‏أحد الأساسيات اللي ما نستغني عنها هو النوم واللي ثلث وقت حياتنا تقريبًا يروح عليه، ما راح اتكلم عن النوم بشكل عام، لكن اللي حسيته اكثر أهمية اني اوضح اللي يصير بالمخ في النوم.
‏للنوم - وانا اتكلم هنا عن النوم العميق - دور كبير في صحة المخ والعمليات اللي تصير فيه مثل التذكر والاستيعاب واتخاذ القرارات، لما تنام يكون المخ قاعد يرتب المعلومات عشان يصير استردادها افضل بكثير بالمستقبل. ‏واتكلم عن تجربة شخصية بديت اسويها يوم كنت بالثانوي وهي وحدة من الاشياء اللي بتساعدك تاخذ افضل الدرجات، اذا كان عندي اختبار بكرا قبل ما انام اراجع كل اللي ذاكرته مراجعة سريعة حتى لو اني مذاكره زين وبعدها انام واحرص على ان تكون المدة كافية 7-8 ساعات و‏السبب ان المخ يحاول يعالج كل المعلومات اللي حصلت خلال اليوم وكل ما كانت المعلومات أقرب لوقت نومك كلما كانت المعلومات هذي بتكون راسخة اكثر، ولذلك اول ما تقوم من النوم بس تسوي مراجعة سريعة جدا بتلاحظ كيف ان المعلومات اللي ذاكرتها كلها مرتبة ومنظمة تنظيم كبير وتتذكرها بسرعة بعد!، ‏وفوق ذا النوم يساعد على انك تفهم الشيء اللي ما فهمته اثناء لما كنت تذاكر، لان اللي يصير في النوم ان المخ يحاول يرتب كل المعلومات ويستوعبها، اول ما تقوم من النوم وتحاول تفهم المسألة اللي ما فهمتها، غالبا راح تقدر تفهمها وتفهم بالضبط ايش هو سبب المشكلة اللي منعك من الفهم. ‏كثير من الناس طول اليوم يلعبون واذا جا الوقت اللي ينامون فيه يستبدلون ذا الوقت بالسهر للمذاكرة، وبالتالي يفقدون كل مميزات النوم ذي والاسوء ان يكون استيعابهم للمعلومات الجديدة اقل بنسبة 40%، وكثير من المعلومات اللي يكون مذاكرينها نسوها لان المخ ما رتبها ونظمها زي لما يكون بالنوم. ‏اذا كنت مذاكر وفيه باقي اشياء ما ذاكرتها فنصيحة ان الافضل انك تنام واذا قمت تذاكر الباقي لان النوم بيكون مفيد جدا لك بداية من روقانك وطول بالك في الاختبار وحتى في ترتيب المعلومات واستيعابها بشكل افضل بكثير
حاول ما تفقد مميزات النوم وبالاخص لما يكون النوم حق ليلة الاختبار. ‏بما اني كنت اتكلم غالبا عن تجربة شخصية ما اخذت الا من مصدر واحد بس، واللي بيقرأ منه بياخذ معلومات اقوى وافضل بكثير من اللي موجودة بالثريد، لكني فضّلت اقول تجربتي ويمكن بعدين اسوي ثريد مفصل عن الاشياء اللي بالضبط تصير في الدماغ اثناء النوم
https://t.co/FtfNZOgYO1‎

‏﴿إن الله وملائكته يصلون على النبي يا أيها الذين آمنو صلو عليه وسلموا تسليما﴾

‏" اعلم أنك إذا انزلت نفسك دون المنزلة التي تستحقها، لم يرفعك الناس إليها "

‏المازني

‏بعد توصية من احد الاشخاص الجميلين، قرأت كتاب ( الرجال من المريخ، النساء من الزهرة )، واللي يتكلم عن الاختلافات بين الجنسين " الذكور والاناث " وتفكير كل واحد منهم.
‏في البداية، الكتاب كان يتكلم عن وجود اختلاف بين الرجل والمرأة من ناحية الخصائص والصفات، ونتيجة لهذا الاختلاف تحصل الخلافات بين الجنسين وما نكون فاهمين بعض وايش اللي نحتاج له بالضبط. ‏من ضمن هذي الاختلافات هي ان الرجل في العادة يركز في امور مثل القوة، المقدرة، الكفاءة بينما المرأة تركز عادةً في التعاون، الحب، التواصل، العلاقات. ‏احيانًا يحتاج الرجل انه ينعزل عن الناس ويفكر بكل اموره ومشاكله بنفسه، ما يقول مشكلاته لاحد الا اذا كان يحتاج نصيحة. بينما المرأة تحتاج انها تكون مقدرة ومفهومة من اللي تتكلم معه - احيانا لما تتكلم ما تحتاج حل تحتاج بس شخص يسمعها - وبكذا هي تحس بالراحة. ‏اي شيء يمس المقدرة او الكفاءة او الثقة عند الرجل يكون شيء محبط جدا بالنسبة له. مثل لما المرأة تحاول تحل كل مشاكله وتتدخل في شؤونه وتشكك في قدرته على التعامل معها بنفسه. ‏في المقابل، اي شيء يمس الاهتمام او التفهم او المشاعر عند المرأة يكون شيء محبط بالنسبة لها. مثل لما الرجل يكون غير مهتم ولا مبالي للمرأة اذا تكلمت عن مشاعرها واللي تحس فيه. ‏لما الرجل يقول مشكلاته فهو بالعادة يحتاج الى حلول بينما المرأة لما تقول مشكلاتها فهي بالعادة تحتاج لمستمع يتفهمها ويفهم الظروف اللي تمر فيها اكثر من ايجاد الحل، وأي تقليل لمشاكل المرأة او مشاعرها مع الوقت يؤثر عليها سلبيًا بشكل قوي نفسه نفس لما يكون التقليل بقدرة الرجل والثقة فيه.


‏رأيي عن الكتاب؟ جميل جدًا وممتع لما تعرف الفوارق هذي واللي تعرفك احيانا عن نفسك والاسباب اللي تخليك تسوي تصرفات معينة. ولكني اشوفه مناسب اكثر للمقبلين على الزواج لانه بيفيدهم جدًا بمعرفة خصائص شريكهم وايش الطريقة اللي يتعاملون معه فيها، ‏اللي كتبته هو جزء قليل جدا من حول 400 صفحة، ولا يعتبر مختصر الكتاب لان الكتاب يقدم لك كل شيء بالتفصيل وايش الصفات الموجودة في كل جنس وايش هي المشكلات الشائعة اللي تحصل نتيجة للاختلاف بين الجنسين وطريقة تفكيرهم وغير هذا...

" المعاملة بالمثل أمر صعب جدًا، فالأصل غلاب مهما حدث "

‏بعض الاشخاص يهتم مرة بالشهادات وتطوير السيرة الذاتية حقته عشان تزيد فرص قبوله بالوظيفة، وهي اكيد ضرورية لكن فيه نقطة مهمة.
‏لما تدخل دورات ما تدخل عشان بس تاخذ شهادة والمحتوى ما تعرفه وما تفهمه، بالبداية تاكد اصلا اذا الشهادة معتمدة وبعد هذا تأكد انك اخذت الشيء المطلوب منك بالدورة، يعني ممكن بعض الناس يقولون انا سجلت واخذت شهادة خلاص مو لازم اعرف وش تتكلم عنه، اللي يكفيني ان الشهادة موجودة عندي وموثقة، ‏بس لازم تهتم بالمحتوى كثير، لان صاحب العمل اولًا راح يسألك عليه واذا ما جاوبت بتكون في موقف محرج، واذا صدفت معك وما سألك عن الشهادة، ف..راح يعاملك صاحب العمل على انك تعرف المهمة اللي بيعطيك اياها بحكم شهادتك اللي ما فهمت فيها شيء، ووقتها تكون في موقف محرج اكثر واكثر و‏عشان كذا اذا بتكتب شهادة بالسيرة الذاتية خليك متاكد انك تفهمها زين مو بس بالوقت اللي استلمت فيه الشهادة، حتى بعدين يعني رسخ المعلومات بذهنك وكلما كانت معتمدة ( محليًا والافضل عالميًا ) والخبرات اللي اخذتها منها اكثر، كلما كانت افضل

‏المختصر:
الشهادة هي وثيقة تثبت انك حضرت او درست لكن اللي فهمته منها يعتمد عليك، لا تخلي نفسك بموقف محرج وانت تدور اي شهادة وتحطها بسيرتك الذاتية واذا جا وقت الشغل ما عرفتها. الشهادة مهمة لكن فهمك أهم

" كل الكلمات معرَّضة لسوء الفهم حتى الصمت، قد يساء فهمه أحيانًا "

‏كان فيه سؤال دايم يحيرني عن ليه الحركات الغربية الفاسدة تكون مؤثرة عادةً ونشوف الدول والشركات والممثلين يعلنون تضامنهم معهم بالرغم من وضوح سوء افكارهم. وبعد مدة طويلة عرفت وأخيرًا سبب كل ذي الفوضى.

‏بالبداية، لما تقول ان الشركات والممثلين حتى الدوريات العالمية مثل الدوري الانجليزي واللي سمحوا بوضع علم الشواذ على ملاعبهم انهم لما يعلنون تضامنهم مع هذي الحركات الغربية بدافع حقوق الانسان والحريات فانت مخطئ تمامًا لأن الموضوع اكبر من هذا بكثير جدًا، ‏لما تؤسس حركة وتدخل كم كبير من الاشخاص فيها فأنت كذا حققت لهذي الحركة تأثير كبير. كل شخص بهذي الحركة راح يظل يدافع عن هذي الفكرة اللي غرستها فيه لانها تعتبر جزء من نفسه وهويته
و‏كمثال بسيط، تخيل انك نشأت على فكرة معينة منذ الصغر وقعدت تنميها وكبرت معك، لما تشوف اشخاص يعادونك ويشوفونها خطأ هل راح توقف عنها بكل بساطة؟ على العكس تمامًا، راح تظل تدافع عنها لانها تعتبر من هويتك.. اذا غلطوا عليها فهم يغلطون عليك.

‏عرفنا الآن ليه الاشخاص اللي بالحركات هذي دايمًا مصرين على افكارهم وصعب يتخلون عنها لكن ليه الدول والشركات العالمية والدوريات حتى البرامج ومواقع التواصل كلهم يعلنون تضامنهم معهم؟

‏صار للحركات هذي تأثير كبير بعد ضم عدد هائل جدًا من الاشخاص، متحدين مع بعض وأي شيء يكون ضدهم وضد افكارهم يقلبون عليه. أصبحت الآن الدول والشركات والاشخاص ملزومين بالاعتراف بهم ولا بيخسرون خسائر هائلة وبينعدم نظامهم واقتصادهم. ‏مثال عندك دولة مثل الهند كثير منها شواذ، حسب ما قرأت انها تخسر سنويًا ما يقارب 12 مليار دولار بسبب عدم اعترافهم القانوني بالعلاقات المثلية وهذي خسارة كبيرة لو اعترفت بهم راح يرتفع اقتصادها بشكل كبير جدًا، وعشان كذا ما نستبعد يسوونها مستقبلًا.
‏المعنى من كل كلامي، لما يطلع رئيس تنفيذي لشركة او ممثل او رئيس دولة او شخص له تأثير كبير ويعلن تضامنه مع أي حركة من ذي الحركات، ففي الغالب ما يعلنها عشان " حقوق الانسان على كلامهم "، يعلنها عشان " الفلوس " ويجيب ايرادات ضخمة ونجاحات كبيرة تتحقق باعتراف واحد بسيط منك.

‏العالم حاليًا في توجه على التطبيع مع ذي الحركات والاعتراف فيها. راح تجد كثير من الناس يطبعون لها حتى لو كانوا اشد المعادين لها والسبب ان كلما تشوف شيء كثير مهما كان سوء ذا الشيء، كلما راح يكون طبيعي وعادي بالنسبة لك ( طبيعة انسانية ) ‏وعلى فكرة ترا فيه عدد كبير من اللي بالغرب يرفضون تمامًا ذي الافكار ويمكن شفتوا لهم فيديوات، لكن ما بيدهم حيلة يسوون شيء فبما انه اصبح قانوني ما راح يكون فيه دافع للشخص انه يخاطر ويعادي ذي الافكار وقد يُسجن وبالاخير ما راح يكون للي يسويه فايدة.

‏" اكثر الناس نقصًا اكثرهم ذكرًا لنقص الآخرين "

‏خطأ فادح ان تعطي مكافأة لشخص واجب عليه يسوي الشيء اللي سواه، لانك كذا بتعطيه شعور انك ممتن له وانه سوا شيء تطوعي من عنده، وذي تحصل اكثر مع الاطفال. ‏يعني مثلًا تخيل لو اب وعد ابنه بمكافأة في حال ساعده، ممكن تكون نية الاب زينة ان يشجعه لكنه كذا بيعطي شعور لابنه ان اذا ما حصل مكافأة اللي بنظره يستحقها ما راح يساعده، واذا ساعده وما اعطاه مكافأة فهو بيتولد عنده شعور انه انحرم من حقه، ‏ذا الشيء يحصل بالعادة بشكل تدريجي لكنه خطير ان ينقلب الواجب الى تطوع وفضل ومنة من الشخص، التشجيع جميل ويعطي صبر وتحمل للشخص خصوصا اذا كان معه مكافأة لكن ابعد تمام البعد عن لما يكون التشجيع والمكافأة على شيء واجب عليه بكل الاحوال ان يسويه.

‏" واعلم أن التوفيق أن تلهم الدعاء كما تلهم المطعم والهواء. لن تجد شيء يحنو على قلبك مثل رفع يديك ورؤية السماء، كيف لا وربك يستحي أن يراك متذللًا له ولايجيب دعاءك؟ "

‏الحرية هي مفهوم لامكانية الشخص انه يسوي الشيء اللي يبيه بدون اي شرط او ضغط خارجي من احد لكن وش يصير لو شخص كان حر تمامًا باللي يسويه؟ ‏بالبداية بوضح ان الحيوان ( اللي ما عنده عقل يعني ) حر تمامًا باللي يسويه وهو اللي غالبًا ما يتعدا 3 اشياء رئيسية واللي هي:
1-حرية القتل ( الحيوان يقدر يقتل حيوان آخر مثلًا بدون عواقب من احد )
2-حرية الاكل والشرب
3- حرية اشباع رغباته وغرائزه
‏هذي الصفة موجودة بشكل خاص للحيوانات لكن وش يصير لما الانسان يكون حر بكل باللي يسويه؟ طبعًا ما راح يكون فيه نظام وبالتالي القتل والسرقة والنهب كلها واكثر راح تكون موجودة فبإختصار راح يكون فساد.
‏وهنا دور القوانين والتشريعات اللي هي الاساس لكن وش يتجه له العالم حاليًا؟ حسب اللي نشوفه فهو يتجه الى انه شيء فشيء يبدأون يسهلون القوانين ويحاولون قدر الامكان يعطون للشخص اكبر حرية في حياته.

‌‏طيب ايش العلاقة بين الحرية واشباع الرغبات؟ الجواب ممكن ما يكون متوقع لان مهما كنت حر باللي تسويه وعندك كل شيء الا انك لا تزال ما تقدر تشبع كل رغباتك وكل شيء تبيه بالتحديد، يعني الانسان بطبيعته ما عنده حد معين لرغباته اذا كان موجود عندك شيء دايم تحاول تجيب اللي احسن منه.

مجملًا، للانسان اللي يعقل فهو حر باللي يسويه لكن بنفس الوقت تعتبر حرية مقيدة ( بحدود معينة ) على اساس هذي الحرية تكون حياة متوازنة وعادلة لك وللجميع

‏قبل مدة بسيطة قريت عن مقال كان يتكلم عن احتمالية تأثير العواصف الشمسية على الكهرباء والانترنت

‏العواصف الشمسية الرئيسية في التاريخ الحديث اللي مسجلة عندنا هي 3 عواصف بالاعوام ( 1921,1859,1989 ) نتج في وحدة منها عن قطع الكهرباء لمدة 9 ساعات في كندا مع العلم ان وقتها كانت الشبكات الكهربائية اقل مستوى من اللي عندنا الحين ‏بس اللي ما عندنا بيانات كافية عنه اللي هو الانترنت، هل بيتأثر اذا حدثت عاصفة شمسية ثانية؟ لان بالاعوام اللي حدثت فيها العواصف الشمسية ما كان فيه انترنت وقتها فما يقدرون العلماء يحددون اذا اكيد بتتاثر او لا.

‏اللي يحير العلماء فيها ان العواصف الشمسية نادرة لذلك ما فيه معلومات كافية عنها وعشان كذا ما يقدرون يعطون اجابات على ذي الاسئلة، وحسب كلام العلماء ان احتمالية العواصف الشمسية قاعدة تزيد مع الوقت لان مرت فترة طويلة من 1989 ما جتنا فيها اي عاصفة شمسية.

‏لكن حسب دراسة اذا حدثت عاصفة شمسية ونتج منها تأثير عالانترنت فبيكون بالغالب قليل جدًا او غير موجود محليًا يعني الشخص اللي قريب منك احتمالية ان ما تفقد الاتصال به هو كبيرة جدًا ( لكن تظل فيه احتمالية )، ‏بس التأثير الاكبر هو بتلف اسلاك الانترنت اللي تربط بين القارات وفي المحيطات واللي توصلنا باشخاص بعيدين جدًا هذي اللي ممكن تتأثر بشكل كبير. يعني اذا حدثت العاصفة الشمسية ممكن نفقد الاتصال بهم لاسابيع او شهور حتى لان ما فيه بروتوكولات تتعامل مع ذي الحالات

‏نظرة على اسلاك الانترنت اللي تربط القارات ببعضها:

‏هل فيه احد مستعد انه يعيش بدون انترنت؟ اعتقد ذا الشيء صعب بذا الوقت لان صار للانترنت جزء كبير من حياتنا وتسهيلاتها لكن عالعموم لا تستبعد ذا الشيء.

‏المصادر:
https://t.co/amEZzjp6XF‎
https://t.co/AmmkbKs6pW‎
https://t.co/8HFGzxyWkH‎

" إذا أقبلت الدنيا عليك فأعط، لإنها لا تفنى وإذا أدبرت فأعطِ، لإنها لا تبقى "

- جعفر البرمكي

‏ما ادري اذا اقدر اقول عنها قاعدة بس اللي اشوفه باغلب العلاقات ان راي الناس عن علاقة معينة تتحدد بشكل كبير حسب آخر المواقف، ان كانت زينة يكون رايهم زين واذا سيئة حتى لو قبلها بمدة كان العكس ينسون او يتناسون الأفضال السابقة ويكون التركيز اكثر بكثير على آخر المواقف. ‏لكن هذا اللي يثبت ان وجهة نظر اي شخص عنك صعب جدا انها تكون ثابتة.

يمكن الحالة الوحيدة اللي تخلي وجهة نظر الناس عن شخص معين ثابتة هي لما يموت، بشكل عام اذا مات احد حتى لو حصلت مواقف سيئة له مع بعض الناس، نادر تلقى احد يحاول يفكر فيها بعكس لو كان حي.
‏فرأيك لأي شخص دايم يتعدل، صعب تلقى احد يذكر ماضيك ويحاول يوزن رايه عنك مع افعالك بالحاضر لانه ما بيستفيد من انه يعدد افضالك عليه بالماضي اذا كان حاضرك العكس، لذلك اذا فيه شخص باقي معك فهو باقي معك عشان شخصيتك الحين مو الشخصية الماضية - اذا تغيرت -

‏﴿إن الله وملائكته يصلون على النبي يا أيها الذين آمنو صلو عليه وسلموا تسليما﴾

" تكون المبالغة في التجاهل احيانًا، مجاهرة بالإنتباه "