တာဝေးစစ်ဆင်ရေးနှင့် ကင်းထောက်ဒရုန်း ထုတ်လုပ်နေကြောင်း Ferderal Wings အသိပေး
===================

ရောင်နီ
(မဇ္စျိမ)။ ။ ပြည်တွင်းပြည်ပ နည်းပညာရှင်များ၏ ပူးပေါင်းပါ၀င်မှုဖြင့် တာဝေးစစ်ဆင်ရေးနှင့် ကင်းထောက်ဒရုန်းများကို ထုတ်လုပ်နေကြောင်း Federal Wings ဒရုန်းတပ်ဖွဲ့က ယနေ့ ဇူလိုင်လ ၇ ရက်တွင် ထုတ်ပြန်သည်။

Federal Wings တပ်ဖွဲ့သည် အကန့်အသတ်ဘောင်များအတွင်းမှ ရနိုင်သမျှ အကောင်းဆုံးရလဒ်များ ဖြစ်ထွန်းလာရန်အတွက် အစဉ်တစိုက် ကြိုးစားအားထုတ်လျက်ရှိကြောင်း ထုတ်ပြန်ချက်တွင် ဖော်ပြထားသည်။

လက်ရှိအချိန်တွင်လည်း တာဝေးစစ်ဆင်ရေးနှင့် ကင်းထောက်ဒရုန်း ထုတ်လုပ်ရေး စီမံကိန်းကို အကောင်အထည်ဖော် ဆောင်ရွက်နေသည်မှာ တစ်နှစ်တာကာလအတွင်း ရောက်ရှိနေပြီဖြစ်ကြောင်း Federal Wings ၏ ထုတ်ပြန်ချက်တွင် ဖော်ပြထားသည်။

ယင်းသို့ ထုတ်လုပ်ရာတွင် ပြည်တွင်းနှင့် ကမ္ဘာအနှံ့မှ နည်းပညာရှင်များ၏ ပူးပေါင်းပါ၀င်မှုဖြင့် ဆောင်ရွက်နေခြင်းဖြစ်ပြီး ဒရုန်းကိုယ်ထည်ကို Composite နည်းပညာများဖြင့် Federal Wings ၏ ထုတ်လုပ်ရေးတပ်ဖွဲ့များက ကိုယ်တိုင်ထုတ်လုပ်နိုင်သည့်အဆင့်သို့ ရောက်ရှိနေပြီဖြစ်ကြောင်းလည်း ထုတ်ပြန်ချက်အရ သိရသည်။
Federal Wings ၏ ပြည်သူလူထုထံ အစီရင်ခံတင်ပြမှုတွင် ၎င်းတို့၏ တာဝေးစစ်ဆင်ရေးနှင့် ကင်းထောက်ဒရုန်းထုတ်လုပ်ရေး Project မှ မှတ်တမ်းဓာတ်ပုံများကိုလည်း ပူးတွဲဖော်ပြထားသည်ကို တွေ့ရသည်။

ထို့အပြင် နည်းပညာဖွံ့ဖြိုးမှုအားကောင်းရန်အတွက် Research & Development (R&D) လုပ်ငန်းများအား Federal Wings မှ ဆက်လက်ကြိုးစားဆောင်ရွက်လျက်ရှိကြောင်း ဆိုသည်။
ထို့ကြောင့် ထုတ်လုပ်ရေးလုပ်ငန်းများနှင့် ဒရုန်းတပ်ဆင်ရေးလုပ်ငန်းများအား လျှင်မြန်ထိရောက်စွာ အကောင်အထည်ဖော်နိုင်ရန်အတွက် ငွေကြေးထည့်ဝင်မှုကိုသာ အားကိုးအားထားပြုရမည် ဖြစ်သောကြောင့် ပြည်သူများအနေဖြင့် ၀ိုင်း၀န်းကူညီကြရန်လည်း တိုက်တွန်းထားသည်။

တိုင်းရင်းသားပေါင်းစုံ၊ လူမျိုးပေါင်းစုံ၊ ဘာသာပေါင်းစုံ လိုလားတောင်းတသည့် Federal Democracy ကို ယူပေးမည့် တောင်ပံများဆိုသည့် အဓိပ္ပါယ်သက်ရောက်သည့် Federal Wings ဒရုန်းတပ်ဖွဲ့ကို ၂၀၂၁၊ မေလတွင် စတင်စုဖွဲ့ တည်ထောင်ခဲ့ခြင်း ဖြစ်သည်။

ကရင်အမျိုးသားအစည်းအရုံး(KNU)နယ်မြေများတွင် စတင်အခြေစိုက်ခဲ့သည့် Federal Wings ဒရုန်းတပ်ဖွဲ့သည်် စစ်ကိုင်းတိုင်းအတွင်းရှိ စစ်ကောင်စီတပ်ဖွဲ့နှင့် ၄င်းတို့ စခန်းချရာနေရာများအား ယခုနှစ် ဇွန်လမှ စတင်ကာ တိုက်ခိုက်မှုများ ပြုလုပ်လျက်ရှိသည်။
၂၀၂၃ ခုနှစ် ပထမ ခြောက်လတာ ကာလအတွင်းတွင်လည်း Federal Wings ဒရုန်းတပ်ဖွဲ့က ဗုံးသီး(အမျိုးအစားစုံ) ၆၈၀ ခန့် အသုံးပြုခဲ့သည့် ဒရုန်းစစ်ဆင်‌ရေးပေါင်း ၂၈၁ ကြိမ်တွင် စစ်ကောင်စီတပ်ဖွဲ့၀င် ၅၀ ဦးခန့် သေဆုံးခဲ့ကြောင်း ဇူလိုင်လ ၃ ရက်တွင် သတင်းထုတ်ပြန်ထားသည်။

စာတည်း။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)

#တာဝေးစစ်ဆင်ရေး
#ကင်းထောက်ဒရုန်း
#FederalWings
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ကန့်ဘလူတွင် စစ်ကောင်စီတပ်စစ်ကြောင်းက ဖမ်းဆီးခေါ်ဆောင်ခံရသူ ၆၀ ကျော်မှ တချို့ပြန်လွတ်လာ
======================

ကိုခင်မောင်
(မဇ္စျိမ) ။ ။ စစ်ကိုင်းတိုင်း၊ ကန့်ဘလူမြို့နယ်တွင် စစ်ကောင်စီစစ်ကြောင်းမှ ဖမ်းဆီးခံရသူ အရပ်သားပြည်သူ ၆၀ ဦးကျော်အနက် အချို့ပြန်လွတ်လာပြီး ၁၄ ဦးမှာ ဆက်လက်ဖမ်းဆီးခံထားရဆဲဖြစ်သည်ဟု ကျွန်းလှ ကန့်ဘလူတက်ကြွလှုပ်ရှားသူများအဖွဲ့ -ကန့်ဘလူခရိုင် ထံမှ သိရသည်။

ပြီးခဲ့သည့် ဇူလိုင်လ ၄ရက်နှင့် ၅ရက်တို့တွင် စစ်ကောင်စီတပ် စစ်ကြောင်းမှ ကန့်ဘလူမြို့နယ်၊ အင်းမရွာ ဒေသခံ ၁၂ဦး နှင့် မိဿလင်ကုန်းရွာနေ ဒေသခံ ၄၈ဦး တို့ကို ၎င်းတို့တပ်စွဲထားရာ နေရာများသို့ ဖမ်းဆီးခေါ်ဆောင်သွားရာမှ ၄၆ဦးပြန်လည် လွတ်မြောက်လာခြင်းဖြစ်သည်ဟု ဆိုသည်။

"ဇူလိုင် ၄ ရက်ကဖမ်းသွားတဲ့ ၁၂ ဦးထဲက အသက်မပြည့်သေးတဲ့ ကလေးသုံးယောက်နဲ့ အမျိုးသမီး လေးဦး၊ ပေါင်း ခုနစ်ယောက် လွတ်လာပါတယ်။ အမျိုးသား ငါးယောက်တော့ ဖမ်းခံရဆဲပါဗျ" ဟု အင်းမရွာခံ တစ်ဦးက ပြောသည်။

စစ်ကောင်စီတပ်မှ ဖမ်းဆီးခေါ်ဆောင်ခံထားရသူများတွင် အသက်မပြည့်သေးသောကလေးများ၊ အမျိုးသမီးများနှင့် လယ်ယာလုပ်ငန်း လုပ်ကိုင်နေသူများ ပါဝင်နေကြောင်းလည်း ဆိုသည်။

"မိဿလင်ကုန်းရွာ ဝင်ဖမ်းတာက အားလုံး ၄၈ ယောက်။ ပထမ အသုတ် ၁၃ ဦး ပြန်လွတ်လာပြီး ဒီနေ့(ဇူလိုင် ၇ရက်)က ၂၆ ဦး ပြန်လွတ်ပါတယ်။ ပြန်လွတ်လာတဲ့ ၂၆ ယောက်ထဲမှာ ရှစ်တန်း ကျောင်းသားလေးတစ်ယောက်ပါပါတယ်ဗျ" ဟု အမည်မဖော်လိုသူ ဒေသခံတစ်ဦးက ပြောသည်။

လက်ရှိတွင် အင်းမရွာမှ အရပ်သားပြည်သူ ငါးဦးနှင့် မိဿလင်ကုန်းရွာမှ အရပ်သားပြည်သူ ကိုးဦးကို စစ်ကောင်စီများအထိုင်ချတပ်စွဲနေသော ကန့်ဘလူမြို့နယ်၊ ကိုးထောင်ဘို့အထိုင်စခန်းနှင့် ကျွန်းလှမြို့နယ်ရှိ အထိုင်စခန်းများတွင် ဆက်လက်ဖမ်းဆီးထားခြင်းဖြစ်ကြောင်း သိရသည်။

“ဆက်လက်ဖမ်းဆီးခံရသူတွေထဲမှာ အမျိုးသားတွေပဲ ကျန်တယ်လို့ သိရပါတယ်” ဟု ကျွန်းလှ - ကန့်ဘလူ တက်ကြွလှုပ်ရှားသူများအဖွဲ့မှ တာဝန်ရှိသူက မဇ္စျိမကို ယနေ့ ၁နာရီ ၁၅မိနစ်တွင် ပြောသည်။
ကန့်ဘလူမြို့နယ်၊ မိဿလင်ကုန်းရွာ ဒေသခံ ၄၈ဦးကို အင်အား ၅၀ခန့်ပါ စစ်ကောင်စီတပ် ခြေမြန်တပ်ရင်း ( ၃၆၃ ) စစ်ကြောင်းက ဇူလိုင်လ ၅ ရက် နံနက်ပိုင်းတွင် ကိုးတောင်ဘို့အထိုင်ရစခန်းသို့ ခေါ်ဆောင်သွားခြင်းဖြစ်သည်။

ထို့အပြင် ကန့်ဘလူမြို့နယ်၊ ပင့်သာတိုက်နယ်က အင်းမရွာဒေသခံ ၁၂ဦးကိုလည်း အင်အား ၁၀၀ကျော်ပါ စစ်ကောင်စီလက်အောက်ခံ ခြေမြန်တပ်ရင်း ( ၃၆၁ )နှင့် ပျူစောထီးဆိုသူများမှ ဇူလိုင်လ ၄ ရက်တွင် ကျွန်းလှမြို့နယ်က အထိုင်ချတပ်စွဲထားရနေရာများသို့ ဖမ်းဆီးခေါ်ဆောင်သွားခြင်း ဖြစ်ကြောင်း သိရသည်။

စစ်ကောင်စီစစ်ကြောင်းများသည် ကန့်ဘလူခရိုင်အတွင်း၌ အမြဲမပြတ်စစ်ကြောင်းထိုးနေပြီး စစ်ကြောင်းနှင့်တိုးသည့် အရပ်သားပြည်သူများကို ဖမ်းဆီးခေါ်ဆောင်သွားကာ ဒေသခံတချို့မှာ ညှဥ်းပန်းနှိပ်စက်သတ်ဖြတ်ခံရသကဲ့သို့ တချို့ကို ငွေကြေးအမြောက်အများဖြင့် အတင်းအကျပ်ပြန်လည်ရွေးခိုင်းခြင်းမျိုးလည်း လုပ်လေ့ရှိကြောင်း ဒေသခံများထံမှ သိရသည်။

ယင်းအပြင် ထိုစစ်ကောင်စီတပ်နှင့် ပျူစောထီးများသည် ပြည်သူပိုင်တန်ဖိုးကြီးပစ္စည်းများအား ခိုးယူသယ်ဆောင်ခြင်း၊ လယ်ယာသုံးကျွဲ၊ နွားများအား အဓမ္မယူဆောင်ကာ ပြန်လည်လေလံတင် ရောင်းချခြင်းများကိုလည်း အမြဲမပြတ် လုပ်ဆောင်လျက်ရှိကြောင်း သိရသည်။
စာတည်း - သန့်ဇော်(သန်လျင်)

#mizzima
#စစ်ကောင်စီတပ်
#ပျူစောထီး
#ကန့်ဘလူမြို့နယ်
#ညှဥ်းပန်းနှိပ်စက်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင်လ ( ၇)ရက်၊ မွန်းလွဲ ၂ နာရီ Mizzima News Hour မဇ္ဈိမသတင်းအစီအစဉ်
===========================

00:58 - လူ့အခွင့်အရေးချိုးဖောက်နေတဲ့ မြန်မာစစ်ကောင်စီကို ICC က အရေးယူဖို့ ကုလလူ့အခွင့်အရေးဆိုင်ရာမင်းကြီး တိုက်တွန်းတဲ့သတင်း

04:37- အင်းစိန်ထောင်တွင်း၌ "ဆဲဗင်းဇူလိုင်"နေ့ လှုပ်ရှားမှုပြုလုပ်တဲ့သတင်း

06:35 - Blackpink ဖျော်ဖြေပွဲစီစဉ်သူရဲ့ တောင်တရုတ်ပင်လယ်မြေပုံအပေါ် ဗီယက်နမ်က စုံစမ်းစစ်ဆေးမှုတွေပြုလုပ်နေတဲ့သတင်း

11:14 - စစ်ကောင်စီက ဒီဂျစ်တယ်နည်းပညာအသုံးချမှုကို တင်းကြပ်စွာ ကန့်သတ်ချုပ်ကိုင်ထားဆဲတဲ့သတင်းတွေ အပါအဝင် အခြားစိတ်ဝင်စားဖွယ် သတင်းတွေကိုလည်း တင်ဆက်ပေးသွားမှာပါ။

https://youtu.be/lEM2yxOj45s

#2pmnews
#Mizzimanewshour
#mizzimatv
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ထိုင်းတွင် မြန်မာကလေးငယ်များအား နေရပ်ပြန်ပို့ခြင်းအတွက် ဝေဖန်ပြစ်တင်မှုများ ထွက်ပေါ်
====================

ထိုင်းနိုင်ငံ အန့်ထောင်းအရပ်အရှိ ထိုင်းရတ်ရှ် ဝတ်တာယာ အမှတ် (၆ )ကျောင်းမှ မြန်မာတိုင်းရင်းသား လူနည်းစုကလေးငယ် ၁၂၆ ဦးကို မြန်မာနိုင်ငံဆီ နေရပ်ပြန်ပို့သည့် ထိုင်းတာဝန်ရှိသူများ၏ ဆုံးဖြတ်ချက်ကို ပညာရှင်များနှင့် NGOs များက ဝေဖန်ပြစ်တင်လျက် ရှိသည်။

ဆရာ နှစ်ဦးတည်းသာ ရှိသည့် ထိုင်းရတ်ရှ် ဝတ်တာယာ အမှတ်( ၆ )ကျောင်းတွင် တိုင်းရင်းသား ကလေးငယ်အများအပြား ကျောင်းအပ်နှံကြကြောင်း ဒေသခံများက ဇွန်အစောပိုင်း၌ အာဏာပိုင်များထံ တင်ပြထားခြင်း ဖြစ်သည်။ ချင်းရိုင်ပြည်နယ် အခါကျေးရွာတစ်ရွာမှ ၎င်းတို့ကို ခေါ်ယူလာခဲ့ခြင်း ဖြစ်ကြောင်း ကလေးငယ်အများစုက စကားပြန်တစ်ဦးကို ပြောဆိုသည်။

July - 7 [2 Pm] Mizzima News Hour

Mizzima Headline News

#2pmnews #mizzimanewshour #reels #shorts

ရန်ကုန်ရှိ တော်လှန်ရေးအင်အားစုများ "ဆဲဗင်းဇူလိုင်" လှုပ်ရှားမှုများပြုလုပ်
=================

ဂန္ဒမာ
(မဇ္ဈိမ)။ ။ ရန်ကုန်မြို့ရှိ နေရာတချို့တွင် တော်လှန်ရေးအင်အားစုများက (၆၁) နှစ်မြောက် “ ဆဲ‌ဗင်းဇူလိုင်" လှုပ်ရှားမှုများကို ယမန်နေ့ ဇူလိုင်လ ၆ ရက် ကစတင်ကာ ပြုလုပ်ခဲ့ကြောင်းသိရသည်။

"ကျွန်တော်တို့ အခုချိန်ထိ အာဏာရှင်စနစ်ကို တွန်းလှန်ဖို့ တည်ရှိနေတာက ဒီကောင်တွေ လုံးဝ ဖိနှိပ်ဖြိုခွဲလို့မရဘူးဆိုတဲ့ သက်သေဖြစ်ပါတယ်။ ဒါကြောင့် အာဏာရှင်စနစ် အဆုံးသတ်ဖို့ ရိုက်ချိုးမယ့် ကျောင်းသားလူငယ်တွေ၊ တော်လှန်လူငယ်တွေ အခုချိန်ထိ ရှိသေးတယ် ။ ကျွန်တော်တို့ ဘယ်သောအခါမှ ဒီလိုဖြစ်ရပ်ကို မမေ့ဘူး ။ ကမ္ဘာမကျေဘူးဆိုတာ ပြသချင်လို့ ဒီလှုပ်ရှားမှု လုပ်ရခြင်း ဖြစ်ပါတယ်။" ဟူ၍ Anti-Janta Alliance Yangon AJAY - စစ်အာဏာရှင်ဆန့်ကျင်ရေး ရန်ကုန်အင်အားစု တာဝန်ရှိသူက မဇ္ဈိမ ကို ဖြေကြားသည်။

အလားတူ စမ်းချောင်းပင်မ သပိတ်စစ်ကြောင်းကလည်း ရန်ကုန်မြို့တစ်နေရာရှိ စာသင်ကျောင်းအတွင်းဝင်၍ People Power အဖွဲ့နှင့် ပူးပေါင်းကာ “ ၇ ဇူလိုင် စိတ်ဓာတ်ကိုင်ဆွဲပြီး တိုက်ပွဲဝင်ကြ “ စာတန်းအားချိတ်ဆွဲ၍ စစ်အာဏာရှင်ဆန့်ကျင်ရေး တိုက်တွန်းလှုံ့ဆော်မှု ပြုလုပ်ခဲ့ကြောင်း သိရသည်။

"မတရားသဖြင့် အာဏာသိမ်းထားတဲ့ စစ်တပ်ကို တော်လှန်နေတဲ့ တလရ အင်အားစုတွေက ဘယ်တော့မှ သွေးမအေးဘူးဆိုတာကိုပြသချင်ပြီး 7th July မှာ မှ မဟုတ်ဘဲ တလရ အတွက် အသက်ပေးလိုက်ရတဲ့ အပြစ်မရှိအသက်ပေါင်းများစွာရဲ့ စိတ်ဓာက်ကိုင်စွဲပြီး ဆက်လက် တိုက်ပွဲဝင်သွားပါမယ်ဆိုတာနဲ့ အရမ်းကိုလက်နက်တွေပေါပြီး လုံခြုံရေးတင်းကြပ်ပါတယ်ဆိုတဲ့ စစ်တပ်ကြီးရဲ့ လုံခြုံရေး လျော့ရဲလာမှုကို ပြချင်တာရယ်ကြောင့်ပါရှင့်" ဟူ၍ စမ်းချောင်းပင်မ သပိတ်စစ်ကြောင်း၏ ဒုတိယ ဥက္ကဋ္ဌ က ပြောသည်။

ဆဲဗင်းဇူလိုင်ကို မမေ့စေရန် ရည်ရွယ်၍ ဇူလိုင်လ ၆ ရက်နေ့ကလည်း Kyimyindaing Networks (KMD18) နှင့် Mayangone Democratic Front (MDF) တို့ပူးပေါင်းကာ "7.7.62 မ မေ့ကြနဲ့" စာတန်းဖြင့် တော်လှန်ရေးအင်အားစုများအား ဆဲဗင်းဂျူလိုင်စိတ်ဓါတ်ကိုင်ဆွဲ၍ဆက်လက်တိုက်ပွဲဝင်ကြရန် နှင့် အကြမ်းဖက်စစ်တပ် ဆန့်ကျင်ရေး အာဏာဖီဆန် တော်လှန်ပုန်ကန် လှုပ်ရှားမှုကို ပြုလုပ်ခဲ့ကြောင်း သိရသည်။

၁၉၆၂ ခုနှစ် ဆဲဗင်းဇူလိုင် အရေးအခင်းနှင့် ၂၀၂၁ ခုနှစ် နွေဦးတော်လှန်ရေးနှစ်ခု နှိုင်းယှဉ်ကြည့်လျင် သိသာထင်ရှားပြီး တူညီသည့် အဖြေရှိကာ ခေတ်တိုင်း၏ အာဏာရှင်တိုင်းသည် တိုင်းပြည်နှင့် လူထုအပေါ် ဘယ်သောအခါမှ ကောင်းကျိုးမပြုသော သူများဖြစ်ပြီး ကွဲခြားချက်အနေဖြင့် ဆဲဗင်းဇူလိုင်ကာလ ဗိုလ်ချုပ်နေဝင်းခေါင်းဆောင်သည့်အာဏာရှင်များက ၎င်းတို့ ထိုင်နေသည့် ပုလ္လင်ကို ကိုင်လှုပ်နိုင်သောသူများမှာ ကျောင်းသားတွေ ဖြစ်သည့်အတွက် အဆိုပါအချိန်ကာလက ကျောင်းသားတွေကို ပစ်မှတ်ထားပြီး သတ်ဖြတ်ခဲ့ပြီး ယခု အချိန် အာဏာရှင် စစ်ခေါင်းဆောင်၏ ပုလ္လင် ကို ကိုင်လှုပ်နိုင်သည်မှာ ကျောင်းသားများအပြင် လူထုပါ ပါဝင်လာခဲ့ခြင်းဖြစ်တဲ့အတွက် မင်းအောင်လှိုင် ဦးဆောင်သည့် အာဏာရှင် လူတစ်စုသည် ကြောက်ရမ်းရမ်းကာ အကြမ်းဖက်သတ်ဖြတ်မှုများပြုလုပ်နေခြင်းဖြစ်ကြောင်း စစ်အာဏာရှင်ဆန့်ကျင်ရေး ရန်ကုန်အင်အားစု တာဝန်ရှိသူက ၎င်း၏ အမြင်နှင့်သုံးသပ်ချက်ကိုပြောသည်။

"ဆဲဗင်းဇူလိုင်" အရေးအခင်းပေါ်ပေါက်လာရခြင်းမှာ ၁၉၆၂ ခုနှစ် ဇူလိုင်လ ၇ ရက်နေ့တွင် ဗိုလ်ချုပ်နေဝင်း အာဏာသိမ်းစစ်တပ်၏ ဖြိုခွင်းသတ်ဖြတ်မှုများကြောင့် တက္ကသိုလ်ကျောင်းသား ရာကျော်သေဆုံးခဲ့သည့် ဖြစ်ရပ်မှ စတင်သည်။ဇူလိုင်လ ၈ ရက်နေ့တွင် ကျောင်းသားသမဂ္ဂ အဆောက်အအုံကြီးအား ဒိုင်းနမိုက်များနှင့် ဖောက်ခွဲခဲ့သည်။ယနေ့သည် "ဆဲဗင်းဇူလိူင်" အရေးအခင်း (၆၁) နှစ်ပြည့်ဖြစ်သည်။

စာတည်း။ ။အောင်ကျော်ဖြိုး

#Mizzima
#ဆဲဗင်းဇူလိုင်
#(၆၁) နှစ်မြောက်
#ရန်ကုန်မြို့
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

အယ်နီညိုရာသီဥတုကြောင့် ကမ္ဘာ့အပူဆုံးဇွန်လအဖြစ် မှတ်တမ်းဝင်ခဲ့
#internationalnews #reels #shorts

တောပုရွာကို လက်နက်ခဲယမ်းလာပို့တဲ့ စစ်ကောင်စီတပ်ဖွဲ့ မိုင်းဆွဲတိုက်ခံရပြီး ၂ဦးသေဆုံး
========================

ပါခွီး (မဇ္စျိမ)။ ။ စစ်ကိုင်းတိုင်း ၊ မုံရွာမြို့နယ် ၊ တောပုကျေးရွာသို့ လက်နက်ခဲယမ်းပို့ပြီး ပြန်လာသည့် စစ်ကောင်စီတပ်ဖွဲ့ခြေလျင်စစ်ကြောင်းကို ယမန်နေ့ ဇူလိုင်လ ၆ရက် ညနေ ၄နာရီ ၃၀မိနစ် အချိန်တွင် မိုင်းဆွဲတိုက်ခိုက်ခဲ့ရာ နှစ်ဦးသေဆုံးပြီး ဒဏ်ရာရရှိသူများရှိကြောင်း Brave Heart Army (BHA) တပ်ဖွဲ့ တာဝန်ရှိသူထံက သိရှိရသည်။

“သူတို့လက်နက်ခဲယမ်းသွားပို့တယ်ဆိုတာကို သတင်းအတိအကျရပြီး ပြန်အလာ မိုင်းကွင်းပေါ်ရောက်တဲ့အချိန် ဆွဲလိုက်တာပါ ။ နှစ်ကောင်ပွဲချင်းပြီးသေတာကို တွေ့ရပါတယ်” ဟု BHA တာဝန်ရှိသူက မဇ္စျိမကိုပြောသည်။

တောပုကျေးရွာသို့ လက်နက်ခဲယမ်း ပို့ဆောင်အပြီး မုံရွာမြို့နယ် ၊ မြေနှဲကျေးရွာအနီးရှိ စွမ်းရည်ထက် ဆီဆိုင်ဂိတ်သို့ ပြန်လာသည့် စစ်ကောင်စီတပ်သား ၂၁ ဦးကို ပဒေသာ မိုင်းငါးလုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ဆိုသည်။


အဆိုပါတိုက်ခိုက်မှုကို BHA နှင့်အတူ Special Force 11 (PDF) , Monywa Dynamite , Myaung Revolution Army , Peace Takers Force(PTTF) နှင့် God of Monywa တို့က ပူးပေါင်း တိုက်ခိုက်ခဲ့ခြင်း ဖြစ်ကြောင်း သိရသည်။

ဇူလိုင်လ ၅ရက်နေ့က ဒေသအတွင်းရှိ ကာကွယ်ရေးတပ်ဖွဲ့များက စစ်ကောင်စီလက်အောက်ခံ ပျူစောထီးဆိုသူများ အများစုနေထိုင်သည့် ‌ကျေးရွာများဖြစ်သော ချောင်းဦးမြို့နယ်အတွင်းရှိ ကံကြီးကုန်း ၊ ကင်းမွန်ထော် ၊ ကုလားကြီးရွာ နှင့် မုံရွာမြို့နယ်အတွင်းရှိ တောပုရွာတို့ကို တစ်ပြိုင်တည်း တိုက်ခိုက်ခဲ့ရာ စစ်ကောင်စီလက်အောက်ခံများ ထိခိုက်သေဆုံးမှုများရှိပြီး ကာကွယ်ရေးတပ်ဖွဲ့များဘက်မှလည်း အကျအဆုံးများရှိကြောင်း သိရသည်။

ဇူလိုင်လ ၅ရက်နေ့ ညနေ ၅နာရီ ၄၀မိနစ်အချိန်တွင် ကံကြီးကုန်းရွာ (ပျူစောထီးအများစုနေသည့်ကျေးရွာ) တိုက်ပွဲတွင် အရေးနိမ့်၍ ထွက်ပြေးလာသော ရေယာဉ်တစ်စီးကို BHA တပ်ဖွဲ့နှင့် မဟာမိတ် များက ပြောင်းတိုက် ၁၇လုံးဖြင့် နေရာလေးနေရာမှ တိုက်ခိုက်ခဲ့ရာ စစ်ကောင်စီတပ်ဖွဲ့ဘက်မှ တစ်ဦးသေဆုံးကြောင်း သိရသည်။

https://youtu.be/CImtfTBCpZ0

စာတည်း။ ။ ဖူးသိမ်ကျ
စာမူတည်းဖြတ်။ ။ အောင်ကျော်ဖြိုး

#စစ်ကိုင်းတိုင်း
#မုံရွာမြို့နယ်
#စစ်ကောင်စီတပ်
#တိုက်ခိုက်မှု
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

တောင်အာဖရိကဆင်းရဲသားရပ်ကွက်မှာ ဓါတ်ငွေ့ယိုစိမ့်မှုကြောင့် ၁၇ ဦးထက်မနည်းသေဆုံး

#internationalnews #reels #shorts