ချပ်သင်းတိုက်နယ်အတွင်းမှ စစ်ရှောင်တဲများအား စစ်ကောင်စီတပ်ဖွဲ့ မီးရှို့ဖျက်ဆီး
==================

KMN
မဇ္ဈိမ။ ။စစ်ကိုင်းတိုင်း၊ ကန့်ဘလူခရိုင် ၊ချပ်သင်းတိုက်နယ် ဇင်းကျေးရွာအနီး တနယ်ကြီးကွင်း (အရပ် ခေါ်)အတွင်းရှိ စစ်ရှောင်တဲများကို စစ်ကောင်စီလက်အောက်ခံ ခမရ(၃၆၁)နှင့် ပျူစောထီးပူးပေါင်းစစ် ကြောင်းက ဇွန်လ ၁၂ ရက်နေ့တွင် မီးရှို့ဖျက်‌ဆီးခဲ့ကြောင်း ကျွန်းလှ ကန့်ဘလူ တက်ကြွလှုပ်ရှားသူများ အဖွဲ့-ကန့်ဘလူခရိုင်က သတင်းထုတ်ပြန်သည်။

“စစ်ကောင်စီတပ်မီးရှို့လို့ တနယ်ကြီးကွင်းအတွင်းက စစ်ရှောင်တဲ ကိုးလုံး၊ ကျွဲတရှင်း(နှစ်ကောင်)၊ ဆန် တင်း ၆၀ နဲ့ ဝက်တကောင် ဆုံးရှုံးခဲ့တယ်” ဟု ယင်းအဖွဲ့တာဝန်ရှိသူက ပြောသည်။

စစ်ကောင်စီလက်အောက်ခံ ခမရ(၃၆၁)နှင့် ပျူစောထီးပူးပေါင်းစစ်ကြောင်းသည် ကတ္တာကျေးရွာမှ နေ အိမ်တလုံးကိုလည်း ဇွန်လ ၁၂ ရက်နေ့ ညနေပိုင်းက မီးရှို့ဖျက်ဆီးခဲ့ကြောင်း သိရသည်။
ပြီးခဲ့သည့် ဇွန်လ ၁၀ ရက် နံနက်ပိုင်းကလည်း စစ်ကောင်စီတပ်ဖွဲ့နှင့် ပျူစောထီး ပူးပေါင်းအင်အား ၁၀၀ ခန့်က ထန်းကုန်းတိုက်နယ်အတွင်းရှိ ဘိုတဲကုန်းရွာအား မီးရှို့ဖျက်ဆီးခဲ့ခြင်းကြောင့် နေအိမ်အလုံး ၂၀ မီးလောင်ပျက်စီး ခဲ့သည်။

ဇွန်လ ၁၀ ရက်နေ့၌ပင် ချပ်ကြီးရွာမှ စစ်ကြောင်းထိုးထွက်လာသော ပျူစောထီးစစ်ကြောင်းသည် ပိတောက်ပင်ရွာမှ အမျိုးသားတစ်ဦးအား ဖမ်းဆီးသတ်ဖြတ်ခဲ့ကြောင်း သိရသည်။

ထို့ပြင် ဇွန်လ ၁၁ ရက် နံနက်ပိုင်းတွင်လည်း ယင်းစစ်ကြောင်းသည် ချပ်သင်းတိုက်နယ်အတွင်းရှိ ပေကုန်း ကျေးရွာအား ဝင်ရောက်မီးရှို့ဖျက်ဆီးခဲ့၍ နေအိမ် ၂၈ လုံးနှင့် စပါးတိုက် ၁၅ လုံး မီးလောင်ပျက်စီး ဆုံးရှုံး ခဲ့ကြောင်း ဒေသခံများက ပြောသည်။

ကန့်ဘလူခရိုင်အတွင်းသို့ စစ်ကောင်စီတပ်ဖွဲ့ စစ်ကြောင်းထိုးဝင်ရောက်လာခြင်းကြောင့် ချပ်သင်းတိုက် နယ်အတွင်းရှိ ဇင်းရွာနှင့်အနီးအနားရှိကျေးရွာများ၊ ထန်းကုန်းတိုက်နယ်အတွင်းရှိ ဘိုတဲကုန်းနှင့် အနီး အနားရှိကျေးရွာများမှ ပြည်သူ ၁၀,၀၀၀ ခန့် အိုးအိမ်စွန့်ခွာကာ ဘေးလွတ်ရာ ထွက်ပြေးတိမ်းရှောင်နေ ကြရကြောင်း ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ -ကန့်ဘလူခရိုင်က သတင်းထုတ် ပြန် ထားသည်။

စာတည်း ။ ။ ဖူးသိမ်ကျ
စာမူတည်းဖြတ်။ ။စောဖေ

#Mizzima
#စစ်ကိုင်းတိုင်း
#ကျွန်းလှ
#ကန့်ဘလူ
ဓာတ်ပုံ-ကျွန်းလှ ကန့်ဘလူ တက်ကြွလှုပ်ရှားသူများအဖွဲ့
(ဇွန်လ ၁၀ ရက်နေ့တွင် စစ်ဘေးရှောင်နေကြသည့် ထန်းကုန်းတိုက်နယ်အတွင်းကျေးရွာများမှ ပြည်သူများ)
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​စစ်ကောင်စီတပ် ထောက်ပို့စစ်ကြောင်းအား KNLA ပူးပေါင်းတပ်ဖွဲ့ ကြားဖြတ်တိုက်ခိုက်
==================

YT
(မဇ္ဈိမ)။ ။ ကရင်ပြည်နယ်၊ ကြာအင်းဆိပ်ကြီးမြို့နယ်ရှိ ကွီလုံတိုင် စစ်ကောင်စီတပ်စခန်းအား ရိက္ခာနှင့် လက်နက်ခဲယမ်းများ ထောက်ပို့ရန် လာသော စစ်ကောင်စီတပ်စစ်ကြောင်းအား ကရင်အမျိုးသားအစည်းအရုံး တပ်မဟာ (၆) KNLA၊ အထူးစစ်ဆင်ရေးတပ်ဖွဲ့(SOF) ပါဝင်သော စစ်ကြောင်း (၁) မှ ကြားဖြတ်တိုက်ခိုက်ခဲ့ကြောင်း SOF က ယနေ့ ဇွန်လ ၁၃ ရက်နေ့တွင် သတင်းထုတ်ပြန်သည်။

ပြီးခဲ့သည့် ဇွန်လ ၃ ရက်နေ့၊ နံနက်ပိုင်းက ကွီလုံတိုင်စခန်းအား ရိက္ခာနှင့်လက်နက်ခဲယမ်းများ ထောက်ပို့ရန်လာသော အင်အား ၅၀ ကျော်ပါသည့် စစ်ကောင်စီတပ်စစ်ကြောင်းအား ကွီလုံတိုင်စခန်းနှင့် ရေသရောက်စခန်းအကြား၊ ဒေါနတောင်ထိပ်တွင် KNLA၊ SOF စစ်ကြောင်းက စောင့်၍ ကြားဖြတ်တိုက်ခိုက်ခဲ့ခြင်း ဖြစ်သည်။

" စစ်ကြောင်းက စစ်ကြောင်းမှူးအပါ ၅၀ အထက်မှာရှိတယ်။ တိုက်ပွဲဖြစ်ရာနေရာက KNU တပ်ရင်း (၁၇) လှုပ်ရှားနယ်မြေပေါ့နော်။ ကြာအင်းဆိပ်ကြီးမြို့နယ်ထဲမှာပဲ ရေသရောက်စခန်းနဲ့ ကွီလုံတိုင်စခန်းကြားပေါ့နော်။ ပြီးတော့ ထိုင်းနယ်စပ်လည်းဖြစ်တယ်။ ထိုင်းနဲ့ မြန်မာ Border Line တည့်တည့်လည်း ဖြစ်တယ်။ တိုက်ပွဲဖြစ်တာက ထိုင်းနဲ့ မြန်မာနယ်စပ် ဒေါနတောင်ထိပ်တည့်တည့် အဲ့ဒီမှာဖြစ်တာပါ" ဟု SOF တာဝန်ခံ ကိုအောင်စံရှားက မဇ္ဈိမကိုပြောသည်။

စစ်ဆင်ရေးအား စနိုက်ပါပစ်ခတ်ခြင်းဖြင့် စတင်ခဲ့ပြီး ထိုပစ်ခတ်မှုကြောင့် စစ်ကောင်စီတပ် စစ်ကြောင်းမှူး (ဒု-တပ်ရင်းမှူး)တစ်ဦး သေဆုံးခဲ့ပြီး နှစ်ဖက်ထိတွေ့တိုက်ပွဲ တစ်နေကုန်နီးပါး ကြာမြင့်ခဲ့ကာ ညနေ ၆ နာရီတွင်မှ ပြီးဆုံးကြောင်း၊ တိုက်ပွဲဖြစ်စဉ်တစ်ခုလုံးအတွင်း စစ်ကောင်စီတပ်ဘက်မှ စစ်ကြောင်းမှူးအပါအဝင် သုံးဦးသေဆုံး၍ ၁၃ ဦးထိခိုက်ဒဏ်ရာရခဲ့ကြောင်း ဆိုသည်။

တိုက်ပွဲဖြစ်ပွားမှုအပြီးတွင် အဆိုပါစစ်ကြောင်းမှ အသက်ရှင်ကျန်ရစ်နေသော စစ်သားများသည် သေဆုံး၊ ဒဏ်ရာရ စစ်သားများအား သယ်၍ ဖရိုဖရဲပုံစံများဖြင့် ထိုင်းဘက်ခြမ်းသို့ ကူးကာ ထွက်ပြေးသွားကြကြောင်း သိရသည်။

" ထိုင်းဘက်ကိုက သူတို့စစ်ကြောင်းတစ်ကြောင်းလုံးပဲပေါ့နော် ထွက်ပြေးတာ။ စစ်ကြောင်းတစ်ကြောင်းလုံးဆိုတာက သူတို့က သေသွားတဲ့ရဲဘော်တွေရဲ့ အလောင်းတွေလည်း ပြန်ဆွဲသွားတယ်။ ဒဏ်ရာရတဲ့ရဲဘော် ၁၃ ကောင်ရှိတော့ သူတို့အဲ့ဒါတွေလည်း ပြန်သယ်သွားတယ်။ စစ်ကြောင်းတစ်ကြောင်းလုံးကတော့ ဖရိုဖရဲပုံစံနဲ့ ထိုင်းဘက်ခြမ်းကို ကူးသွားတာ" ဟု SOF တာဝန်ခံ ကိုအောင်စံရှားက မဇ္ဈိမကိုပြောသည်။

KNLA၊ SOF ပူးပေါင်းစစ်ကြောင်းဘက်တွင်လည်း ရဲဘော်ငါးဦး ထိခိုက်ဒဏ်ရာရခဲ့ပြီး စိုးရိမ်ရသည့် အခြေအနေ မဟုတ်ကြောင်း သိရသည်။

KNLA၊ SOF အနေဖြင့် စစ်ကောင်စီစစ်ကြောင်းအား ပိတ်ဆို့၍ အပြီးသတ်ချေမှုန်းရန် ပြုလုပ်ခဲ့သော်လည်း နယ်မြေအနေအထားအရ အခက်အခဲများစွာရှိခဲ့၍ အပြီးတိုင်ချေမှုန်းနိုင်ခြင်းမရှိခဲ့ကြောင်း သိရသည်။

" ကျွန်တော်တို့က အဓိကကတော့ သူတို့စစ်ကြောင်းတွေကို ပိတ်ဆို့ပြီးတော့ ချေမှုန်းတာပေါ့။ သို့သော်လည်း မြေပြင်အနေအထားအရ လျှိုတွေ တောင်ဆင်းတောင်တက်တွေ၊ ချိုင့်ဝှမ်းတွေ များတဲ့အတွက် ပိတ်ဆို့ပြီးတော့ စစ်ဆင်ရေးလုပ်ရတဲ့အခါမှာ နည်းနည်း အခက်အခဲရှိပါတယ်။ အဲ့ဒါကြောင့် စစ်ကြောင်းကို အပြီးတိုင် ချေမှုန်းနိုင်တဲ့အနေအထားမရှိခဲ့ဘူး" ဟု ကိုအောင်စံရှားက ဆိုသည်။

ပြီးခဲ့သည့် ဇွန်လ ၈ ရက်နေ့ကလည်း ကြာအင်းဆိပ်ကြီးမြို့နယ်၊ မြို့နယ်ခန်းမ (ခ) ဇမိခန်းမအား KNU တပ်မဟာ (၆) KNLA၊ SOF၊ Cloud Wings ပူးပေါင်းတပ်ဖွဲ့က ဒရုန်းများဖြင့် ဗုံးသီးပစ်ချ တိုက်ခိုက်ခဲ့ပြီး ဗုံးသီးကျရောက်ပေါက်ကွဲမှုကြောင့် စစ်ကောင်စီတပ်သား နှစ်ဦးနှင့်အထက် သေဆုံး၍ ထိခိုက်ဒဏ်ရာရသူများခဲ့ကာ ဇမိခန်းမ​၏ အဆောက်အဦများ ကြေမွပျက်စီးခဲ့ရကြောင်း သိရသည်။

စာတည်း - သန့်ဇော်(သန်လျင်)
#mizzima
#ကြာအင်းဆိပ်ကြီးမြို့နယ်
#ကွီလုံတိုင်စခန်း
#KNLA
#SOF
ဓါတ်ပုံ- KNLA၊ SOF ပူးပေါင်းစစ်ကြောင်း
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇွန်လ (၁၃)ရက်၊ ညနေ ၄ နာရီ Mizzima News Hour မဇ္ဈိမသတင်းအစီအစဉ်
=====================

01:01 − စစ်ကောင်စီ အခြေစိုက်ရာ နေပြည်တော်က ဂိတ်စခန်း နေရာ ၂ ခု တိုက်ခိုက်ခံရတဲ့ သတင်း

02:32 − အမည်အလွဲသုံးစားလုပ် ငွေညှစ်နေသူတွေကို အရေးယူမယ်လို့ CDF ဟားခါးနဲ့ ကောင်စီ ပြောတဲ့သတင်း

04:23 − ဖမ်းဆီးခံ PDF ၂ ဦးကို စစ်ကောင်စီက စခန်းတည်နေရာလိုက်ပြခိုင်းတဲ့အချိန် မိုင်းဆွဲတိုက်ခိုက်ပြီးကယ်ထုတ်တဲ့သတင်းနဲ့

10:11 − အမေရိကန်ဟာ ဇူလိုင်လကစပြီး အဖွဲ့ဝင်အဖြစ် ပြန်လည်ပေါင်းစည်းဖို့ စီစဉ်နေကြောင်း ယူနက်စကိုပြောကြားလိုက်တဲ့သတင်းအပါအဝင် တခြား အရေးကြီးသတင်းတွေနဲ့ စိတ်ဝင်စားဖွယ်သတင်း တွေကို တင်ဆက်ပေးသွားမှာပါ။

https://youtu.be/bjNdZkrs0wA

#4pmnews
#Mizzimanewshour
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

Business Roundup (13 June 2023)
================

- အပြည်ပြည်ဆိုင်ရာအလုပ်သမားရေးရာအဖွဲ့ ILO ညီလာခံမှာ မြန်မာကိုယ်စားပြုမှုချန်လှပ်ထားဖို့ ဆုံးဖြတ်

- အိန္ဒိယက မြန်မာကို ရူပီးဖြင့် ကုန်သွယ်မှု အမြန်စတင်ဖို့ တောင်းဆို

- ဂျပန်၊ တရုတ်၊ ဆော်ဒီအာရေးဗျ၊ ယူအေအီးနိုင်ငံများက မြန်မာ့ကော်ဖီအတွက် သွင်းကုန်ခွန် ကင်းလွတ်ခွင့်ပေး

- ပြီးခဲ့တဲ့ မေလအတွင်း ကမ္ဘာ့စားသောက်ကုန်ဈေးများ အနိမ့်ဆုံးသို့ ကျဆင်းခဲ့

https://youtu.be/zd4yYv1iKjw

#BusinessRoundUp
#MizzimaTV
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

"ဆက်ကြေးပေးရတဲ့ ရွှေလုပ်ငန်းတွေကြောင့် ဥရုမြစ် တိမ်ကောပျောက်ကွယ်တော့မယ်" (ရုပ်၊ သံ)
======================

KMN
မဇ္ဈိမ။ ။ ကချင်ပြည်နယ်၊ ဟူးကောင်းလွင်ပြင်၊ ဖားကန့်မြို့နယ်အတွင်းမှာ စတင်မြစ်ဖျားခံတဲ့ ဥရုမြစ်ဟာ မြန်မာနိုင်ငံရဲ့ ဒုတိယအရေးပါဆုံး ချင်းတွင်းမြစ်ရဲ့အဓိက မြစ်လက်တက် တခုပါ။

၂၀၂၁ ခုနှစ် စစ်တပ်အာဏာသိမ်းပြီးချိန်ကစပြီး လက်နက်ကိုင်အဖွဲ့တွေ ခွင့်ပြုထားတဲ့ ကျောက်စိမ်းတူး ဖော်တဲ့လုပ်ငန်းက စွန့်ပစ်မြေစာတွေ၊ ရွှေတူးဖော်တဲ့လုပ်ငန်းက စွန့်ပစ်မြေစာတွေကို စည်းကမ်းမဲ့ စွန့်ပစ်နေတာကြောင့် မြစ်ကြောင်းပျောက်ကွယ်လုနီးပါး အန္တရာယ်နဲ့ရင်ဆိုင်နေရပါတယ်။

ဟုမ္မလင်းမြို့နယ်တွင်း ဥရုမြစ်တလျှောက်က ရွှေတူးဖော်လုပ်ငန်းတွေဟာ လက်နက်ကိုင်အဖွဲ့တွေကို ရွှေ ထွက်ရှိနှုန်းနဲ့ရွှေတူးစက်အင်ဂျင်ပါဝါပေါ်မူတည်ကာ ငွေကျပ်ငါးသိန်းမှ သိန်းရာချီ ဆက်ကြေးပေး ဆောင် နေရတယ်လို့ ဥရုမြစ် တလျှောက်လေ့လာခဲ့တဲ့ Myanmar Resource Watch အဖွဲ့က ထုတ်ပြန်ပါတယ်။

https://youtu.be/EyFWO-Gy884

တင်ဆက်၊ တည်းဖြတ် - KMN
စာတည်း ။ ။ Alden

#Mizzima
#ဥရုမြစ်
#ရွှေတူးဖော်ရေး
#မြစ်စာပုံ
#လက်နက်ကိုင်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဟားခါးမြို့နယ် လုံခါရ်တောင် တိုက်ပွဲတွင် ချင်းရဲဘော် ၂ဦးကျဆုံး
====================

ပါခွီး
မဇ္စျိမ ။ ။ ချင်းပြည်နယ် ၊ ဟားခါးမြို့နယ် လုံခါရ်တောင်တိုက်ပွဲတွင် ချင်းအမျိုးသားတပ်မတော် (CNA)၌ တာဝန်ထမ်းဆောင်နေသည့် ရဲဘော်နှစ်ဦး ကျဆုံးခဲ့ကြောင်း The Zotung Post က ဇွန်လ ၁၂ရက်တွင် ဖော်ပြထားသည်။

ယမန်နေ့ ဇွန်လ ၁၂ရက် နံနက် ၄ နာရီ ၃၀မိနစ်အချိန်တွင် စတင်ဖြစ်ပွားခဲ့သည့် တိုက်ပွဲအတွင်း စစ်ကောင်စီတပ်ဖွဲ့ဘက်မှ လက်နက်ကြီးများဖြင့် ပစ်ခတ်ခဲ့သဖြင့် ကျဆုံးခဲ့ရခြင်းဖြစ်ကြောင်း ဆိုသည်။

CNA တပ်ဖွဲ့ဝင် ဇိုတုန်းလူငယ် နှစ်ဦးဖြစ်သော ဆလိုင်းဆန်းဦး နှင့် ဆလိုင်း ထောင်နော်ဟွေ တို့ ကျဆုံးခဲ့ခြင်းဖြစ်ကြောင်း သိရသည်။
စစ်ကောင်စီကို တွန်းလှန်တိုက်ခိုက်ရင်း တိုင်းပြည်နှင့်လူမျိုးအတွက် ကျဆုံးခဲ့ခြင်းဖြစ်ကြောင်း၊ ၎င်းတို့၏ တည်ကြည်ရဲရင့်သော စိတ်ဓာတ်ကို လေးစားအသိမှတ်ပြုကြောင်း၊ ကျန်ရစ်သူမိသားစုနှင့် ထပ်တူဝမ်းနည်းပြီး ၎င်းတို့၏ ပေးဆပ်မှုသည် ဇိုတုန် အမျိုးသားတစ်ရပ်လုံးတွင် ထာဝရတည်ရှိမည်ဖြစ်ကြောင်း CDF – Zotung မှ မှတ်တမ်းတင်သည်ဟု ထုတ်ပြန်ချက်တွင် ဖော်ပြထားသည်။

မေလ ၂၆ရက်နေ့မှ စတင်ပြီး စစ်ကောင်စီတပ်ဖွဲ့ဝင် အင်အား ၁၅၀ဖြင့် ဟားခါးမြို့နယ်မှ ထန်တလန်ဘက်သို့ စစ်ကြောင်းနှစ်ကြောင်းထိုးလျက်ရှိရာ CNA နှင့် ဒေသခံ ချင်းကာကွယ်ရေးတပ်ဖွဲ့များက ခုခံတိုက်ခိုက်နေခြင်း ဖြစ်သည်။

စစ်ကောင်စီတပ်ဖွဲ့ဘက်သို့ ဟာခါးမြို့မှ လက်နက်ကြီးများဖြင့် ပစ်ကူပေးခြင်း၊ လေကြောင်းမှ ဗုံးကြဲခြင်းများနှင့် မြေပြင်ထိုးစစ်ကို ကူညီ‌ပေးခြင်းများ ရှိနေကြောင်း သိရသည်။

ထိုသို့ စစ်ကူများ ရှိနေသော်လည်း စစ်ကောင်စီတပ်ဖွဲ့ဝင် အနည်းဆုံး ၅၀ခန့် ကျဆုံးခဲ့ပြီး လက်နက်ခဲယမ်းများလည်း သိမ်းဆည်းရရှိခဲ့ကြောင်း ချင်းကာကွယ်ရေးတပ်ဖွဲ့ တာဝန်ရှိသူများထံမှ သိရသည်။
အဆိုပါ သီးမစ်လွင်ပြင် တိုက်ပွဲများအတွင်း ချင်းပူးပေါင်းတပ်ဖွဲ့ဘက်တွင်လည်း ၁၇ဦးကျဆုံးခဲ့ပြီး ၁၅ဦးခန့် ဒဏ်ရာရရှိထားကြောင်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)

#ချင်းပြည်နယ်
#ဟားခါးမြို့နယ်
#စစ်ကောင်စီတပ်
#တိုက်ပွဲဖြစ်ပွား
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​နေပြည်တော်ကောင်စီနယ်မြေ ပျဉ်းမနားမြို့နယ်တွင် စစ်ကောင်စီစစ်ဆေးရေးဂိတ် တိုက်ခိုက်ခံရ
================

ရွှေနွယ်
(မဇ္ဈိမ) ။ ။နေပြည်တော်ကောင်စီနယ်မြေ ပျဥ်းမနားမြို့နယ် တောင်ပေါ်ဒေသ၊ မြွေဟောက်မြှောင် ဘုရား ကုန်းတွင်တပ်စွဲထားသော စစ်ကောင်စီတပ်ဖွဲ့၏ စစ်ဆေးရေးဂိတ်အား ဇွန်လ ၁၂ ရက်နေ့ နံနက်ပိုင်းက သွားရောက်တိုက်ခိုက်သည်ဟု နေပြည်တော် ပြည်သူ့ကာကွယ်ရေးတပ်ဖွဲ့ဝင်ထံမှ သိရသည်။

ဇွန်လ ၁၂ ရက်နေ့ နံနက် ၇ နာရီမှစ၍ ၉ နာရီအထိ အချိန်နှစ်နာရီခန့်ကြာ တိုက်ပွဲဖြစ်ပွားခဲ့ခြင်းဖြစ် ကြောင်း ဆိုသည်။
“ထိခိုက်မှုကတော့ သူတို့ဘက်က အထိနာသွားတယ်။ PDF ပူးပေါင်းတပ်ဖွဲ့ဘက်ကတော့ အထိအခိုက် မရှိခဲ့ဘူး။ လက်နက်တွေပါ သိမ်းပြီး ဆုတ်ခွာနိုင်ခဲ့ပါတယ်” ဟု Naypyitaw PDF မှ ဗိုလ်ငွေစိုးက မဇ္ဈိမကို ပြောသည်။

ယမန်နေ့က နေပြည်တော်ကောင်စီနယ်မြေအတွင်းရှိ လယ်ဝေးမြို့နယ်နှင့် ဇမ္ဗူသီရိမြို့နယ်တို့၌လည်း တိုက်ခိုက်မှုများဖြစ်ပွားခဲ့ပြီး ရဲအချို့သေဆုံးမှုရှိကြောင်း သိရသည်။

၂၀၂၃ ခုနှစ်အတွင်း တနိုင်ငံလုံးအတိုင်းအတာဖြင့် စစ်ရေးအရှိန်မြင့်တက်လျက်ရှိပြီး စစ်ကောင်စီအဖွဲ့များ အဓိကနေထိုင်အခြေချရာ နေပြည်တော်ကောင်စီနယ်မြေအတွင်း၌ပါ တိုက်ပွဲများ၊ တိုက်ခိုက်မှုများ မကြာ ခဏဖြစ်ပွားလာခြင်းဖြစ်သည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#နေပြည်တော်
#စစ်ကောင်စီတပ်
#တိုက်ခိုက်မှု
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

မုံရွာမြို့နယ် ညောင်ပင်သာကျေးရွာတွင် စစ်ကောင်စီတပ်က နေအိမ် ၄ လုံး မီးရှို့ဖျက်ဆီး
=======================

ပါခွီး
(မဇ္စျိမ) ။ ။စစ်ကိုင်းတိုင်း၊ မုံရွာမြို့နယ်၊ ညောင်ပင်သာကျေးရွာကို စစ်ကောင်စီတပ်က ဝင်ရောက်စီးနင်းပြီး လက်ဖက်ရည်ဆိုင်အပါအဝင် လူနေအိမ်လေးလုံးကို မီးရှို့ဖျက်ဆီးခဲ့ကြောင်း ဒေသခံများထံမှ သိရသည်။

မုံရွာမြို့အဝင်ရှိ မအူစစ်ဆေးရေးဂိတ်မှ စစ်ကောင်စီတပ်သား ၃၀ ခန့်သည် ဇွန်လ ၁၂ ရက်နေ့ မွန်းလွဲ ၁ နာရီခန့်တွင် ညောင်ပင်သာဘုန်းကြီးကျောင်းအနီး မုံရွာ-အမြင့် ကားလမ်းဘေးတွင်ရှိသော လက်ဖက်ရည် ဆိုင်ကို စတင်မီးရှို့ဖျက်ဆီးသွားခြင်းဖြစ်ကြောင်း ဆိုသည်။

“တိုက်ပွဲဖြစ်တာလဲမရှိဘဲနဲ့ သေနတ်တွေဖောက်ပြီး လူတွေအကုန်ထွက်ပြေးတဲ့အချိန်မှာ မီးရှို့ခဲ့ကြတာ” ဟု ဒေသခံတဦးက ပြောသည်။

အဆိုပါမီးလောင်ကျွမ်းမှုကြောင့် ပျက်စီးဆုံးရှုံးမှု ကာလတန်ဘိုး ကျပ်သိန်း ၅၀၀ ခန့်ရှိကြောင်း ခန့်မှန်း ပြောဆိုသည်။
ညောင်ပင်သာကျေးရွာသည် အိမ်ခြေ ၇၀ ခန့်ရှိသောရွာဖြစ်ပြီး စစ်ကောင်စီတပ်က ပထမဆုံးအကြိမ် မီးရှို ခဲ့ခြင်းဖြစ်ကြောင်း သိရသည်။

စစ်ကောင်စီတပ်ဖွဲ့ဝင်များသည် နေအိမ်များကို မီးရှို့ပြီးနောက် ညနေ ၃ နာရီခန့်တွင် မအူစစ်ဆေးရေးဂိတ် သို့ ပြန်ဝင်သွားကြောင်း အဆိုပါဒေသခံက ဆိုသည်။

စစ်ကောင်စီတပ်များ ရွာအတွင်းဝင်ရောက်စဉ် ရမ်းသမ်းပစ်ခတ်မှုကြောင့် အမျိုးသမီးတဦး ကျည်ထိမှန်ခဲ့ ကြောင်းလည်း သိရသည်။
အဆိုပါမအူဂိတ်သည် ကာကွယ်ရေးတပ်များမှ လက်နက်ကြီးငယ်များဖြင့် မကြာခဏ ပစ်ခတ်တိုက်ခိုက် ခြင်းခံရသော ဂိတ်ဖြစ်ကြောင်း ဒေသခံများထံမှသိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#စစ်ကိုင်းတိုင်း
#မုံရွာမြို့နယ်
#ညောင်ပင်သာကျေးရွာ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

KNDF တပ်ရင်း (၁) က ထောက်ပို့တပ်သား ၂,၀၀၀ ခေါ်ယူ
==================

နောင်နောင်(မဇ္ဈိမ) ။ ။ ကရင်နီပြည်နယ်အတွင်း အာဏာသိမ်း စစ်ကောင်စီတပ်ကို အားကောင်းကောင်းနဲ့ တိုက်ခိုက်နေတဲ့ ကရင်နီအမျိုးသားများ ကာကွယ်ရေးတပ် (KNDF) တပ်ရင်း (၁) က ထောက်ပို့တပ်သား ၂,၀၀၀ ခေါ်ယူနေတယ်လို့ တပ်ရင်း (၁) ရဲ့ ဒု-ထောက်ပို့ တာဝန်ခံ မမိထော်က မဇ္ဈိမကို ပြောပါတယ်။

လက်ရှိမှာတော့ ထောက်ပို့တပ်သား အရေအတွက် ၃၅၀ လောက် လက်ခံရရှိထားပြီ ဖြစ်တယ်လို့ သူက ဆိုပါတယ်။

ကရင်နီဒေသမှာ အာဏာသိမ်းစစ်ကောင်စီတပ်နဲ့ KNDF၊ ‌တော်လှန်ရေး အင်အားစု ပူးပေါင်းတပ်တွေအကြား နှစ်ဘက်တိုက်ပွဲတွေ ပြင်းထန်လာတာနဲ့အတူ လက်နက်ခဲယမ်းဖိုး လိုအပ်ချက်တွေကလည်း အရင်ကထက် မြင့်တက်လာ နေတာပါ။

တပ်ဖွဲ့တစ်ခု၊ အဖွဲ့အစည်းတစ်ခုမှာ ထောက်ပို့ဟာ အင်မတန် အရေးကြီးတဲ့ အခန်းကဏ္ဍမှာ ပါဝင်ပြီး လက်ရှိမှာ ထောက်ပို့ငွေရှာဖွေမှုဟာ အရင်နှစ်တွေကထက် ပိုခက်ခဲလာတယ်လို့လည်း ဆိုပါတယ်။

KNDF တပ်ရင်း (၁) ၊ ထောက်ပို့ဌာနက ဒု-ထောက်ပို့တာဝန်ခံ မမိထော်ကို ကိုနောင်နောင်က ဆက်သွယ်မေးမြန်းထားပါတယ်။

https://youtu.be/mA_IQMr7iVU

တည်းဖြတ်= နောင်နောင်

#KNDF
#ထောက်ပို့တပ်သား၂ထောင်ခေါ်ယူ
#Mizzima
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ပီအက်စ်ဂျီနဲ့ စာချုပ်သက်တမ်းတိုးဖို့ ငြင်းဆိုခဲ့ပြီးနောက် အမ်ဘာပေရဲ့ အနာဂတ်ဟာ သံသယကြီးစရာဖြစ်နေ
=======================

ကိုင်လီယန် အမ်ဘာပေက သူဟာ ဒီနွေရာသီမှာ အသင်းကနေ လီယွန်နယ် မက်ဆီ ထွက်ခွာပြီးနောက် သူ့ကို ၂၀၂၅ အထိ စာချုပ်သက်တမ်းတိုးဖို့ ရွေးချယ်ခွင့်ကို ရယူမှာမဟုတ်ဘူးလို့ တနင်္လာနေ့က ပဲရစ်စိန့်ဂျာမိန်းကို ပြောကြားခဲ့ပါတယ်။

အသက် ၂၄ နှစ်အရွယ် ပြင်သစ်တိုက်စစ်မှူးရဲ့ လက်ရှိစာချုပ်ဟာ လာမယ့်ရာသီကုန်မှာ ကုန်ဆုံးမှာဖြစ်ပြီး နောက်ထပ်တစ်နှစ် စာချုပ်ချုပ်ခွင့်လည်း ရှိနေပါတယ်။

တကယ်လို့ သူသာ စာချုပ်မချုပ်ဆိုဘူးဆိုရင် ပြင်သစ်ချန်ပီယံတွေဟာ တစ်နှစ်တာအတွင်း သူ့ကို ဆုံးရှုံးနိုင်ချေရှိပါတယ်။ ဒါ့ကြောင့် သူတို့ဟာ အခုအခါ ကမ္ဘာ့အကောင်းဆုံးကစားသမားတွေထဲက တစ်ဦးကို ဆောင်းရာသီမှာ လက်လွှတ်ရမယ့်အစား ဒီနွေရာသီမှာ သူ့ကို ရောင်းချနိုင်ဖွယ်ရှိပါတယ်။

တနင်္သာရီတိုင်းအတွင်း မေလထဲတွင် အရပ်သား ၄၀၀ ကျော်ကို စစ်ကောင်စီ အကြောင်းမဲ့ဖမ်းဆီး၊ တိုက်ပွဲတွင် အထိနာတိုင်း အရပ်သားများကို ပစ်မှတ်ထားဖမ်းဆီးနေဟု တနင်္သာရီစစ်ဒေသခွဲစစ်ဆင်ရေးတာဝန်ခံပြော
======================

ကိုရွှေမြိတ်(မဲဆောက်)
(မဇ္ဈိမ) ။ ။တနင်္သာရီတိုင်းတွင် စစ်ကောင်စီက အရပ်သားများကို အကြောင်း အမျိုးမျိုးပြပြီး ဖမ်းဆီးနေရာ မေလတစ်လတည်းတွင် ၄၂၁ဦးထက်မနည်း ဖမ်းဆီးခံခဲ့ရသည်ဟု သုတေသနအဖွဲ့တစ်ခုဖြစ်သော FE5 Tanintharyi က ထုတ်ပြန်သည်။

တနင်္သာရီတိုင်းအတွင်း ထားဝယ်ခရိုင်၊ မြိတ်ခရိုင်နှင့် ကော့သောင်းခရိုင်တို့တွင် စစ်ကောင်စီက အရပ်သားများအား ဖမ်းဆီးမှုအခြေအနေကို FE5 Tanintharyi ကဇွန် ၈ ရက်နေ့တွင် ထုတ်ပြန်ထားခြင်းဖြစ်သည်။

မေလအတွင်း ဖမ်းဆီးခံရသူ စုစုပေါင်း ၄၂၁ ဦးထက်မနည်းရှိခဲ့ပြီး ၎င်းတို့ထဲမှ ၃၁၂ ဦး ကို ပြန်လည်လွတ်ပေးခဲ့သော်လည်းသုံးဦးမှာ စစ်ကောင်စီလက်ထဲတွင် သေဆုံးခဲ့ကြောင်း FE5 Tanintharyi အစီရင်ခံစာတွင် ဖော်ပြထားသည်။ ‌သတ်ဖြတ်ခံရသူ သုံးဦးမှာ ထားဝယ်ခရိုင်မှ ဖြစ်ကြောင်းသိရသည်။

" PDF တွေ ရှိတယ်ဆိုပြီး ရွာတွေကို ဝင်စီးတယ်။ အရပ်သားတွေကို ဖမ်းတယ်။ ပြီးတော့ ငွေတောင်းပြီး ပြန်လွှတ်တယ်။ အဲ့ဒါ သူတို့ လုပ်ရိုးလုပ်စဉ်ဖြစ်နေပြီ"ဟု ထားဝယ်မြို့ခံတစ်ဦးကပြောသည်။
ထားဝယ်ခရိုင်တွင် အရပ်သား ပြည်သူ ၃၃၃ ဦး ထက်မနည်း ဖမ်းဆီးခံပြီး၂၆၂ ဦးကို ပြန်လွှတ်ပေးကာ သုံးဦးသည် လက်ပြန်ကြိုးတုပ်သတ်ဖြတ်ခံလိုက်ရကြောင်းFE5 Tanintharyi ၏အစီရင်ခံစာတွင် ဖော်ပြထားသည်။ မြိတ်ခရိုင်တွင် အရပ်သား ၈၁ ဦး ထက်မနည်း ဖမ်းဆီးခဲ့ပြီး ၅၀ ဦးကို ပြန်လည်လွှတ်ပေးခဲ့သည်။ကော့သောင်းခရိုင်တွင် အရပ်သား ခုနှစ်ဦးထက်မနည်းဖမ်းဆီးခံခဲ့ရသည်ဟု သိရသည်။

" မိုင်းဆွဲခံရပြီဆိုတာနဲ့ အဲ့ဒီနားက ရွာတွေကို မဲတော့တာပဲ။ ပြည်သူတွေအနေနဲ့က ပိုသတိရှိဖို့လိုပါမယ်" ဟု တနင်္သာရီစစ်ဒေသခွဲကွပ်ကဲရေးအဖွဲ့၏ စစ်ဆင်ရေးတာဝန်ခံကပြောသည်။

တနင်္သာရီတိုင်းတွင် မေလအတွင်း တိုက်ပွဲဖြစ်ပွားမှုကြောင့် နေရပ်စွန့်ခွာထွက်ပြေးတိမ်းရှောင်ခဲ့ရသူ ၃၄,၀၀၀ ကျော်အထိရှိခဲ့သည်ဟု FE5 Tanintharyi အစီရင်ခံက အသိပေးထားသည်။စစ်ဘေးရှောင်များသည် မိုးရွာသွန်းမှုနှင့်အတူ နေရေး၊စားရေး အခက်အခဲနှင့် ကျန်းမာရေး ပြဿနာများ ကြုံတွေ့နေကြရပြီး ဆေးဝါးနှင့် အမိုးအကာများ လိုအပ်နေသည်ဟု စစ်ဘေးရှောင်ကူညီရေးအဖွဲ့များကပြောသည်။

FE5 Tinintharyi သည် စစ်အာဏာသိမ်းပြီးနောက်တနင်္သာရီတိုင်းအတွင်း စစ်ရေးသတင်းနှင့် ပတ် သက်သောသတင်း အချက်အလက်များကို ဖော်ပြပေးနေသော သုတေသနအဖွဲ့တစ်ဖွဲ့ဖြစ်သည်။

စစ်ကောင်စီသည် အရပ်သားပြည်သူများကို ဖမ်းဆီးနှိပ်ကွပ်နေပြီး လူ့အခွင့်အရေးချိုးဖောက်သည့် လုပ်ရပ်များကို ပိုမိုလုပ်ဆောင်လာ၍ နိုင်ငံတကာအနေဖြင့် အလျင်အမြန်အရေးယူပေးရန်
ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီးဦးကျော်မိုးထွန်းက မကြာခဏတောင်းဆိုနေသည်။

ယခုအခါ စစ်အာဏာရှင်အား ခုခံတော်လှန်စစ်မှ ထိုးစစ်ဆးသို့ အရှိန်မြှင့်နေပြီဖြစ်၍ ပြည်သူများအနေ ဖြင့် ယခင်ကထက် ပိုမိုသတိရှိကြရန် တနင်္သာရီစစ်ဒေသခွဲ ကွပ်ကဲရေးအဖွဲ့၏ စစ်ဆင်ရေးတာဝန်ခံက သတိပေးပြောကြားသည်။

စာတည်း - မောင်ကြီး

#mizzima
#တနင်္သာရီတိုင်း
#တနင်္သာရီစစ်ဒေသခွဲ
#စစ်ကောင်စီ
#FE5 Tanintharyi
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U