ကျောင်းသားများသမဂ္ဂ ရုံးခန်းကို စစ်ကောင်စီတပ်က ဝင်ရောက်စီးနင်း အဖွဲ့ ဥက္ကဋ္ဌ အပါအဝင် ၃ ဦးအသတ်ခံရ
=================

MTO
(မဇ္ဈိမ)။ ။ စစ်ကိုင်းတိုင်း ဘုတလင်မြို့နယ်ကျောင်းသားများသမဂ္ဂ ရုံးခန်းကို ယနေ့ ဇူလိုင်လ ၂၈ ရက်နေ့ မနက်အစောပိုင်းတွင် စစ်ကောင်စီတပ်က ဝင်ရောက်စီးနင်းပြီးနောက် အဖွဲ့၏ ဥက္ကဋ္ဌ၊ ဒုဥက္ကဋ္ဌ နှင့်အတွင်းရေးမှူးတို့ ကို သတ်ဖြတ်သွားကြောင် ဗကသများအဖွဲ့ချုပ် မှ ဗဟိုအမှုဆောင်တစ်ဦးက ပြောသည်။

၎င်းက “အသတ်ခံရသူတွေကတော့ ဘုတလင်ကျောင်းသားများသမဂ္ဂ ( ဗကသများအဖွဲ့ချုပ်) ရဲ့ ဥက္ကဋ္ဌ ၊ ဒုဥက္ကဋ္ဌ နဲ့ အတွင်းရေးမှူး သုံးဦးကျဆုံးပါတယ်၊ ပြည်သူတွေထဲက ထိခိုက်ကျဆုံးမှု ရှိတယ်လို့လည်း သတင်းကြားရပေမယ့် ဗကသ အနေနဲ့ အတည်မပြုနိုင်သေးပါဘူး” ဟုပြောသည်။

စစ်ကောင်စီတပ်ဖွဲ့သည် ဘုတလင်မြို့မှ နံနက်စောစောအချိန်တွင် ညောင်ကန်ရွာရှိ ဗကသ ရုံးကို နေရာအတိအကျဖြင့် ဝင်ရောက်စီးနင်းသွားခြင်းဖြစ်ပြီး သတင်းပေးမှုကြောင့် ဖြစ်နိုင်ကြောင်း ဗကသ အဖွဲ့ တာဝန်ရှိသူက ဆိုသည်။

“ မနက် ၄နာရီဝန်းကျင်လောက်မှာ ရုံးကို ဝိုင်းထားပြီးမှ သိရတာမျိုးဖြစ်သွားပြီး ရှောင်တိမ်းချိန်မရလိုက်ဘူး၊ ဒါကြောင့်ပဲ သူတို့ ကျဆုံးသွားရတာပါ” ဟု ၎င်းက ပြောသည်။

စစ်ကောင်စီတပ်၏ ယခုလုပ်ရပ်သည် ဗကသ ကို အဓိကထား တိုက်ခိုက်သွားသည့်လုပ်ရပ်ဖြစ်ပြီး တော်လှန်ရေးသမားများကို သတ်ဖြတ်ရုံဖြင့် တော်လှန်ရေးဟာ ရပ်တန့်သွားမှာမဟုတ်ဘူးဟု ဗကသများ အဖွဲ့ချုပ်၏ ဗဟိုအမှုဆောင် က ပြောသည်။

၎င်းက " ဖက်ဆစ်တပ်က သူတို့လုပ်နေကျ ဖက်ဆစ်လုပ်ရပ်မျိုးတွေကို လုပ်သွားတဲ့အပေါ်မှာတော့ ကျနော်တို့အနေနဲ့ များများစားစား ပြောစရာမရှိပါဘူး။ သေချာတာက တော်လှန်ရေးသမားကို သတ်ဖြတ်ရုံနဲ့ တော်လှန်ရေးက ရပ်တန့်မှာမဟုတ်ဘူး။ ကျနော်တို့ ဆက်ပြီးတိုက်ပွဲဝင်သွားမယ်။ ပြည်သူ့ဒီမိုကရေစီတော်လှန်ရေးကို ဆုံးခန်းတိုင်တဲ့အထိ ဗကသများအဖွဲ့ချုပ်အနေနဲ့ဆက်လက် တိုက်ပွဲဝင်သွားမှာပါ” ဟုပြောသည်။

စစ်ကောင်စီတပ်ဖွဲ့သည် ဘုတလင်မြို့ ဗကသရုံးကို ဝင်ရောက်စီးနင်းပြီးနောက် ရုံးခန်းနေရာ၊ စာသင်ကျောင်းနှင့် အနီးအနား ကျေးရွာများရှိ နေအိမ်များကိုလည်း မီးရှို့ ဖျက်ဆီးသွားကြောင်းသိရသည်။

စစ်တပ်က အာဏာသိမ်းပြီးနောက် ဗကသများ အဖွဲ့ချုပ်အဖွဲ့ ဝင် ၁၇ ဦးထိ စစ်ကောင်စီတပ်၏ သတ်ဖြတ်ခြင်းကို ခံခဲ့ရကြောင်း ဗကသများအဖွဲ့ချုပ်ထံမှ သိရသည်။

စာတည်း- သန့်ဇော်(သန်လျင်)

#mizzima
#ဘုတလင်မြို့နယ်
#ကျောင်းသားများသမဂ္ဂ
#စစ်ကောင်စီတပ်
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အင်းတော်မြို့နယ်တွင် စစ်ရှောင်ဒေသခံ ၂ ဦး မိုင်းထိသေဆုံး
=================

ကိုခင်မောင်
(မဇ္စျိမ)။ ။ စစ်ကိုင်းတိုင်း၊ အင်းတော်မြို့နယ် ၊ အင်ပင်ရွာ၌ ဇူလိုင်လ ၁၇ရက်နေ့တွင် စစ်ဘေးရှောင်နှစ်ဦး မိုင်းထိသေဆုံးသွားကြောင်း Indaw Revolution -IR အဖွဲ့က ယမန်နေ့ ဇူလိုင်လ ၂၇ရက်တွင် သတင်းထုတ်ပြန်သည်။

“စစ်ရှောင်ပြည်သူနှစ်ယောက်၊ သူတို့က အင်းတော်နားလေးမှာ အိမ်ငှားပြီးစစ်ရှောင်နေတာ။ သူတို့က နံ့သာဘက်ကို သုံးဘီးနှင့် ဝက်ပို့သွားရင်းနဲ့ သူတို့ရဲ့လယ်ကို သွားကြည့်တာ အဲဒီလယ်နားလေးမှာမိုင်းမိပြီးတော့ ပွဲချင်းပြီးသေသွားတာ။ အပိုင်းပိုင်းပြတ်သွားတာပါ” ဟု Indaw Revolution – IR အဖွဲ့မှ တာဝန်ရှိသူက ပြောသည်။

မိုင်းထိသေဆုံးသူနှစ်ဦးသည် အင်းတော်မြို့နယ် နန့်သာရွာသား အသက် ၃၀နှစ်အရွယ် ကိုပေါ်လွင်ဦး နှင့် အင်ပင်ရွာသား ကိုမျိုးမြင့် တို့ဖြစ်ကြပြီး မော်တိတ်ဒေသတွင် စစ်ကောင်စီတပ်ဖွဲ့က စစ်ကြောင်းထိုးနေ၍ အင်းတော်မြို့အနီးတွင် စစ်ဘေးတိမ်းရှောင်နေကြသူများ ဖြစ်သည်ဟု ဆိုသည်။

အဆိုပါမိုင်းသည် မည်သည့်အဖွဲ့မှ ထောင်ထားသောမိုင်းဖြစ်သည်ကိုမူ မသိရသေးကြောင်းလည်း ဆိုသည်။

စစ်ကောင်စီတပ်ဖွဲ့သည် ယခုနှစ် မတ်လ ၂၀ရက်မှ စ၍ ယနေ့အချိန်ထိ အင်းတော်မြို့နယ် ၊ မော်တိတ်ဒေသရှိ ကျေးရွာအချို့တွင် တပ်စွဲနေသည့်အတွက် အောင်းကုန်း၊ အင်ပင်၊ နန့်သာ၊ မော်တိတ်၊ ရွာသာယာ စသည့်ကျေးရွာများမှ ဒေသခံ ၅,၀၀၀ကျော်သည် ဘေးလွတ်ရာသို့ စစ်ဘေးတမ်းရှောင်နေရကြောင်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)

#စစ်ကိုင်းတိုင်း
#အင်းတော်မြို့နယ်
#စစ်ဘေးရှောင်
#မိုင်း
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အလုပ်လိမ်လည်ခံရသည့် နိုင်ငံသားများကို အင်ဒိုနီးရှားသံရုံးက မြဝတီမှ ပြန်လည်ခေါ်ယူ
=========================

မြန်မာနိုင်ငံ ပဋိပက္ခ ကြုံကြိုက်နေသည့် မြဝတီတွင် အလုပ်လိမ်လည်ခံရသည်ဆိုသော အင်ဒိုနီးရှားနိုင်ငံသား ၂၆ ဦးကို ရန်ကုန်ရှိ အင်ဒိုနီးရှားသံရုံးက ဇူလိုင် ၂၅ ရက်တွင် ပြန်လည်ခေါ်ယူကြောင်း ဇူလိုင် ၂၈ ရက်၌ Antara သတင်းဌာနက သတင်းဖော်ပြသည်။

---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​လွိုင်ကော်တွင် လက်နက်ကြီးကြောင့် ၁ ဦးသေဆုံးပြီး ကိုယ်ဝန်ဆောင်အပါအဝင် အရပ်သား ၈ ဦးဒဏ်ရာရ
=================

001
(မဇ္စျိမ)။ ။ ကရင်နီပြည်နယ်၊ လွိုင်ကော်မြို့နယ်တွင် စစ်ကောင်စီတပ်၏ လက်နက်ကြီး ပစ်ခတ်မှုကြောင့် အရပ်သားတစ်ဦးသေဆုံးခဲ့ပြီး ကိုယ်ဝန်ဆောင်အမျိုးသမီးတစ်ဦး အပါအဝင် အရပ်သားရှစ်ဦး ထိခိုက်ဒဏ်ရာရရှိခဲ့ကြောင်း ကရင်နီအမျိုးသားများ ကာကွယ်ရေးတပ် (KNDF) က ဇူလိုင်လ ၂၆ ရက်နေ့တွင် ထုတ်ပြန်သည်။

ပြီးခဲ့သည့် ဇူလိုင်လ ၂၅ ရက် ညပိုင်းက လွိုင်လင်မြို့အခြေစိုက် စစ်ကောင်စီ ခမရ ၅၃၀ တပ်ရင်း ပစ်ခတ်ခဲ့သည့် လက်နက်ကြီးသည် ဝမ်ကုန်းကျေးရွာရှိ နေအိမ်တစ်လုံးပေါ်သို့ ကျရောက်ပေါက်ကွဲခဲ့ပြီး ကိုယ်ဝန်ဆောင်အမျိုးသမီးတစ်ဦး နှင့် ကလေး တစ်ဦး အပါအဝင် မိသားစုဝင်လေးဦး ထိခိုက်ဒဏ်ရာရရှိခဲ့ကြောင်း သိရသည်။
၎င်းတို့မှာ အသက်အန္တရာယ်မစိုးရိမ်ရသော်လည်း ဆေးကုသမှုခံယူနေကြရကြောင်း သိရသည်။

ဇူလိုင်လ ၂၀ရက်က ပဒါးညေးကျေးရွာနှင့် ကုန်းသာကျေးရွာတို့ကို စစ်ကောင်စီတပ်က လက်နက်ကြီးဖြင့် ပစ်ခတ်တိုက်ခိုက်ခဲ့သည်။ ထိုဖြစ်ရပ်တွင် ပဒါးညေးကျေးရွာမှ အရပ်သားပြည်သူသုံးဦးထိခိုက်ဒဏ်ရာရရှိခဲ့ပြီး ထိုအထဲမှ အသက် ၁၆ နှစ်အရွယ် အမျိုးသားတစ်ဦး သေဆုံးခဲ့ကာ ကုန်းသာကျေးရွာတွင် ကလေးငယ်တစ်ဦးနှင့် သက်ကြီးပိုင်း အမျိုးသားတစ်ဦး ထိခိုက်ဒဏ်ရာရရှိခဲ့ကြောင်း KNDF ကပြောသည်။

ထိုဖြစ်ရပ်များ နှင့်ပတ်သက်၍ KNDF ထံ ဖုန်းဖြင့် ဆက်သွယ်ခဲ့သော်လည်း ဖုန်းလိုင်းအခက်အခဲကြောင့် ဆက်သွယ်၍ မရပေ။
ယခု ၂၀၂၃ ခုနှစ် ဇန်နဝါရီလမှ ဇူလိုင်လ ၂၇ ရက်နေ့အထိ ခုနစ်လတာ ကာလအတွင်း နိုင်ငံတဝန်းစစ်ကောင်စီတပ်၏ လက်နက်ကြီးကျည်ကြောင့် ၁၅၇ ဦးသေဆုံးခဲ့ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ထုတ်ပြန်ထားသည်။

စာတည်း။ ။အောင်ကျော်ဖြိုး

#Mizzima
#ကိုယ်ဝန်ဆောင်
#အရပ်သားသေဆုံး
#လက်နက်ကြီးကျည်
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

သဘာဝပတ်ဝန်းကျင်ဆိုင်ရာ ဂျီ-၂၀ အကြီးအကဲတွေ အိန္ဒိယမှာကျင်းပတဲ့ရာသီဥတုဆိုင်ရာ ဆွေးနွေးပွဲသို့တက်ရောက်

#InternationalNews #reels #shorts #Mizzima #India

ZARA ပိုင်ရှင် INDITEX မြန်မာနိုင်ငံမှ အထည်ဝယ်ယူမှု ရပ်ဆိုင်းမည် | Business Round Up (28.7.2023)
==================

- ZARA ပိုင်ရှင် INDITEX မြန်မာနိုင်ငံမှ အထည်ဝယ်ယူမှု ရပ်ဆိုင်းမည်

- ၂၀၂၂ ခုနှစ်အတွင်း ‌ကန်ဒေါ်လာ ၄ ဘီလီယံခန့် တန်ဖိုးရှိ ကျောက်စိမ်းများ တရုတ်နိုင်ငံသို့ တင်ပို့ခဲ့

- ရိုဟင်ဂျာဒုက္ခသည်များ နေရပ်ပြန်ရပါက နိုင်ငံသားအခွင့်အရေးနှင့် လုံခြုံရေးအာမခံချက်ပေးရန် တောင်းဆို

- စံချိန်တင် အပူဆုံး ကာလသို့ရောက်ရှိနေပြီး တကမ္ဘာလုံး ဆူပွက်နေပြီ လို့ ကုလ သတိပေး

https://youtu.be/TeY3NA1PnCc
 
 
#BusinessRoundUp
#mizzimatv
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

နိုင်ဂျာအာဏာသိမ်းမှုကို ထောက်ခံကြောင်း စစ်တပ်အကြီးအကဲပြော

#InternationalNews #reels #shorts

​​မတူပီမြို့နယ်တွင် စစ်ကောင်စီလက်အောက်ခံ ဒုရဲအုပ်ကို CDF ဖမ်းဆီး
===================

ပါခွီး
(မဇ္စျိမ) ။ ။ ချင်းပြည်နယ် ၊ မတူပီမြို့နယ် ၊ မတူပီ - ဟားခါးလမ်းပေါ်တွင် စစ်ကောင်စီလက်အောက်ခံ ဒုရဲအုပ်တစ်ဦးကို စစ်ဆင်ရေးပြုလုပ်၍ ဖမ်းဆီးခဲ့ကြောင်း ချင်းလဲန်းကာကွယ်ရေးတပ်ဖွဲ့ (မတူပီ) CDF – Matupi က ယမန်နေ့ ဇူလိုင်လ ၂၇ရက်တွင်ထုတ်ပြန်သည်။
မတူပီမြို့နယ် ၊ ဖနိုင်ကျေးရွာနှင့် မတူပီခရိုင်ရုံးအကြား၌ ဇူလိုင်လ ၂၆ရက် ညနေ ၃နာရီ ၃၀မိနစ်အချိန်တွင် ဖမ်းဆီးရမိခဲ့ကြောင်း ဆိုသည်။

ဖမ်းဆီးရမိသူမှာ မတူပီမြို့နယ် ရဲတပ်ဖွဲ့မှ ဒုရဲအုပ် ချမ်းမြေ့အောင် (ကိုယ်ပိုင်အမှတ် - လ - ၂၃၁×××) ဆိုသူဖြစ်ပြီး ၎င်းနှင့်အတူ ခြောက်လုံးပြူး တစ်လက် ၊ လက်ပစ်ဗုံး နှစ်လုံး ၊ ကျည်ဆန် ၅၈ တောင့်တို့ကို ဖမ်းဆီးရမိခဲ့ကြောင်း ထုတ်ပြန်ချက်တွင် ဖော်ပြထားသည်။

“ကျနော်တို့ သူ့ကိုစစ်ဆေးနေဆဲဖြစ်ပါတယ် ၊ စစ်ဆေးပြီးမှ ဘယ်လိုအရေးယူဆောင်ရွက်မယ်ဆိုတာကို ပြန်လည်အသိပေးသွားပါ့မယ်” ဟု CDF – Matupi မှ တာဝန်ရှိသူတစ်ဦးက မဇ္စျိမသို့ပြောသည်။
ဖမ်းဆီးရမိသူအား စစ်ဆေးပြီး ၎င်းကျူးလွန်သည့် ပြစ်မှုအတိုင်း တရားသဖြင့် စီရင်သွားမည်ဖြစ်ကြောင်းလည်း သိရသည်။

ယခုဖမ်းဆီးရမိသောနေရာသည် မတူမီမြို့နယ်အတွင်းရှိ စစ်ကောင်စီတပ်ဖွဲ့ စိုးမိုးထားသော နယ်မြေဖြစ်သော်လည်း ပြည်သူ့ကာကွယ်ရေးတပ်ဖွဲ့များအနေဖြင့် ၎င်းတို့(စစ်ကောင်စီလက်‌အောက်ခံများ)ကို နေရာမရွေး တိုက်ခိုက်နိုင်ကြောင်း သိစေလိုသောကြောင့် စစ်ဆင်ရေးတစ်ရပ်အဖြစ် ပြုလုပ်၍ ဖမ်းဆီးခဲ့ခြင်းဖြစ်ကြောင်း ဆိုသည်။

ဇူလိုင်လ ၁၀ရက်နေ့က CDF – Matupi တပ်ဖွဲ့ ၏ ဦးဆောင်မှုဖြင့် ဒေါက်တာ အေးငြိမ်းသူနှင့်အတူ ဒုတိယအကြိမ်မြောက် အခြေခံဆေးသင်တန်းကို အောင်မြင် စွာပြုလုပ်နိုင်ခဲ့ကြောင်းလည်း သိရသည်။

မတူပီမြို့နယ်တွင် ကျန်းမာရေးစောင့်ရှောက်မှုအားနည်းလာသဖြင့် ပြည်သူနှင့် တပ်ဖွဲဝင်များ အခက်အခဲများ ကြုံတွေ့နေရပြီး အသက်မဆုံးရှုံးသင့်သော အခြေအနေများတွင် အသက်ပေးရသော အခြေအနေမျိုးလည်း ကြုံတွေ့နေရကြောင်း ဆိုသည်။

အဆိုပါ အခြေခံဆေးဝါးသင်တန်းကို သင်တန်းသား ၂၇ဦး တက်ရောက်ကြပြီး ရက် ၂၀ကြာ ပို့ချခဲ့ကြောင်းနှင့် ဆေးဝါးအခက်အခဲများ ရှိသဖြင့် မိဘပြည်သူများအနေဖြင့် ပူးပေါင်းပါဝင်ပေးကြပါရန် CDF – Matupi က မေတ္တာရပ်ခံထားသည်။

စာတည်း။ ။ ဖူးသိမ်ကျ
စာတည်း ။ ။သန့်ဇော်(သန်လျင်)

#ချင်းပြည်နယ်
#မတူပီမြို့နယ်
#စစ်ကောင်စီတပ်
#ဖမ်းဆီးမှု
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ယူကရိန်းလေယာဉ်ကွင်းတွေနဲ့ အနောက်အုပ်စုရဲ့ လက်နက်တွေသိုလှောင်ရာနေရာတွေကို တိုက်ခိုက်ခဲ့ကြောင်း ရုရှားပြော

#InternationalNews #reels #shorts #Ukraine #Russia #Mizzima

ဇူလိုင်လ ၂၈ ရက်၊ ညနေ ၄ နာရီ၊ Mizzima News Hour မဇ္ဈိမသတင်းအစီအစဉ်
======================

01:00-ငွေကြေးတန်ဖိုးကျဆင်းနေချိန်မှာပဲ ပြည်တွင်းစီးပွားရေး ၄ ရာခိုင်နှုန်း တိုးတက်လာဖို့ စစ်‌ခေါင်းဆောင် မျှော်မှန်းတဲ့သတင်း

03:33-YGF ဆက်သွယ်ရေးရုံးခန်း ဝင်စီးခံရပြီး လက်နက်ခဲယမ်းတွေ ဆုံးရှုံးတဲ့သတင်း

08:17-၂၀၂၂ ခုနှစ်အတွင်း ‌ကန်ဒေါ်လာ ၄ ဘီလီယံခန့် တန်ဖိုးရှိ ကျောက်စိမ်းများ တရုတ်နိုင်ငံသို့ တင်ပို့ခဲ့တဲ့သတင်း

13:46--သဘာဝပတ်ဝန်းကျင်ဆိုင်ရာ ဂျီ-၂၀ အကြီးအကဲတွေ အိန္ဒိယမှာကျင်းပတဲ့ရာသီဥတုဆိုင်ရာ ဆွေးနွေးပွဲသို့ တက်ရောက်တဲ့သတင်းတွေအပါအဝင် တခြားစိတ်ဝင်စားဖွယ်နဲ့ အရေးကြီးသတင်းတွေကို တင်ဆက်ပေးပါတော့မယ်။

https://youtu.be/v3vDsNuDh1Q

#4pmnews
#Mizzimanewshour
#MizzimaTV
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

ပါပူဝါနယူးဂီနီသို့ အမေရိကန်ကမ်းရိုးတန်းစောင့်သင်္ဘော ဖြန့်ကြက်ချထား

#InternationalNews #reels #shorts #American #Mizzima

ပစ်ချခံ တိုက်လေယာဉ်၏ လေယာဉ်မှူးနှစ်ဦးအား ရာထူးတိုး ဂုဏ်ထူးဆောင်ဘွဲ့ ချီးမြှင့်
====================

ဂျူချန်း
(မဇ္ဈိမ)။ ။ ထိုင်းနိုင်ငံနယ်စပ်တွင်ရှိသည့် ကရင်နီပြည်နယ် ရွာသစ်မြို့အနီးတွင် ကရင်နီပြည်လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ)မှ စစ်ကောင်စီ၏ တိုက်လေယာဉ်တစ်စင်းကို ပစ်ချနိုင်ခဲ့ပြီး ထိုလေယာဉ်မောင်းနှစ်ဦးအား စစ်ကောင်စီခေါင်းဆောင် ဗိုလ်ချုပ်မှူးကြီး မင်းအောင်လှိုင်က ရာထူးတစ်ဆင့်စီတိုးပေးကာ ဂုဏ်ထူးဆောင်ဘွဲ့ ချီးမြှင့်ခဲ့ကြောင်း ကလလတ မှ ယမန်နေ့ ဇူလိုင်လ ၂၇ ရက်နေ့တွင် ထုတ်ပြန်ခဲ့သည်။

ထိုလေယာဉ်သည် တောင်ငူလေတပ်မှ ဇွန်လ ၃၀ ရက်နေ့တွင် ထွက်ခွာခဲ့သည့် K8W အမျိုးအစားဖြစ်ပြီး လေယာဉ်အမှတ်(၃၉၃၅) ဖြစ်ကာ ဗိုလ်ကြီးသော်ဇင်(လေ ၄၁၉၈) နှင့် ဗိုလ်အောင်ဖြိုးကျော်(လေ ၄၃၄၉) တို့ မောင်းနှင်ခဲ့ခြင်းဖြစ်ကြောင်း ကလလတ မှ စုံစမ်းရရှိထားသည့် တပ်တွင်းအချက်အလက်တွင် ဖော်ပြထားသည်။

ထိုအချက်အလက်ထဲတွင် ဗိုလ်ကြီး သော်ဇင်နှင့်၊ ဗိုလ်အောင်ဖြိုးကျော် တို့ သည် K8W လေယာဉ်အမှတ်(၃၉၃၅) အား ဇွန်လ ၃၀ ရက်နေ့တွင် ရွာသစ်အနီး ခမမပည(LB 464160) နေရာသို့ ၂၃ မမကျည် ၈၀တောင့်၊ ၅၀ KG ဗုံး လေးလုံး၊ ၁၂၀ ပေါင်ဗုံး နှစ်လုံးတပ်ဆင်ကာ တောင်ငူလေယာဉ်ကွင်းမှ နံနက် ၁၀နာရီ ၄၃ မိနစ်တွင် စတင်ပျံတက်ခဲ့ပြီး ရည်မှန်းချက်နေရာအား တိုက်ခိုက်ခဲ့ကာ ၁၀နာရီ ၅၉မိနစ်တွင် ဆက်သွယ်မှု ပြတ်တောက်ခဲ့ကြောင်း၊ ပြန်လည်ဆင်းသက်ရမည့် သတ်မှတ်ချိန်အတွင်း တောင်ငူလေယာဉ်ကွင်းသို့ ပြန်လည်ရောက်ရှိလာခြင်းမရှိခဲ့ ဟု စစ်ကောင်စီ၏ လေတပ်ကာကွယ်ရေးဦးစီးချုပ်ရုံး၏ စာအမှတ် ၃၀၂၁၁၅/၂၁၂၀ အစီရင်ခံစာတွင် ဖော်ပြထားသည်။

ကရင်နီတွင် ပစ်ချခံရသည့် လေယာဉ်သည် တောင်ငူလေတပ်မှ K8အမျိုးအစား တိုက်လေယာဉ်ဖြစ်ပြီး ယာဉ်မောင်းနှစ်ဦး ပျောက်ဆုံးနေခဲ့ကြောင်း တောင်ငူလေတပ် တပ်တွင်းသတင်းပေးက မဇ္ဈိမကို ပြီးခဲ့သည့် ဇူလိုင်လ ၂ရက်နေ့တွင် အတည်ပြု ပြောခဲ့သည်။

တောင်ငူလေတပ်မှ လေယာဉ်မှူးနှစ်ဦး တာဝန်ထမ်းဆောင်နေစဉ် လေယာဉ်နှင့်အတူ ပျောက်ဆုံးခဲ့သည့် ဖြစ်စဉ်နှင့် ပတ်သက်၍ စုံစမ်းစစ်ဆေးရန် ဗိုလ်မှူး ရဲလင်းမြတ်(လေ ၂၉၇၆) ကို ဥက္ကဋ္ဌအဖြစ်နှင့် အဖွဲ့ဝင်အဖြစ် ဗိုလ်ကြီး အောင်မြင့်မြတ် (လေ ၃၅၃၅) နှင့် ဗိုလ် ဖြိုးပြည့်စိုး (လေ ၄၁၀၀) တို့အား ဇူလိုင်လ ၃ ရက်နေ့တွင် တာတန်ပေးအပ်ခဲ့ကြောင်း တပ်တွင်းအချက်အလက်အရ သိရသည်။
ပစ်ချခံရသည့် လေယာဉ်နှင့်အတူ တစ်ပါတည်းသေဆုံးခဲ့သည့် လေယာဉ်မှူးနှစ်ဦးအား စစ်ကောင်စီခေါင်းဆောင် မှ အမိန့်ကြော်ငြာစာအမှတ် ၁၂၅/၂၀၂၃ တွင် ရာထူးတစ်ဆင့်စီ တိုးမြှင့်ခဲ့ပြီး ဂုဏ်ထူးဆောင်ဘွဲ့ချီးမြှင့်ကြောင်း ကလလတ မှ ထုတ်ပြန်ခဲ့သည်။

လေယာဉ်မောင်း ဗိုလ်ကြီးသော်ဇင်ကို ဗိုလ်မှူး ရာထူးတိုးကာ “သူရဘွဲ့” ချီးမြှင့်ခဲ့ပြီး ဗိုလ်အောင်ဖြိုးကျော်ကိုမူ ဗိုလ်ကြီး ရာထူးတိုးကာ “သူရဲကောင်းမှတ်တမ်းဝင်တံဆိပ်” ချီးမြှင့်ခဲ့ကြောင်း စစ်ကောင်စီလက်အောက်ခံ သတင်းစာများတွင် ဇူလိုင် ၂၄ ရက်နေ့၌ ဖော်ပြခဲ့ကြသည်။

ပြီးခဲ့သည့် ဇွန်လ ၃၀ ရက်နေ့နံနက် ၁၁နာရီခန့်တွင် ဘော်လခဲခရိုင် ရွာသစ်မြို့၊ BGF တပ်ရင်းအမှတ် (၁၀၀၅) အနီးတွင် စစ်ကောင်စီ ရဟတ်ယာဉ်တစ်စီးကို ပစ်ချနိုင်ခဲ့ကြောင်း ကလလတ ဗဟိုကော်မတီ တာဝန်ရှိသူတစ်ဦးက မဇ္ဈိမကို အတည်ပြုပြောကြားခဲ့သည်။

"ဂျက်လေယာဥ်က ခပ်နိမ့်နိမ့်ပျံသွားတာကြောင့် ပွင့်ပွင့်လင်းလင်းပြောရရင် ကျွန်တော်တို့ဆီမှာ လေယာဥ်ပစ်လည်းမရှိပါဘူး ။ ကျွန်တော်တို့ဆီမှာရှိတဲ့ လက်နက်အကုန်လုံးနဲ့ ဝိုင်းပစ်ကြတာ၊ ရှိတာထဲမှာ အကြီးဆုံးဆိုလို့ သူတို့ဆီကရထားတဲ့ G4 ပဲရှိတယ်" ဟု ကလလတမှ ရဲဘော်လော်ရင်းစိုးက မဇ္ဈိမကိုပြောသည်။

နအဖ စစ်အစိုးရလက်ထက်တွင် နယ်ခြားစောင့်တပ်အဖြစ် အသွင်ပြောင်းဖွဲ့စည်းခံခဲ့ရသည့် ကလလတ သည် ဇွန်လ ၁၃ ရက်နေ့တွင် စတင်ခဲ့သည့် မယ်စဲ့တိုက်ပွဲမှစတင်ကာ အာဏာသိမ်းစစ်ကောင်စီကို ပြတ်ပြတ်သားသား ပြန်လည်တိုက်ခိုက်သွားမည်ဖြစ်ပြီး NUG၊ CRPH အပါအဝင် တော်လှန်ရေးအင်အားစုများနှင့်ပူးပေါင်းကာ တိုက်ပွဲဝင်သွားမည်ဖြစ်ကြောင်း ဇူလိုင်လ ၁ ရက်နေ့တွင် တရားဝင် ထုတ်ပြန်ခဲ့သည်။

ကရင်နီပြည်နှင့် ထိုင်းနယ်စပ်တွင်တိုက်ပွဲဖြစ်ပွားနေသဖြင့် မယ်စဲ့၊ ဘော်လခဲနှင့် ဖားဆောင်းမှ ဒေသခံ ၅,၀၀၀ ခန့်သည် ထိုင်းနိုင်ငံနယ်စပ်တွင် စစ်ဘေးရှောင်နေရဆဲဖြစ်ကာ လက်ရှိတွင် ဖားဆောင်းမြို့၊ သံလွင်မြစ်အရှေ့ခြမ်း နှင့် လွိုင်ကော်-မိုးဗြဲ လမ်းတစ်လျှောက်တွင် ကရင်နီတော်လှန်ရေးပူးပေါင်းတပ်ဖွဲ့နှင့် စစ်ကောင်စီတပ်တို့ကြား တိုက်ပွဲပြင်းထန်နေဆဲဖြစ်ကြောင်း ဖားဆောင်း PDF ပြန်ကြားရေးတာဝန်ခံထံမှ သိရသည်။

စာတည်း - သန့်ဇော်(သန်လျင်)

#mizzima
#NUG
#CRPH
#PDF
#ကရင်နီပြည်နယ်
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

July - 28 [4 Pm] Mizzima News Hour

Mizzima Headline News

#4pmnews #mizzimanewshour #reels #shorts

​​ဘုတလင်မြို့နယ် ကျေးရွာ ၃ ရွာကို စစ်ကောင်စီတပ် မီးရှို့ ၊ ဒေသခံ ၅,၀၀၀ ကျော် စစ်ရှောင်နေရ
===================

လွှမ်းမိုး
(မဇ္ဈိမ)။ ။ စစ်ကိုင်းတိုင်း ၊ ဘုတလင်မြို့နယ် ၊ အနောက်မြောက်ခြမ်းတွင် စစ်ကြောင်းထိုးနေသည့် စစ်ကောင်စီတပ်က ညောင်းကန်ကျေးရွာ ရှိ အ.က.သ ရုံးကို ဝင်ရောက်စီးနင်းပြီး ညောင်းကန် ၊ ရွာသာ နှင့် ဖျောက်ဆိပ်ကုန်း ကျေးရွာများကို နေအိမ်များကို မီးရှို့ဖျက်ဆီးသည်ဟု ဒေသခံများထံမှ သိရသည်။

ဇူလိုင်လ ၂၈ ရက် နံနက်ပိုင်း ၄ နာရီ အချိန်မှ စတင်ကာ ညောင်းကန်ကျေးရွာ ရှိ အ.က.သ ရုံးကို ဝင်ရောက်စီးနင်းပြီး နံနက် ၉ နာရီ အချိန်တွင် ညောင်းကန် ၊ ရွာသာ နှင့် ဖျောက်ဆိပ်ကုန်း ကျေးရွာများရှိ နေအိမ် ၂၂ လုံးကို မီးရှို့ ဖျက်ဆီးခဲ့ခြင်းဖြစ်သည်။

ဘုတလင်မြို့ပေါ်က စစ်ကြောင်း နှင့် န.မ.ခ က ထွက်လာသည့် စစ်ကြောင်း နှစ်ကြောင်းပေါင်းပြီး စစ်အင်အား ၁၀၀ ခန့်ဖြင့် ညောင်ကန် ၊ ရွာသာ ၊ ဖျောက်ဆိပ်ကုန်း စတဲ့ ကျေးရွာတွေကို ဝင်ရောက် စစ်ကြောင်းထိုးခဲ့တာ ဖြစ်ကြောင်း ဒေသခံ တစ်ဦးက မစ္ဈိမကို အခုလိုပြောသည်။

“ ညောင်ကန်ကျေးရွာက နေအိမ် ၁၂ လုံး ၊ ရွာသာကျေးရွာ က နေအိမ် ခုနစ်လုံးနှင့် ဖျောက်ဆိပ်ကုန်း ကျေးရွာက နေအိမ် သုံးလုံး စုစုပေါင်း နေအိမ် ၂၂ လုံးကို စစ်ကောင်စီတပ်က မီးရှို့သွားတာ ဖြစ်ပါတယ်။ အခုမှ ကျေးရွာအတွင်းကို ကာကွယ်ရေးအဖွဲ့တွေ ဝင်ရောက်နေတာ ဖြစ်ပါတယ် ” ဟု လုံခြုံရေးအရ အမည်မဖော်လိုတဲ့ ဒေသခံတစ်ဦးက ဆိုသည်။

အဆိုပါ စစ်ကောင်စီတပ်က ညောင်ကန်ကျေးရွာအတွင်းရှိ အ.က.သ ရုံးခန်းကို ဝင်ရောက်စီးနင်းပြီး ရဲဘော်ငဘီး ၊ ကြယ်စင် နှင့် ကျွဲကြီးတို့ အပြင် အခြားဒေသခံများကိုလည်း သတ်ဖြတ်သွားကြောင်း ကာကွယ်ရေးရဲဘော်များက ယခုလိုပြောသည်။

“ စစ်ကြောင်းမှာ ဒေသခံ ပြည်သူတွေကို ဖမ်းဆီးပြီး ဓားစာခံအဖြစ် ခေါ်လာတာတွေလည်း ရှိပါတယ်။ ယခုအချိန်ထိ သိထားရတာက အ.က.သ ရဲဘော် သုံးဦး နှင့် အခြားဒေသခံ သုံးဦး သတ်ဖြတ်ခံထားရတဲ့ ရုပ်အလောင်းတွေကို တွေ့ရှိထားပါတယ်။ သတ်ဖြတ်ခံရသူတွေ ဒီထက်လည်း ပိုနိုင်တယ်” ဟု ဒေသကာကွယ်ရေး ရဲဘော်တစ်ဦးက ဆိုသည်။

ထိုကဲ့သို့ စစ်ကောင်စီတပ်က ဘုတလင်မြို့နယ်တွင် ရွာစဉ်ထိုး လှည့်လည် စစ်ကြောင်းထိုးနေသည့်အတွက် ညောင်ကန် ၊ ရွာဇာ ၊ စိုင်ပြင်လေး ၊ ဖြောက်ဆိပ်ကုန်း ၊ သမန်းတော စတဲ့ ကျေးရွာများမှ ဒေသခံ ပြည်သူ ၅,၀၀၀ ကျော် စစ်ကောင်စီတပ်ရန်မှ စစ်ဘေးရှောင်နေရကြောင်း သိရသည်။

စာတည်း - သန့်ဇော်(သန်လျင်)

#mizzima
#စစ်ကောင်စီတပ်
#စစ်ဘေးရှောင်
#ဘုတလင်မြို့နယ်
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ငွေကြေးလိုအပ်ချက် မရှိဘူးဆိုပြီး အလိမ်အညာတွေနဲ့ ဟန်ဆောင်နေရပြီဖြစ်တဲ့ စစ်ကောင်စီ | သတင်းသုံးသပ်ချက်
=================

မြန်မာနိုင်ငံက အလုပ်သမားတွေဟာ ကိုဗစ်ကပ်ရောဂါနဲ့ ၂၀၂၁ စစ်တပ်အာဏာသိမ်းမှု ဆိုးကျိုးတွေရဲ့ နောက်ဆက်တွဲအဖြစ် လူမှုစီးပွား ပြဿနာတွေကို တွေ့ကြုံခံစားနေရတယ်လို့ အပြည်ပြည်ဆိုင်ရာ အလုပ်သမားအဖွဲ့ (ILO) က ပြောကြားလိုက်ပါတယ်။
အလုပ်အကိုင် ရရှိနှုန်း၊ အလုပ်အရည်အသွေးနဲ့ ကုန်ထုတ်စွမ်းအားတွေ ဆက်လက်ကျဆင်းနေပြီး စိန်ခေါ်မှုတွေ ရှိနေတယ်လို့ ILO က ဇူလိုင် ၂၇ ရက်နေ့မှာ ဖော်ပြထားပါတယ်။

မြန်မာနိုင်ငံရဲ့ အလုပ်သမားဈေးကွက်ဟာ တချို့ကဏ္ဍတွေမှာ အနည်းငယ်တိုးတက်တယ်လို့ ဆိုနိုင်ပေမယ့် များပြားလှတဲ့လူဦးရေအတွက် အမီလိုက်နိုင်ခြင်း မရှိတာကြောင့် ၂၀၂၂ ခုနှစ်မှာ အလုပ်လုပ်နိုင်တဲ့ လူဦးရေရဲ့ ၅၄ ဒသမ ၅ ရာခိုင်နှုန်းပဲ အလုပ်အကိုင် ရရှိပါတော့တယ်။ ဒါဟာ ၂၀၁၇ ခုနဲ့ နှိုင်းယှဉ်ရင် ၈ ဒသမ ၂ ရာခိုင်နှုန်း ကျဆင်းသွားတာပါ။

ကြုံရာကျဘန်းလုပ်ကိုင်သူ ပိုများလာပြီး အလုပ်အကိုင်အရည်အသွေးတွေလည်း ကျဆင်းနေတဲ့အပြင်၊ ကုန်ထုတ်စွမ်းအားလည်း ကျဆင်းနေတယ်လို့ ILO ရဲ့အစီအရင်ခံစာမှာ ဖော်ပြထားပါတယ်။

အဲဒီလို အလုပ်လက်မဲ့ ဦးရေ ကျဆင်းလာပြီး ပြည်သူတွေရဲ့ ဝင်ငွေတွေ လျော့ကျလာတဲ့အချိန်မှာ ငွေကြေး ဖောင်းပွမှုနှုန်းက မြင့်တက်လာတာ၊ ကုန်ဈေးနှုန်းကြီးမြင့်လာတာကြောင့် မြန်မာပြည်သူတွေရဲ့ လူမှုစီးပွား ဘဝတွေ ထိခိုက်နစ်နာနေရပြီဖြစ်ပါတယ်။

ILO ရဲ့ အစီအရင်ခံစာမှာ လူမှုစီးပွားဘဝတွေ ထိခိုက်နေပြီလို့ဆိုပေမယ့် စစ်ကောင်စီခေါင်းဆောင် ကတော့ လာမယ့် ၂၀၂၃ - ၂၀၂၄ ဘဏ္ဍာနှစ်မှာ စီးပွားရေး ၄ ရာခိုင်နှုန်းတိုးတက်လာဖို့ မျှော်မှန်းထားတယ်လို့ ပြောနေပါတယ်။

နိုင်ငံတော်အနေနဲ့ ဘဏ္ဍာငွေလိုအပ်ချက် မရှိတဲ့အပြင် နိုင်ငံတွင်းလည်ပတ်သုံးစွဲငွေတွေ မျှတစွာ ရှိနေတဲ့ အတွက် နှစ်သောင်းတန် ငွေစက္ကူထုတ်တာဟာ ငွေကြေးဖောင်းပွမှု မဖြစ်နိုင်ဘူးလို့လည်း စစ်ကောင်စီ ခေါင်းဆောင်က ဆိုပါတယ်။

နိုင်ငံအတွင်း ငွေကြေးလည်ပတ်မှုဟာ ပုံမှန်အခြေအနေမှာ ရှိနေပြီး ဘဏ်တွေမှာလည်း ငွေကြေးအပ်နှံတာ များပြားနေတယ်လို့ စစ်ကောင်စီခေါင်းဆောင်က ပြောလိုက်ပါသေးတယ်။

သူ့အနေနဲ့ နိုင်ငံ့စီးပွား မြှင့်တင်ရေးကို အစွမ်းကုန်ကြိုးစားခဲ့ပြီး ဘဏ္ဍာငွေ သုံးစွဲမှုမှာ နိုင်ငံခြားချေးငွေ လုံးဝ ချေးယူခြင်း မရှိဘဲ ပြည်ပထောက်ပံ့ငွေ အနေနဲ့လည်း ၂၀၂၂ ခုနှစ်နှောင်းပိုင်းရောက်မှာ အနည်းငယ်သာ ရရှိတယ်လို့ ပြောပါတယ်။

တကယ့်မြေပြင်အခြေအနေမှာတော့ စစ်ကောင်စီ ခေါင်းဆောင်ပြောတာနဲ့ တခြားစီဆိုတာ လက်တွေ့ ရင်ဆိုင်နေရသူတွေ အားလုံး သိကြမှာပါ။

ဘဏ်တွေမှာ ကြည့်လိုက်ရင်လည်း ငွေသွင်းသူထက် ငွေထုတ်သူတွေက ပိုများနေပြီး ငွေကြေး တက်နိုင်သူ တွေက ခိုင်မာမယ့် အိမ်၊ ခြံ၊ မြေတွေ ဝယ်ယူတာမျိုးကို ပိုလုပ်လာကြလို့ အိမ်၊ ခြံ၊ မြေ ဈေးတွေ အဆမတန် မြင့်တက်နေတာပါ။

နိုင်ငံခြားငွေ လဲလှယ်နှုန်းနဲ့ ရွှေဈေးဟာလည်း ၂၀၂၁ ခုနှစ် အရှေ့ပိုင်းကထက် စာရင် ၂ ဆကျော်အထိ မြင့်တက်နေပြီး ကျပ် ၂ သောင်းတန် ငွေစက္ကူ ဂရက်ကြောင့် ရွှေဆိုင်တွေက အရောင်းပိတ်တာ၊ နိုင်ငံခြားငွေ လဲလှယ်တဲ့ နေရာတွေ ပိတ်ထားတာအထိ လှုပ်ခတ်နေတာ ဖြစ်ပါတယ်။

အခြေခံလူတန်းစားတွေ အတွက် မဖြစ်မနေ လိုအပ်ချက်ဖြစ်တဲ့ အခြေခံစားသောက်ကုန်တွေ ဆိုလည်း တစ်နေ့ထက် တစ်နေ့ မြင့်တက်နေတာပါ။ ဆန်ကြမ်းတစ်အိတ်ကို ကျပ် ၁ သိန်းနား ကပ်နေပါပြီ။

စစ်ကောင်စီ ထုတ်မယ့် ကျပ် ၂ သောင်းတန် ငွေစက္ကူကို အမျိုးသားညီညွတ်ရေး အစိုးရက တရားမဝင်ဘူးလို့ ကြေညာခဲ့ပါတယ်။ တရားမဝင်ငွေစက္ကူတွေ ရိုက်နှိပ်ထုတ်ဝေတဲ့အတွက် ငွေကြေးဖောင်းပွမှုကို ဖြစ်စေတာဟာ ပြည်သူတွေရဲ့ လုပ်အားနဲ့ ချွေးနဲစာကို ခိုးယူနေတာလည်း ဖြစ်တယ်လို့ ဆိုထားပါတယ်။
စစ်ကောင်စီခေါင်းဆောင် အနေနဲ့ ဘဏ္ဍာငွေလိုအပ်ချက် မရှိဘူးလို့ ဆိုတာဟာ ဟန်ကိုယ့်ဖို့ သက်သက် လိမ်ညာပြောနေတာသာ ဖြစ်ပါတယ်။ နိုင်ငံခြားချေးငွေ ချေးယူခြင်းမရှိဘူးဆိုတာကတော့ သူ့ကို ဘယ်နိုင်ငံကမှ မချေးတော့လို့ပါ။

စစ်ကောင်စီ အနေနဲ့ အရင်ကြွေးတွေတောင် လည်ပင်းနစ်နေပါပြီ။ နွေဦးတော်လှန်ရေး အောင်ပွဲခံပြီး ပြည်သူ့အစိုးရ တက်လာတဲ့ အခါမှာ အာဏာသိမ်းပြီးမှ စစ်ကောင်စီကို ချေးထားတဲ့ ငွေကြေးတွေအတွက် တာဝန်မယူဘူးဆိုတာ သိထားတဲ့ ဘယ်အစိုးရကမှ စစ်ကောင်စီကို ချေးရဲမှာ မဟုတ်ပါဘူး။

စစ်ကောင်စီဟာ ပြည်တွင်းလည်ပတ်ဖို့ ငွေကြေးလိုအပ်နေလို့ ကျပ် ၂ သောင်းတန် ငွေစက္ကူ တွေကို ရိုက်နှိပ်ထုတ်ဝေတယ်ဆိုတာ သိသာစေတဲ့အချက်က ဒီကိစ္စကို မကြာခဏ ရှင်းနေတာနဲ့တင် သိသာ နေပြီဖြစ်ကြောင်း ဖော်ပြလိုက်ပါတယ်။

#၂ သောင်းတန်
#ILO
#ကိုဗစ်ကပ်ရောဂါ

​​ထိုးစစ် ဆင်နွှဲနေသည့် ပဲခူးတိုင်းမှ ပြည်သူ့ကာကွယ်ရေးတပ်ဖွဲ့များ စစ်ရေးအရှိန်တိုးမြှင့်မည်
======================

ရွှေနွယ်
(မဇ္ဈိမ)။ ။ ပဲခူးတိုင်း စစ်ဒေသသခွဲအတွင်းမှ ပြည်သူကာကွယ်ရေးတပ်ဖွဲ့များသည် စစ်ကောင်စီတပ်ကို ထိုးစစ်ဆင်နွှဲလျက်ရှိပြီး စစ်ရေးအရှိန်တိုးမြှင့်သွားမည်ဖြစ်ကြောင်း
တပ်ရင်းတပ်ဖွဲ့များ၏ တာဝန်ရှိသူများက မဇ္ဈိမကိုပြောသည်။

ခုခံစစ်ဆင်နွှဲခဲ့သည့် ပြည်သူ့ကာကွယ်ရေးတပ်ဖွဲ့များသည် လက်နက်အင်အားအတန်အသင့် ရရှိလာခြင်းနှင့်အတူ တိုက်ခိုက်စွမ်းဆောင်ရည်တိုးမြင့်လာပြီး ၂၀၂၃ ခုနှစ် နှစ်စပိုင်းမှ စတင်ကာ ထိုးစစ်ဆင်နွှဲနိုင်ခဲ့ကြောင်း ပဲခူးတိုင်း စစ်ဒေသခွဲ စစ်ရေးဌာနတာဝန်ခံ ကိုသော်မတ်စ်မှ မဇ္ဈိမကိုပြောသည်။

“ကျွန်တော်တို့ ၂၀၂၂ မှာတုန်းက ချောင်းမြောင်းပြီးမှ ပြောက်ကျားလုပ်ရတာပါ။ ၂၀၂၃ မှာတော့ တဆင့်တက်ပြီးတော့ လက်နက်နဲ့သွားရောက်တိုက်ခိုက်တဲ့ အဆင့်ကိုတော့ တိုးသွားပြီ။ စစ်ရေးဟာ ဘယ်လောက်ရာနှုန်းထိ တိုးလာပါပြီဆိုပြီး ပြောဖို့တော့ခက်တယ်။ သို့ပေမယ့် ၂၀၂၂ မှာ မလုပ်ဆောင်နိုင်ခဲ့တဲ့ စစ်ဆင်ရေးအကြီးကြီးတွေကို ၂၀၂၃ မှာ ပဲခူးတိုင်းအတွင်းလုပ်ဆောင်လာနိုင်တယ်” ဟု ကိုသောမတ်စ်က ပြောသည်။

စစ်ရေးအရှိန်တိုးမြှင့်ရန်အတွက် လိုအပ်နေသည့် မမ လက်နက်များဝယ်ယူနိုင်ရန် "မမအားနဲ့မိစ္ဆာရှင်းဖို့ပဲခူးမြေကိုထောက်ကူစို့" ကမ်ပိန်းပြုလုပ်နေကြောင်းသိရသည်။

"ကျွန်တော်တို့မှာ လက်ရှိ လက်နက်ကြီးမရှိဘူး ။ ကိုယ်တိုင်ထုတ်လက်လုပ် ၄၀ မမတွေပဲရှိတာ။ ဒါတောင်စစ်ကောင်စီတပ်တွေ မကပ်ရဲကြဘူး။ ရင်ဆိုင်တိုက်ပွဲတွေမှာလည်း သူတို့ဘက်က အထိနာကြတယ်။ တကယ်လို့သာ ကျွန်တော်တို့မှာ လက်နက်ကြီးရှိလာမယ်ဆိုရင် မှန်းထားတာထက်ပို လုပ်ဆောင်လာနိုင်မယ်။ နယ်မြေစိုးမိုးနိုင်ဖို့လည်း ဆောင်ရွက်လာနိုင်မယ်။ တော်လှန်ရေးမှာ နောက်ထပ်အရွှေ့တစ်ခုကို ထပ်မြင်လာရမယ်” ဟု သာယာဝတီခရိုင်ပြည်သူ့ကာကွယ်ရေးတပ်ဖွဲ့၏ တာဝန်ရှိသူတစ်ဦးက ပြောသည်။

လက်နက်ဖြည့်တင်းရန် လုပ်ဆောင်နေသည့် ထိုကမ်းပိန်းမှ ၄၅ ရက်အတွင်း ကျပ်သိန်း ၅,၀၀၀ ရရှိနိုင်ရန် မျှော်မှန်းထားသော်လည်း မပြည့်မီသေး၍ နောက်ထပ် ၁၃ ရက် ထပ်မံတိုးထားကြောင်း သိရသည်။ ဇွန်လ ၁၅ ရက်က စတင်ပြုလုပ်ခဲ့သည့် ထိုကမ်ပိန်းတွင် လက်မှတ်တစ်စောင်လျှင် ကျပ် ၅၀၀၀ သတ်မှတ်ထားပြီး လာမည့် သြဂုတ်လ ၁၃ ရက်တွင် မဲမောက်ပေးသွားမည်ဖြစ်သည်။
“လက်နက်လိုအပ်ချက်က တော်တော်ရှိနေပါသေးတယ်။ ဒီကမ်ပိန်းက အဲ့ဒီလိုအပ်ချက်တွေကို စစ်ဆင်ရေးအရ အတော်လေးထိရောက်နိုင်မယ့် ထောက်ပံ့နိုင်မှုကိုလုပ်ဆောင်နိုင်မှာပါ” ဟု ကိုသော်မတ်စ်က ဆိုသည်။

ထိုကမ်ပိန်းမှ ရရှိလာသည့် ငွေများဖြင့် ပဲခူးတိုင်းစစ်ဒေသခွဲရှိ တပ်ရင်းများဖြစ်သည့် ပြည်ခရိုင်တပ်ရင်း (၃၆၀၁)၊ (၃၆၀၂)၊ သာယာဝတီခရိုင် တပ်ရင်း (၃၈၀၁)၊(၃၈၀၂ )၊ တောင်ငူခရိုင်တပ်ရင်း (၃၅၀၁)၊ (၃၅၀၂ ) နှင့် ပဲခူးခရိုင်တပ်ရင်း (၃၇၀၁)၊ (၃၇၀၂) တို့ကို မမ လက်နက်များ တပ်ဆင်သွားမည်ဖြစ်ကြောင်း သိရသည်။
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက “လမ်းအားလုံးနေပြည်တော်သို့" စစ်ဆင်ရေးကို ဆောင်ရွက်နေပြီဖြစ်ပြီး နိုင်ငံတစ်ဝန်းရှိ တော်လှန်ရေးတပ်ဖွဲ့များသည် စစ်ကောင်စီအခြေစိုက်ရာ နေပြည်တော်သို့ ဦးတည်တိုက်ခိုက်သွားမည်ဟု ပြီးခဲ့သည့် ဇွန်လအတွင်းတွင် ထုတ်ဖော်ပြောဆိုထားသည်။

ပဲခူးတိုင်းသည် မြေမျက်နှာသွင်ပြင်အနေအထားအရ နေပြည်တော်၊ ရန်ကုန်တိုင်းတို့နှင့် ထိစပ်နေသည်။ ထို့ကြောင့် ပဲခူးတိုင်း၏စစ်ရေးအရှိန်သည် တော်လှန်ရေး၏အပြောင်းအလဲတစ်ခုအားဖန်တီးပေးနိုင်စွမ်းရှိလိမ့်မည်ဟု တော်လှန်ရေးအင်အားစုများက သုံးသပ်ထားသည်။

စာတည်း။ ။အောင်ကျော်ဖြိုး

#Mizzima
#ကမ်ပိန်း
#ပဲခူးတိုင်း
----------------------------------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

"စွန့်လွှတ်စွန့်စား ပြည့်ရင် သွေးများ" အစီအစဥ် - Episode 6
===================

"စွန့်လွှတ်စွန့်စား ပြည့်ရင် သွေးများ" အစီအစဥ်ကို အပတ်စဥ် သောကြာ နေ့၊ ညနေ ၅ နာရီတိုင်းတွင် PVTV နှင့် ကာကွယ်ရေးဝန်ကြီးဌာန၏ လူမှုကွန်ရက် စာမျက်နှာများအပြင် လွတ်လပ်သော သတင်းမီဒီယာများတွင်လည်း စောင့်မျှော်နားဆင်နိုင်ပါပြီ။

ယခုအပတ် "စွန့်လွှတ်စွန့်စား ပြည့်ရင် သွေးများ" အစီအစဥ် - Episode 6 မှာ နားဆင်ရမှာက တော့ ပြည်သူကို အလေးထားသူ၊ ပြည်သူကို ကာကွယ်နေသူ အထူးစစ်ဆင်ရေးတပ်ဖွဲ့ - S.O.F၊ တပ်ခွဲ (၃) ရဲ့ တပ်ခွဲအရာခံဗိုလ် “နော်ဖော” အ ကြောင်းကို နားဆင်ရမှာ ဖြစ်ပါတယ်။

အနီရောင်နောက်ခံပေါ်မှာ
အဖြူရောင်ကြယ်တပွင့်ပါတဲ့
PDF အလံတော်ကို အမြင့်ဆုံး လွှင့်ထူလိုက်တယ်။
ပြည်သူအတွက် ငါတို့ ရဲရင့်ဖို့အသင့်
ရန်သူတွေ ကြောက်ဒူးတုန်ကြဟေ့။
ကာကွယ်ရေးဝန်ကြီးဌာန
အမျိုးသားညီညွတ်ရေးအစိုးရ။

https://youtu.be/5ja0xbLGI4k

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

Children a target of Myanmar junta
===============

https://youtu.be/Z9c0E_h44Hs