​​စစ်ကောင်စီ၏ငွေတိုက်စာချုပ်နှင့် ငွေတိုက်လက်မှတ်များ ဝယ်ယူထားသူများကို NUG က အရေးယူသွားမည်
====================

မိုးသောက်
မဲဆောက်(မဇ္ဈိမ)။ ။စစ်ကောင်စီထံမှ ငွေတိုက်စာချုပ်နှင့် ငွေတိုက်လက်မှတ်များဝယ်ယူနေခြင်းသည် ပြည်သူလူထုကို အကြမ်းဖက်မှုများဆောင်ရွက်ရာ၌ အသုံးပြုနေသည့် ဘဏ္ဍာငွေများဖြစ်သဖြင့် တစ်ချိန်တွင် ငွေတိုက်စာချုပ်နှင့် လက်မှတ်များဝယ်ယူထားသူများကို NUG က ပြတ်ပြတ်သားအရေးယူသွားမည်ဟု သိရသည်။

အမျိုးသားညီညွတ်ရေးအစိုးရ(NUG) ၊ စီမံကိန်း ဘဏ္ဍာရေးနှင့်ရင်းနှီးမြှုပ်နှံမှုဝန်ကြီးဌာနက နွေဦးဘဏ်နှင့်ပတ်သက်ပြီး ပြုလုပ်သည့် သတင်းစာရှင်းလင်းပွဲတွင် ငွေတိုက်စာချုပ်ဝယ်ယူထားသူများနှင့်ပတ်သက်ပြီး မဇ္ဈိမက မေးမြန်းခဲ့ရာတွင် ပြည်ထောင်စုဝန်ကြီး ဦးတင်ထွန်းနိုင်က ဖြေကြားခဲ့ခြင်းဖြစ်သည်။

"ဒါနဲ့ပတ်သက်ပြီးတော့လေ၊ ပါဝင်နေတဲ့ ပြည်တွင်းပုဂ္ဂလိက ဘဏ်တွေကအစပေါ့လေ၊ လုပ်ငန်းရှင်တွေ စီးပွားရေးသမားတွေ အားလုံးအနေနဲ့က ဒါကိုတာဝန်ခံရပါလိမ့်မယ်၊ ပြည်သူတွေအနေနဲ့လည်း မိမိတို့ရဲ့ ယုံကြည်စွာဘဏ်မှာ အပ်နှံထားတဲ့ငွေကို တစ်ဖက်လှည့်နဲ့ အကြမ်းဖက်စစ်တပ်ရဲ့ ဘဏ္ဍာရေးပိုင်းဆိုင်ရာ အထောက်အပံ့ဖြစ်နေတာကို ပြည်သူလည်း သိသင့်ပါတယ်။ ဒါကိုလည်း ကြားခံဆောင်ရွက်ပေးနေတဲ့ ဘဏ်တွေက လုပ်ငန်းရှင်တွေဘက်ကနေပြီးတော့လည်း တာဝန်ခံသင့်ပါတယ်။ ဒါကြောင့်မို့ အဲဒီဟာတွေကို ကျနော်တို့ပြတ်ပြတ်သားသား ဥပဒေနဲ့ အညီ ကျနော်တို့အနေနဲ့ အရေးယူသွားမယ်ဆိုတာ တစ်လက်စတည်း တင်ပြလိုပါတယ်။ " ဟု ၎င်းကပြောသည်။

စစ်ကောင်စီသည် ၂၀၂၂ခုနှစ် ဧပြီလ ၈ ရက်နေ့ကတည်းက ငွေတိုက်စာချုပ်နှင့်လက်မှတ်များ၊ ရောင်းချခြင်းများ ပြုလုပ်နေသည်ကိုတွေ့ရပြီး လက်ရှိအချိန်တွင် ၄၆ ကြိမ်ရောင်းချခဲ့ပြီးဖြစ်သည်။ ၄၆ ကြိမ်ရောင်းချပြီးချိန်တွင် စစ်ကောင်စီက စုစုပေါင်းရောင်းချငွေ မြန်မာကျပ်ငွေ ၁၇.၈ ထရီလီယံဖိုး(ကျပ်ဘီလျံ ၁၇,၈၀၀)ရောင်းချခဲ့ရကြောင်း စစ်ကောင်စီလက်အောက်ခံ စီမံကိန်းနှင့် ဘဏ္ဍာရေးဝန်ကြီးဌာနအောက်ရှိ ငွေတိုက်ဦးစီးဌာန၏ ဇူလိုင်လ ၁၁ ရက်နေ့အထိ စာရင်းများအရ သိရသည်။

ငွေတိုက်စာချုပ်နှင့် ငွေတိုက်လက်မှတ်ဆိုသည်မှာ အစိုးရအနေဖြင့်ငွေချေးယူသည့် အဓိကနည်းလမ်းတစ်ခုဖြစ်ပြီး ဗဟိုဘဏ်အနေဖြင့် ကြားခံဆောင်ရွက်ပေးရသည်။ မြန်မာနိုင်ငံတွင် ငွေတိုက်စာချုပ်နှင့် ငွေတိုက်လက်မှတ်များကို ၂၀၁၆ ခုနှစ်တွင် စတင်ရောင်းခဲ့ပြီး စစ်ကောင်စီအာဏာသိမ်းထားသည့် ကာလအတွင်းတွင် စံချိန်တင်ရောင်းချခဲ့ရကြောင်း ၁၁ ကြိမ်မြောက် ရောင်းချပြီးချိန် ထုတ်ပြန်သည့် ၂၀၂၀-၂၀၂၁ခုနှစ်ဘဏ္ဍာနှစ်အတွက် ဗဟိုဘဏ်က ထုတ်ပြန်သည့် ငွေးကြေးမူဝါဒအကောင်အထည်ဖော်ဆောင်ရွက်ချက် အစီရင်ခံစာတွင် တွေ့ရသည်။

ယခင်အာဏာမသိမ်းခင် ငွေတိုက်စာချုပ်များကို ပုဂ္ဂလိကလုပ်ငန်းရှင်များနှင့်ဘဏ်များမှ ဝယ်ယူမှုနည်းခဲ့ပြီး နိုင်ငံပိုင်ဘဏ်များမှ အများအပြားဝယ်ယူခဲ့သည်။ စစ်ကောင်စီလက်ထက်တွင် ငွေတိုက်စာချုပ်ရောင်းချရငွေမှာ ၄၆ ကြိမ်အတွင်း ကျပ်ဘီလျံ ၁၇,၈၀၀ ရှိနေပြီး အဆိုပါပမာဏမှာ စစ်ကောင်စီသတ်မှတ်ထားသည့် စစ်အသုံးစရိတ်ထက် သုံးဆကျော် များပြားနေသည်။ ထိုသို့ဝယ်ယူသူများထဲတွင် ပုဂ္ဂိလကဘဏ်များနှင့် စီးပွားလုပ်ငန်းရှင်များပါဝင်ကြောင်း Myanmar Now သတင်းဌာနကဖော်ပြသည်။
စစ်ကောင်စီ၏ငွေတိုက်စာချုပ်များသည် စစ်ကောင်စီကို ဘဏ္ဍာငွေဖြည့်တင်းပေးနေသည့်အပြင် တရားဝင်မှုလည်းမရှိကြောင်း NUGကဆိုသည်။

ဝန်ကြီး ဦးတင်ထွန်းနိုင်က "ခုနပြောခဲ့တဲ့ ငွေတိုက်စာချုပ်တွေကို သူရောင်းပိုင်ခွင့်မရှိတဲ့ တရားမဝင်အစိုးရကနေပြီးတော့ ရောင်းချတဲ့ ဒီငွေတွေကနေပြီးတော့ သူ့ရဲ့ ပြည်သူကို ပြန်လည်သတ်ဖြတ်တဲ့ အကြမ်းဖက်လုပ်ရပ်တွေအတွက် အဓိကဒေါက်တိုင်ဝင်ငွေအနေနဲ့ ရှိနေတာဖြစ်ပါတယ်။ ဒါကြောင့်မို့ကျနော်တို့အနေနဲ့က ဒီလိုမျိုး ငွေတိုက်စာချုပ်တွေရောင်းချတာတွေ ငွေတိုက်လက်မှတ်တွေ ရောင်းချတာတွေ၊ ဒီဟာတွေအားလုံးကို တရားလည်းမဝင်ဘူး ။ ဒုတိယအချက်က အဲဒီငွေတွေနဲ့ ပြည်သူကိုပြန်ပြီးတော့ အကြမ်းဖက်လုပ်ရပ်တွေ ဆောင်ရွက်နေတာဖြစ်တယ်။” ဟု ဆိုသည်။

မြန်မာနိုင်ငံတွင် အာဏာသိမ်းထားသည့် ဗိုလ်ချုပ်မှူးကြီးမင်းအောင်လှိုင်ဦးဆောင်သည့် စစ်တပ်သည် ပြည်သူ့ဘဏ္ဍာဖြင့် ဝယ်ယူထားသည့် စစ်လက်နက်များ၊ ဂျက်တိုက်လေယာဥ်များဖြင့် ပြည်သူများကို ပစ်ခတ်သတ်ဖြတ်မှုများပြုလုပ်နေသဖြင့် စစ်ကောင်စီ၏ဝင်ငွေရလမ်းများကို ဖြတ်တောက်ရန်အတွက် ဒီမိုကရေစီရေးလှုပ်ရှားသူများက အပြင်းအထန်ကြိုးစားနေကြဆဲဖြစ်သည်။

စာတည်း - သန့်ဇော်(သန်လျင်)

#mizzima
#NUG
#ပြည်သူ့ဘဏ္ဍာ
#ငွေတိုက်စာချုပ်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မြန်မာ့အရေးအပေါ် တရုတ်ရဲ့ သဘောထား ရှင်းရှင်းလင်းလင်း မြင်ရပြီလား | သတင်းသုံးသပ်ချက်
=================

မြန်မာစစ်ကောင်စီကို လက်နက်ရောင်းချနေတယ်ဆိုတဲ့ စွပ်စွဲချက်တွေကို တရုတ်အစိုးရက မြိုတော် ဘေကျင်းမှာ ပုံမှန်ကျင်းပတဲ့ တရုတ်နိုင်ငံခြားရေး ဝန်ကြီးရဲ့ သတင်းစာရှင်းလင်းပွဲမှာ ပြောရေးဆိုခွင့်ရှိသူ တစ်ဦးဖြစ်တဲ့ မစ္စတာ မောင်နင်းက ကန့်ကွက်လိုက်ပါတယ်။

ဒါ့အပြင် မြန်မာနိုင်ငံနဲ့ ပတ်သက်ပြီး ကုလသမဂ္ဂ အထူးကိုယ်စားလှယ် တင်သွင်းတဲ့ အစီအရင်ခံစာဟာ လုပ်ပိုင်ခွင့်ထက် ကျော်လွန်နေတယ်လို တရုတ်အစိုးရက တုန့်ပြန်လိုက်တာ ဖြစ်ပါတယ်။

တရုတ်နဲ့ ရုရှားနိုင်ငံတွေက မြန်မာစစ်ကောင်စီကို စစ်လက်နက်ပစ္စည်းတွေ တင်သွင်း ရောင်းချနေတယ်လို ကုလသမဂ္ဂရဲ့ လူ့အခွင့်အရေး အထူးကိုယ်စားလှယ် တွမ်အင်ဒရူး မေလက တင်သွင်းတဲ့ အစီအရင်ခံစာမှာ ဖော်ပြထားတဲ့အပေါ် တရုတ်က ပြန်လည်ကန့်ကွက်လိုက်တာပါ။ 

လူ့အခွင့်အရေး အထူးကိုယ်စားလှယ်ရဲ့ အစီအရင်ခံစာဟာ အချုပ်အခြာအာဏာပိုင်တဲ့ နိုင်ငံတွေအကြား စစ်လက်နက်ပစ္စည်း ပုံမှန် အရောင်းအဝယ်လုပ်တာကို အပုပ်ချထားတဲ့အပြင် မမှန်ကန်တဲ့ အချက်အလက် တွေကို အခြေခံထားတယ်လိုလည်း တရုတ်အစိုးရက တုန့်ပြန်ထားပါတယ်။

လွတ်လပ်တဲ့ နိုင်ငံအချင်းချင်းကြားမှာ သာမန်လက်နက် ရောင်းဝယ်တာကို နာမည်ဆိုးတပ်ထားပြီး အချက်အလက်တွေကိုလည်း လွဲမှားစွာ ဖော်ပြထားတဲ့အတွက် တရုတ်အစိုးရက ခိုင်ခိုင်မာမာ ကန့်ကွက်တယ် လိုလည်း မစ္စတာ မောင်နင်းက ဆိုပါတယ်။

မီဒီယာတွေကတော့ မြန်မာစစ်ကောင်စီဟာ အာဏာသိမ်းယူပြီးတဲ့နောက် အရပ်သားတွေကို ပစ်မှတ်ထား တိုက်ခိုက်သတ်ဖြတ်တာ အပါအဝင် ကိုယ့်နိုင်ငံသားတွေအပေါ် အကြမ်းဖက်သတ်ဖြတ်နေတဲ့ သက်သေ အထောက်အထား အများအပြားတွေ့ရှိနေရတဲ့ အခြေအနေမျိုးမှာတောင် တရုတ်နိုင်ငံက မြန်မာပြည်မှာ ကုန်သွယ်ရေးဆိုင်ရာ ရင်းနှီးမြှုပ်နှံမှုတွေ ပြုလုပ်နေပြီး တရုတ်နိုင်ငံခြားရေးဝန်ကြီး အပါအဝင် တရုတ်နိုင်ငံက ထိပ်တန်းအရာရှိတွေက စစ်ကောင်စီနဲ့ တွေ့ဆုံဆွေးနွေးမှုတွေ လုပ်နေတာ ဘာကြောင့်လဲဆိုတဲ့ မေးခွန်း ထုတ်ခဲ့ကြပါတယ်။

မီဒီယာတွေရဲ့ မေးမြန်းချက်တွေကို မစ္စတာ မောင်နင်းက မြန်မာ့အရေးနဲ့ ပတ်သက်ရင် တရုတ်ရဲ့ ရပ်တည်ချက်က ပြောင်းလဲမှုမရှိဘဲ ရှင်းရှင်းလင်းလင်း ရှိကြောင်းနဲ့ အခြေခံ ဥပဒေ မူဘောင်ထဲကနေ တရားဝင်နိုင်ငံရေး ဆွေးနွေးပြီး ပဋိပက္ခတွေကို ဖြေရှင်းရမှာဖြစ်တယ်လို ဖြေကြားခဲ့ပါတယ်။

မြန်မာ့အရေးအတွက် နိုင်ငံတကာရဲ့ ကြိုးပမ်းမှုတွေကလည်း မြန်မာ့နိုင်ငံရေးနဲ့ လူမှုရေးတည်ငြိမ်စေဖို၊ ငြိမ်းချမ်းရေးနဲ့ ပြည်ထောင်စု ပြန်လည်သင့်မြတ်ရေးမှာ ပိုတိုးတက်စေဖို ပဋိပက္ခတွေ ပိုမိုးဆိုးရွားမှု မရှိစေရေး တိုအတွက် အထောက်အပံ့ ဖြစ်လိုလိုတယ်လိုလည်း မစ္စတာမောင်နင်းက နိုင်ငံတကာကို သတင်းစကား ပါးလိုက်ပါတယ်။

ကုလသမဂ္ဂ အထူးကိုယ်စားလှယ်အနေနဲ့လည်း အထူးကိုယ်စားလှယ်ဆိုတဲ့ ဂုဏ်သိက္ခာကို ထိခိုက်မှု မရှိရအောင် နိုင်ငံရေးအစီအစဉ် ဆောင်ရွက်တာမျိုးကို ရပ်တန့်ပါဆိုပြီးတော့လည်း တရုတ်အစိုးရက တောင်းဆိုလိုက်ပါသေးတယ်။

မစ္စတာမောင်နင်းရဲ့ ပြောကြားချက်တွေထဲမှာ မြန်မာနိုင်ငံကို လက်နက်လုံးဝ မရောင်းဘူးဆိုတဲ့ စကား မတွေ့ရပါဘူး။ 
ဒါကိုကြည့်ရင် တရုတ်နိုင်ငံက ကိုယ့်ပြည်သူကို ပြန်သတ်ဖြတ်နေတဲ့ မြန်မာစစ်ကောင်စီကို စစ်လက်နက် ပစ္စည်းတွေ ရောင်းချနေပြီး တွေ့ဆုံဆွေးနွေးရေးနဲ့ အဖြေရှာဖို လမ်းကြောင်းကိုပဲ ယုံကြည်တဲ့အကြောင်း နိုင်ငံတကာကို ပြသလိုက်တာလို ယူဆရပါတယ်။
မြန်မာ့အရေးနဲ့ ပတ်သက်လို တရုတ်ရဲ့ ရပ်တည်ချက်က ခိုင်ခိုင်မာမာရှိပြီးသားဆိုတာဟာ စစ်ကောင်စီရဲ့ နိုင်ငံရေးထွက်ပေါက်ကို ဖွင့်ပေးဖိုလားလို မေးခွန်းထုတ်ရမလို ဖြစ်နေပါတယ်။ သေချာတာကတော့ တရုတ်ဟာ မြန်မာပြည်သူတွေဘက်မှာ မရှိဘူးဆိုတာပါပဲ။

တရုတ်အစိုးရဟာ ကုလသမဂ္ဂကို ဝေဖန်ကန့်ကွက်တဲ့အပြင် ဒီမိုကရေစီအကျိုးစီးပွား တစ်ခုတည်းကိုပဲ ကြည့်ပြီး ပြည်သူလူထုဘက်က ရပ်တည်နေတဲ့၊ စစ်ကောင်စီကို ပိတ်ဆိုအရေးယူမှုတွေ လုပ်နေတဲ့ အမေရိကန် အပါအဝင် အနောက်နိုင်ငံတွေရဲ့ မြန်မာ့အရေး ကြိုးပမ်းမှုတွေကိုပါ မှန်မမှန် ပြန်ဆန်းစစ်ကြဦးလို ထောက်ပြနေသလိုပါပဲ။

တရုတ်နိုင်ငံရဲ့ မူဝါဒက သူ့ရဲ့ ကိုယ်ကျိုးစီးပွားအတွက်ပဲ ကြည့်တယ်ဆိုတာ သိထားပြီး ဖြစ်ပေမယ့် ရက်စက်ရိုင်းစိုင်းတဲ့ စစ်ကောင်စီကို ပြည်သူတွေကို သတ်ဖို လက်နက်တွေ ရောင်းချတာ၊ စစ်ကောင်စီ အသက်ရှူချောင်အောင် ပြည်သူလုံးဝ လက်သင့်မခံတဲ့ တွေ့ဆုံဆွေးနွေးရေး ဆိုတဲ့ လမ်းကြောင်းပေါ် ရောက်အောင် ကူညီတာအထိကတော့ တရားလွန်လွန်းတယ်လို ဆိုရမှာ ဖြစ်ကြောင်း ဖော်ပြလိုက်ပါတယ်။

​​ထိုင်ဝမ်ကို တရုတ်ကျူးကျော်မည့် ခြိမ်းခြောက်မှုအား ဖိလစ်ပိုင် အနီးကပ် စောင့်ကြည့်
==========================

ဒေသတွင်း ဖြစ်လာနိုင်သော ပဋိပက္ခများအတွက် ဖိလစ်ပိုင်၏ အရေးပေါ် အစီအစဉ်များမှ တစ်စိတ်တစ်ပိုင်းအဖြစ် ထိုင်ဝမ်အား တရုတ် ကျူးကျော်မည့် ခြိမ်းခြောက်မှုကို အမေရိကန်၏ စစ်ရေးမဟာမိတ် ဖိလစ်ပိုင်အနေဖြင့် နေ့စဉ် စောင့်ကြည့်လျက် ရှိကြောင်း ကာကွယ်ရေးဦးစီးချုပ်ဖြစ်သူက ကြာသပတေးနေ့တွင် ပြောသည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အိန္ဒိယတွင် မြေပြိုမှုကြောင့် လူ ၁၀ ဦး သေဆုံးပြီး ၁၀၀ ကျော် ပိတ်မိနေဖွယ်ရှိ
========================

အိန္ဒိယနိုင်ငံ အနောက်ပိုင်း မဟာရက်ရှ်ထရာ ပြည်နယ်ရှိ ကျေးရွာတစ်ခုတွင် မိုးအဆက်မပြတ်ရွာသွန်းပြီး မြေပြိုမှု ဖြစ်ပွား၍ ရွာသား ၁၀ ဦးထက်မနည်း သေဆုံးပြီး နောက်ထပ် လူ ၁၀၀ ကျော် ပိတ်မိနေဖွယ် ရှိကြောင်း တာဝန်ရှိသူများက ပြောသည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင်လ ၂၀ ရက်၊ ည ၇ နာရီ The Mizzima Prime Time မဇ္စျိမ ပင်မသတင်းအစီအစဥ်
=======================

-ထိုင်းနိုင်ငံရေးဂယက်နဲ့ စစ်ကောင်စီရဲ့ ပိတ်ဆို့ကန့်သတ်မှုတွေကြောင့် ထိုင်း-မြန်မာကုန်သွယ်ရေး ထိခိုက်နေတဲ့သတင်း

-ကရင်ပြည်နယ်နဲ့ ထိုင်းနယ်တွေမှာ တိုက်ပွဲတွေပြင်းထန်နေကြောင့် ထိုင်းဘက်ခြမ်းမှာ နယ်စပ်လုံခြုံရေးတိုးမြှင့် ထားတဲ့သတင်း

-ဖိထာ၏ ဝန်ကြီးချုပ်ဖြစ်ရေး ကြိုးပမ်းချက် မအောင်မြင်ပြီးတဲ့နောက် နိုင်ငံမှာ တည်တည်ငြိမ်ငြိမ် ရှိကြဖို့ ထိုင်းအစိုးရ တိုက်တွန်းလိုက်တဲ့အကြောင်း

-ရေဖြူမြို့ စစ်ရှောင်စခန်း အချိုတွင် ရာသီ တုတ်ကွေး ဖြစ်ပွားမှု များနေတဲ့သတင်း

-ဖမ်းဝရမ်းထုတ်ခံထားရတဲ့ပူတင်ဟာ တောင်အာဖရိကနိုင်ငံကို BRICS ထိပ်သီးဆွေးနွေးပွဲသွားမတက်ရဲတဲ့သတင်း

-မော်လမြိုင်မှာ ၇၁ နှစ်အတွင်း စံချိန်တင်မိုးကြီးပြီး ရေဘေးကြောင့် ကလေးသုံးယောက် သေဆုံးခဲ့တဲ့သတင်းအပါအဝင် တခြားအရေးကြီးသတင်းတွေနဲ့ စိတ်ဝင်စားဖွယ် သတင်းတွေကို စုစည်းတင်ဆက်ပေးသွားပါမယ်။

https://www.youtube.com/live/E0WE_O3PjB4?feature=share

#7pmnews
#themizzimaprimetime
#MizzimaTV
----------------------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ဇူလိုင်လ (၂၀)ရက်၊ ကြာသပတေးနေ့ ညပိုင်း မဇ္ဈိမ ရေဒီယို အစီအစဉ်
=====================

ဒီကနေ့ည နားဆင်ရမယ့် အစီစဉ်တွေကတော့ ...

ဒိုက်ဦးထောင်ကနေ ထောင်ပြောင်းရွှေ့တယ်ဆိုပြီး ထောင်ထဲက ထုတ်သွားပြီးတဲ့နောက် တရားမဲ့ သတ်ဖြတ်ခံရတဲ့ နိုင်ငံရေးအကျဉ်းသား ၈ ဦးအထိရှိလာနေပြီဆိုတဲ့ သတင်းနဲ့အတူ အာဏာသိမ်းပြီးကတည်းက အကြမ်းဖက်တိုက်ခိုက်မှုတွေ ဖြစ်လာပြီး မြန်မာနိုင် ငံရဲ့ ပညာရေးစနစ်ဟာ စိုးရိမ်ဖွယ်အနေအထားမှာ ရှိနေတယ်လို့ ကမ္ဘာ့ဘဏ်က ထုတ်ပြန်လိုက်တဲ့ သတင်း အပါအဝင် တခြားစိတ်ဝင်စားဖွယ် ပြည်တွင်းနဲ့ နိုင်ငံတကာ သတင်းတွေကိုနားဆင်ကြရပါမယ်။

အဲ့ဒီနောက်မှာတော့ စီးပွားရေးသတင်းတွေနဲ့ ဒီကနေ့အတွက် သတင်းသုံးသပ်ချက်အစီအစဉ်ကို နားဆင်ရဖို့ရှိသလို ကျန်းမာရေးအကြောင်း ပြောပြထားတဲ့ ကျန်းမာသုတ လူမှုဘဝ အစီအစဉ်ကို နားဆင်ရမှာဖြစ်ပါတယ်။
....................................................

မဇ္ဈိမရေဒီယို ညနေပိုင်းအစီအစဉ်ကို မတ်လ ၂၆ ရက်နေ့ကစပြီး Frequency ပြောင်းလဲထုတ်လွှင့်နေတာဖြစ်တဲ့အတွက် ယခင်ဖမ်းယူနေကျ လှိုင်းတိုမီတာ ၁၆ မီတာ ၊ ၁၇.၇၃ မီဂါဟဇ်ကနေ လှိုင်းတိုမီတာ ၁၃ မီတာ၊ ၂၁.၇၁ မီဂါဟဇ်ကို ပြောင်းလဲဖမ်းယူနားဆင်ကြဖို့အတွက် မေတ္တာရပ်ခံအပ်ပါတယ်။

ဖမ်းယူနားဆင်နိုင်မယ့်အချိန်ကတော့ ထုတ်လွှင့်နေကျဖြစ်တဲ့ မြန်မာစံတော်ချိန် ညနေ ၆ နာရီခွဲကနေ ၇ နာရီခွဲအတွင်း ဖမ်းယူနားဆင်နိုင်မှာပဲဖြစ်ပါတယ်။

https://youtu.be/TQqdYjELvpI

#Mizzimaradio
#Eveningradio
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

July - 20 [ 7 Pm ] The Mizzima Primetime

Mizzima Headline News

#7pmnews #themizzimaprimetime #reels #shorts

ကုလသမဂ္ဂ လူ့အခွင့်အရေး အထူးအစီရင်ခံစာမှာ မြန်မာစစ်တပ်နဲ့ပတ်သက်ပြီး ဘာတွေပြောထားလဲ
========================

ကုလသမဂ္ဂလူ့အခွင့်အရေးကောင်စီ၏ (၅၃) ကြိမ်မြောက် ပုံမှန်အစည်းအဝေးတွင် မြန်မာနိုင်ငံ လူ့အခွင့်အရေးအခြေအနေနှင့်ပတ်သက်၍ အထူးစီရင်ခံစာကို မြန်မာနိုင်ငံဆိုင်ရာ လူ့အခွင့်အရေး အထူးကိုယ်စားလှယ် တွမ်အင်ဒရူးက တင်သွင်းခဲ့သည်။ ထို့အပြင် အစ္စလာမ်မစ်ပူးပေါင်းဆောင်ရွက်ရေးအဖွဲ့ (OIC) က တင်သွင်းသော ဆုံးဖြတ်ချက်အဆိုကို ဆွေးနွေးမှုလည်း ပြုလုပ်ခဲ့သည်။ အဆိုပါ အစီရင်ခံစာနှင့် ဆုံးဖြတ်ချက်တို့နှင့်ပတ်သက်၍ အမျိုးသားညီညွတ်ရေးအစိုးရ (NUG) ၏ လူ့အခွင့်အရေးဆိုင်ရာ ပြည်ထောင်စုဝန်ကြီး ဦးအောင်မျိုးမင်းကို Human Rights Barometer အစီအစဉ်တွင် မေးမြန်းထားသည်။

https://youtu.be/vLHrx8H4W7I

#Human Rights Barometer
#တွမ်အင်ဒရူး
#ရိုဟင်ဂျာ
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

လူမျိုးတုန်း သတ်ဖြတ်မှု ထပ်ကြုံမှာကို စိုးရိမ်တယ်လို့ ရိုဟင်ဂျာ ဒုက္ခသည်တွေ ပြော
=======================

မဇ္ဈိမ ။ ။ ရခိုင်မြောက်ပိုင်းမှာ ပြီးခဲ့တဲ့ ၂၀၁၇ ခုနှစ်က ဖြစ်ပျက်ခဲ့တဲ့ လူမျိုးတုန်း သတ်ဖြတ်မှု Genocide လို  အဖြစ်အပျက်မျိုး ထပ်ကြုံရမှာကို စိုးရိမ်တယ်လို့ တစ်ဘက် ဘင်္ဂလားဒေ့ရှ် နိုင်ငံရောက် ရိုဟင်ဂျာ ဒုက္ခသည်တွေက မဇ္ဈိမကို ပြောပါတယ်။

ဘင်ဂလာဒေ့ရှ်နိုင်ငံဟာ သေးငယ်တဲ့ နိုင်ငံတစ်ခုဖြစ်တာကြောင့် ရိုဟင်ဂျာ ဒုက္ခသည် ၁ သန်းကျော် နေထိုင်ဖို့၊ ရိက္ခာ၊ ရေနဲ့ အိမ်သာတွေ အခက်အခဲရှိတယ် လို့လည်း ပြောပါတယ်။

ရိုဟင်ဂျာတွေကို လူမျိုးတုံး သတ်ဖြတ်ဖို့ ညွှန်ကြားခဲ့တဲ့ ဗိုလ်ချုပ်မှူးကြီး မင်းအောင်လှိုင်ဟာ လက်ရှိမှာ အာဏာသိမ်းပြီး အရပ်သားပြည်သူတွေအပေါ် လူ့အခွင့်အရေး ချိုးဖောက်နေတယ်လို့ လူ့အခွင့်အရေး ကိုယ်စားလှယ် တွမ်အင်ဒရူးက ဇွန်လအတွင်းမှာ ပြောကြားထားပါတယ်။

https://youtu.be/naLqhCZC1r0

#ရိုဟင်ဂျာ
#Mizzima
#Genocide
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

"စစ်ကောင်စီတပ် အထိုင်ချ တပ်စွဲလိုက်တဲ့ ရွာတွေဟာ ပျူရွာတွေ ဖြစ်လာတယ်"
=========================

MTO ။ ။ စစ်တပ်က အာဏာသိမ်းလိုက်ပြီးနောက် ၂၀၂၁ ခုနှစ် မတ်လ ၅ ရက်နေ့မှာ မန္တလေးတိုင်းဒေသကြီး ပျူစောထီးအဖွဲ့ အထက်ဗမာပြည် နဲ့ ရန်ကုန်တိုင်းဒေသကြီး ပျူစောထီးအဖွဲ့ အောက်မြန်မာပြည်တွေကို ဖွဲ့စည်းကြောင်း ကြေညာခဲ့ပါတယ်။

အဲ့ဒီနောက်မှာတော့ စစ်ကောင်စီတပ်ဖွဲ့ဟာ သူတို့ကို တော်လှန်နေတဲ့ အညာဒေသတွေမှာ ကျေးရွာတွေ ကို စစ်ကြောင်းထိုးဝင်ရောက် အထိုင်ချတပ်စွဲပြီးနောက် ပျူစောထီးအဖွဲ့ဝင်တွေ ဖြစ်အောင် စည်းရုံးမှုတွေ ပြုလုပ်ကြပါတယ်။

စစ်ကောင်စီတပ်ဖွဲ့ ဟာ ပျူစောထီးအဖွဲ့ ဝင်ဖြစ်လာတဲ့သူတွေကို လက်နက်တပ်ဆင်ပေးတာ စိတ်ကြိုက် လုပ်ပိုင်ခွင့်ပေးတာတွေအပေါ် သာယာပြီး ပျူစောထီးအဖွဲ့ ဝင်တွေ ဖြစ်လာကြတာလို့ မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးအဖွဲ့ (CDSOM) ရဲ့ ခေါင်းဆောင်ကိုနွေဦးက မဇ္ဈိမကို ပြောပါတယ်။

https://youtu.be/ku6utTo1svM

တင်ဆက်၊တည်းဖြတ် -- MTO

#စစ်ကောင်စီ
#ပျူ
#Mizzima
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U

မင်းလှမြို့တွင် သစ်နှင့်မီးသွေးခိုးထုတ်သောကားကို PDF ဖမ်းဆီး
=================

ရွှေနွယ်
(မဇ္ဈိမ) ။ ။ ပဲခူးတိုင်းအနောက်ခြမ်း မင်းလှမြို့နယ် စိန်ကန့်လန့်−မြို့ချောင်းလမ်း ခါချဉ်တောင်အနီးတွင် စစ်ကောင်စီတပ်နှင့်ပူးပေါင်း၍ ပဲခူးရိုးမအတွင်းမှ သစ်နှင့်မီးသွေးများ ခိုးထုတ်လာသောကားအား PDF မှပစ်ခတ်ဖမ်းဆီးကာ မီးရှို့ခဲ့ကြောင်းဒေသခံများထံမှ သိရသည်။

ဇူလိုင်လ ၁၉ ရက်နေ့ ညနေ ၅ နာရီ ၂၀ မိနစ်ခန့်တွင် ဖမ်းဆီးခဲ့ခြင်းဖြစ်ပြီး ပစ်ခတ်မှုကြောင့် ယာဉ်မောင်းနှင့် အခြားအမျိုးသားတစ်ဦးတို့ သေဆုံးခဲ့ကြောင်း သာယာဝတီခရိုင် ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက ပြောသည်။

" ကျွန်တော်တို့ အရင်ရက်ကတည်းက သတိပေးခဲ့ပြီးသား၊ စာလည်းထုတ်ထားပြီးသားပဲဗျ၊ သတိမပေးဘဲ လုပ်တာမဟုတ်ဘူး၊ သေဆုံးသူတွေဟာလည်း စစ်ကောင်စီတပ်နဲ့ ပူးပေါင်းနေတဲ့သူတွေပါပဲ။ မနေ့ညက ကားငါးစီးနဲ့ စစ်ကောင်စီတပ်သားတွေ အလောင်းကို လာသယ်တယ်၊ လာသယ်တာကို အရှေ့မှာ ပြည်သူ လေးဦးကိုဖမ်းပြီး ရှေ့ကလွှတ်တယ် ဒိုင်းအနေနဲ့ပေါ့။ လက်ရှိတော့ သူတို့ဘက်က အင်အား ၁၀၀ လောက် ရိုးမပေါ်ရောက်နေတယ်" ဟု သာယာဝတီခရိုင် ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက မဇ္ဈိမကိုပြောသည်။

သေဆုံးခဲ့သူနှစ်ဦးမှာ မင်းလှမြို့တွင် နေထိုင်သူများဟုသိရပြီး ၎င်းတို့၏ရုပ်အလောင်းများသည် ယင်းနေ့ ည ၂ နာရီ ၁၅ မိနစ်ခန့်တွင် မင်းလှမြို့နယ်ဆေးရုံ၊ ရင်ခွဲရုံသို့ရောက်ရှိလာကြောင်း ဒေသခံတစ်ဦးကလည်းပြောသည်။

" တက်လာတာက ကားက လေးစီး။ ဗိုလ်မှူးကျော်သူရနဲ့ ပေါင်းလုပ်တာ၊ ဗိုလ်မှူးကျော်သူရက ဒကစ ကရောက်လာတာ လက်ရှိမှာ မင်းလှအုပ်ချုပ်ရေးကောင်စီမှာ ပါနေတယ်၊ သူနဲ့ပေါင်းလုပ်နေတာ သစ်ခိုးထုတ်တာတွေက၊ အခုရှို့ခံရတာက တစ်စီးပဲ။ ကျန်သုံးစီးက ဘယ်ရောက်သွားလဲမသိ။ ရှို့ခံရတဲ့ကားပေါ်မှာက မီးသွေးတွေကိုတင်လာတာ” ဟု အထက်ပါ မင်းလှမြို့ဒေသခံက ပြောသည်။

သစ်ခိုးထုတ်ခြင်းသည် ပဲခူးတိုင်းအနောက်ခြမ်းရှိ စစ်ကောင်စီ၏ အဓိကဝင်ငွေရလမ်းကြောင်းတစ်ခုဟုသိရပြီး ပစ်ခတ်မှုကို သာယာဝတီခရိုင် ပြည်သူ့ကာကွယ်ရေးတပ်ရင်း (၃၈၀၂) မှ လုပ်ဆောင်ခဲ့ခြင်းဖြစ်ကြောင်းဆိုသည်။

ပဲခူးရိုးမအတွင်းတွင် တောင်ကတုံးများဖြစ်နေသည့်အထိ ဆိုးရွားသော သစ်တောပြုန်းတီးမှုဖြစ်ပေါ်နေ၍ NLD အစိုးရလက်ထက်တွင် ပဲခူးရိုးမအတွင်းမှ သစ်ထုတ်လုပ်မှုကို ၂၀၁၇−၂၀၁၈ ဘဏ္ဏာနှစ်မှစတင်ကာ ၂၀၂၇ ခုနှစ်အထိ ၁၀ နှစ်တိတိ ရပ်ဆိုင်းထားခဲ့သည်။

သို့သော် စစ်အာဏာသိမ်းပြီးနောက်ပိုင်းတွင် ရိုးမအတွင်းမှ သစ်ခိုးထုတ်ရောင်းချမှုများနှင့်အတူ စီးပွားဖြစ်မီးသွေးဖုတ်ခြင်းများကို ပြုလုပ်လျက်ရှိကြောင်း ဒေသခံများ၏ပြောဆိုချက်အရ သိရသည်။

စာတည်း ။ ။။ Alden
စာမူတည်းဖြတ်။ ။သန့်ဇော်(သန်လျင်)

https://youtu.be/8DyWE3RcYzk

#မီးသွေး
#သစ်
#ပဲခူးတိုင်း
#မင်းလှမြို့နယ်
#စိန်ကန့်လန့်
#ခါချဉ်တောင်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U