❗️ IELTS balisiz ham 11 nafar o‘quvchi imtihondan o‘tibdi, qoyil!

Bugun natijalarni tahlil qilamiz va apellatsiya berish tartibini tushuntiraman!

✍️ Natijangiz yoki fikringiz bo‘lsa, @mathmentor_1 ga yuboring!

Assalomu alaykum, xayrli kun barchaga!

Bugun sizlar bilan imtihondan keyingi muhim masalalar haqida gaplashamiz.

Avvalo, apellyatsiya berish tartibi va qaysi holatlarda apellyatsiya berish kerakligi haqida tushuntirib o‘tamiz.

Shuningdek, maktabga kirgan o‘quvchilar bundan keyin nimalarga e’tibor berishi kerak, kira olmaganlar esa keyingi tayyorgarlikni qanday davom ettirgani ma’qul — shu haqida ham gaplashamiz.

❗️ Shuning uchun keyingi xabarlarni sinchkovlik bilan kuzatib boringlar. Kerakli tavsiyalarni imkon qadar tushunarli qilib yozib boraman.

O‘zi qiziqmi? 🔥

💬Telegram: @math_mentor

❗️ Apellyatsiya bo‘yicha muhim xabar!

Natijalar e'lon qilinganda har bir savoldan necha ball olingani ko‘rsatilmagan, faqat umumiy ball berilgan. Shu sabab apellyatsiya sababini aniq yozish qiyin!

💜 Yana bir masala: agentlik kanalida apellyatsiya o‘z hududida ko‘rib chiqiladi degan ma’lumot berildi, lekin telefonda aniqlashtirsak, yozma ishlar Agentlikda saqlanarkan va maxfiylik sabab apellyatsiya uchun o‘quvchi ham, qonuniy vakili ham Toshkent shahridagi Al-Xorazmiy maktabiga kelishi kerak ekan!

Rostini aytganda, ayniqsa viloyatdagi o‘quvchilar uchun bu apellyatsiyadan oldingi yana bir qo‘shimcha bosh og‘riq bo‘libdi.

Manimcha, apellyatsiya berish ma’qul, agar:

— qabul chegarasiga juda yaqin qolgan bo‘lsangiz;
— matematika yoki fizikadan balingiz yozgan ishingizga nisbatan juda past tuyulsa;
— bir nechta masalani to‘liq yoki deyarli to‘liq yechganingizga ishonchingiz komil bo‘lsa.

Shunchaki “balki ball qo‘shilar” degan umidda emas, asos bo‘lsa apellyatsiya beringlar.

❗️ Lekin Toshkentga borib-kelish sizlar uchun muammo bo‘lmasa, apellyatsiya berib ko‘rgan ma’qul. Hech bo‘lmasa o‘z yozma ishingizni ko‘rib, qanday baholanganini bilib olasizlar.

Keyingi postda namunaviy apellyatsiya murojaatini ham yuboraman.

💬Telegram: @math_mentor

❗️ Namunaviy apellyatsiya murojaati

Albatta, har bir o‘quvchining vaziyati har xil. Quyidagi matnni shunchaki ko‘chirib yubormanglar — o‘z natijangiz va yozgan yechimlaringizga qarab moslab yozinglar.

Assalomu alaykum!

Matematika fanidan qo‘yilgan 7 ball natijamga e’tirozim bor va yozma ishimning qanday baholanganiga aniqlik kiritilishini istayman.

Imtihonda bir nechta topshiriqlar bo‘yicha to‘liq yoki qisman yechimlar yozganman, ayrimlarida yakuniy javobga ham kelganman. Imtihondan keyingi hisobim bo‘yicha taxminan 20 ball atrofida natija kutgan edim. Shu sababli 7 ball qanday shakllanganini tushunishni istayman.

Natijada har bir savol bo‘yicha alohida ball ko‘rsatilmagani uchun aynan qaysi yechimimga qancha ball berilganini aniqlash imkonim yo‘q.

Shu sababli yozma ishimni baholash mezoni asosida qayta ko‘rib chiqishingizni, har bir masala bo‘yicha qo‘yilgan ballarga aniqlik kiritishingizni so‘rayman.

Agar to‘liq yoki qisman to‘g‘ri bajarilgan yechimlarim uchun tegishli ballar hisobga olinmagan bo‘lsa, ularni qayta hisoblashni so‘rayman.

Agar imkon bo‘lsa, apellyatsiya jarayonida yozma ishimni o‘z ko‘zim bilan ko‘rib, har bir savolim qanday baholanganini va qancha ball qo‘yilganini bilishni ham xohlayman.

Rahmat!

📌 Muhim: agar har bir savolda taxminan nimalar yozganingiz esingizda bo‘lsa, murojaatga albatta qo‘shinglar. Masalan: 1-savolni to‘liq ishladim, 2-savolning a) qismini bajardim, 3-savolda mana bu bosqichgacha bordim...

Shunda murojaatingiz ancha aniq va asosli bo‘ladi. Ballar va savollarni esa o‘zingizning holatingizga qarab almashtiringlar.

💬Telegram: @math_mentor

❗️ Al-Beruniy maktabiga kirgan o‘quvchilarga

Avvalo, hammangizni yana bir bor tabriklayman. Hozir biroz yaxshilab dam olib olinglar, bunga haqqingiz bor 😊

Lekin “Al-Beruniy maktabiga kirdim, bo‘ldi” deb xotirjam bo‘lib qolmanglar. Menimcha, Al-Beruniy maktabiga kirish - kemaga chiqish, xolos. Kemaga chiqqaningiz bilan hali manzilga yetib borgan bo‘lmaysiz.

Maktabda darslarni birinchi kundanoq mas’uliyat bilan olib ketishga harakat qilinglar. Vazifalarni yig‘ib qo‘ysangiz, keyin yetib olish qiyin bo‘ladi. Ko‘p fan, ko‘p uyga vazifa, tez-tez imtihonlar bo‘ladi. Faqat o‘zingiz yaxshi ko‘radigan 2-3 ta fanga yopishib olib, qolganlarini tashlab qo‘ymanglar!

❗️ Yana bir muhim narsa — uyqu va sog‘liq. O‘tgan yilgi o‘quvchilardan eshitganim, aynan vazifalar, imtihonlar, stress va uyqusizlik ancha qiynagan. Shuning uchun vaqtni to‘g‘ri taqsimlashni hozirdan o‘rganinglar!

Agar maqsadingiz TOP universitetlar bo‘lsa, Al-Beruniy maktabida o‘qishning o‘zi bilan cheklanib qolmanglar. IELTS, SAT, olimpiadalar, loyihalar va portfolio uchun ham asta-sekin hozirdan harakat qilish kerak.

Al-Beruniy maktabi sizlarga juda yaxshi imkoniyat beradi. Endi shu imkoniyatdan qanday foydalanish o‘zingizga bog‘liq.

Hali maqsadingizga yetmadingiz, shunchaki maqsadingiz tomon yaxshi kemaga chiqib oldingizlar🔥

💬Telegram: @math_mentor

❗️ Al-Beruniyga kira olmagan o‘quvchilarga | 1-qism

1️⃣ Avvalo, bir narsani to‘g‘ri tushunib olaylik:

Al-Beruniy maktabiga kira olmaganingiz — TOP universitetlarga boradigan yo‘lingiz yopildi degani emas!

Al-Beruniy maktabi katta imkoniyat, lekin yagona yo‘l emas. Maktab - shunchaki vosita. Asosiy natijani baribir o‘quvchining o‘zi, bir necha yillik mehnati va to‘g‘ri tuzilgan reja beradi.

☝️ Qolaversa, ko‘pchiligingiz noldan boshlamayapsizlar: ingliz tilingiz yaxshi, ayrimlaringizda IELTS bor, matematikangiz ham yomon emas. Oldingizda hali taxminan 3 yil vaqt bor. Uni to‘g‘ri ishlatsangiz, oddiy maktabda o‘qib ham kuchli universitetlarga hujjat topshirishingiz mumkin.

2️⃣ 9-sinfni poydevor yili qilinglar:

— matematikani kuchaytiringlar;
— IELTSdan yuqoriroq ball olinglar;
— SAT boshlanglar va imkon qadar 9-sinf oxiri yoki 10-sinf boshida yaxshi natija qilinglar;
— maktab baholarini tushirib yubormanglar;
— kelajakdagi yo‘nalishingizni aniqlanglar.

Faqat IELTSni juda erta topshirib qo‘ymanglar - universitetga hujjat topshirish vaqtida amal qilish muddati tugab qolmasin.

Eng muhimi, IELTS va SAT — yakuniy maqsad emas. Ular universitet eshigini ochadigan vosita, xolos.

3️⃣ 9-sinf oxiriga kelib:

“Men nimam bilan boshqa o‘quvchilardan ajralib turaman?”

degan savolga javobingiz bo‘lishi kerak.

💜 Matematikasi kuchli o‘quvchilar esa 9-sinfdayoq portfolio uchun sekin harakatni boshlasa ham bo‘ladi.

Keyingi postda 10-sinfda qanday kuchli portfolio qurish va aynan nimalarga e’tibor berish kerakligini yozaman🔥

💬Telegram: @math_mentor