​​မြစ်ကြီးနား - ဖားကန့် ကားလမ်းပေါ် တွင် တိုက်ပွဲဖြစ်ပွားနေ
===================

အဂမ်
(မဇ္ဈိမ) ။ ။ ကချင်ပြည်နယ်၊ မြစ်ကြီးနား - ဖားကန့် ကားလမ်းမပေါ်တွင် အာဏာသိမ်း စစ်ကောင်စီတပ်နှင့် ကချင်လွတ်မြောက်ရေးတပ်မတော် (KIA) တပ်တို့အကြား ယနေ့ အောက်တိုဘာလ ၁၄ ရက်နေ့ နံနက်ပိုင်းတွင် တိုက်ပွဲပြန်ဖြစ်နေကြောင်း ဒေသခံများက မဇ္ဈိမကို ပြောသည်။

မြစ်ကြီးနား - ဖားကန့် ကားလမ်းမပေါ်က ကားမိုင်းနှင့် နန့်ယားကြားရှိ မအူပင်ကျေးရွာအနီးသို့ စစ်ကောင်စီတပ်များက ကနဦး စစ်ရေးလှုပ်ရှားလာသည့်အတွက် ယနေ့နံနက် ၈ နာရီက စတင်ပြီး နှစ်ဘက်တိုက်ပွဲများ ဖြစ်ပွားနေခြင်းဖြစ်ကြောင်း ဆိုသည်။
လောလောဆယ်တွင် တိုက်ပွဲအခြေအနေအသေးစိတ်ကို မသိရသေးဘဲ မဇ္ဈိမ၏ မြေပြင်သတင်းအဖွဲ့ ကလည်း ဆက်လက်စုံစမ်းနေဆဲ ဖြစ်သည်။

ပြီးခဲ့သည့် ဩဂုတ်လ၂၂ ရက်နေ့မှာ စစ်ကောင်စီတပ်က ကားမိုင်းမှ ဖားကန့်ဘက်ကို စစ်ကြောင်းထိုးလှုပ်ရှားလာခဲ့ရာ ယင်းစစ်ကြောင်းကို KIA ဘက်က နန့်ယားမရောက်ခင် ကျောက်ထုရွာ အနီးတွင် ပစ်ခတ်တိုက်ခိုက်ခဲ့ရာ တိုက်ပွဲများစတင်ဖြစ်ပွားခဲ့သည်။
ယင်းနောက် နှစ်ဘက် စစ်ရေးတင်းမာလာသောကြောင့် တိုက်ပွဲဖြစ်သည့် ဩဂုတ်လ ၂၂ ရက်နေ့တွင် မြစ်ကြီးနား - ဖားကန့် ကားလမ်းမကို ပိတ်လိုက်ပြီး ယင်းနောက် ငါးရက်အကြာ ဩဂုတ်လ ၂၈ ရက်နေ့တွင် နှစ်ဘက်တပ်က လမ်းပြန်ဖွင့်ပေးခဲ့သည်။

ထို့ပြင် စက်တင်ဘာလအတွင်းကလည်း ဖားကန့်လုံးခင်းရတနာမြေအတွင်းမှာ KIA တပ်နှင့် အာဏာသိမ်း စစ်ကောင်စီတပ်တို့အကြား တိုက်ပွဲများ ပြင်းထန်ခဲ့သည်။

စာတည်း။ ။ နောင်နောင်

#ဖားကန့်
#မြစ်ကြီးနားကားလမ်း
#KIA
#Mizzima

ဓာတ်ပုံ- မြစ်ကြီးနား- ဖားကန့် လမ်းပိုင်းကို တွေ့ရစဉ် (ပုံဟောင်း)

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

မုန်လိုင်ခက်စစ်ဘေးရှောင်စခန်း တိုက်ခိုက်ခံရမှု မန္တလေးတွင် ရှုတ်ချ ကန့်ကွက်ဆန္ဒပြ
=====================

၀၀၈
(မဇ္ဈိမ)။ ။ မန္တလေးမြို့တွင် စစ်ကောင်စီတပ်ဖွဲ့မှ နေရာအနှံ့စစ်ဆေးမှုများပြုလုပ်နေသည့်ကြားက အောက်တိုဘာ ၁၄ရက်၊ နံနက်ပိုင်း၌ မုန်လိုင်ခက် စစ်ဘေးရှောင်စခန်း တိုက်ခိုက်ခံရမှုကို ရှုတ်ချ ကန့်ကွက်ကြောင်း ဆန္ဒပြခဲ့သည်။

အဆိုပါ ဆန္ဒပြပွဲကို မန္တလေးသပိတ်အင်အားစုက လုပ်ဆောင်ခဲ့ခြင်းဖြစ်ပြီး ကချင်ပြည်နယ်၊ လိုင်ဇာမြို့၊ မုန်လိုင်ခက် စစ်ဘေးရှောင်စခန်းကို အောက်တိုဘာ ၉ရက်၊ ညပိုင်းက တိုက်ခိုက်ခံရမှုတွင် ကလေးငယ် ၁၃ဦးနှင့် အမျိုးသမီးများအပါအဝင် ပြည်သူ ၂၉ဦးထက် မနည်းသေဆုံးခဲ့ကာ စစ်တပ်၏ လူမျိုးတုံးသတ်ဖြတ်နေမှုကို ကန့်ကွက်ကြောင်း ယခုလို ဆန္ဒပြခြင်းဖြစ်သည်။

"ကျွန်တော်တို့ မန္တလေး သပိတ်အင်အားစုအနေနဲ့ အကြမ်းဖက်သတ်ဖြတ်မှုကို အပြင်းအထန်စွာ ကန့်ကွက် ရှုတ်ချပါတယ်။ အကြမ်းဖက်စစ်အုပ်စုဟာ အပြစ်မဲ့ အရပ်သားပြည်သူတွေကို ဖမ်းဆီးနှိပ်စက်သတ်ဖြတ်မှုတွေ ဆက်တိုက်ကျူးလွန်နေရုံသာမက တိုင်းပြည်ရဲ့အနာဂတ်ဖြစ်တဲ့ ကလေးသူငယ်တွေကိုပါ လက်နက်ကြီး လက်နက်ငယ်တွေနဲ့ ရက်ရက်စက်စက် လူမဆန်စွာ သတ်ဖြတ်နေမှုဟာ အောက်တိုဘာ လဝက် စာရင်းတွေအရ ၄၇၂ဦးခန့်ရှိနေပါတယ်။"ဟု မန္တလေးသပိတ်အင်အားစု ဦးဆောင်သူတစ်ဦးကပြောသည်။

"Stop Killing Our Children"စာတန်းပါ ဗီနိုင်းချိတ်ဆွဲခြင်း၊"ငါတို့ကလေးတွေကို စစ်ရဟတ်ယာဥ်တွေသုံးပြီး သတ်နေတယ်။ ခင်ဗျားတို့ ရပ်ကြည့်နေမှာလား" ဟု စာသားပါ ပိုစတာများကပ်ခြင်းနှင့်"ကလေးပါမကျန် သတ်တဲ့ ဖက်ဆစ်တပ် ပြည်သူအားနဲ့အမြစ်ဖြတ်၊ အချိန်ကြာလို့ အေးသွားမယ့်သွေးကို ကြယ်ကြွေညတွေ ပြန်တွေး နွှေးပါ၊ တစ်ကြိမ်တစ်ခါလောက်ပဲ ရဲရင့်ပေးကြပါ၊ ဒီတော်လှန်ရေး မုချအောင်မြင်ရမှာ ဧကံမလွဲပါ၊ အကြောက်တရားကိုရိုက်သွင်းလေ တော်လှန်ချင်စိတ်က ပိုပြင်းထန်လေပဲ"ဟု ရေးသားထားသည့် စာရွက်များလည်း ကြဲဖြန့် ဆန္ဒပြခဲ့ကြောင်းသိရသည်။

ကလေးသူငယ်ဆိုင်ရာ အရပ်ဖက် အဖွဲ့အစည်းများအနေဖြင့် လက်ရှိစစ်ဘေးဒဏ်ကြောင့် ချို့ယွင်းလျှက်ရှိသည့် ကလေးသူငယ် အခွင့်အရေးများကို အလေးထားကာ အကူအညီများ ပေးစေလိုကြောင်း တိုက်တွန်းတောင်းဆိုသည်ဟု မန္တလေး သပိတ်အင်အားစုအဖွဲ့က ဆိုသည်။

ဆန္ဒပြထားသည့် နေရာသို့ ယနေ့ နံနက် ၁၀နာရီတွင် စစ်ကောင်စီတပ်ဖွဲ့ ရောက်လာပြီး ဗီနိုင်းနှင့်ကပ်ထားသည့် ပိုစတာများကို သိမ်းဆည်းကာ အနီးပတ်ကျင်၌ ရှိနေသူများကို စစ်ဆေး မေးမြန်းမှုများပြုလုပ်သွားကြောင်းသိရသည်။

စာတည်း - သန့်ဇော်(သန်လျင်)

#mizzima
#ကလေးသူငယ်
#မန္တလေးမြို့
#သပိတ်အင်အားစု
ဓါတ်ပုံ-မန္တလေးသပိတ်အင်အားစု
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

We Don't Give Up
ကိုအောင်နေမျိုးသီဆိုတဲ့ "We Don't Give Up"။ စစ်အာဏာသိမ်းမှု ...
https://www.youtube.com/watch?v=DIsqQreDTks

Teacher stabbed to death in attack at French school
A man of Chechen origin has stabbed to death a teacher and severely wounded two other adults at a school in northeastern ...
https://www.youtube.com/watch?v=7FMMu53VDXQ

“ငြိမ်းချမ်းရေးဖြစ်စဉ်တခုလုံးကိုဖျက်ဆီးတာ စစ်တပ်ဖြစ်တယ်”ပဒိုစောတောနီး (ကရင်အမျိုးသားအစည်းအရုံး(KNU))
ငြိမ်းချမ်းရေးဖြစ်စဉ် တခုလုံးကို ဖျက်ဆီးတာ စစ်တပ်ဖြစ်တယ်” ...
https://www.youtube.com/watch?v=NsM8EQ0-tJo

China foreign minister says cause of conflict is 'injustice' against Palestinians
China's Foreign Minister Wang Yi says the cause of the Israel-Hamas conflict is "historical injustice" against Palestinians, as he ...
https://www.youtube.com/watch?v=S08F-TeUDNI

​​စစ်ကောင်စီ ပြုလုပ်မည့် NCA ပွဲကို တက်ရောက်မည်မဟုတ်ဟု KNU ပြော
========================

YT
(မဇ္ဈိမ) ။ ။ အာဏာသိမ်း စစ်ကောင်စီက တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ရှစ်နှစ်ပြည့်အခမ်းအနားကို ကျင်းပရန် ပြင်ဆင်ထားပြီး ကရင်အမျိုးသား အစည်းအရုံး (KNU) အနေဖြင့် ထိုအခမ်းအနားသို့ တက်ရောက်မည်မဟုတ်ကြောင်း KNU ဗဟိုကော်မတီဝင် ပဒိုစောတောနီးက မဇ္ဈိမကို ပြောသည်။

"တက်လိုက်ရင် ဘာဖြစ်သွားမလဲ၊ ဒီလိုတရားမဝင်တဲ့ အဖွဲ့အစည်းကို သွားပြီးတော့ ပလူးပလဲလုပ်နေမယ်ဆိုရင် ကိုယ်ပါ ရောယောင်ပြီး အထင်သေး အမြင်သေး ခံနေရပြီးတော့ ကိုယ့်သိက္ခာတွေလည်း အကုန်ကျပြီးတော့ ဘာမှ သုံးစားမရတဲ့အဆင့်ရောက်သွားပြီ၊ ရှင်းရှင်းပြောရမယ်ဆိုရင် အဆိပ်ပင်ရေမလောင်းဘူးဆိုတာ အဲ့ဒါကိုပြောတာ၊ ကျွန်တော်တို့ လုံးဝမလုပ်ဘူး" ဟု KNU ဗဟိုကော်မတီဝင် ပဒိုစောတောနီးက မဇ္ဈိမကို ပြောသည်။

အောက်တိုဘာလ ၁၅ ရက်နေ့တွင် ကျရောက်မည့် NCA ရှစ်နှစ်ပြည့်အခမ်းအနားကို စစ်ကောင်စီက နေပြည်တော်ရှိ မြန်မာအပြည်ပြည်ဆိုင်ရာ ကွန်ဗန်းရှင်း ဗဟိုဌာန - ၂ (MICC-2) ၌ ကျင်းပရန် ပြင်ဆင်ထားပြီး တိုင်းရင်းသားလက်နက်ကိုင်အဖွဲ့များအား အဆိုပါ အခမ်းအနားသို့ တက်ရောက်ရန် ဖိတ်ကြားထားသည်။

"ကျွန်တော်တို့ဘက်ကတော့ မူဝါဒ ရှင်းရှင်းလင်းလင်း ရှိထားတယ်၊ ရှိထားတဲ့အတိုင်းလည်း ကျွန်တော်တို့ တိုက်ပွဲဝင်နေတယ်၊ တိုက်ပွဲဝင်နေတဲ့အတိုင်းလည်း ကျွန်တော်တို့ အောင်ပွဲတွေ တဆင့်ပြီးတဆင့်ခံနေတဲ့အပေါ် မှာ သူတို့လုပ်တဲ့ဟာတွေက ဘာမှကို သွားနားထောင်စရာ မရှိဘူး၊ တက်လည်း မတက်ဘူး" ဟု ပဒိုစောတောနီးက မဇ္ဈိမကိုပြောသည်။

ချင်းအမျိုးသားတပ်ဦး (CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့ကလည်း စစ်ကောင်စီတပ်၏ အာဏာသိမ်းခြင်းသည် NCA အခြေခံမူနှင့် ရည်ရွယ်ချက်ကို ဖျက်ဆီးပြီး ၂၀၀၈ ဖွဲ့စည်းပုံအခြေခံဥပဒေကိုလည်း ပျက်ပြယ်စေသည့်အတွက် NCA ကို အခြေခံသည့် ဆွေးနွေးပွဲနှင့် လုပ်ငန်းစဉ်များ ရပ်တန့်သွားပြီဖြစ်ကြောင်း KNU၊ CNF နှင့် ABSDF တို့က အောက်တိုဘာလ ၁၂ ရက်နေ့က ပူးတွဲသဘောထားထုတ်ပြန်ချက် တစောင် ထုတ်ပြန်ခဲ့သည်။

အဆိုပါ ပူးတွဲထုတ်ပြန်ချက်တွင် NCA ကို အခြေပြုပြီး ဖိအားပေး ပြုလုပ်နေသည့် NCA ဟန်ပြ အကောင်အထည်ဖော်မှု ဆွေးနွေးပွဲများ၊ ၂ဝဝ၈ ဖွဲ့စည်းပုံ အခြေခံဥပဒေကို ရှိနေသယောင်ဖြင့် ပြုလုပ်နေသည့် ဖွဲ့စည်းပုံပြင်ဆင်ရေး ဟန်ပြလုပ်ရပ်များနှင့် စစ်ကောင်စီက ကျင်းပရန် ပြင်ဆင်နေသည့် ၂၀၀၈ ဖွဲ့စည်းပုံ အခြေပြု အတုအယောင် ရွေးကောက်ပွဲတို့သည် နိုင်ငံ၏ အကျပ်အတည်းကို ပိုမိုနက်ရှိုင်းစေပြီး ပဋိပက္ခကို ရှည်လျားအောင် ပြုလုပ်နေခြင်းသာ ဖြစ်ကြောင်းလည်း ဖော်ပြထားသည်။

စစ်ကောင်စီက ကျင်းပမည့် NCA ရှစ်နှစ်ပြည့် အခမ်းအနားကို NCA စာချုပ်တွင် လက်မှတ်ရေးထိုးထားသည့် တိုင်းရင်းသားလက်နက်ကိုင် ၁၀ ဖွဲ့အနက် ခုနစ်ဖွဲ့က တက်ရောက်မည် ဖြစ်သည်။
အဆိုပါ တက်ရောက်မည့် ခုနစ်ဖွဲ့သည် အာဏာသိမ်း စစ်ကောင်စီတပ်နှင့် တိုက်ပွဲဖြစ်ပွားခြင်း မရှိသည့် အဖွဲ့များဖြစ်ပြီး အခမ်းအနားသို့ မတက်ရောက်သည့် ကျန်သုံးဖွဲ့မှာ စစ်ကောင်စီတပ်နှင့် အပြင်းအထန် တိုက်ပွဲများ ပြင်းထန်နေသည့် KNU၊ CNF နှင့် ABSDF တို့ဖြစ်သည်။

လက်ရှိတွင် စစ်ကောင်စီ၏ NCA ရှစ်နှစ်ပြည့် အခမ်းအနား တက်ရောက်ရန် KNU ဥက္ကဋ္ဌဟောင်း စောမူတူးစေးဖိုး၊ RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ်၊ ပအိုဝ်းအမျိုးသား လွတ်မြောက်ရေး အဖွဲ့ချုပ်(PNLO) နာယက ဗိုလ်မှူးကြီးခွန်ဥက္ကာ၊ လားဟူဒီမိုကရက်တစ် အစည်းအရုံး (LDU) ဥက္ကဋ္ဌ စောလမွန်တို့ နေပြည်တော်ကို ရောက်ရှိနေကြပြီဖြစ်ကြောင်း စစ်ကောင်စီဘက်ကလာသော သတင်းများတွင် ဖော်ပြထားသည်။

စာတည်း။ ။ နောင်နောင်
စာမူတည်းဖြတ်။ ။သန့်ဇော်(သန်လျင်)

#NCA
#နှစ်ပတ်လည်
#တိုက်ပွဲဖြစ်
#Mizzima
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​Mizzima needs your support!

မဇ္ဈိမသတင်းများ ဆက်လက်တင်ဆက်နိုင်ဖို့ သင့်ရဲ့ ပံ့ပိုးမှုလိုအပ်နေပါတယ်.

ဖော်ပြပါလင့်တွင် မဇ္ဈိမကိုကူညီပံ့ပိုးမှု စတင်လိုက်ပါ

https://bit.ly/2VhJ12U

For more information- https://donate.mizzima.com/mm/

#supportmizzima

​​စက်သုံးဆီအကန့်အသတ်ဖြင့်ရောင်း၊ ဆီမရှိသည့်အခါ ရပ်နားထားရဟုဆို
====================

မင်းထက်
(မဇ္စျိမ)။ ။ဧရာဝတီတိုင်း ၊ပုသိမ်မြို့ရှိ စက်သုံးဆီအရောင်းဆိုင်များတွင် စက်သုံးဆီ အလုံအလောက်မရသည့်အတွက် အကန့်အသတ်ဖြင့်သာ ရောင်းချရသည့်အပြင် ဆီရောင်းရန်မရှိသည့်အခါ ရပ်နားထားရသည်ဟု ဆီဆိုင်ပိုင်ရှင်များက မဇ္စျိမကိုပြောသည်။

"ဆီကခွဲတမ်းနဲ့ပဲရနေတော့ အခုရောက် အခုရောင်းရင် အခုကုန်မယ့်ပုံစံဖြစ်နေတယ်။ အဲ့ဒီတော့ ဆီဝယ်သူအားလုံး မဟုတ်ရင်တောင်၊ အားလုံးနီးပါးရအောင် ထိန်းရောင်းနေရတဲ့သဘောပါ။ တချို့ဆိုင်တွေကတော့ ရှိတာရောင်းပြီး ဆီကုန်ရင်မရောင်းတော့ဘဲ၊ ဆီရမှ ပြန်ရောင်းကြတယ်။ အဓိက ဝယ်အားကောင်းနေတာက 92 နဲ့ 95 ပါ။ ဒီဇယ်ကတော့ လုံးဝပြတ်သွားတာမျိုး မရှိသေးပါဘူး"ဟု စက်သုံးဆီဆိုင်ပိုင်ရှင်တဦးက ပြောသည်။

ဓာတ်ဆီနှင့် ဒီဇယ်အမျိုးအစားများအားလုံးကို တပတ်လျှင်နှစ်ကြိမ်သာ သီလဝါဆိပ်ကမ်းမှ ဆီထုတ်ရောင်းပေးနေပြီး တကြိမ်ထုတ်ရောင်းပေးလျှင် သုံးရက်စာရောင်းရန်အတွက်သာ ထုတ်ရောင်းပေးနေခြင်းဖြစ်သည်ဟု ၎င်းကဆိုသည်။

"တပတ်မှာ အင်္ဂါနေ့တခါ သောကြာနေ့တခါ ဆီထုတ်ရောင်းပေးတယ်။ ဆီသွားထုတ်ရင်လည်း ဆိုင်အကြီးအသေးနဲ့ ရောင်းအားပေါ်မူတည်ပြီး အကန့်အသတ်နဲ့ရတာဆိုတော့ ပြန်ရောင်းဖို့ လုံလုံလောက်လောက်မရဘူးပေါ့။ ဥပမာပြောရရင် ဆိုင်တဆိုင်မှာ ဂါလံ ၃,၂၀၀ ဆီကန်ကြီးရှိသာရှိနေတာ၊ သူတို့ဘက်က သုံးရက်တကြိမ် ဆီထုတ်ရောင်းပေးတာက ဂါလံ ၈၀၀ လောက်ပဲဖြစ်နေတဲ့သဘောပါ။ တချို့ဆိုင်တွေဆိုရင် တခါထုတ်ရင် ဂါလံ ၄၀၀ လောက်ပဲရတယ်"ဟု ပုသိမ်မြို့နယ်အတွင်းမှ ဆီဆိုင်ပိုင်ရှင်နောက်ထပ်တဦးက ဆိုသည်။

အာဏာသိမ်းပြီးနောက် စစ်ကောင်စီတပ်ဖွဲ့ဝင်များ၊ ရဲတပ်ဖွဲ့ဝင်များနှင့် အုပ်ချုပ်ရေးမှူးများက စက်သုံးဆီအရောင်းဆိုင်များထံသို့ သွားရောက်ကာ ရောင်းအားစာရင်းများကို တောင်းယူခဲ့သည်ဟု သိရသည်။

လက်ရှိတွင် ၎င်းတို့တောင်းယူထားသည့် စာရင်းများအရ ရောင်းအားကောင်းသည့်ဆိုင်နှင့် ရောင်းအားနည်းသည့်ဆိုင်ဟူ၍ ခွဲခြားကာ သီလဝါဆိပ်ကမ်းမှ ဆီထုတ်ရောင်းပေးနေခြင်းဖြစ်သည်ဟု ပုသိမ်မြို့ပေါ်ရှိ ဆီဆိုင်ပိုင်ရှင်အချို့က ပြောသည်။

ဧရာဝတီတိုင်းအတွင်းရှိ အခြားမြို့နယ်များတွင်မူ စက်တပ်ယာဥ်များအားလုံးအတွက် စက်သုံးဆီဝယ်ယူ၍ ရနေသေးကြောင်း ဂါလံပုံး၊ ဆီပေပါများဖြင့် ဝယ်ယူ၍မရကြောင်း မြို့နယ်အသီးသီးရှိ ဒေသခံများက ပြောသည်။

"လက်ရှိတော့ ဆိုင်ကယ်တွေ ဆီသွားထည့်ရင် အပြည့်ထည့်လို့ရနေသေးတယ်။ ဆီစျေးထပ်ကျရင်တော့ အလုပ်လုပ်ရတာ ပိုအဆင်ပြေတာပေါ့။ ဆီစျေးတက်မှာစိုးလို့ ပုံးတွေဘာတွေနဲ့သွားဝယ်ရင်တော့ တချို့ဆိုင်တွေကပေးမရောင်းကြဘူး "ဟုသိမ်မြို့မှ ဆိုင်ကယ် တက္ကစီ(Taxi)မောင်းနှင်သူတဦးက ပြောသည်။

လက်ရှိတွင် ပုသိမ်မြို့၌ ဓာတ်ဆီ 92 တလီတာလျှင် ၂,၀၁၀ ကျပ်နှင့် 95 တလီတာလျှင် ၂,၁၂၀ ကျပ်နှုန်း စျေးပေါက်နေသည်ဟု ဆီဆိုင်ပိုင်ရှင်များ၏ပြောပြချက်အရ သိရသည်။

ပုသိမ်မြို့တွင် ပြီးခဲ့သည့် စက်တင်ဘာလ နောက်ဆုံးပတ်က 92 တလီတာလျှင် ၂,၂၂၀ ကျပ်နှင့် 95 တလီတာလျှင် ၂,၃၁၅ ကျပ်စျေးပေါက်ခဲ့သည်ဟုသိရပြီး လက်ရှိစျေးနှုန်းများနှင့် နှိုင်းယှဥ်လျှင် စျေးကျသွားသည်ကို တွေ့ရှိရသည်။

ဓာတ်ပုံ-ပုသိမ်မြို့မှ ဆီဆိုင်တစ်ဆိုင်(ပုံဟောင်း)
.,
စာတည်း ။ ။ ဖူးသိမ်ကျ
စာမူတည်းဖြတ်။ ။သန့်ဇော်(သန်လျင်)

#ဧရာဝတီတိုင်း
#ပုသိမ်မြို့
#စက်သုံးဆီ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​ထီးချိုင့်တိုက်ပွဲ ပြင်းထန် ၊ စစ်ကောင်စီတပ် ဂျက်ဖိုက်တာဖြင့် ဗုံးကြဲ
===================

ကိုခင်မောင်
(မဇ္စျိမ)။ ။ စစ်ကိုင်းတိုင်းအထက်ပိုင်း၊ ကသာခရိုင်၊ ထီးချိုင့်မြို့နယ် ပျဉ်းစုကျေးရွာအနီးတွင် စစ်ကောင်စီတပ်နှင့် ထီးချိုင့်ပြည်သူ့ကာကွယ်ရေးတပ်ဖွဲ့များအကြား ထိတွေ့ ပစ်ခတ်မှုပြင်းထန်စွာဖြစ်ပွားခဲ့ပြီး စစ်ကောင်စီတပ်ဘက်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ကြောင်း ထီးချိုင့်ပြည်သူ့ကာကွယ်ရေးတပ်ဖွဲ့ထံက သိရသည်။

ယမန်နေ့ အောက်တိုဘာလ ၁၃ရက် နံနက် ၇နာရီမှစ၍ နေ့လယ် ၁၂နာရီအချိန်ထိ ငါးနာရီကျော်ကြာ တိုက်ပွဲတွင် စစ်ကောင်စီတပ်ဘက်မှ အထိနာ၍ ဂျက်ဖိုက်တာတစင်းဖြင့် နှစ်ကြိမ် ဗုံးကြဲတိုက်ခိုက်ခဲ့သည်ဟု ထီးချိုင့်ပြည်သူ့ကာကွယ်ရေးတပ်ဖွဲ့တာဝန်ရှိသူက မဇ္စျိမကို ပြောသည်။

“ အဲဒီစစ်ကြောင်းက ဆားတွင်းရွာနဲ့ ရွှေလီရွာကနေ ကွဲထွက်လာတဲ့လာတာပေါ့လေ။ အဲဒါထန်းကုန်းရွာမှာစစ်ကြောင်း နှစ်ခုပြန်ပေါင်းပြီးတော့ဒီဘက်က ပျဥ်းစုရွာဘက်ကို ဝင်လာတော့ ကျွန်တော်တို့ ပစ်ခတ်တိုက်ခိုက်ခဲ့တာပါ။ စစ်ကောင်စီဘက်က အကျအဆုံးကတော့ များနိုင်ပါတယ်။ အကျအဆုံးကိုတော့ အတိအကျမသိနိုင်ပါဘူး။ သူတို့(စစ်ကောင်စီတပ်)ဘက်က အထိနာနေတော့ ဂျက်ဖိုက်တာနဲ့ ဗုံးလာကြဲသွားတာပါ။” ဟု ထီးချိုင့်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက ဆိုသည်။

အောက်တိုဘာ ၁၁ရက်မှစ၍ ထီးချိုင့်မြို့မှ ထွက်လာသော အင်အား ၁၈၀ နီးပါးပါ စစ်ကောင်စီတပ်စစ်ကြောင်းသည် ထန်းကုန်းရွာမှ ပျဥ်းစုရွာဘက်သို့ ထွက်လာစဥ် ထီးချိုင့် ပြည်သူ့ကာကွယ်ရေးတပ်ဖွဲ့များနှင့် KIA တပ်တို့ ပူးပေါင်းတိုက်ခိုက်ခဲ့ခြင်းဖြစ်ကြောင်း ၎င်းတာဝန်ရှိသူထံက သိရသည်။

စစ်ကောင်စီတပ်ဘက်မှ ဂျက်ဖိုက်တာတစီးဖြင့် နှစ်ကြိမ်တိတိ ဗုံးကြဲချတိုက်ခိုက်ခဲ့ရာ ဗုံးများသည် ပျဥ်းစုရွာအနီးပတ်ဝန်းကျင်နှင့် လယ်ကွင်းထဲများသို့ ကျရောက်ပေါက်ကွဲခဲ့ပြီး ဒေသခံပြည်သူများနှင့် ပြည်သူ့ကာကွယ်ရေးတပ်ဖွဲ့များ ထိခိုက်မရှိဟု လည်း ထီးချိုင့်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက ဆိုသည်။

အဆိုပါစစ်ကောင်စီတပ်စစ်ကြောင်းသည် ထီးချိုင့်မြို့နယ် ၊ ထန်းကုန်းရွာအတွင်း တပ်စွဲနေဆဲဖြစ်ပြီး ယနေ့ အောက်တိုဘာလ ၁၄ရက် နံနက် ၈နာရီအချိန်တွင်လည်း ထန်းကုန်းရွာအနီးတွင် ပစ်ခတ်မှုထပ်မံဖြစ်ပွားခဲ့ကာ ထိခိုက်သေဆုံးမှုအခြေအနေကို စုံစမ်းနေဆဲဖြစ်ကြောင်း ၎င်းတာဝန်ရှိသူက ပြောသည်။

ထိုသို့ တိုက်ပွဲများဖြစ်ပွားနေမှုများကြောင့် ထီးချိုင့်မြို့နယ်မှ ထန်းကုန်းရွာ၊ ပျဥ်းစုရွာ၊ ဆားတွင်းရွာ၊ ရွှေလီရွာစသော ကျေးရွာများရှိ ဒေသခံများသည် စစ်ဘေးတိမ်းရှောင်လျက်ရှိကြောင်း သိရသည်။
ထီးချိုင့်မြို့နယ်တွင် ပြီးခဲ့သည့် ဩဂုတ်လအတွင်းမှာ တိုက်ပွဲနောက်ဆုံးဖြစ်ပွားခဲ့ပြီး ထိုကာလနောက်ပိုင်း စစ်ရေးအခြေအနေ ငြိမ်သက်နေရာမှ ယမန်နေ့ အောက်တိုဘာလ ၁၃ရက်တွင် တကျော့ပြန် တိုက်ပွဲဖြစ်ပွားခြင်းဖြစ်သည်။

စာတည်း။ ။အောင်ကျော်ဖြိုး

#Mizzima
#ထီးချိုင့်မြို့နယ်
#လေကြောင်းတိုက်ခိုက်
#ပြည်တွင်းသတင်း
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မြောက်ဥက္ကလာမြို့နယ်က မိုက်တီးဘီယာဆိုင် ကာကွယ်ရေးတပ်ဖွဲ့ ဖောက်ခွဲတိုက်ခိုက်
=====================

ဂန္ဒမာ
(မဇ္ဈိမ)။ ။ရန်ကုန်တိုင်း၊ မြောက်ဥက္ကလာပမြို့နယ်ရှိ မိုက်တီးဘီယာဆိုင်အား ယမန်နေ့ အောက်တိုဘာ ၁၃ ရက် ည ၇ နာရီ ၂၅ မိနစ် အချိန်တွင် ဖောက်ခွဲတိုက်ခိုက်လိုက်သည်ဟု တိုက်ခိုက်မှုပြုလုပ်သည့်အဖွဲ့ တာဝန်ရှိသူထံက သိရသည်။

“ဒီဆိုင်က မြောက်ဥက္ကလာပြည်သူ‌တွေ တိုင်တန်းတာများလာလို့ ပြုလုပ်ရတာပါ။ စစ်ကောင်စီလူကြီးပိုင်းတဦး ပိုင်တဲ့ဆိုင်ဆိုတာလည်း သိထားရတာကြောင့် အခုပထမအကြိမ် သတိပေးတဲ့အနေနဲ့ အပြင်က ကားပါကင်မှာပဲ ဖောက်ခွဲခဲ့တာပါ”ဟု မြောက်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ (၂) မှ တာဝန်ရှိသူက မဇ္ဈိမကိုပြောသည်။

ပြည်သူများတိုင်တန်းရသည့် အကြောင်းအရင်းမှာ မိုက်တီးဘီယာဆိုင်သည် ည ၁၁ နာရီ ဝန်းကျင်ထိ သီချင်းသံများ ဆူညံနေခြင်းကြောင့် ဖြစ်ကာ နောက်ထပ် ပြည်သူတိုင်တန်းမှုပိုများလာပါက ဆိုင်အတွင်းထိ ဝင်ရောက်တိုက်ခိုက်မည်ဖြစ်ကြောင်း ၎င်းကပြောသည်။

မစ်ရှင်အား အဝေးထိန်းမိုင်းဖြင့် ဆောင်ရွက်ခဲ့ပြီး ၎င်းဆိုင်၏ ကားပါကင်မှ ကားနှစ်စီး ပျက်စီးခဲ့ကာ ဆိုင်လုံခြုံရေးဝန်ထမ်း အသေးစားဒဏ်ရာရခဲ့ကြောင်း ယနေ့ မွန်းလွဲ ၁ နာရီတွင် အဖွဲ့တာဝန်ရှိသူ၏ပြောပြချက်အရ နောက်ဆက်တွဲအခြေအနေအား သိရသည်။

ပြည်သူများအနေဖြင့် စစ်ကောင်စီနှင့်ပတ်သက်သည့် နေရာများနှင့် ဝေးရာတွင်နေပြီး တော်လှန်ရေးတွင် ပါဝင်ကူညီအားဖြည့်ပေးပါရန်နှင့် အသိပေးထားသည့်ကြားမှ ဖောက်ခွဲတိုက်ခိုက်ထားသည့် ဆိုင်တွင် ဆက်လက်အားပေးနေပါက ဖြစ်လာမည့်ကိစ္စများကို တာဝန်ယူမည်မဟုတ်ကြောင်း မြောက်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ (၂) တာဝန်ရှိသူက ပြောသည်။

စာတည်း ။ ။ ဖူးသိမ်ကျ
စာမူတည်းဖြတ်။ ။အောင်ကျော်ဖြိုး

#ရန်ကုန်တိုင်း
#မြောက်ဥက္ကလာပမြို့နယ်
#ဖောက်ခွဲတိုက်ခိုက်မှု
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​လိင်ပိုင်းဆိုင်ရာ အကြမ်းဖက်မှုနှင့် စော်ကားမှုများအား ထိရောက်သော အရေးယူမှုများ ရှိစေရန် တော်လှန်ရေးအင်အားစုများ တောင်းဆို
=====================

001
(မဇ္စျိမ)။ ။ တော်လှန်ရေးကာလအတွင်း လိင်အကြမ်းဖက်မှုများနှင့် လိင်ပိုင်းဆိုင်ရာ စော်ကားမှုများအား ထိရောက်တိကျသည့် အရေးယူမှုများရှိစေရန် အမျိုးသားညီညွတ်ရေးအစိုးရ (NUG) အပါအဝင် သက်ဆိုင်ရာ တာဝန်ရှိသူများကို တော်လှန်ရေးအင်အားစုများက တောင်းဆိုလိုက်သည်။

လူမျိုးပေါင်းစုံအထွေထွေသပိတ်ကော်မတီ (GSCN)၊ Blood Money Campaignတို့အပါအဝင် စုစုပေါင်း အဖွဲ့အစည်း ၂၀ ကျော်က အောက်တိုဘာလ ၁၂ ရက်တွင် ကြေညာချက်ထုတ်ပြန် တောင်းဆိုခဲ့ကြခြင်းဖြစ်သည်။

လက်ရှိတွင် “လိင်ပိုင်းဆိုင်ရာထိပါးနှောင့်ယှက်ခြင်း၊ အမြတ်ထုတ်ခြင်းနှင့် မဖွယ်မရာပြုခြင်းဆိုင်ရာ အကာအကွယ်ပေးရေးမူဝါဒ”ကို ရေးဆွဲအတည်ပြုထားသော်လည်း လက်တွေ့အကောင်အထည်ဖော်နိုင်မှု အားနည်းချက်များကြောင့် လိင်ပိုင်းဆိုင်ရာ ကျူးလွန်သူများကို အပြစ်ပေး အရေးယူနိုင်ခြင်းမရှိသည့်အပြင် နစ်နာသူများအား အကာအကွယ်ပေးနိုင်ခြင်းမရှိသေးသည်ကိုလည်း တွေ့ရကြောင်း တော်လှန်ရေးအင်အားစုများက ဆိုသည်။

လူမျိုးပေါင်းစုံ အထွေထွေသပိတ်ကော်မတီ (GSCN)၊ အလုပ်အမှုဆောင်ကော်မတီအဖွဲ့ဝင် မနယုန်မိုးသွေးက” ထိရောက်တဲ့ အရေးယူမှုမရှိလို့လည်း ဒီဆင့်ပွားပြီးတော့မှ ဒီလိုအမှုကိစ္စတွေက ထပ်ထပ်ပြီး ကြားနေရတာဖြစ်တယ်။ Case တွေက အများကြီးရှိတယ်။ ရှေ့မှာဆိုရင် လွန်ခဲ့တဲ့နှစ်တွေကနေပြီး ကျူးလွန်ခံရတဲ့ ချောင်းဦးဘက်က မုဒိန်း Case လိုဟာမျိုးတွေ ပြီးရင် မကွေးတိုင်းမှာလည်း ကြားရတယ်။ မဲဆောက်ဘက်မှာလည်း ကြားလိုက်ရတယ်။ ဒီကြားလိုက်ရတဲ့ အမှုကိစ္စတွေအကုန်လုံးက ဒါတောင်မှ လူမှုကွန်ရက်မှာ အများသိလိုက်ရတဲ့အဖြစ်တွေပေါ့။ ဒီလိုမျိုးလူထုကြားထဲ ကျယ်ကျယ်ပြန့်ပြန့်သိလိုက်ရတဲ့ကိစ္စတွေတောင် ထိထိရောက်ရောက်ဖြေရှင်းနိုင်တယ်ဆိုတဲ့ဟာမျိုးကို မကြားရဘူးဆိုတော့ လူမသိသူမသိကျူးလွန်ခံရတဲ့ Case တွေဆိုရင် ပိုပြီးဆိုးသွားနိုင်တယ်”ဟုဆိုသည်။

ထို့ကြောင့် NUG အနေဖြင့် လက်ရှိ ကြားကာလတွင်သာမက နောင်အသွင်ကူးပြောင်းရေးကာလတွင်လည်း လိင်ပိုင်းဆိုင်ရာ ထိပါးနှောင့်ယှက်ခြင်း၊ အမြတ်ထုတ်ခြင်း၊ မဖွယ်မရာပြုခြင်းခံရသူများအား အကာအကွယ်ပေးခြင်း၊ ကျူးလွန်စော်ကားသူများကို ထိရောက်စွာ အပြစ်ပေးအရေးယူခြင်းနှင့် ထိုကဲ့သို့သော ဖြစ်ရပ်များနောင်တွင်မဖြစ်ပွားစေရေး ထိန်းကျောင်းရန် လိုအပ်ကြောင်း တော်လှန်ရေးအင်အားစုများက တိုက်တွန်းသည်။

ကျူးလွန်သူသည် တော်လှန်ရေးအဖွဲ့အစည်းများမှသော်လည်းကောင်း၊ ကြားကာလအုပ်ချုပ်ရေးယန္တရားများမှ သော်လည်းကောင်း၊ ပြည်သူ့ကာကွယ်ရေးတပ်သားသော်လည်းကောင်းဖြစ်နေပါကလည်း ခြွင်းချက်မရှိ ထိရောက်စွာ အရေးယူနိုင်ရန်မှာ ၎င်းရှိနေသော အဖွဲ့အစည်း၌သာမက တော်လှန်ရေးအင်အားစုများအားလုံး၌ တာဝန်ရှိကြောင်း ထောက်ပြထားသည်။

NUG အပါအဝင် အဖွဲ့အစည်းအသီးသီးအနေဖြင့် လူမှုကွန်ရက် စာမျက်နှာ ၊ ပြင်ပသို့ ပျံ့နှံ့လာသည့် လိင်ပိုင်းဆိုင်ရာထိပါးနှောင့်ယှက်ခြင်း၊ အမြတ်ထုတ်ခြင်း၊ မဖွယ်မရာ ပြုခြင်းများအပြင် နောက်ထပ် မပျံ့နှံ့သေးသော အလားတူဖြစ်စဉ်များကို ဖုံးကွယ်ပြီး လျစ်လျူရှုထားခြင်းမှာ မသင့်တော်ဟုလည်း ထုတ်ပြန်ချက်တွင် ပြောဆိုထားသည်။

“ပူးပေါင်းဆောင်ရွက်ရမယ့် အနေအထားတွေ နယ်မြေတွေမှာဆိုရင်လည်း ပူးပေါင်းဆောင်ရွက်ဖို့ မတုံ့ဆိုင်းသင့်ဘူး။ NUG အပါအဝင် တိုင်းရင်းသားတော်လှန်ရေးလက်နက်ကိုင်အဖွဲ့အစည်းတွေလည်း အများကြီးရှိတယ် ဆိုတော့ အားလုံးပူးပေါင်းဆောင်ရွက်လို့ရတဲ့အနေအထားမှာ အုပ်ချုပ်ရေးပိုင်းက တာဝန်ရှိတဲ့သူတွေရော ပူးပေါင်းဆောင်ရွက်ဖို့ ဒီအမျိုးသမီးတွေကို အကာအကွယ်ပေးဖို့ ထိထိရောက်ရောက်ဆောင်ရွက်ဖို့ တိုက်တွန်းချင်ပါတယ်”ဟု မနယုန်မိုးသွေးက ပြောသည်။

ထို့ပြင် လိင်ပိုင်းဆိုင်ရာ ကျူးလွန်သူများကို လူမှုရေးပြစ်ဒဏ်ပေးခြင်း၊ ကျူးလွန်ခံရသူများအနေဖြင့် နှုတ်ဆိတ်မနေဘဲ ရဲဝင့်စွာပြောနိုင်ရန် အမျိုးသမီးများ စွမ်းဆောင်ရည်မြှင့်တင်ရေး သင်တန်းနှင့် ဆွေးနွေးပွဲများကို အခါအားလျော်စွာ ပြုလုပ်ပေးခြင်း၊ အဆိုပါဖြစ်စဉ်များကို တိုင်ကြားနိုင်ရန် အကာအကွယ်ရေး ပလက်ဖောင်းတရပ် ၊ ကော်မတီတရပ်ဖွဲ့စည်းခြင်း၊ စိတ်ချလုံခြုံရသော Hotline တခုဖန်တီးပေးခြင်းတို့ ပြုလုပ်ရန်လည်း လိုအပ်သည်ဟု တော်လှန်ရေးအင်အားစုများက အကြံပြုထားသည်။

လိင်ပိုင်းဆိုင်ရာ ကျူးလွန်စော်ကားခြင်းအမှုများနှင့် ပတ်သက်၍ ထိရောက်စွာ အရေးယူမှုရှိ၊ မရှိကို တာဝန်ရှိသူများအနေဖြင့် ပြည်သူလူထုထံသို့ ချပြန်ရန်လည်း တောင်းဆိုထားသည်။

Photo - ပြီးခဲ့သည့် ရှစ်လေးလုံးနေ့တွင် စစ်အာဏာရှင်ဆန့်ကျင်ရေး ဆန္ဒပြနေသည့် အမျိုးသမီးအချို့အားတွေ့ရစဥ် (ခင်ဦးမြို့နယ်သတင်းမှန်ပြန်ကြားရေး)
စာတည်း ။ ။အောင်ကျော်ဖြိုး

#Mizzima
#အမျိုးသမီး
#လိင်ပိုင်းဆိုင်ရာအကြမ်းဖက်မှု
#NUG

Mizzima Weekly Sports အစီအစဉ်
တပတ်အတွင်း အားကစားလောကရဲ့ထူးခြားတဲ့ သတင်းအကြောင်းအရာတွေကို ...
https://www.youtube.com/watch?v=qLqrsF3JbJI

​​CDM ဝန်ထမ်းများနေရာတွင် အစားထိုးခန့်အပ်သော ပြန်တမ်းဝင်အရာရှိစာရင်းကို စစ်ကောင်စီမှ ထုတ်ပြန်ကြေညာ
==================

ငြိမ်းချမ်း(MMIT)
မဇ္ဈိမ။ ။ CDM ဝန်ထမ်းအများစု နေရာတွင် အစားထိုးခန့်အပ်မည့် ပြန်တမ်းဝင်အရာရှိစာရင်းကို စစ်ကောင်စီ၏ ပြည်ထောင်စု ရာထူးဝန်အဖွဲ့ ဝန်ထမ်းရွေးချယ်လေ့ကျင့်ရေး ဦးစီးဌာနမှ ၂၀၂၃ ခုနှစ် အောက်တိုဘာလ ၁၃ရက် နေ့စွဲဖြင့် ကြေညာသည်။
ကြော်ငြာစာအမှတ်(၃/၂၀၂၃)ဖြင့် ဝန်ကြီးဌာန/ အဖွဲ့အစည်း ၂၁ ခုမှပြန်တမ်းဝင်အရာရှိအဆင့် စတင်ခန့် လစ်လပ်ရာထူး ၄၇၇ ဖြင့် ပြည်​ထောင်စု​ရွေး​ကောက်ပွဲ​ကော်မရှင် ၊ စက်မှုဝန်ကြီးဌာန တို့မှပြန်တမ်းဝင်အရာရှိအဆင့် စတင်ခန့်လစ်လပ်ရာထူး ၃၁​ နေရာ၊ စုစု​ပေါင်းရာထူး ၅၀၈​နေရာတို့အတွက်​ ရွေးချယ်ခံရသူများစာရင်း​ ကြေညာခြင်းဖြစ်ကြောင်း CDM အရာထမ်း တဦးမှ Mizzima ကိုပြောသည်။

ကြေညာထားချက်အရ ပြန်တမ်းဝင်အရာရှိ စတင်ခန့်အပ် လစ်လပ်ရာထူး ၅၀၈ နေရာအတွက် ပြည်ထောင်စုရာထူးဝန်အဖွဲ့က ခေါ်ယူခဲ့ပြီး လျှောက်ထားသူ ကျား ၁,၂၂၅ ဦး၊ မ ၁,၄၂၄ ဦး စုစုပေါင်း ၂,၆၄၉ ဦးရှိခဲ့ကြောင်း သိရသည်။

ယင်းတို့အနက်မှ ရေးဖြေနှင့် လူတွေ့စစ်ဆေးအောင်မြင်သူ ၂၂၉ ဦးကိုလစ်လပ်နေရာအလိုက် ခန့်အပ်မည်ဟုဆိုသည်။ ၂၂၉ ဦးအနက် ဝန်ထမ်းများမှ ဖြေဆိုအောင်မြင်သူ ၁၄၄ ဦးရှိကာ ပြင်ပမှ ဖြေဆိုအောင်မြင်သူ ၈၅ ဦးရှိကြောင်းသိရသည်။

“CDM လုပ်ခဲ့တဲ့ လူတွေရဲ့ ပေးဆပ်မှုကို ပြည်သူတွေ မေ့ကုန်မှာစိုးတယ်၊ ကျွန်တော်တို့ ဆေးလောကကတော့ အလွယ်တကူ အစားထိုးဖို့ မလွယ်သလို ၊အရှက်မရှိ လျှောက်တဲ့သူလည်း နည်းတယ်၊ ကျန်တဲ့ဌာနတွေကတော့ ရွံစရာကောင်းတယ်ဗျ၊ ပြန်တမ်းဝင် အရာထမ်းဖြစ်ဖို့က မလွယ်ကူခဲ့ကြဘူး။ ခွေးတိုးပေါက်က အလွယ်ဝင်လာသူတွေကို ပြည်သူတွေက စောင့်ကြည့်ထားစေချင်တယ်” ဟု ရန်ကုန်မှ CDM အရာထမ်း တဦးက Mizzima ကိုပြောသည်။
“ ရာထူးတိုး၊ ပင်စင်ယူတွေကြောင့် နေရာလစ်လပ်တာက နည်းပါတယ်၊ CDM နေရာ လွတ်ကုန်တာက ၉၅ ရာခိုင်နှုန်း မကဘူး၊ အမှုထမ်းဘဝကနေ အရာထမ်းဖြစ်ဖို့ အချိန်အများကြီး ပေးခဲ့ရတာပါ။ အမှန်တရားဘက်က ပြည်သူနဲ့ ရပ်ခဲ့တဲ့ ကျွန်မတို့ကို မေ့မထားကြဖို့ ပြည်သူနဲ့ NUG ကို ပြောချင်ပါတယ်” ဟု မန္တလေးမှ CDM အရာထမ်း တဦးကလည်း Mizzima ကို ပြောသည်။

“ပြည်သူ ရှုံးလို့မရဘူး၊ ဒီတခါ ပြည်သူရှုံးရင် ဘယ်တော့မှ မြန်မာပြည်မှာ တရားမျှတမှုတို့ အမှန်တရားတို့ ၊ဒီမိုကရေစီတို့ ရှိလာတော့မှာ မဟုတ်ဘူး၊ သွေးမအေးကြပါနဲ့၊ ပြည်သူဘက် ရပ်ခဲ့တဲ့ သူတွေကို ပြည်သူကမှ မကြည့်ရင် ဘယ်လိုလုပ်မလဲ၊ CDM လုပ်တဲ့အမှုထမ်း၊ အရာထမ်းတွေ ဒုက္ခရောက်မယ်ဆိုတာ သိသိနဲ့ ပြည်သူ့ဘက်မှာ ရပ်တည်ခဲ့တာပါ။ တော်လှန်ရေးကို သွေးမအေးကြဘဲ အမြဲစိတ်ထဲထည့်ပြီး နိုင်တဲ့နေရာက ကူပေးကြဖို့ ပြောချင်တယ်” ဟု နေပြည်တော်မှ CDM အရာထမ်းတဦးကလည်း Mizzima ကို ပြောသည်။

ပြည်ထောင်စု ရာထူးဝန်အဖွဲ့ ဝန်ထမ်းရွေးချယ်လေ့ကျင့်ရေး ဦးစီးဌာနမှကြေညာချက်အရ လျှောက်ထားသူ မရှိသော လစ်လပ်နေရာများ ရှိပြီး၊ လျှောက်ထားသူများရှိသော်လည်း ရွေးချယ်ခံရသူမရှိသော လစ်လပ်နေရာများလည်း ရှိနေသည်။

သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ၊စွမ်းအင်ဝန်ကြီးဌာန ၊စက်မှုဝန်ကြီးဌာန၊ သိပ္ပံနှင့်နည်းပညာဝန်ကြီးဌာန၊ ဆောက်လုပ်ရေးဝန်ကြီးဌာန၊ လူမှုဝန်ထမ်း၊ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန၊ တိုင်းရင်းသားလူမျိုးများရေးရာဝန်ကြီးဌာန၊ နိုင်ငံတော်ဗဟိုဘဏ်၊ နေပြည်တော်စည်ပင်သာယာရေးကော်မတီနှင့် ပြည်ထောင်စုရွေးကောက်ပွဲ ကော်မရှင်ရုံး ၁၀ ခုတို့အတွက် ရွေးချယ်ခံရသူ ၁၁၅ ဦးတို့သည် နိုင်ငံ့ဝန်ထမ်း တက္ကသိုလ်(အောက်မြန်မာပြည်)တွင် ၂၀၂၃ ခုနှစ် နိုဝင်ဘာ ၆ ရက်နေ့မှ ၂၀၂၄ ခုနှစ် ဖေဖော်ဝါရီ ၂၃ ရက်နေ့အထိ ဖွင့်လှစ်မည့် အရာထမ်းလောင်း(အထူး)သင်တန်း အမှတ်စဉ် (၁၁) သို့ မပျက်မကွက် တက်ရောက်ကြရမည်ဟု ကြေညာချက်တွင်ပါရှိသည်။

ပြည်ထဲရေးဝန်ကြီးဌာန၊ ပို့ဆောင်ရေးနှင့် ဆက်သွယ်ရေး ဝန်ကြီးဌာန၊စီမံကိန်းနဲ့ ဘဏ္ဍာရေးဝန်ကြီးဌာန၊ ပြန်ကြားရေးဝန်ကြီးဌာန၊ သာသနာရေးနှင့်ယဉ်ကျေးမှု ဝန်ကြီးဌာန၊ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၊သယံဇာတနှင့် သဘာဝဝန်းကျင် ထိန်းသိမ်းရေး ဝန်ကြီးဌာနနှင့် လျှပ်စစ်ဝန်ကြီးဌာန ရှစ်ခုတို့အတွက် ရွေးချယ်ခံရသူ ၁၁၄ ဦးတို့သည် နိုင်ငံ့ဝန်ထမ်း တက္ကသိုလ်(အထက်မြန်မာပြည်)တွင် ၂၀၂၃ခုနှစ် နိုဝင်ဘာ ၆ ရက်နေ့မှ ၂၀၂၄ ခုနှစ် ဖေဖော်ဝါရီ ၂၃ ရက်နေ့အထိ ဖွင့်လှစ်မည့် အရာထမ်းလောင်း(အထူး)သင်တန်း အမှတ်စဉ် (၁၂) သို့ မပျက်မကွက် တက်ရောက်ကြရမည်ဟု စစ်ကောင်စီလက်အောက်ခံ ပြည်ထောင်စု ရာထူးဝန်အဖွဲ့၏ကြေညာချက်တွင်ပါရှိသည်။

စာမူတည်းဖြတ် - သန့်ဇော်(သန်လျင်)

#mizzima
#CDM
#ပြန်တမ်းဝင်အရာရှိ
#နိုင်ငံ့ဝန်ထမ်း
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U