စစ်ကောင်စီတပ်က သာဇင်ကျေးရွာကို မီးရှို့ဖျက်ဆီးမှု နေအိမ် ၆၀၀ ခန့် မီးလောင်ပျက်စီး
========================

MTO
(မဇ္ဈိမ)။ ။ စစ်ကိုင်းတိုင်း၊ စစ်ကိုင်းမြို့နယ် ဆားတောင်ဒေသရှိ သာဇင်ကျေးရွာကို ဇွန်လ ၁၃ ရက်နေ့ မနက်ပိုင်းတွင် စစ်တပ်က ဝင်ရောက်မီးရှို့ ဖျက်ဆီးခဲ့မှုကြောင့် သာဇင်ကျေးရွာအတွင်းရှိ နေအိမ်ပေါင်း ၆၀၀ ခန့် မီးလောင်ပျက်စီးသွားကြောင်း စစ်ကိုင်းမြို့နယ် ပြည်သူ့အုပ်ချုပ်ရေးအဖွဲ့ထံမှ သိရ သည်။

“သာဇင်ကျေးရွာမှာ အိမ်ခြေ ၆၀၀ ခန့် မီးရှို့ခံရပါတယ်။ ပြည်သူတချို့ ဓားစားခံအဖြစ် အဖမ်းခံရတယ် လို့သိရပါတယ်” ဟု စစ်ကိုင်းမြို့နယ် ပအဖ မှ တာဝန်ရှိသူတစ်ဦးက ပြောသည်.

စစ်ကောင်စီတပ်ဝင်ရောက်လာချိန်တွင် ပြေးလွှားရင်း ပိတ်မိခဲ့သည့် ပြည်သူ ၄၀ဦးခန့် ဖမ်းဆီးခံလိုက်ရပြီးနောက် စစ်ကောက်စီတပ်က အမျိုးသမီး ၁၀ ဦးကို ပြန်လည်လွှတ်ပေးခဲ့သော်လည်း အမျိုးသား အယောက် ၃၀ ကိုဓားစာခံအဖြစ်ဖမ်းဆီးထားကြောင်း စစ်ကိုင်းမြို့နယ်သတင်းမှန်ပြန်ကြားရေး အဖွဲ့ က ဖော်ပြထားသည်။

“ ဖမ်းဆီးခံဓားစာခံတွေ ပြန်လည်လွတ်မြောက်လာခြင်းမရှိသေးဘူလို့ သိရပါတယ်” ဟု စစ်ကိုင်းမြို့ နယ် ပအဖ မှ တာဝန်ရှိသူတစ်ဦးက ယနေ့ ဇွန်လ ၁၅ ရက်နေ့ နေ့လယ်ပိုင်းတွင် ပြောသည်။

စစ်ကောင်စီတပ်စစ်ကြောင်းကြောင့် ထွက်ပြေးနေရသည့် စစ်ရှောင်ပြည်သူများအတွက် နေရေးထိုင်ရေး စားရေးသောက်ရေးများကို စီစဉ်ဆောင်ရွက်ပေးနေကြောင်း စစ်ကိုင်းမြို့နယ် ပြည်သူ့အုပ်ချုပ်ရေးအဖွဲ့ မှ တာဝန်ရှိသူတစ်ဦးက ပြောသည်။

၎င်းက “စစ်ရှောင်ပြည်သူများကို လုံခြုံတဲ့ရွာတစ်ရွာမှာထားပြီး လတ်တလောလိုအပ်ချက် စားရေး သောက်ရေး၊ နေထိုင်မှုတွေ စီစဉ်ဆောင်ရွက်နေပါတယ်။ စစ်ကိုင်းမြို့နယ်က စစ်ဘေးရှောင်ပြည်သူများ အတွက် အရန်ရိက္ခာသိုလှောင်ထားမှုရှိတဲ့အတွက် ဆန်ဆီကတော့ မဝယ်ရပါဘူး၊ ရောက်တဲ့နေရာမှာ တစ်ခါတည်းချက်ပြုတ်နိုင်အောင် စီစဉ်ထားပါတယ်” ဟု ပြောသည်။

ယင်းအပြင် စစ်ကောင်စီတပ်ဖွဲ့ဝင်များသည် သာဇင်ကျေးရွာမှ အသက် ၆၀ အရွယ်အဖွားအိုတစ်ဦးကိုလည်း သတ်ဖြတ်ပြီးနောက် အလောင်းကို မီးရှို့ ခဲ့ကြောင်း သိရသည်။

ဇွန်လ ၁၃ ရက်နေ့ တွင် သာဇင်ကျေးရွာကို မီးရှို့ခဲ့သည့် စစ်ကောင်စီတပ်ဖွဲ့ သည် ဇွန်လ ၁၄ ရက်နေ့ တွင် အိုင်းဓမ္မ၊ အင်းစ စသည့် ကျေးရွာများကို လည်းမီးရှို့ဖျက်ဆီးခဲ့ကြောင်း Wetlet Information Network က ဖော်ပြထားသည်။

စာတည်း - သန်ဇော်(သန်လျင်)

#mizzima
#သာဇင်ကျေးရွာ
#မီးရှို့
#စစ်ကောင်စီတပ်ဖွဲ့
#စစ်ကိုင်းမြို့နယ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အိန္ဒိယ၏ အရှေ့ဖက်နိုင်ငံများ ဦးစားပေး မူဝါဒ နှင့် အရှေ့မြောက်ဒေသအပေါ် သြဇာလွှမ်းမိုးမှု
==========================

ဗြိတိန်လက်အောက်မှ လွတ်လပ်ရေးရရှိပြီးနောက် လွတ်လပ်ခါစ အိန္ဒိယသည် အရှေ့မြောက်ဒေသကို လျစ်လျူရှုထားခဲ့သည်။

ယင်း၏ ပိုင်နက်အရှေ့မြောက်ဒေသကို လျစ်လျူရှုထားရုံသာမက အရှေ့တောင်အာရှနိုင်ငံများကိုပါ အာရုံ မစိုက်နိုင်ခဲ့ပေ။ ထို့ကြောင့် ဝန်ကြီးချုပ် ပီဗီ နာရာဆမ်ဟာရာအိုလက်ထက် ၁၉၉၁ ခုနှစ်တွင် အရှေ့တောင် အာရှနိုင်ငံများနှင့် ပိုမိုကောင်းမွန်သော ဆက်ဆံရေးတည်ဆောက်ရန် "အရှေ့မျှော်မူဝါဒ(Look East Policy)" ကို အဆိုပြုခဲ့သည်။

ထို့ကြောင့် အရှေ့တောင်အာရှနိုင်ငံများသို့ ဝင်ပေါက်ဖြစ်သည့် အိန္ဒိယ၏ အရှေ့မြောက်ဒေသသည်လည်း မရှိမဖြစ် လိုအပ်ချက်ဖြစ်လာခဲ့သည်။

June - 15 [2 Pm] Mizzima News Hour

Mizzima Headline News

#2pmnews #mizzimanewshour #reels #shorts

Mizzima + Channel ကနေပြီး ထုတ်လွှင့်ပေးနေတဲ့ အစီစဉ်လေးတွေနဲ့ မိတ်ဆက်ပေးချင်ပါတယ်
=============

ဖျော်ဖြေရေးဆိုတာ ဘ၀အမောတွေ သက်သာစေပြီး စိတ်ခွန်အားရစေတာမို့ နေ့စဉ်ဘ၀မှာ

အရေးကြီးပါတယ်။ ဒါကြောင့် Mizzima + channel ကနေပြီးတော့ လူကြိုက်များတဲ့ နိုင်ငံတကာ ဇာတ်လမ်းတွဲတွေ၊ ကာတွန်းစီးရီးတွေ၊ variety show တွေနဲ့ ပညာပေး ဖျော်ဖြေရေးအစီအစဉ်ပေါင်းများစွာကို ထုတ်လွှင့်ပေးလျက်ရှိပါတယ်။

Mizzima + channel ကို မနက် ၆ နာရီကနေစပြီး ည ၁၂ နာရီအထိ မြန်မာနိုင်ငံနဲ့ အာရှနိုင်ငံများသို့ မြန်မာဘာသာဖြင့် ထုတ်လွှင့်ပြသလျက်ရှိပါတယ်။

Satellite တွေကနေ တစ်ဆင့် ဖမ်းယူကြည့်ရှုနိုင်သလို ဖုန်းတစ်လုံးရှိယုံနဲ့လည်း Mizzima TV Application ကနေ အလွယ်တကူကြည့်ရှုနိုင်တာမို့ အခုပဲ ဒေါင်းယူပြီး ကြည့်လိုက်ရအောင်။

https://youtu.be/knd6HEAZ9rM

-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ဖားကန့်တွင် လက်ဖက်ရည်ဆိုင်ပိုင်ရှင် ပြန်ပေးဆွဲခံရ
=====================

အဂမ်
(မဇ္ဈိမ) ။ ။ ကချင်ပြည်နယ်၊ ဖားကန့်မြို့မှ လက်ဖက်ရည်ဆိုင်ပိုင်ရှင်တဦး ဇွန်လ ၁၃ ရက်နေ့ ညနေပိုင်းက ပြန်ပေးဆွဲခံရကြောင်း ဒေသခံသတင်းရင်းမြစ်များက ဆိုသည်။

ဖားကန့်မြို့၊ ဥရုရတနာကျောက်စိမ်းတောင်တံတားအနီးရှိ မြို့မလက်ဖက်ရည်ဆိုင်ပိုင်ရှင် ဦးသိန်းလွင် သည် ညနေ ၄ နာရီခန့်တွင် ဆံပင်ညှပ်ရန် နေအိမ်မှထွက်ခွာခဲ့ပြီးနောက် ပြန်ပေးဆွဲခံခဲ့ရခြင်းဖြစ်ကြောင်း မိသားစုနှင့်နီးစပ်သူများက အတည်ပြုသည်။

“ဇွန်လ ၁၃ ရက်နေ့ ည ၇ နာရီလောက်က ဖုန်းဆက်လာတယ်။ ပိုက်ဆံသိန်း ၃၀၀ နဲ့ ရွှေ ၁၀ သားယူပြီး ဆိုင်းတောင်-ယူမာကားလမ်းအတိုင်းလာခဲ့ဖို့ ဖုန်းဆက်လာတယ်” ဟု မိသားစုဝင်များနှင့် နီးစပ်သူတဦးက ပြောသည်။

ဦးသိန်းလွင်သည် ဖားကန့်မြို့၏ မြို့မျက်နှာဖုံးစာရင်းတွင်ပါဝင်ပြီး ဖားကန့်သံဘောင်တံတားတဘက် ခြမ်းရှိ လူအထိုင်များသော မြို့မလက်ဖက်ရည်ဆိုင်ပိုင်ရှင်ဖြစ်ကြောင်း သိရသည်။

ပြန်ပေးဆွဲသူများ၏ ဖမ်းဆီးခေါ်ဆောင်သွားခြင်းကိုခံခဲ့ရနောက် ယနေ့ ဇွန်လ ၁၅ ရက်နေ့အထိ ထပ်မံ အဆက်သွယ်မရရှိသေး၍ ဦးသိန်းလွင်၏ အသက်အန္တရာယ်ထိခိုက်မည်ကို မိသားစုဝင်များက စိုးရိမ်နေ ကြကြောင်း နီးစပ်သူများကဆိုသည်။

ဖားကန့်မြို့တွင် ဓားပြမှု၊ လူသတ်မှုများလည်းဖြစ်လေ့ရှိပြီး ယခုပြန်ပေးဆွဲမှုသည် ၂၀၂၃ ခုနှစ်အတွင်း ပထမဆုံးအကြိမ်ဖြစ်ကြောင်းလည်း သိရသည်။

စာတည်း ။ ။ Alden
စာမူတည်းဖြတ်။ ။စောဖေ

#ပြန်ပေးဆွဲ
#မြို့မလက်ဖက်ရည်ဆိုင်
#ဖားကန့်မြို့
ဓာတ်ပုံ - ပြန်ပေးဆွဲခံရသည့် မြို့မလက်ဖက်ရည်ပိုင်ရှင် ဦးသိန်းလွင်၏ပုံ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇွန်လ ၁၅ ရက်၊ မွန်းလွဲ ၂ နာရီ Mizzima News Hour မဇ္ဈိမသတင်းအစီအစဉ်
======================

01:07- SSPP/SSA တပ်စခန်း(၁၀)ခု ဖယ်ရှားပေးဖို့ စစ်ကောင်စီတောင်းဆိုမှုကြောင့် စစ်ရေးတင်းမာတဲ့သတင်း

03:30-ကာကွယ်ရေးတပ်ဖွဲ့ ခေါင်းဆောင်အပါအဝင် လေးဦးကို သတ်ဖြတ်ခဲ့သည်ဟူသော စွပ်စွဲချက် မှားယွင်းဟုမြောင်ပလဖတုန့်ပြန်ပြီး စုံစမ်းဖော်ထုတ်အရေးယူဖို့ စစ်ကိုင်းခရိုင်ရင်း(၁)က NUG ထံ တောင်းဆိုတဲ့သတင်း

07:03-ယူကရိန်းကို ရုရှားက ဒုံးကျည်တွေနဲ့ သည်းသည်းမဲမဲတိုက်ခိုက်နေတဲ့သတင်း

08:17-ကရင်နီဒေသအတွင်းတိုက်ပွဲတွေကြောင့် ဒုက္ခသည် သုံးထောင်ကျော် ထိုင်းနယ်စပ်ဖြတ်ကျော်တဲ့သတင်း အပါအဝင် တခြားအရေးကြီးသတင်းတွေနဲ့ စိတ်ဝင်စားဖွယ်သတင်းတွေကို တင်ဆက်ပေးမှာဖြစ်ပါတယ်။

https://youtu.be/f4Jmx8eMCYE

#2pmnews
#mizzimanewshour
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ယူကရိန်းကို ရုရှားက ဒုံးကျည်တွေနဲ့ သည်းသည်းမဲမဲတိုက်ခိုက်နေ

https://www.facebook.com/reel/243855945066838

#internationalnews #Ukraine #Russia #reels #shorts

ကရင်နီဒေသအတွင်းတိုက်ပွဲများကြောင့် ဒုက္ခသည် သုံးထောင်ကျော် ထိုင်းနယ်စပ်ဖြတ်ကျော်
=========================

ကရင်နီ(ကယား)ပြည်နယ် မယ်စဲ့မြို့နယ် မြန်မာ-ထိုင်းနယ်စပ်တလျှောက်ရှိ စစ်ကောင်စီတပ်စခန်းများ ကို ကရင်နီလက်နက်ကိုင်တပ်ဖွဲ့များက တိုက်ခိုက်သိမ်းပိုက်ပြီးနောက် ဒေသခံ ၃ထောင်ကျော်ဟာ ထိုင်းနိုင်ငံ မယ်ဟောင်ဆောင်ခရိုင်ထဲသို့ ထွက်ပြေးတိမ်းရှောင်လာကြကြောင်း ထိုင်းသတင်းဌာနတွေမှာဖော်ပြထားပါတယ်။
ထိုင်းမြန်မာနယ်စပ်၊ မြန်မာဘက်ခြမ်း ကရင်နီပြည်နယ်၊ မဲ့စက်မြို့အတွင်းမှာဖြစ်ပွားနေတဲ့ စစ်ကောင်စီ တပ်တွေနဲ့ ကရင်နီအမျိုးသားများကာကွယ်ရေးတပ် KNDF နဲ့ PDF ပြည်သူ့ကာကွယ်ရေးတပ်တို့ကြား တိုက်ပွဲတွေကြောင့် စစ်ဘေးဒုက္ခသည် ၃၀၀၀ ကျော် ထိုင်းနယ်စပ်ကို ဖြတ်ကျော်ပြီး မယ်ဟောင်ဆောင် ပြည်နယ်အတွင်းက ယာယီစစ်ဘေးရှောင်စခန်းကို ဇွန်လ ၁၄ရက်နေ့ကလာရောက် ခိုလှုံနေကြပါတယ်။

မယ်စဲ့မြို့နယ်အတွင်းရှိ နယ်စပ်စခန်းတွေ နဲ့ မယ်စဲ့မြို့မရဲစခန်းတို့ကို ဇွန်လ ၁၃ ရက် အစောပိုင်းက ကရင်နီတပ်မတော် KA၊ ကရင်နီအမျိုးသားများ ကာကွယ်ရေးတပ် KNDF နဲ့ PDF ပူးပေါင်းတပ်များက တိုက်ခိုက်သိမ်းပိုက်ခဲ့တာပါ။

https://youtu.be/VChtQ8VwsF0

#Political News
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ဆိုင်ကယ်အရောင်းဆိုင်မရှိဘဲ အွန်လိုင်းတွင် ဆိုင်ကယ်ရောင်းချပြီး ငွေကြေးလိမ်လည်နေ
========================

(မဇ္ဈိမ)။ ။ ရွှေတောင်မြို့၌ ဆိုင်ကယ်အရောင်းဆိုင် အမှန်တကယ်မရှိဘဲ ဖေ့စ်ဘုတ်တွင် ဆိုင်ကယ်နှင့် တပတ်ရစ်ဖုန်း များရောင်းချသည့်ပို့စ်များတင်ကာ ငွေကြေးလိမ်လည်မှုများ ရှိနေသည်။

ဖေ့စ်ဘုတ်တွင် “ကိုမြတ်သူ ဆိုင်ကယ် အာမခံ ရောင်းဝယ်ရေး” ၊ “Mobile Star ဖုန်း Second ရောင်း ဝယ်ရေး” ပေ့ချ်များနှင့် TitTok ၌ “ကိုမြတ်သူ” ဆိုသည့်အကောင့်များဖွင့်ကာ ဆိုင်ကယ်နှင့် ဖုန်းများ ရောင်းဝယ်နေသည့် ပေ့ချ်များရှိနေသည်။

“ကိုမြတ်သူ ဆိုင်ကယ် အာမခံ ရောင်းဝယ်ရေး” စာမျက်နှာတွင် စောင့်မျှော်ကြည့်ရှုသူ ၁၆,၀၀၀ ကျော်ရှိ ပြီး “Moblie Star ဖုန်း Second ရောင်းဝယ်ရေး” စာမျက်နှာ၌ စောင့်မျှော်ကြည့်ရှုသူ ၂,၇၀၀ ကျော်ရှိ သည်။ “ကိုမြတ်သူ” TitTok တွင် ကြိုက်နှစ်သက်သူ ၁၆၇,၅၀၀ ကျော်ရှိသည်။ ထို့ပြင် “Myat Thu Aung” နှင့် “Ko Myat Thu” ဖေ့စ်ဘုတ်အကောင့်များတွင်လည်း ဖုန်းများရောင်းဝယ်ကြောင်း ဖော်ပြထားသည်။

ဖော်ပြပါ ဖေ့စ်ဘုတ်စာမျက်နှာများနှင့် TitTok တို့အားလုံးတွင် ပဲခူးတိုင်း၊ ရွှေတောင်မြို့၊ ထန်းကုန်းလမ်း ကြားဟုလိပ်စာဖော်ပြထားပြီး 09690918012 ဖုန်းနံပါတ်ဖြင့် အရောင်းပို့စ်များ တင်ထားသည်။
ဆိုင်ကယ်အရောင်းပို့စ်များအောက်တွင် ဆိုင်ကယ်များ ဈေးတန်ကြောင်း၊ သန့်ကြောင်းနှင့် နယ်မြို့များသို့ ပို့ပေးနိုင်မလား၊ လိုင်စင်ပါလား၊ ရှိသေးလား စသဖြင့်မေးထားသည်ကို တွေ့ရသည်။

မဇ္ဈိမအနေဖြင့် အချက်အလက်စိစစ်ခဲ့ရာတွင် ရွှေတောင်မြို့၌ ထန်းကုန်းလမ်းဟုမရှိဘဲ ထန်းကုန်းကျေး ရွာသာရှိပြီး အဆိုပါ ကျေးရွာအနီးတွင်လည်း ဆိုင်ကယ်ဆိုင်နှင့် ဖုန်းဆိုင် ကြီးကြီးမားမားမရှိကြောင်း ဒေသခံများက ပြောသည်။

ထို့ပြင် မဇ္ဈိမ၏အချက်အလက်စစ်ဆေးသူများက ကိုမြတ်သူဆိုင်ကယ်ရောင်းဝယ်ရေးနှင့် Mobile Star ဖုန်း Second ရောင်းဝယ်ရေး ဖေ့စ်ဘုတ်စာမျက်နှာတွင်ဖော်ပြထားသည့် ဖုန်းနံပါတ်အားဆက်သွယ်ပြီး ဆိုင် လိပ်စာအားမေးမြန်းရာတွင် ရန်ကုန်-ပြည်လမ်းဘေးတွင်ရှိသည့် ထန်းကုန်းလမ်းဟုပြောသော်လည်း ရေရေရာရာ တိတိကျကျ ပြန်လည်ဖြေကြားခြင်းမရှိဘဲ viber သို့ ဆက်သွယ်ပေးရန်သာ ပြောသည်။
“ရွှေတောင်မှာ အကုန်လုံးလိုက်ပြီး စုံစမ်းကြည့်တာတော့ ထန်းကုန်းဘက်မှာ အဲဒီလို ဆိုင်ကယ်အကြီး ကြီးတွေမရှိပါဘူး။ ရွှေတောင်မှာလည်း မရှိဘူး။ လုပ်စား လိမ်စားနေတဲ့ ပေ့ချ်တွေပေါ့နော်။ ထန်းကုန်း နားမှား အဲဒီဆိုင်ကယ်ဆိုင်မရှိဘူးဆိုတာ ထန်းကုန်းနယ်သားတွေကိုယ်တိုင်ပြောတာ။ ဒီရက်ပိုင်း အဲဒါက ဂယက်တော်တော်ရိုက်နေတယ်” ဟု ရွှေတောင်ဒေသခံတစ်ဦးက ပြောသည်။
ကိုမြတ်သူ ဆိုင်ကယ်ရောင်းဝယ်ရေးနှင့် second ဖုန်းရောင်းဝယ်ရေးတွင်ဖော်ပြထားသည့် 09690918012 ဖုန်းနံပါတ်မှာ KBZ Pay တွင် U THU REIN HLAING ဟု အမည်ပေါက်ပြီး Wave Pay တွင် Zin Mar Htwe ဟု အမည်ဖြင့်တွေ့ရသည်။
ထိုပေ့ချ်တွင်ဖော်ပြထားသည့် ဆိုင်ကယ်ဈေးနှုန်းများသည် ပေါက်ဈေးထက် ဈေးသက်သာသဖြင့် ဝယ်ယူ လိုသူများက စရန်ငွေကြိုလွှဲပြီး ဆုံးရှုံခဲ့ရသည်များရှိကြောင်း ဒေသခံတဦးကပြောသည်။
“မြဝတီတိုက်ရိုက်သွင်း ဘာညာဆိုပြီးလုပ်စားနေကြတာအများကြီးပဲ၊ အရမ်းလိမ်နေကြတာ။ သိန်း ၆၀ ပေါက်တဲ့ဆိုင်ကယ်ကို သိန်း ၅၀ လောက်နဲ့ရောင်းတော့ တချို့တွေပါသွားကြတယ်။ K Pay ကနေ စရန်လွှဲ ထား၊ ဆိုင်ကယ်ဖိုးကို ဂိတ်ရောက်မှအပြည့်လွှဲရမယ်ဆိုလို့ စရန်လည်းလွှဲလိုက်ရော ပါသွားကြရော” ဟု ဒေသခံတဦးက မဇ္ဈိမကိုပြောသည်။
ဆိုင်ကယ်ဝယ်ရောင်းလုပ်နေသည့် ရွှေတောင်မြို့ခံတဦးကလည်း “ကိုမြတ်သူ ဆိုင်ကယ်ရောင်းဝယ်ရေး” ပေ့ချ်တွင်တင်ထားသည့် ဆိုင်ကယ်ဈေးနှုန်းများသည် ပြင်ပပေါက်ဈေးထက် သိန်း ၂၀ ခန့် ဈေးသက်သာ နေပြီး အမှန်တကယ်မရှိသည့် လူလိမ်ပေ့ချ်သာဖြစ်ကြောင်း ပြောသည်။

“ကိုမြတ်သူ ဆိုင်ကယ် အာမခံ ရောင်းဝယ်ရေး”တွင် ဖော်ပြထားသည့် ပို့စ်တခု၌ပါဝင်သော ဖေ့စ်ဘုတ် အသုံးပြုသူတဦးအား မဇ္ဈိမကဆက်သွယ်မေးမြန်းခဲ့သည်။

၎င်းသည် ဇွန်လ ၄ ရက်နေ့တွင် Wave Pay မှ တဆင့် ဆိုင်ကယ်ဖိုး စရန်ငွေတစ်သိန်းခွဲလွှဲပြီးနောက် ကိုယ်တိုင်ဆိုင်ကယ်လာယူမည်ဟုဆိုကာ ဖော်ပြထားသည့်လိပ်စာအတိုင်းသွားခဲ့သည်။ သို့သော် ဖော်ပြပါ နေရာသို့ရောက်သော်လည်း ဆိုင်ကိုမတွေ့ရကြောင်းနှင့် ထိုရက်မှစ၍ အဆိုပါပေ့ချ်သည် ၎င်းကို ဖေ့စ် ဘုတ်တွင် သာမက ဖုန်းနံပါတ်ကိုပါ block သွားသဖြင့် ဆက်သွယ်၍ မရခဲ့ကြောင်း ပြောသည်။

“ကျနော်တို့က သူပြောတဲ့လိပ်စာအတိုင်း လိုက်ကြည့်တာ။ အဲဒီနားရောက်လည်းရောက်ရော အနားက လူတွေကိုမေးကြည့်လိုက်တာ အကို အလိမ်ခံလိုက်ရပြီတဲ့။ အဲဒီလိုမေးမေးပြီးလာတဲ့လူတွေ မနည်းတော့ ဘူး အကို့အရင်လေးငါးယောက်ရှိပြီတဲ့။ အဲဒီလိုဆိုင်မျိုး သူတို့လမ်းထဲမရှိဘူးတဲ့။ နယ်ခံတွေ အဲဒီလိုပြော မှပဲ ကျနော် ပြန်လာလိုက်ရတယ်” ဟု ငွေလိမ်ခံလိုက်ရသူတစ်ဦးက မဇ္ဈိမ ကိုပြောသည်။

စာတည်း။ ။စောဖေ
#Misinformation_Buster
#Fake_News
#Fake_Pages

​​မိုးဗြဲတွင် ၃ ရက်အတွင်း အရပ်သား ၂၆ ဦး သတ်ဖြတ်ခံရ
================

ဂျူချန်း
(မဇ္ဈိမ)။ ။ ရှမ်းပြည်နယ်တောင်ပိုင်း၊ မိုးဗြဲမြို့တွင် ဇွန်လ ၆ ရက်နေ့မှ ၈ ရက်နေ့အထိ သုံးရက်အတွင်း အရပ်သား ၂၆ ဦးကို စစ်ကောင်စီတပ်က သတ်ဖြတ်ခဲ့ကြောင်း Free Burma Rangers အဖွဲ့က ဇွန်လ ၁၄ ရက်နေ့တွင် ထုတ်ပြန်ထားသည်။

မိုးဗြဲမြို့၊ စေတီတော်အနီးဝန်းကျင်တွင် ဇွန်လ ၆ရက်နေ့မှ ၈ ရက်နေ့အတွင်း အရပ်သား ၁၄ ဦး ကို စစ်ကောင်စီက အစုလိုက်အပြုံလိုက် ပစ်သတ်ခဲ့ခြင်းဖြစ်ပြီး သတ်ဖြတ်ခံရသူများအနက် တစ်ဦးသည် စေတီတော်ဝန်းအတွင်း လဲကျနေစဉ် ဦးခေါင်းအား ပစ်သတ်ခံရသည်ကို ဒရုန်းဗီဒီယိုဖိုင်မှတစ်ဆင့် မြင်တွေ့ရပြီး အခြားသေဆုံးသူ သုံးဦးသည် ဒူးထောက်လျက် ပစ်သတ်ခံခဲ့သည့် ပုံစံအနေအထားများဖြစ်ကြောင်း ဆိုသည်။

ထို့ပြင် စစ်ကောင်စီ၏ လက်နက်ကြီးပစ်ခတ်မှုကြောင့် မိုးဗြဲမြို့အနီး၌ အခြားအရပ်သား ၁၂ဦး သေဆုံးခဲ့ရကာ ထိခိုက်ဒဏ်ရာရသူ ဦးရေ ၂၀ ရှိကြောင်း ဖော်ပြထားသည်။

ကရင်နီလူ့အခွင့်အရေးအဖွဲ့ (KnHRG) အုပ်ချုပ်မှုဒါရိုက်တာ ကိုဗညားက စစ်ကောင်စီကြောင့် ထိခိုက်သေဆုံးမှုများသည် ပိုမိုများပြားလာနိုင်ပြီး ပျောက်ဆုံး(သို့မဟုတ်) သေဆုံးဟု သတ်မှတ်ထားသူများလည်း ရှိကြောင်း ပြောသည်။

“ စစ်ကောင်စီကြောင့် အသက် သုံးနှစ်အရွယ် ကလေး သေဆုံးတာလည်းရှိတယ်။ ခု ကျနော်တို့ အလောင်းတွေ ပြန်မရခဲ့တာတွေ၊ ကျနော်တို့ လက်လှမ်းမမီတဲ့ ကူညီလို့ မရတော့တဲ့ ရပ်ကွက်ထဲကဟာတွေကျန်နေပါသေးတယ်။ တချို့လူတွေက ထွက်လို့မရအောင် ပိတ်ဆို့ထားခြင်း ခံရတာလည်းရှိတယ်” ဟု ကိုဗညားက မဇ္ဈိမ ကိုပြောသည်။

မိုးဗြဲတွင် အရပ်သားများအား စစ်ကောင်စီက အစုလိုက်အပြုံလိုက် လူမျိုးတုံးသတ်ဖြတ်မှု ကျူးလွန်နေခြင်းကို အပြင်းအထန် ရှုတ်ချကြောင်း အမျိုးသားညီညွတ်ရေးအစိုးရ၏ အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဒေါက်တာဆာဆာက ယမန်နေ့ ဇွန်လ ၁၄ ရက်နေ့တွင် ဖော်ပြထားသည်။

“တချို့ ပစ္စည်းပြန်ယူသူတောင် ခြောက်ပစ်ခံရ၊ အသတ်ခံရနဲ။ မနေ့ကလည်း နှစ်ယောက် ပစ်သတ်ခံရတယ်။ မနေ့မနက် ၈နာရီလောက် မိသားစုသုံးယောက် အိမ်က စက်ပြန်ယူတာ ခုထိပြန်မလာဘူး။ ခုနစ်လသားလေးချန်ထားခဲ့ပြီး အဆက်အသွယ်လည်းမရ။ သေလားရှင်လားမသိဘူး” ဟု မိုးဗြဲမြို့အပြင်ဘက်တွင် ရှောင်နေသည့် ဒေသခံတစ်ဦးက ပြောသည်။

လက်ရှိတွင် မိုးဗြဲမြို့ စည်ကားရပ်ကွက်၊ ပွဲကုန်းရပ်ကွက်၊ ဈေးကုန်း၊ ပေါ်ဦးရပ်ကွက်၊ ဒုန်းဒူထန်ရပ်ကွက်၊ စက်တော်ရာ စသည့် ရပ်ကွက်များတွင် စစ်ကောင်စီတပ်သားများ ဝင်ရောက်လျက်ရှိသောကြောင့် ဒေသခံများမှာ မြို့ပြင် လယ်ကွင်းများနှင့် အခြားလုံခြုံမည့်နေရာများတွင် သွားရောက်ခိုလှုံနေကြရပြီး မြို့တွင်းသို့ လိုအပ်သည့် ပစ္စည်းများ ဝင်ယူသည့်အခါတွင် အသတ်ခံရခြင်း နှင့် ပျောက်ဆုံးခြင်းများ ရှိကြောင်း ဒေသခံများထံက သိရသည်။

မိုးဗြဲမြို့တွင် မေလအကုန်ပိုင်းမှ စတင်ကာ တော်လှန်ရေး အင်အားစုနှင့် စစ်ကောင်စီတပ်တို့ကြား တိုက်ပွဲဖြစ်ပွားလျက်ရှိပြီး စစ်ကောင်စီက နေ့စဉ် လက်နက်ကြီး ပစ်ခတ်ခြင်းများ ပြုလုပ်နေကြောင်း သိရသည်။ လက်ရှိ မိုးဗြဲမြို့ခံ အများစုသည် ဘေးလွတ်ရာသို့ တိမ်းရှောင်နေကြရပြီး မြို့ထဲတွင် ပိတ်မိနေသူအချို့လည်း ကျန်ရှိနေသေးကြောင်း သိရသည်။

စာတည်း။ ။ အောင်ကျော်ဖြိုး

#Mizzima
#Free Burma Rangers
#မိုးဗြဲ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဘားအံမြို့နယ် ထုံးအိုင်ကျေးရွာရှိ NUG ဝန်ကြီးနှင့် NLD အမတ် နေအိမ်တို့အား စစ်ကောင်စီချိပ်ပိတ်
==================

ဂျူချန်း
(မဇ္ဈိမ)။ ။ကရင်ပြည်နယ်၊ ဘားအံမြို့နယ်၊ ထုံးအိုင်ကျေးရွာတွင်ရှိသည့် အမျိုးသားညီညွတ်ရေးအစိုးရ၏ အလုပ်သမားဝန်ကြီးဌာန ပြည်ထောင်စုဝန်ကြီး နိုင်သုဝဏ္ဏ(ခ)နိုင်ထွန်းဖေနှင့် NLD ပါတီမှ ကရင်ပြည် နယ် ဗမာတိုင်းရင်းသားရေးရာလွှတ်တော်ကိုယ်စားလှယ် ဦးတင်ဝင်းတို့၏ နေအိမ်များကိုစစ်ကောင်စီမှ ချိပ်ပိတ်ကာ သိမ်းဆည်းခဲ့ကြောင်း သိရသည်။

ဇွန်လ ၁၃ ရက်နေ့ ညနေ ၆ နာရီဝန်းကျင်ခန့်တွင် စစ်ကောင်စီတပ်သား၊ ရဲ၊ ကျေးရွာလူကြီးသုံးဦး ပါဝင် သည့်အဖွဲ့က ထုံးအိုင်ကျေးရွာ အမှတ်(၇)ရပ်ကွက်၊ (၃)လမ်းတွင်ရှိသည့် နိုင်သုဝဏ္ဏ၏နေအိမ်နှင့် အမှတ် (၆)ရပ်ကွက်၊(၂)လမ်းတွင်ရှိသည့် ဦးတင်ဝင်းတို့၏နေအိမ်များကို ချိပ်ပိတ်သိမ်းဆည်းကြောင်း စာလာကပ် သွားခြင်းဖြစ်ကြောင်း ဒေသခံများက ပြောသည်။

ထိုစာရွက်တွင် ကရင်ပြည်နယ်ရဲတပ်ဖွဲ့အမည်ဖြင့် အကြမ်းဖက်တိုက်ဖျက်ရေးဥပဒေအရ ချိတ်ပိတ်သိမ်း ဆည်းထားသော အဆောက်အဦးဖြစ်ကြောင်း ပါရှိသည်။

အာဏာသိမ်းပြီး သုံးလေးလခန့်အကြာတွင် အိမ်ပိုင်ရှင်များသည် ၎င်းနေအိမ်များ၌ နေထိုင်ကြခြင် မရှိ တော့သော်လည်း စစ်ကောင်စီလက်အောက်ခံ ရဲများက မကြာခဏ လာရောက်ရှာဖွေခြင်း ပြုလုပ်ကြလေ့ ရှိကြောင်း ဒေသခံများက ပြောသည်။

“အဲဒီအိမ်တွေက လူမနေတာ ကြာပြီ။ ခဏခဏ ဓာတ်ပုံလာရိုက်ကြတယ်။ ဘကြီး(နိုင်သုဝဏ္ဏ) တို့အိမ်ဆို ဘာမှမရှိတော့ဘူး။ တံခါးတွေလည်း ဖျက်ဖွင့်ပြီးဝင်မွှေကြတယ်။ လွန်ခဲ့တဲ့လတွေကလည်း ဦးတင်ဝင်း အိမ်ကရောင်းထားတယ်ဆိုပြီး အဲဒီတုန်းက သူတို့ မပိတ်ကြသေးတာ။ ဘကြီးအိမ်ကတော့ ပိတ်ထားတာ ကြာပြီ။ မနေ့ကမှ စာလာကပ်သွားတာ” ဟု ဒေသခံတစ်ဦးက ပြောသည်။

နိုင်သုဝဏ္ဏသည် ဝါရင့်အမျိုးသားရေးလှုပ်ရှားသည့် နိုင်ငံရေးသမားတစ်ဦးဖြစ်ပြီး ၁၉၉၀ ရွေးကောက်ပွဲ တွင် မွန်အမျိုးသားဒီမိုကရေစီအဖွဲ့ချုပ်(MNDF) ပါတီကိုယ်စားပြုပြီး ကြာအင်းဆိပ်ကြီး အမှတ်(၂) မဲဆန္ဒ နယ်တွင်တကြိမ်၊ ၂၀၁၅ ရွေးကောက်ပွဲ၌ မွန်အမျိုးသားပါတီ(MNP) ပါတီကိုယ်စားပြုကာ ဘားအံမြို့နယ် အမျိုးသားလွှတ်တော် အမှတ်(၁)မဲဆန္ဒနယ်တွင်တကြိမ် ရွေးကောက်ခံကိုယ်စားလှယ်အဖြစ် ဝင်ရောက် ယှဉ်ပြိုင်ခဲ့ဖူးသည်။ မွန်ညီညွတ်ရေးပါတီ(MUP)၌ ဗဟိုအလုပ်အမှုဆောင်အဖြစ်တာဝန်ယူခဲ့ပြီး ၂၀၂၁ခုနှစ် တွင် စစ်အာဏာသိမ်းခြင်းကို လက်မခံသောကြောင့် MUP မှ နှုတ်ထွက်ခဲ့သည်။

လက်ရှိတွင် နိုင်သုဝဏ္ဏသည် အမျိုးသားညီညွတ်ရေးအစိုးရ အလုပ်သမားဝန်ကြီးဌာနတွင် ပြည်ထောင်စု ဝန်ကြီးအဖြစ် တာဝန်ယူထားပြီး မွန်ပြည်ဖက်ဒရယ်ကောင်စီတွင် သဘာပတိအဖြစ်လည်း တာဝန်ယူ ထားသည်။

ဦးတင်ဝင်းသည် ၂၀၂၀ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်(NLD)မှ ကရင်ပြည်နယ်တွင် ဗမာတိုင်းရင်းသားကိုယ်စားပြုအဖြစ် ဝင်ရောက်ယှဉ်ပြိုင်ခဲ့ပြီး လက်ရှိတွင် ကရင်ပြည်နယ်လွှတ်တော် ကိုယ်စားပြုကော်မတီ(CRKH) အဖွဲ့ဝင်တစ်ဦး ဖြစ်ကြောင်း သိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#ကရင်ပြည်နယ်
#ဘားအံမြို့နယ်
#နေအိမ်ချိပ်ပိတ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ကရင်နီဒေသအတွင်းတိုက်ပွဲများကြောင့် ဒုက္ခသည် သုံးထောင်ကျော် ထိုင်းနယ်စပ်ဖြတ်ကျော်

Watch more detail -
https://youtu.be/VChtQ8VwsF0

#ကရင်နီဒေသ #ဒုက္ခသည် #ထိုင်းနယ်စပ်ဖြတ်ကျော် #VideoNews #shorts #reels

​​မုတ်သုံလေအားကောင်းလာခြင်းကြောင့် ဇွန်လ ၁၈ ရက်နေ့အထိ တိုင်းနှင့်ပြည်နယ်အများစုတွင် မိုးရွာ သွန်းနိုင်
==============

ရောင်နီ
(မဇ္စျိမ)။ ။မုတ်သုံလေအားကောင်းလာခြင်းကြောင့် တိုင်းနှင့်ပြည်နယ်အများစုတွင် ဇွန်လ ၁၈ ရက်နေ့ အထိ မိုးရွာသွန်းနိုင်ကြောင်း NUG လူသားချင်းစာနာထောက်ထားမှုနှင့် ဘေးအန္တရာယ်ဆိုင်ရာစီမံခန့်ခွဲ ရေး၀န်ကြီးဌာန (MOHADM)က သတင်းထုတ်ပြန်ထားသည်။

၂၀၂၃ ခုနှစ်တွင် မြန်မာနိုင်ငံအတွင်း အနောက်တောင်မုတ်သုံလေ၀င်ရောက်မှုသည် ပုံမှန်၀င်ရောက်သည့် ရက်ထက် အနည်းငယ်နောက်ကျပြီးမှ ၀င်ရောက်ခဲ့ကြောင်း (MOHADM) က ဆိုသည်။
ထို့ပြင် ဇွန်လ ၁၂ ရက်နေ့မှ၁၇ ရက်နေ့အထိရက်များအတွင်း ဘင်္ဂလားပင်လယ်အော်တွင် မုတ်သုံလေ အားကောင်းရာမှ အားအလွန်ကောင်းလာခြင်းကြောင်း ကမ်းရိုးတန်းဒေသများနှင့် မြောက်ပိုင်းဒေသများ တွင် မိုးကြီးနိုင်ပြီး မြို့ပြနှင့် မြစ်ချောင်းများ ရေကြီးရေလျှံနိုင်ချေရှိကြောင်း အသိပေးထားသည်။

“မိုးကတော့ သိပ်အများကြီး မရွာဘူး။ မိုးတွေအုံ့ပြီး ရွာနိုင်တဲ့အနေအထားတော့ တွေ့နေရတယ်။ အရင် တုန်းကလိုတော့ သိပ်အများကြီးမဟုတ်ဘူး။ လေပြင်းတွေဘာတွေ တိုက်ခတ်တာလည်း မရှိသေးပါဘူး” ဟု ရခိုင်ပြည်နယ် ပေါက်တောမြို့နယ်မှ ဒေသခံတဦးက မဇ္စျိမကို ပြောသည်။

စစ်ကောင်စီ၏ မိုးလေ၀သနှင့် ဇလဗေဒညွှန်ကြားမှု ဦးစီးဌာန၏ ဇွန်လ ၁၅ ရက်နေ့ နံနက်၇ နာရီအချိန် ထုတ်ပြန်ချက်အရ ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့တွင် မုတ်သုံလေအားကောင်းနေ ခြင်းကြောင့် နေရာအနှံ့အပြား မိုးထစ်ချုန်းရွာသွန်းပြီး ဒေသအလိုက် မိုးကြီးနိုင်ကြောင်း ဖော်ပြထားသည်။

စာတည်း။ ။စောဖေ
စာမူတည်းဖြတ်။ ။စောဖေ

#မုတ်သုံလေ
#မိုးလေဝသ
#ရေကြီးရေလျှံ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U