မယ်စဲ့မြို့နယ် တောအတွင်းသို့ ထပ်မံတိမ်းရှောင်လာရသည့် စစ်ဘေးရှောင် ၂,၀၀၀ ခန့်အတွက် အရေး ပေါ် အမိုးအကာများ လိုအပ်နေ
==================

ဂျူချန်း
(မဇ္ဈိမ)။ ။ကရင်နီပြည်နယ်၊ မယ်စဲ့မြို့နယ်၊ ကျောက်စုကျေးရွာအနီး တောအတွင်းသို့ ဘော်လခဲမြို့နယ်မှ ဒေသခံ ၂,၀၀၀ ခန့် ထပ်မံတိမ်းရှောင်လာရကာ အမိုးအကာနှင့် ခြင်ထောင်များ အရေးပေါ် လိုအပ်လျက်ရှိ ကြောင်း စစ်ဘေးရှောင်များအား ကူညီဆောင်ရွက်ပေးနေသူများထံမှ သိရသည်။

“ဒီနှစ်ရက်၊ သုံးရက်မှာမှ ရှောင်လာကြတဲ့ အဖွဲ့တွေပါ။ တောထဲ သစ်ပင်တွေအောက်မှာ နေ နေကြရတော့ အမိုးအကာ အရေးပေါ်လိုအပ်တယ်ဗျ။ ပြီးတော့ ဖြုတ်တွေတအားကိုက်တာ။ ခြင်ထောင်မဟုတ်ဘူးဆို ရင်တောင် ခြင်ဆေးပေါ့ အဲဒီနှစ်မျိုး အဓိကလိုအပ်တယ်။ စားနပ်ရိက္ခာကတော့ တပတ်စာလောက်ပါလာ ကြတယ်။ တပတ်ကျော်ရင်တော့ စားနပ်ရိက္ခာပြတ်ပါပြီ” ဟု စစ်ရှောင်များအား ကူညီဆောင်ရွက်ပေးနေ သည့် ဦးဖိုးဇော်ကမဇ္ဈိမကို ပြောသည်။

မယ်စဲ့သည် ငှက်ဖျားအဖြစ်များသည့်ဒေသဖြစ်သောကြောင့် ခြင်ထောင်၊ ခြင်ဆေးနှင့် ဆေးဝါးများလည်း အဓိက လိုအပ်နေပြီး မိုးတွင်းကာလဖြစ်၍ အမိုးအကာများလည်း လိုအပ်လျက်ရှိကြောင်း သိရသည်။

ကရင်နီပြည်နယ်တွင် ဘော်လခဲ၊ ဖားဆောင်း၊ ရွာသစ်နှင့် မယ်စဲ့မြို့နယ်တို့၌ တိုက်ပွဲပြင်းထန်လျက်ရှိပြီး ဒေသခံများအနေဖြင့် စစ်ဘေးလွတ်ကင်းနိုင်မည့် လွိုင်ကော်မြို့နယ်၊ မော်ချီးဒေသ၊ မယ်စဲ့မြို့နယ်၊ ကျောက်စုရွာဘက်နှင့် ထိုင်းနိုင်ငံအတွင်းသို့ တိမ်းရှောင်နေကြရကြောင်း သိရသည်။

“ထိုင်းနဲ့ကပ်နေတဲ့ BP14 ဘက်ကို ထွက်ပြေးမယ်ဆိုရင်တော့ ဟိုဘက်က အကူအညီရလိမ့်မယ်။ သို့သော် မော်ချီးဘက်ရောက်သွားတဲ့အဖွဲ့တွေကတော့ တော်တော်ဒုက္ခရောက်လိမ့်မယ်။ အဲဒီမှာလည်း စစ်ရှောင် ၅,၀၀၀ လောက်ရှိမယ်။ ကျောက်စုကတော့ အလှူရှင်လုံးဝကို မရှိတာ။ သွားလို့လည်းမရဘူး။ ကလေး တွေတော့ အများဆုံးပဲ” ဟု ဦးဖိုးဇော်က ပြောသည်။

ကောက်ယူရရှိထားသည့် စာရင်းများအရ ဘော်လခဲမြို့နယ် ရေကျော်ချောင်း၊ နန်းမဆွပ်၊ လွိုင်ဟူးဟန်း၊ ပန်မခူ၊ ဟွေပါဆူ၊ ထွန်းယောင်း၊ နတ်စင်၊ နမ့်ဟူး၊ နန့်ပိန့်လိင်၊ စုကျက်ချောင်း၊ ဆွတ်ဖ စသည့် ကျေးရွာ များမှ ဒေသခံ ၁,၉၃၀ ဦး သည် မယ်စဲ့မြို့နယ်၊ ကျောက်စုကျေးရွာ တောအတွင်းသို့ စစ်ဘေးတိမ်းရှောင် လာရကာ ထိုအထဲတွင် အမျိုးသမီး ၉၂၅ ဦး နှင့် သံဃာငါးပါးပါဝင်ပြီး စစ်ရှောင်အရေအတွက်သည် ဆက် လက်တိုးလာနေဆဲဖြစ်ကြောင်း သိရသည်။

ကရင်နီပြည်နယ် သံလွင်မြစ်အရှေ့ခြမ်းရှိ မယ်စဲ့၊ ဖားဆောင်း၊ ဘော်လခဲနှင့် ရွာသစ်မြို့များတွင် ပြီးခဲ့ သည့် ဇွန်လလယ်ပိုင်းမှစတင်ကာ စစ်ကောင်စီနှင့် တော်လှန်ရေး အင်အားစုများကြား တိုက်ပွဲဖြစ်ပွားခဲ့ရာ လက်ရှိအချိန်အထိ တိုက်ပွဲပြင်းထန်နေဆဲဖြစ်ကြောင်း ကရင်နီလူမျိုးပေါင်းစုံ လွတ်မြောက်ရေးတပ်ဦး (ကလလတ) ပြောရေးဆိုခွင့်ရှိသူထံမှ သိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#ကရင်နီပြည်နယ်
#စစ်ဘေးရှောင်
#မယ်စဲ့မြို့နယ်
#အရေးပေါ်အကူအညီ
#အမိုးအကာ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

တော်လှန်ရေးထောက်ပို့ဆောင်ရွက်နေတဲ့ မလေးရောက်မြန်မာများရဲ့ Clicker Team Malaysia
========================

(မဇ္ဈိမ)။ ။မလေးရှားနိုင်ငံမှာ အကြောင်းအမျိုးမျိုးကြောင့် ရောက်ရှိနေကြတဲ့ မြန်မာနိုင်ငံသားအချို့ဟာ Clicker Team Malaysia ကို တည်ထောင်ပြီး ထောက်ပို့တာ၀န် ထမ်းဆောင်နေကြပါတယ်။

Clicker Team Malaysia ဆိုတဲ့ ထောက်ပို့အဖွဲ့အစည်းကို ပြီးခဲ့တဲ့ ၂၀၂၂ ခုနှစ် အောက်တိုဘာလက စတင်ဖွဲ့စည်းခဲ့ကာ အဖွဲ့၀င် ၁၅၀ နီးပါး ပါ၀င်တယ်လို့ သိရပါတယ်။

Clicker Team Malaysia အနေနဲ့ မြေပြင်မှာတိုက်ပွဲ၀င်နေတဲ့ ရဲဘော်တွေရဲ့ လိုအပ်ချက်တွေကို ဖြည့် ဆည်းနိုင်ဖို့ တော်လှန်ရေးအောင်မြင်ပြီးဆုံးတဲ့အချိန်အထိ ထောက်ပို့တာ၀န်တွေကို ထမ်းဆောင်သွားမှာ ဖြစ်ကြောင်း သတင်းစကားပါးထားပါတယ်။

အာဏာသိမ်းပြီးနောက်ပိုင်းမှာ အွန်လိုင်းပလက်ဖောင်းတွေကနေတဆင့် ရှာဖွေနိုင်ခဲ့တဲ့ တော်လှန်ရေး ရန်ပုံငွေဟာ သိန်း ၉၀,၀၀၀ နီးပါးအထိ ရှိခဲ့ပြီဖြစ်တယ်လို့လည်း သိရပါတယ်။

တော်လှန်ရေးအတွက် ထောက်ပို့ဆောင်ရွက်ကြပုံအကြောင်းကို Clicker Team Malaysia က တာဝန်ရှိသူ နဲ့ ဆက်သွယ်မေးမြန်း တင်ဆက်ထားပါတယ်။

https://youtu.be/0I82fTeln0E

သတင်းနှင့်တင်ဆက် - ရောင်နီ

#နွေဦးတော်လှန်ရေး
#ထောက်ပို့
#Clicker Team Malaysia
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​မြဝတီမြို့အနီးတွင် စစ်ကောင်စီတပ်နှင့် တော်လှန်ရေးတပ်ဖွဲ့တို့ ထိတွေ့တိုက်ပွဲဖြစ်ပွားနေ
======================

သွင်ထူးဈာန်
ကော်သူးလေ(မဇ္ဈိမ)။ ။ကရင်ပြည်နယ်၊ မြဝတီမြို့၊ စိမ်းလဲ့မြိုင်ကားဝန်းအနီးတွင် ဇူလိုင်လ ၅ ရက်နေ့မှစတင် ကာ စစ်ကြောင်းထိုးလာသည့် စစ်ကောင်စီတပ်ဖွဲ့နှင့် ကော်ဘရာစစ်ကြောင်းတို့ ထိတွေ့တိုက်ပွဲဖြစ်ပွား နေကြောင်း ကော်ဘရာစစ်ကြောင်းတာဝန်ရှိသူထံမှ သိရသည်။

ယင်းတိုက်ပွဲတွင် စစ်ကောင်စီတပ်ဖွဲ့ဝင် သုံးဦးသေဆုံးခဲ့ပြီး ခမရ(၁၁၈)မှ ဗိုလ်မှူးတဦးနှင့် ဗိုလ်ကြီးတဦး အပါအဝင် ငါးဦး ထိခိုက်ဒဏ်ရာရရှိခဲ့သည်ဟု ၎င်းကပြောသည်။

ကော်ဘရာစစ်ကြောင်းမှ ရဲဘော်တဦးဒဏ်ရာရရှိကာ ဒရုန်းတစင်းနှင့် သေနတ်တလက်ပျက်စီးခဲ့ကြောင်း လည်း သိရသည်။
ထို့ပြင် ယမန်နေ့ ဇူလိုင်လ ၈ ရက်မှစတင်ကာ BGF တပ်ဖွဲ့များ ထိန်းချုပ်ထားသည့် လက်ခတ်တောင် အနီးဝန်းကျင်တွင်လည်း ထိတွေ့တိုက်ပွဲဖြစ်ပွားနေကြောင်း သိရသည်။

“မနေ့ကတည်းက အခုထိတိုက်ပွဲဖြစ်နေတယ် လက်နက်ကြီး လက်နက်ငယ်သံတွေ ကြားရတယ်။ စစ် ကောင်စီဘက်က သုံးယောက်သေတယ်၊ စနိုက်ပါထိတယ်လို့ကြားရတယ်”ဟု မြေပြင်သတင်းရင်းမြစ်၏ ပြောပြချက်အရ သိရသည်။

စစ်ကောင်စီတပ်ဖွဲ့၏ လက်နက်ကြီးပစ်ခတ်မှုများကြောင့် မဲကနယ်ဒေသ၊ ကျောက်မိုင်းဒေသမှ အရပ် သားထိခိုက်သေဆုံးမှုများလည်းရှိသည်ဟု သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#ကရင်ပြည်နယ်
#မြဝတီမြို့
#စစ်ကောင်စီတပ်
#တိုက်ပွဲဖြစ်ပွား
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ဟားခါး - ထန်တလန်အကြား ၆ ရက်တာ တိုက်ပွဲအတွင်း စစ်ကောင်စီတပ်သား ၂၀ သေဆုံးပြီး ၃၅ဦးဒဏ်ရာရ ဟုဆို
===================

ပါခွီး
(မဇ္စျိမ) ။ ။ ချင်းပြည်နယ် ၊ ဟားခါးမြို့နှင့် ထန်တလန်မြို့အကြား စစ်ကောင်စီတပ်နှင့် ခြောက်ရက်တာ ဖြစ်ပွားခဲ့သည့် တိုက်ပွဲအတွင်း စစ်ကောင်စီတပ်သား ၂၀ဦးခန့်သေဆုံးပြီး ၃၅ဦး ဒဏ်ရာရရှိကြောင်း ချင်းအမျိုးသားတပ်မတော် (CNA) ပြောရေးဆိုခွင့်ရှိသူ ဆလိုင်းထက်နီ က ပြောသည်။

ဟားခါးမြို့ မှ ထန်တလန်မြို့သို့ အင်အားဖြည့်တင်းရန် စစ်ကြောင်းထိုးလာသည့် စစ်ကောင်စီတပ်သားများကို သီးမစ်လွင်ပြင်တွင် ဇူလိုင်လ ၃ရက် မှ ၈ရက်နေ့ အတွင်း CNA နှင့် ဒေသခံ ချင်းကာကွယ်ရေးတပ်ဖွဲ့ (CDF )များပူးပေါင်းတိုက်ခိုက်ခဲ့ ခြင်းဖြစ်ကြောင်း ဆိုသည်။

“ဟိုအရင်ရက်က ငါးယောက် ဟားခါးဆေးရုံရောက်တယ် ။ မနေ့က တိုက်ပွဲအပြီး ၃၀ လောက်ထပ်ရောက်တယ် ။ သေတာ ၂၀ရှိတယ်လို့ ကျနော်တို့အတွင်းသတင်းများ အရသိရတာဖြစ်ပါတယ်” ဟု ဆလိုင်းထက်နီ က မဇ္စျိမကိုပြောသည်။

ယမန်နေ့ ဇူလိုင်လ ၈ရက်တွင် ဟားခါး - ထန်တလန်နယ်စပ် သီတာကျေးရွာအနီး တွင် စစ်ကောင်စီတပ်နှင့် တိုက်ပွဲဖြစ်ပွားခဲ့ပြီး ယနေ့ ဇူလိုင်လ ၉ရက်တွင် နယ်မြေရှင်းလင်းရာ စစ်ကောင်စီတပ်သား အလောင်း ခြောက်လောင်းနှင့် သေနတ် လေးလက်အပါအဝင် လက်နက်ခဲယမ်းများလည်းသိမ်းဆည်းရကြောင်းသိသည်။

ယင်းတိုက်ပွဲအတွင်း စစ်ကောင်စီတပ်က လေကြောင်းမှ နှစ်ကြိမ်ဗုံးကြဲခဲ့ပြီး ဟားခါးမြို့ဘက်ရှိ စစ်ကောင်စီတပ်ကလည်း လက်နက်ကြီးပစ်ကူပေးခဲ့သဖြင့် ချင်းပူးပေါင်းတပ်ဖွဲ့ မှ ရဲဘော် ခြောက်ဦး ဒဏ်ရာရရှိထားကြောင်း ဆလိုင်းထက်နီက ဆက်ပြောသည်။

မေလ ၂၆ရက်နေ့မှ စတင်ပြီး အင်အား၁၅၀ခန့်ပါဝင်သော စစ်ကောင်စီတပ်သည် ဟားခါးမြို့မှ စစ်ကြောင်းနှစ်ကြောင်းဖြင့် ထန်တလန်မြို့ဘက်သို့ စစ်ကြောင်းထိုး လာရာ သီးမစ်လွင်ပြင်အနီးတွင် ချင်းပူးပေါင်းတပ်ဖွဲ့က ခုခံနေခြင်းဖြစ်သည်။

ဟားခါးမြို့နယ် ၊ ချွန်ကျုံးကျေးရွာအနီး စစ်ကောင်စီတပ်၏ သံချပ်ကာ ကားနှစ်စီးနှင့် ယာဉ်တန်းကို တိုက်ခိုက်ဖျက်ဆီးနိုင်ခဲ့သဖြင့် အမျိုးသားညီ ညွတ်ရေးအစိုးရ (NUG ) က CNA နှင့် CDFများကို ဇူလိုင်လ ၄ရက်နေ့တွင် ကျပ် ၄၀၀,၀၀၀,၀၀၀ (သိန်းလေး ထောင်) ချီးမြှင့်ခဲ့ကြောင်းသိရှိရသည်။

စာတည်း။ ။ အောင်ကျော်ဖြိုး

#Mizzima
#CNA
#CDF
# ခြောက်ရက်တာ တိုက်ပွဲ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ရာသီမလာခြင်း (ရာသီထိမ်ခြင်း) ​| ကျန်းမာသုတ လူမှုဘဝ Episode - 24

https://buff.ly/43wNDiV

#ကျန်းမာသုတလူမှုဘဝ #Mizzima #Amenorrhea #reels #shorts

"ပြည်သူ့ဘက်သား ရင်တွင်းစကား" အစီအစဥ် Episode 11
====================

"ပြည်သူ့ဘက်သား ရင်တွင်းစကား" အစီအစဥ်ကို အပတ်စဥ် တနင်္ဂနွေနေ့၊ ညနေ (၆)နာရီတိုင်းတွင် PVTV နှင့် ကာကွယ်ရေးဝန်ကြီးဌာန၏ လူမှုကွန်ရက် စာမျက်နှာများအပြင် လွတ်လပ်သော သတင်းမီဒီယာများတွင်လည်း စောင့်မျှော်နားဆင်နိုင်ပါပြီ။

ဒီတပတ် "ပြည်သူ့ဘက်သား ရင်တွင်းစကား" အစီအစဥ် Season - 1 ရဲ့ နောက်ဆုံး Episode မှာ နားဆင်ရမှာကတော့ (CDM - စစ်သား) တဖြစ်လဲ ကဗျာဆရာတစ်ဦးဖြစ်တဲ့ "ဂနိုက်" ပြောပြတဲ့ ပြည်သူ့ရင်ခွင်နဲ့ ပတ်သက်တဲ့ အတွေ့အကြုံတွေ၊ ခံယူချက်တွေနဲ့ သူ့ရဲ့ 'ငါတို့ပြန်ဆုံတဲ့အခါ' ဆိုတဲ့ ကဗျာရွတ်ဆိုမှုကို နားဆင်ရမှာ ဖြစ်ပါတယ်။

❝ငါတို့ပြန်ဆုံတဲ့အခါ❝

ငါတို့ပြန်ဆုံတဲ့အခါ
စစ်ဖိနပ်အောက်ကအဖိနှိပ်ခံရက်စွဲတွေကို
ကဗျာတွေထဲထည့်ရွတ်မယ်
ဒုက္ခတသီကြီးကို ဟားတိုက်(ရီ)ရယ်မောပစ်မယ်။

ငါတို့ပြန်ဆုံတဲ့အခါ
ညခင်း ဂစ်တာဝိုင်းတွေပြန်လုပ်မယ်
ခြတက်နေတဲ့စာကြည့်တိုက်တွေက
အသိတရားတွေကိုရိုက်ချိုး မယ် ။

ငါတို့ပြန်ဆုံတဲ့အခါ
အရက်ဖြူဆိုင်တွေလိုက်ရှာမယ်
ကဗျာစာအုပ်အဟောင်းတွေရှာဝယ်မယ်
ပြည်တွင်းဖြစ်ကို အားပေးရမယ်။

ငါတို့တတွေပြန်ဆုံတဲ့အခါ
ကျဆုံးသွားတဲ့ဘော်ဒါရဲဘော်အပေါင်းကို
နေ့တိုင်းအလေးနီပြုမယ်
သူတို့အမည်နာမကို ရင်ဘတ်မှာတတ်တူးသွားထိုးမယ်။

ငါတို့ပြန်ဆုံတဲ့အခါ
အမျိုးသမီးတွေကိုလေးလေးစားစား
ဆက်ဆံရမယ်၊အိမ်နောက်ဖေးမျက်ကွယ်က
အယူအဆတွေကို ကန်ချိုးပစ်ရမယ် ။

ငါတို့ဘယ်အချိန်ချိန်ဖြစ်ဖြစ်
ပြန်ဆုံကြတဲ့အခါ အပြုံးနဲ့ကြိုဆိုရမယ်
မေတ္တာတရားနဲ့လက်ဆွဲနှုတ်ဆက်ပြီး
အရက်ဆိုင်မှာလဲတဝိုင်းတည်းထိုင်ကြမယ်။

ငါတို့ပြန်ဆုံတဲ့အခါ
စစ်အာဏာရှင်ကိုနောင်ကျဥ်နေစေရမယ်
"အာဏာရှင်ဟာ ဒီလိုကွ" ဆိုပြီး
နှောင်းလူတွေကို စကားလုံးအဖြစ်သာပြသနိုင်ရမယ်။

ငါတို့ အိမ်ပြန်ချိန်ဟာ ဘယ်လောက်ဝေးဝေး
ငါတို့ရင်ဘတ်တွေမှာနှင်းရည်စက်တွေတွဲလွဲခိုလို့
ငါတို့အိမ်တံစက်မြိတ်မှာ အာဏာရှင်အလိုမရှိဆိုင်းဘုတ်
ငါတို့ရင်ထဲမှာ စွဲနေတဲ့စစ်ဖိနပ်ရာ
ငါတို့မျက်လုံးထဲက နာကျည်းမှုမျိုး
ငါတို့ပြန်ဆုံတဲ့အခါ ။

ငါတို့ပြန်ဆုံတဲ့အခါ
လူတန်းစားသာတူညီမျှအရေးကနေ
အလုပ်သမားထုဆီကခေါင်းပုံဖျက် ချွေးစက်တွေကို
ချနင်းထားတဲ့ ဆောက်တလွဲမှန်ကန်ခြင်းတွေကို
ထပ်တော်လှန်ရင်တော်လှန်ရလိမ့်မယ် ။

နာကျင်နေ့ရက်တွေအလွန်ကျရင်တော့
သိမ်းစွန်ငှက်တို့အပြန်လမ်းကဗျာ*ကို
အာဘောင်းအာရင်းသန်သန်ရွတ်မယ်
ဆယ်လ်မွန်ငါးတို့အပြန်သီချင်း*ကို
ကျယ်ကျယ်လောင်လောင်ဆိုမယ်
အိမ်ပြန်ဖို့ကိုယ့်လက်ကိုရွက်လိုဖွင့်
တလွင့်လွင့် အိမ်ပြန်ကြမယ် ။

မင်းတို့ငါတို့ပြန်ဆုံကြတဲ့အခါ
ရယ်သံတွေကျယ်လောင်နေရမယ် ။
ငါတို့တရက်ရက်ပြန်ဆုံကြရမှာ ... ။

■ ဂနိုက်
ဂျွန် ၂ဝ၂၃


သိမ်းစွန်ဌက်အပြန်လမ်း ကဗျာဆရာပိုင်စိုးဝေ၏ နာမည်ကျော် ကဗျာတပုဒ်ဖြစ်သည်။

ဆယ်လ်မွန်ငါးတို့အပြန် တေးရေးဆရာ/တေးဆို ခင်ဝမ်း၏ နာမည်ကျော် တေးသီချင်း တပုဒ် ဖြစ်သည်။

အပတ်စဥ် တင်ဆက်နေကြ "ပြည်သူ့ဘက်သား ရင်တွင်းစကား" အစီအစဥ်ကို စောင့်မျှော်နားဆင်ပေးခဲ့ကြတဲ့အတွက် ကျေးဇူးအထူးတင်ပါတယ်။

ကာကွယ်ရေးဝန်ကြီးဌာန
အမျိုးသားညီညွတ်ရေးအစိုးရ။

https://youtu.be/fOuqVYDOZeE

-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​လူ ၂၇၅ ဦး သေဆုံးခဲ့ရသည့် အိန္ဒိယရထားတိုက်မှု ဖြစ်စဉ်နှင့်ပတ်သက်၍ မီးရထားအရာရှိ ၃ ဦးကို ဖမ်းဆီး
==================

အိန္ဒိယအာဏာပိုင်များသည် နိုင်ငံသမိုင်းတွင် လူအသေအပျောက်အများဆုံးသော ရထားတိုက်မှုဖြစ်စဉ်တစ်ခုနှင့်ပတ်သက်၍ စုံစမ်းစစ်ဆေးမှု၏ တစ်စိတ်တစ်ဒေသအဖြစ် မီးရထားအရာရှိသုံးဦးကို ဖမ်းဆီးထိန်းသိမ်းလိုက်သည်။

ပြီးခဲ့သည့် သောကြာနေ့က မီးရထားဌာန အရာရှိသုံးဦးကို ဖမ်းဆီးခဲ့ကြောင်း ဗဟို စုံစမ်းစစ်ဆေးရေး ဗျူရို (CBI) က ထုတ်ပြန်ချက်တစ်ရပ်တွင် ပြောသည်။

ဇွန်လ ၂ ရက်က နိုင်ငံအရှေ့ပိုင်း ဩရိဿပြည်နယ်၌ ခရီးသည်တင် ရထားနှစ်စင်းနှင့် ကုန်တင်ရထားတစ်စင်းတို့ ပါဝင်သော ရထားလမ်းသုံးလမ်းတွင် ဖြစ်ပွားသည့် ရထားတိုက်မှုဖြစ်စဉ်ကြောင့် လူ ၂၇၅ ဦးထက်မနည်း သေဆုံးခဲ့ရပြီးနောက် ယခု ဖမ်းဆီးထိန်းသိမ်းမှုများ ပေါ်ပေါက်ခဲ့ခြင်း ဖြစ်သည်။

ဇူလိုင်လ (၉) ရက်၊ တနင်္ဂနွေနေ့ညဘက် မဇ္ဈိမရေဒီယိုအစီအစဉ်
===================

ဒီကနေ့ည နားဆင်ရမယ့် အစီစဉ်တွေကတော့ ...

လီလီနိုင်ကျော်ကို ပစ်ခတ်တယ်လို့ စွပ်စွဲခံရတဲ့ လူငယ် ၂ ဦး ဖမ်းဆီးခံရပြီးနောက် သေဆုံးသွားတဲ့သတင်းနဲ့အတူ

ပြည်သူ့ဝန်ထမ်းများသမဂ္ဂစတင်ဖွဲ့စည်းလိုက်တဲ့အကြောင်းသတင်းလွှာအပါအဝင် နောက်ဆုံးရ ပြည်တွင်းသတင်းတွေနဲ့ တပတ်အတွင်း နိုင်ငံတကာသတင်းတွေကို နားဆင်ကြရပါမယ်။

အဲဒီနောက်မှာတော့ တပတ်အတွင်း စီးပွားရေးသတင်းတွေကို နားဆင်ကြရမှာပါ။

သတင်းတွေအပြီးမှတော့ အပတ်စဉ် ထုတ်လွှင့်သွားမယ့် အစီအစဉ်သစ် တစ်ခုဖြစ်တဲ့ Post Mocha အစီအစဉ်ကို နားဆင်ကြရမှာပါ။

ဒီအစီအစဉ်မှာတော့ မိုခါအလွန် ရခိုင်ဒေသအခြေအနေတွေကို နားဆင်ကြရမှာ ဖြစ်ပါတယ်။

သတင်းတွေအပြီးမှာတော့ Spring University ကပေးပို့တင်ဆက်ထားတဲ့ “ဂျပန်ကင်ပေတိုင်များ အကြောင်း” ကိုနားဆင်ကြရမှာပါ။

အဲ့ဒီနောက်မှာတော့ "နိုင်ငံရေးတွေမပြောချင်ဘူးကိုတုတ်ကြီးရယ်” အစီအစဉ်ကို ထုတ်လွှင့်သွားမှာပါ။

နောက်ဆုံးမှာတော့ တိုင်းရင်းသားတွေရဲ့အသံကို စုစည်းတင်ဆက်ပေးနေတဲ့ BNI ရေဒီယိုအစီအစဉ်ကိုလည်း ထုတ်လွှင့်သွားမှာဖြစ်ပါတယ်။

https://youtu.be/cAK_MnKztrM

#Mizzimaradio
#Eveningradio
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ရာသီမလာခြင်း (ရာသီထိမ်ခြင်း) ​| ကျန်းမာသုတ လူမှုဘဝ Episode - 24
===================

ဒီတပတ်ရဲ့ ''ကျန်းမာသုတ လူမှုဘ၀'' အစီအစဉ်ကနေ အမျိုးသမီးတွေမှာ ကြုံရတတ်တဲ့ ပုံမှန်လာရမယ့် ရာသီမလာခြင်း (ရာသီထိမ်ခြင်း) နဲ့ ပတ်သက်ပြီး တင်ဆက်ပေးချင်ပါတယ်။

ရာသီထိမ်ခြင်း ဘာကြောင့်ဖြစ်တာလဲ၊ ရာသီထိမ်ခြင်းရဲ့လက္ခဏာတွေနဲ့ ရာသီထိမ်ခြင်းက ကင်ဆာရောဂါဖြစ်နိုင်လား။

လူနေမှုပုံစံပြောင်းလဲတာမျိုးအပါအဝင် ကာကွယ်ကုသနိုင်မယ့် နည်းလမ်းတွေကို ဒေါက်တာ ဖြိုးသီဟက ဆွေးနွေးပေးထားပါတယ်။

https://youtu.be/4aquTXdfFtY

#ဒေါက်တာဖြိုးသီဟ
#mizzima
#ကျန်းမာသုတလူမှုဘဝ
#ရာသီထိမ်ခြင်း
#Amenorrhea
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​နွေဦးတော်လှန်ရေးနေ့စဉ် မှတ်စု (၉ ဇူလိုင် ၂၀၂၃)
===============

အမျိုးသားညီညွတ်ရေး အစိုးရ

• ကုလသမဂ္ဂ နိုင်ငံရေးရာဆိုင်ရာ အမေရိကန် အထူးသံအမတ်ကြီး Robert A.Wood နှင့် အမျိုးသား ညီညွတ်ရေး အစိုးရ၊ ကျန်းမာရေး ဝန်ကြီးဌာန နှင့် ပညာရေး ဝန်ကြီးဌာန ပြည်ထောင်စု ဝန်ကြီး ဒေါက်တာ ဇော်ဝေစိုး တို့ တွေ့ဆုံ ဆွေးနွေးခဲ့ကြောင်း U.S Mission to the UN တွစ်တာစာမျက်နှာတွင် ထုတ်ပြန်ထားသည်။

• ကျင်းပနေဆဲ လူ့အခွင့်အရေး ကောင်စီအစည်းအဝေးတွင် မြန်မာ့အရေးနှင့်ပတ်သက်၍ ကုလသမဂ္ဂ လူ့အခွင့်အရေးဆိုင်ရာ မဟာမင်းကြီး အပါအဝင် တာဝန်ရှိသူများ၏ ပြောကြားချက် ၊ ရှုတ်ချမှုများ နှင့် ကုလသမဂ္ဂ လုံခြုံရေးကောင်စီက အရေးယူ လုပ်ဆောင်ရန် တောင်းဆိုချက်များ အရှိန်မြင့်လာကြောင်း NUG လူ့အခွင့်အရေးဆိုင်ရာ ဝန်ကြီး ဦးအောင်မျိုးမင်းက ပြောသည်။

• မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသက စစ်ဘေးရှောင် ပြည်သူများကို အမျိုးသားညီညွတ်ရေး အစိုးရ၊ မြို့နယ် ပြည်သူ့အုပ်ချုပ်ရေးအဖွဲ့က အိမ်ထောင်စု ၆၀၀ ကျော်အတွက် ဆန် နှင့် ဖိနပ် ကူညီ ထောက်ပံ့မှုများ ပြုလုပ်ခဲ့ကြောင်း သတင်းထုတ်ပြန်ထားသည်။

• မြန်မာနိုင်ငံတစ်ဝန်း အကျဉ်းထောင်များမှ နိုင်ငံရေးအကျဉ်းသားများကို ထောင်မှထုတ်၍ ပစ်ခတ်သတ်ဖြတ်မှုများသည် အကြောက်တရားဖြင့် ပြည်သူကို ပိပြားစေရန် စစ်ကောင်စီက ရည်ရွယ်လုပ်ဆောင်သော ရက်စက်ယုတ်မာသည့် လုပ်ရပ်အဖြစ် ၈၈ မျိုးဆက် ကျောင်းသား ခေါင်းဆောင် ဦးမင်းကိုနိုင်က ရှုတ်ချလိုက်သည်။

​​လိုင်ဇာမြို့အနီးကို စစ်ကောင်စီတပ် လက်နက်ကြီးဖြင့် ပစ်ခတ်
======================

KMN
(မဇ္ဈိမ) ။ ။ ကချင်လွတ်လပ်ရေးအဖွဲ့(KIO)ဌာနချုပ်ရှိရာ လိုင်ဇာမြို့အနီးကို စစ်ကောင်စီတပ်က လက်နက်ကြီးဖြင့် ယမန်နေ့ ဇူလိူင်လ ၈ ရက်နေ့တွင် ပစ်ခတ် တိုက်ခိုက်ခဲ့ကြောင်း ဒေသခံများက ပြောကြားသည်။

စစ်ကောင်စီ တပ်စခန်းရှိရာ ဖွန်းပန်ဘွမ်ဘက်မှ လိုင်ဇာမြို့အနီးကို ယမန်နေ့ မနက်ပိုင်းနှင့် ညနေပိုင်းတွင် လက်နက်ကြီးဖြင့် ငါးကြိမ်ခန့် ပစ်ခတ်ခဲ့ကြောင်းသိရသည်။

"အလင့်တောင်ပေါ် က ချုံတောထဲမှာကျတာလို့သိရတယ်။ လိုင်ဇာနဲ့ တော်တော်တော့ ဝေး တယ်" ဟု ဒေသခံတစ်ဦးက မဇ္ဈိမကိုပြောကြားသည်။

လိုင်ဇာမြို့နယ်ရှိ အလမ့်ဘွမ် စိုက်ပျိုးရေးကျောင်းအနီးသို့ လက်နက်ကြီးတစ်လုံးကျရောက်ခဲ့ကြောင်း သိရပြီး အတည်ပြုနိုင်ခြင်း မရှိသေးသလို KIO သတင်းနှင့်ပြန်ကြားရေးတာဝန်ခံ ဗိုလ်မှူးကြီးနော်ဘူကို ဖုန်းဆက်သွယ်မေးမြန်းပေမယ့် ပြန်လည်ဖြေကြားခြင်း မရှိသေးပါ။

စစ်ကောင်စီက လိုင်ဇာမြို့ဝန်းကျင်ကို လက်နက်ကြီးဖြင့်ပစ်ခတ်ခဲ့ပြီး ဝိုင်းမော်မြို့နယ်၊ မဒီယာန်ကျေးရွာအနီးတွင် အင်အား ၂၀၀ နီးပါးပါဝင်သည့် စစ်ကောင်စီစစ်ကြောင်းနှင့် ကချင်လွတ်လပ်ရေးတပ်မတော် (KIA)တို့အကြား ယမန်နေ့ ညနေ ၄ နာရီဝန်းကျင်တွင်တိုက်ပွဲဖြစ်ပွား‌ေကြာင်း ဒေသခံထံက သိရသည်။

ယမန်နေ့ ည ၈ နာရီ အချိန် ခန့်တွင်လည်း ဝိုင်းမော်မြို့နယ်၊ နန်ဆန်ယန်ကျေးရွာ ဘန်ဒေါင်လမ်းခွဲအနီးတစ်ဝိုက်သို့ စစ်ကောင်စီမှ တိုက်လေယာဉ်များဖြင့် ဗုံးကြဲသွားကြောင်း ကချင်သတင်းဌာနများတွင် ဖော်ပြထားသည်။

KIO ဌာနချုပ်ရှိရာ လိုင်ဇာမြို့အနီး တည်ရှိသည့် နန်ဆန်ယန်ကျေးရွာဘက်ကို စစ်ကောင်စီစစ်ကြောင်းများဝင်ရောက်နေခြင်းကြောင့် ဇူလိုင်လ ၁ ရက်နေ့မှ စတင်ကာ စစ်ရေးတင်းမာနေပြီး ဒေသခံ ၁,၀ ၀၀ခန့်မှာ ထွက်ပြေးတိမ်းရှောင်နေရသည်။
ဇူလိူင်လ ၈ ရက်နေ့ တစ်ရက်ထဲတွင် ဖားကန့်မြို့နယ် ၊ လီဒိုလမ်းမရှိ ရှဒူးဇွပ်ကျေးရွာ၊ လိုင်မောက်ယန်ကျေးရွာနှင့် ဝိုင်းမော်မြို့နယ်၊ နန်ဆန်ယန်ကျေးရွာအနီး မိုင်ဆတ်ပါ ဒေသများတွင် စစ်ကောင်စီတပ်နှင့် ကချင်လွတ်လပ်ရေးတပ်မတော် (KIA) အကြား တိုက်ပွဲများ ပြင်းပြင်းထန်ထန်ဖြစ်ပွားခဲ့ကြောင်း သိရသည်။

စာတည်း။ ။အောင်ကျော်ဖြိုး

#Mizzima
#လိုင်ဇာမြို့
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။
Follow the link : https://bit.ly/2VhJ12U

စစ်ရှောင်စခန်း ၅ ခုတွင် လိုအပ်နေသည့် အဆောက်အအုံပစ္စည်းများကို ကယန်းအမျိုးသမီးအစည်းအရုံး ထောက်ပံ့
====================

ကိုဇာနည်
(မဇ္စျိမ) ။ ။ ကယန်းအမျိုးသမီးအစည်းအရုံး (KyWO) က ဖယ်ခုံမြို့နယ်နှင့် ဒီးမော့ဆိုမြို့နယ်အတွင်းရှိ စစ်ရှောင်စခန်း ငါးခုတွင် လတ်တလော လိုအပ်နေသည့် အဆောက်အအုံပစ္စည်းနှင့်နေရာထိုင်ခင်းများကို ထောက်ပံ့ပေးခဲ့ကြောင်း သိရသည်။
ထို စခန်းငါးခုရှိ အိမ်ထောင်စု ၁၀၀ အား ဇူလိုင်လ ၄ ရက်မှ ဇူလိုင်လ ၇ ရက်အတွင်း ထောက်ပံ့ပစ္စည်းများ ပေးအပ်ခဲ့ခြင်းဖြစ်သည်။

" အဓိကတော့ မုဆိုးမနဲ့ တကယ့်လိုအပ်နေတဲ့သူကို ဦးစားပေး ထောက်ပံ့ပေးတာဖြစ်တယ်။ အထူးသဖြင့် အမျိုးသမီးတွေဖြစ်ကြတဲ့အတွက် တချို့သောလိုအပ်ချက်တွေ စိန်ခေါ်မှုတွေ အများကြီးရှိတယ် ။ ကျမတို့လည်း အလှူရှင်ထံကနေ တစ်ဆင့် ပံ့ပိုးပေးရသည့်အတွက် အပြည့်အစုံတော့ မထောက်ပံ့ပေးနိုင်ပေမယ့် အရေးပေါ်လိုအပ်နေတဲ့ ပစ္စည်းတွေကို ထောက်ပံ့ပေးပြီး အားလုံးစစ်ရှောင်တွေဖြစ်ကြတဲ့အတွက် အားလုံးက လိုအပ်နေတယ်” ဟု KyWO၏ တာဝန်ရှိသူတစ်ဦးက မဇ္စျိမကို ပြောသည်။

လိုအပ်နေသော ပစ္စည်းဖြစ်သည့် အထပ်သား​ပြား ၊ မိုးကာ၊ သွပ်ကြိုး၊ ပိုက်ဖျာတို့ကို ပေးအပ်ခဲ့ခြင်းဖြစ်ကြောင်း ၎င်းက ဆိုသည်။
ကရင်နီပြည်နယ်အတွင်းတွင် စစ်ဘေးရှောင် ဦးရေ တစ်နေ့ထက် တစ်နေ့ပိုမိုများပြားလာပြီး စားနပ်ရိက္ခာနှင့် နေရာထိုင်ခင်းများ အရေးပေါ်လိုနေသည်ဟု သိရသည်။

စာတည်း။ ။အောင်ကျော်ဖြိုး

#Mizzima
#စစ်ရှောင်စခန်း
#ကယန်းအမျိုးသမီးအစည်းအရုံး
ဓာတ်ပုံ (KyWO)
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။
Follow the link : https://bit.ly/2VhJ12U

လောင်းလုံးတွင် စစ်အာဏာရှင်ဆန့်ကျင်ရေး လူထုသပိတ်လှုပ်ရှားမှု ပြုလုပ်
====================

ကိုရွှေမြိတ် (မဇ္ဈိမ)။ ။တနင်္သာရီတိုင်း၊ ထားဝယ်ခရိုင်၊ ဒီမိုကရေစီအရေးလှုပ်ရှားမှု သပိတ်ကော်မတီ (DDMSC) မှ ဦးဆောင်ပြီး စစ်အာဏာရှင်ဆန့်ကျင်ရေး လူထုသပိတ်လှုပ်ရှားမှုကို ယနေ့ ဇူလိုင်လ ၉ ရက် မွန်းလွဲပိုင်း တွင် လောင်းလုံးမြို့နယ်၌ ပြုလုပ်ခဲ့ကြောင်း ဦးဆောင်သူများထံမှ သိရသည်။

လူထုသပိတ်လှုပ်ရှားမှုကို “ 7 July စိတ်ဓာတ်ကိုင်ဆွဲကြ၊ စစ်အာဏာရှင်စနစ်ကို အမြစ်ပြတ်ချေမှုန်းကြ” စာတန်းကိုင်ဆောင်၍ ချီတက်ခဲ့ကြပြီး အမျိုးသမီးများ၊ လူငယ်များနှင့် ဒေသခံပြည်သူများ ပူးပေါင်းပါဝင် ခဲ့ကြသည်။

https://youtu.be/6HHRovp4CVI

#တနင်္သာရီတိုင်း
#DDMSC
#လောင်းလုံးမြို့နယ်
#စစ်အာဏာရှင်ဆန့်ကျင်ရေး
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U