Mahalla yettilik a’zolari uchun umumiy vazifalar

Mahallada tadbirkorlar sonini ko‘paytirish va mavjud bizneslarni qo‘llab-quvvatlash eng muhim vazifalardan biridir. Har bir yosh va har bir oilaga yangi imkoniyat yaratish, ayollarni hunarmandchilik, tikuvchilik, pazandalik hamda boshqa kasblarga jalb etib, ularning oilaviy tadbirkorlikda faol bo‘lishiga sharoit yaratish zarur. Shu bilan birga, ishsizlarni kasb-hunarga o‘qitish va ularni doimiy ish bilan ta’minlashga amaliy ko‘mak berish ham dolzarb masalalardan sanaladi.

Har bir xonadonga kirib, yolg‘iz keksalar, imkoniyati cheklanganlar va bemorlarning muammolarini o‘rganish, ularning muammolarini joyida yechishga intilish ham yettilik zimmasidagi mas’uliyatdir. Ajrimlarning oldini olish, yarashtirish va tushuntirish ishlari orqali oilaviy totuvlikni ta’minlash mahalla obro‘sini oshiradi. Yoshlarni bo‘sh vaqtini mazmunli o‘tkazishga yo‘naltirish, ularni sport, madaniyat va ijodiy to‘garaklarga jalb qilish esa mahallaning kelajagi uchun katta ahamiyat kasb etadi.

Bundan tashqari, mahalladagi muammolarni o‘z vaqtida ko‘tarib chiqish, tegishli tashkilotlar bilan hamkorlikda hal etish, aholining davlat organlari va idoralarga yo‘llagan murojaatlarini kuzatib borish va ularning ijrosini ta’minlashda faol yordam berish talab etiladi. Eng asosiysi, mahallani obodonlashtirish, tozalik va tartib-intizomni mustahkamlash, xavfsizlikni ta’minlash borasida doimiy e’tibor qaratish har bir yettilik a’zosining umumiy vazifasidir.