សង្គ្រាមយោធា សង្គ្រាមចិត្តសាស្ត្រ និងសង្គ្រាមការទូត តើជាអ្វី? សៀមដូចជាត្រីឆ្អិនដាក់នៅលើតុចាំតែឆី ប៉ុន្តែអ្នកឆីពិបាកនិយាយស្ដាប់គ្នា។ តើហេតុអ្វីទៅ?

មែនទែនទៅនៅក្នុងសង្គ្រាមសៀមឈ្លានពានខ្មែរកំពុងតែបានដើរចូលសេនារីយ៉ូរបស់ថ្នាក់ដឹកនាំជាតិទាំងអស់។ ប៉ុន្តែចន្លោះខ្លះបានកើតឡើងដោយសារប្រជាពលរដ្ឋ គឺពួកគាត់អត់យល់អំពីសង្គ្រាម។ ឥឡូវពួកយើងចូលរួមគិតទាំងអស់គ្នា តើនេះជាពេលវេលាអ្វី? រឿងគួរគិតអ្វី? យើងគួរធ្វើអ្វី? បើខ្ញុំនិយាយឱ្យខ្លីថា ការជឿទុកចិត្តលើរាជរដ្ឋាភិបាលយើង គឺជារឿងដ៏ល្អបំផុតបងប្អូនក៏ប្រហែលជាគិតថា ចង់គិត ចង់ដឹងខ្លះដែរ។

បើកាលណានិយាយអំពីសង្គ្រាមសៀមឈ្លានពានខ្មែរគឺត្រូវតែសង្កត់ធ្ងន់លើរឿង3 យ៉ាង គឺចុងបញ្ចប់ ទប់ស្កាត់និងការពារ។

ចុងបញ្ចប់នៃសង្គ្រាមគឺសៀមត្រូវតែអនុវត្តផែនទីបារាំង-សៀម 1904-1907 ផ្នែកលើ MOU2000 បន្តនីតិវិធី GBC&JBC ដើម្បីដើរតួនាទីក្នុងផែនទី ការបោះបង្គោលព្រំដែនបន្ត។ ដូច្នេះមានន័យថា ក្នុងសង្គ្រាមលើកទី 1 និងសង្គ្រាមលើកទី 2 នេះទោះបីជាសៀមគ្រប់គ្រងកន្លែងណាក៏ដោយ ត្រូវតែប្រគល់ឱ្យខ្មែរវិញទាំងអស់ និងសងផលខូចខាតទាំងអស់ ដែលបានបង្កឱ្យខូចខាត របួសនិងស្លាប់ ដោយសារទង្វើសៀមឈ្លានពាន។

សៀមក៏មានគំនិតថា ធ្វើយ៉ាងណាក៏ដោយឱ្យខ្មែរទទួលស្គាល់ថា ខ្មែរជាអ្នកឈ្លានពានតាំងពីក្នុងសង្គ្រាមលើកទី1 និងលើកទី2 ដើម្បីគេចឱ្យផុតលើការទទួលខុសត្រូវ បានឥឡូវគឺសៀមក៏និយាយថា បើខ្មែរចង់បញ្ចប់សង្គ្រាម សៀមឱ្យខាងខ្មែរយើងឈប់បាញ់មុន ដូច្នេះបានបញ្ជាក់ថា សៀមជាមនុស្សល្អ ឯខ្មែរជាអ្នកឈ្លានពាន មានន័យថាកំហុសទាំងអស់នៅក្នុងសង្គ្រាមគឺសៀម អ្នកត្រឹមត្រូវ។ តើយល់នៅចំណុចហ្នឹងដែរឬទេ?

បើសិនយោងតាមអ្នកនាំពាក្យក្រសួងការបរទេសអាមេរិកបាននិយាយថា សង្គ្រាម ខ្មែរ-សៀម អាចបញ្ចប់ត្រឹមថ្ងៃទី22ឬ 23 មានន័យថាថ្ងៃចន្ទ ឬ ថ្ងៃអង្គារ ព្រោះគេបានមើលឃើញកម្លាំងរបស់កម្ពុជាគឺមានប្រៀបជាងសៀម ទាំងសង្គ្រាមលើគោកនិងសង្គ្រាមការទូត។ ដូច្នេះសល់ពេលតែប៉ុន្មានថ្ងៃទៀតពួកសៀមត្រូវតែបុកធ្វើសង្គ្រាមចិត្តសាស្ត្រ ដែលក្នុងរូបភាពក្លែងក្លាយនៃនយោបាយផ្សេងៗ គ្នា ដូចជាថា បានទីតាំងទីនេះ ទីនោះ និងដុតប្រជាពលរដ្ឋខ្មែរឱ្យឆេះខឹងអស់ការអត់ធ្មត់ ដើម្បីទៅជំរុញរដ្ឋាភិបាល ឆ្លើយតបដើម្បីប្រើប្រាស់សព្វាវុធ បាញ់យន្តហោះចម្បាំងសៀម។ ដូច្នេះបើសិនផែនការសៀមធ្វើបានជោគជ័យប្រាកដជាសៀមអាចមានលេសបន្តសង្គ្រាម ឬពង្រីកសង្គ្រាមបន្ត។ បើខ្មែរចង់បញ្ចប់ ខ្មែរជាអ្នកសុំចរចានិងឈប់បាញ់មុន។

តើបងប្អូនយើងឃើញទេ? នេះសុទ្ធតែជាល្បិចសៀមទាំងអស់ ឥឡូវបងប្អូនគិតដោយស្មោះត្រង់ តើចង់សុំវាចរចាដើម្បីវាគេចពីការទទួលខុសត្រូវនៅសង្គ្រាមឈ្លានពានលើកទី1 &លើកទី 2 មែនដែរឬទេ? តើចង់ចូលល្បិចសៀមដែរឬទេ? ឥឡូវនេះវាកំពុងព្យាយាមដើម្បីយកទីតាំងដោយប្រើកម្លាំងទ័ពពិសេស គឺ វាយបុកទ័ពខ្មែរយើងយ៉ាងខ្លាំង ដើម្បីឱ្យបានមុនការចរចា ឬក៏ជំរុញ ឱ្យមានការឆ្លើយតបដើម្បីបន្តសង្គ្រាម និងរកល្បិចចោទខ្មែរជាអ្នកឈ្លានពាន។

យើងឃើញខូចខាតស្ពាននិងសាលារៀន ប៉ុន្តែបើបន្តសង្គ្រាម ខ្ញុំចង់សួរថាអាចស្មើនឹងតម្លៃជីវិតវិរកងទ័ពយើងម្នាក់ដែរឬទេ? យើងមិនត្រូវឱ្យវីរកងទ័ពរបស់ខ្មែរយើងពលីបន្ត ក្នុងសង្គ្រាមសៀមឈ្លានពានបន្តទៀតទេ? មិនមែនគេដទៃទេជាឪពុក ជាបងប្រុស របស់យើងខំតស៊ូនៅក្នុងសមរភូមិ ដើម្បីការពារពួកយើង។ ហេតុអ្វីពួកយើងមិនទុកចិត្តទៅលើពួកគាត់? ហេតុអ្វីក៏ពួកយើងជំរុញឱ្យពួកគាត់បន្តសង្គ្រាម? យើងស្អប់សៀម តែយើងត្រូវការពារ គឺរបៀបបិទទ្វារវាយឆ្កែនោះទេ។ ទើបជារឿងដែលត្រឹមត្រូវនិងស្របច្បាប់។ កុំយកការឈឺចាប់ បំផ្លាញការគិត កុំយកជីវិតប្រឡូកនិងសង្គ្រាម។ នេះគ្រាន់តែសង្គ្រាម 15 ថ្ងៃខូចខាតប៉ុណ្ណឹង បើបន្តទៀតអាចខូចខាតនិងស្លាប់បាត់បង់អាយុជីវិតប៉ុន្មានទៀត? រឿងបាញ់យន្តហោះចម្បាំង 100% គឺត្រូវតែធ្លាក់លើដីសៀម ពួកសៀមមានលេសភ្លាមៗ។ ខ្ញុំក៏សូមលើកឧទាហរណ៍ យន្តហោះចម្បាំងF16 គឺហោះរយៈចម្ងាយ 80 គីឡូ ប្រើប្រាស់ពេលតែ 3នាទី- 5នាទី បើដូច្នេះប្រភេទគឺគ្រាប់រ៉ូកែតKS-1C អាចបាញ់ទម្លាក់បាន ប៉ុន្តែមិនអាចឱ្យធ្លាក់នៅលើដីខ្មែរទេ។ ដូច្នេះគឺធ្លាក់លើដីសៀម ចុះសៀមព្យាយាមហោះគេចរហូតដល់បាងកក សុខចិត្តចំណាយអាគារ 1 ឬ 2 ស្លាប់ជនស៊ីវិលនិងខូចខាតនានា ប្រាកដជាជនជាតិសៀមស៊ូងើបទូទាំងប្រទេសគាំទ្រសង្គ្រាមឱ្យកំទេចខ្មែរវិញ។ អន្តរជាតិក៏ដូចគ្នា ប្រាកដជាថ្កោលទោសមកលើខ្មែរ និងគាំទ្រសង្គ្រាមសៀមឈ្លានពានខ្មេរបន្ត។ និយាយឱ្យងាយយល់បើបាញ់ធ្លាក់នៅលើដីយើង ទើបយើងបាញ់ ដូចជាបាញ់ដ្រូនកាលពីថ្ងៃមុនហោះមានល្បឿនមធ្យមខ្មែរបាញ់ធ្លាក់ ដូច្នេះសៀមគ្មានលេសអ្វីទាំងអស់ ថែមទាំងខ្មែរមានវត្ថុតាងច្បាស់លាស់ដើម្បីបង្ហាញទៅអន្តរជាតិថែមទៀត។ តម្រាំដល់ថ្ងៃចរចា ឱ្យតែការកម្ទេចឬធ្លាក់នៅទឹកដីយើង យើងត្រឹមត្រូវ សៀមជាអ្នកទទួលខុសត្រូវនៅអ្វីៗក្រោយបញ្ចប់សង្គ្រាមទាំងស្រុង។

ដូច្នេះសរុបរួម ចុងបញ្ចប់នៃសង្គ្រាម ជាអ្វី? របៀបទប់ស្កាត់ជាអ្វី? ការពារដើម្បីទទួលខុសត្រូវជាអ្វី? គឺនៅខាងលើសុទ្ធតែជាទិន្នន័យដើម្បីឲ្យបងប្អូនស្វែងយល់បាន។ ខ្ញុំសូមសុំបញ្ចប់នៅសំណេរត្រឹមតែប៉ុណ្ណឹងចុះ បើមានចន្លោះឬខ្វះខាតត្រង់ចំណុចណា? ខ្ញុំសុំការអធ្យាស្រ័យទុកជាមុន។ ខ្ញុំក៏សូមគោរពអរគុណដល់បងប្អូនដែលបានលះបង់ និងខិតខំចំណាយពេលវេលាដ៏មានតម្លៃដើម្បីព្យាយាមអាន តាំងពីដើមរហូតដល់ចប់ និងនៅចុងបញ្ចប់សូមបងប្អូនត្រូវតែបន្តជឿជាក់ទៅលើរាជរដ្ឋាភិបាលយើង ដើម្បីយកជ័យជំនះលើសត្រូវសៀម៕ ចប់.

សូមជម្រាបជូននូវស្ថានការណ៍នៅតាមបន្ទាត់ព្រំដែនកម្ពុជា-ថៃ អំពី ករណីយោធាថៃនៅតែបន្តធ្វើសកម្មភាពបាញ់ប្រហារចូលទីតាំងប្រជាជនស៊ីវិលកម្ពុជា និងហេដ្ឋារចនាសម្ព័ន្ធស៊ីវិល នៅយោធភូមិភាគទី៥ ក្នុងភូមិសាស្រ្ត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នាថ្ងៃទី២១ ខែធ្នូ ឆ្នាំ២០២៥៖

- ចាប់ម៉ោង ១៤:៣៦នាទី ដល់ម៉ោង១៤:៥៧នាទី យោធាថៃនៅតែបន្តវាយប្រហារចូលទីតាំងប្រជាជនស៊ីវិលដោយប្រើប្រាស់កាំភ្លើងធំផ្លោងចំនួន ១១គ្រាប់ ចូលក្នុងភូមិសាស្ត្រ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

សកម្មភាពខាងលើជាការវាយប្រហារដ៏កំរោល ដោយមិនរើសគោលដៅរបស់យោធាថៃ ជាការរំលោភបំពានច្បាប់មនុស្សធម៌អន្តរជាតិយ៉ាងធ្ងន់ធ្ងរ។

ព័ត៌មានលម្អិតនឹងរាយការណ៍ជូននៅពេលក្រោយ៕