​​ဘီးလင်းတွင် ၁ ရက်အတွင်း စစ်ကောင်စီဂိတ်စခန်း ၃ ခု ဒရုန်းဖြင့် ဗုံးကြဲခံရ
====================

YT
(မဇ္ဈိမ)။ ။ မွန်ပြည်နယ်၊ သထုံခရိုင်၊ ဘီးလင်းမြို့နယ်ရှိ စစ်ကောင်စီလုံခြုံရေးယူထားသော တပ်စခန်းနေရာသုံးခုအား ဒရုန်းဖြင့် ဗုံးကြဲတိုက်ခိုက်ခဲ့ကြောင်း သထုံခရိုင် PDF တာဝန်ခံနှင့် ဒေသတွင်း သတင်းအရင်းအမြစ်ထံက သိရသည်။

ပြီးခဲ့သည့် ဇွန်လ ၁၆ ရက်နေ့၊ နံနက် ၉ နာရီ ၃၀ မိနစ်မှစ၍ စစ်ကောင်စီတပ်သားများ လုံခြုံရေးယူထားသော ဘီးလင်းတိုးဂိတ်အဟောင်း၊ ဘီးလင်းတံတားထိပ် ( မြို့တွင်းဘက်) ရှိ စစ်ကောင်စီလုံခြုံရေးဂိတ်နှင့် ဘီးလင်း သကြားစက်အဝင်လမ်းရှိ စစ်ကောင်စီလုံခြုံရေး ဂိတ်စခန်းတို့အား ဒရုန်းဖြင့် ဗုံးကြဲတိုက်ခိုက်ခဲ့ခြင်းဖြစ်သည်။

" ၁၆ ရက်နေ့ ၉ နာရီ ၃၀ မိနစ်အချိန်ခန့်မှာ ဘီးလင်းတိုးဂိတ်ဟောင်း၊ ဘီးလင်းတံတားထိပ်၊ သကြားစက်အဝင်လမ်းစစ်ဆေးရေးဂိတ်တို့ကို ဒရုန်းနဲ့ တိုက်ခိုက်ခဲ့တာမှာ ရန်သူ ထိခိုက်မှုကို စုံစမ်းနေဆဲပါ" ဟု သထုံခရိုင် PDF တာဝန်ခံ ကိုအေးမင်းထွန်းက မဇ္ဈိမကိုပြောသည်။

ဗုံးကြဲတိုက်ခိုက်မှုများအား တပ်မဟာ (၁) KNLA၊ PDF၊ LPDF ပူးပေါင်းအဖွဲ့များက ပြုလုပ်ခဲ့ခြင်းဖြစ်ပြီး ဒရုန်းဖြင့် ဗုံးသီးချ တိုက်ခိုက်မှုပြီးသည့်နောက်တွင် ဘီးလင်းတံတားထိပ်ရှိ စစ်ကောင်စီဂိတ်စခန်း၊ ဘီးလင်းတိုးဂိတ်အဟောင်းရှိ စစ်ကောင်စီတပ်သားတို့သည် နီးစပ်ရာများသို့ သေနတ်များဖြင့် ပစ်ခတ်ခဲ့ကြောင်း ဒေသတွင်း သတင်းရင်းမြစ်တစ်ဦး​ထံက သိရသည်။

" ဗုံးကွဲသံတွေတော့ ကြားရတယ်။ ပြီးတော့မှ သေနတ်သံတွေ ကြားရတာက ဘီးလင်းတံတားဘက်နဲ့ တိုးဂိတ်ဘက်ကနေပါ။ အထိအခိုက်ရှိတယ်တော့ မကြားမိဘူး" ဟု ၎င်းကဆိုသည်။
ကရင်အမျိုးသားအစည်းအရုံး (KNU)၊ တပ်မဟာ (၁)နယ်မြေ၊ သထုံခရိုင်၊ ဘီးလင်းမြို့နယ်ရှိ စစ်ကောင်စီအခြေစိုက် စခန်းများ၊ ဂိတ်စခန်းများ၊ ကင်းပုန်းများအား တပ်မဟာ (၁) KNLA ပူးပေါင်းတပ်ဖွဲ့က မကြာခဏ သွားရောက်တိုက်ခိုက်လေ့ရှိပြီး စစ်ကောင်စီဘက်မှလည်း လက်နက်ကြီး၊ လက်နက်ငယ်များဖြင့် ပြန်လည်ပစ်ခတ့်လေ့ရှိကြောင်း သိရသည်။

ပြီးထဲ့သည့် မေလ ၁၈ ရက်နေ့မှ မေလ ၂၁ ရက်နေ့အတွင်း ဘီးလင်းမြို့နယ်ရှိ မဲပလီစစ်ကောင်စီစခန်း၊ ဘီးလင်းတိုးဂိတ်အဟောင်း၊ ဘီးလင်းတံတားထိပ်ရှိ စစ်ကောင်စီလုံခြုံရေးဂိတ်၊ ဇီးတောကျေးရွာအနီးရှိ စစ်ကောင်စီကင်းစခန်း၊ မဲလံ BGF စခန်း၊ ရင်းအုံ BGF စခန်း စသည့် စစ်ကောင်စီစခန်း ခြောက်ခုအား ဒရုန်း၊ လက်နက်ကြီးများဖြင့် သွားရောက်ပစ်ခတ်တိုက်ခိုက်ခဲ့သေးကြောင်း သိရသည်။

စာတည်း။ ။အောင်ကျော်ဖြိုး

#Mizzima
#စစ်ကောင်စီဂိတ်စခန်း
#ဒရုန်းဖြင့် ဗုံးကြဲခံရ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ပုလောမြို့ ပဝတ်ကုန်းရွာ အနီး တိုက်ပွဲတွင် အရပ်သား ကျည်ထိမှန်သေဆုံး
====================

ကိုရွှေမြိတ်
မဲဆောက် (မဇ္ဈိမ) ။ ။ တနင်္သာရီတိုင်း ၊ မြိတ်ခရိုင်၊ ပုလောမြို့နယ် ၊ ပဝတ်ကုန်းနှင့် ကဒဲကျေးရွာ အနီး ယမန်နေ့ ဇွန်လ ၁၇ ရက်နေ့ နေ့လယ်ပိုင်းတွင် ဖြစ်ပွားသည့် တိုက်ပွဲ၌ အရပ်သား တစ်ဦး ကျည်ထိမှန် သေဆုံးကာ ခရီးသည် အမျိုးသမီး တစ်ဦးလည်း ဒဏ်ရာ ရရှိခဲ့ကြောင်း ပြည်သူ့ကာကွယ်ရေး တပ်ဖွဲ့ဝင်ထံက သိရသည်။

ပြည်သူ့ကာကွယ်ရေးတပ်ဖွဲ့ မြိတ်ခရိုင် တပ်ရင်း (၁) က ကဒဲကျေးရွာ အနီးရှိ ပြည်ထောင်စု လမ်းမကြီးပေါ်တွင် ရှောင်တခင် စစ်ဆေးနေချိန် စစ်ကောင်စီ တပ်ဖွဲ့၏ လာရောက် ပစ်ခတ်မှုကြောင့် နှစ်ဖက် တိုက်ပွဲ ဖြစ်ပွားခဲ့ခြင်းဖြစ်သည်။

အင်အား ၁၅ ဦးပါ စစ်ကောင်စီတပ်ဖွဲ့က ပြည်သူများ၏ ကားများ အကြား ကပ်လိုက်ပါလာပြီး လက်နက်ငယ်များဖြင့် စတင် ပစ်ခတ်ရာမှ ကျောက်တင်ကား မောင်းလာသူ ယာဉ်မောင်း အသက် ၄၀ နှစ်ခန့်ရှိ ဦးဝဏ္ဏတိုး ဆိုသူ ကျဉ်ထိမှန် သေဆုံးခဲ့ပြီး၊ ကော့သောင်းမြိုမှ ရန်ကုန်သို့ ထွက်ခွာလာသော ရွှေစင်စင်္ကြာခရီးသည်တင် မှန်လုံယာဉ်ပေါ်ရှိ ခရီးသည် အမျိုးသမီး တစ်ဦး ထိခိုက် ဒဏ်ရာ ရရှိခဲ့ကြောင်း မြိတ်ခရိုင် တပ်ရင်း (၁) ထံက သိရ သည်။

မြိတ်ခရိုင် တပ်ရင်း (၁) မှ သတင်းနှင့် ပြန်ကြားရေး တာဝန်ခံက“ကျွန်တော်တို့ မြိတ်-ထားဝယ် လမ်းမကြီးပေါ်မှာ စစ်ဆေးရေး ပြုလုပ်နေချိန်မှာ စစ်တပ်က အရပ်သားကားနဲ့ လိုက်ပါလာပြီး လာရောက် ပစ်ခတ်သွားတာ ဖြစ်တယ်”ဟု ပြော သည်။

တိုက်ပွဲ ဖြစ်ပွားနေချိန် အတွင်း ခရီးသွား ပြည်သူများသည် စစ်ကာင်စီတပ်ဖွဲ့နှင့် နီးကပ်စွာ သွားလာခြင်း မပြုရန် ပြည်သူ့ကာကွယ်ရေး တပ်ဖွဲ့ဝင်များက အသိပေး ထုတ်ပြန်ပြီး စစ်ရေး သတင်းများကိုလည်း လိုက်နာကြရန် လိုကြောင်း ၎င်းကပြောသည်။

မြိတ်-ထားဝယ် ပြည်ထောင်စု လမ်းမကြီးပေါ်တွင် ည ၇ နာရီမှ နံနက် ၄ နာရီ အချိန် အထိ ခရီးသွားလာခြင်း မပြုရန် ပြည်သူ့ကာကွယ်ရေး ပူးပေါင်း တပ်ဖွဲ့က အသိပေးထားသည်။

စာတည်း။ ။အောင်ကျော်ဖြိုး

#Mizzima
#ပုလောမြို့ ပဝတ်ကုန်းရွာ
#အရပ်သား ကျည်ထိမှန်သေဆုံး
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဝက်လက်မြို့နယ်အတွင်းရှိကျေးရွာများကို စစ်ကောင်စီတပ်က စစ်ကြောင်းထိုး မီးရှို့
=========================

KMN
(မဇ္ဈိမ) ။ ။စစ်ကိုင်းတိုင်း၊ ဝက်လက်မြို့နယ်အတွင်းရှိကျေးရွာများကို အင်အား ၁၀၀ ခန့်ရှိသည့် စစ်ကောင်စီတပ်စစ်ကြောင်းက ဇွန်လ ၁၇ ရက်နေ့မှစတင်ကာ စစ်ကြောင်းထိုး မီးရှို့ဖျက်ဆီးမှုများ ပြုလုပ် နေသည်ဟု ဒေသခံများက ပြောသည်။

“ဝက်လက်မြို့နယ်အနောက်ခြမ်း သားပျောက်ကုန်းရွာမှာ ရောက်နေတဲ့စစ်ကြောင်းက အနောက်ဘက်ကို ထွက်နေပါတယ်။ မောက်ကဒီးရွာတောင်ဘက်ရောက်နေတဲ့စစ်ကြောင်းက ရေဆိုးတွင်ရွာဘက်မှာ လက် နက်ငယ်တွေနဲ့ ပစ်နေတယ်လို့ သတင်းရထားတယ်” ဟု ဝက်လက်မြို့နယ် သတင်းကွန်ရက်မှ တာဝန်ရှိ သူက ပြောသည်။

အဆိုပါစစ်ကြောင်းသည် ဇွန်လ ၁၇ ရက်နေ့တွင် ဝက်လက်မြို့နယ်အနောက်ခြမ်းရှိ ကံပလုပ်ရွာနှင့် တဲ ကောရွာတို့အား မီရှို့ဖျက်ဆီးခဲ့ပြီး ယနေ့ ဇွန်လ ၁၈ ရက် နံနက်ပိုင်းတွင် ဘုရားပြန်ရွာရှိ နေအိမ်များကို မီးရှို့၍ တဲကောရွာဘက်သို့ ပြန်လည်ထွက်ခွာကာ သားပျောက်ကုန်းရွာနှင့် မောက်ကဒီးရွာ တောင်ဘက် တို့အား အဖွဲ့နှစ်ဖွဲ့ခွဲ၍ စစ်ကြောင်းထိုးနေကြောင်း ဝက်လက်မြို့နယ် သတင်းကွန်ရက် (Wetlet Informational Network) ကထုတ်ပြန်ထားသည်။

ယင်းစစ်ကြောင်းသည် ဆားတောင်မြို့နယ် သာဇင်ရွာနှင့် ပေါက်မရွာများအား ဇွန်လ ၁၃ ရက်မှ ၁၅ ရက် နေ့အထိ မီးရှို့ဖျက်ဆီးခဲ့ပြီး ဒေသခံများကို ဓားစာခံအဖြစ် ခေါ်ဆောင်သွားခဲ့သည့် စစ်ကြောင်း ဖြစ်သည် ဟု သိရသည်။

ဇွန်လ ၁၃ရက်နေ့တွင် အိမ်ခြေ ၁,၀၀၀ ခန့်ရှိသည့် သာဇင်ကျေးရွာအား စစ်ကောင်စီတပ်ဖွဲ့က မီးရှို့ ဖျက်ဆီးခဲ့ရာ အိမ်ခြေ ၆၀၀ ခန့် မီးလောင်ပြာကျခဲ့ပြီး အသက် ၆၀ အရွယ် အမျိုးသမီးတဦး မီးလောင်သေ ဆုံးခဲ့ကြောင်း သိရသည်။

ယင်းစစ်ကောင်စီတပ်ဖွဲ့သည် ဇွန်လ ၁၄ ရက်တွင် အိုင်းဓမ္မရွာမှ နေအိမ် ၁၀ လုံးကို မီးရှို့ခဲ့ပြီး ဇွန်လ ၁၅ ရက်နေ့တွင် ပေါက်မရွာတောင်ခြမ်းနှင့် မြောက်ခြမ်းကို ဝင်ရောက်စီးနင်းမီးရှို့ခဲ့ကာ သာဇင်ကျေးရွာမှ ဒေသခံ၂၅ ဦး၊ အိုင်းဓမ္မကျေးရွာနှင့်ပေါက်မရွာမှ ဒေသခံ ၁၀ ဦးတို့ကို ဖမ်းဆီးခေါ်ဆောင်ပြီး ဝက်လက်မြို့ နယ်အတွင်း ပြန်လည်ဝင်ရောက်နေခြင်းဖြစ်ကြောင်း သိရသည်။

အဆိုပါ စစ်ကောင်စီတပ်စစ်ကြောင်းသည် ဇွန်လဆန်းပိုင်းတွင် ဝက်လက်မြို့နယ်မှတဆင့် စစ်ကိုင်းမြို့ နယ်အတွင်း ဝင်ရောက်ကာ မီးရှို့ဖျက်ဆီးမှုများပြုလုပ်၍ ယင်းမှတဆင့် ဆားတောင်မြို့နယ်အတွင်း စစ်ကြောင်းထိုး မီးရှို့မှုများပြုလုပ်ကာ ဇွန်လ ၁၇ ရက်နေ့တွင် ဝက်လက်မြို့နယ်အတွင်း ပြည်လည် ရောက်ရှိလာခဲ့ခြင်းဖြစ်သည်ဟု ဆိုသည်။

စစ်ကောင်စီတပ်၏ စစ်ကြောင်းထိုး မီးရှို့မှုများကြောင့် ဆားတောင်မြို့နယ်၊ သာဇင်ရွာ၊ အိုင်းဓမ္မရွာ၊ ပေါက် မရွာနှင့် အနီးအနားကျေးရွာဒေသခံများ၊ ဝက်လက်မြို့နယ် သားပျောက်ကုန်း၊ ဘုရားပြန်၊ မောက်ကဒီး စသည့်ကျေးရွာများမှ ဒေသခံထောင်နှင့်ချီ စစ်ဘေးတိမ်းရှောင်နေရပြီး အကူအညီများ လိုအပ်နေကြောင်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#mizzima
#ဝက်လက်မြို့နယ်
#ဆားတောင်မြို့နယ်
Photo - စစ်ကိုင်းမြို့နယ် သတင်းမှန် ပြန်ကြားရေး
( စစ်ကောင်စီတပ် မီးရိူ့ဖျက်စီးခဲ့သည့် ဆားတောင်မြို့နယ်၊ သာဇင်ကျေးရွာ)
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ဂျာနယ်လစ်အသတ်ခံရမှုအတွက် နိုင်ငံရေးသမား ၁ ဦးကို ဘင်္ဂလားဒေ့ရှ်ရဲတပ်ဖွဲ့ ဖမ်းဆီး
========================

ဘင်္ဂလားဒေ့ရှ်နိုင်ငံတွင် ဂျာနယ်လစ်တစ်ဦး အသတ်ခံရသည့် လူသတ်မှုကို ကြိုးကိုင်စီစဉ်မှုဖြင့် နိုင်ငံရေးသမားတစ်ဦးကို ရဲတပ်ဖွဲ့က ဇွန်လ ၁၇ ရက်တွင် ဖမ်းဆီးထိန်းသိမ်းလိုက်သည်။ အဆိုပါ ဖမ်းဆီးခံရသည့် နိုင်ငံရေးသမားသည် ၎င်း၏ မိသားစုအကြောင်း သတင်းစတိုရီများ ရေးသားခဲ့သည့် ဂျာနယ်လစ်ကို သတ်ဖြတ်ရန် စီစဉ်ညွှန်ကြားခဲ့သူဖြစ်ကြောင်း စွပ်စွဲခံထားရသည်။
http://www.mizzimaburmese.com/article/129726
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U