ဒေါ်အောင်ဆန်းစုကြည်၏ အသက် ၇၈ နှစ်ပြည့်မွေးနေ့အတွက် မွေးနေ့ဆုတောင်း
===================

ဂီတမှူး ကိုဖြိုး(KB) နဲ့ PDFညီလေး အောင်ပွဲတို့က ဒေါ်အောင်ဆန်းစုကြည်၏ အသက် ၇၈ နှစ်ပြည့်မွေးနေ့အတွက်သီချင်းလေးနဲ့ မွေးနေ့ဆုတောင်းပေးထားပါတယ်။

"အမေဒေါ်အောင်ဆန်းစုကြည်နှင့်အတူမတရားဖမ်းစီးချုပ်နှောင်ခံထားရသော နိုင်ငံရေး အကျဥ်းသားများအားလုံးအမြန်ဆုံးလွှတ်မြောက်ပါစေ" တဲ့။

https://youtu.be/EwRUonLUzlI

-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ဗိုလ်ကြီးဆိုင်ဂုံ ဖမ်းဆီးစစ်ဆေးခံနေရမှု ရိုးရှင်းမှုမရှိကြောင်း ပြည်သူ့စစ်သားဦးဆောင်အဖွဲ့ပြော
===========================

မိုးသောက်
မဲဆောက်(မဇ္ဈိမ)။ ။လွတ်မြောက်ရေးအင်အားစုစစ်သည်များအဖွဲ့(WOLF)မှ တပ်ရင်းမှူး CDM ဗိုလ်ကြီး ဆိုင်ဂုံ(ခေါ်) သူရိန်ဝင်းအပါအဝင် တော်လှန်ရေးတပ်ဖွဲ့ဝင်ခြောက်ဦးကို နှစ်လကျော်ကြာဖမ်းဆီးစစ်ဆေး နေမှုအပေါ် CDM စစ်သားအသိုင်းအဝိုင်းနှင့် WOLF တပ်ဖွဲ့ဝင်များက စိတ်ပူလျက်ရှိနေကြသည်။

CDM ဗိုလ်ကြီးဆိုင်ဂုံအပါအဝင် ခုနစ်ဦးကို ပြည်သူ့စစ်မဟာဗျူဟာအကြံပေးဗျူရို(PMSAB)အဖွဲ့လက် အောက်ခံ မိုးကြိုးပြောက်ကျားတပ်ဖွဲ့က ၂၀၂၃ ခုနှစ် ဧပြီလ ၁၁ ရက်နေ့တွင် ဖမ်းဆီးလိုက်ကြောင်းသိရ ပြီး ဖမ်းဆီးစစ်ဆေးနေမှုသည် ရိုးရှင်းမှုမရှိကြောင်း ဗိုလ်ကြီးညီသုတက ပြည်သူ့စစ်သားဦးဆောင်အဖွဲ့၊ တရားမျှတမှုဖော်ဆောင်ရေးကော်မတီ၏ သတင်းစာရှင်းလင်းပွဲတွင် ပြောသည်။

“အခုအချိန်ထိလည်း ပွင့်လင်းမြင်သာစွာ စုံစမ်းစစ်ဆေးခံရတာမရှိပါဘူး။ ပြီးတော့ သမာသမတ်ကျတဲ့ အဖွဲ့တွေကိုလွှဲအပ်ပေးတာကမရှိသေးဘူး။ ဒါကြောင့်မို့ ဒီကိစ္စသည် ရိုးရှင်းမှုမရှိဘူး၊ တရားမျှတမှုမရှိဘူး လို့ နားလည်ပါတယ်” ဟု ၎င်းကပြောသည်။
ဖမ်းဆီခံရသည့် အချိန်တွင် ကျင့်ဝတ်နှင့်မညီသည့် နှိပ်စက်မှုများလည်းရှိကြောင်း ၎င်းကဆက်ပြောသည်။

မိုးကြိုးပျောက်ကြားတပ်ဖွဲ့တပ်ရင်း(၁၀၁)၏ တပ်ရင်းမှူးဖြစ်ခဲ့သည့် ဗိုလ်ကြီးဆိုင်ဂုံကို နေပြည်တော်၊ ရန်ကုန်၊ မန္တလေး၊ ပုဂံနှင့် ညောင်ဦးတို့ကို ဗဟိုစစ်ကော်မရှင်သို့ တင်ပြမှုမရှိဘဲ သွားလာခဲ့ခြင်း၊ တင်ပြ ခြင်းမရှိဘဲ တပ်ဖွဲ့ပိုင်အမှတ်တံဆိပ်များကို အသုံးပြု၍ Facebook ပေ့ချ်များ ဖွင့်လှစ်ခြင်း၊ တိုင်းရင်းသား ဒေသတခုသို့ခွင့်ပြုချက်မရှိဘဲ သွားလာခြင်း၊ ဒေသတွင်းတော်လှန်ရေးအဖွဲ့များ၏ တပ်တည်နေရာ လက် နက်လမ်းကြောင်းများကို မှတ်သားခြင်း၊ တပ်ဖွဲ့ဝင်များအကြား သွေးခွဲအုပ်ချုပ်ခြင်း၊ လူမှုရေးဖောက်ပြန် ခြင်း စသည့်မသင်္ကာဖွယ်ရာတို့ကို အချက်အလက်နှင့်တွေ့ရှိခဲ့ခြင်းကြောင့် တပ်ရင်း(၄၀၄)နယ်မြေတွင် ဖမ်းဆီးခဲ့ခြင်းဖြစ်သည်ဟု မိုးကြိုးပြောက်ကျားတပ်ဖွဲ့က မေလ ၂၃ ရက်နေ့တွင် ထုတ်ပြန်ခဲ့သည်။

ဗိုလ်ကြီးဆိုင်ဂုံကိုဖမ်းဆီးသွားစဉ်က ဒလန်ဟူသောစွပ်စွဲချက်ပါဝင်သည့်အတွက် အခြားသော တော်လှန် ရေးတွင်ပါဝင်နေသည့် CDM များအတွက် စောင့်ကြည့်စရာကိစ္စတခုဖြစ်လာသည်ဟု CDM တပ်မတော် သားများက ယူဆနေသည်။

သတင်းစာရှင်းလင်းပွဲတွင်ပါဝင်သည့် CDM တဦးဖြစ်သည့် Captain Zero “CDM စစ်သားတွေအနေနဲ့ ဒလန်ဖြစ်ကြောင် စွပ်စွဲခံရပြီဆိုတာနဲ့ အရင်ဆုံးလာဖမ်းတယ်ဆိုတဲ့ဖြစ်ရပ်က မြေပြင်မှာတိုက်ပွဲဝင်နေတဲ့ CDM စစ်သားတွေကို ခြိမ်းခြောက်မှုဖြစ်လာတယ်” ဟု ပြောသည်။

“ပန်ဆက် (ပြည်သူ့စစ်မဟာဗျူဟာအကြံပေးဗျူရို-PMSAB)အနေနဲ့ ကိုဆိုင်ဂုံကို ပုဂ္ဂိုလ်ရေးမုန်းတီးမှု ကြောင့် လက်စဖျောက်ချင်တယ်လို့ ကျနော်တို့အနေနဲ့မြင်တယ်” လွတ်မြောက်ရေးအင်အားစုစစ်သည် များအဖွဲ့(WOLF)မှ တပ်ရေးအရာရှိ ဘရာဗိုက ပြောသည်။

ဖမ်းဆီးခံထားရသူများနှင့်ပတ်သက်ပြီး သိရှိနိုင်ရန် မိုးကြိုးပျောက်ကြားအဖွဲ့ကို မဇ္ဈိမမှဆက်သွယ်နေဆဲ ဖြစ်သည်။
ပြည်သူ့စစ်သားဦးဆောင်အဖွဲ့၊ တရားမျှတမှုဖော်ဆောင်ရေးကော်မတီသည် အဖွဲ့အစည်းနှစ်ခုအကြား ပြဿနာများကို ကြားဝင်မည်မဟုတ်သော်လည်း မျှတသောတရားစီရင်မှုဖြစ်စေရေးအတွက် အမျိုးသား ညီညွတ်ရေးအစိုးရ (သို့မဟုတ်) KIA/KIO ရှေ့မှောက်တွင် တရားစီရင်ခြင်းပြုလုပ်နိုင်ရန် ဆန္ဒရှိနေပြီး အကြောင်းကြားမှုများပြုလုပ်ထားကြောင်း သိရသည်။

Photo- ပေးပို့( ဖမ်းဆီးခံထားရသူများနှင့် WOLFအဖွဲ့တို့ အွန်လိုင်းမှတွေ့ဆုံခဲ့စဉ်)
စာတည်း။ ။စောဖေ
စာမူတည်းဖြတ်။ ။စောဖေ

#ဗိုလ်ကြီးဆိုင်ဂုံ
#ပြည်သူ့စစ်သားဦးဆောင်အဖွဲ့
#PMSAB
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဒေါ်အောင်ဆန်းစုကြည် ၇၈ နှစ်ပြည့်မွေးနေ့ ကလေးမြို့သပိတ်ကော်မတီ ကျင်းပ
=========================

ပါခွီး
(မဇ္စျိမ) ။ ။ နိုင်ငံတော်အတိုင်ပင်ခံ ဒေါ်အောင်ဆန်းစုကြည်၏ ၇၈ နှစ်မြောက် မွေးနေ့ပွဲ အထိမ်းအမှတ်အဖြစ် လူထုလှုပ်ရှားမှုကို ကလေးမြို့ ပင်မသပိတ်ကော်မတီမှ ကျင်းပခဲ့ကြောင်း သိရသည်။
ဇွန်လ ၁၉ ရက် ယနေ့တွင်ကျင်းပသော အခမ်းအနားကို ဒေသခံပြည်သူများနှင့်အတူ ကျောင်းသားများ ၊ ယင်းမာပင် - ဆားလင်းကြီး ရွာပေါင်းစုံသပိတ်ကော်မတီ ၊ လက်ပံတောင်းတောင် လူထုသပိတ်ဦးဆောင်ကော်မတီမှ အဖွဲ့ဝင်ရဲဘော်များနှင့် ပူးပေါင်းကျင်းပခဲ့ခြင်း ဖြစ်သည်။

အခမ်းအနားတွင် ဇွန်လ (၁၉) ရက် လှုပ်ရှားမှုအဖြစ် ပန်းသပိတ်နှင့်အတူ “ခွန်အား ဖြည့်မိငယ်” သီချင်းကို သံပြိုင်သီဆိုက ဦးဆောင်သူများမှ လူထုသပိတ်တရားများ ဟောကြားခဲ့ကြောင်းသိရသည်။
မိဘပြည်သူများအနေဖြင့် စစ်အာဏာရှင်စနစ်ကို “ကျေးလက်ပုန်ကန် မြို့ပြဖီဆန်” ကြလျက် တော်လှန်ရေးမီးစာအမြင့်ဆုံးသို့မြင့်တင်ကာ နိုင်ရာကဏ္ဍအသီးသီးမှ ပါဝင် တိုက်ပွဲဝင်ကြပါရန် ကလေးမြို့ပင်မသပိတ်ကော်မတီမှ တိုက်တွန်းထားသည်။

ကလေးမြို့တွင် ဧပြီလ ၁၆ရက် “တော်လှန်သင်္ကြန်” ဆန္ဒပြပွဲတွင် သပိတ်ကော်မတီမှ အဖွဲ့ဝင်လေးဦး ဖမ်းဆီးခံရပြီးနောက် စစ်အာဏာရှင်ဆန့်ကျင်ရေးဆန္ဒပြပွဲများရပ် ဆိုင်းသွားခဲ့ပြီး ဇွန်လ ၁၈ ရက် ယမန်နေ့မှစတင်ကာ လူထုလှုပ်ရှားမှုများ ပြန်လည် ပြုလုပ်လာခြင်းဖြစ်ကြောင်း သိရသည်။

စာတည်း။ ။ နောင်နောင်

#ဒေါ်အောင်ဆန်းစုကြည်
#ပန်းသပိတ်
#Mizzima
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇွန်လ (၁၉) ရက်နေ့၊ ည ၇ နာရီ၊ The Mizzima Primetime မဇ္စျိမ ပင်မသတင်းအစီအစဥ်
=======================

- ရန်ကုန်မှာ We Miss You ဘန်နာချိတ်ဆွဲကာ ဒေါ်အောင်ဆန်းစုကြည်မွေးနေ့အထိမ်းအမှတ် လှုပ်ရှားမှုပြုလုပ်တဲ့သတင်း

- စစ်ကောင်စီက မန္တလေးမြို့အနှံ့ ပိတ်ဆို့စစ်ဆေးနေပြီး ပန်းပန်ထားပါက ဆဲဆိုပြီး ဆွဲဖြုတ်ခိုင်းတဲ့သတင်း

- လေအားလျှပ်စစ်စီမံကိန်း ၃ ခုအတွက် ရုရှားနှင့် စစ်ကောင်စီ MOU ထိုးတဲ့သတင်း

- ကန့်ကွက်မှုများကြားမှာပဲ ထိုင်းအစိုးရက မြန်မာ့အရေး ဆွေးနွေးပွဲ ကျင်းပမယ့်သတင်း

- အညာဒေသမှာ စစ်ကောင်စီတပ်ဖွဲ့က ရိက္ခာတွေကို ဘယ်လိုသယ်နေလဲဆိုတဲ့ရုပ်သံသတင်းလွှာနဲ့

- ယူကရိန်းပဋိပက္ခနဲ့ပတ်သက်ပြီး အာဖရိကနိုင်ငံတွေရဲ့ မျှတတဲ့ချဉ်းကပ်မှုအပေါ် ပူတင်ချီးကျူးတဲ့သတင်းအပါအဝင် တခြားအရေးကြီးတဲ့သတင်းတွေနဲ့ စိတ်ဝင်စားဖွယ်သတင်းတွေကို တင်ဆက်ပေးပါမယ်။

https://www.youtube.com/live/KvaXP6Re2K0?feature=share

#7pmnews
#themizzimaprimetime
#MizzimaTV
----------------------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ဒေါ်အောင်ဆန်းစုကြည်၏ စိတ်ဓာတ်သတ္တိများကို စံပြုအတုယူရ မည်ဟု NUG ယာယီသမ္မတပြောကြား
================

ဒေါ်အောင်ဆန်းစုကြည်၏ စိတ်ဓာတ်သတ္တိများကို စံပြုအတုယူရမည်ဟု အမျိုးသားညီညွတ်ရေးအစိုးရ (NUG) ယာယီသမ္မတဒူဝါလရှီးလက တိုက်တွန်းရင်း အကျဉ်းကျခံနေရသော အသက် ၇၈ နှစ်ပြည့်မြောက်သောမွေးနေ့ရှင်ကို ဂုဏ်ပြုလိုက်သည်။

" ဒေါ်အောင်ဆန်း စုကြည်ဟာ စွန့်စားရဲတယ်၊ ဇွဲနပဲ သိပ်အားကြီးတယ်။ လူထုလွတ်လပ်ခွင့်နဲ့ လူထုအကျိုးစီးပွားအတွက် ဒေါ်အောင်ဆန်းစုကြည်ရဲ့ တစိုက်မတ်မတ် အနစ်နာခံမှုဟာ တော်ရုံ ဘယ်သူမှ မမှီနိုင်တဲ့ အဆင့်အတန်းမျိုးမှာ ရှိပါတယ်။ အဲသည့်အတွက် ကျွန်တော်ဟာ ဒေါ်အောင်ဆန်းစုကြည်ကို လေးစားဦးညွှတ်မိပါတယ်။ ကျွန်တော်တို့ဟာ ဒေါ်အောင်ဆန်း စုကြည်ရဲ့ စိတ်ဓာတ်သတ္တိတွေကို အမှတ်တရအနေနဲ့ပဲ ထားရမှာ မဟုတ်ပါဘူး။ စံပြု အတုယူကြရမယ်လို့ အထူးပြောကြားချင်ပါ တယ်" ဟု ယာယီသမ္မတကြီးက ပြောသည်။

မွေးနေ့ရှင်မပါဝင်နိုင်သည့် မွေးနေ့ပွဲကို ဝမ်းနည်းကြောင်း၊ ဒေါ်အောင်ဆန်းစုကြည်မှာ မိမိနှင့် အသက်အပိုင်းအခြားကွာခြား မှုမရှိကြောင်း၊ ပြည်သူများပေးပို့သည့် မေတ္တာကို ရရှိမည်ဟု ယုံကြည်ကြောင်း သမ္မတကြီးကပြောသည်။

" ဒေါ်အောင်ဆန်းစုကြည်ဟာ လူထုခေါင်းဆောင်အဖြစ်ကို ရရှိခဲ့သလို၊ တိုင်းပြည်ကို ဦးစီးဦးဆောင် ပြုခဲ့သူ ဖြစ်ပါတယ်။ နိုင်ငံရေးအရ နည်းနာပိုင်း / မဟာဗျူဟာပိုင်း အတိမ်းအစောင်း အချွတ်အချော်ဖြစ်တာ ရှိကောင်းရှိနိုင်ပေမယ့် ဒေါ်အောင်ဆန်း စုကြည်ဟာ တိုင်းပြည်နဲ့ လူထုအပေါ် စေတနာ မယုတ်လျော့ခဲ့ပါ ဘူး။ ဒါကို ဒေါ်အောင်ဆန်းစုကြည်ရဲ့ နိုင်ငံရေးဘဝ ဖြတ်သန်းမှု တစ်လျှောက်လုံးက သက်သေခံနေပါတယ်။ လူထုအပေါ်မှာ ထားတဲ့ ဒေါ်အောင်ဆန်းစုကြည်ရဲ့ စိတ်ကောင်း စေတနာဟာ မြန်မာ့နိုင်ငံရေးသမိုင်းမှာ အထင်အရှား ပြယုဂ်တစ်ခုအနေနဲ့ နှစ်ပေါင်းများစွာ ထင်ကျန်ရစ်နေပါလိမ့်မယ်" ဟု ၎င်းကဆက် ပြောသည်။

ဒေါ်အောင်ဆန်းစုကြည်ကို စစ်ခေါင်းဆောင်များက နိုင်ငံရေး ဇာတ်ခုံ ပေါ်မှ တွန်းချရန် အားထုတ်ခဲ့သည်ဟု ယာယီသမ္မတကြီးက ပြောသည်။

" ဒေါ်အောင်ဆန်းစုကြည်ကို ဖယ်ရှားဖို့ ကြိုးစားခြင်းဟာ လူထုရဲ့ လွတ်လပ်ခွင့်နဲ့ လူထုတရားမျှတမှုကို ငြင်းဖျက်တာနဲ့ အတူတူပဲလို့ ပြောချင်ပါတယ်။ ကျွန်တော်တို့ဟာ လူထုလွတ်လပ်ခွင့်အတွက် အမြဲတိုက်ပွဲဝင်နေကြရပါလိမ့်မယ်" ဟု သမ္မတကြီးက သတိပေး သည်။

နွေဦးတော်လှန်ရေးမှာ လက်နက်ကိုင်လမ်းစဉ်တခုတည်းဖြင့် သွားနေသည့် လူထု တော်လှန် ရေးမဟုတ်ကြောင်း၊ ဒေါ်အောင်ဆန်းစုကြည်မှာ လတ်တ လောတွင် တိုင်းပြည်နှင့် လူထုကို ရှေ့ဆောင်ရန် အခက်အခဲဖြစ်နေသည့်အချိန်ဖြစ်ကြောင်း၊ သို့သော် သူမပြောကြားခဲ့သည့် လမ်းညွန်ချက်ဟောပြောချက်များ ရှိသည်ဟု ယာယီသမ္မတကြီးက ပြောသည်။

" အတိတ်မှာ ဒေါ်အောင်ဆန်းစုကြည် လမ်းပြသွန်သင်ဟောပြော ခဲ့တဲ့ လမ်းညွှန်ချက်တွေ အမြောက်အမြား ရှိခဲ့ပါတယ်။ ဒေါ်အောင်ဆန်းစုကြည်ဟာ တိုင်းပြည်နဲ့ လူထုကိုလည်း လမ်းညွှန်ခဲ့တယ်၊ အမျိုးသားဒီမိုကရေစီအဖွဲ့ချုပ်အတွက်လည်း လမ်းညွှန်ချက်တွေ ပေးခဲ့ပါတယ်။ ဒေါ်အောင်ဆန်းစုကြည်ရဲ့ နိုင်ငံရေးလမ်းညွှန်ချက်တွေဟာ အချိန်ကာလ ကြာညောင်း ခဲ့ပေမယ့် မပုတ်မသိုးဘဲ တည်ရှိနေတဲ့ လမ်းညွှန်ချက် အမြောက်အမြားရှိနေပါတယ်။ ဒါတွေကို ကျွန်တော်တို့ သတိရကြဖို့ ဖြစ်ပါတယ်" ဟု ယာယီသမ္မတကြီးက ပြောသည်။