မီးရှို့ခံရသော တလိုင်းရွာဒေသခံများ ရွာထဲပြန်ဝင်နေကြသော်လည်း စစ်ကောင်စီတပ် ပြန်ဝင်လာမည်ကို စိုးရိမ်နေကြဆဲ
====================

ကိုခင်မောင်
(မဇ္စျိမ) ။ ။ စစ်ကိုင်းတိုင်း၊ စစ်ကိုင်းမြို့နယ်၊ တလိုင်းကျေးရွာက ဒေသခံများသည် ဘေးလွတ်ရာသို့တိမ်းရှောင်နေရာမှ ယနေ့ဇူလိုင် ၄ရက်တွင် ရွာထဲပြန်ဝင်နေကြသော်လည်း စကစတပ် ပြန်ဝင်လာမည်ကို စိုးရိမ်နေကြဆဲ ဖြစ်သည်ဟု ဒေသခံသတင်းရင်းမြစ်ထံမှ သိရသည်။

စစ်ကိုင်းမြို့နယ်၊ တလိုင်းကျေးရွာကို စစ်ကောင်စီတပ်က ဇူလိုင်လ ၂ရက်နေ့က အိမ်ခြေ ၁၀၀ကျော် မီးရှို့ဖျက်ဆီးခဲ့ရာ ဒေသခံများမှာ ဘေးလွတ်ရာသို့ တိမ်းရှောင်ခဲ့ကြရာမှ ရွာထဲသို့ ပြန်ဝင်နေခြင်းဖြစ်သည်။

“တလိုင်းကတော့ စ- (စကစတပ်သား)တွေ ပြန်ထွက်သွားပြီဆိုတော့ ရွာပြန်ကပ်နိုင်ကြပါပြီ၊ ဘယ်အချိန်ပြန်ဝင်လာမလဲ သတိထားနေရဆဲပါ။” ဟု ဒေသခံသတင်းရင်းမြစ်တစ်ဦးက မဇ္စျိမကိုပြောသည်။

အင်အား ၇၀ ကျော်ပါ စစ်ကောင်စီတပ်သားများသည် အိမ်ခြေ ၃၀၀ ခန့်ရှိသော တလိုင်းကျေးရွာသို့ ဇူလိုင် ၂ ရက်နေ့တွင် စစ်ကြောင်းထိုးဝင်ရောက်ခဲ့ပြီး ဇူလိုင် ၃ ရက် နံနက်ပိုင်းတွင် ပဒူရွာဘက်သို့ ပြန်ဆုတ်သွားခဲ့သည်ဟု ၎င်းကဆိုသည်။

အဆိုပါစစ်ကောင်စီတပ်သည် တလိုင်းကျေးရွာရှိ လူနေအိမ် ၁၀၀ကျော်ကို မီးရှို့ပြီး ရွာအနီးပတ်ဝန်းကျင်ရှိ တောရဘုန်းကြီးကျောင်းများတွင် တစ်ညအိပ်ရပ်နားခဲ့ခြင်းဖြစ်ကြောင်းသိရသည်။

တလိုင်းရွာသို့ စစ်ကောင်စီတပ် စစ်ကြောင်းမဝင်မီ ဇွန်လ ၂ရက်နေ့ နံနက် ၃ နာရီ ၂၀မိနစ်အချိန်ခန့်တွင် တလိုင်းရွာတောင်ဘက်တွင် ကင်းစောင့်နေသာ ဒေသကာကွယ်ရေးတပ်ဖွဲ့များကို အင်အား ၇၀ ခန့်ပါ စစ်ကောင်စီတပ်များမှ ဝင်စီးပြီး ထိတွေ့မှုဖြစ်ခဲ့ပွားခဲ့ကြောင်း သိရသည်။

“ကင်း ရဲဘော်တွေ ခုခံကာကွယ်ပေးခဲ့တာကြောင့် ကျေးရွာပြည်သူတွေ ရှောင်တိမ်းချိန်ရခဲ့တယ်၊ မဟုတ်ရင် ဒီထက် အခြေအနေဆိုးနိုင်ပါတယ်၊ စစ်ကြောင်းဝင်လာပြီးချိန် ဖမ်းဆီးခံရတာမျိုးတော့မရှိပါဘူး၊ နောက်ရက် နံနက် ၁၀ နာရီလောက် ပဒူ ကို ပြန်ဝင်သွားပါတယ်။” ဟု သတင်းရင်းမြစ်က ဆက်လက်ပြောပြသည်။

ထိုစစ်ကောင်စီတပ်များသည် တပ်မ (၃၃) လက်အောက်ခံ စစ်ကောင်စီတပ်သားများဖြစ်ပြီး မေလ ၁၉ရက်ကတည်းက ပဒူရွာတွင် အထိုင်ချတပ်စွဲကာ အနီးပတ်ဝန်းကျင်ရှိ ကျေးရွာများဘက်သို့ စစ်ကြောင်းထိုးဝင်ရောက်လျက်ရှိကြောင်း သိရသည်။
ထိုကြောင့် ပဒူရွာဒေသခံများသည် နေရပ်မပြန်နိုင်ဘဲ ယနေ့ဇူလိုင် ၄ရက်နေ့အထိ စစ်ဘေးတိမ်းရှောင်လျှက်ရှိကြောင်း သတင်းရင်းမြစ်ထံမှ သိရသည်။

စာတည်း - သန့်ဇော်(သန်လျင်)

#mizzima
#မီးရှို့
#တလိုင်းရွာ
#ဒေသခံများ
#စစ်ကိုင်းမြို့နယ်

ဓာတ်ပုံ- စစ်ကိုင်းမြို့နယ် သတင်းမှန်ပြန်ကြားရေး
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​စစ်ရေးတင်းမာနေသည့်အတွက် ပြည်သူများ အသွားအလာသတိပြုကြရန် KIO အစိုးရက သတိပေးထုတ်ပြန်
==================

ကချင်လေး
(မဇ္ဈိမ) ။ ။ ကေအိုင်အိုဌာနချုပ်အနီး စစ်ရေးတင်းမာနေမှုကြောင့် ပြည်သူများအသွားအလာ သတိပြုရန် ကေအိုင်အိုဗဟိုကော်မတီက ဒီနေ့ရက်စွဲဖြင့် ထုတ်ပြန်လိုက်သည်။

KIO(ကချင်လွတ်မြောက်ရေးအဖွဲ့) အစိုးရရဲ့ လိုင်ဇာခရိုင် အုပ်ချုပ်မှုနယ်မြေဒေသအတွင်း၌ စစ်ကောင်စီတပ်၏ စစ်ကြောင်းလှုပ်ရှားမှုများရှိလာနေ၍ အချိန်မရွေးတိုက်ပွဲများ ဖြစ်ပွားလာနိုင်သည့်အတွက် ပြည်သူများ သတိထားဆင်ခြင်သွားလာနိုင်ဖို့ လိုင်ဇာခရိုင် အုပ်ချုပ်ရေးရုံးမှ ယနေ့ရက်စွဲဖြင့် သတိပေးထုတ်ပြန်လိုက်ခြင်း ဖြစ်သည်။

ကချင်ဘာသာဖြင့် ရေးသားထုတ်ပြန်ချက်အရ ဗန်းမော် - မြစ်ကြီးနား ကားလမ်းတစ်လျှောက် သွားလာခြင်းကို အတတ်နိုင်ဆုံးရှောင်ရှားရန်၊ ကား၊ ဆိုင်ကယ်၊ ခြေကျင်ခရီးများဖြင့် မလွဲမရှောင်သာ သွားလာရမည့် အကြောင်းကိစ္စများပေါ်လာပါက စစ်ရေးသတင်းများကို သတိထားနားစွင့်ပြီးမှ သွားလာကြရန်၊ စစ်ကောင်စီတပ်နှင့် နီးစပ်သည့်နေရာများသို့ သွားလာခြင်း မပြုရန်၊ တိုက်ပွဲဖြစ်ပွားနိုင်သည့်နေရာနှင့် ဖြစ်ပွားလေ့ရှိသည့် နေရာများသို့ သွားလာခြင်းမပြုရန်နှင့် စစ်တပ်၏ အသုံးချခံရခြင်း မခံရရန်အတွက် ရှောင်ရှားကြရန် ထုတ်ပြန်ချက်မှာ ဖော်ပြထားသည်။

ကေအိုင်အိုအစိုးရ၏ လိုင်ဇာခရိုင်အုပ်ချုပ်ရေးနယ် မြေအတွင်း ပါဝင်နေသည့် ဗန်းမော် - မြစ်ကြီးနားလမ်း ဘေးက နမ်ဆန်ယန်ကျေးရွာအနီးမှာ ယမန်နေ့မှစ၍ တိုက်ပွဲများ ပြန်လည်ဖြစ်ပွားလာနေသည့်အတွက် ကျေးရွာမှ နေရပ်ပြန်စစ်ရှောင်ပြည်သူများလည်း ပြန်လည်ထွက်ပြေးကြရပြီ ဖြစ်သည်။

စာတည်း - သန့်ဇော်(သန်လျင်)

#mizzima
#KIO
#အစိုးရ
#သတိပေး #လိုင်ဇာခရိုင်
#အုပ်ချုပ်မှုနယ်မြေ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မအူပင်မြို့တွင် စစ်ကောင်စီတပ်အရာရှိချင်း ပစ်ခတ်မှု ၂ဦးလုံးသေဆုံးဟုဆို
==================

မင်းထက်
(မဇ္စျိမ) ။ ။ဧရာဝတီတိုင်း၊ မအူပင်မြို့အဝင် စစ်ဆေးရေးဂိတ်တွင် စစ်ကောင်စီတပ်အရာရှိနှစ်ဦး စကားများရန်ဖြစ်ပြီး ပစ်ခတ်မှုဖြစ်ရာမှ နှစ်ဦးလုံးသေဆုံးခဲ့ကြောင်း ဒေသခံသတင်းရင်းမြစ်များကပြောသည်။

မအူပင်မြို့မှ ရန်ကုန်မြို့ဘက်သို့ ထွက်သည့်မအူပင်တံတား စစ်ဆေးရေးဂိတ်တွင် ယနေ့ ဇူလိုင်လ ၄ ရက်နေ့၊ နေ့လည် ၁၂ နာရီ ၃၀ မိနစ်ခန့်က အဆိုပါပစ်ခတ်မှုဖြစ်ပွားခြင်းဟု သိရသည်။

" ဂိတ်မှာ ကား‌တွေ၊ဆိုင်ကယ်တွေဆီကနေ ပိုက်ဆံကောက်တာကနေ စကားများတာ။ ဗိုလ်က ဗိုလ်ကြီးကို ပစ်ချပစ်တာ။ ပြီးတော့ သူ့နားထင်သူ ထောက်ပြီး သတ်သေတာ။ နှစ်ယောက်စလုံး သေတယ်" ဟု ယင်းဖြစ်စဉ်ကို သိရှိထားသည်ဆိုသော ဒေသခံတစ်ဦးက ပြောသည်။

ဗိုလ်အဆင့်နှစ်ပွင့်နှင့်အရာရှိက ဗိုလ်ကြီးအဆင့် သုံးပွင့်နှင့် အရာရှိကို ပစ္စတိုဖြင့်ပစ်ခတ်ခဲ့ကြောင်း၊ ဗိုလ်ကြီးအဆင့်ရှိသူသည်သေနတ်ကျည်ထိမှန်သည့်ဒဏ်ရာဖြင့် သေဆုံးပြီးနောက် ပစ်ခတ်သူ ဗိုလ်အဆင့်ရှိသူလည်း ကိုယ့်ကိုယ်ကိုယ် သေနတ်ဖြင့်ပစ်ကာ အဆုံးစီရင်သွားကြောင်း နောက်ထပ်သတင်းရင်းမြစ်တစ်ဦးက ပြောသည်။
"ဘာအကြောင်းကြောင့် စကားများရန်ဖြစ်တယ်တော့ မသိဘူး။ နှစ်ယောက်လုံးသေတာတော့ အတည်ပြုလို့ရတယ်" ဟု အထက်ပါသတင်းရင်းမြစ်ကပြောသည်။

အချင်းချင်းပစ်ခတ်မှု‌ကြောင့်စစ်ကောင်စီအရာရှိနှစ်ဦး သေဆုံးသည့် သတင်းကို မဇ္ဈိမက မေးမြန်းခဲ့သည့် မြို့ခံ ငါးဦးက အတည်ပြုသည်။ မအူပင်မြို့မရဲစခန်းသို့ ဆက်သွယ်ရာ ဖုန်းကိုင်ဆောင်ခြင်းမရှိပေ။

အဆိုပါဖြစ်စဥ်ကို မအူပင်မြို့အခြေစိုက် စစ်ကောင်စီခြေလျင်တပ်ရင်း ခလရ(၂၇)မှ အရာရှိများက လာရောက်စစ်ဆေးနေကြသည်ဟုသိရသည်။

သေဆုံးသွားသည့် စစ်ကောင်စီတပ် အရာရှိနှစ်ဦးကို ပုသိမ်မြို့သို့သယ်ဆောင်သွားပြီး အခင်းဖြစ်ပွားရာနေရာရှိ လုံခြုံရေးကင်းတဲများကို စစ်ကောင်စီတပ်ဖွဲ့ဝင်များက မိုးကာများဖြင့်ဖုံးအုပ်ထားကြောင်း ဒေသခံများက ပြောသည်။

ဧရာဝတီတိုင်းအတွင်း စစ်ကောင်စီလက်အောက်ခံတပ်ဖွဲ့ဝင်အချင်းချင်း ပစ်ခတ်မှုသည် ကိုးရက်အတွင်း နှစ်ကြိမ်ဖြစ်ပွားခြင်းဖြစ်သည်။ပြီးခဲ့သည့် ဇွန်လ ၂၇ ရက်က ဧရာဝတီတိုင်း၊ ဟင်္သာတမြို့၊ အမှတ် (၂) နယ်မြေရဲစခန်းတွင် ရဲတပ်ဖွဲ့ဝင်နှစ်ဦး စကားများရန်ဖြစ်ရာမှ အချင်းချင်း ပစ်ခတ်မှုဖြစ်ပွားပြီး ရဲတပ်သားနေလင်းဆိုသူ သေဆုံးခဲ့သည်ဟု သိရသည်။

စာတည်း - မောင်ကြီး

#mizzima
#မအူပင်မြို့
#ပစ်ခတ်မှု
#စစ်ကောင်စီတပ်အရာရှိနှစ်ဦး
#သေဆုံး
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မြင်းခြံမြို့နယ်တွင် ကြံ့ခိုင်ရေးပါတီ၀င် ကျေးရွာအုပ်ချုပ်ရေးမှူးသားအဖ ပစ်ခတ်ခံရ၍ သေဆုံး
====================

007
(မဇ္စျိမ) ။ ။မန္တလေးတိုင်း၊ မြင်းခြံမြို့နယ်၊ နဘူးအိုင်ကျေးရွာအုပ်စု၊ ရွှေပေါ်ကျွန်းကျေးရွာတွင် အုပ်ချုပ်ရေး မှူးနှင့်သားဖြစ်သူတို့ ဇူလိုင်လ ၃ ရက်နေ့ နံနက်ပိုင်းက သေနတ်ဖြင့်ပစ်ခတ်ခံရ၍ သေဆုံးသွားကြောင်း သတင်းရရှိသည်။

“မနက်အစောကြီးရှိသေးတယ် အိမ်ထဲအထိ ၀င်ပစ်သတ်သွားတာ၊ ၀င်လာတာတွေ့လို့ တံခါးထပိတ်တာ ကို ပြတင်းပေါက်ကနေတက်လာပြီး ပစ်သွားတာ၊ ဒလန်သားအဖဆိုပြီး ပစ်သွားတာ၊ အုပ်ကြီးက ကြံ့ခိုင် ရေး(ပါတီ)ကနေ စစ်တပ်ခေတ်(အာဏာသိမ်းပြီးနောက်)မှာ အုပ်ကြီးဖြစ်လာတာပါ" ဟု ဒေသခံတဦးက ပြောသည်။

အသက် ၅၆ နှစ်အရွယ် အုပ်ချုပ်ရေးမှူး ဦးသန်းထွန်းအောင်နှင့် အသက် ၁၈ နှစ်အရွယ် သားဖြစ်သူ ကို၀ဏ္ဏအောင်တို့သည် မိသားစုနှင့်အတူနေအိမ်အတွင်းရှိနေစဉ် ဆိုင်ကယ်သုံးစီးဖြင့် ရောက်လာသော လူခြောက်ဦးက သေနတ်များဖြင့် ၀င်ရောက်ပစ်ခတ်သွားခြင်းဖြစ်ကြောင်း သိရသည်။

ပစ်ခတ်မှုကြောင့် ဦးသန်းထွန်းအောင်တွင် ဝဲဘက်လက်ကောက်၀တ် ဖောက်ထွက်ဒဏ်ရာ၊ ဝဲဘက်၀မ်း ဗိုက်ဖောက်၀င်ဒဏ်ရာ၊ ယာဘက်၀မ်းဗိုက် ဖောက်၀င်ဒဏ်ရာ၊ ဝဲပုခုံးဖောက်၀င်ဒဏ်ရာ၊ ယာပုခုံး ပွင့်ထွက် ဒဏ်ရာတို့ဖြင့်လည်းကောင်း၊ ကို၀ဏ္ဏအောင်တွင် ဝဲဘက်မျက်လုံးဘေး ဖောက်၀င်ဒဏ်ရာ ၊ ယာဘက်နား ထင် ဖောက်ထွက်ဒဏ်ရာတို့ဖြင့်လည်းကောင်း အခင်းဖြစ်နေရာတွင်ပင် သေဆုံးခဲ့ကြောင်း မန္တလေးတိုင်း ရဲတပ်ဖွဲ့နှင့် နီးစပ်သည့်အသိုင်းအဝိုင်းမှ သိရသည်။

ယခုပစ်ခတ်မှုအား မည်သည့်အဖွဲ့အစည်းက ပစ်ခတ်သွားခြင်းဖြစ်ကြောင်း မသိရသေးသော်လည်း စစ်‌ ကောင်စီ၏ ဝါဒဖြန့်မီဒီယာနှင့် တယ်လီဂရမ်ချန်နယ်များတွင် PDF က ပစ်သတ်သွားခြင်းဖြစ်ကြောင်း ဖော်ပြကြသည်။

ဇွန်လ ၂၃ ရက် ညပိုင်းကလည်း မန္တလေးမြို့၊ ချမ်းမြသာစည်မြို့နယ်၊ ကျွန်းလုံးဥသျှောင်ရပ်ကွက်တွင် ရာအိမ်မှူးဦးမြတ်ထူးနှင့် သားဖြစ်သူ ကိုရဲမြင့်မိုရ်ထူးတို့ နေအိမ်တွင်အတူရှိနေစဉ် သေနတ်သမားသုံးဦး က ၀င်ရောက်ပစ်ခတ်သွားသည့်ဖြစ်စဉ် ဖြစ်ပွားခဲ့သေးသည်။
အဆိုပါပစ်ခတ်မှုကြောင့် ရာအိမ်မှူး ပွဲချင်းပြီးသေဆုံးပြီး သားဖြစ်သူမှာ ပြင်းထန်ဒဏ်ရာဖြင့် ဆေးရုံတက် ရောက်၍ ကုသမှုခံယူထားရကြောင်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#မန္တလေးတိုင်း
#မြင်းခြံမြို့နယ်
#အုပ်ချုပ်ရေးမှူး
#ပစ်ခတ်မှု
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ဇူလိုင်ပထမပတ်အတွင်း ရန်ကုန်၌ လူငယ် အယောက် ၂၀ ကျော် ဖမ်းဆီးခံရ
====================

ဂန္ဒမာ
(မဇ္ဈိမ)။ ။ဇူလိုင်လပထမပတ်အတွင်း ရန်ကုန်မြို့တွင် လူငယ် ၂၀ ဦးကျော် စစ်ကောင်စီတပ်၏ ဖမ်းဆီး ခြင်းကိုခံခဲ့ရကြောင်း မြေပြင်သတင်းရင်းမြစ်များ၏ ပြောပြချက်အရ သိရသည်။

“ဒီလ ရန်ကုန်မှာ လူငယ်တွေအနေနဲ့ အထူးသတိထားဖို့လိုပါတယ်။ စစ်ကောင်စီတပ်သားတွေက အပြစ်မဲ့ ပြည်သူတွေကို ဖမ်းဆီးစစ်ဆေးပြီး နှိပ်စက်မှုတွေလည်း ရန်ကုန်မှာလုပ်နေတယ်” ဟု သတင်းရင်းမြစ်က ပြောသည်။

ဇူလိုင်လ ပထမပတ် လေးရက်အတွင်း မင်္ဂလာဒုံ ၊ ကမာရွတ် ၊ တောင်ဒဂုံ ၊ ကြည့်မြင်တိုင်၊ ရွှေပြည်သာ မြို့နယ်တို့တွင် လူငယ်အချို့သည် စစ်ကောင်စီတပ်၏ဖမ်းဆီးခြင်းကိုခံခဲ့ရသည်။
ဇူလိုင်လ ၃ ရက်နေ့က ရွှေပြည်သာမြို့နယ်၊ အ.လ.က(၉) အနီးတွင် “ကျောင်းသားထုသွေးနှင့်ရေးသော ၇. ၇. ၁၉၆၂ ကိုမမေ့ကြနဲ့” ဟူသော စာသားပါ ဘန်နာအားချိတ်ဆွဲနေစဉ် အရပ်ဝတ် စစ်ကောင်စီတပ်သား များမှဖမ်းဆီးရာ အမျိုးသမီးတဦးနှင့် အမျိုးသားတဦးဖမ်းဆီးခံရကြောင်း သိရသည်။

ဇူလိုင်လ ၁ ရက်နေ့ကလည်း ကမာရွတ်မြို့နယ်၊ အင်းစိန်လမ်းမပေါ် စံရိပ်ငြိမ်(၁)လမ်းအနီးတွင် စစ်ကောင်စီတပ်မှ လှည့်ကင်းပတ်နေစဉ် ခေါ်ယူစစ်ဆေးရာမှ အသက် ၂၄ နှစ်အရွယ် ကိုဉာဏ်လင်းထက် ဆိုသူ ဖမ်းဆီးခံခဲ့ရသည်။

ကိုဉာဏ်လင်းထက်မှာ ရန်ကုန်တက္ကသိုလ်မှ မြန်မာစာကျောင်းသားတဦးဟု သိရသော်လည်း ရန်ကုန် တက္ကသိုလ်၊ ကျောင်းသားသမဂ္ဂအားမေးမြန်းရာတွင် ပြန်လည်ဖြေကြားခြင်း မရှိသေးပေ။

အလားတူ ဖမ်းဆီးခံရသူအများစုမှာ လမ်းသွားလမ်းလာ အရပ်သားပြည်သူများဖြစ်ကြပြီး တော်လှန်ရေး နှင့် ပတ်သက်သည့်အချက်အလက်များမရှိပါကလည်း ပြန်လည်လွှတ်ပေးခြင်းမရှိဘဲ ငွေပေးပြီး ပြန်လည် ရွေးယူခိုင်းမှုများရှိကြောင်း တော်လှန်ရေးအင်အားစုတခုကပြောသည်။

စစ်ကောင်စီတပ်အနေဖြင့် ရန်ကုန်မြို့ပေါ်တွင် လူငယ်များကိုပစ်မှတ်ထားကာ ဖမ်းဆီးစစ်ဆေးမှုများ ပြုလုပ်နေသကဲ့သို့ ညအချိန်တွင်လည်း သာကေတ၊ လှိုင်၊ တောင်ဒဂုံနှင့် စမ်းချောင်းမြို့နယ်တို့တွင် ရှောင်တခင် ဧည့်စာရင်းစစ်ဆေးမှုများပြုလုပ်နေကြောင်း သိရသည်။

စာတည်း ။။ Alden
စာမူတည်းဖြတ်။ ။စောဖေ

#ဇူလိုင်လ
#ရန်ကုန်မြို့
#လူငယ်
#ဖမ်းဆီးခံရ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မြင်းခြံထောင်တွင် နှိပ်စက်ခံရသည့် ဒဏ်ရာများဖြင့် နိုင်ငံရေးအကျဉ်းသား သေဆုံး
====================

001
(မဇ္စျိမ) ။ ။ မန္တလေးတိုင်း ၊ မြင်းခြံအကျဉ်းထောင်တွင် နိုင်ငံရေးပုဒ်မဖြင့် တရားစွဲဆိုခံရသည့် အသက် ၄၃ နှစ်အရွယ် မန်ကျည်းစုရွာသား ဦးစိန်ဝင်းသည် ညှဥ်းပန်းနှိပ်စက်ခံရသည့် ဒဏ်ရာများဖြင့် သေဆုံးသွားကြောင်း မိသားစုနှင့် နီးစပ်သူများထံမှ သိရသည်။

ဦးစိန်ဝင်းသည် အစာအိမ်သွေးကြောပေါက်ပြီး သေဆုံးသွားကြောင်း အကျဉ်းထောင်ဘက်က မိသားစုထံသို့ ပြီးခဲ့သည့် ဇူလိုင်လ ၂ ရက်နေ့တွင် အကြောင်းကြားလာခြင်းဖြစ်ကြောင်း မိသားစုနှင့် နီးစပ်သူတစ်ဦးက မဇ္စျိမကို ပြောသည်။

“အလောင်းတော့ မပေးဘူး။ သူတို့ပဲ သင်္ဂြိုဟ်ပြီးတော့ ဒီက မိသားစုဝင်တွေကိုတော့ ခေါ်တယ်။ သွားကြည့်တဲ့အခါမှာတော့ ရင်ခွဲရုံမှာ ရင်ခွဲပြီး ပြန်ချုပ်ထားတာတွေ့ခဲ့ရတယ်။ ညာဘက်လက်မောင်းနဲ့ လည်ပင်းမှာတော့ ညိုမဲဒဏ်ရာတွေ ရှိတယ်”ဟု ၎င်းက ပြောသည်။
စစ်ကောင်စီတပ်ဖွဲ့က ပြီးခဲ့သည့် ၂၀၂၂ခုနှစ်အတွင်းက ၎င်းအား ပြည်သူ့ကာကွယ်ရေးတပ်ဖွဲ့ဝင်( PDF )များနှင့် ဆက်နွယ်သည်ဟူသော စွပ်စွဲချက်ဖြင့် ကျေးရွာအတွင်း လာရောက်ဖမ်းဆီးသွားခြင်းဖြစ်ပြီး ပုဒ်မ ၅၀၅(က) ဖြင့် တရားစွဲကာ ထောင်ဒဏ် သုံးနှစ် ချမှတ်ခဲ့ခြင်းဖြစ်ကြောင်း သိရသည်။

ဦးစိန်ဝင်းသည် သာမာန်ရွာသားတစ်ဦးသာဖြစ်ပြီး ကျန်းမာရေးကောင်းမွန်ကာ ရောဂါအခံလည်း မရှိကြောင်း မိသားစုနှင့် နီးစပ်သူများက ပြောသည်။

“သူကတော့ မြင်းခြံထောင်မှာ နှိပ်စက်ခံရတဲ့ အကျဉ်းသားတွေထဲမှာ ပါတယ်။ တော်တော်လေးကို ဆိုးဆိုးရွားရွား နှိပ်စက်ခံရတာ။ သူနဲ့အတူ နောက်ထပ် သုံး၊ လေး၊ ငါးဦးရှိတယ်လို့ ပြောတယ်။ ထောင်ကနေ ခေါ်ထုတ်ခံရတဲ့အထဲတော့ မပါဘူး။ သီးသန့်ထောင်မှာ ရိုက်တာ။ ဒါ ထောင်ကရိုက်တာ”ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် PPN တာဝန်ရှိသူ ကိုသိုက်ထွန်းဦးက ပြောသည်။

စာတည်း။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)

#မန္တလေးတိုင်း
#မြင်းခြံမြို့နယ်
#နိုင်ငံရေးအကျဉ်းသား
#စစ်ကောင်စီ
#အကျဉ်းထောင်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​စစ်ကောင်စီအပေါ်ချမှတ်ထားတဲ့ အရေးယူမှုပုံစံကို အီးယူ ပြန်သုံးသပ်ဖို့လိုနေပြီလား
=======================

စစ်ကောင်စီလက်ထက် လူ့အခွင့်အရေးချိုးဖောက်ခံရမှုတွေထဲမှာ အလုပ်သမားအခွင့်အရေးချိုးဖောက်ခံရမှုက လည်း ထိပ်ဆုံးမှာရှိနေခဲ့ပါတယ်။ စစ်ကောင်စီ အလိုလိုက် အကြိုက်ဆောင်နေတဲ့ လုပ်ငန်းရှင်အများစုဟာ အလုပ် သမားအခွင့်အရေးချိုးဖောက်မှုတွေကို အများဆုံးကျူးလွန်နေခဲ့တာပါ။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

National Unity Government (NUG)၏ PVTV Channel မှ ၂၀၂၃ ခုနှစ် ဇူလိုင်လ ၄ ရက်ထုတ်လွှင့်မှုများ
==================

https://youtu.be/R12LjV1VXj4

​​မန္တလေးတွင် Night Club/Bar မွ ပြန်လာသူများအား ဖမ်းဆီးငွေညှစ်ခြင်းများရှိနေဟုဆို
=======================

007
(မဇ္စျိမ)။ ။ မန္တလေးမြို့တွင်၊ ညအချိန် Night Club နှင့် Bar များမှပြန်လာသူများအား၊ ကားဖြင့်လိုက်ဖမ်းပြီးငွေညှစ်သည့်ဖြစ်စဉ်များ ယခုရက်ပိုင်းဖြစ် ပွားနေကြောင်း ကိုယ်တိုင်ကြုံတွေ့ခဲ့ကြသူူများထံသိရသည်။

ဘားကေန ကျွန်တော်တို့ထွက်လာတော့၊ လူနှစ်ယောက်က လမ်းလယ်ထွက်လာပြီး တားတယ်၊ မင်းတို့ ညဘက်မထွက်ရဘူးဆိုတာ မသိဘူးလား ဘာပုဒ်မနဲ့အရေးယူမယ်ဘာညာဆိုပြီး၊ ငွေညှိခိုင်းတယ်၊ ငါးသိန်းတောင်းတယ်၊ ကျွန်တော်တို့ သုံးသိန်းနဲ့ဖြတ်ခဲ့ရတယ် ဟု ဇူလိုင်လ ၂ ရက်နေ့ညက ကိုယ်တိုင်ကြုံတွေ့ခဲ့သည့်ဖြစ်စဉ်နှင့်ပတ်သက်၍ မြို့ခံတစ်ဦးကပြောသည်။

ထိုဖြစ်စဉ်သည်၊ အောင်မြေသာစံမြို့နယ် ၂၆ လမ်းနှင့် ၅၈ လမ်းထောင့်အနီးတွင်ဖြစ်ပွားခဲ့ခြင်းဖြစ်ပြီး၊ ယနေ့အထိဖမ်းဆီးငွေညှစ်ခံရသူ ၄ ဦးထက်မနည်းရှိနေပြီဖြစ်ကြောင်း သိရသည်။
အရင်လတွေတုန်းကတော့၊ တစ်ညလုံးဖွင့်ထားပေးလို့ရတော့ အမ်ားစုက ညဘက်မပြန်ကြဘူး၊ တစ်ညလုံးကလပ်ထဲမှာပဲပျော်ကြပြီး မနက်မှပြန်တယ်၊ တချို့လည်း ကလပ်နဲ့အနီးဆုံးဟိုတယ်တည်းခိုခန်းတစ်ခုထဲ၀င်အိပ်လိုက်ကြတယ်၊ ငွေညှစ်ခံရတဲ့ကိစ္စက ဒီနှစ်ရက်သုံးရက်မှာစကြားရတာပဲ၊ ကျွန်တော် သိရသလောက် လေးငါးခါလောက်ရှိပြီ ဟု လုံခြုံရေးအရအမည်မဖော်ပြလိုသည့် Night Club ၀န်ထမ်းတစ်ဦးကပြောသည်။

ကားဖြင့်ငွေလိုက်ညှစ်သည့်အဖွဲ့တွင် ယူနီဖောင်း၀တ်တစ်ဦးနှင့် အရပ်၀တ်တစ်ဦးအပြင်၊ ကားပေါ်တွင် အနည်းဆုံးနောက်ထပ်လူနှစ်ဦးခန့် ရှိမည်ဟုခန့်မှန်းရကြောင်း ကိုယ်တိုင်ကြုံတွေ့ခဲ့ရသူနောက်ထပ်တစ်ဦးအပြောအရသိရသည်။

ရုတ်တရတ်ဆိုတော့ ကျွန်တော်တို့လည်းကြောင်သွားတယ်၊ သူတို့ကသေနတ်တွေလည်းပါတယ်၊ လာလိုက်ခဲ့ဆိုပြီး၊ အောင်ပင်လယ်ကန်ပတ်လမ်းဘက်ခေါ်သွားတယ်၊ ဟို ရောက်တော့မှ ငွေညှစ်တာမှန်းသိရတာ၊ လက်စွပ်တောင်းတော့ပေးလိုက်တယ်၊ ငွေငါးသိန်းထပ်တောင်းတယ်၊ ငွေမပါလို့ Kpay ပေးမယ်ဆိုတာမရဘူး၊ အဲဲဒါနဲ့ Bar ပြန်သွားပြီး ၀န်ထမ်းတစ်ယောက်ကိုအကူအညီတောင်း ပြီးဖြေရှင်းလိုက်ရတယ် ဟု ၎င်းကပြောသည်။

အဆိုပါကိစ္စနှင့်ပတ်သက်၍၊ Night Out ထွက်ပြီးပြန်လာသူများအား ငွေညှစ်တောင်းယူခြင်းကိုလက်သင့်မခံကြောင်း၊ နောက်နောင်ထပ် လုပ်လာလျှင် နယ်မြေအပိုင်ရဲစခန်းနာမည်နှင့်တကွ ထုတ်ဖော်ပြောဆိုသွားမည်ဖြစ်ကြောင်း စစ်အုပ်စု၏တယ်လီဂရမ်ချန်နယ်များက ဖော်ပြ ကြသည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင်လ (၅) ရက် ဗုဒ္ဓဟူးနေ့ မနက်ပိုင်း မဇ္ဈိမ ရေဒီယိုအစီအစဉ်
===================

ဒီကနေ့ မနက်နားဆင်ရမယ့် သတင်းတွေကတော့

ရွှေနဲ့ ဒေါ်လာဈေးကွက်က လုပ်ငန်းရှင်နဲ့ စီးပွားရေးသမား ၁၀၀ လောက်ကို စစ်တပ်က ထပ်မံ ဖမ်းဆီးနေတဲ့သတင်း
နဲ့အတူ ရန်ကုန်မြို့ရှိ နိုက်ကလပ်နှင့်ဘားတွေ ယာယီပိတ်ကြောင်း ထုတ်ပြန်လိုက်တဲ့သတင်းတွေပါဝင်တဲ့ နောက်ဆုံးရ ပြည်တွင်းသတင်းတွေ၊စီးပွားရေးသတင်းတွေနဲ့ ထိပ်တန်းရောက် နိုင်ငံတကာသတင်းတွေကို နားဆင်ကြရပါမယ်။

သတင်းတွေအပြီးမှာတော့ အပတ်စဉ်ကဏ္ဍတွေအနေနဲ့ “မရွှေမိုးရဲ့လေးညှို့သံ” အစီအစဉ်ကို နားဆင်ရမှာပါ။

https://youtu.be/fA3BP3GNWvk

#Morningradio
#mizzimaradio
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​လူထုထောက်ခံမှုအမြင့်ဆုံးရထားသည့် တော်လှန်ရေးကို စိတ်ပျက်အောင် အစိုးရအဖွဲ့ဝင်များ မလုပ်ကြရန် NUG ယာယီသမ္မတ သတိပေး
==========================

မဇ္စျိမ
လူထုထောက်ခံမှုအမြင့်ဆုံးရထားသည့် တော်လှန်ရေးကို စိတ်ပျက်အောင် အစိုးရအဖွဲ့ဝင်များ မလုပ်ကြရန် NUG ယာယီသမ္မတ ဒူဝါလရှီးလက အစိုးရအဖွဲ့ အစည်းအဝေးတွင် သတိပေးသည်။
" နွေဦးတော်လှန်ရေးဟာ အချိန်တိုအတွင်းမှာ ရှုပ်ထွေး ကျပ်တည်းတဲ့ ဖြစ်စဉ်ကို ဖြတ်သန်းနေရသလိုလည်း တွေ့နေမြင် နေရပါတယ်။

ဒါပေမယ့် လောလောဆယ်အားဖြင့် နွေဦးတော်လှန်ရေးအပေါ်မှာ လူထုရဲ့ ယုံကြည် ထောက်ခံမှု အမြင့်ဆုံး အခြေအနေကို ကျွန်တော်တို့ ရထားပါတယ်။ ကျွန်တော်တို့ အစိုးရအဖွဲ့ဝင်တွေဟာ လူထုစိတ်ပျက်အောင် မလုပ်သင့်သလို၊ အစိုးရအဖွဲ့ရဲ့ စွမ်းဆောင်ရည်တွေကိုလည်း ပြည်သူက ကိုးစားလာအောင် တင်ပြဖို့ တာဝန်ရှိ နေပါတယ်။ ဒါ့အပြင် လက်ရှိ အရှိပကတိနဲ့ မကင်းကွာတဲ့ ပြည်သူ မျှော်လင့်ချက်ကို ဖြစ်ထွန်းစေဖို့ လိုအပ်ပါတယ်" ဟု ယာယီသမ္မတ က ပြောသည်။

Public Relations ဟုခေါ်သည့် ပြည်သူ့ဆက်ဆံရေး အလုပ်ဆိုသည်မှာ အင်မတန်သိမ်မွေ့သည့်အလုပ်ဖြစ် ကြောင်း၊ ပြည်သူရဲ့ သဘောထားဆန္ဒများကို အမြဲမပြတ် အကဲခတ် စောင့်ကြည့်ရသည့်အလုပ်ဖြစ် ကြောင်း ၎င်းက ပြောသည်။

" ပြည်သူ့ဆက်ဆံရေးအလုပ်တာဝန်တွေမှာ တတ်နိုင်သမျှ အမှားအယွင်း မဖြစ်အောင် သတိနဲ့ လုပ်ဆောင်စရာတွေ အမြောက်အမြား ရှိနေပါလိမ့်မယ်။ ဒါ့အပြင် လူထုရဲ့ မျှော်လင့် ချက်ကို တွန်းတင်ဖို့တာဝန်ရှိပြီး အကြမ်းဖက် စစ်ကောင်စီရဲ့ ဝါဒမှိုင်း ဖြန့်ကျက်မှုတွေကို တန်ပြန်တုံ့ပြန်နိုင်တဲ့ လုပ်ငန်းတွေကို လုပ်ဆောင်ဖို့ လိုပါတယ်။ ဒါ့အပြင် နိုင်ငံတကာ အသိုင်းအဝိုင်းရဲ့ အမြင်သဘောထားဟာ နွေဦးတော်လှန်ရေးအပေါ်မှာ အပြုသဘောဆောင်တဲ့ အမြင်တွေ ဖြစ်ထွန်းအောင် လုပ်ဆောင်ဖို့ လိုအပ်ပါတယ်" ဟု ယာယီသမ္မတက ပြောသည်။

အစိုးရအဖွဲ့ဝင်များအနေဖြင့် လူထု၏ မျှော်လင့်ချက်များကို ကာယကံ မြောက် ဖြည့်ဆည်းပေးနိုင်ရန် လုံ့လစိုက်ထုတ်ကြရန် ယာယီသမ္မတက တိုက်တွန်းသည်။

" စမတ်ကျသော ပြည်သူ့ဆက်ဆံရေး ကျင့်ထုံးတွေနဲ့ / လူထုနဲ့ အစိုးရအကြားက ယုံကြည်မှုကို တိုးသထက် တိုးအောင် လုပ်ဆောင်ပေးဖို့ ကျွန်တော့် အနေနဲ့ အထူး မေတ္တာရပ်ခံ ချင်ပါတယ်" ဟု ယာယီသမ္မတ ဒူဝါလရှီးလက ပြောသည်။

အစည်းအဝေးတွင် ချင်းပြည်နယ်အတွင်းရှိ တော်လှန်ရေး တပ်ဖွဲ့များ၏ လုပ်ဆောင်မှုများကို အထူးဂုဏ်ယူဝမ်း မြောက် ကြောင်း ယာယီသမ္မတက ပြောသည်။

မဇ္ဈိမအတွက် ဗွီအိုအေ သတင်းလွှာ၊ ဇူလိုင်လ ၅ ရက်၊ ၂၀၂၃ | VOA On Mizzima
=====================

အမေရိကန်သမ္မတဟောင်း Donald Trump ဟာ သမ္မတရွေးကောက်ပွဲမှာ ပြန်လည်ယှဉ်ပြိုင်ဖို့ မဲဆွယ်စည်းရုံးပွဲတွေ စကျင်းပနေပြီ။ အမေရိကန်အထက်တန်းကျောင်းတွေမှာ ကရင်ဘာသာစကား သင်ယူနိုင်တော့မှာ ဖြစ်ပါတယ်။ ဒီလို စိတ်ဝင်စားစရာ နိုင်ငံတကာသတင်းဆောင်းပါးတွေနဲ့ နောက်ဆုံးရ ငွေကြေးဈေးကွက် သတင်းတွေကို ၂၀၂၃ ခုနှစ်၊ ဇူလိုင်လ ၅ ရက်၊ မဇ္ဈိမအတွက် ဗွီအိုအေ အစီအစဉ်မှာ ကြည့်ရှုနိုင်ပါတယ်။

https://youtu.be/cWoOyslCukQ

#VOA
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

လာမယ့် အမေရိကန် သမ္မတရွေးကောက်ပွဲ မဲဆွယ်မှုတွေ စတင် | VOA On Mizzima
====================

အမေရိကန်သမ္မတဟောင်း Donald Trump ဟာ သမ္မတရွေးကောက်ပွဲမှာ ပြန်လည်ယှဉ်ပြိုင်ဖို့ မဲဆွယ်စည်းရုံးပွဲတွေ စကျင်းပနေပြီ။ ၂၀၂၀ ရွေးကောက်ပွဲမှာ သူ့ကို နိုင်သွားတဲ့ လက်ရှိ သမ္မတ Joe Biden ကို ဖယ်ရှားပစ်မယ်လို့ ပြောဆိုနေပါတယ်။ ဒါပေမဲ့လည်း ရီပတ်ဗလစ်ကန်ပါတီမှာ ပါတီတွင်း သမ္မတလောင်း ယှဉ်ပြိုင်မယ့်သူကလည်း များလာတဲ့အတွက် Donald Trump အနေနဲ့ Joe Biden ကို မယှဉ်ပြိင်ခင် ပါတီတွင်းက ပြိုင်ဖက်တွေကို အရင်အနိုင်ရဖို့ လိုပါတယ်။ ရီပတ်ဗလစ်ကန် ပါတီတွင်း သမ္မတလောင်း ယှဉ်ပြိုင်မယ့်သူ တော်တော်များများက သမ္မတဟောင်း Trump ကို ဝေဖန်တိုက်ခိုက်ဖို့ တွန့်ဆုတ်နေတာကြောင့် Trump အနိုင်ရအောင် အခွင့်အရေးပေးသလိုလည်း ဖြစ်နေတဲ့အကြောင်း Steve Herman သတင်းပေးပို့ထားတာကို ကိုသိန်းထိုက်ဉီး တင်ဆက်ပေးနေပါတယ်။

https://youtu.be/0m1XDVCkuy4

#VOA
#mizzimatv
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ဒေါ်အောင်ဆန်းစုကြည်၏ ကိုယ်ရံတော်တပ်ဖွဲ့ခေါင်းဆောင် ရဲအုပ်ပြည့်ဖြိုးနိုင် ပြန်လည်လွတ်မြောက်
=====================

001
(မဇ္စျိမ)။ ။နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ကိုယ်ရံတော်တပ်ဖွဲ့ခေါင်းဆောင် ရဲအုပ် ပြည့်ဖြိုးနိုင် ယနေ့ ဇူလိုင်လ ၅ ရက် နံနက်ပိုင်းတွင် ရမည်းသင်းအကျဉ်းထောင်မှ ပြန်လည်လွတ်မြောက် လာကြောင်း ၎င်းနှင့်နီးစပ်သည့် အသိုင်းအဝိုင်းထံမှ သိရသည်။

ရဲအုပ်ပြည့်ဖြိုးနိုင်မှာ ရဲစည်းကမ်းထိန်းသိမ်းရေးဉပဒေပုဒ်မဖြင့် တရားစွဲခံရပြီး ထောင်ဒဏ်သုံးနှစ် ချမှတ် ခံခဲ့ရကာ လွတ်ရက်စေ့၍ ပြန်လည်လွတ်မြောက်လာခြင်းဖြစ်ကြောင်း နီးစပ်သူများက ပြောသည်။

“အခုတော့ အိမ်ကိုပြန်နေပြီ။ သူက လွတ်ရက်စေ့နဲ့လွတ်တာ။ ရဲစည်းကမ်းဖောက်ဖျက်မှုနဲ့ ထောင်သုံးနှစ် ကျထားတာ” ဟု အကျဥ်းထောင်နှင့် နီးစပ်သူတဦးကပြောသည်။

ရဲအုပ်ပြည့်ဖြိုးနိုင်မှာ ထောင်စည်းမျဥ်းအရ သတ်မှတ်ထားသည့် လျှော့ရက်ကိုသာရရှိပြီး အထူးလျှော့ရက် မရရှိကြောင်း တရားရုံးနှင့် နီးစပ်သူတဦးကလည်း မဇ္စျိမကို ပြောသည်။

“သူက တနှစ်ကိုဘယ်လောက်၊ တလကိုဘယ်လောက်ရမယ်။ အဲ့ဒီလျှော့ရက်ပဲ၊ ထောင်စည်းမျဥ်းကသတ် မှတ်တဲ့ဟာပဲရတာ။ ကျန်တာရလို့မဟုတ်ဘူး။ အဲဒီလိုတော့ သိရတယ်” ဟု ဆိုသည်။
စစ်အာဏာသိမ်းပြီးနောက် နိုင်ငံတော်အတိုင်ပင်ခံပုဂ္ဂိုလ်၏ ကိုယ်ရံတော်တပ်ဖွဲ့တွင် တာဝန်ထမ်းဆောင် သည့် ဒုရဲအုပ်ချယ်ရီထက်နှင့် လုံခြုံရေးအရာရှိ ဦးအောင်နိုင်ဦးတို့လည်း ဖမ်းဆီးထောင်ချခံထားရသည်။

ဒုရဲအုပ်ချယ်ရီထက်မှာ ရဲစည်းကမ်းထိန်းသိမ်းရေးဉပဒေ၊ ပုဒ်မ ၅၀၅(က) စသည်တို့ဖြင့် ထောင်ဒဏ် ငါး နှစ်ချမှတ်ခံထားရကာ ဦးအောင်နိုင်ဦးမှာလည်း အကြမ်းဖက်မှုတိုက်ဖျက်ရေးဉပဒပုဒ်မ ၅၂ (က)၊ နိုင်ငံ တော်လျှို့ဝှက်ဉပဒေပုဒ်မ ၃(၁)(ဂ) တို့ဖြင့် ထောင်ဒဏ် ၁၅ နှစ်ချမှတ်ခံရပြီး ရမည်းသင်းအကျဉ်းထောင် တွင် ထိန်းသိမ်းခံထားရသည်။

ရမည်းသင်းအကျဉ်းထောင်တွင် NLD အစိုးရလက်ထက် နေပြည်တော်မြို့တော်ဝန် ဒေါက်တာမျိုးအောင်၊ ဒုတိယမြို့တော်ဝန်ဦးရဲမင်းဦးနှင့် ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီး ဦးမင်းသူ တို့လည်း အကျဥ်းကျခံနေရသည်။

နိုင်ငံရေးအကျဥ်းသားများ ကူညီစောင့်ရှောက်ရေးအသင်း(AAPP)၏ ထုတ်ပြန်ချက်အရ ၂၀၂၁ ခုနှစ် အာဏာသိမ်းချိန်မှ ၂၀၂၃ ခုနှစ်၊ ဇူလိုင်လ ၄ ရက်နေ့ထိ ဖမ်းဆီးခံခဲ့ရသူ စုစုပေါင်း ၂၃,၆၇၄ ဦးရှိပြီး ထို အထဲမှ ၁၉,၃၁၁ ဦးမှာ ထိန်းသိမ်းခံနေရဆဲဖြစ်ကြောင်း သိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#နိုင်ငံတော်အတိုင်ပင်ခံပုဂ္ဂိုလ်
#ကိုယ်ရံတော်တပ်ဖွဲ့
#ရဲအုပ်ပြည့်ဖြိုးနိုင်
#ရမည်းသင်းအကျဉ်းထောင်

ဓာတ်ပုံ- ဒေါ်အောင်ဆန်းစုကြည်နှင့် ကြည့်နေသူသည် လွတ်မြောက်လာသော ရဲအုပ်ပြည့်ဖြိုးနိုင် ဖြစ်သည်။
---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

အမေရိကန်အထက်တန်းကျောင်းမှာ ကရင်ဘာသာစကား သင်ယူနိုင် | VOA On Mizzima
=====================

အမေရိကန်ပြည်ထောင်စု အထက်တန်းကျောင်းတွေမှာ အင်္ဂလိပ်စာအပြင် သက်ဆိုင်ရာ မိခင် ဘာသာစကားသင်ကြားပေးတဲ့ အစီအစဉ် ၁၆၀၀ လောက် ရှိပါတယ်။ အမေရိကန်ပြည်နယ် ၁၃ ပြည်နယ်နဲ့ ဝါရှင်တန်ဒီစီမှာ သက်ဆိုင်ရာ လူမျိုးအလိုက် မိခင်ဘာသာစကား သင်ကြားပေးသူတွေထဲမှာ အခုဆိုရင် မင်နီဆိုးတာပြည်နယ်မှာ ကရင်ဘာသာနဲ့ သင်ကြားပေးမယ့် အစီအစဉ်လည်း ပါဝင်လာပါတယ်။ မိခင်ဘာသာစကားမပျောက်ပျက်အောင်နဲ့ ရိုးရာယဉ်ကျေးမှုအမွေထိန်းသိမ်းဖို့ အခက်အခဲကြားထဲကနေ ဖြစ်မြောက်အောင် စီစဉ်ခဲ့တာလို့ တာဝန်ရှိသူတွေက ပြောပါတယ်။ ကိုအောင်အောင် တင်ပြပေးထားပါတယ်။

https://youtu.be/ve9ERJ7IERA

#VOA
#mizzimatv
---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင်လ ၅ ရက်နေ့ မနက်ပိုင်း ၁၁ နာရီထိ နောက်ဆုံးရ ငွေစျေး၊ ရွှေစျေး၊ စက်သုံးဆီစျေး၊ စားအုန်းဆီစျေး
===================

https://youtu.be/bciNJ1mY95A