ကြာအင်းဆိပ်ကြီးမြို့နယ် ခလယ်-တံခွန်တိုင်တိုက်ပွဲတွင် စစ်ကောင်စီတပ်သား ၁၅ ဦးထက်မနည်း ထိခိုက်သေဆုံး
==================

YT
(မဇ္ဈိမ)။ ။ကရင်ပြည်နယ်၊ ကြာအင်းဆိပ်ကြီးမြို့နယ်၊ ခလယ်-တံခွန်တိုင်ကျေးရွာအုပ်စု၊ ခလယ်တံခွန်တိုင် ရွာနှင့်ပုလိန်ရွာတဝိုက်တွင်ဖြစ်ပွားခဲ့သောတိုက်ပွဲအတွင်း စစ်ကောင်စီတပ်သား ၁၅ ဦးထက်မနည်း ထိ ခိုက်သေဆုံးခဲ့ကြောင်း KNLA သတင်းရင်းမြစ်ထံမှ သိရသည်။

“ဇူလိုင်လ ၁၄ ရက်နေ့ မနက်ပိုင်းကနေ စဖြစ်တာပေါ့။ လက်နက်ကြီးက တောက်လျှောက်ပစ်တယ်ဗျ၊ ည ၇ နာရီလောက်ထိ ပစ်တာရှိတယ်။ ၁၂၀ မမတွေ၊ ၁၂၂ တွေနဲ့ပစ်တာ၊ လက်နက်ကြီးနဲ့ လမ်းကြောင်းရှင်း ပေးပြီး စစ်ကြောင်းထိုးတဲ့သဘောပေါ့။ ထိတွေ့တိုက်ပွဲမှာ သူတို့ဘက်ကအထိနာတော့ လေကြောင်း ပစ် ကူသုံးတယ်၊ လေကြောင်းပစ်ခတ်မှုကြောင့် ပျက်စီးတာတွေရှိတယ်” ဟု KNLA သတင်းရင်းမြစ်က မဇ္ဈိမ ကို ပြောသည်။

ပြီးခဲ့သည့် ဇူလိုင်လ ၁၄ ရက်နေ့က အဘစ်-ခလယ်-တံခွန်တိုင် ကားလမ်းမှတဆင့် ကြာအင်းဆိပ်ကြီးမြို့ နယ် ခလယ်-တံခွန်တိုင်ကျေးရွာအနောက်ဘက်သို့ အင်အားဖြည့်ရန် စစ်ကြောင်းထိုးလာသော အင်အား ၈၀ ဝန်းကျင်ရှိ စစ်ကောင်စီတပ်အား တပ်မဟာ (၆) KNLA ပူးပေါင်းတပ်ဖွဲ့က သွားရောက်တိုက်ခိုက်ခဲ့ရာ မှ တိုက်ပွဲပြင်းထန်လာခဲ့ခြင်းဖြစ်သည်။

“အတွင်းသတင်းအရတော့ သူတို့ဘက်ကတော့ အကျအဆုံးနဲ့ အထိအခိုက်က ၁၅ ယောက်လောက် ရှိပါ တယ်။ ပူးပေါင်းတပ်ဖွဲ့ဘက်က နဂါးနီက သုံးယောက်၊ တောင်ညိုက နှစ်ယောက် စုစုပေါင်း ငါးယောက် ဒဏ်ရာရထားပါတယ်” ဟု အဆိုပါ သတင်းရင်းမြစ်က ပြောသည်။

ထိတွေ့တိုက်ပွဲသည် ညနေပိုင်းအထိပြင်းထန်ခဲ့ကာ အဘစ်ကျေးရွာအခြေစိုက် အမှတ် (၃၁၈) အမြောက် တပ်မှ လက်နက်ကြီး ပစ်ကူခဲ့ပေးပြီး Mi 35 ရဟတ်ယာဉ်ဖြင့် လေကြောင်းတိုက်ခိုက်မှုပါ ပြုလုပ်ခဲ့ကြောင်း သိရသည်။

စစ်ကောင်စီတပ်၏ လက်နက်ကြီးဖြင့်ပစ်ခတ်မှု၊ လေကြောင်းတိုက်ခိုက်မှုတို့ကြောင့် ပုလိန်နှင့် ခလယ်- တံခွန်တိုင်ကျေးရွာအတွင်းရှိ နေအိမ်အချို့ ထိခိုက်ပျက်စီးမှုရှိသော်လည်း လူသူအထိအခိုက် မရှိခဲ့ကြောင်း သိရသည်။

တိုက်ပွဲခေတ္တနားစဉ်အချိန်အတွင်း စစ်ကောင်စီတပ်သားများသည် အဘစ်-ခလယ်-တံခွန်တိုင် ကားလမ်း အတိုင်းဖြတ်သွားသည့် အရပ်သားကားတစီးအား ပစ်ခတ်ခဲ့ရာ ကားပေါ်ပါလာသည့် အရပ်သားနှစ်ဦး သေဆုံးခဲ့ကြောင်း KNLA သတင်းရင်းမြစ်နှင့် ဒေသခံတဦးထံမှ သိရသည်။

“စစ်ဘေးရှောင်လာတာထင်တယ်။ ကားပေါ်မှာ အဝတ်ထုပ်တွေရော အခြားအထုပ်အပိုးတွေ ပါတယ်ဗျ။ သူတို့လည်း တိုက်ပွဲငြိမ်ပြီဆိုပြီး ဖြတ်သွားမိတာထင်ပါတယ်။ ဘယ်သူမှ သွားမကြည့်ရဲဘူးဗျ။ ညပိုင်းကျမှ သွားကြည့်လို့ရတယ်။ အမျိုးသားချည်းပဲ နှစ်ဦးပါ” ဟု ကြာအင်းဆိပ်ကြီးမြို့နယ်မှ သတင်းရင်းမြစ်တဦး ကမဇ္ဈိမကို ပြောသည်။

ဇူလိုင်လ ၁၆ ရက်နေ့ မွန်းလွဲ ၂ နာရီ ၅၀ မိနစ်တွင် ဆက်သွယ်မေးမြန်ချက်အရ စစ်ကြောင်းထိုးလာသော အဆိုပါ စစ်ကောင်စီတပ်သားများသည် ကြာအင်းဆိပ်ကြီးမြို့နယ်၊ ငြိမ်းချမ်းမြိုင်အနောက်ဘက်ရှိ တောင် ကုန်းတွင် ခေတ္တအထိုင်ချနေကြကြောင်း သိရသည်။

ပြီးခဲ့သည့် ဇူလိုင်လ ၁၁ ရက်နှင့် ၁၂ ရက်နေ့ကလည်း ငြိမ်းချမ်းမြိုင်တွင် စစ်ကောင်စီတပ်သားများနှင့် တပ်မဟာ (၆) KNLA ၊ PDF ပူးပေါင်းတပ်ဖွဲ့များအကြား တိုက်ပွဲများဖြစ်ပွားခဲ့ပြီး စစ်ကောင်စီတပ်သား ငါးဦးသေဆုံး၍ ၁၃ ဦးထိခိုက်ဒဏ်ရာရခဲ့ကြောင်း သိရသည်။

ဇူလိုင်လ ၁၂ ရက်နေ့ တိုက်ပွဲတွင်လည်း စစ်ကောင်စီတပ်က လေကြောင်းတိုက်ခိုက်မှု ပြုလုပ်ခဲ့သေးပြီး ပုလိန်ကျေးရွာမှ နေအိမ်အချို့ ထိမှန်ပျက်စီးခဲ့သေးသည်။

စာတည်း။ ။စောဖေ
စာမူတည်းဖြတ်။ ။စောဖေ

#ကရင်ပြည်နယ်
#ကြာအင်းဆိပ်ကြီးမြို့နယ်
#တိုက်ပွဲ
#KNLA
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အိန္ဒိယတွင် ဘာသာရေး ခြိမ်းခြောက်မှုများမရှိကြောင်း နိုင်ငံတော် လုံခြုံရေးအကြံပေးအရာရှိပြောကြား
===========================

အိန္ဒိယနိုင်ငံတွင် ဘာသာတရားအားလုံးသည် တန်းတူညီတူဖြစ်ပြီး ရာစုနှစ်ပေါင်းများစွာ ယဉ်ကျေးမှုနှင့် ဘာသာရေးအရ သဟဇာတရှိစွာ ယှဉ်တွဲနေထိုင်ခဲ့သောကြောင့် မည်သည့်ဘာသာတရားမှ ခြိမ်းခြောက်ခံရခြင်း မရှိကြောင်း နိုင်ငံတော် လုံခြုံရေးအကြံပေး အာဂျစ်ဒိုဗယ်က ဇူလိုင် ၁၁ ရက် ပြောကြားလိုက်သည်။

 “အိန္ဒိယဟာ မတူကွဲပြားမှုများကို လက်ခံရန် အယူဝါဒကွဲများ အစွမ်းကုန်ထွန်းကားရာ နေရာအဖြစ် ဆက်လက် ရပ်တည်နေပါတယ်။ ဘယ်ဘာသာတရားမှ ခြိမ်းခြောက်ခံမနေရပါဘူး” ဟု နယူးဒေလီ မြို့တော်ရှိ အိန္ဒိယအစ္စလာမ်ယဉ်ကျေးမှုဌာနတွင် ကျင်းပသည့် အခမ်းအနားတစ်ခုအတွင်း ဒိုဗယ်က ပြောကြားခဲ့သည်။ ကမ္ဘာ့မွတ်စလင်အဖွဲ့ချုပ် အတွင်းရေးမှူးချုပ် ရှိတ်ခ် ဒေါက်တာ မိုဟာမက်ဘင် အဗ္ဗဒူကာရင်မ် အယ်လ်-အစ်ဆာသည် အိန္ဒိယနိုင်ငံသို့ ၆ ရက်ကြာ ခရီးစဉ်အတွင်း အဆိုပါ အခမ်းအနားသို့ တက်ရောက်မိန့်ခွန်း ပြောကြားခဲ့သည်။

“ဂုဏ်ယူစရာကောင်းတဲ့ ယဉ်ကျေးမှုထွန်းကားရာ နိုင်ငံတစ်ခုအနေနဲ့ အိန္ဒိယနိုင်ငံဟာ မျက်မှောက်ခေတ် စိန်ခေါ်မှုတွေကို ရင်ဆိုင်ဖြေရှင်းရာမှာ စိတ်ရှည်သည်းခံမှု၊ ဆွေးနွေးညှိနှိုင်းမှုနဲ့ ပူးပေါင်းဆောင်ရွက်မှုတွေ တိုးမြှင့်သွားမယ်လို့ ယုံကြည်ပါတယ်။ မွတ်စလင် သန်း ၂၀၀ လောက်ရှိပေမဲ့ ကမ္ဘာလုံးဆိုင်ရာ အကြမ်းဖက်မှုတွေမှာ အိန္ဒိယနိုင်ငံသားတွေ ပါဝင်ပတ်သက်မှု အင်မတန် နည်းတယ်ဆိုတာ တိုက်ဆိုင်မှုသက်သက် မဟုတ်ပါဘူး” ဟု ၎င်းက ပြောကြားခဲ့သည်။

မြို့ချောင်း−စိန်ကန့်လန့် ရိုးမဖြတ်ကျော်လမ်းတွင် ပဲခူးတိုင်း PDF များ နယ်မြေစစ်ဆေးမှုလုပ်ဆောင်
=================

ရွှေနွယ်
(မဇ္ဈိ)။ ။ပဲခူးတိုင်းအနောက်ခြမ်း၊ မင်းလှမြို့နယ်၊ စိန်ကန့်လန့်ကျေးရွာနှင့် ပဲခူးတိုင်းအရှေ့ခြမ်း၊ ကျောက်တံခါးမြို့နယ်၊ မြို့ချောင်းသို့ ပဲခူးရိုးမအားဖြတ်ကျော်ဖောက်လုပ်ထားသည့်လမ်းပေါ်၌ ယခု သီတင်းပတ်အတွင်း ပြည်သူ့ကာကွယ်ရေးတပ်ဖွဲ့များမှ နယ်မြေစစ်ဆေးရေးလုပ်ဆောင်ခဲ့သည်ဟု သာယာဝတီခရိုင် တပ်ရင်း(၃၈၀၂)မှ တာဝန်ရှိသူတဦးက မဇ္ဈိမကိုပြောသည်။

အဆိုပါ ရိုးမဖြတ်ကျော်လမ်းသည် ပဲခူးတိုင်းအရှေ့ခြမ်းရှိ ရန်ကုန်−မန္တလေးအမြန်လမ်းနှင့် ဆက်သွယ် ထားသောလမ်းမဖြစ်ပြီး မင်းလှမြို့ဘက်ခြမ်းတွင် နယ်မြေစစ်ဆေးရေး လုပ်ဆောင်နေခြင်းဖြစ်သည်။

“ဒီလမ်းကနေ စစ်ကောင်စီက သစ်ခိုးထုတ်တယ်။ ဒီလမ်းကြောင်းက စစ်ကောင်စီရဲ့ ဝင်ငွေရလမ်းလည်း ဖြစ်နေတယ်။ ဒါတွေကိုစစ်ဆေးချင်တာလည်းပါတယ်။ နောက်တစ်ခုကတော့ ကျွန်တော်တို့ နယ်မြေစိုးမိုး နိုင်တယ်ဆိုတာကိုလည်း ပြချင်တာပါတယ်။ ဒီနေရာတွေမှာ ပြည်သူတွေအနေနဲ့ စစ်ကောင်စီနဲ့ပူးပေါင်း သွားလာတာတွေ၊ သစ်ခိုးထုတ်တာတွေမလုပ်ကြဖို့အတွက် သတိပေးချင်တာပါ။

ဒီနယ်မြေမှာ ကျွန်တော် တို့ ရှိနေပါတယ်” ဟု သာယာဝတီခရိုင် တပ်ရင်း(၃၈၀၂)မှ တာဝန်ရှိသူတဦးမှ မဇ္ဈိမကိုပြောသည်။
ပဲခူးရိုးမအတွင်းမှ သစ်ခိုးထုတ်ရောင်းချခြင်းသည် ပဲခူးတိုင်းအနောက်ခြမ်းရှိ စစ်ကောင်စီ၏ အဓိက ဝင်ငွေ ရလမ်းတွင်ပါဝင်နေကြောင်းလည်း ၎င်းကပြောသည်။

မြန်မာနိုင်ငံ၏ အဓိကသစ်တောများတည်ရှိရာ ပဲခူးရိုးမအတွင်းတွင် ဆိုးရွားသော သစ်တောပြုန်းတီးမှု ဖြစ်နေပြီး တောင်များသည် တောင်ကတုံး ဖြစ်နေသောကြောင့် ပဲခူးရိုးမအတွင်း သစ်ထုတ်လုပ်မှုကို ၂၀၁၇−၁၈ ဘဏ္ဍာနှစ်မှစတင်ကာ ၂၀၂၇ ခုနှစ်အထိ ၁၀ နှစ်တိတိ ရပ်ဆိုင်းကြောင်းကို ၂၀၁၆ ခုနှစ်တွင် သစ်တောဦးစီးဌာနက ထုတ်ပြန်ခဲ့သည်။

သို့သော် ပြီးခဲ့သည့်မတ်လအတွင်းက ပဲခူးရိုးမပေါ်သို့စစ်ကြောင်းထိုးလာသော စစ်ကောင်စီတပ်က ဇာမနည်တောင် ၄၇ ပေါက်မှတဆင့် သစ်တန်ချိန် ၁၀၀ ကျော်ကို ခိုးထုတ်သယ်ယူခဲ့ကြောင်း မဇ္ဈိမမှ သတင်းရရှိခဲ့သည်။
“သူတို့ကတော့ သူတို့ငွေရဖို့လုပ်နေမှာပါ။ ကျွန်တော်တို့ပြောချင်တာကတော့ ပြည်သူတွေအနေနဲ့ ဒီနယ် မြေတွေမှာ ကျွန်တော်က စစ်ဆေးတဲ့အခါ ကြည်ကြည်ဖြူဖြူ ပူးပေါင်းပေးကြဖို့ တောင်းဆိုချင်တာပါ” ဟု သာယာဝတီခရိုင် တပ်ရင်း(၈၀၂)မှတာဝန်ရှိသူက ဆိုသည်။

လက်ရှိတွင် မြို့ချောင်း−စိန်ကန့်လန့်လမ်း၌ ပဲခူးတိုင်းအနောက်ခြမ်း သာယာဝတီခရိုင် ပြည်သူ့ကာကွယ် ရေးတပ်ဖွဲ့များမှစစ်ရေးလှုပ်ရှားနေပြီး ပြည်သူများအနေဖြင့်လည်း ပူးပေါင်းပါဝင်ပေးကြရန် တိုက်တွန်း ထားသည်။

စာတည်း။ ။စောဖေ
စာမူတည်းဖြတ်။ ။စောဖေ

#ပဲခူတိုင်း
#နယ်မြေစစ်ဆေးမှု
#ရိုးမဖြတ်ကျော်လမ်း
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ကရင်နီပြည်နယ်တွင် ကျန်းမာရေးစောင့်ရှောက်မှုပေးနေသည့်နေရာများ လေကြောင်းမှတိုက်ခိုက်ခံရ၍ ဆေးကုသပေးရန် အခက်ကြုံနေရ
====================

ကီရာ
(မဇ္ဈိမ)။ ။ကရင်နီပြည်နယ်တွင် ကျန်းမာရေးစောင့်ရှောက်မှုပေးနေသည့်နေရာများ လေကြောင်းမှ တိုက်ခိုက်ခံရသည့်အတွက် ဆေးဝါးကုသပေးရန်အခက်ကြုံနေရသည်ဟု ပြည်နယ်အတွင်း ကျန်းမာရေး စောင့်ရှောက်မှုဆောင်ရွက်ပေးနေသည့် ဝိဇ္ဇာအဖွဲ့ထံမှ သိရသည်။

“ဆေးရုံ ဆေးခန်းတွေ လေကြောင်းကတိုက်ခိုက်ခံရတဲ့အတွက် Public Center တွေမှာ နေလို့မရပါဘူး။ ဆေးကုသပေးဖို့ အခက်အခဲဖြစ်ပါတယ်”ဟု လတ်တလောကြုံတွေ့နေရသည့် အခက်အခဲနှင့်ပတ်သက်၍ ဒေါက်တာကိုအုပ်က ပြောသည်။
ဆေးရုံ၊ ဆေးခန်းနှင့် ကျန်းမာရေးစောင့်ရှောက်မှုပေးနေသည့် အဆောက်အဦများကို လေကြောင်းမှ တိုက်ခိုက်ခံနေရခြင်းဖြစ်၍ စစ်ရှောင်များနှင့် တော်လှန်ရေးရဲဘော်များအတွက် ကျန်းမာရေးစောင့်ရှောက် မှုပေးရန် အခက်ကြုံနေရခြင်းဖြစ်သည်ဟု ၎င်းကရှင်းပြသည်။

Waid Zar Team ဆေးကုသရေးအဖွဲ့သည် ကရင်နီပြည်နယ်၌ ရှေ့တန်းတိုက်ပွဲများတွင်ပါ ကျန်းမာရေး စောင့်ရှောက်မှု ဆောင်ရွက်ပေးနေသည်မှာ နှစ်နှစ်ခန့်ရှိပြီဖြစ်သည်ဟု သိရသည်။
“လတ်တလော ဆေးကုပေးဖို့ လုံခြုံတဲ့နေရာရှိဖို့နဲ့ သွားလာရေးအတွက် လိုအပ်ချက်တွေရှိပါတယ်၊ အရေး ပေါ် ပတ်တီး၊ ဂွမ်း၊ အရက်ပျံလိုအရာတွေ လိုအပ်နေတာပါ”ဟု ဒေါက်တာ ကိုအုပ်က ပြောသည်။

ဆေးကုသရေးအဖွဲ့များအတွက် လှူဒါန်းလိုသူများအနေဖြင့်လည်း Waid Zar လူမှုကွန်ရက် စာမျက် နှာမှတဆင့်ဆက်သွယ်ပြီး လှူဒါန်းနိုင်ကြောင်း သိရသည်။

“ဆေးဝါးတွေက စျေးကြီးလာတယ်၊ လမ်းကြောင်းတွေကလဲ ခက်ခဲလာတဲ့အခါကျတော့ လူသူမရောက် နိုင်တဲ့နေရာတွေကို ဆေးအဖွဲ့တွေရောက်ရှိဖို့ အခက်အခဲရှိနေပါတယ်”ဟု ဒေါက်တာကိုအုပ်က ပြော သည်။

ကွင်းဆင်း၍ ကျန်းမာရေးစောင့်ရှောက်မှုပေးရန် လိုအပ်ချက်များရှိနေသည့်အပြင် ဒေသခံများအတွက် ကျန်းမာရေးစောင့်ရှောက်မှုပေးရန် သောက်ဆေး၊ ထိုးဆေး လိုအပ်ချက်များ ရှိနေသည်ဟုလည်း ၎င်း ကပြောသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#ကရင်နီပြည်နယ်
#ကျန်းမာရေး
#စစ်ရှောင်
photo - မျိုးဆက်လှသော်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

စစ်ကောင်စီတပ်က ကား ၆၅ စီးဖြင့် ဧရာဝတီတိုင်းတွင် ပေါ်ဆန်းစပါးများ လိုက်လံဝယ်ယူ
==================

မင်းထက်
(မဇ္စျိမ)။ ။ ဧရာဝတီတိုင်းအတွင်း မြို့နယ်အချို့ရှိ ဆန်စက်များမှ ပေါ်ဆန်းစပါးများကို စစ်ကောင်စီတပ်က စစ်ကားအကြီး ၆၅ စီးဖြင့် လိုက်လံဝယ်ယူခဲ့ကြောင်း ဒေသတွင်းသတင်းရင်းမြစ်များထံက ပြောသည်။

ပြီးခဲ့သည့် ဇူလိုင်လ ပထမပတ်အတွင်းက စစ်ကောင်စီတပ်ဖွဲ့ဝင်များ စီးနင်းလိုက်ပါလာသည့် စစ်ကား ၆၅ စီး သည် ဖျာပုံ၊ ဘိုကလေး၊ ဝါးခယ်မ ၊မော်လမြိုင်ကျွန်းနှင့် မြောင်းမြ စသည့်မြို့နယ်များတွင် ထိုသို့လိုက်လံဝယ်ယူခဲ့ခြင်းဖြစ်ကြောင်း သိရသည်။
ဇူလိုင်လ ၆ ရက်တွင် မော်လမြိုင်ကျွန်းမြို့သို့ ထိုစစ်ကားများရောက်ရှိလာခဲ့ပြီး ဆန်စက် ငါး ခုမှ ပေါ်ဆန်းစပါး တင်းပေါင်း ၁၀,၀၀၀ ကိုဝယ်ယူသွားခဲ့သည်ဟု မော်လမြိုင်ကျွန်းမြို့ခံ နိုင်ငံရေးတက်ကြွလှုပ်ရှားသူတစ်ဦးက ပြောသည်။

မော်လမြိုင်ကျွန်းမြို့ရှိ ဦးသိန်းစိုးဦး၏ တိမ်တံခွန်ဆန်စက်မှ စပါးတင်း ၃,၀၀၀၊ ဦးဝင်းထွန်း၏ ရွှေပြည်ကျော်ဆန် စက်မှစပါးတင်း ၃,၀၀၀၊ ဦးဇော်နိုင်ထွေး၏ ဧက္ကရာဇ်ဆန်ဘစက်မှ စပါးတင်း ၁,၀၀၀ ၊ဦးညွန့်လွင်၏ ထိပ်တန်းဆန် စက်မှစပါးတင်း ၁,၀၀၀ နှင့် ကျိုက်ပိဆန်စက်မှစပါးတင်း ၂,၀၀၀ ကို ဝယ်ယူသွားခဲ့ခြင်းဖြစ် သည်ဟု ၎င်းကဆိုသည်။

"စစ်ကားတွေမြို့ထဲဝင်လာတော့ သို့လော သို့လော သတင်းတွေထွက်လာပြီး ပြည်သူတွေက စိုးရိမ်တာပေါ့။ အမှန်က မော်လမြိုင်ကျွန်းမြို့ကထွက်တဲ့ စပါးအချောတွေကို စစ် တပ်ကလာဝယ်တာပါ။ စစ်ကားတွေပေါ်မှာ ဖျာပုံ၊ ဘိုကလေး၊ မြောင်းမြ၊ ဝါးခယ်မဘက်က ဝယ်လာတဲ့စပါးတွေလည်း ပါလာတယ် "ဟု နိုင်ငံရေးတက်ကြွလှုပ်ရှားသူက ပြောသည်။

မော်လမြိုင်ကျွန်းမြို့နယ်တွင် စပါးအချော(ပေါ်ဆန်းစပါး) တင်း ၁၀၀ လျှင် ၂၄ သိန်း ပေါက်စျေးရှိသော်လည်း စစ်ကောင်စီတပ်ဖွဲဲ့များက စပါးတင်း ၁၀၀ လျှင် ၂၈ သိန်းစျေးပေး၍ ဝယ်ယူသွားခဲ့ကြောင်းသိရသည်။

"မြို့နယ်စီမံကောင်စီက ဗိုလ်မှူးမင်းလွင်နဲ့ မြို့နယ်အုပ်ချုပ်ရေးမှူး ဦးသီဟဇော်တို့နှစ်ယောက်ပေါင်းပြီး လာဝယ်တဲ့စစ်တပ်ကို ၂၈ သိန်းစျေးနဲ့ရောင်းလိုက်တယ်လို့ကြားတယ် ။ကျွန်တော်ထင်တာတော့ မော်ကျွန်းမှာ စပါးစျေးမြင့်တယ်လို့ပြောပြီး အဲဲဒီနှစ်ယောက်ကကြားထဲက လုပ်စားသွားတာဖြစ်နိုင်တယ်"ဟု ၎င်းကဆိုသည်။
စစ်ကောင်စီတပ်ဖွဲ့များသည် မည်သည့်ရည်ရွယ်ချက်ဖြင့် ပေါ်ဆန်းစပါးများ လိုက်လံဝယ်ယူခဲ့သည်ကို အတိအကျမသိရကြောင်း ဆက်လက်ပြောသည်။

ထိုသို့ စစ်ကောင်စီတပ်ကား ၆၅ စီးဖြင့် ပေါ်ဆန်းစပါးများလိုက်လံဝယ်ယူခဲ့သည့် စစ်ကောင်စီတပ်ဖွဲ့များသည် ဇူလိုင်လ ပထမပတ်အတွင်းက ပုသိမ်ခရိုင်၊ ရေကြည်မြို့နယ်ဘက်သို့လည်း သွားရောက်ခဲ့သည်ဟုသိရပြီး ထိုမှတစ်ဆင့် ရန်ကုန် ဘက်သို့ ပြန်ထွက်သွားခဲ့သည်ဟု သတင်းရင်းမြစ်များက ပြောသည်။

သို့သော် စစ်ကောင်စီတပ်ကားများ မည်သည့်နေရာသို့ ထွက်ခွာသွားသည်ကို မဇ္စျိမအနေဖြင့် သီးခြားအတည်ပြုနိုင်ခြင်းမရှိပေ။
စစ်ကောင်စီတပ်ဖွဲ့များက ပေါ်ဆန်းစပါးများလိုက်လံဝယ် ယူနေမှုနှင့် ပတ်သက်၍ ဧရာဝတီ တိုင်းအတွင်းရှိ နိုင်ငံရေးတက်ကြွလှုပ်ရှားသူတစ်ဦးက"စစ်တပ်က စပါးစျေးကို စျေးကစားဖို့ဝယ်တာဖြစ်နိုင်သလို၊ တပ်အရာရှိတွေရဲ့ မိသားစုတွေအတွက် ရိက္ခာစုဆောင်းတာလည်းဖြစ်နိုင်တယ်။ ပေါ်ဆန်းစပါးဆိုတော့ ရိုးရိုး အခြားအဆင့်စစ်သားတွေအတွက် ရိက္ခာဝယ်တာတော့ မဖြစ်နိုင်ဘူး"ဟုဝေဖန်သုံးသပ်သည်။

ဆန်အိတ် ၁,၀၀၀ တစ်နည်းအားဖြင့် ဆန်တန်ချိန် ၅၀ (သို့မဟုတ်) စပါးတင်း ၅,၀၀၀ နှင့်အထက် သိုလှောင်ပါက မှတ်ပုံတင်ရမည်ဟု စစ်ကောင်စီလက်အောက်ခံ စီးပွားရေးနှင့်ကူးသန်းရောင်း ဝယ်ရေးဝန်ကြီးဌာနက၂၀၂၃ ခုနှစ် မေ လ ၉ ရက်နေ့က ထုတ်ပြန်ကြေညာခဲ့သေးသည်။

စာတည်း။ ။အောင်ကျော်ဖြိုး

#Mizzima
#ဧရာဝတီတိုင်း
#ပေါ်ဆန်းစပါး

ဓာတ်ပုံ - မော်လမြိုင်ကျွန်းမြို့သို့ စပါးဝယ်ယူရန်ရောက်ရှိလာသည့် စစ်ကောင်စီတပ်ကားများ

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အာဠာဝကစစ်ဆင်ရေး ပွဲဦးထွက်တွင် စစ်ကောင်စီတပ်သား ၃၀ ခန့်သေဆုံးဟုဆို
====================

KMN
(မဇ္ဈိမ) ။ ။စစ်ကိုင်းတိုင်း၊ မြင်းခြံခရိုင်တွင် စတင်အကောင်အထည်ဖော်နေသည့် အာဠာဝကစစ်ဆင်ရေး ပွဲဦးထွက်တွင် စစ်ကောင်စီတပ်သား ၃၀ ခန့်ကို ရှင်းလင်းနိုင်ခဲ့ကြောင်း ZERO ပြောက်ကျားတပ်ဖွဲ့ကထုတ်ပြန်သည်။

“အာဠာဝက စစ်ဆင်ရေးပွဲဦးထွက်ကို ဇူလိုင်လ ၁၃ ရက်နေ့ မနက်အစောပိုင်းက မြင်းမူမြို့နယ်ဘက်မှာ ပွဲကထားပါတယ်။ စစ်ကောင်စီတပ်သား ၃၀ ခန့်သေဆုံးခဲ့ပါတယ်” ဟု မြင်းခြံခရိုင် တပ်ရင်း(၇) ZERO ပြောက်ကျားတပ်ဖွဲ့ ခေါင်းဆောင်ကိုသက်ကြီးက ပြောသည်။

စစ်ကောင်စီစစ်ကြောင်းသည် ဇူလိုင် ၇ ရက်မှ ၁၃ ရက်နေ့အထိ မြင်းမူမြို့နယ်အတွင်း ဂုံညှင်းဆိပ်၊ ငကင်း၊ ကန်သုံးဆင့် စသည့်ကျေးရွာများကို စစ်ကြောင်းထိုးဝင်ရောက်ကာ မီးရှို့ခဲ့သည်။
အဆိုပါ စစ်ကြောင်းကို ဇူလိုင်လ ၁၃ ရက်နေ့ နံနက် ၄ နာရီခန့်က ကျေးရွာတရွာအနီးတွင် ကင်းပုန်းဝပ် တိုက်ခိုက်ခဲ့ပြီး ယင်းတိုက်ပွဲ၌ စစ်သား ၃၀ ခန့်သေဆုံးခဲ့ခြင်းဖြစ်ကြောင်း ကိုသက်ကြီးကဆိုသည်။
စစ်ကောင်စီတပ်သား ၃၀ ခန့်သေဆုံးမှုနှင့်ပတ်သက်ပြီး မဇ္ဈိမအနေဖြင့် သီးခြားအတည်ပြုနိုင်ခြင်း မရှိ သေးပေ။

ZERO ပြောက်ကျားတပ်ဖွဲ့ကဦးဆောင်ပြီး ငွေကျပ် သိန်း ၂,၀၀၀ ရန်ပုံငွေရှာဖွေနေသည့် အာဠာဝကကမ် ပိန်းကို ဇူလိုင်လ ၅ ရက်မှ ဩဂုတ်လ ၂၀ ရက်နေ့အထိ အကောင်အထည်ဖော်နေပြီး ပြည်သူများအနေဖြင့် အာဠာဝက စစ်ဆင်ရေးအတွက် လှူဒါန်းနိုင်ကြောင်း ၎င်းတပ်ဖွဲ့က ထုတ်ပြန်ထားသည်။

ဓာတ်ပုံ - ZERO ပြောက်ကျားတပ်ဖွဲ့ (ပုံဟောင်း)

စာတည်း။ ။စောဖေ
စာမူတည်းဖြတ်။ ။စောဖေ

#အာဠာဝကစစ်ဆင်ရေး
#ZEROပြောက်ကျားတပ်ဖွဲ့
#မြင်းမူမြို့နယ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U