Наманган вилояти Поп туманида вояга етмаган қизга шилқимлик қилган 25 ёшли йигит 5 суткага маъмурий қамоққа олинди.

«Дарё» танишган суд ҳужжатига кўра, воқеа 2026 йил 31 январь куни содир бўлган. Ўша куни И.Ш. қизга қўнғироқ қилиб, уни учрашувга чақирган. Қиз таклифга рози бўлиб, дугонаси билан Тўрақўрғон тумани марказига борган.

И.Ш. манзилга отасига тегишли автомобилда дўсти билан бирга борган. У ердан тўртовлон Поп туманига бирга йўл олишган. Бироқ қизнинг дугонаси ва йигитнинг дўсти йўлда тушиб қолган.

Шундан сўнг И.Ш. автомобилни адирлик томонга бурган ва қизни ҳеч ким йўқ жойга олиб борган. У ерда қизга уйланишини айтиб, унга нисбатан шаҳвоний шилқимлик қилган.

Судда йигит айбига тўлиқ иқрор бўлиб, содир этган қилмишидан пушаймонлигини билдирган. Жабрланувчи ва унинг онаси эса ҳуқуқбузарга нисбатан даъвоси йўқлигини маълум қилган.

Жиноят ишлари бўйича Поп туман суди И.Ш.ни Маъмурий жавобгарлик тўғрисидаги кодекснинг 41¹-моддаси 1-қисми билан айбли деб топиб, унга 5 сутка маъмурий қамоқ жазоси тайинлаган.