ရွှေပြည်သာတွင် အရေးပေါ်လူနာတင်ယာဥ် မတော်တဆမှုဖြစ်၊ ၂ သေဆုံး ၂ ဦး ဒဏ်ရာရ
======================

ရောင်နီ
(မဇ္စျိမ)။ ။ရန်ကုန်တိုင်း၊ ရွှေပြည်သာမြို့နယ်တွင် လူနာတင်ယာဥ်တစီး မတော်တဆမှုဖြစ်ပွားပြီး အရေးပေါ်လူနာတဦးနှင့် ပရဟိတ၀န်ထမ်းတဦး သေဆုံးကာ နှစ်ဦးဒဏ်ရာရရှိခဲ့ကြောင်း သတင်းရရှိသည်။

We Love Care Burma လူမှုဘဝစောင့်ရှောက်ရေးပရဟိတအသင်းမှ လူနာတင်ယာဥ်သည် ယမန်နေ့ အောက်တိုဘာလ ၁၆ ရက် ည ၈ နာရီအချိန်ခန့်က ရွှေပြည်သာမြို့နယ်မှ လူနာသယ်ယူပြီး အင်းစိန်ဆေးရုံကြီးသို့ သွားရောက်ပို့ဆောင်စဥ် ပုလဲလမ်းမပေါ် (၁၄) လမ်းဆုံအနီးတွင် မတော်တဆမှု ဖြစ်ပွားခဲ့ခြင်း ဖြစ်သည်။
“အရေးပေါ် လူနာကို တင်ပြီးမောင်းလာတဲ့အချိန် ပုလဲလမ်းမပေါ်မှာ လမ်းဖြတ်ကူးတဲ့ လူတယောက်ကို တွေ့လို့ ရှောင်လိုက်တာ။ အဲ့လို ရှောင်လိုက်တဲ့အချိန် လမ်းဘေးမှာ ရပ်ထားတဲ့ တွဲကားကို အနောက်ကနေ တိုက်မိခဲ့ပြီး တိမ်းမှောက်ခဲ့တာဖြစ်ပါတယ်။ဒဏ်ရာရတဲ့သူ နှစ်ယောက်ရှိပါတယ်။ လက်ရှိအချိန်အထိ အင်းစိန်ဆေးရုံမှာ ဆေးကုသမှုခံယူနေပါတယ်” ဟု မရမ်းကုန်းအခြေစိုက် လူမှုကူညီရေးအသင်း တာ၀န်ရှိသူတဦးက ပြောသည်။

ယင်းသို့ ယာဥ်မတော်တဆမှု ဖြစ်ပွားခြင်းကြောင့် လူနာတင်ယာဥ်ပေါ်တွင် လိုက်ပါလာသည့် ပရဟိတ၀န်ထမ်း အမျိုးသားတဦး နေရာတွင်ပင် သေဆုံးခဲ့ပြီး အရေးပေါ်လူနာသည်လည်း အင်းစိန်ဆေးရုံအရောက်တွင် သေဆုံးသွားခဲ့ကြောင်း သိရသည်။

စာတည်း ။ ။ ဖူးသိမ်ကျ
စာမူတည်းဖြတ် ။ ။ အောင်ကျော်ဖြိုး

#ရန်ကုန်တိုင်း
#ရွှေပြည်သာမြို့နယ်
#ယာဉ်တိမ်းမှောက်မှု

ပုံအညွှန်း - မတော်တဆမှုဖြစ်ပွားပြီးနောက် တိမ်းမှောက်ခဲ့သည့် လူနာတင်ယာဥ်။ (ဓာတ်ပုံ - လူမှုကွန်ရက်)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ထိုင်းနိုင်ငံသို့ ၂ ရက်အတွင်း မြန်မာ အလုပ်သမား ၁,၃၀၀ ကျော် ဝင်ရောက်
====================

ကိုရွှေမြိတ်
(မဇ္ဈိမ) ။ ။ ထိုင်းနိုင်ငံသို့ အောက်တိုဘာလ ၁၆ ရက်နှင့် ၁၇ ရက် နှစ်ရက်အတွင်း နှစ်နိုင်ငံ သဘောတူစာချုပ် (MOU) ဖြင့် မြန်မာ အလုပ်သမား ၁,၃၀၀ ကျော် ဝင်ရောက်လာကြောင်း ထိုင်းနိုင်ငံ ၊ မဲဆောက်မြို့ရှိ အလုပ်သမား သံအရာရှိရုံး (Myanmar Labour Attache Office) တာဝန်ရှိသူ တဦးက ပြော သည်။

မဲဆောက်-မြ၀တီ အမှတ် (၂) ချစ်ကြည်ရေး တံတားမှ အောက်တိုဘာလ ၁၆ ရက်တွင် ၈၃၀ ဦးနှင့် အောက်တိုဘာလ ၁၇ ရက်တွင် ၅၁၄ ဦး စုစုပေါင်း ၁၃၄၄ ဦး ဝင်ရောက်လာခြင်းဖြစ်ကြောင်း သိရသည်။

ပြည်ပအလုပ်အကိုင်အကျိုးဆောင် အေဂျင်စီများမှ တဆင့် ရောက်ရှိလာသည့် အလုပ်သမားများဖြစ်ပြီး တာဝန်ယူ၊ တာဝန်ခံမှုမရှိသည့် အေဂျင်စီများကိုလည်း အရေးယူနေကြောင်း အလုပ်သမား သံအရာရှိရုံးမှ တာဝန်ရှိသူက ဆိုသည်။

“အခုလိုမျိုး MOU အလုပ်သမားတွေနဲ့ ပတ်သက်ပြီး အေဂျင်စီတွေက တာဝန်ယူမှု ၊တာဝန်ခံမှု မရှိတဲ့ အပိုင်းတွေ ရှိလာရင် အရေးယူ အပြစ်ပေးတာ လုပ်နေတာ ရှိတယ်။ လက်ရှိလည်း အချို့ အေဂျင်စီတွေကို ယာယီပိတ်ခိုင်းတာ၊ အပြီး ပိတ်ခိုင်းတာတွေကို ရုံးချုပ်က ပြုလုပ်နေတာ ရှိနေတယ်”ဟု ၎င်းက ပြော သည်။။

ပြည်တွင်း၌ အလုပ်အကိုင်ရှားပါးမှုကြောင့် ထိုင်းနိုင်ငံသို့ ရွေ့ပြောင်းလာသည့် မြန်မာလုပ်သားများပြားလာ၍ အလုပ်အကိုင်ရှားပါးမှုနှင့် အလုပ်သမားအခွင့်အရေးချိုးဖောက်ခံရမှုများ ကြုံတွေ့နေရကြောင်း MOU အလုပ်သမားအချို့ထံက သိရသည်။

ထိုင်းနိုင်ငံ ဖူးခက်မြို့ရောက် MOU အလုပ်သမား တဦး ဖြစ်သူ ကိုထက်နိုင်ထွန်းက“အခုချိန်မှာတော့ ပြည်တွင်းမှာက အလုပ်အကိုင်က ဘယ်လိုမှ အဆင်မပြေတော့ ထွက်လာကြ မှာပဲလေ။ ဒီလို ထွက်လာလို့ အပြစ် မပြောချင်ပေမယ့် ရောက်လာ ပြီးမှတော့ အလုပ် အကိုင်တွေ အဆင်ပြေဖို့ အရေးကြီးတယ်”ဟု ပြောသည်။
MOU စနစ်ဖြင့် စေလွှတ်သည့် အလုပ်သမားများသည် နယ်စပ်ဂိတ် နှစ်ခု ဖြစ်သည့် မဲဆောက်-မြ၀တီ နယ်စပ်ဂိတ်နှင့် ရနောင်း-ကော့သောင်း နယ်စပ်ဂိတ် နှစ်ခုမှ နေ့စဉ်နီးပါး ဝင်ရောက်နေခြင်းရှိကြောင်း ထိုင်းနိုင်ငံ မဲဆောက်မြို့နေ မြန်မာနိုင်ငံသား သတင်းအရင်းမြစ်တဦးက ဆို သည်။

“အခုလို MOU နဲ့ ဝင်လာတဲ့ မြန်မာ ရွှေ့ပြောင်း အလုပ်သမားတွေ အခက်အခဲ တစ်ခုခု ဖြစ်လာရင် အေဂျင်စီနဲ့ ချိတ်ဆက်ပေးဖို့ တာဝန်ရှိဆုံး ဖြစ်တဲ့ သံရုံးဘက်က ကူညီဖြေရှင်းပေးတာက အရမ်းကို အားနည်းနေတာ ရှိတယ်။ အများစုက အရပ်ဘက်က အလုပ်သမား အရေး ကူညီပေးနေတဲ့ သူတွေကပဲ ကူညီပေးတာ များတယ်”လို့ ထိုင်းနိုင်ငံ မဲဆောက်မြို့နေ မြန်မာ နိုင်ငံသား သတင်း အရင်းမြစ် တစ်ဦးက ပြော သည်။

မြန်မာနိုင်ငံမှာ ၂၀၂၃ ခုနှစ် အတွင်း ပြည်ပ အလုပ်အကိုင် အကျိုးဆောင် လိုင်စင်ရ အေဂျင်စီ ၄၇၇ ခု ရှိသည့် အနက် ထိုင်းလိုင်စင်ရ အေဂျင်စီ ၁၅၈ ခုရှိပြီး ယာယီ ရုပ်သိမ်း ခံရသည့် အေဂျင်စီ ၁၂ ခု ရှိကြောင်း စစ်ကောင်စီ၏အလုပ်သမား ညွန်ကြားရေး ဦးစီးဌာန၏ ထုတ်ပြန်ချက်များ အရ သိရ သည်။

စာတည်း။ ။အောင်ကျော်ဖြိုး

#Mizzima
#ထိုင်းနိုင်ငံ
#ရွေ့ပြောင်းအလုပ်သမား

ပုံအညွှန်း - ထိုင်းနိုင်ငံသို့ ဝင်ရောက်လာသည့် မြန်မာလုပ်သားများ(ဓာတ်ပုံ- CJ)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U