Uch zamon

ЭҲТИЁТ БЎЛИНГ! "ФРАНЦИЯЛИК" ФИРИБГАРЛАР! ТАРҚАТИНГЛАР!

Кеча ўқувчиларимиздан бири маслаҳат сўраб ёзиб қолди. Франциядаги "HSBC Group" деган банк уч кун ичида 10 000 $ кредит бераркан. Кредит шартлари: 600 ойгача муддатга 2% ли кредит. 10 000 долларни "Western Union"дан жўнатишлари учун уларга 215 доллар пул жўнатиш керак экан.

Айнан шу мавзуда мендан маслаҳат сўраб ёзганлар кўп бўлган ва ҳар сафар "Кредит берувчилар"ни ўрганиб, таҳлил қилиб, уларнинг фирибгар эканликларини 100% исботлаб берганман. Мендан маслаҳат сўраганлар фирибгарларнинг фирибидан қутулиб қолганлар, аммо ишониб пул юборганлар ҳам анча бўлиши мумкин.

Схемалар жуда жўн, аммо ҳар 10 кишидан 1 киши тузоққа тушса ҳам бир юртдошимиз яхшигина пулга тушади. Шу сабабдан, мен бошқалар ҳам бу схемадан хабардор бўлишлари учун огоҳлантириб қўймоқчиман.

1. ФРАНЦИЯДА БАНКЛАР ФЕЙСБУК МЕССЕНЖЕР ОРҚАЛИ МИЖОЗ ҚИДИРМАЙДИ

Юз берган ҳолатларнинг барчасида фирибгарлар Мессенжер орқали алоқага чиқиб, ундан кейин Европа номерли "Ватсап" берганлар ва шу орқали алоқа ўрнатганлар.

Францияда банклар ҳеч қачон Мессенжер орқали мижоз қидирмайдилар ва Ватсап орқали ёзишмайдилар. Ватсап мобил телефон номерга очиладиган ижтимоий тармоқ. Банклар Ватсапда гаплашиш учун мобил телефонларини беришлари ақлга сиғмайдиган иш.

2. ФРАНЦИЯДА БАНКЛАР ЧЕТ ЭЛЛИКЛАРГА КРЕДИТ ТАКЛИФ ҚИЛМАЙДИ

Францияда банкдан кредит олиш учун аввало мижоз Францияда расман истиқомат қилиши, мазкур банкда ҳисоб рақами бўлиши ва ҳисобида етарлича пул бўлиши керак. Чет элдан миллионлаб пуллари билан келиб, Францияда расман турмаганлари учун кредит олиш тугул ҳисоб рақами оча олмаганларни кўп кўрганман. Мобадо Францияга ўрнашиб, ҳисоб рақами очиб, кредит сўрайдиган бўлсангиз ҳам турли шартларни бажаришингизга тўғри келади. Шунда ҳам кредитни бош уриб бориб ўзингиз сўрайсиз. Банк сизга кредит таклиф қилмайди.

3. СОҲТАЛАШТИРИЛГАН ҲУЖЖАТЛАР

Фирибгарлар мавжуд бўлган нуфузли банкларнинг номларини ишлатадилар ва уларнинг сайтларидаги бланкаларни олиб соҳталаштирадилар. Шунда тузоққа тушган одам Гуглдан банкнинг номини қидириб кўрса, банкнинг расмий сайтини кўриши ва Википедиядаги маълумотларни ўқиб, "сеҳрланиб" қолиши мумкин. Биладиган одам бланкаларни бир қарашда аниқлаб олади, аммо билмайдиган одам учун ҳақиқийдай туюлади.

Улар "Франциядаги HSBC Group" дейишяпти. Албатта банкнинг Францияда ҳам филиаллари бор, аммо бу инглиз банки ҳисобланади. "HSBC" асосан "бойларнинг банки" деган нуфузга эга ва у ерда 10 000$ деган пул чақадай бўлиб қолиши мумкин. Бунинг устига улар Франциядан Ўзбекистондаги ўзлари танимаган одамга бор йўғи 10000$ кредит бериш учун алоқага чиқмайдилар. Францияда валюта доллар эмас евро эканлиги ҳам огоҳликка чорлаши керак.

Фирибгарлар "HSBC Group" деб ёзишяпти-да, бланкаларининг орасида "Société Générale" банкининг логотиплари ҳам юрибди. Кимгадир кредит бермоқчи бўлган банк ўзининг рақобатчисининг логотипларини бланкаларда ишлатишини ақлга сиғдириб бўлмайди.

Ундан кейин банклар ҳеч қачон кредитни "Western Union"дан юбормайди. Европа банкларида нақд пул дегани йўқ пул ҳисоби. Кимдир сиз билан "Western Union" орқали олди-берди таклиф қиляптими, демак у "тиниқ, шаффоф" эмас.

4. ФИРИБГАРЛАР ФРАНЦУЗЛАР ЭМАС

Табиийки, фирибгарлар французлар эмас ва улар Францияда эмас. Унда нега барчаси Франциядан деб ёзади ?

Фирибгарлар Франциянинг собиқ колониялари бўлган Африка давлатларидан алоқага чиқадилар. Кечаги мисолда менимча улар Конгодан алоқага чиққанлар. Буни қаердан биламан?

Фирибгарнинг Ватсап номери Белгия номери. Конго Белгиянинг Африкадаги мустамлакаси бўлган ва конголикларнинг кўпчилиги одатда Белгияга бориб жойлашадилар. Конго бундан ташқари Португалия ва Франциянинг ҳам мустамлакаси бўлган. Бланкаларда инглиз, француз тилларидан ташқари португал тиллари ҳам ишлатилган. Хуллас, ишонарли чиқиши учун максимум ҳаракат қилинган.

Фирибгарлар Ватсапни Белгияда сотиб олинган мобил телефони номерига очиб олганлар ва ўзлари Конгодалар. Агар уларнинг фирибгар эканликларини билиб қолиб, судга берсангиз ҳам уларни ҳеч қачон топа олмайсиз. 215$ учун ҳеч ким уларни Конгога бориб қидириб юрмайди.

1.61K viewsedited 08:37