" تكون المبالغة في التجاهل احيانًا، مجاهرة بالإنتباه "

‏كثرة الضغوط تولد لك زيادة القدرة على التعامل معها وذا الشيء لاحظته من بداية الاسبوع الرابع بالجامعة الى الآن، كل اسبوع لازم يكون فيه اختبار والاختبارات والمواد بشكل عام مو سهلة ابدا. ‏وعلى العموم، الجامعة تطور من شخصيتك بهذا الجانب وتخليك تعرف تواجه وتتعامل مع الضغوطات بحياتك بشكل عام وأيضًا تخليك ترتب اولوياتك حتى لو كان على حساب متعتك وراحتك، ‏هذا الشيء اشوف محروم منه اللي اكتفى بالتعليم الذاتي او دخل دورات ومهاهد بسيطة، ما بيكون متعود على ان تجيه ضغوطات.
‏ولما نجي نقارن عمرنا والضغوطات اللي بعصرنا الحالي مثلًا مقارنةً بالعصور القديمة، نلاحظ ان الحياة صارت اصعب والضغوطات صارت اكثر.
قديمًا كان بمجرد ما ينضج الشخص يكون عنده وسائل مقصورة يكسب منها من تجارة او زراعة او رعي، وكانت تكفيه جدًا ‏اما الآن صار كل شيء معقد، التجارة صارت اصعب اذا بتبدا مشروع جديد.. الزراعة والرعي وكل هذي الامور البسيطة ما تكفيك، تحتاج شيء اقوى وأعقد عشان تعيش حياة منتظمة. الله يسهل

‏﴿إن الله وملائكته يصلون على النبي يا أيها الذين آمنو صلو عليه وسلموا تسليما﴾

‏" تكون المبالغة في التجاهل احيانًا، مجاهرة بالإنتباه "

‏مراجعة الشخص لنفسه والانعزال شوي عن الحياة وهمومها هي شيء ضروري يحتاجه الانسان عشان يجدد الطاقة ويخليها ترجع من جديد، يسوي تصفية لجميع الاشياء ويحدد منها ايش الشيء اللي يبي يكون موجود في حياته والشيء اللي لازم يبعد عنه ويتركه. ‏فيه علاقة طردية بين الهموم وطول فترة اللي يحتاجها الشخص للانعزال، فكلما كانت الهموم اكثر او اكبر كلما صار يحتاج الشخص فترة اطول انه يبقى بعيد عن الناس ويكون بينه وبين نفسه. ‏الانعزال عن الناس هو وقت خاص فيك يعطي فرصة انه يخليك تكتشف جوانب فيك ما كنت تعرفها، ويساعد بتحسين نفسيتك وتغييرها ويساعد بتقليل الضغط واتخاذ قرارات صحيحة، فمتى ما كنت تبي تاخذ وقت راحة تبعد فيه شوي عن الناس لا تحرم نفسك منه

‏﴿إن الله وملائكته يصلون على النبي يا أيها الذين آمنوا صلوا عليه وسلموا تسليما﴾

‏" لا تحاول مع من لا يحاول "

‏اشوف اكبر شيء انضحك على الناس فيه هي قصص بعض الناجحين وكيف كانوا وايش صاروا ووش فرقك عنهم، يعطونك جزء من الحقيقة واللي هو مثلا انه كان فقير ويخفون لك الجانب الثاني من الحقيقة اللي يكملها واللي هو مثلا ان عمه الغني مات وورث فلوسه. ‏قراءة قصص الناجحين بهدف ان تنجح بمثل الطريقة اللي نجحوا فيها، فهذا يعطيك أمل ضئيل جدًا بشيء صعب جدا تحقيقه، وأسوء عذاب لأي شخص ان تعطيه أمل بشيء يكافح عشانه وينتظره يحصل ذا الشيء مثل ما حصل لناجح ثاني غيره ويتقدم بالعمر وهو على ذا الحال ‏ويكتشف الواقع بعد سلسلة من الجهد ان ما تحقق اي شيء من الاشياء اللي تعب عشان يحصلها والسبب بكل بساطة ان ما جته " الفرصة " او " الحظ " اللي جا للناجح الثاني عشان يحقق اللي حققه. ‏احيانًا تجيك فرص قد تكون تغير مجرى حياتك بالكامل من دورات، وظايف، تدريب، الخ.. لكن تركيزك على فرصة وحيدة لناجح معين هو اللي بيضيعك وكأنك حاط مستقبلك على احتمال واحد من مليار، اذا ما تحقق هذا الاحتمال.. انتهت كل فرص نجاحك.
ذا الشيء خصوصا اذا تقدمت بالعمر اكثر ( لا يمكن تعويضه ). ‏ما اقول ان قراءة قصص الناجحين مو مفيدة كليًا، بالعكس أحيانًا تعطيك الاخطاء اللي وقعوا فيها اللي قبلك وتستفيد منها، لكن الشيء الخاطئ كليًا هو ان تكون طريقة نجاحك بنفس الطريقة لناجح ثاني لان النتائج بنسبة 99% بتكون عكسية تمامًا وبتصير انسان فاشل بكل ما تعنيه الكلمة من معنى

‏﴿إن الله وملائكته يصلون على النبي يا أيها الذين آمنوا صلوا عليه وسلموا تسليما﴾

‏" الأمور المتروكة لله مضمونة "

‏بعض الصفات الشخصية تكون موجودة بشكل دائم مع الشخص مهما حاول يكتشف طرق وحلول لتغييرها ما تتغير ابد وقد تكون بسبب عوامل وراثية او اشياء تعرض لها وهو صغير واحيانًا حتى تكون الصفات الموجودة ذي - بدون سبب واضح -. ‏فيه قاعدة مهمة انه اذا كان من المستحيل انك تقدر تغير شيء او تبدله مهما كان هذا الشيء ( ظروف، مصاعب، او صفات شخصية..الخ ) فالطريقة الوحيدة الامثل للتعامل معها انك تتقبل وجودها في حياتك حتى لو كانت سيئة لان شعورك بانك ما تتقبلها وبنفس الوقت ما تقدر تغيرها بيكون شعور اسوء.

‏بكل الحالتين هي فيك فيك.
فمثلًا وانا اطلب من مطعم شفت شخص ( الله يعافيه ويعافينا ) عنده اربع اصابع، بالرغم من هذا كان هو الكاشير لعدة سنوات بهذا المطعم وهو اللي يستلم الطلبات من كل شخص، بمعنى انه يوميًا يقابل مئات الاشخاص ومع ذلك ما تحسس وخذ وظيفة يبعد فيها عن رؤية الناس له. ‏وهذا يبين الثقة العالية والتقبل الكبير اللي عند الشخص ذا، احيانا عدم تقبلك لصفة معينة فيك وتحسسك منها يخليك تخسر كثير، فلو كان الشخص هذا مو متقبل هذا الشيء ما كان توظف وممكن ما لقى مكان يتوظف فيه وممكن كان اصبح عالة على اهله وما بيعتمد على نفسه، في غالب الاحيان تقبلك لصفاتك ضروري.

‏في آخر نقطة بتكلم عنها بذا الثريد اللي هي ان احيانا تعطي لنفسك حلول وما تنفع ومباشرة تصدر الحكم ان هذي الصفة ما تقدر تغيرها وهذا غلط،
احيانا تكون حلولك غلط او شفتها من مصادر مو موثوقة او تطبيقك لها غلط او اشياء كثير قد تجعل الحل يفشل مو لان الصفة دائمة فيك.. لان ما قدرت تجيب الحل، ‏قبل ما تصدر الحكم اللي اذا كان مصيري ممكن يغير حياتك كلها، اختبره زين.. قارن مشكلتك مثلًا مع شخص ما عنده ذي المشكلة وحاول تشوف الفوارق بينكم، لا تشوف مصدر واحد لحل مشكلتك احيانًا يكون الحل بمصادر ثانية والنت مليان، التدقيق بمثل هذي الامور ضروري جدًا.

‏﴿إن الله وملائكته يصلون على النبي يا أيها الذين آمنوا صلوا عليه وسلموا تسليما﴾

قال ابن مسعود رضي الله عنه: «لا تدع إذا كان يوم الجمعة أن تصلِّي على النَّبيّ ﷺ ألف مرّة»

‏بما اني حبيت وتعلمت الشطرنج وصرت اعتبرها جزء من وقتي بكتب ايش فادتني فيه ذي اللعبة من اشياء غيرت حتى من الواقع، وذي اول لعبة واتوقعها اللعبة الوحيدة اللي تاثر بواقعك وتعطيك اشياء تفرق معك فعليًا. ‏بس قبل كل شيء، اللي يميز الشطرنج عن باقي الالعاب ان نسبة الحظ فيها معدومة وهذا اكثر شيء معجبني فيها يعني انت وخصمك كلكم عندكم نفس الفرص، اللي يفرق باللعبة هو الذكاء والمهارة وتقدر تطورهم مع تقدم مستوياتك باللعبة. ‏مع تقدمي بالمستوى في لعب الشطرنج بديت تدريجيًا الاحظ بفروقات منها انها حسنت البديهية عندي، حسنت التخطيط والتوقعات، حسنت اكتشافي للمشاكل وحلها، ساعدت بشكل كبير في زيادة التفكير عندي ‏وغيرها، وبعض الآثار تبقى معك على المدى الطويل ومنها ان اللعبة تقلل بشكل كبير جدًا من احتمالية تعرضك لمرض الزهايمر - لا قدر الله - وفيه ابحاث كثير أكدت ذا الشيء.
غير ان اللعبة ممتعة جدًا اصلا لو فهمتها زين.. ممكن احيانا ببعض الاوقات تاخذ جزء كبير من وقتك لكن وقتها ممكن تصدع 😂

‏عمومًا لا تخسر الفرصة، اذا ما عندك رقعة شطرنج بالبيت فيه مواقع كثير للعبة تقدر تلعب مع الناس او مع اشخاص تعرفهم، انا عن نفسي احب العب بموقع https://t.co/njbEmFsKUf‎ ( لهم تطبيق بعد )

‏﴿إن الله وملائكته يصلون على النبي يا أيها الذين آمنوا صلوا عليه وسلموا تسليما﴾

" الخصوصية قوة، فالناس لا يستطيعون تدمير ما لا يعرفون، ‏أنت سيد ما تخفيه وأسير ما تفشيه "

‏-مصطفى محمود

‏اكثر شيء يفسد متعة اللحظة لما تجيك فكرة انك في هذا الوضع ( لازم ) تستمتع وان ما حصل ذا الشيء فهذا غلط فيك، وعشان اوضح الفكرة اكثر هل جربت في مرة من المرات تتابع فلم مثلًا وقال لك شخص ان عند لحظة معينة حدد لك اياها انها راح تكون شيء عظيم جدا وبتستمتع فيه. ‏لما تجي اللحظة ذي في الوقت ذا انت تختبر صحة كلامه اذا كنت بتستمتع فيها او لا، ولكنك اثناء تفكيرك بتفسد -جزء- من متعة اللحظة، وفي ذا الوقت انت بتحس ان فيك شيء غلط وما استمتعت فيها بالشيء المتوقع فتتضطر تتصنع، ‏وبكذا جاك شعور سيء من ناحيتين، الاولى انك تصنعت شيء مو فيك والثانية انك بتحس ان فيك شيء غلط كاكئتاب ومن ذي الامور، ولكن في الواقع الموضوع ابسط من كذا. والسبب يعتمد غالبًا على اللي قلته واللي هو انك اجبرت نفسك ان تستمتع باللقطة استمتاع كامل.

‏بعيدًا عن مثال الفلم، اي شيء في الحياة تكون ملزم على نفسك انك لازم تستمتع فيه فانت كذا راح تفسده، والحل بكل سهولة لا تلزم على نفسك تاخذ المتعة من شيء وباختصار شديد (خليك على طبيعتك)

‏" يبدأ المرء بتنازل بسيط، ثم تتحول حياته كلها إلى استسلام "

‏ذي الفترة مهتم اشوف مناظرات بين جميع الاديان وموضوع الالحاد، واكتشفت انها تعطيك فائدة من ناحيتين اولها وأهمها انها تثبت عقيدتك فلما تشوف مناظرة بين مسيحي ومسلم مثلًا او مسلم وملحد، بتشوف المعتقدات اللي يؤمن فيها هذول الاشخاص وليه هي خطأ وايش الاسئلة اللي عجزوا الاجابة عنها ‏هذي تعطيك ركائز اساسية تبني عليها معتقداتك مو بس شيء تلقيته وتربيت عليه وخلاص، وبكل المناظرات اللي شفتها - حتى الآن - ما شفت الشيخ ما يعرف يرد على سؤال المناظر له بالطريقة المطلوبة وذا يدل على الحق، ايضًا تعلمت كثير عن المسيحية ايش معتقداتهم وطريقة الرد عليهم وذي الامور. ‏الفائدة الثانية انها طورت فيني اسلوب الاقناع، ومن اهم اساليب الاقناع اللي شفتها بالمناظرات هو اسلوب - الاثبات بالتناقض - واللي درسناه ولكن بطريقة مختلفة بالجامعة، الاسلوب ذا هو بالبداية تخلي المناظر لك يعترف بلسانه بصحة شيء معين وهذي خطوة مهمة جدا عشان لا ينكر هذا الشيء بعدين ‏بعدها تبدا معه بموضوع ثاني يوصلك ان تخليه يعترف بنفسه ان فيه تناقض بين العبارتين اللي قالهم وبكذا تخليه يفكر بالقناعات اللي نشأ عليها من الصغر ويراجع نفسه اذا صحيحة او لا.

وعالعموم متابعتك للمناظرات غالبا بيكون ممتع اصلا، فبتستفيد من نواحي كثير، جميل تستغل الفرصة دامها متوفرة لك

جاء في سنن الترمذي عن النبي ﷺ انه قال " أفضل العبادة انتظار الفرج "

‏مهما احسن لك شخص وسوا لك اشياء عظيمة بحياتك غلط انك تزيد في مدحه وتحسسه انك ولا شيء بدونه بالأخص اذا كان قريب من عمرك ‏فبشكل تلقائي مع كثرة المدح بيحس ان له فضل كبير عليك وانه منقذك وبيقل تقديره لك حتى لو كان ما يحب يجيه ذا الشعور بس صعب جدا يتفاداه، بمرور الوقت بتفقد هيبتك قدامه وممكن حتى يتجرأ عليك. ‏ما بنكتسب خبرات ونستفيد من اخطاء الناس بدون علاقات، لازم تسأل وتبحث لكن مب لشخص واحد مهما كانت قوة وعلم الشخص ذا كثرة اسئلتك له في الغالب بتؤدي لزيادة شكرك له وزي ما قلت كثرة الشكر بيقلل من قدرك، وهذي وحدة من افضل ايجابيات كثرة العلاقات، ما تحشر كل شيء تبي تعرفه في شخص واحد.

‏واذا ما قدرت ترد المعروف بمعروف وما قدرت تفيد الشخص مثل ما يفيدك، فاقصى شي تسويه تشكره وتدعي له، لا تعظيم ولا جحود