❕Barcha ishga joylashish istagidagi yoshlar, ayollar, bitiruvchilar, probatsiyadagi va JIEMdan qaytgan fuqarolar, shuningdek, kasb-hunar o‘rganish istagida bo‘lganlar uchun keng imkoniyatlar yaratiladi.

Ayniqsa, voyaga yetmaganlar va yoshlar orasida giyohvandlik bilan bog‘liq holatlarning yuzaga kelishi jamiyatimiz uchun katta tashvish uyg‘otadi.

Yoshlar — mamlakatimiz kelajagi. Shu sababli ularni turli salbiy illatlardan asrash barchamizning ustuvor vazifamizdir.

Shu o‘rinda ta’kidlash lozimki, giyohvand moddalar bilan bog‘liq jinoyatlar uchun amaldagi qonunchilikda juda qat’iy javobgarlik belgilangan. Jumladan, O‘zbekiston Respublikasi Jinoyat kodeksining:

273-moddasi (giyohvandlik vositalari yoki psixotrop moddalarni qonunga xilof ravishda tayyorlash, olish, saqlash, tashish yoki jo‘natish)ga ko‘ra aybdor shaxslarga 3 yildan 5 yilgacha ozodlikdan mahrum qilish jazosi qo‘llanilishi mumkin. Agar ushbu qilmish og‘irlashtiruvchi holatlarda sodir etilsa, jazo 5 yildan 10 yilgacha ozodlikdan mahrum qilishni tashkil etadi.

Shuningdek, Jinoyat kodeksining 251-moddasiga ko‘ra giyohvandlik vositalari yoki psixotrop moddalarni boshqa shaxslarni iste’mol qilishga jalb etish, ya’ni kimnidir bunday zararli odatga undash, ko‘ndirish yoki shunday muhitga tortish ham og‘ir jinoyat hisoblanadi.

Bunday harakatlar uchun ham qonunchilikda ozodlikdan mahrum qilish bilan bog‘liq qat’iy jazo choralari belgilangan.

Bu esa giyohvandlik bilan bog‘liq har qanday harakatlar qonun oldida og‘ir jinoyat hisoblanishini yana bir bor ko‘rsatadi.

Hurmatli ota-onalar!

Farzand tarbiyasi juda katta mas’uliyat talab etadi. Farzandlaringizning bo‘sh vaqtlarini mazmunli tashkil etish, ularning do‘stlari, qiziqishlari va qanday muhitda yurganiga e’tibor qaratish juda muhim. Yoshlar taqdiriga befarq bo‘lmaslik, ularni turli yot g‘oyalar va zararli odatlardan asrash — har bir ota-onaning muqaddas burchidir.

Shuningdek, barcha fuqarolardan atrofimizda sodir bo‘layotgan shubhali holatlarga befarq bo‘lmaslikni, giyohvandlik bilan bog‘liq holatlar haqida tegishli idoralarga o‘z vaqtida xabar berishni so‘raymiz. Giyohvandlikka qarshi kurashish faqat huquqni muhofaza qiluvchi organlarning emas, balki butun jamiyatning umumiy vazifasidir.

Aziz yurtdoshlar!

Yoshlarimizning sog‘lom va ma’naviy barkamol bo‘lib kamol topishi — mamlakatimiz kelajagining mustahkam poydevoridir. Barchamizni qonunlarga qat’iy rioya qilishga, farzandlarimiz taqdiriga befarq bo‘lmaslikka va jamiyatimizni giyohvandlik kabi illatlardan asrash yo‘lida hamjihat bo‘lib harakat qilishga chaqiraman.

Hurmat bilan,
Nurafshon shahar IIB boshlig‘i A. Yuldashev