မုံရွာမြို့နယ် မအူကျေးရွာကို စစ်ကောင်စီတပ်က လက်နက်ကြီးဖြင့်ပစ်၍ မိသားစုလိုက်ထိမှန်ပြီး မိခင်ဖြစ်သူ သေဆုံး
==================

ပါခွီး
(မဇ္စျိမ)။ ။စစ်ကိုင်းတိုင်း၊ မုံရွာမြို့နယ်ရှိ မအူကျေးရွာကို စစ်ကောင်စီတပ်က လက်နက်ကြီးဖြင့်ပစ်ခတ်၍ မိသားစုလိုက်ထိမှန်ခဲ့ပြီး မိခင်ဖြစ်သူသေဆုံးခဲ့ကြောင်း မုံရွာ-အမြင့် သတင်းမှန်ပြန်ကြားရေးတာဝန်ရှိသူ တဦးက မဇ္စျိမသို့ပြောသည်။

မုံရွာမြို့အဝင် မအူမုခ်ပေါက်ဂိတ်တွင် တပ်စွဲထားသည့်စစ်ကောင်စီတပ်သားများက ဇူလိုင်လ ၁၀ ရက် ညနေ ၅ နာရီ ၅၁ မိနစ်အချိန်တွင် လက်နက်ကြီးဖြင့်ပစ်ခတ်ခဲ့ခြင်းဖြစ်ကြောင်း ဆိုသည်။

လက်နက်ကြီးကျည်သည် နေအိမ်ပေါ်သို့ကျရောက်ပေါက်ကွဲပြီး မအူကျေးရွာမှ မနွယ်ဝင်း(၄၅ နှစ်)သေ ဆုံးခဲ့ပြီး ၎င်း၏ခင်ပွန်း (၅၀ နှစ်)အပြင် အသက် ခုနစ်နှစ်နှင့် ငါးနှစ်အရွယ်ကလေးနှစ်ဦး ထိခိုက်ဒဏ်ရာ ရရှိခဲ့ကြောင်း သိရသည်။

“ အဲဒီဂိတ်ကို ကာကွယ်ရေးအဖွဲ့တဖွဲ့က သွားပစ်တယ်လို့ကြားတယ်။ လက်နက်ကြီးအသံ လေး - ငါး ချက် လောက်ကြားလိုက်ရတယ် ” ဟု ဒေသခံတဦးက မဇ္စျိမသို့ပြောသည်။

သို့သော် အဆိုပါဂိတ်ကို မည်သည့်အဖွဲ့မှ သွားရောက်တိုက်ခိုက်ခဲ့ခြင်းဆိုသည်ကို မဇ္စျိမအနေဖြင့် သီးခြား အတည်ပြုနိုင်ခြင်း မရှိသေးပေ။

တိုက်ခိုက်မှုအပြီး ဇူလိုင်လ ၁၁ ရက် ယနေ့နံနက် ၇ နာရီကျော်အချိန်တွင် စစ်ကောင်စီတပ်မှ စစ်ကြောင်း ထိုးလာပြီး မအူရွာကိုဝင်ရောက်ကာ နေအိမ် ကိုးလုံးကို မီးတင်ရှို့ခဲ့ကြောင်း သိရသည်။
မအူဂိတ်သည် စစ်ကောင်စီတပ်သား ၄၀ ခန့်ဖြင့် တပ်စွဲထားခြင်းဖြစ်ပြီး ဒေသတွင်း ခရီးသွားများကို စစ်ဆေးခြင်းများအပြင် နယ်မြေတွင်းစစ်ကြောင်းထိုးခြင်းများ ပြုလုပ်နေခြင်းဖြစ်သည်။

ထို့ကြောင့် မအူဂိတ်သည် မကြာခဏတိုက်ခိုက်ခံရလေ့ရှိပြီး ၎င်းဂိတ်နှင့်မနီးမဝေးတွင်ရှိသော မုံရွာမြို့ ကညန ရုံး၊ ရေဦးဆန်ဆိုင်ဂိတ်များတွင်လည်း စစ်ကောင်စီတပ်မှ တပ်စွဲထားမှုများရှိနေသည်။

စာတည်း ။ ။ Alden
စာမူတည်းဖြတ်။ ။စောဖေ

#မအူဂိတ်
#မုံရွာမြို့နယ်
#လက်နက်ကြီး
#ဒေသခံ
Photo - မီးရှို့ခံထားရသည့် မအူကျေးရွာ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​သိုင်းငင်းကျေးရွာတွင် တိုက်ပွဲပြင်းထန်နေပြီး စစ်ကောင်စီတပ်က လေကြောင်းမှတိုက်ခိုက်
======================

ပါခွီး
မဇ္စျိမ။ ။ချင်းပြည်နယ်၊ တီးတိန်မြို့နယ်၊ သိုင်းငင်းကျေးရွာတွင် ယနေ့ ဇူလိုင်လ ၁၁ ရက်အထိ တိုက်ပွဲ ပြင်းထန်နေကာ စစ်ကောင်စီတပ်က လေကြောင်းမှ ဗုံးကြဲပြီး ကလေးမြို့မှလည်း လက်နက်ကြီးများဖြင့် ပစ်ခတ်လျက်ရှိကြောင်း ဒေသတွင်း စစ်ရေးသတင်းရင်းမြစ်များထံမှ သိရသည်။

ဇူလိုင်လ ၁၀ ရက်နေ့ ညနေပိုင်းမှ စတင်ဖြစ်ပွားခဲ့ခြင်းဖြစ်ပြီး ဇူလိုင် ၁၁ ရက် ယနေ့နံနက်တွင်လည်း တိုက်ပွဲဆက်လက်ပြင်းထန်နေခြင်း ဖြစ်သည်။

“ကလေးမြို့ကနေ စစ်ကား ၁၀ စီး၊ အမြောက်တင်ကားလည်းပါတယ် ၊ ချင်းတောင်ဖက်ကို စစ်ကူတက် သွားတယ်။ လက်နက်ကြီးကတော့ မနက်ကတည်းက တောက်လျှောက်ထုနေတာ” ဟု ဒေသတွင်းရှိ တော်လှန်ရေးတပ်ဖွဲ့ဝင်တဦးက မဇ္စျိမကို ပြောသည်။
ကလေးမြို့ အမြောက်တပ်နှင့် ဒကစတို့မှ ယနေ့ နံနက် ၃ နာရီမှ စတင်ပြီး ချင်းတောင်၊ သိုင်းငင်းဖက်သို့ လက်နက်ကြီးများဖြင့် အဆက်မပြတ် ပစ်ခတ်နေခြင်းဖြစ်ကြောင်း ဆိုသည်။

ယင်းသို့ လက်နက်ကြီးဖြင့်ပစ်ခတ်မှုကြောင့် ကလေးမြို့၊ တာဟန်းရပ်ကွက် အ.ထ.က(၂) ဘောလုံးကွင်း မြောက်ဘက်ရှိ အ.လ.က (၁) ကျောင်းလမ်းအနောက်ဖက်ခြမ်းတွင် လက်နက်ကြီးကျည် ကျရောက် ပေါက်ကွဲပြီး အမျိုးသမီးတဦး သေဆုံးပြီး ကလေးငယ်တဦး ထိခိုက်ဒဏ်ရာရရှိခဲ့ကြောင်း သိရသည်။

လက်ရှိတွင် သိုင်းငင်းကျေးရွာဝန်းကျင်၌ တိုက်ပွဲများဆက်လက်ဖြစ်ပွားနေပြီး အခြေနေအသေးစိတ်ကို မဇ္စျိမက ဆက်လက်စုံစမ်းနေသည်။

သိုင်းငင်းကျေးရွာအနီးရှိ စစ်ကောင်စီတပ်စခန်းမှ ဒေသခံများကို တော်လှန်ရေးအဖွဲ့ဝင်များ (သို့မဟုတ်) ပတ်သက်ဆက်နွယ်မှုများရှိသည်ဟု စွပ်စွဲကာ ဖမ်းဆီးမှုများရှိခဲ့သဖြင့် CDF – CDM SIYIN က ဇွန်လ ၃၀ ရက်နေ့တွင် ဒေသခံများကို ဘေးလွတ်ရာ ရွှေ့ပြောင်းနေထိုင်ကြရန် သတိပေးစာ ထုတ်ပြန်ခဲ့သည်။

ယင်းသို့စာထုတ်ပြန်ပြီးနောက် ဇူလိုင်လ ၁ ရက်နေ့တွင် ကလေးမြို့မှ စစ်ကောင်စီအင်အား ၆၀ ခန့်သည့် သိုင်းငင်းတပ်စခန်းသို့ အင်အားဖြည့်တင်းလာခဲ့ပြီး ချင်းတောင်သို့ ထွက်ခွာမည့်ယာဉ်များကို ပိတ်ပင်တား ဆီးခဲ့ကြောင်း ဒေသခံများက ပြော သည်။
သိုင်းငင်းကျေးရွာသည် ကလေးမြို့မှ သုံးနာရီခန့် ကားဖြင့်သွားရပြီး ကလေး-ဖလမ်း-ဟားခါးလမ်းနှင့် တီးတိန်-ရိဒ်နယ်စပ်ကုန်သွယ်ရေးလမ်းဆုံတွင် တည်ရှိသည်။

စာတည်း။ ။ နောင်နောင်
စာမူတည်းဖြတ်။ ။စောဖေ

#သိုင်းငင်းကျေးရွာ
#တီးတိန်
#Mizzima
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အာဆီယံအထူးသံတမန်ရုံးအကြီးအကဲနှင့် လူငယ်တော်လှန်ရေးသမားများတွေ့ဆုံမှု ကောင်းမွန်သည့် တုံ့ပြန်မှုများရရှိခဲ့ဟုဆို
==================

001
(မဇ္စျိမ)။ ။ မြန်မာနိုင်ငံဆိုင်ရာ အာဆီယံအထူးသံတမန်ရုံးအကြီးအကဲဖြစ်သူ သံအမတ်ကြီး Mr. Ngurah Swajaya နှင့် လူငယ်တော်လှန်ရေးသမားများတွေ့ဆုံမှုမှ ကောင်းမွန်သည့်ရလဒ်များနှင့် တုံ့ပြန်မှုများရရှိခဲ့ကြောင်း ဆွေးနွေးပွဲတက်ရောက်ခဲ့သည့် အဖွဲ့အစည်းများကပြောသည်။

အစည်းအဝေးကို ဇူလိုင်လ ၃ ရက်နေ့တွင် အွန်လိုင်းမှတစ်ဆင့် ပြုလုပ်ခဲ့ခြင်းဖြစ်ပြီး တော်လှန်ရေးတွင်ပါဝင်နေသည့်အဖွဲ့အစည်းများဘက်မှ လူငယ်ကိုယ်စားလှယ် ၂၆ ဦး ပါဝင်တက်ရောက်ခဲ့ကြောင်း Progressive Voice - ရှေ့ပြေးအသံ က ဇူလိုင်လ ၁၀ ရက်တွင် ထုတ်ပြန်ခဲ့သည်။

“ အဓိကကတော့ အာဆီယံရဲ့ မြန်မာ့အရေးလှုပ်ရှားတဲ့ဟာနဲ့ ပတ်သက်ပြီးတော့ မြန်မာလူငယ်တွေပေါ့နော်။ တော်လှန်ရေးလုပ်နေတဲ့ မြန်မာလူငယ်တွေနဲ့တွေ့ဆုံတဲ့ဟာပါ။ အလွတ်သဘောတွေ့ဆုံပြီးတော့ advocacy လုပ်တဲ့အစည်းအဝေးပါ” ဟု တွေ့ဆုံပွဲ ပြောရေးဆိုခွင့်ရှိသူ၊ စစ်အာဏာရှင်စနစ်တိုက်ဖျက်ရေးအထွေထွေသပိတ်ကော်မတီ-GSC ကိုယ်စားလှယ် ကြည်ငြိမ်းက ပြောသည်။
အာဆီယံအထူးသံတမန်ရုံး အကြီးအကဲအနေဖြင့် မြန်မာနိုင်ငံအတွင်းမှကိစ္စရပ်များ၊ ပြည်တွင်းရေးအခြေအနေများနှင့်ပတ်သက်ပြီး စိတ်ဝင်တစား မေးမြန်းမှုများပြုလုပ်ခဲ့ကြောင်း ဆိုသည်။

လူငယ်များဘက်မှလည်း အာဆီယံအနေဖြင့် စစ်ကောင်စီအား ဆွေးနွေးဘက်အဖြစ် မသတ်မှတ်ဘဲ စစ်ရာဇဝတ်မှုများကျူးလွန်နေသည့် အကြမ်းဖက်အုပ်စုအဖြစ် သတ်မှတ်ပေးနိုင်ရန် တိုက်တွန်းမှုများ ပြုလုပ်ခဲ့ကြောင်း ကိုယ်စားလှယ် ကြည်ငြိမ်းကပြောသည်။
“ မြန်မာပြည်မှာရှိနေတဲ့ ပြည်သူလူထုရဲ့ ဆန္ဒအပေါ်ကို လေးစားပြီးတော့ ပြည်သူလူထုရဲ့ ဆန္ဒနဲ့ တစ်ထပ်တည်းကျတဲ့ အသံတွေအပေါ်မှာမူတည်ပြီးတော့ ထည့်သွင်းစဉ်းစားတဲ့ အာဆီယံရဲ့ ဆုံးဖြတ်ချက်တွေ အာဆီယံရဲ့ လုပ်ငန်းတွေဖြစ်ဖို့ကို အဓိကဦးစားပေးပြီး တိုက်တွန်းခဲ့ပါတယ်”ဟု ၎င်းက ဆိုသည်။

အစည်းအဝေးတွင် အာဆီယံဘုံသဘောတူညီချက် ငါးရပ်ချမှတ်ခဲ့ပြီးနောက် နှစ်နှစ်ကျော်ကာလအတွင်း မြန်မာပြည်သူများအပေါ်ကျူးလွန်နေသည့် စစ်အုပ်စု၏အကြမ်းဖက်မှုများနှင့် ရက်စက်ကြမ်းကြုတ်မှုများကို အာဆီယံမှ ထိရောက်စွာတားဆီးနိုင်မှုမရှိခြင်းအပေါ် ထုတ်ဖော်တင်ပြဆွေးနွေးခဲ့ကြကြောင်း ရှေ့ပြေးအသံ၏ ထုတ်ပြန်ချက်တွင် ဖော်ပြသည်။

ထိရောက်မှုမရှိသည့် အဆိုပါဘုံသဘောတူညီချက်ငါးရပ်ကို ဆက်လက်ထားရှိနေခြင်းက စစ်ကောင်စီကို နောက်ထပ်ရာဇဝတ်မှုများ ကျူးလွန်စေရန် အတင့်ရဲစေမည်ဖြစ်ပြီး မြန်မာပြည်သူများခံစားနေရသောဒုက္ခကို ပိုမိုဆိုးရွားစေမည်ဟုလည်း လူငယ်များက ပြောကြားခဲ့သည်။

ထို့ပြင် စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးပစ်ခတ်မှု၊ ကျေးရွာများကို မီးရှို့မှု၊ တရားလက်လွတ်သတ်ဖြတ်မှုများနှင့်ပတ်သက်သည့် နောက်ဆုံးရအခြေအနေများကို တင်ပြခဲ့ကြကြောင်းလည်းသိရသည်။

စာတည်း ။။ Alden
စာမူတည်းဖြတ်။ ။သန့်ဇော်(သန်လျင်)

#အာဆီယံ
#သံအမတ်ကြီး
#လူငယ်
#တော်လှန်ရေး
#အစည်းအဝေး
Photo - ကရင်နီအမျိုးသားများ ကာကွယ်​ရေးတပ် KNDF တပ်ရင်း ၁၄ တပ်ဖွဲ့ဝင်များအား ၂၀၂၃ ခုနှစ် ဧပြီလအတွင်းက​တွေ့ရစဥ် (KNDF)
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင်လ (၁၁)ရက်၊ ညနေ ၄ နာရီ Mizzima News Hour မဇ္ဈိမသတင်းအစီအစဉ်
======================

00:59 − မယ်စဲ့မှာ စစ်ကောင်စီရဲ့ ထောက်ပို့လေယာဉ်က ချသွားတဲ့ လက်နက်ခဲယမ်းတွေကို တော်လှန်ရေးပူးပေါင်းတပ် သိမ်းဆည်းရရှိတဲ့သတင်း

03:31 − ဗိုလ်ကြီးကိုသတ်လိုက်တဲ့ အရာခံဗိုလ်ရဲ့ မိသားစုကို လိုင်းခန်းကနှင်ချပြီး သားစစ်ဗိုလ်ကို တပ်ကနေထုတ်ပယ်လိုက်တဲ့အကြောင်း

05:14 − ကရင်နီဒေသအတွက် ကိန္နရာဆေးရုံ တည်ဆောက်ဖို့ရှိနေတဲ့သတင်းနဲ့

07:40 − အိန္ဒိယမှာ မုတ်သုံရေလွှမ်းမိုးမှုကြောင့် လူ ၁၅ ဦးထက်မနည်းသေဆုံးရတဲ့သတင်း အပါအဝင် တခြား အရေးကြီးသတင်းတွေနဲ့ စိတ်ဝင်စားဖွယ်သတင်း တွေကို တင်ဆက်ပေးသွားမှာပါ။

https://youtu.be/Pe95vvT5s08

#4pmnews
#Mizzimanewshour
#mizzimatv
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ဖူကူရှီးမားရေထုတ်လွှတ်မှုအစီအစဉ်အတွက် ဂျပန်နိုင်ငံမှာ နောက်ဆုံးစည်းမျဉ်းကန့်သတ်ချက်တွေကို ဖယ်ရှား

#InternationalNews #reels #shorts #Japan #Mizzima

Business Round Up (11 July 2023)
=============

- အလယ်အလတ်ဝင်ငွေ အနိမ့်ပိုင်း နိုင်ငံအဆင့်အတန်းတွင် မြန်မာနိုင်ငံ ပါဝင်

- ကုန်သွယ်မှုလိုငွေပြမှုနှင့် ဒေါ်လာငွေလဲနှုန်းမြင့်တက်မှုတို့ကြောင့် ပြည်တွင်း ကုန်ဈေးနှုန်းများကြီးမြင့်နေ

- Asian Clearing Union အဖွဲ့ဝင်နိုင်ငံများက အမေရိ ကန်ဒေါ်လာအသုံးပြုမှုကို လျော့ချပြီး ပြည်တွင်းငွေကြေးများသုံးစွဲရန် သဘောတူ

- 'ဝဥ' စိုက်တောင်သူများ ဈေးကွက်ပျက်စီးမှုကြောင့် ထိခိုက်မှုများရှိနေ

https://youtu.be/Lhgyn0PvGT0
 
#BusinessRoundUp
#mizzimatv
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

အလယ်အလတ်ဝင်ငွေ အနိမ့်ပိုင်း နိုင်ငံအဆင့်အတန်းတွင် မြန်မာနိုင်ငံ ပါဝင်

#Businessnews #Myanmar #reels #shorts #mizzima

တူရကီ အီးယူအဖွဲ့ဝင်ဖြစ်ရေးနဲ့ ဆွီဒင်ရဲ့နေတိုးအဖွဲ့ဝင်ဖြစ်ရေး ဘာမှမသက်ဆိုင်ကြောင်း အိုလက်ဖ်ရှောပြောကြား

#InternationalNews #reels #shorts #EU #Sweden #Mizzima

​​ကန့်ဘလူမြို့နယ် ထန်းကုန်းတိုက်နယ်တွင် စစ်ဘေးရှောင် ၂ ဦး မြွေဆိုးကိုက်ခံရ
=====================

ကိုခင်မောင်
(မဇ္စျိမ)။ ။စစ်ကိုင်းတိုင်း၊ ကန့်ဘလူမြို့နယ်၊ ထန်းကုန်းတိုက်နယ်တွင် စစ်ဘေးရှောင်နှစ်ဦး မြွေဆိုးကိုက် ခံခဲ့ရကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ ( ကန့်ဘလူခရိုင်)ထံမှ သိရသည်။

ဇူလိုင်လ ၉ ရက်နေ့က ထန်းကုန်းတိုက်နယ်ရှိ စစ်ရှောင်တဲအတွင်း အိပ်နေသည့် အသက် ၂၅ နှစ်အရွယ် စစ်ရှောင်အမျိုးသမီးတဦး မြွေကိုက်ခံခဲ့ရခြင်းဖြစ်ပြီး အခြေအနေအသေးစိတ်ကို မသိရှိသေးကြောင်း ယင်း အဖွဲ့ကပြောသည်။

ထို့ပြင် ဇူလိုင်လ ၆ ရက်နေ့ကလည်း ကန့်ဘလူခရိုင်၊ ထန်းကုန်းတိုက်နယ်မှ အသက် ၅၀ နှစ် အရွယ် အမျိုး သမီးတဦး မြွေဆိုးကိုက်ခံခဲ့ရသည်ဟု ဆိုသည်။

“အိန္ဒိယမြွေဆိပ်ဖြေဆေးက အလုံး ၂၀ တော့ရှိတယ်။ လူနာက နှစ်ယောက်ဖြစ်နေတော့ မလောက်ဘူး ဖြစ်နေလို့ တခြားမြွေဆိပ်ဖြေဆေးရှိတဲ့ တနေရာကို လွှဲပေးလိုက်ရတယ်” ဟု ကျန်းမာရေးစောင့်ရှောက်မှု ပေးနေသူတဦးက ပြောသည်။

ကန့်ဘလူမြို့နယ်၊ ချပ်သင်းတိုက်နယ်တွင်လည်း ဇူလိုင်လ ၆ ရက် နံနက် ၆ နာရီ ၁၅ မိနစ်အချိန်တွင် ဒေသခံတဦး မြွေဆိုးကိုက်ခံရသည်ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ ( ကန့်ဘလူခရိုင်) ထံမှ သိရသည်။

ထန်းကုန်းတိုက်နယ်အတွင်း၌ မြွေဆိပ်ဖြေဆေးများအပြင် အခြေခံဆေးဝါးများနှင့် အမြဲစွဲသောက်ရသည့် သွေးတိုး၊ ဆီးချိုကဲ့သို့ ဆေးဝါးများလိုအပ်လျက်ရှိနေသည်ဟု သိရသည်။
ကန့်ဘလူခရိုင်တွင်းရှိ ကိုးထောင်ဘို့၊ ချပ်သင်း၊ ပင့်သာနှင့် ထန်းကုန်းတိုက်နယ်များသည် မြွေဆိုးကိုက်ခံ ရမှု အများဆုံးဒေသများ ဖြစ်သည်။

မိုးရာသီ ရောက်လာသည်နှင့်အမျှ မြွေဆိုးအန္တရာယ်လည်း ပိုမိုကြုံတွေ့လာရပြီး စစ်‌ရှောင်များအနေဖြင့် အနေအထိုင် ပိုမိုခက်ခဲလာနေကြကြောင်းလည်း သိရသည်။

ဇွန်လအတွင်းကလည်း ကန့်ဘလူခရိုင်အတွင်း၌ မြွေဆိုးကိုက်ခံရသည့် လူနာစုစုပေါင်း ၁၁ ဦးအထိ ရှိခဲ့ သည်ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့(ကန့်ဘလူခရိုင်)မှ ပြုစုထားသည့် စာရင်းအရ သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#စစ်ကိုင်းတိုင်း
#ကန့်ဘလူမြို့နယ်
#စစ်ဘေးရှောင်
#မြွေအန္တရာယ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ပြီးခဲ့သည့် သီတင်းပတ်က ကမ္ဘာ့ အပူဆုံး ရက်သတ္တပတ်အဖြစ် စံချိန်တင်ဟု ကုလ ပြော
========================

ဇူလိုင်လအစ ပြီးခဲ့သည့် သီတင်းပတ်သည် မှတ်တမ်းမှတ်ရာများအရ ကမ္ဘာ့အပူဆုံး သီတင်းပတ်ဖြစ်ကြောင်း ကမ္ဘာ့ မိုးလေဝသ အဖွဲ့ကြီး (WMO) ၏ ဇူလိုင် ၁၀ ရက် ကနဦး လေ့လာတွေ့ရှိချက်များအရ သိရသည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ဒေသခံ ၁၇ ဦးအား စစ်ကောင်စီတပ်က ဖမ်းဆီးချုပ်နှောင်ထားကြောင်း KNU ပြော
======================

YT
(မဇ္ဈိမ)။ ။ ကရင်အမျိုးသားအစည်းအရုံး (KNU) တပ်မဟာ (၃) အုပ်ချုပ်နယ်မြေဖြစ်သည့် ပဲခူးတိုင်း၊ ကျောက်ကြီးမြို့နယ်တွင် လေးရက်အတွင်း ဒေသခံ ၁၇ ဦး စစ်ကောင်စီတပ်သားများ​၏ ဖမ်းဆီးခြင်းခံခဲ့ရကြောင်း KNU ဗဟို​၏ ယမန်နေ့ ဇူလိုင်လ ၁၀ ရက်နေ့ ထုတ်ပြန်ချက်အရ သိရသည်။

" အခုထိ ပြန်မလွတ်သေးပါဘူး။ ဖမ်းခံရတဲ့ ၁၇ ဦးက အမျိုးသားတွေချည်းပဲ။ ကျောက်ကြီးမှာ ဝယ်လို့မရတဲ့ ရိက္ခာပစ္စည်းတွေ ကျောက်တံခါးမှာ သွားရောက်ဝယ်ယူရင်း ဖြစ်ပွားခဲ့တာ၊ မိသားစုတွေနဲ့ အဆက်အသွယ်မရသေးဘူး" ဟု တပ်မဟာ (၃) KNLA သတင်းရင်းမြစ်က မဇ္ဈိမကိုပြောသည်။

ဇူလိုင်လ ၆ ရက်နေ့မှ ဇူလိုင်လ ၉ ရက်နေ့အတွင်း ဖမ်းဆီးခံရခြင်းဖြစ်ပြီး ဖမ်းဆီးခံရသူများသည် ကျောက်ကြီးမြို့နယ်၊ ကျောက်မော်ဘုရားကြီးကျေးရွာ၊ ပဲဒဲကောကျေးရွာ၊ ဗမာဝက်လာတောကျေးရွာနှင့် ဒါးကုလားကျေးရွာတို့မှ ဒေသခံအမျိုးသား ၁၇ ဦးဖြစ်ကာ ကျောက်တံခါးမြို့နယ်သို့ စားနပ်ရိက္ခာများ ဝယ်ယူရန်သွားစဉ် ဖမ်းဆီးခံရခြင်းဖြစ်သည်။

ထိုဒေသခံ ၁၇ ဦးအား ကျောက်တံခါးမြို့နယ် အခြေစိုက် စစ်ကောင်စီ ခြေလျင်တပ်ရင်း ခလရ (၂၆၄) မှ စစ်ကောင်စီတပ်သားများက ဖမ်းဆီးခဲ့ခြင်းဖြစ်ပြီး လက်ရှိတွင် ၎င်းတို့အား ကျောက်တံခါးမြို့နယ် ရဲစခန်းတွင် ချုပ်နှောင်ထားဆဲဖြစ်ကြောင်း KNU က ဆိုသည်။

ဒေသခံ ၁၇ ဦး ဖမ်းဆီးခံရသည့် ဖြစ်စဉ်အပြင် KNU တပ်မဟာ (၃) နယ်မြေအတွင်း အထိုင်ချနေသည့် စစ်ကောင်စီတပ်သားများက ဇူလိုင်လ ၆ ရက်နေ့မှ ၉ ရက်နေ့အတွင်း စစ်တောင်းမြစ်အနောက်ဘက်ခြမ်းနှင့် အရှေ့ဘက်ခြမ်းရှိ ကျေးရွာများအတွင်းသို့ လက်နက်ကြီး ၂၈ လုံးခန့် ပစ်ခတ်ခဲ့ပြီး ထိခိုက်ပျက်စီးမှုမရှိကြောင်း KNU က ထုတ်ပြန်ချက်တွင် ဖော်ပြထားသည်။

စစ်ကောင်စီတပ်​၏ လက်နက်ကြီးပစ်ခတ်မှုများကြောင့် ကျောက်ကြီးမြို့နယ်ရှိ ကျေးရွာ ၁၇ ရွာမှ ဒေသခံပြည်သူများသည် ဘေးလွတ်ရာ ဒေသများသို့ ခေတ္တ ထွက်ပြေးတိမ်းရှောင်နေကြရကြောင်း သိရသည်။

စာတည်း- သန့်ဇော်(သန်လျင်)

#mizzima
#စစ်ကောင်စီတပ်
#လက်နက်ကြီး
#ကျောက်ကြီးမြို့နယ်
#KNU
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U