Mizzima
✔
47.6K subscribers
33.8K photos
2.57K videos
36 files
76.5K links
Share & Follow us. https://mizzima.carrd.co Mizzima News brings you the latest news and insightful reports about Myanmar.
Download Telegram
ဖရူဆိုတိုက်ပွဲတွင် စစ်ကောင်စီတပ်ထံမှ လက်နက်ခဲယမ်းများ သိမ်းဆည်းရရှိကြောင်း KNDF ပြော
👏8😁2
ဖရူဆိုတိုက်ပွဲတွင် စစ်ကောင်စီတပ်ထံမှ လက်နက်ခဲယမ်းများ သိမ်းဆည်းရရှိကြောင်း KNDF ပြော
=================

ဂျူချန်း
(မဇ္ဈိမ)။ ။ ကရင်နီပြည်၊ ဖရူဆိုမြို့နယ်၊ ထီးသော်ကူးကျေးရွာရှိ စစ်ကောင်စီတပ်စခန်းတခုအား ကရင်နီ တော်လှန်ရေးပူးပေါင်းတပ်ဖွဲ့မှ သွားရောက်တိုက်ခိုက်ခဲ့ရာ စစ်ကောင်စီတပ် အကျအဆုံး၊ အထိအခိုက် များပြားပြီး လက်နက်ခဲယမ်းများသိမ်းဆည်းရရှိကြောင်း KNDF ဗဟိုသတင်းနှင့် ပြန်ကြားရေးတာဝန်ခံက မဇ္ဈိမကို အတည်ပြုပြောကြားသည်။

ထီးသော်ကူးကျေးရွာအတွင်း အင်အား ၅၀ ခန့်ဖြင့် တပ်စွဲထားသည့် တပ်မ(၅၅) လက်အောက်ခံ ခမရ (၁၁၂)မှ စစ်ကောင်စီတပ်သားများကို ဩဂုတ်လ ၁၂ ရက်နေ့ ညနေပိုင်းတွင် ပူးပေါင်းတပ်ဖွဲ့က ဝင်ရောက် တိုက်ခိုက်ခဲ့ခြင်း ဖြစ်သည်။

ထိုနေရာတဝိုက်တွင် လက်ရှိအချိန်ထိ နှစ်ဘက်စစ်ရေးတင်းမာကာ တိုက်ပွဲများ ဖြစ်ပွားနေဆဲဟု KNDF က ပြောသည်။
“စစ်ရေးက မပြီးပြတ်သေးဘူးပေါ့လေ၊ ခုချိန်အထိ နေ့ရော၊ ညရော ထိတွေ့တိုက်ပွဲတွေဖြစ်နေတော့ အခြေအနေငြိမ်မှပဲ တိတိကျကျ ထုတ်ပေးပါမယ်၊ အဲ့ဒီရက်မှာတော့ ကျနော်တို့ ကာကွယ်ရေးဘက်က ဒဏ်ရာအနည်းငယ်ရတာ ရှိတာပေါ့” ဟု KNDF ဗဟိုသတင်းနှင့်ပြန်ကြားရေးမှ တာဝန်ရှိသူတဦးက မဇ္ဈိမ ကို ပြောသည်။

သိမ်းဆည်းရမိသည့် လက်နက်များမှာ MA-1 လေးလက်၊ MA-4 တလက်၊ MA-3 တလက်၊ အီနာဂါဗုံးသီး ၂၃ ခု၊ ၆၀ မမ ဗုံးသီး ရှစ်လုံး၊ လက်ပစ်ဗုံး ငါးလုံး၊ M- 14 နင်းမိုင်း နှစ်လုံး၊ ၄၀ မမ ဗုံးသီး ခြောက်လုံး၊ RPG ထိပ်ဖူး ကိုးခု၊ MA magazine ၁၃ ခု၊ ပို့ယမ်း ငါးချောင်းနှင့် ကျည်ဆံများဖြစ်ကြောင်း KNDF က ပြောသည်။
ထို့ပြင် စစ်ကောင်စီတပ်သားများလွယ်သည့် ခြင်းကျား ကိုးလုံးကိုလည်း သိမ်းဆည်းရမိထားကြောင်း ဆိုသည်။

ဩဂုတ်လ ၁၂ ရက်နေ့ ဖရူဆိုတိုက်ပွဲအတွင်း သေဆုံးသူများအနက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က စစ်မှုထမ်းကောင်းတံဆိပ်ချီးမြှင့်ထားသည့် ဒုတပ်ကြပ်အောင်နိုင်ဝင်းလည်း ပါဝင် ကြောင်း KNDF ဒု-စစ်ဦးစီးချုပ်မာဝီက ၎င်း၏ ဖေစ်ဘွတ်တွင် ဓာတ်ပုံနှင့်တကွ ဖော်ပြထားသည်။

ဒီးမော့ဆို-ဖရူဆို လမ်းပိုင်းတွင် စစ်ကောင်စီတပ်နှင့် ကရင်နီတော်လှန်ရေး ပူးပေါင်းတပ်ဖွဲ့များကြား ပြီးခဲ့သည့် ဩဂုတ်လ ၂ ရက်နေ့မှ စတင်ကာ လက်ရှိအချိန်အထိ တိုက်ပွဲပြင်းထန်နေဆဲဖြစ်သည်။

စာတည်း။ ။ နောင်နောင်
စာမူတည်းဖြတ်။ ။စောဖေ

#ဖရူဆိုတိုက်ပွဲ
#ဒီးမော့ဆို
#စစ်ကောင်စီတပ်
#Mizzima

ဓါတ်ပုံ-ဩဂုတ် ၁၂ ရက်နေ့ ဖရူဆိုတိုက်ပွဲတွင် သိမ်းဆည်းရမိထားသည့် လက်နက်ခဲယမ်းများ

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍8❤3👏2🥴2
အာဏာရှင်စနစ် အဆုံးသတ်နိုင်ရေး အဖွဲ့အစည်း အားလုံးနဲ့လက်တွဲလုပ်ဆောင်မယ်လို့ KNU ဥက္ကဌပြော
=================

အာဏာရှင်စနစ်ရဲ့ လမ်းစဉ်နဲ့ လုပ်ငန်းအားလုံး အဆုံးသတ်ရေးအတွက် စစ်အာဏာရှင်စနစ်ကို တွန်းလှန်တိုက်ခိုက်နေတဲ့ တိုင်းရင်းသားလက်နက်ကိုင်တွေ၊ ဒီမိုကရေစီအင်အားစုတွေ အပါအဝင် လူထုအခြေပြု အဖွဲ့အစည်းတွေနဲ့ ပူးပေါင်းဆောင်ရွက်မည်လို့ ကရင်အမျိုးသားအစည်းအရုံး (KNU) ဥက္ကဋ္ဌ ပဒိုစောကွယ်ထူးဝင်းက ပြောပါတယ်။

ဩဂုတ်လ ၁၂ ရက်နေ့မှာ ကျရောက်ခဲ့တဲ့  ၇၃ နှစ်မြောက် “ကရင့်အမျိုးသား အာဇာနည်နေ့” မိန့်ခွန်းမှာ KNU ဥက္ကဌ ပဒိုစောကွယ်ထူးဝင်းက ထည့်သွင်းပြောကြားခဲ့တာဖြစ်ပါတယ်။

မြန်မာနိုင်ငံမှာ တိုင်းရင်းသားလူမျိုးပေါင်းစုံ နေထိုင်ကြပြီး စစ်အုပ်စုဟာ မဟာလူမျိုးကြီး ဝါဒကို အသုံးချကာ အာဏာရှင်စနစ်ကို တည်ဆောက်ပြီး ကိုယ်ကျိုးရှာနေကြောင်း၊ အာဏာရှင် စနစ် အပြင် အာဏာရှင်စနစ်ရဲ့ လမ်းစဉ်နဲ့ အုပ်ချုပ်ရေး လုပ်ငန်းအားလုံး အဆုံးသတ်နိုင်ရေးအတွက် အာ ဏာရှင်စနစ်နဲ့ အာဏာရှင်စနစ်ကို တွန်းလှန်တိုက်ခိုက်နေကြတဲ့ တိုင်းရင်းသားတော်လှန်ရေး အဖွဲ့ အစည်းများ၊ ဒီမိုကရေစီအင်အားစုများ၊ လူထုအခြေပြုအဖွဲ့အစည်းများနဲ့လက်တွဲ လုပ်ဆောင် ကြရ မည် ဖြစ်ကြောင်း KNU ဥက္ကဌပဒိုစောကွယ်ထူးဝင်းက ပြောဆိုခဲ့တာဖြစ်ပါတယ်။

၁၉၆၂ ခုနှစ်မှစကာ မဟာလူမျိုးကြီးဝါဒကို ကိုင်စွဲပြီး နိုင်ငံရဲ့ အာဏာကို အတင်းအဓမ္မ ရယူကာ စစ် အုပ်ချုပ်ရေးစနစ်ကို ပုံစံအမျိုးမျိုးဖြင့် ကျင့်သုံးနေကြောင်း၊ အာဏာရှင်အုပ်စုသည် စစ်တပ်ကို အသုံးချ ပြီး ပြည်သူလူထုနဲ့ တိုင်းရင်းသား လူမျိုးများရဲ့ ဆန္ဒကို ဆန့်ကျင်ကာ ဖိနှိပ်အုပ်ချုပ်လျက်ရှိကြောင်း၊ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့မှစပြီး နိုင်ငံရဲ့ အာဏာကို နောက်ထပ်တစ်ဖန် အတင်းအဓမ္မ ရယူခဲ့ရာ ပြည်သူလူထုမှ လုံးဝလက်ခံနိုင်ခြင်းမရှိသဖြင့် နည်းလမ်းမျိုးစုံဖြင့် ဆန့်ကျင်လျက်ရှိပြီး လက်နက်ကိုင်တော်လှန်ရတဲ့ အဆင့်သို့ ရောက်ရှိခဲ့ရာ အာဏာရှင်အုပ်စုမှလည်း စစ်တပ်ကို အသုံးချ ကာ စစ်ရေးအရ အကြမ်းဖက်တဲ့ နည်းလမ်းများကို ဆိုးဆိုးရွားရွား လုပ်ဆောင်နေကြောင်း ပဒိုစောကွယ်ထူးဝင်းက ပြောပါတယ်။

စစ်ရေးဖြင့် အကြမ်းဖက်မှုဟာ  မြန်မာလူမျိုးအမားစုနေထိုင်တဲ့နေရာ၊ ဒေသများသို့ပင် ပြန့်နှံ့သက်ရောက်လျက်ရှိပြီး စစ်အုပ်စုမှ လက်နက်ကြီးများ၊ အမြောက်ကြီးများအပြင် တိုက်လေ ယာဉ် များပါ အသုံးပြုတိုက်ခိုက်နေပေမယ့်လည်း တိုင်းရင်သားပြည်သူလူထုနေအဖြင့် အညံ့မခံပဲ အာဏာရှင်အုပ်စုအား နိုင်ငံရေး၊ စစ်ရေးအပြင် သံတမန်နည်းလမ်း စတဲ့နည်းလမ်းအမျိုးမျိုးဖြင့် တော်လှန်နေကြောင်း ဆိုထားပါတယ်။

အစုအဖွဲ့အားလုံးကို စုစည်းပြီး စစ်တပ်ရဲ့ ကံကြမ္မာဟာ လူထုလက်ထဲကို ပြန်လည်ရောက်ရှိတဲ့အထိ ဆောင်ရွက်ရမယ်လို့လည်း ပဒိုစောကွယ်ထူးဝင်းက ပြောကြားခဲ့ပါတယ်။

အမျိုးသားညီညွတ်ရေးအစိုးရ(NUG) ယာယီသမ္မတ ဒူဝါလရှီးလကလည်း  အမျိုးသားတန်းတူညီမျှရေးနဲ့ ဖက်ဒရယ်ဒီမိုကရေစီပြည်ထောင်စု တည်ထောင်နိုင်ရေးအတွက် ကရင်တိုင်းရင်းသားများနဲ့ အတူတကွရပ်တည်ပြီး ရန်သူဖက်ဆစ်စစ်တပ်ကို အပြီးတိုင်ချေမှုန်းသွားမှာဖြစ်ကြောင်း (၇၃)နှစ်မြောက် ကရင့်အာဇာနည်နေ့ဂုဏ်ပြုစကား ပြောကြားရာမှာ ထည့်သွင်းပြောကြားခဲ့ပါတယ်။
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကိုလက်မှတ် ရေးထိုးခဲ့ပေမယ့် စစ်အာဏာသိမ်းပြီးကတည်းက NCA ဟာ ပျက်စီးသွားပြီလို့ KNU ကထုတ်ဖော် ပြောဆိုထားပါတယ်။

https://youtu.be/OJRcPTX0-jw

#PoliticalNews
#Mizzima
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်.
https://bit.ly/2VhJ12U
❤8👍4😁2
​​ကျိုက်မရောနှင့် ကျုံဒိုးမှ စစ်ကောင်စီစခန်းများ ဒရုန်းဖြင့်ဗုံးကြဲတိုက်ခိုက်ခံရ၍ ၆ ဦးသေ၊ ၇ ဦး ဒဏ်ရာရ
==================

ဂျူချန်း
(မဇ္ဈိမ)။ ။မွန်ပြည်နယ် ကျိုက်မရောမြို့နယ် ချောင်းနှစ်ခွစစ်ဆေးရေးဂိတ်နှင့် ကရင်ပြည်နယ် ကော့ကရိတ် မြို့နယ် ကျုံဒိုးမြို့ရှိ ဂျိုင်းမြစ်ကူးတံတားအနီးမှ စစ်ကောင်စီစခန်းတို့ကို ဒရုန်းဖြင့် ဗုံးကြဲတိုက်ခိုက်ခဲ့ ကြောင်း Alpha Bats Drone တပ်ဖွဲ့မှ တာဝန်ရှိသူတဦးက ပြောသည်။

ဩဂုတ်လ ၁၁ ရက်နေ့ ညနေ ၆ နာရီခန့်တွင် စစ်ကောင်စီတပ်မှအင်အား ၃၀ ခန့် အထိုင်ချလေ့ရှိသည့် ကျိုက်မရောမြို့နယ် အတ္ထရံတံတား (ချောင်းနှစ်ခွ) စစ်ဆေးရေးဂိတ်ကို KNDO တပ်ရင်း(၆)၊ Alpha Bats ဒရုန်းတပ်ဖွဲ့တို့ ပူးပေါင်းကာ fixed wing အမျိုးအစားဒရုန်းဖြင့် ဗုံးသီးချတိုက်ခိုက်ခဲ့ရာ စစ်ကောင်စီတပ် သား ခြောက်ဦးသေဆုံးကာ လေးဦး အပြင်းအထန်ဒဏ်ရာသွားကြောင်း သိရသည်။
“ခြောက်ယောက်သေ၊ လေးယောက်ထိတယ်။ ကျနော်တို့ နယ်မြေခံသတင်းရင်းမြစ်ကလည်း အတည်ပြု ထားပါတယ်။ ရင်း(၆) က အဲဒီအထိ ပေါက်တယ်လေ” ဟု Alpha Bats ဒရုန်းတပ်ဖွဲ့တာဝန်ရှိသူတဦးက မဇ္ဈိမကိုပြောသည်။

ကျုံဒိုးမြို့ ဂျိုင်းတံတားထိပ်ရှိစစ်ကောင်စီစခန်းသို့ အရှေ့တောင်တိုင်းစစ်ဌာနချုပ်မှ ဒုတိုင်းမှူးလာမည်ဟု သတင်းရရှိသောကြောင့် ဩဂုတ်လ ၁၂ ရက်နေ့ နံနက် ၈ နာရီခွဲခန့်တွင် ဒရုန်းဖြင့် ဗုံးသီးချတိုက်ခိုက်ခဲ့ရာ နားနေဆောင်ပေါ်သို့ ကျရောက်ပေါက်ကွဲပြီး အရာရှိအဆင့်သုံးဦး ထိခိုက်ဒဏ်ရာရခဲ့ကြောင်း ဆိုသည်။

“အဲဒီစစ်ကောင်စီစခန်းမှာ နားနေဆောင်အကြီးကြီးရှိတယ်။ အဲဒီမှာဝင်နားမယ်လို့ သတင်းရတယ်။ သူတို့ ဘက်က သတင်းအရမ်းဖုံးထားတော့ အရာရှိထိတယ်လို့ပဲ သိရတယ်။ ဘယ်ရာထူးအဆင့်လဲ တိတိကျကျ မသိရဘူး။ ဒါပေမယ့် ထိသွားတဲ့ အရာရှိသုံးယောက်ထဲက တယောက်ကတော့ ပြင်းပြင်းထန်ထန် ဒဏ်ရာ ရတယ်လို့ သိရတယ်” ဟု Alpha Bats ဒရုန်းတပ်ဖွဲ့တာဝန်ရှိသူက ပြောသည်။
ဒရုန်းဖြင့် ပစ်ခတ်တိုက်ခိုက်ခံရပြီးနောက် ကျုံဒိုးမြို့အခြေစိုက် ခမရ(၅၄၆) မှ လက်နက်ကြီးဖြင့် ပစ်ခတ် ခဲ့ကြောင်းလည်း သိရသည်။

ပြီးခဲ့သည့် ဇွန်လ ၂၇ ရက်နေ့ကလည်း ကျိုက်မရောမြို့နယ်၊ ချောင်းနှစ်ခွကျေးရွာ ရဲစခန်းအား KNDO တပ်ရင်း (၆)၊ Alpha Bats Fixed Wings Drone တပ်ဖွဲ့နှင့် PDF ပူးပေါင်းအဖွဲ့က ဒရုန်းဖြင့် ဗုံးသီးငါးလုံးချ တိုက်ခိုက်ခဲ့ရာ ရဲလေးဦးသေဆုံးခဲ့သည်။

စာတည်း။ ။စောဖေ
စာမူတည်းဖြတ်။ ။စောဖေ

#ချောင်းနှစ်ခွစစ်ဆေးရေးဂိတ်
#ကျုံဒိုးမြို့
#ဒရုန်းဖြင့်ဗုံးကြဲ

ဓါတ်ပုံ- Alpha Bats တပ်ဖွဲ့ဝင်များ

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍9👏4😁2
မြဝတီ-ကော့ကရိတ် လမ်းဟောင်းကို အတက် ၁ ရက်၊ အဆင်း ၁ ရက် အသွားအလာပြုလုပ်ရန် သတ်မှတ်
👍1🔥1
မြဝတီ-ကော့ကရိတ် လမ်းဟောင်းကို အတက် ၁ ရက်၊ အဆင်း ၁ ရက် အသွားအလာပြုလုပ်ရန် သတ်မှတ်
====================

YT
(မဇ္ဈိမ)။ ။ကရင်ပြည်နယ်၊ မြဝတီ-ကော့ကရိတ်လမ်းဟောင်းတွင် အတက်တရက်၊ အဆင်းတရက်ဖြင့် ယာဉ်များ အသွားအလာပြုလုပ်ရန်သတ်မှတ်လိုက်ကြောင်း ဒေသတွင်းလူမှုကူညီရေးအသင်းထံက သိရ သည်။

“လမ်းဟောင်းကို သတ်မှတ်လိုက်တာပါ ကားတွေပိတ်လို့။ မြဝတီကနေ ကော့ကရိတ်ကို ဒီနေ့ အဆင်းဆို ပြီး သတ်မှတ်လိုက်တယ်။ မနက်ဖြန်ကျရင် ကော့ကရိတ်ကနေ မြဝတီကို အတက်၊ အရင်ကလို ပြန်ဖြစ် သွားတာပေါ့။ ထို့ကော်ကိုးလမ်းကတော့ လမ်းဟောင်းသွားလို့ရနေတာကြောင့် အသွားအလာနည်းသွား တယ်”ဟု ဒေသတွင်းလူမှုကူညီရေးအသင်း တာဝန်ရှိသူတဦးက မဇ္ဈိမကိုပြောသည်။

မိုးရွာသွန်းမှုနှင့် တောင်ကျရေတိုက်စားမှုတို့ကြောင့် ဩဂုတ်လ ၆ ရက်မှစ၍ မြဝတီ-ကော့ကရိတ် အာရှ လမ်းမကြီးပေါ်တွင် တောင်ပြိုမှု၊ လမ်းမြေပြိုကျမှုများ ဖြစ်ပွားနေပြီး လမ်းအသုံးပြု၍မရသဖြင့် ကူးသန်း သွားလာမည့် ယာဉ်ငယ်များမှာ မြဝတီ-ကော့ကရိတ် ဒေါနတောင်ပေါ်လမ်းဟောင်းအား ပြန်လည်အသုံး ပြုလာကြခြင်းဖြစ်သည်။

အဆိုပါ ဒေါနတောင်ပေါ်လမ်းဟောင်း၌ အိမ်စီးကားများနှင့် ဆိုင်ကယ်များကိုသာ ဖြတ်သန်းသွားလာခွင့် ပြုထားခြင်းဖြစ်ပြီး ကုန်တင်ယာဉ်များ သွားလာ၍မရသေးကြောင်း သိရသည်။

“အတက်ရော အဆင်းရော ယာဉ်တွေများတော့ လမ်းပိတ်တာပေါ့။ လမ်းကလည်းကျဉ်းတယ်၊ ကျဉ်းတော့ အတက်အဆင်းနှစ်ဖက်ဆုံသွားရင် ခရီးသွားရတာ ကြန့်ကြာတာပေါ့။ လမ်းကလည်း ရေတိုက်စားပြီး ပြို ထားတာတွေလည်းရှိတယ်လေ။ တချို့နေရာတွေဆို ကားတစီးစာပဲ သွားလို့ရတဲ့နေရာတွေလည်းရှိ တယ်” ဟု အဆိုပါ လူမှုကူညီရေးအသင်းတာဝန်ရှိသူက ဆက်ပြောသည်။

လက်ရှိတွင် မြဝတီ-ကော့ကရိတ်အာရှလမ်းမကြီးပေါ်၌ မြေပြိုမှုဖြစ်ပွားထားသည့် မြေစာပုံများအား ရှင်း လင်းထားပြီး မြေပြိုထားသောနေရာအား ပြုပြင်ရန်ကြိုးပမ်းနေကြဆဲဖြစ်ကာ ပြန်လည်အသုံးပြုနိုင်ရန် ကြာဦးမည်ဖြစ်ကြောင်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#ကရင်ပြည်နယ်
#မြဝတီ-ကော့ကရိတ်အာရှလမ်း
#မြေပြိုမှု

ဓါတ်ပုံ- Sett Paing Aung ပုံအညွှန်း- ဒေါနတောင်ပေါ်လမ်းဟောင်းပေါ်၌ ယာဉ်အသွားအလာများ ( ဩဂုတ်လ ၈ ရက်နေ့အခြေအနေ)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍14🔥2
This media is not supported in your browser
VIEW IN TELEGRAM
Aug - 14 [2 Pm] Mizzima News Hour

Mizzima Headline News

#2pmnews #mizzimanewshour #reels #shorts
👍4🍌2❤1
​​ကျောက်တံခါးမြို့နယ် နံဇကျေးရွာတွင် စစ်ကောင်စီတပ်၏မီးရှို့မှုကြောင့် နေအိမ် ၁၀၃ လုံး ဆုံးရှုံး
================

ရွှေနွယ်

(မဇ္ဈိမ)။ ။ပဲခူးတိုင်း၊ ကျောက်တံခါးမြို့နယ် နံဇကျေးရွာတွင် စစ်ကောင်စီတပ်၏မီးရှို့ဖျက်ဆီးမှုများကြောင့် နေအိမ် ၁၀၃ လုံး မီးလောင်ဆုံးရှုံးခဲ့ရကြောင်း မြို့နယ်ပြည်သူ့ကာကွယ်ရေးတပ်ဖွဲ့မှထုတ်ပြန်သည်။

စစ်ကောင်စီတပ်သည် နံဇကျေးရွာအား ပြီးခဲ့သည့် ဇူလိုင်လ ၂၀ ရက်နေ့မှစတင်ကာ မီးရှို့ဖျက်ဆီးခဲ့ခြင်း ဖြစ်ပြီး ဩဂုတ် ၁၃ ရက်နေ့အထိ နေအိမ် ၁၀၃ လုံး မီးလောင်ခဲ့ရခြင်းဖြစ်သည်။

ဇူလိုင်လအတွင်း နေအိမ်ခုနစ်လုံး မီးလောင်ဆုံးရှုံးခဲ့ရကာ ကျေးရွာအတွင်းအထိုင်ချ၍ ဆက်လက်မီးရှို့နေ ခြင်းဖြစ်ကြောင်း ကျောက်တံခါးမြို့နယ် ပြည်သူ့ကာကွယ်ရေးတပ်ဖွဲ့ထံမှသိရသည်။

“ဇူလိုင်လမှာ အိမ်ခုနစ်လုံး၊ ဆက်ရှို့လာတာ ဩဂုတ်လ ၁၃ ရက်နေ့အထိ ၁၀၃ လုံးရှိပြီ” ဟု ကျောက် တံခါးမြို့နယ် ပြည်သူ့ကာကွယ်ရေးတပ်ဖွဲ့၊ တာဝန်ရှိသူက အတည်ပြုပြောသည်။

ထို့ပြင် ကျေးရွာအတွင်း တပ်စွဲထားသောစစ်ကောင်စီတပ်က အဘိုးအိုတဦးနှင့် စိတ်ကျန်းမာရေးမကောင်း သူတဦးကိုလည်း သတ်ဖြတ်ခဲ့ကြောင်းဆိုသည်။ သို့သော် ဖြစ်စဉ်အသေးစိတ်နှင့် အမည်၊ အချက်အလက် များကိုမူ မဇ္ဈိမအနေဖြင့် စုံစမ်းနေဆဲဖြစ်သည်။

လက်ရှိတွင် ကျောက်တံခါးမြို့နယ်အတွင်း စစ်ရေးတင်းမာနေပြီး လက်နက်ကြီးများနှင့် စစ်ကြောင်းထိုးမှု များကြောင့် ဒေသခံ ၁၀,၀၀၀ ခန့် စစ်ရှောင်နေရသည်။

“ရွာနား ထိတွေ့မဖြစ်ရင် ဝင်နေလိုက်၊ ဖြစ်ရင် ရှောင်လိုက်နဲ့ စုစုပေါင်း အကြမ်းဖျဉ်း စစ်ရှောင် ၁၀,၀၀၀ လောက်ရှိပါတယ်” ဟု ကျောက်တံခါးမြို့နယ် ပြည်သူ့ကာကွယ်ရေးတပ်ဖွဲ့တာဝန်ရှိသူက ဆက်လက် ပြောကြားသည်။

စစ်ရှောင်များသည် နံဇ၊ သမင်အင်းကုန်း၊ တောင်ခင်၊ ကညင်ကျိုး၊ ဗောဓိကွင်းကျေးရွာအုပ်စုတို့မှဖြစ်ပြီး မြို့နယ်အတွင်းမှစစ်ရှောင်ပြည်သူများနှင့် နံဇကျေးရွာမှစစ်ရှောင်ပြည်သူများအား ဝိုင်းဝန်းစောင့်ရှောက် ကူညီပေးကြပါရန်လည်း ကျောက်တံခါးမြို့နယ် ပြည်သူ့ကာကွယ်ရေးတပ်ဖွဲ့မှ မေတ္တာရပ်ခံထားသည်။

ကျောက်တံခါးမြို့နယ်တွင် ဇူလိုင်လ ၁၉ ရက်နေ့က KNLA ၊ PDF ပူးပေါင်းတပ်များနှင့် စစ်ကောင်စီတပ် တို့အကြား တိုက်ပွဲပြင်းထန်ပြီးနောက် အထိနာခဲ့သည့်စစ်ကောင်စီတပ်က လေကြောင်းတိုက်ခိုက်မှုနှင့် ဒေသခံများပိုင်ဆိုင်သည့်နေအိမ်များကို မီးရှို့နေခြင်းဖြစ်သည်။

စာတည်း ။ ။ Alden
စာမူတည်းဖြတ်။ ။စောဖေ

#ကျောက်တံခါး
#နံဇကျေးရွာ
#နေအိမ်
#မီးရှို့
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍9😢6❤1😁1🤬1
တိုက်ပွဲနှင့် မိုင် ၂၀ ခန့်ဝေးသည့်ကျေးရွာများအား စစ်ကောင်စီတပ်ကဗုံးကြဲမှု စစ်ရာဇဝတ်မှု ကျူးလွန်ခြင်းဖြစ်ကြောင်း CNA ပြော
👍10🔥1😁1
တိုက်ပွဲနှင့် မိုင် ၂၀ ခန့်ဝေးသည့်ကျေးရွာများအား စစ်ကောင်စီတပ်ကဗုံးကြဲမှု စစ်ရာဇဝတ်မှု ကျူးလွန်ခြင်းဖြစ်ကြောင်း CNA ပြော
===============

ပါခွီး

(မဇ္စျိမ)။ ။ချင်းပြည်နယ်၊ ဖလမ်းမြို့နယ်အတွင်း တိုက်ပွဲဧရိယာနှင့် အလှမ်းဝေးသော ကျေးရွာနှစ်ရွာကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်သဖြင့် ဒေသခံ ၁၄ ဦး ဒဏ်ရာရရှိသွားကြောင်း ချင်း အမျိုးသားတပ်မတော်(CNA) ပြောခွင့်ရသူက မဇ္ဈိမကိုပြောသည်။

ဖလမ်းမြို့အခြေစိုက် စစ်ကောင်စီတပ်စခန်းကို ချင်းအမျိုးသားတပ်မတော်(CNA)နှင့် မဟာမိတ်များဝင် ရောက်တိုက်ခိုက်ပြီးနောက် တိုက်ပွဲနေရာနှင့် မိုင် ၂၀ ခန့်ကွာဝေးသည့် ရမ်ထလိုကျေးရွာနှင့် ဆွန်ထလာ ကျေးရွာတို့ကို စစ်ကောင်စီတပ်ကလေကြောင်းမှ ဗုံးကြဲခဲ့ခြင်းဖြစ်သည်။ 

ဒေသခံပြည်သူများအပေါ် အကြမ်းဖက်ဗုံးကြဲမှုသည် စက်ဆုပ်ဖွယ်လုပ်ရပ်ဖြစ်ပြီး လိုက်နာကျင့်သုံးရမည့် ကျင့်ဝတ်များကို ချိုးဖောက်ကာစစ်ရာဇဝတ်မှုကိုကျူးလွန်ခြင်းဖြစ်ကြောင်း CNA ပြောခွင့်ရသူ ဆလိုင်း ထက်နီက မဇ္ဈိမကို ပြောသည်။

“စကစရဲ့ စစ်ရာဇဝတ်မှုကျူးလွန်နေတာ အားလုံးအသိပါ။ CNF/CNA အနေနဲ့ လေယာဉ်မပျံသန်းရဇုန် အထိ တောင်းဆိုခဲ့ဖူးပြီ။ စကစအမြစ်ပြတ် ဖြုတ်ချရေးကလွဲလို့ ရွေးစရာမရှိဘူး” ဟု ဆလိုင်းထက်နီက မဇ္စျိမကိုပြောသည်။

အဆိုပါတိုက်ခိုက်မှုကြောင့် ဖလမ်းမြို့နယ် ရမ်ထလိုကျေးရွာတွင် ခုနစ်ဦးနှင့် ဆွန်ထလာကျေးရွာမှ ခုနစ် ဦး၊ စုစုပေါင်း ၁၄ ဦး ထိခိုက်ဒဏ်ရာရရှိခဲ့သည်။

ထို့ပြင် ခရစ်ယာန်ဘုရားကျောင်းနှင့် လူနေအိမ်အနည်းဆုံး နှစ်လုံး မီးလောင်ပျက်စီးခဲ့ကြောင်းလည်း သိရ သည်။

ကျေးရွာအပေါ် ဗုံးကြဲတိုက်ခိုက်မှုသည် စစ်ရာဇဝတ်မှုကို ကျူးလွန်ခြင်းဖြစ်ပြီး အစုလိုက်အပြုံလိုက် သေ စေနိုင်သည့် ဗုံးကြဲတိုက်ခိုက်သောလုပ်ရပ်ကို အပြင်းအထန်ရှုတ်ချကြောင်းလည်း ဆိုသည်။

စစ်ကောင်စီတပ်၏ အကြမ်းဖက်တိုက်ခိုက်မှုကြောင့် ထိခိုက်နစ်နာခဲ့ရသည့် ပြည်သူများနှင့်မိသားစုဝင် များကို ပံ့ပိုးကူညီမှုများပြုလုပ်ပေးကြရန်နှင့် စစ်ကောင်စီကို အမြန်ဆုံးအရေးယူရန်လိုအပ်ကြောင်းလည်း CNF က ထုတ်ပြန်ထားသည်။

ဖလမ်းမြို့အခြေစိုက် ခလရ (၂၆၈) တပ်ရင်းကို ချင်းပူးပေါင်းတပ်ဖွဲ့ဖြစ်သော CNA ၊ CDF – KKG နှင့် CDF – Hualngoram တို့မှ ဩဂုတ်လ ၁၂ ရက် နံနက် ၁ နာရီခွဲမှ ၄ နာရီခွဲထိ သွားရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ခြောက်ဦးသေဆုံးပြီး ကိုးဦး ဒဏ်ရာရရှိသွားကြောင်း သိရသည်။
ထိုတိုက်ပွဲတွင် ချင်းပူးပေါင်းတပ်ဖွဲ့မှလည်း CDF – KKG တပ်ဖွဲ့ဝင်တဦး ကျဆုံးခဲ့သည်။

စာတည်း။  ။ နောင်နောင်
စာမူတည်းဖြတ်။ ။စောဖေ

#ဖလမ်း
# ခလရ(၂၆၈)
#CNA
#Mizzima

ဓာတ်ပုံ- စစ်ကောင်စီတပ် လေကြောင်းတိုက်ခိုက်မှုကြောင့် ပျက်စီးမှုများအား တွေ့ရစဉ် (The Chin Journal)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍14🔥2😁1🤬1😢1
သြဂုတ်လ (၁၄)ရက်၊ မွန်းလွဲ ၂ နာရီ Mizzima News Hour မဇ္ဈိမသတင်းအစီအစဉ်
==============

− ဖားကန့် မြေစာပုံပြိုကျမှု ၃၄ ဦးထက်မနည်း ပျောက်ဆုံးနေတဲ့သတင်း

− အာဆီယံပါလီမန်များညီလာခံ AIPA အဖွဲ့ မြန်မာနိုင်ငံကိုသွားဖို့ ပြင်ဆင်နေတဲ့သတင်း

− မြန်မာနိုင်ငံနိုင်ငံဆိုင်ရာ အာဆီယံအထူးကိုယ်စားလှယ်အဖြစ် အင်ဒိုနီးရှားကိုဆက်ထားဖို့ အမေရိကန်တိုက်တွန်းလိုက်တဲ့သတင်းနဲ့
 
− ဖရူဆိုတိုက်ပွဲမှာ စစ်ကောင်စီတပ်ထံမှ လက်နက်ခဲယမ်းတွေ သိမ်းဆည်းရရှိကြောင်း KNDF ပြောတဲ့သတင်းအပါအဝင် တခြား အရေးကြီးသတင်းတွေနဲ့ စိတ်ဝင်စားဖွယ်သတင်း တွေကို တင်ဆက်ပေးသွားမှာပါ။

https://youtu.be/N9aS5FI-3xY

#2pmnews
#Mizzimanewshour
#mizzimatv
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍11🔥1🍌1
​​တိုင်းနှင့်ပြည်နယ် ၅ ခု ထပ်မံ မိုးကြီးနိုင်
===============

ရောင်နီ
(မဇ္စျိမ)။ ။ ပဲခူးတိုင်းအပါအ၀င် တိုင်းနှင့်ပြည်နယ် ငါးခုတွင် ထပ်မံ မိုးကြီးနိုင်သည့်အတွက် သတိပြုကြရန် အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး၀န်ကြီးဌာန (MOHADM)က သတင်းထုတ်ပြန်သည်။
ယနေ့ သြဂုတ်လ ၁၄ ရက်နေ့မှ ဩဂုတ်လ ၂၀ ရက်နေ့အထိ မိုးလေ၀သအခြေအနေကို MOHADM က သတိပေးထားရာ၌ ပဲခူးတိုင်း၊ စစ်ကိုင်းတိုင်း အထက်ပိုင်း၊ ကချင်ပြည်နယ်၊ မွန်ပြည်နယ်နှင့် တနင်္သာရီတိုင်းတွင် နောက်တကြိမ်ထပ်မံမိုး ကြီးနိုင်ကြောင်း သတိပေးထားသည်။ မိုးများမှုကြောင့် ဖြစ်ပေါ်လာနိုင်သည့် နောက်ဆက်တွဲ ရေကြီး၊ရေလျှံမှုနှင့် မြေပြိုမှုဘေးများအတွက် အထူးသတိထား ပြင်ဆင်နေထိုင်ရန်လည်း MOHADM ကအသိပေးထားသည်။

ဩဂုတ်လဆန်းမှစတင်ကာ မြန်မာနိုင်ငံအနှံအပြားတွင် မိုးကောင်းနေပြီး မြစ်ချောင်းများတွင်လည်း စိုးရိမ်ရေမှတ်အထက်သို့ မြင့်တက်ခဲ့သည်။ ကရင်ပြည်နယ်၊ မွန်ပြည်နယ်နှင့် ပဲခူးတိုင်းမှ မြို့နယ်အချို့တွင် ရေကြီးနစ် မြုပ်မှုကို ရင်ဆိုင်ခဲ့ရပြီး ထိခိုက်ပျက်စီးမှုများ ရှိခဲ့သည်။ ကရင်ပြည်နယ်မှ အာရှလမ်းမကြီး၊ မြဝတီ-ကော့ကရိတ်လမ်းပိုင်း နှစ်နေရာ၌မြေပြိုကျခဲ့ပြီး ယနေ့အထိ ပြန်လည်ပြင်ဆင်နိုင်ခြင်းမရှိသေးပေ။ ဩဂုတ်လ ပထမလပတ်အတွင်း ရေဘေးကြောင့် သေဆုံးသူ ၅ ဦးထက်မနည်းရှိခဲ့ပြီး လူဦးရေ ၄၀,၀၀၀ခန့် ရေဘေးရင်ဆိုင်ခဲ့ရသည်။

စစ်ကောင်စီမိုးဇလဌာနက တနင်္သာရီတိုင်းနှင့်ကချင်ပြည်နယ်တွင် မိုးပိုလာနိုင်ကြောင်းနှင့် စစ်ကိုင်းတိုင်းအတွင်း ချင်းတင်းမြစ်ရေသည် ဟုမ္မလင်းနှင့် ဖောင်းပြင်မြို့၊ ပဲခူးတိုင်းအတွင်း စစ်တောင်းမြစ်ရေသည် မဒေါက်မြို့၊ ကရင်ပြည်နယ်အတွင်း သံလွင်မြစ်ရေသည် ဘားအံမြို့များတွင် စိုးရိမ်ရေအထက်သို့ ရောက်ရှိနေကြောင်း ယနေ့ သြဂုတ်လ ၁၄ ရက်တွင် ထုတ်ပြန်ထားသည်။

စာတည်း - မောင်ကြီး

#mizzima
#ပဲခူးတိုင်း
#တိုင်းနှင့်ပြည်နယ်ငါးခု
#မိုးသတိပေးချက်
#MOHADM

ပုံစာ - ကရင်ပြည်နယ်တွင် မိုးသည်းထန်စွာရွာသွန်းပြီး တောင်ကျရေတိုက်စားမှုကြောင့် သြဂုတ်လ ၇ ရက်နေ့က ပြိုကျပျက်စီးခဲ့သည့် အာရှလမ်းပိုင်းတစ်နေရာ။ (ပုံ - CJ)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍12🔥1😁1
​​မြောင်မြို့ရှိ ရဲစခန်းနှင့် ထွေအုပ်ရုံးကို ကာကွယ်ရေးပူးပေါင်းတပ်ဖွဲ့ ပစ်ခတ်တိုက်ခိုက်
======================

MTO
(မဇ္ဈိမ)။ ။စစ်ကိုင်းတိုင်း၊ မြောင်မြို့ရှိ ရဲစခန်းနှင့် အထွေထွေအုပ်ချုပ်‌‌ရေးမှူးရုံးကို ဩဂုတ်လ ၁၃ ရက်နေ့ နံနက်အစောပိုင်းက တပြိုင်တည်းတိုက်ခိုက်ခဲ့ကြောင်း မြောင်မြို့နယ် ပြည်သူ့ကာကွယ်ရေးနှင့် လုံခြုံရေး အဖွဲ့(CDSOM)ထံမှ သိရသည်။

ဒရုန်းတပ်ဖွဲ့နှင့်မြေပြင်တပ်ဖွဲ့များပူးပေါင်းကာ မြေပြင်နှင့်ဝေဟင်မှ တစ်ပြိုင်တည်းတိုက်ခိုက်ခဲ့ခြင်းဖြစ် ကြောင်း CDSOM အဖွဲ့ ခေါင်းဆောင် ကိုနွေဦးက ပြောသည်။

“ဒရုန်းအဖွဲ့က သူတို့ဘက်က ကောင်တာပြန်ပစ်နိုင်တဲ့ နေရာတွေ၊ လက်နက်ကြီးထားတဲ့ နေရာတွေကို ဒရုန်းနဲ့တောက်လျှောက်ပစ်တယ်။ မြေပြင်က လက်နက်ကြီးတွေအားပြုပစ်ခတ်ပြီး အနီးကပ်လည်း ဝင် ပစ်တယ်” ဟု ၎င်းကဆိုသည်။

တိုက်ပွဲဖော်ဆောင်ချိန် နှစ်နာရီခန့် ကြာမြင့်ခဲ့ပြီး အပြန်အလှန်ပစ်ခတ်မှု မိနစ် ၃၀ ခန့် ဖြစ်ပွားခဲ့သည်ဟု ဆိုသည်။

ပုံမှန်အားဖြင့် စစ်ကောင်စီတပ်ဖွဲ့ဘက်က အပြင်းအထန် ပြန်လည်ပစ်ခတ်ခြင်း၊ ဆုတ်ခွာချိန်တွင် လိုက်လံ ပစ်ခတ်ခြင်းမျိုး ပြုလုပ်လေ့ရှိသော်လည်း ယခုတိုက်ပွဲတွင် ထိုကဲ့သို့ လုပ်ဆောင်ခြင်းမရှိကြောင်း ကိုနွေဦး က ပြောသည်။

“ကျနော်တို့ဘက်က လက်နက်ကြီးပစ်ခတ်မှုတွေဟာ ပစ်မှတ်ကိုထိမှန်မှုတွေရှိခဲ့တယ်။ ခါတိုင်းဆို အခုလို တိုက်ပွဲပြီးသွားရင် အနီးအနား နေအိမ်တွေကို ဝင်စစ်တာ၊ မသင်္ကာတဲ့ လူငယ်တွေဆို ဖမ်းဆီးတာမျိုး ရှိ တယ်။ အခုတခေါက်မှာတော့ အဲ့လိုမျိုးတွေ လုပ်နိုင်တာမတွေ့ဘူး။ အထဲမှာ ထိခိုက်ဒဏ်ရာရတာတွေ များလို့ထင်တယ်” ဟု ဆိုသည်။

ယခုတိုက်ခိုက်မှုကို ဒရုန်းအဖွဲ့သုံးဖွဲ့နှင့် မြေပြင်မဟာမိတ်အဖွဲ့ ၁၈ ဖွဲ့ တို့ ပူးပေါင်းတိုက်ခိုက်ခဲ့ခြင်းဖြစ် ကြောင်း မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM) က ထုတ်ပြန်ထားသည်။

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ

#စစ်ကိုင်းတိုင်း
#မြောင်မြို့
#စစ်ကောင်စီတပ်
#တိုက်ခိုက်မှု

ပုံအညွှန်း - ကာကွယ်ရေးတပ်ဖွဲ့များက တိုက်ခိုက်မှုပြုလုပ်သည့် မှတ်တမ်း။(ဓာတ်ပုံ-CDSOM)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
❤9👏5👍2😁2
​​ငါန်းဇွန်တွင် ကြံ့ခိုင်ရေးပါတီဝင် အပါအဝင် လူ ၄ ဦး ပစ်သတ်ခံရ
===================

007
(မဇ္ဈိမ)။ ။မန္တလေးတိုင်း၊ ငါန်းဇွန်မြို့နယ် သာကျင်းကျေးရွာတွင် ဩဂုတ်လ ၁၃ ရက်နေ့၊ မွန်းလွဲ ၃ နာရီ က ကြံ့ခိုင်ရေးပါတီဝင်တဦးအပါအဝင် လူလေးဦး သေနတ်ဖြင့်ပစ်ခတ်သတ် ခံခဲ့ရကြောင်း ဒေသခံများက မဇ္ဈိမကို ပြောသည်။

“ကြံ့/ဖွံ့ တယောက်ပါတယ်၊ နောက်ပြီးတော့ အုပ်ကြီးယောက်ဖနဲ့ အုပ်ကြီးရဲ့ ဆွေမကင်း၊ မျိုးမကင်းထဲက အမျိုးသမီးနှစ်ယောက်ပါတယ်၊ စုစုပေါင်းလေးယောက်ပါ။ သေနတ်သမားက အားလုံးပေါင်း ၁၀ ယောက် ကျော်တယ်လို့ ပြောတယ်။ ဆိုင်ကယ်တွေနဲ့ ဝင်လာပြီး တနေရာစီမှာ သတ်ပြီး ပြန်ထွက်သွားကြတာလို့ သိရတယ်” ဟု ငါန်းဇွန်ဒေသခံတဦးက မဇ္ဈိမကို ‌ပြောသည်။

စစ်ကောင်စီလက်အောက်ခံ ရဲတပ်ဖွဲ့နှင့်နီးစပ်သူတဦး၏အဆိုအရ အမည်မသိ လူ ၁၂ ဦးခန့်သည် ဆိုင် ကယ်ခြောက်စီးဖြင့် ရောက်ရှိလာပြီး သာကျင်းကျေးရွာအဝင် တောစပ်အနီးတွင် ပြည်ထောင်စုကြံ့ခိုင်ရေး နှင့် ဖွံ့ဖြိုးရေးပါတီဝင် အသက် ၂၀ အရွယ် ကိုဖုန်းတင့်အား ပစ်သတ်ခဲ့ကြောင်း သိရသည်။

ယင်းနောက် ကျေးရွာအုပ်စုအုပ်ချုပ်ရေးမှူး၏ နေအိမ်သို့သွားရောက်ကာ ပစ်ခတ်မှုများပြုလုပ်ခဲ့ရာ အုပ်ချုပ်ရေးမှူး၏ ယောက်ဖဖြစ်သူ အသက် ၅၄ နှစ်အရွယ် ဦးဟန်လင်း ကျည်ဆန်ငါးချက် ထိမှန်ကာ သေဆုံး သွားသည်။

ဆက်လက်ပြီး ကျေးရွာအရှေ့ဘက်ရှိ ဈေးဆိုင်တဆိုင်တွင်ရောက်ရှိနေသော အသက် ၄၈ နှစ်အရွယ် ဒေါ်လှလှနှင့် အသက် ၂၅ နှစ်အရွယ် မယဉ်မွန်ဇော်တို့လည်း ပစ်သတ်ခံရပြီး သေဆုံးသွားကြောင်း ခရိုင် ရဲတပ်ဖွဲ့နှင့် နီးစပ်သူတဦးက ပြောသည်။

“လေးယောက်စလုံး ဦးခေါင်းပွင့်ထွက်ဒဏ်ရာတွေနဲ့ချည်း ပွဲချင်းပြီး သေတယ်”ဟု ရဲနှင့် နီးစပ်သူတဦးက ပြောသည်။
၎င်းတို့ကို မည်သည့်အဖွဲ့၊ မည်သူတို့က ပစ်ခတ်ခဲ့သည်ကို မသိရသေးပေ။

ထို့ပြင် အသတ်ခံရသူလေးဦးသည် အာဏာသိမ်းစစ်ကောင်စီတပ်ကို သတင်းပေးနေသူများဖြစ်ကြောင်း ပြောဆိုကြသော်လည်း မဇ္ဈိမအနေဖြင့် သီးခြားအတည် မပြုနိုင် သေးပေ။

မန္တလေးတိုင်း၊ မြင်းခြံခရိုင်တွင် သြဂုတ်လ ၁၁ ရက်နေ့ ညကလည်း နွားထိုးကြီးမြို့နယ် မင်းရွာ စာသင် ကျောင်းအတွင်း ပုန်းအောင်းနေသော ကြောင်နံကျေးရွာအုပ်ချုပ်ရေးမှူးလင်မယား အပါအဝင် လူလေးဦး ပစ်သတ်ခံခဲ့ရသည်။

စာတည်း။ ။ နောင်နောင်
စာမူတည်းဖြတ်။ ။စောဖေ

#ငါန်းဇွန်
#Mizzima
#ကြံ့ခိုင်ရေးပါတီဝင်
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U
👍12❤1👏1😁1🤮1