ကွင်းလယ်အဖျက်ကစားသမားအဖြစ် ကစားရန် လိုအပ်ချက်များရှိနေသေးပြီး နည်းပြ ဂွါဒီယိုလာနှင့်အတူ ဗီဒီယိုများကြည့်ကာ လေ့လာနေကြောင်း ကိုဗာချစ် ပြောကြား

လက်ရှိ မန်စီးတီးအသင်း၏ ကွင်းလယ် အဖျက်ကစားသမားအဖြစ် ရိုဒရီ ကစားနေပြီး ပွဲတိုင်းပါဝင်ကစားနေရသည့်အတွက် မောပန်းနွမ်းနယ်နေပြီး အနားယူရန် လိုအပ်ကြောင်း ပြီးခဲ့သည့်ရာသီက နှစ်ကြိမ်တိုင်တိုင်ပြောကြားခဲ့သည်။ ရိုဒရီ(၂၈ နှစ်)သည် မန်စီးတီးအသင်းအတွက် ပြီးခဲ့သည့်ရာသီက ပြိုင်ပွဲစုံ ပွဲပေါင်း ၅၀ အထိ ကစားခဲ့ပြီး မန်စီးတီးအသင်းအတွက် ၎င်းနောက်ဆုံး ပါဝင်ကစားခဲ့သည့် ၇၅ ပွဲတွင် တစ်ပွဲသာ ရှုံးနိမ့်ခဲ့ကြောင်း သိရသည်။

မန်စီးတီးနည်းပြ ဂွါဒီယိုလာသည် ရာသီသစ်တွင် ရိုဒရီအား အလှည့်ကျအသုံးပြုရန်စီစဉ်နေပြီး ၎င်း၏နေရာ၌ ခရိုအေးရှားကွင်းလယ်ကစားသမား ကိုဗာချစ်အား ကစားခိုင်းရန် ဆန္ဒပြင်းပြနေကြောင်း သိရှိရသည်။ ကိုဗာချစ်ကမူ ၎င်းအနေဖြင့် ကွင်းလယ်အဖျက်ကစားသမားအဖြစ် ကစားရန် လိုအပ်ချက်များရှိနေသေးကြောင်း ပြောကြားခဲ့ခြင်းဖြစ်သည်။

ကိုဗာချစ်က "ရိုဒရီကစားတဲ့ ကွင်းလယ်အဖျက်နေရာက ဘယ်လိုအခြေအနေမျိုးမှာ ဘယ်မှာရှိနေရမယ်။ ပြိုင်ဘက် ဘောလုံးပိုင်ဆိုင်ထားချိန်မှာ အသင်းခံစစ်ကို ကာကွယ်ရမယ်။ ပြီးတော့ ကိုယ့်အသင်းဘောလုံးကိုင်ထားချိန်မှာ မဆုံးရှုံးအောင် ကာကွယ်ရမယ်ဆိုတဲ့ အချက်တွေပါပါတယ်။ အဲဒီအပိုင်းတွေမှာ ကျွန်တော် တိုးတက်ဖို့ လိုနေဆဲပါပဲ။ ကွင်းလယ်တစ်ခုလုံးကို ထိန်းချုပ်ကစားတဲ့ နံပါတ် ၆ ကစားသမားနေရာက ကွင်းလယ်မှာ ထိုင်ကစားရပြီး နေရာတိုင်းကို ပြေးလွှားကစားဖို့ မလိုပါဘူး။ ဒီတော့ ကျွန်တော့်လို တစ်ကွင်းလုံးကို ပြေးလွှားကစားနေတဲ့ ကစားသမားအတွက်တော့ အဲဒီနေရာမှာ ကစားဖို့ ခက်ခဲပါတယ်။ နည်းပြက ကျွန်တော့်ကို သေချာရှင်းပြသလို ဗီဒီယိုတွေအတူ ကြည့်ပြီးတော့လည်း လေ့လာနေပါတယ်"ဟု ပြောကြားခဲ့သည်။

အသက် ၃၀ အရွယ်ရှိ ကိုဗာချစ်က မန်စီးတီးကစားသမားဘဝ ပထမရာသီမှာ ခက်ခဲခဲ့ကြောင်းလည်း ဝန်ခံပြောကြားခဲ့သည်။ "အစပိုင်းက ခက်ခဲပါတယ်။ ကစားသမား တစ်ယောက်အနေနဲ့ အသင်းသစ်တစ်သင်းမှာ နည်းပြနဲ့ နည်းပြအဖွဲ့တွေ ခိုင်းထားတာကို ချက်ချင်းလုပ်နိုင်ဖို့ မလွယ်ပါဘူး။ ဖြည်းဖြည်းချင်းပဲ သင်ယူလေ့လာရပါတယ်"ဟု ကိုဗာချစ်က ပြောကြားခဲ့သည်။

Captain Bruno ကို သက်တမ်းတိုးဖို့ သဘောတူညီမှု ရရှိခဲ့တဲ့ မန်ယူနိုက်တက်

မန်ချက်စတာ ယူနိုက်တက်အသင်းဟာ ဆော်ဒီကလပ်အသင်းတွေရဲ့ စိတ်ဝင်စားမှုကို ရရှိနေတဲ့ အသင်းခေါင်းဆောင် ကွင်းလယ်ကစားသမား ဘရူနို ဖာနန်ဒက်စ်ကို ၂၀၂၇ခုနှစ် ဇွန်လထိနဲ့ နောက်ထပ် တစ်နှစ်ပါ ထပ်တိုးခွင့် ပါဝင်တဲ့ စာချုပ်သစ်တစ်ရပ် ကမ်းလှမ်းခဲ့ရာ ဖာနန်ဒက်စ်ဘက်ကလည်း လက်ခံသွားခဲ့တယ်လို့ ဖာဘရီဇီယို ရိုမာနိုက သတင်းဖော်ပြလာပါတယ်။

ပေါ်တူဂီသားကြီးအနေနဲ့ ယူနိုက်တက်နဲ့ စာချုပ်သက်တမ်း တိုးမြှင့်ပြီးရင် အသင်းရဲ့ လစာအများဆုံး ကစားသမားတွေထဲမှာပါ ပါဝင်လာတော့မှာ ဖြစ်ပါတယ်။