▪️ مانگرتن لە خواردنی زیندانییانی سیاسی لە زیندانیی سنە بۆ پشتیوانی لە مانگرتنی گشتی کوردستان

بەپێی هەواڵێک کە بەدەست کۆڵبەرنیوز گەیشتووە، کۆمەڵێک لە زیندانییانی سیاسی لە بەندی سیاسی زیندانیی سنە لە ناڕەزایەتی و پشتیوانی بۆ مانگرتنی گشتی سەرتاسەری لە کوردستان، دەستیان بە مانگرتن لە خواردن گرتووە.

ئەم زیندانییە سیاسییانە لە پەیامێکدا کە لە ناوەوەی زیندان بۆ دەرەوەیان ناردووە، وێڕای دەربڕینی پشتیوانی لە مانگرتنی گشتی، بە توندی کوشتنی هاووڵاتیانی بێ بەرگری لە ناوچەکانی مەلەکشاهی، کرماشان و ئیلامیان بە تووندی ئیدانە کردووە. بەپێی سەرچاوە ئاگادارەکان، ئەم ناڕەزایەتییە لە کاردانەوەی چڕبوونەوەی سەرکوت و دۆخی قەیراناوی کۆمەڵایەتی و ئابووریی ئەنجامدراوە.

ناوی ئەو زیندانیە سیاسیانەی کە لەم مانگرتن لە خواردنەدا بەشداریان کردووە، بریتین لە: ڕەفیق سەلیمی، مەحمود سادقی، ئیدریس منبەری، نادر بەهمەنی، یوسف ئەحمەدی، فەریاد قادری و فەردین مەولودی.

ئەم زیندانیانە لە پەیامەکەیاندا جەختیان لەوە کردووەتەوە کە ناڕەزایەتییە جەماوەرییەکان بەرامبەر بە هەژاری، هەڵاوسان، گرانی، بێکاری و بێ توانایی بەربڵاو لە دابینکردنی بژێوی ژیانیان، ناڕەزایەتی ڕەوا و ڕیشەدارە و ڕایانگەیاندووە کە خۆیان بە بەشێک لەو خەباتە کۆمەڵایەتییە دەزانن. هەروەها جەختیان لەسەر پێویستی هاودەنگی نێوان زیندانیانی سیاسی و بزووتنەوە ناڕەزایەتییەکانی کۆمەڵگا کردووەتەوە.