စစ်တပ်ထုတ်ကုန်နှင့် ဝန်ဆောင်မှုလုပ်ငန်းများ ဆန့်ကျင်ရေး တိုက်တွန်းသည့် လောင်းလုံးမြို့လူထုသပိတ်
====================

ကိုရွှေမြိတ်
(မဇ္ဈိမ)။ ။တနင်္သာရီတိုင်း၊ လောင်းလုံးမြို့နယ်တွင် စစ်တပ်ထုတ်ကုန်များနှင့်ဝန်ဆောင်မှုလုပ်ငန်းများကို ပြည်သူလူထု တရပ်လုံး ဆန့်ကျင်သပိတ်မှောက်ကြရန်တိုက်တွန်းသည့်လူထုသပိတ်နှင့် စစ်အာဏာရှင် စနစ်ဆန့်ကျင်ရေးသပိတ်ကို ထားဝယ်ခရိုင်ဒီမိုကရေစီအရေးလှုပ်ရှားမှုသပိတ်ကော်မတီ (DDMSC)က ဦးဆောင်ပြုလုပ်ခဲ့သည်။

အဆိုပါ လူထုသပိတ်ကို ယနေ့ အောက်တိုဘာလ ၁၇ ရက် နေ့လယ်ပိုင်းတွင် လောင်းလုံးမြို့ပေါ် နေရာအချို့၌ ပြုလုပ်ခဲ့ခြင်းဖြစ်သည်။
သပိတ်ကော်မတီဝင်များနှင့် ဒေသခံများက “‌‌ဖက်ဆစ်ဝင်ငွေ ဖြတ်တောက်၊ ပြည်သူ့ဘဏ္ဍာ တည်ဆောက်”စာသားပါ ဘန်နာကိုင်ဆွဲပြီးချီတက်ခဲ့ကြသည်။

ဒေသခံပြည်သူများအပါအဝင် ပြည်သူလူထုတရပ်လုံးအနေနှင့် စစ်တပ်ထုတ်ကုန်ပစ္စည်းများကိုရောင်းချခြင်း၊ဝယ်ယူသုံးစွဲခြင်း မပြုလုပ်ကြဘဲ သပိတ်မှောက်သွားကြရန် အလေးအနက်တိုက်တွန်းလိုကြောင်း သပိတ်ဦးဆောင်သူများက တိုက်တွန်းခဲ့ကြသည်။
တနင်္သာရီတိုင်းအတွင်း ယခုရက်ပိုင်းတွင် တနင်္သာရီ၊ ထားဝယ်နှင့် မြိတ်မြို့နယ်တို့၌ စစ်ကောင်စီတပ်နှင့် ဒေသကာကွယ်ရေးတပ်များကြား စစ်ရေးတင်းမာနေကြောင်း သိရသည်။

စာတည်း - အေးချမ်း

#mizzima
#လောင်းလုံးမြို့နယ်
#စစ်တပ်ထုတ်ကုန်များ
#လူထုသပိတ်
#DDMSC

ယနေ့ (အောက်တိုဘာလ ၁၇ရက်) တွေ့ရသည့် လောင်းလုံးမြို့လူထုသပိတ်
Photo/DDMSC

==============
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ခင်ဦးမြို့တွင် မြို့နယ် ပကဖ အဖွဲ့ တိုက်ခိုက်၍ စစ်ကောင်စီတပ်ဖွဲ့ဝင် ၃ ဦးသေဆုံး
=====================

၀၀၈
(မဇ္ဈိမ)။ ။ စစ်ကိုင်းတိုင်း ၊ ခင်ဦးမြို့ပေါ်တွင် စစ်ကောင်စီတပ်ဖွဲ့ဝင် ၃ ဦးကို ယနေ့ အောက်တိုဘာ ၁၇ရက် နံနက် ၇နာရီခန့်တွင် ပြည်သူ့ကာကွယ်ရေးတပ်ဖွဲ့က ကြားဖြတ်တိုက်ခိုက်ခဲ့ရာ သုံးဦးလုံးသေဆုံးခဲ့ပြီး MA 1 သေနတ် နှစ်လက်သိမ်းဆည်း ရမိခဲ့ကြောင်း ခင်ဦးမြို့နယ် သတင်းမှန်ပြန်ကြားရေး တာဝန်ရှိသူကပြောသည်။
မင်းသိုက် တိုက်ပေါ်တွင် တပ်စွဲထားသော စစ်ကောင်စီတပ်ဖွဲ့ဝင် သုံးဦးသည် ခင်ဦး-ရေဦးသွားကားလမ်းအတိုင်း မြို့နယ်ဆေးရုံတွင် တပ်စွဲထားသည့် စစ်ကောင်စီတပ်ဖွဲ့ထံသို့ ခြေလျင်ထွက်လာစဥ် တိုက်ခိုက်ခံရခြင်းဖြစ်ကြောင်း သိရသည်။

"တပ်စွဲထားတဲ့ မင်းသိုက်တိုက် ကနေ မီတာ ၃၀၀ အကွာနဲ့ တပ်စွဲထားတဲ့ ဆေးရုံကနေ မီတာ ၃၀၀ အကွာကြား ဗလီကွေ့မှာမြို့နယ် (ပကဖ)က ကြားဖြတ်တိုက်ခဲ့တာပါ။အဲဒီတိုက်ခိုက်မှုမှာ စကစ နှစ်ဦး နေရာတင်ပွဲချင်းပြီးသေဆုံးခဲ့ပြီး ထိခိုက်ဒဏ်ရာနဲ့ထွက်ပြေးသွားတဲ့ စကစတဦးက ဆေးရုံအရောက်မှာ သေဆုံးခဲ့ပါတယ်။မြို့နယ်(ပကဖ )အဖွဲ့က ထိခိုက်မှုမရှိ ပြန်လည်ဆုတ်ခွာနိုင်ခဲ့ပါတယ်"ခင်ဦးမြို့နယ် သတင်းမှန်ပြန်ကြားရေးတာဝန်ရှိသူကပြောသည်။

ထိုသို့ တိုက်ခိုက်စဥ် မင်းသိုက်တိုက်ပေါ်နှင့် မြို့နယ်ဆေးရုံတွင် တပ်စွဲထားသည့် စစ်ကောင်စီအဖွဲ့နှစ်ခုက ကြားဖြတ်တိုက်ခိုက်ခဲ့၍ နှစ်မိနစ်ခန့် ပစ်ခတ်မှုဖြစ်ပွားခဲ့ပြီး မြို့နယ်ပြည်သူ့ကာကွယ်ရေးအဖွဲ့အနေဖြင့် ထိခိုက်မှုမရှိခဲ့ကြောင်း ၎င်းက ဆိုသည်။
စစ်ကောင်စီတပ်ဖွဲ့၏ ရမ်းသန်းပစ်ခတ်မှုကြောင့် ပြည်သူများထိခိုက်သေဆုံးမှုရှိကြောင်း ခင်ဦးမြို့နယ် သတင်းမှန်ပြန်ကြားရေးက ထုတ်ပြန်ထားသည်။

“ အမျိုးသား တဦး ထိခိုက်မိတယ်လို့တော့ ကြားမိတယ်ဗျ” ဟု ဒေသခံတဦးက ပြောသည်။
မဇ္ဈိမ အနေဖြင့် သေဆုံး၊ ထိခိုက်သူများ စာရင်းကို စုံစမ်းနေဆဲဖြစ်သည်။

လက်ရှိတွင် စစ်ကောင်စီတပ်သည် ခင်ဦးမြို့သို့ ဖြတ်သန်းသွားလာနေသည့် ကားများကို တင်းကျပ်စွာ စစ်ဆေးနေပြီး တိုက်ခိုက်ခံရသည့်နေရာတွင်လည်း ကင်းပုန်းများချထားကြောင်းသိရသည်။

စာတည်း။ ။အောင်ကျော်ဖြိုး

#Mizzima
#ပြည်တွင်းသတင်း
#ခင်ဦးမြို့နယ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​တနင်္သာရီတွင် စစ်ကောင်စီ အမြောက်တပ် ပစ်ခတ်မှုကြောင့် အရပ်သား နှင့် စစ်ကောင်စီတပ်ဖွဲ့ဝင် ၃ ဦးသေဆုံး၊ အမျိုးသမီး ၁ ဦးဒဏ်ရာရ
=====================

ကိုရွှေမြိတ်
(မဇ္ဈိမ)။ ။ တနင်္သာရီမြို့နယ်၊ မော်တုန်းရွာ အခြေစိုက် စစ်ကောင်စီတပ် အမြောက်တပ်၏ လက်နက်ကြီးဖြင့် ပစ်ခတ်မှုကြောင့် အရပ်သား တဦး နှင့် စစ်ကောင်စီ တပ်ဖွဲ့ဝင် သုံးဦး သေဆုံးကာ အမျိုးသမီး တဦး လက်နက်ကြီးကျည် ထိမှန် ဒဏ်ရာခဲ့ကြောင်း ဒေသခံများထံက သိရ သည်။

တနင်္သာရီတိုင်း ၊ မြိတ်ခရိုင် ၊ တနင်္သာရီမြို့နယ် ၊ မော်တုန်းရွာ အခြေစိုက် စစ်ကောင်စီ အမြောက်တပ် အမတ (၃၀၆) တပ်ရင်းသည် အောက်တိုဘာလ ၁၆ ရက်က စစ်ကြောင်းထိုးရာမှ ပြန်လာစဥ် လမ်းကြောင်းရှင်းသည့်အနေဖြင့် ထိုနေ့ ညနေ ၅ နာရီခွဲ အချိန်မှ ည ၈ နာရီကျော်အချိန်ထိ ပစ်ခတ်ခဲ့ခြင်းဖြစ်ကြောင်း သိရသည်။
“အခုက သူတို့ဘက်က တိုက်ပွဲ ဖြစ်တာမျိုး မဟုတ်ဘဲ အကြောင်းမဲ့ ပစ်ခတ်လို့ အချင်ချင်းတွေထိတာလည်း ရှိတယ်။ ကနဦး ကျွန်တော်တို့ သိရတာက ဒဏ်ရာ ပြင်းထန်တယ်လို့ ကြားရပြီး သုံးဦးစလုံး သေတယ်လို့လည်း တပ်နဲ့ နီးစပ်သူတွေဆီက သိရတယ်”လို့ အထက်ပါ သတင်း အရင်းမြစ်က ဆိုသည်။

ထိုလက်နက်ကြီးကျည်သည် တပ်ရင်းအနီးရှိ မြို့ဟောင်းကျေးရွာမှ နေအိမ်ပေါ်သို့ ည ၈ နာရီခန့်တွင် ကျရောက်ပြီး ကိုလာဖွီဒင်(အသက် ၂၁ နှစ်)သည် ကျည်ထိမှန်သေဆုံးပြီး ၎င်း၏ ဇနီးဖြစ်သူ အမျိုးသမီးမှာ ကျည်ထိမှန်ဒဏ်ရာရခဲ့သည်။ ကိုလာဖွီဒင်မှာ ထိုနေ့ည ၉ နာရီတွင် ဦးခေါင်းကျည်ထိမှန် ဒဏ်ရာဖြင့်သေဆုံးသွားခဲ့ခြင်းဖြစ်ကြောင်း ဒေသခံများကဆိုသည်။ ထို့ပြင် တပ်ရင်းအနီး ကင်းပုန်းနေသည့် စစ်ကောင်စီတပ်ဖွဲ့ဝင် သုံးဦးလည်း လက်နက်ကြီးကျည် ထိမှန်ကာ သေဆုံးခဲ့ကြောင်း ဒေသခံက ဆိုသည်။
စစ်ကောင်စီတပ်က လက်နက်ကြီး အချက်ရေ ၃၀ ထက်မနည်း ပစ်ခတ်ခဲ့ကြောင်း သိရသည်။

ဒေသခံ အမျိုးသား တဦးက “ တိုက်ပွဲ ဖြစ်တာ မဟုတ်ဘူး။ စစ်တပ်က သူတို့ တပ်ရင်းကို ပြန်လာတဲ့ အချိန်မှာ PDF တွေ လာရောက် တိုက်ခိုက်မှာကို စိုးရိမ်ပြီး အရှေ့ပြေး အနေနဲ့ လက်နက်ကြီးတွေကို ရမ်းသန်း ပစ်ခတ်ပြီး ဝင်လာလို့ ဖြစ်တာပါ”ဟု ပြောသည်။
လက်နက်ကြီး ကျည်ကျ ရောက် ပေါက်ကွဲခဲ့သည့် မြို့ဟောင်းရွာသည် အမြောက်တပ်ရင်းနှင့် ကိုက် ၃၀၀ ခန့်ကွာဝေးကြောင်း ဒေသခံများက ဆို သည်။

ပြီးခဲ့သည့် ရက်ပိုင်းကလည်း မော်တုန်းကျေးရွာဘက်သို့ အမြောက် (၃၀၆) တပ်ရင်းက ယင်းကဲ့သို့ လက်နက်ကြီးဖြင့် ပစ်ခတ်မှုကြောင့် ဒေသခံများ ထိခိုက် သေဆုံးသူများ ရှိကြောင်း ဒေသခံများက ဆို သည်။

တနင်္သာရီမြို့နယ် သည်၊ စစ်ကောင်စီက စစ်အုပ်ချုပ်ရေး ဒေသအဖြစ် ကြေညာထားပြီးနောက် စစ်ကောင်စီဘက်က ကျေးရွာ အချို့ကို လက်နက်ကြီးဖြင့် မကြာ ခဏ ပစ်ခတ်နေသလို နှစ်ဖက် ထိတွေ့ ပစ်ခတ်မှုများလည်း မကြာ ခဏ ဖြစ်ပွားလေရှိနေသည်။

စာတည်း။ ။အောင်ကျော်ဖြိုး

#Mizzima
#မြိတ်ခရိုင်
#အမြောက် ၃၀၆ တပ်ရင်း

ပုံအညွှန်း- စစ်ကောင်စီတပ်၏ လက်နက်ကြီးကျည်ကြောင့် သေဆုံးသူနှင့် လက်နက်ကြီးကျည်ပုံ(ဓာတ်ပုံ- ပေးပို့)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ငါန်းဇွန်တွင် စစ်ကောင်စီစစ်ကြောင်းအား တိုက်ခိုက်မှု ၃ ဦးသေဟု ပကဖပြော
========================

ဓါတု
(မဇ္ဈိမ)။ ။မန္တလေးတိုင်း၊ငါန်းဇွန်မြို့နယ်တွင် စစ်ကောင်စီခြေလျင်စစ်ကြောင်းအားပြည်သူ့ကာကွယ် ရေးပူးပေါင်းတပ်ဖွဲ့များက မိုင်းဆွဲတိုက်ခိုက်ရာ စစ်သားသုံးဦးသေဆုံး၍ တဦးဒဏ်ရာရသွားကြောင်း မြို့နယ်ပကဖက သတင်းထုတ်ပြန်သည်။
ယ
မန်နေ့ အောက်တိုဘာလ ၁၆ ရက်နံနက် ၈ နာရီခန့်က ငါန်းဇွန်မြို့နယ်၊နတ်ကြီးရွာမှရေဇင်းရွာသို့ ထွက်ခွာလာသည့် အင်အား ၃၀ ခန့်ပါ စစ်ကောင်စီခြေလျင်စစ်ကြောင်းကို မိုင်းဆွဲတိုက်ခိုက်ခဲ့ခြင်းဟု သိရသည်။

စစ်ကောင်စီစစ်ကြောင်းသည် မိုင်းကွင်းပေါ်သို့ ရောက်ရှိချိန် အချိန်ကိုက်တိုက်ခိုက်နိုင်ခဲ့ခြင်းဟု ငါန်းဇွန်မြို့နယ် ပြည်သူ့ကာကွယ်ရေးအဖွဲ့(ပကဖ) တာဝန်ရှိသူတဦးကမဇ္စျိမကိုပြောသည်။ ပဒေသာမိုင်း ၁၀လုံးထောင်ထားခဲ့ပြီး မိုင်းနှစ်လုံးကို ထိထိမိမိဖောက်ခွဲနိုင်ခဲ့သည်ဟုဆိုသည်။

" မိုင်းကွင်းပေါ်ရောက်လာတဲ့ သုံးယောက်က အဲ့နေရာမှာတင်လဲသွားတယ်"ဟု၎င်းကပြောသည်။

အဆိုပါတိုက်ခိုက်မှုကို ငါန်းဇွန်မြို့နယ်ပြည်သူ့ကာကွယ်ရေးအဖွဲ့၊မြင်းခြံခရိုင်တပ်ရင်း (၇)တပ်ခွဲ (၁) ငါန်းဇွန်မီးနဂါးပြောက်ကျားအဖွဲ့ နှင့်ငါန်းဇွန်ပကဖ အဖွဲ့ဝင်များဖြစ်သောTGYR ၊ဒေါင်းဖိုက်တာ၊ပြည်တော်ဝင်၊925၊လက်ရုံး၊ဖက်ဒရယ်ညီအကို၊ငန်းနက်၊ အားမာန်သစ်စသည့် ပြောက်ကျားအဖွဲ့များနှင့် ရွှေဂျိူးဖြူပြည်သူ့ကာကွယ်ရေးအဖွဲ့တို့ပူးပေါင်းတိုက်ခိုက်ခဲ့ကြခြင်းဖြစ်ကြောင်း ထုတ်ပြန်ထားသည်။ စစ်ကောင်စီဘက်မှ ထိခိုက်သေဆုံးမှုများကို မဇ္ဈိမအနေဖြင့် သီးခြားအတည်မပြုနိုင်သေးပေ။

မိုင်းဆွဲတိုက်ခိုက်ခံရသည့် စစ်ကောင်စီစစ်ကြောင်းသည် ယနေ့အောက်တိုဘာလ ၁၇ရက်တွင် ငါန်းဇွန်မြို့နယ် ရေဇင်းရွာသို့ရောက်ရှိနေကြောင်းသိရသည်။

စာတည်း - အေးချမ်း

#mizzima
#ငါန်းဇွန်မြို့နယ်
#စစ်ကောင်စီခြေလျင်စစ်ကြောင်း
#မိုင်းဆွဲတိုက်ခိုက်

ပုံအညွှန်း - ငါန်းဇွန်မြို့နယ်တွင် စစ်ကောင်စီတပ်အား ပဒေသာမိုင်းဖြင့် တိုက်ခိုက်စဥ်(ဓာတ်ပုံ- ငါန်းဇွန်မြို့နယ် ပြည်သူ့ကာကွယ်ရေးအဖွဲ့)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ရွေးကောက်ပွဲအတွက် ကြိုတင်ပြင်ဆင်ကြရန် စစ်ကောင်စီ UEC က နိုင်ငံရေးပါတီများကို နှိုးဆော်
======================

001
(မဇ္စျိမ)။ ။ ရွေးကောက်ပွဲတွင် ယှဉ်ပြိုင်ရေးနှင့် အနိုင်ရရှိရေးအတွက် ကြိုတင်ပြင်ဆင်​​ဆောင်ရွက်ကြရန် စစ်ကောင်စီလက်အောက်ခံ ပြည်ထောင်စုရွေးကောက်ပွဲကော်မရှင် (UEC) က ဥက္ကဋ္ဌ ဦးသိန်းစိုးက နိုင်ငံရေးပါတီများကို ယမန်နေ့ အောက်တိုဘာလ ၁၆ ရက်နေ့က နှိုးဆော်မှာကြားခဲ့ကြောင်း သိရသည်။

နေပြည်တော်ရှိ UEC ရုံးတွင် နိုင်ငံရေးပါတီ ၃၇ ပါတီမှ ဥက္ကဋ္ဌများ၊ ခေါင်းဆောင်များနှင့် တွေ့ဆုံရာတွင် အထက်ပါအတိုင်း မှာကြားခဲ့ခြင်းဖြစ်ကြောင်း ယနေ့ အောက်တိုဘာလ ၁၇ ရက်နေ့ထုတ် စစ်ကောင်စီလက်အောက်ခံ ကြေးမုံသတင်းစာတွင် ဖော်ပြထားသည်။
ထိုသို့ မှာကြားသော်လည်း ရွေးကောက်ပွဲကျင်းပမည့် အချိန်အတိအကျကိုမူ ပြောဆိုခြင်းမရှိကြောင်း ဆွေးနွေးပွဲတက်ရောက်ခဲ့သည့် နိုင်ငံရေးပါတီများက ပြောသည်။

ရခိုင့်ဦးဆောင်ပါတီ AFP ဥက္ကဋ္ဌ ဒေါက်တာအေးမောင်က”လက်ရှိ အနေအထားကိုပဲဆွေးနွေးကြတာပါ။ ဘာအခက်အခဲရှိတယ်။ ဘာတွေဖြစ်နေတယ်။ ဘယ်လိုဖြစ်နေကြတယ်ဆိုတာ။ အဲ့တာတော့ (ရွေးကောက်ပွဲကျင်းပမည့်ကာလ) မပြောသေးဘူး။ သန်းခေါင်စာရင်းပြီးမှပဲ ထင်တယ်”ဟု ပြောသည်။

စစ်ကောင်စီက မှတ်ပုံတင်ခွင့်ပြုထားသည့် နိုင်ငံရေးပါတီများအနက် ပါတီအချို့မှာ ယခုအောက်တိုဘာလအတွင်း ရက်ပေါင်း ၁၈၀ ပြည့်မည်ဖြစ်သဖြင့် သတ်မှတ်ကာလအတွင်း ပါတီရုံးခန်းများဖွင့်လှစ်ရန် UEC ဘက်က ညွှန်ကြားခဲ့ကြောင်းလည်း သိရသည်။
စစ်ကောင်စီ၏ နိုင်ငံရေးပါတီများမှတ်ပုံတင်ခြင်းဥပဒေအရ ပြည်ထောင်စုတဝန်းလုံးစည်းရုံးမည့်ပါတီအဖြစ် မှတ်ပုံတင်ထားပါက မှတ်ပုံတင်ခွင့်ပြုသည့်နေ့မှစ၍ ရက်ပေါင်း ၉၀ အတွင်း ပါတီဝင်အနည်းဆုံး ဦးရေ ၁၀၀,၀၀၀ စည်းရုံးရမည်ဖြစ်ပြီး ရက်ပေါင်း ၁၈၀ အတွင်း မြို့နယ်အားလုံး၏ ထက်ဝက်တွင် ပါတီရုံးခန်းဖွင့်လှစ်ရမည်ဖြစ်သည်။

လက်ရှိ နိုင်ငံရေးအခြေအနေနှင့် အခက်အခဲများရှိနေသည့်အတွက် ပါတီဝင်ဦးရေ သတ်မှတ်ချက်၊ ပါတီရုံးခန်းဖွင့်ရမည့် သတ်မှတ်ချက်များနှင့် ပတ်သက်ပြီး ဖြေလျှော့ပေးရန် နိုင်ငံရေးပါတီများဘက်က တောင်းဆိုခဲ့သော်လည်း မရရှိခဲ့ကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ ဥက္ကဋ္ဌ ဦးစိုင်းဌေးအောင်က ပြောသည်။

“(အခက်အခဲတွေ) ရှိတယ်။ တနိုင်ငံလုံးပြိုင်မယ့် ပါတီတွေအတွက် ပိုခက်ခဲတာပေါ့။ အခုလို နိုင်ငံရေးအခြေအနေနဲ့ဆို ရုံးခန်းဖွင့်ဖို့ အခက်အခဲတွေဖြစ်တဲ့အကြောင်းတွေတော့ ဆွေးနွေးခဲ့ကြတာပေါ့ ။ ပါတီဝင်စုဆောင်းတဲ့ကိစ္စတွေကအစပေါ့ ခက်ခဲတဲ့အကြောင်းတွေတော့ ဆွေးနွေးခဲ့ကြတယ်” ဟု ဦးစိုင်းဌေးအောင်ကပြောသည်။
သို့​သော် တောင်းဆိုချက်များနှင့် ပတ်သက်ပြီး စစ်ကောင်စီလက်အောက်ခံ UEC က နိုင်ငံရေးပါတီများ မှတ်ပုံတင်ခြင်းဥပဒေအရသာ ဆောင်ရွက်မည်ဟု တုံ့ပြန်ခဲ့ကြောင်း ဦးစိုင်းဌေးအောင်က ပြောသည်။

စစ်ကောင်စီက ၂၀၂၃ ခုနှစ် ဇန်နဝါရီလတွင် ပြဌာန်းခဲ့သည့် နိုင်ငံရေးပါတီများ မှတ်ပုံတင်ခြင်းဥပဒေအရ ဆက်လက်တည်ထောင်ခွင့်ပြုရန် လျှောက်ထားသည့် နိုင်ငံရေးပါတီ ၅၀ ရှိပြီး ယင်းအနက်မှ ၃၇ ပါတီမှာ ပြီးခဲ့သည့် ဧပြီလကစပြီး မှတ်ပုံတင်ခွင့်ရရှိထားသည်။
မှတ်ပုံတင်ခွင့် ပြန်မလျှောက်ခဲ့သည့် အမျိုးသားဒီမိုကရေစီအဖွဲ့ချုပ် NLD အပါအဝင် ပါတီ ၄၀ ကိုလည်း စစ်ကောင်စီက ပယ်ဖျက်ကြောင်း ကြေညာထားသည်။

ရွေးကောက်ပွဲနှင့် ပတ်သက်ပြီး လာမည့် ၂၀၂၄ ခုနှစ် အောက်တိုဘာလတွင် ပြည်လုံးကျွတ်သန်းခေါင်စာရင်းကောက်ယူပြီးမှသာ ရွေးကောက်ပွဲကျင်းပမည်ဖြစ်ကြောင်း စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောဆိုထားသည်။

လက်ရှိတွင် စစ်ကောင်စီအနေဖြင့် စက်တင်ဘာလအတွင်းက ရန်ကုန်တွင် ပါတီ ၃၀ ကျော်နှင့် တွေ့ဆုံပြီး အီလက်ထရောနစ် မဲပေးစက်နှင့် ပတ်သက်၍ ရှင်းလင်းပြသခြင်းများ ပြုလုပ်နေသကဲ့သို့ နေပြည်တော်ရှိ ရှစ်မြို့နယ်တွင်လည်း အဆိုပါစက် အသုံးပြုနည်းနှင့် ပတ်သက်ပြီး ရှင်းလင်းပြသမှုများ ပြုလုပ်လျက်ရှိသည်။

စာတည်း။ ။ အောင်ကျော်ဖြိုး

#Mizzima
#ရွေးကောက်ပွဲ
#UEC
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

Xi welcomes 'dear friend' Putin to Beijing
Chinese leader Xi Jinping has welcomed his "dear friend" Russian President Vladimir Putin to Beijing, kicking off a multilateral ...
https://www.youtube.com/watch?v=RtTPJJzWCQw