စက်တင်ဘာလ( ၂၈ )ရက်၊ မွန်းတည့် ၁၂ နာရီ Mizzima News Hour မဇ္ဈိမသတင်းအစီအစဉ်
===========================

01:00-မှတ်ပုံတင်မထားတဲ့ ဆင်းကတ်တွေရောင်းချပါက ဆက်သွယ်ရေးဥပဒေနဲ့ အရေးယူမယ်လို့ စစ်ကောင်စီ ကြေညာတဲ့သတင်း

02:43-ပဋိပက္ခဖြစ်ပွားမှု ကမ္ဘာ့နိုင်ငံ ၅၀ စာရင်းထဲ မြန်မာနိုင်ငံ ထိပ်ဆုံးကရပ်တည်နေတဲ့သတင်း

05:38-ပုလဲတွင် ဒေသကာကွယ်ရေး ရဲဘော် ၃ ဦး သတ်ဖြတ်ခံရပြီး ဒေသခံ ၅ ဦးပျောက်ဆုံးနေတဲ့သတင်း

10:47-ဒီကနေ့ မနက် ၁၁နာရီအထိရရှိထားတဲ့ ငွေလဲနှုန်း၊ ရွှေဈေး၊ စက်သုံးဆီဈေးနဲ့ စားအုန်းဆီဈေးတွေအပါအဝင် တခြားအရေးကြီးသတင်းတွေနဲ့ စိတ်ဝင်စားဖွယ်သတင်းတွေကို တင်ဆက်ပေးမှာဖြစ်ပါတယ်။

https://youtu.be/ypg-7q6SBO0?si=X-LWNqG-po3nEVXY

#12pmnews
#Mizzimanewshour
#MizzimaTV
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

မြောက်ကိုရီးယားက အမေရိကန်စစ်သား ထရာဗစ်ကင်းကို နယ်နှင်ဒဏ်ပေးဖို့ဆုံးဖြတ်

#internationalnews #reels #shorts #American #NorthKorea #Mizzima

အင်ဒိုနီးရှားမှာ တရုတ်ထောက်ပံ့တဲ့ စီမံကိန်းတွေအတွက် ဒေသခံတစ်ချို့နှင်ထုတ်ခံနေရ

#internationalnews #reels #shorts #Indonesia #Mizzima

မြောက်ကိုရီးယားက အမေရိကန်စစ်သား ထရာဗစ်ကင်းကို နယ်နှင်ဒဏ်ပေးဖို့ဆုံးဖြတ်
=========================

https://youtu.be/KRXJpIEksu0?si=pilGArSavKnuiVoD

​​ကန်ပက်လက်မြို့တွင် စစ်ကောင်စီ တပ်စွဲထားသည့် ၂ နေရာ တိုက်ခိုက်ခံရပြီး ၃ ဦး သေဆုံး
====================

ပါခွီး
(မဇ္စျိမ) ။ ။ချင်းပြည်နယ် ၊ ကန်ပက်လက်မြို့တွင် စစ်ကောင်စီ တပ်စွဲထားသည့် အထွေထွေ အုပ်ချုပ်ရေးဦးစီးဌာနရုံးနှင့် ပညာရေးမှူးရုံးတို့ကို တိုက်ခိုက်ခဲ့ရာ စစ်ကောင်စီတပ်သား သုံးဦးသေဆုံးခဲ့ကြောင်း ချင်းကာကွယ်ရေးတပ်ဖွဲ့ (ကန်ပက် လက်) CDF – Kanpetlet က ယမန်နေ့ စက်တင်ဘာလ ၂၇ရက်နေ့တွင် ထုတ်ပြန်သည်။

ကန်ပက်လက်မြို့တွင် အင်အား ၃၀ ဖြင့် တပ်စွဲထားသော ထွေအုပ်ရုံးကို ယမန်နေ့ နံနက် ၆နာရီ မှ ၁၁ နာရီထိ တိုက်ခိုက်ခဲ့ရာ စစ်ကောင်စီတပ်သား သုံးဦးသေဆုံးပြီး ဒဏ်ရာရရှိသူများရှိသည်ဟု သိရသည်။

တဖန် စစ်ကောင်စီ တပ်အင်အား ၂၅ ဦးခန့်ဖြင့် တပ်စွဲထားသော ပညာရေးမှူးရုံးကို ယမန်နေ့ မွန်းလွဲ ၂ နာရီမှ ၃ နာရီအထိ ဆက်လက်တိုက်ခိုက်ခဲ့ခြင်းဖြစ်ပြီး ယင်းတိုက်ပွဲတွင် စစ်ကောင်စီတပ် သား သေဆုံးဒဏ်ရာရရှိမှုကို အတည်မပြုနိုင်ကြောင်းထုတ်ပြန်ချက်တွင် ဖော်ပြသည်။

“ထွေအုပ်ရုံးတိုက်ပွဲမှာ စစ်ကောင်စီတပ်သားသေတာက ကျနော်တို့က စနိုက်ပါနဲ့ပစ်ခဲ့တာပါ ။ အဲဒီနောက် အနီးဆုံး ကတုတ်ကျင်းအထိ ချည်းကပ်နိုင်ခဲ့ကြတယ်။ လက်နက်ချဖို့ အော်ဟစ်ပြော ဆိုခဲ့ပေမဲ့ အသေခံပြီး တောင့်ခံခဲ့ကြတယ်။ တပ်စွဲထားတဲ့အထဲက ငိုသံတွေလည်း ကြားခဲ့ကြတယ်” ဟု CDF – Kanpetlet တပ်မဟာမှူး ဆလိုင်းထွန်းလိန်း က မဇ္စျိမ ကိုပြောသည်။

အဆိုပါထွေအုပ်ရုံးကို သိမ်းယူနိုင်ရန်အခွင့်အရေးရခဲ့သော်လည်း လက်လုပ် လက်နက်ကြီးပစ်ကူနှင့် ဒရုန်းပစ်ကူများ မရှိ၍ ပြန်လည်ဆုတ်ခွာခဲ့ရကြောင်း ဆိုသည်။

ပညာရေးရုံးမှူးတိုက်ပွဲတွင် စစ်ကောင်စီတပ်သားများက အဆင်သင့်နေရာယူထားသဖြင့် အပြန်အလှန်ပစ်ခတ်မှုရှိခဲ့သော်လည်း သေဆုံးမှုကို အတည်မပြုနိုင်ခဲ့ခြင်း ဖြစ်ကြောင်းဆိုသည်။

ကန်ပက်လက်မြို့တွင် တိုက်ခိုက်ခဲ့သည့် နှစ်နေရာအပြင် စစ်ကောင်စီတပ်သည် အထက(၁)ကျောင်းတွင် အင်အား ၇၀ ၊ ရဲစခန်းတွင် ရဲအင်အား ၃၀ ၊ ရန်အောင်စေတီကုန်းနှင့် ဘုန်းကြီးကျောင်းတွင် ၅၀ခန့်ဖြင့်တပ်စွဲထားပြီး တိုက်ခိုက်ချိန်တွင် ၎င်းနေရာများမှ စစ်ကူမလာ ရောက်နိုင်စေရန် လမ်းကြောင်း များကို ကာကွယ်ရေးတပ်ဖွဲ့မှ ပိတ်ဆို့ထားခဲ့ကြောင်း တပ်မဟာမှူးက ဆက်လက် ပြောဆိုသည်။

တိုက်ပွဲနှစ်ခုစလုံးတွင် ကာကွယ်ရေး ရဲဘော်များအထိအခိုက်မရှိကြောင်း CDF – Kanpetlet က ထုတ်ပြန်ချက်တွင်အသိပေးထားသည်။

CDF – Kanpetlet တပ်ဖွဲ့သည့် တိုက်ပွဲပေါင်း ၁၅၀ ကျော် ဆင်နွှဲခဲ့ပြီး စစ်ကောင်စီတပ်မှ အရာရှိအချို့အပါအဝင် အနည်းဆုံး ၂၀၀ ခန့်ကို ရှင်းလင်းနိုင်ခဲ့ကာ ၎င်းတို့ဘက် မှ တပ်ဖွဲ့ဝင် ၁၆ဦး ကျဆုံးခဲ့ပြီးဖြစ်ကြောင်းသိရသည်။

ယခုအချိန်တွင် ပြောက်ကျားစခန်းမှ တန်ပြန်ထိုးစစ်များစတင်နိုင်ရန်နှင့် စစ်ကောင်စီ တပ်အထိုင်စခန်းများကို ပြန်လည်သိမ်းပိုက်နိုင်ရန်အတွက် လိုအပ်သော လက်နက် ကြီး၊ ငယ်များနှင့် ကျည်ဆန်များ ဖြည့်တင်းနိုင်ရေးအတွက် “ဝိတိုရိယ သူရဲကောင်း စုပေါင်းအားသစ်လောင်း” ခေါင်းစဥ်ဖြင့် ရန်ပုံငွေ ကျပ်သိန်း ၅၀၀,၀၀၀,၀၀၀ (သိန်းငါးထောင်) ကမ်ပိန်းပြုလုပ်လျက်ရှိကြောင်းသိရသည်။

ဩဂုတ်လ ၃၁ရက်နေ့မှ အောက်တိုက်ဘာ ၁၅ရက်အထိ ၄၅ ရက်အကြာပြုလုပ်မည် ဖြစ်သော အဆိုပါကမ့်ပိန်းတွင် စက်တင်ဘာလ ၂၈ရက် ယနေ့အထိ ကျပ် ၁၂၀,၀၀၀,၀၀၀(သိန်း၁,၂၀၀) ခန့်သာရရှိသေးသဖြင့် ရာခိုင်နှုန်းပြည့်မီရန် မိဘပြည်သူများအနေဖြင့် ဝိုင်းဝန်းအာရုံစိုက်ပေးစေလိုကြောင်း တပ်မဟာမှူးက မေတ္တာရပ်ခံထားသည်။

စာတည်း။ ။အောင်ကျော်ဖြိုး
ပုံအညွှန်း - CDF – Kanpetlet ရဲဘော်များ
ဓါတ်ပုံ။ - CDF – Kanpetlet

#Mizzima
#CDF – Kanpetlet
#ကန်ပက်လက်မြို့
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ပဋိပက္ခဖြစ်ပွားမှု ကမ္ဘာ့နိုင်ငံ ၅၀ စာရင်းထဲ မြန်မာနိုင်ငံ ထိပ်ဆုံးကရပ်တည်နေ
======================

ကမ္ဘာပေါ်မှာ အဆိုးရွားဆုံး ပဋိပက္ခမီးတောက်လောင်နေတဲ့ ကမ္ဘာ့နိုင်ငံ ၅၀ စာရင်းကို ACLED က မကြာမီက ထုတ်ပြန်ခဲ့ရာ အဆိုပါ စာရင်းထဲမှာ မြန်မာနိုင်ငံက အဆိုးရွားဆုံး နံပါတ် (၁) မှာရှိနေတယ်လို့ဖော်ပြထားပါတယ်။

ပြီးခဲ့တဲ့ တနှစ်အတွင်းမှာ မြန်မာနိုင်ငံဟာ ကမ္ဘာပေါ်မှာ ပဋိပက္ခ ဖြစ်ပွားမှု အဆင့်က ယူကရိန်းထက်ကျော်ပြီး နံပါတ် (၁) နေရာမှာ ရှိနေတာဖြစ်တယ်လို့ လက်နက်ကိုင်ပဋိပက္ခတည်နေရာနဲ့ ဖြစ်ရပ်တွေကို အချိန်နဲ့တပြေးညီ မှတ်တမ်းပြုစုနေတဲ့ အမေရိကန် အခြေစိုက် ACLED သုတေသန အဖွဲ့က ပြောကြားလိုက်တာပါ။

ဒီအချက်အလက်တွေက ၂၀၂၂ ခုနှစ် စက်တင်ဘာ ၁၅ ရက်ကနေ ၂၀၂၃ ခုနှစ် စက်တင်ဘာ လဝက်အထိ မှတ်တမ်းပြု တွက်ချက်ထားတာလည်းဖြစ်ပါတယ်။

Acled အဖွဲ့ဟာ သတင်းအစီရင်ခံစာတွေ၊ အရပ်သားအဖွဲ့အစည်းနဲ့ လူ့အခွင့်အရေး အဖွဲ့အစည်းတွေရဲ့ ထုတ်ပြန်ချက်တွေ အပြင် ဒေသတွင်းနဲ့ အပြည်ပြည်ဆိုင်ရာ အဖွဲ့အစည်းတွေရဲ့ လုံခြုံရေးဆိုင်ရာ နောက်ဆုံးအခြေအနေ ထုတ်ပြန်ချက်တွေကို အခြေခံပြီး အချက်အလက် ကောက်ယူတာဖြစ်ပါတယ်။

အဆိုပါစာရင်းကို ပြီးခဲ့တဲ့နှစ်က ဖြစ်ပွါးခဲ့တဲ့ နိုင်ငံရေးအကြမ်းဖက်မှု ဆိုင်ရာ အဓိက အချက်အလက် အကြောင်းအရာ လေးခုအပေါ် အခြေခံပြီး စာရင်းထုတ်ပြန်လိုက်တာဖြစ်တယ်လို့ဆိုပါတယ်။
အကြောင်းအရာ လေးခုကတော့ အန္တရာယ်ကြီးမားမှု၊ အရပ်သားများအပေါ် ဘေးအန္တရာယ်ဖြစ်စေမှု၊ ပဋိပက္ခကြောင့် ပထဝီဆိုင်ရာ ဖြစ်ပေါ်ပြောင်းလဲမှုနဲ့ လှုပ်ရှားနေတဲ့ အဖွဲ့အစည်းအရေအတွက် တို့ဖြစ်ပါတယ်။

မြန်မာနိုင်ငံက ကမ္ဘာပေါ်မှာ လက်နက်ကိုင်အဖွဲ့အစည်း အများဆုံးနဲ့ အလွန့်အလွန်စိုးရိမ်စရာ အခြေအနေအဖြစ် ထိပ်ဆုံးတွင် ရပ်တည်နေပြီး ပြည်တွင်းစစ်ဖြစ်ပွားနေတဲ့ ဆီးရီးယားနဲ့ မူးယစ်ဒုစရိုက်မှု အများအပြားဖြစ်နေတဲ့ မက္ကဆီကိုနိုင်ငံတို့တောင် မြန်မာနိုင်ငံအောက်မှာရှိနေတာဖြစ်ပါတယ်။

မြန်မာပြီးရင် ဆီးရီးယားက ဒုတိယနဲ့ မက္ကဆီကိုက တတိယနေရာမှာဖြစ်ပါတယ်။ ယူကရိန်း၊ နိုင်ဂျီးရီးယား၊ ဘရာဇီး၊ ယီမင်၊ အီရတ်၊ ကွန်ဂို နဲ့ ကိုလံဘီယာ တို့က အဆက့်(၄)မှ (၁၀) အတွင်း အလွန်စိုးရိမ်စရာ(extreme) အနေအထားတွင် ရှိပြီး ရုရှားက အကြောင်းအရာ လေးခုအနက် တစ်ခုဖြစ်သော မတည်ငြိမ်မှု ( turbulence)မှာ အဆင့် ၃၉ ရရှိနေပါတယ်။

အာဖဂန်နစ္စတန်၊ အိန္ဒိယ၊ ပါကစ္စတန်တို့က အဆင့် ၁၃၊ ၁၆ နှင့် ၁၉ နေရာများတွင် ရောက်ရှိနေပြီး ဘင်္ဂလားဒေ့ရှ်က အဆင့် ၂၂ တွင် ရှိနေပါတယ်။

အနောက်အုပ်စုနိုင်ငံများအနက် အမေရိကန် တစ်နိုင်ငံတည်းက ပဋိပက္ခမီး တောက်လောင်နေတဲ့ နိုင်ငံများစာရင်းမှာ အဆင့်(၅၀)မှာရှိနေပါတယ်။

အညွှန်းကိန်းအချက်အလက်များအရ ကမ္ဘာ့နိုင်ငံအားလုံးမှာ ပဋိပက္ခများ ရှိနေပေမယ့်လည်း အမြင့်ဆုံးပဋိပက္ခတွေကို နိုင်ငံ ၅၀ မှာတွေ့ရတာဖြစ်တယ်လို့ဆိုပါတယ်။

ထိပ်ဆုံး(၁၀)နိုင်ငံက အလွန့်အလွန်စိုးရိမ်စရာ(extreme) အဆင့် သတ်မှတ်ခံရပြီး (၁၁မှ ၃၀ အထိ) နိုင်ငံ ၂၀ က မြင့်မားသော( high) အဆင့်၊ နောက်ဆုံး နိုင်ငံ ၂၀ ကို မငြိမ်မသက်အဆင့်အဖြစ် ( turbulence) သတ်မှတ် ထားတာဖြစ်ပါတယ်။

https://youtu.be/fJAAbzWbu3s?si=ZvIPl1qJLNItPgct

#Political News
#MizzimaTV
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

ပဋိပက္ခဖြစ်ပွားမှု ကမ္ဘာ့နိုင်ငံ ၅၀ စာရင်းထဲ မြန်မာနိုင်ငံ ထိပ်ဆုံးကရပ်တည်နေ

Watch more detail - https://youtu.be/fJAAbzWbu3s

#စစ်ကောင်စီ#ရွေးကောက်ပွဲ
#VideoNews #shorts #reels

ရုရှား-မြန်မာ ဦးစီးတဲ့ အာဆီယံ ပူးတွဲစစ်ရေးလေ့ကျင့်မှု စင်ကာပူနိုင်ငံ မတတ်ရောက်
====================

ရုရှားနဲ့ မြန်မာကာကွယ်ရေးဝန်ကြီးဌာနများ ပူးတွဲဦးဆောင်ကျင်းပတဲ့ အကြမ်းဖက်မှု တိုက်ဖျက်ရေးဆိုင်ရာ စစ်ရေးလေ့ကျင့်မှုကို စက်တင်ဘာ ၂၅ ရက်နေ့က ရုရှားနိုင်ငံမှာ စတင်ကျင်းပခဲ့ပါတယ်။
ADMM-Plus လို့ အမည်ပေးထားတဲ့ အာဆီယံကာကွယ်ရေးဝန်ကြီးများနဲ့ မိတ်ဖက်နိုင်ငံများ ပူးတွဲအစည်းအဝေးမှာ အာဆီယံအဖွဲ့ဝင် ၁၀ နိုင်ငံမှ ကာကွယ်ရေးအရာရှိများ၊ ဆွေးနွေးဖက် ၈ နိုင်ငံဖြစ်တဲ့ အမေရိကန်၊ သြစတြေးလျ၊ တရုတ်၊ အိန္ဒိယ၊ ဂျပန်၊ နယူးဇီလန်၊ ရုရှားနဲ့ တောင်ကိုရီးယားတို့မှ လုံခြုံရေးဆိုင်ရာ ကျွမ်းကျင်သူများ တက်ရောက်လေ့ရှိပါတယ်။

ရုရှားက ယူကရိန်းကို ကျူးကျော်စစ်ဆင်နွှဲနေတဲ့အတွက် တရုတ်နဲ့ အိန္ဒိယကလွဲရင် အမေရိကန်၊ ဩစတေးလျ၊ တောင်ကိုးရီးယား၊ ဂျပန်နဲ့ နယူးဇီလန်တို့က မနှစ်ကရော ဒီနှစ်မှာပါ အဆိုပါလေ့ကျင့်မှုကို မတက်ရောက်ဘဲ သပိတ်မှောက်ထားပါတယ်။
အာဆီယံထဲက စင်္ကာပူနိုင်ငံကတော့ ဒီနှစ်လေ့ကျင့်မှုကို အာဏာသိမ်း မြန်မာစစ်တပ်က ရုရှားနဲ့အတူ ဦးဆောင်ပြုလုပ်တာမို့ မတက်ရောက်ဘဲ သပိတ်မှောက်ထားပါတယ်။

ဘရူနိုင်း၊ ကမ္ဘောဒီးယား၊ ထိုင်း၊ လာအို၊ မလေးရှား၊ အင်ဒိုနီးရှား စတဲ့နိုင်ငံတွေ ပါဝင်ဆင်နွှဲနေကြောင်း သိရပါတယ်။
နိုင်ငံတကာ အကြမ်းဖက်မှုတိုက်ဖျက်ရေး ပူးတွဲစစ်ရေးလေ့ကျင့်မှုကို စက်တင်ဘာ ၂၅ ကနေ ၃၀ ရက်နေ့ထိ ရုရှားနိုင်ငံ ပရီမော့စကီး (Primorsky) ဒေသမှာ ပြုလုပ်နေပြီး အာဆီယံနိုင်ငံတွေနဲ့ ဆွေးနွေးဖက်နိုင်ငံတွေက အထူးကျွမ်းကျင်စစ်သား ခုနစ်ရာခန့် ပါဝင်ဆင်နွှဲနေကြောင်း ရုရှားအစိုးရပိုင် Tass သတင်းဌာနက စက်တင်ဘာ ၂၆ ရက်နေ့က ဖော်ပြထားပါတယ်။

အဲဒီ စစ်သည် ခုနစ်ရာနဲ့အတူ တိုက်ခိုက်ရေး လေယာဉ်တွေ၊ စစ်ရဟတ်ယာဉ်တွေ၊ မောင်းသူမပါတဲ့ လေကြောင်းတိုက်ခိုက်ရေးယာဉ်တွေ၊ တင့်ကားတွေနဲ့ သံချပ်ကာ ကားတွေလည်း ပါဝင်ပါတယ်။

ပြီခဲ့သည့် သြဂုတ်လဆန်းပိုင်း နေပြည်တော်မှာ ကျင်းပခဲ့တဲ့ အာဆီယံနိုင်ငံများနဲ့ ရုရှား၊ တရုတ်၊ အိန္ဒိယတို့ ပါဝင်တဲ့ အကြမ်းဖက်မှု တန်ပြန်တိုက်ဖျက်ရေးဆိုင်ရာ ဆွေးနွေးပွဲကိုလည်း စင်ကာပူနိုင်ငံက တက်ရောက်ခြင်းမရှိပါဘူး။

ဒီစစ်ရေးလေ့ကျင့်မှုမှာ မြန်မာ့အရေးနဲ့ပတ်သက်လို့ စစ်ကောင်စီကို ထောက်ပြဝေဖန်လေ့ရှိတဲ့ အင်ဒိုနီးရှားနဲ့ မလေးရှားအပါအဝင် အာဆီယံနိုင်ငံအားလုံး ပါဝင်ဆင်နွှဲနေတာဟာ အာဆီယံပဋိညာဉ်ကို ချိုးဖောက်တာလို့ အမျိုးသားညီညွတ်ရေး အစိုးရ (NUG) ရဲ့ သမ္မတရုံးပြောရေးဆိုခွင့်ရှိသူ ဦးကျော်ဇော်က ပြောကြားထားပါတယ်။

စစ်ကောင်စီကို အာဆီယံရဲ့ ဘယ်လိုအစီအစဉ်မျိုးမှာမှ တက်ရောက်ခွင့်မပေးဘဲ ပြတ်ပြတ်သားသား ဆန့်ကျင်သင့်တယ်လို့ ဆိုပါတယ်။
Justice for Myanmar အဖွဲ့ကလည်း ဒီစစ်ရေးလေ့ကျင့်မှုတွေဟာ မြန်မာပြည်သူတွေ အပေါ် တိုက်ခိုက်၊ သတ်ဖြတ်၊ အကြမ်းဖက်နေတဲ့ စစ်အုပ်စုကို တိုက်ခိုက်ရေး စွမ်းရည်တွေ ပိုကောင်းအောင် လုပ်ပေးနေတာကြောင့် ကန့်ကွက်ရှုတ်ချကြောင်း ဩဂုတ်လကုန်ပိုင်းက ထုတ်ပြန်ထားပါတယ်။

ဒီစစ်ရေးလေ့ကျင့်မှုကို တက်ရောက်တဲ့ အာဆီယံနိုင်ငံတွေဟာ မြန်မာနိုင်ငံအတွင်း စစ်ရာဇဝတ်မှု၊ လူသားမျိုးနွယ်အပေါ် ကျူးလွန်တဲ့ ရာဇဝတ်မှုများဖြစ်ပေါ်စေဖို့ ကူညီပေးနေခြင်းဖြစ်တယ်လို့ Justice For Myanmarအဖွဲ့ ကပြောပါတယ်။

https://youtu.be/jH5SnacBqRg?si=OSA-dXYuloqE1bDC

#Political News
#MizzimaTV
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

တနင်္သာရီမြို့မှစစ်ကောင်စီခြေမြန်တပ်ရင်းစစ်ဆေးရေးဂိတ်တိုက်ခိုက်မှုအရာခံဗိုလ်အပါအဝင် ၂ ဦး သေဆုံးဟုဆို
====================

ကိုရွှေမြိတ် ။ ။တနင်္သာရီတိုင်း၊ တနင်္သာရီမြို့နယ်မှ စစ်ကောင်စီခြေမြန်တပ်ရင်း ခမရ(၅၆၁) စစ်ဆေးရေးဂိတ်ကို ပြည်သူ့ကာကွယ်ရေးပူးပေါင်းတပ်ဖွဲ့ကတိုက်ခိုက်ခဲ့ရာ စစ်ကောင်စီအရာခံဗိုလ်နှစ်ဦး သေဆုံးပြီးတဦး ဒဏ်ရာအပြင်းအထန်ရရှိသွားကြောင်း တော်လှန် ရေးအင်အားစုများနှင့် တပ်တွင်းသတင်းရင်းမြစ်များထံမှ သိရသည်။

တနင်္သာရီမြို့နယ်၊ ညောင်ပင်ကွင်းကျေးရွာအခြေစိုက် အမှတ် (၅၆၁)စစ်ဆေးရေးဂိတ်ကို ယနေ့ စက်တင်ဘာလ(၂၈) ရက်နေ့ နံနက် ၅ နာရီ ၄၅ မိနှစ်ခန့်တွင် တိုက်ခိုက်ခဲ့ခြင်းဖြစ်သည်။

"ကျွန်တော်တို့သိရတဲ့ သတင်းတွေအရ အရာခံဗိုလ် တဦးသေတယ်ဆိုတာ အတည်ပြုနိုင်သလို တပ်ထဲ ရောက်မှ နောက်တဦး ထပ်သေ၊ တဦးဒဏ်ရာရတယ်ဆိုတာသိရတယ်။ ကျွန်တော်တို့ ပူးပေါင်း အဖွဲ့မှာတော့ ထိခိုက်သူမရှိပါဘူး”ဟု တနင်္သာရီမြို့နယ်ပြည်သူ့အုပ်ချုပ်ရေးအဖွဲ့မှပြောရေးဆိုခွင့်ရှိသူက မဇ္ဈိမအားပြောသည်။

ဘက်မလိုက်ပြောက်ကျားအဖွဲ့၊ SWDF တောင်ပိုင်း သူရဲကောင်းအဖွဲ့၊ ပြည်သူ့ ကာကွယ်ရေး တပ်မတော်၊ မြိတ်ခရိုင် တပ်ရင်း(၂) ၏ တပ်ခွဲ (၁) ၊ နှင့် တနင်္သာရီမြို့နယ် ပြည်သူ့ကာကွယ်ရေး အဖွဲ့တို့ ပူးပေါင်းတိုက်ခိုက်ခဲ့ခြင်းဟု ၎င်းကပြောသည်။

စစ်ကောင်စီဘက်မှ ထိခိုက်မှုများနှင့် ပတ်သက်၍ အမှတ် (၅၆၁) ခြေမြန် တပ်ရင်းမှ သတင်းရင်းမြစ်တဦးက“စစ်တပ်ဘက်က အရာခံ ဗိုလ်လေးတဦး သေတယ်။ အလောင်းကို ချက်ချင်းပဲ တပ်ထဲကို သယ်သွားရတယ်။ နောက်ထပ် သေဆုံးနဲ့ ထိခိုက် ဒဏ်ရာ ရထားတဲ့ သူတွေလည်း ရှိနေတယ်”ဟု ပြောသည်။

အဆိုပါ စစ်ဆေးရေးဂိတ်သည် ညောင်ပင်ကွင်းရွာ အရှေ့ကမ်းနှင့် အနောက်ကမ်း ဆက်ထားသည့် တံတား၌ စစ်ကောင်စီတပ်စွဲထားသည့် ဂိတ်ဖြစ်သည်။ထိုဂိတ်မှ စစ်ကောင်စီနှင့် ပျူစောထီးများက ခရီးသွားပြည်သူများထံမှ ငွေတောင်းကြမ်းသည်ဟု နာမည်ကြီးပြီး မကြာခဏလည်း တိုက်ခိုက်ခံနေရသည်။ယခုနှစ် သြဂုတ်လနှင့် ပြီးခဲ့သည့် ၂၀၂၂ ခုနှစ်၊ ဒီဇင်ဘာလက တိုက်ခိုက်ခံရမှုတွင် စစ်ကောင်စီဘက်၌ ထိခိုက်သေဆုံးသူများရှိခဲ့သည်။

ထို့အပြင် ပြီးခဲ့သည့် စက်တင်ဘာလ ၁၃ရက်နေ့က ခမရ (၅၆၁) မှ စစ်ကောင်စီတပ်သား တဦးသည် လက်နက်ခဲယမ်းများယူဆောင်လာပြီး ပြည်သူ့ကာကွယ်ရေးတပ်ဖွဲ့ထံ အလင်းဝင်လာခဲ့သည်။အဆိုပါစစ်သားကို တနင်္သာရီတိုင်းပြည်သူ့ကာကွယ်ရေးတပ်ဖွဲ့မှတာဝန်ရှိသူများက ဂုဏ်ပြု ချီးမြှင့်ငွေ ၃၆ သိန်း ပေးအပ်ချီးမြှင့်ခဲ့ကြောင်း သိရသည်။

စာတည်း - အေးချမ်း
ခမရ(၅၆၁)အား တိုက်ခိုက်မှုရုပ်သံကို တနင်္သာရီတိုင်းပြည်သူ့ကာကွယ်ရေးအဖွဲ့ကထုတ်ပြန်ထားစဉ်

https://youtu.be/fpdXhXP_ASU?si=YEGZpMQtsnpkmQHP

#mizzima
#တနင်္သာရီမြို့နယ်
#စစ်ကောင်စီခြေမြန်တပ်ရင်း
#ပြည်သူ့ကာကွယ်ရေးပူးပေါင်းတပ်ဖွဲ့
#တိုက်ခိုက်
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

ကျိုက်မရောတွင် ၆နှစ်အရွယ် မိန်းကလေးငယ်အပါအဝင် ဒေသခံ ၆ဦး လက်နက်ကြီးထိမှန် ဒဏ်ရာရ
======================

ဂျူချန်း
(မဇ္ဈိမ)။ ။ မွန်ပြည်နယ်၊ ကျိုက်မရောမြို့နယ်၊ ကနာလို ကျေးရွာအတွင်းသို့ ယမန်နေ့ စက်တင်ဘာလ ၂၇ ရက်နေ့ ည ၉နာရီခွဲအချိန်တွင် လက်နက်ကြီး ကျရောက်ပေါက်ကွဲမှုကြောင့် အသက် ခြောက်နှစ်အရွယ် မိန်းကလေးငယ်တဦးနှင့် အသက် ၁၃ နှစ်အရွယ် ကလေးငယ်တဦးအပါဝင် ဒေသခံ ခြောက်ဦး လက်နက်ကြီးစ ထိမှန်ဒဏ်ရာရရှိခဲ့ကြောင်း ဒေသခံများထံမှ သတင်းရရှိသည်။

စက်တင်ဘာလ ၂၇ ရက်နေ့ ည ၉နာရီခွဲ အချိန်ခန့်တွင် ကနာလိုကျေးရွာအတွင်းသို့ လက်နက်ကြီးနှစ်လုံး ကျရောက်ပေါက်ကွဲမှုကြောင့် အသက်ခြောက်နှစ်အရွယ် မိန်းကလေးငယ်တဦး၊ အသက် ၁၃ နှစ်အရွယ် ကလေးငယ်တဦး၊ အသက် ၆၅ နှစ်အရွယ် အမျိုးသမီးတဦး၊ အသက် ၂၇ နှစ်အရွယ် အမျိုးသမီးတဦး၊ အသက် ၃၀နှင့် ၅၀ အရွယ် ယောက်ျားလေး နှစ်ဦး စုစုပေါင်း ခြောက်ဦး လက်နက်ကြီး ထိမှန်ဒဏ်ရာ ရရှိခဲ့ကြောင်း ဒေသခံက ပြောသည်။

ထိခိုက်ဒဏ်ရာသူများအနက် အသက် ၁၃ နှစ်အရွယ်ဖြစ်သူ မောင်မင်းနှင့် အသက် ၆၅ နှစ်အရွယ် အမျိုးသမီးတို့သည် ပြင်းထန်ဒဏ်ရာများ ရရှိခဲ့ပြီး ၎င်းတို့နှစ်ဦးကို ကျိုက်မရော ဆေးရုံမှ မော်လမြိုင်ဆေးရုံသို့ ပို့ထားရကြောင်း သိရသည်။

“ဆိုးဆိုးဝါးဝါးက ကလေးတယောက်က တော်တော်ထိတယ်၊ သုံးတန်းအရွယ်လောက်ကလေး၊ မျက်နှာမှာ ထိသွားတာ၊ သတိတော့ ရှိနေတယ်။ ဒါပေမယ့် အခြေအနေကတော့ အဆင်မပြေပါဘူး၊ ကောင်းသွားရင်တော့လည်း သိပ်အဆင်မပြေလောက်ဘူး၊ မျက်နှာလေးတွေထိသွားတာဆိုတော့လေ” ဟု ဒေသခံတဦးက မဇ္ဈိမ ကို ပြောသည်။

ကျန်သည့် အသက် ၃၀ နှင့် ၅၀ အရွယ် အမျိုးသားနှစ်ဦးသည် ကျိုက်မရောဆေးရုံတွင် ဆက်လက် ဆေးကုသမှု ခံယူလျက်ရှိပြီး အသက် ခြောက်နှစ်အရွယ် မိန်းကလေးငယ်နှင့် အမေဖြစ်သူ အသက် ၂၇ နှစ်အရွယ် အမျိုးသမီးတို့သည် သက်သာသဖြင့် ယနေ့တွင် ဆေးရုံမှ ဆင်းသွားပြီဖြစ်ကြောင်း သိရသည်။

ထို လက်နက်ကြီး ကျရောက်ပေါက်ကွဲမှုကြောင့် ကနာလိုကျေးရွာမှ နေအိမ်နှစ်လုံးနှင့် ကားတစီး ထိမှန်ပျက်စီးခဲ့ကြောင်း ဒေသခံမှသိရသည်။

လက်ရှိအချိန်အထိ မည်သည့်အဖွဲ့အစည်းမှ ပစ်ခတ်ခဲ့သည့် လက်နက်ကြီးဖြစ်သည်ကိုမူ မဇ္ဈိမမှ ဆက်လက်စုံစမ်းနေဆဲဖြစ်သည်။

စာတည်း - သန့်ဇော်(သန်လျင်)
ပုံအညွှန်း-ထိခိုက်ဒဏ်ရာရကလေးငယ်နှင့် ပျက်ဆီးမှုများ (CJ)

#mizzima
#လက်နက်ကြီး
#ကျိုက်မရောမြို့နယ်
#မိန်းကလေး
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U