ТАВАЛЛУД КУНИНГИЗ МУБОРАК, РАҲМАТЖОН ҚУРБОНОВ !

Ўзбекистонда ҳали ҳам "Халқ артисти" унвони берилмаган бир ХАЛҚ АРТИСТИ бор. Бу овоз, маҳорат, хизмат, билим ва санъат борасида Комилжон Отаниёзов, Отажон Худойшукуровнинг издоши деб айтиладиган, халқ "Довудий овоз соҳиби" деб ном берган Раҳматжон Қурбоновдир.

Яқинда Маданият вазири Озодбек Назарбековга ёзма мурожаат қилганимда президентга Оғабек Собиров билан бирга Раҳматжон Қурбоновга ҳам "Халқ артисти" беришни тавсия қилишларини сўраган эдим. Оғабек Собировга "Халқ артисти" унвони берилганидан бошим осмонга етди, аммо Раҳматжон оғага берилмаганлиги учун кўнгил ярим қолди.

Раҳматжон Қурбонов бугун 61 ёшга кирди. У 1959 йилда Хива шаҳрида санъаткор оиласида таваллуд топган.

Буюк ҳофизни таваллуд куни билан муборакбод этаман. Ҳофизга хоразмча айтганда камида Гўрўғлининг ёшини тилайман. Санъати, овози ҳеч қачон сўнмасин. Халқ унга аллақачон бериб бўлган "Халқ артисти" унвони тезроқ берилиб, адолат қарор топсин !

👉https://t.me/uchzamon

"Дўстим ким, душманим ким", Раҳматжон Қурбонов

"Уч замон"га ҳали аъзо бўлмаганлар учун ҳавола👉https://t.me/uchzamon

ЛОНГРАЙТЕР КИМ ВА У НЕГА УЗУН ЁЗАДИ?

Долзарб муаммолар ҳақида ёзадиган ва кўпчилик ўқийдиган инсонлар орасида "лонграйтерлар"и, яъни инглиз тилидан таржима қилганда "Узунматнёзарлар"и бор. Бунга мисол қилиб "Асанов формати" канали муаллифи Элдор Асановни, "Ҳужайра.уз" канали муаллифи Бахтиёр Шералиевни, "Микрофон Ашуровда" канали муаллифи Рустам Ашуровни ва каминани келтириш мумкин.

Лонграйтерларнинг матнлари қанчалик долзарб бўлмасин баъзан фақатгина матн узун бўлганлиги учунгина уни ўқимайдиган ва ҳатто "Шу гапни айтиш учун шунча ёзиш шартмиди" деб нолийдиганлар ҳам топилади. Буни лонграйтерларнинг ўзлари ҳам биладилар, аммо улар барибир узун матнларни ёзаверадилар ёки ёзишга мажбур бўлаверадилар.

Шундан келиб чиқиб савол : Лонграйтер ким ва нега у узун матнлар ёзади?

Мен барча лонграйтерлар учун жавоб бериш ниятим йўқ. Фақат ўзим учун жавоб бераман.

Париж сиёсий фанлар институтида ўқиганимизда бир вазифа бериларди. 150-200 варақли китобни ёки 500 варақли зерикарли ҳисоботни ўқиб, уни анализ-синтез қилиб, қисқача мазмунини 10 қаторда ёзишимиз керак эди. Машқнинг масъулияти шунда эдики, матнни ўқиган одам китобни ёки ҳисоботни тўлиқ ўқигандай бўлиши керак эди.

Аммо 10 қатрога сиғдирган матнни ўқийдиган одамнинг билим, тажриба ва салоҳияти 10 қаторга сиғдирилган матнни ўқигач, миясида таҳлил қилиб уни бошқатдан 150-200 варақ китобга ёки 500 варақли ҳисоботга айлантира олиши керак. Агар ўқувчи бу ишни қила олмаса, унга матнни қисқартириб бериш худди унга ҳеч нарса бермаслик билан баробардир.

Оддий халқ илмий китоб ва мақолаларни ўқимайди. Чунки улар шунчалар узун, шунчалар зерикарли ва "ҳаволалар" сабабли шунчалар ўқишга ноқулайдир. Оқибатда жамиятларда олимлар ва олим эмасларнинг ўртасида жарлик юзага келади.

Илм кишиларининг орасида қарашлари халқчилроқ ва характери ижодкорроқлари бўлади. Улар долзарб ва илмий жиҳатдан мураккаб бўлган мавзуларни 1000 марта соддалаштириб, таҳлил қилиб, илмий-публицистик мақолалар шаклида оддий халқнинг оғзига "чайнаб" солиб берадилар. Улар бу ишни одатда илҳом келганда қиладилар ва илҳом келмаса ёза олмайдилар. Чунки бу уларнинг илмий эмас, кўпроқ ижодкорлик қирралари махсули ҳисобланади.

Улар илмий-публицистик мақолани ёзганларида долзарб мавзуга оид бир неча китоблар ва илмий мақолалардаги илмларни анализ-синтез қилиб, максимум даражада қисқартириб, оддий халқнинг тилига "таржима қилиб" кейин чоп этадилар. Шу сабабдан, уларнинг матнлари 3-5 варақ бўлиб кетади. Ана шу инсонлар "лонграйтерлар" бўладилар.

Долзарб мавзулар шундайки, уларнинг аниқ ва жўн жавоблари бўлмайди. Улар юзасидан томлаб китоблар ёзилади, тадқиқотлар қилинади ва шунда ҳам тайинли жавоблар топилмайди. Шундай бўлгач, илмий-публицистик мақола муаллифи, яъни лонграйтер имкон қадар холис қолганча барча илмий позицияларни ва аргументларни келтиришга ҳаракат қилади. Чунки айтилмай қолган позиция ёки аргумент учун шундай позициядаги инсонлар мақолани нотўғри деб, муаллифни нохолис деб ўйлашлари мумкин. Маъқул деб топса, ўзининг шахсий позициясини ҳам билдириши мумкин. Қарабсизки, лонграйтер "оғзини очмасидан" туриб 1000 марта қисқартирилган ва ҳеч нарса қолиб кетмаслигига, қўшимча саволлар пайдо бўлиб қолмаслигига интилиб ёзилган мақола камида 3 варақ бўлиб қолади.

Лонграйтерлар олимлар ва халқнинг ўртасида кўприк вазифасини бажаришдай масълулиятли ишни касб қилган ижодкор илм кишилари ҳисобланадилар. Шу сабабдан, лонграйтерларни тўғри тушуниш, иложи бўлса уларга текинга сут бериб 😬😜... узр, уларнинг матнларини эринмасдан ўқиб бориш керак!

ПС. Уффф, матн яна узун бўлиб кетди! Ишқилиб охиригача ўқиган бўлсангизлар бўлди ! 😜

"Уч замон"га ҳали аъзо бўлмаганлар учун ҳавола👉https://t.me/uchzamon

Ўзбек-турк хабарлари телеграмиканали хабари. Ўзбекистон Республикаси Маданият вазирлиги, Ўзбекистон Республикасининг Туркиядаги Элчихонаси ҳамда Истанбулдаги Бош консулхонаси маълум қилади

Сиз Туркиядамисиз?
Пандемия сабабли вақтинчалик ишсиз ҳолатга тушиб қолдингизми?
Айни вақтда нима билан шуғулланиш устида бош қотираяпсизми? Пул топиш истагидамисиз?
У ҳолда бу лойиҳа айнан сиз учун!

Туркияда ишсиз ҳолатга тушиб қолган фуқароларимизни қўллаб-қувватлаш мақсадида янги “Мендирман Жалолиддин” телесериалининг оммавий саҳналарида иштирок этиш ва вақтинчалик иш билан таъминланиш имконияти яратилди.

Тарихий сериалнинг оммавий саҳналарида сиз ҳам қатнашинг ва моддий рағбатлантириш имкониятларидан фойдаланинг.

Мурожаат учун:

“Gül Production” Şirketi, Levent Mahallesi, Alkaranfil Caddesi, No: 16, Beşiktaş, İstanbul
Telefon: +905533827795, +905362291707

"Уч замон"га ҳали аъзо бўлмаганлар учун ҳавола👉https://t.me/uchzamon

БИР ОЙДА 13 КИЛО ЙЎҚОТДИМ!

Коронавирус карантини туфайли (баҳонани қара 😜) оёқларим кўринмай бошлаган эди.

Шу сабабли, 21 август куни диета бошлаган эдим. Бугун 21 сентябрда 13 кило йўқотдим. Мўлжал: 1 нояьргача яна 14 кило йўқотиш. Агар мақсадимга эриша олсам мақтаниб пост қиламан.

Менга ўхшаб диетада юрганларга сабр тилайман ! 😜

"Уч замон"га ҳали аъзо бўлмаганлар учун ҳавола👉https://t.me/uchzamon

"The Power Of Love", Jennifer Rush

"Уч замон"га ҳали аъзо бўлмаганлар учун ҳавола👉https://t.me/uchzamon

Нафақат диета қилишда, умуман овқатланишда қатъий эътибор бериш керак бўлган нарса бу истеъмол қилаётган таомингизнинг кўп ёки камлиги, катта ёки кичиклиги эмас, балки ундаги калория миқдоридир. ☝

"Уч замон"га ҳали аъзо бўлмаганлар учун ҳавола👉https://t.me/uchzamon

2020 йил фавқулотда оғир йил бўлмоқда.

Навбатдаги йўқотиш. "Ўзбекистонда хизмат кўрсатган артист", халқимизнинг севимли суҳандон ва ҳофизи Шуҳрат Қаюмов вафот этибди.

Жойлари жаннатда бўлсин! Яқинларига, оила аъзоларига сабр тилайман !

"Уч замон"га ҳали аъзо бўлмаганлар учун ҳавола👉https://t.me/uchzamon

"Сиз ўшаму?", Шуҳрат Қаюмов

"Уч замон"га ҳали аъзо бўлмаганлар учун ҳавола👉https://t.me/uchzamon

ЎЗБЕКИСТОН КАААТТА ТОВУҚХОНАМИ?

Савол ғалати туюлдими? Ҳозир тушунтираман.

Француз тилида "Nid de poule" (ўқилиши "Нидепул") деган ибора бор. Иборанинг сўзма-сўз таржимаси "Товуқ уяси" дегани бўлади. Аммо бу ибора йўллардаги чуқурлар (яма)га нисбатан ишлатилади.

Шундан келиб чиқиб, йўллардаги ҳар бир "яма" товуқ уяси бўладиган бўлса, Ўзбекистонни бемалол кааатта товуқхона десак бўладими?

А лаббай? 😜🐔😂

"Уч замон"га ҳали аъзо бўлмаганлар учун ҳавола👉https://t.me/uchzamon

ГУЛЛАРИМИЗ ГУЛЛАДИ!

Мана шу гуллар ташландиқ бўлиб қолиб кетиб, деярли сўлиб бўлган эди. "Ўлиб қолди, энди ташлаймиз" деб ўйлаб юрган жойимизда уларнинг ўлишларини истамай умидлар билан қайта парваришлашни бошлаган эдим.

Тупроқларини юмшатиб, қуриб қолган шоҳларини олиб ташлаб, сув қуйиб ҳар куни қараб турдим. Бирон ойлар олдин қайта яшашни бошлаганида бир хурсанд бўлган эдик.

Бугун қарасак, улар қип-қизил бўлиб очилибди. Кўзларимиз қувнаб, кўнглимиз шод бўлди.

"Умид охирда ўлади" деганларидай умидни йўқотмаслик керак экан. Агар меҳр бериб, чин кўнгилдан парвариш қилинса, барчаси мана шу гулдай гўзал бўлиб кетади!

"Уч замон"га ҳали аъзо бўлмаганлар учун ҳавола👉https://t.me/uchzamon

САМАРАДАГИ ЎЗБЕК МИГРАНТЛАРИНИНГ ЧОДИРИ

Бу Самарада бир неча ойлардан бери кўчада ётган юртдошларимизнинг чодирлари экан.

1. Дунёда биронта тинч давлатнинг фуқаролари бундай аҳволда бошқа давлат ҳудудида хор бўлиб ётмайдилар. Одатда уруш ва қирғинлар сабабли ўз юртларини ташлаб кетишга мажбур бўлган халқлар, масалан ироқликлар, афғонлар, сурияликлар, ливияликлар Туркия ёки Европа чегараларида шу аҳволда яшашга мажбур бўладилар.

2. Дунёдаги истаган бир давлатнинг фуқаролари ойлар давомида бошқа давлат ҳудудида хор бўлиб ётсалар, бу муаммони ҳал қилмаган масъуллар - ўша давлатнинг раҳбаридан тортиб то тегишли вазирларгача истеъфо беришга ёки муаммони ҳал қилишга мажбур бўлган бўлар эдилар.

3. Ўзбекистон дунёдаги истаган давлат эмас. Унинг осмони мусаффо ва у ерда "Бунёдкор" стадиони бор!

Тугади! Мен бир йиғлаб олай! 😭

"Уч замон"га ҳали аъзо бўлмаганлар учун ҳавола👉https://t.me/uchzamon

"Имшаб ёд кардам", Далер Назаров

"Уч замон"га ҳали аъзо бўлмаганлар учун ҳавола👉https://t.me/uchzamon

Белкурак битта бўлса ҳам ўзбек йўлини топади 😜😂👏

"Уч замон"га ҳали аъзо бўлмаганлар учун ҳавола👉https://t.me/uchzamon

НЕГА ЮРТДАГИ МУАММОЛАР ҲАҚИДА ГАПИРИЛСА АЙРИМЛАР БУНИ ВАТАННИ ЁМОНЛАШ ДЕБ ТУШУНАДИ ?

Жамиятнинг зиёли ва фаол инсонлари юртнинг фаровонлигини ўйлаб, ижтимоий (маиший)-иқтисодий-сиёсий ва бошқа муаммоларни кўтариб чиқадилар, ёритадилар, таҳлил қиладилар ва билимлари етса ечимлар таклиф қиладилар. Улар одатда бу ишни жамиятнинг ва юртнинг фаоровонлигини кўзлаб қиладилар ва бундан албатта шахсий манфаатларни кўзламайдилар.

Мен ўз мутахассислик соҳаларимнинг вакили сифатида жамиятимизнинг муаммолари ва иллатларига нисбатан ўз фикрларимни, таҳлил ва таклифларимни бериб бораман. Умуман олганда, бу менинг оддийгина фуқаролик ҳуқуқим. Аммо мен қайси мавзуда фикр билдиришимдан қатъи назар албатта на мавзуни, на муаммони тушунмай туриб мантиқсиз фикрлар билдирадиганлар топилади. Масалан, мен юртимиздаги порахўрлик, соғлиқни сақлаш, таълим, умуман бошқарув соҳасига оид муаммолар юзасидан фикрлар билдирганимда баъзан мени "Ватанни танқид қилиш"да, "Ўзбекистонни ёмонлаш"да айблайдиганлар чиқиб қолади.

Тўғри, ҳаммада мен олган тахсил ва тажрибаларни олиш имкони бўлмаган ва мен кўраётган ва англаётган муаммоларни кўриш ва англаш салоҳияти йўқ. Аммо инсонлар тушуниб тушунмай турли нотўғри ва ноўрин фикрлар билдирганларида уларга тўғрисини билдириш ҳам халқимизнинг онгини шакллантиришга ҳисса қўшади.

Авваламбор, мен ватанимизни, юртимизни, Ўзбекистонни танқид қилмайман. Ўзи одатда танқид ҳам қилмайман. Мен илм кишисиман ва муаммолар юзасидан ўз мутахассислик ва фуқаролик муносабатимни билдираман. Агар билимим етса таҳлил қилиб, ечимлар таклиф қиламан. Билмасам ва тушунмасам, аралашмайман ва муносабат ҳам билдирмайман.

Ўзбекистондаги йўлларнинг сифати ёмонлигини, соғлиқни сақлаш вазирлиги коронавирус инқирозини ёмон бошқараётганлигини айтишим бу "Ўзбекистонни ёмонлаш" бўлмайди. Ўзбекистоннинг йўлларини сифатсиз қилганлар ва миллиардлаб доллар пулларни ўмарганлар бошқалар. Коронавирусни бошқаришда шифохоналарда шароитларни яратишнинг ўрнига шифокорларни беморларга гул бердирганлар бошқалар. Уларнинг бу қилган ишлари нотўғри, бефойда эканлигини айтиш мени "Ватанни ёмонловчи"га чиқармайди.

Бундай гапларни айтадиган, мантиқсиз айбловлар қўядиганларнинг фикрлари саёзлиги ва билимлари ҳаминқадарлиги тушунарли. Муаммоларнинг яралишига сабабчи бўлганлар ва уларни ҳал қилмай юрганлар ҳам бундай гапларни айтишлари тушунарли. Аммо айрим халқ вакиллари айнан бир хил айбловларни айтишларига сабаблар бор. Бу сабаблар нималардан иборат ?

Биринчи сабаб - таълим сифатининг ёмонлиги ! Айниқса, мустақиллик йилларида ижтимоий соҳалар, хусусан таълим соҳасининг таназзулга юз тутиши саводсиз авлодларни етиштириб чиқарди ва бу жамиятимизни ҳали узоқ йиллар ортга тортади.

Иккинчи сабаб - давлат тарғиботи ! Миллий истиқлол ғояси, маънавият ва бошқа чала пишган мафкураларни фуқароларнинг онгларига сингдириш учун қилинган ҳаракатлар уларнинг ижодкорлик, фикрлаш қобилиятларидан мосуво қилиб, фақат телевизор такрорлаган гапларни гапирадиган қилиб ташлаган.

Учинчи сабаб - "Ёмонини яшириб, яхшисини ошириш" ҳақидаги ўзбек мақоли ! Албатта биргина мақол ҳеч нарсани ҳал қилмайди. Аслида бу мақол менталитетимиздаги бутун бошли бир одатимизнинг ифодаси ҳисобланади. Ўзбек ўз уйининг ичидагини кўчага чиқармайди. Отаси ичиб келиб онасини урадими, уйда нон йўқ, хоналар ремонт қилинмаганми, ҳожатхона сасиб ётадими, барча муаммолар уйда қолиши керак. Муаммоларни ҳеч қачон ҳал қилмаслик мумкин, асосийси улар уйдан ташқарига чиқмаслиги керак. Уйнинг ичидагилар эса шу муаммолар билан бирга яшашлари керак.

Тўртинчи сабаб олдинги сабабларнинг тўғридан-тўғри оқибати - сиёсий ва ҳуқуқий онгнинг пастлиги ! Кўпчилик инсонлар ватан, миллат, ҳукумат, подшо ва бошқа сўз ва тушунчаларнинг маъно ва моҳиятларини билмасликлари. Ўзбек жамияти патерналист, яъни ота устун бўлган жамият ҳисобланади. Ўзбек давлатчилиги эса хонликлар давридаги монархия тузумидан Россиянинг мустамлакасига айланиб, кейин мустақил бўлган. Шу сабабдан, сиёсий тузум республика ва давлат раҳбари президент бўлса ҳам одамларнинг онгида "Юрт отаси" - подшо юртнинг хўжайини ҳисобланади.

Францияда абсолют монархия ўрнатган қирол Людовик 14 "Давлат бу менман" деган. Абсолют монархия тузумида давлат деганда якка ҳукмрон монарх тушунилади.

Ўзбекистонда президентни давлат, юртни муаммолари айтилмаслиги керак деб биладиган инсонлар кўп. Улар нафақат менинг, балки ўзларининг ҳуқуқларини ҳам билмайдилар. Шу сабабдан, кимдир юртдаги муаммоларни кўтарса, улар буни отага, уйга нисбатан ҳиёнат деб ўйлайдилар. Ваҳоланки, ташқарида 21 аср бормоқда ва Ўзбекистонда подшоларнинг монархия замони бир асрдан бери мавжуд эмас.

Шу ва шу каби сабабларга кўра, айрим инсонларимиз мен ва менга ўхшаган инсонларни ноҳақ айблайдилар. Маълумот учун, мен матнларни ўзбек тилида, ўзбекларга, ўз юртдошларимга ёзаман. Муаммолар ҳақида гапирсам улар эътиборга тушиши ва ечилиши учун гапираман. Мен пиар учун ёки қуруқ танқид қилиб очко ишлаш учун матн ёзмайман. Бу фикрларни чет тилларида чет элликлар учун ёзмайман. Чет давлатларда ҳеч қачон юртимизни ва юртдошларимизни ёмонлайдиган фикр айтмаганман ва айтмайман ҳам. Аксинча, касбий ва шахсий фаолиятимда доим юртимиз ҳақида ижобий тасаввурлар пайдо бўлишига ўз ҳиссамни қўшиб келмоқдаман.

Шунинг учун бировнинг манзилига бир гапни ёзиш ёки айтишдан олдин мия деган жониворни ишлатиш ва 7 марта ўйлаб кейин гапириш керак. Акс ҳолда, мантиқсиз айбловни гапирувчи инсоннин ўзи Ватанимизни, Ўзбекистонимизни ёмон кўрсатувчи, унинг тараққиётини орқага тортувчига айланиб қолиши мумкин !

"Уч замон"га ҳали аъзо бўлмаганлар учун ҳавола👉https://t.me/uchzamon

Айрим йигитларга "Тўй қачон" деса "Қиз йўқ" деб юраверади. Айримларга бутун оила, амма, холалар қиз қидирадилар.

Шундай пайтда менда йигит ва унинг қиз қидирувчилари мана шу узукка бармоғи тўғри келадиган қиз қидириб юргандай тасаввур пайдо бўлади 😜😂.

Дунёда нима кўп, қиз кўп. Бориб биттасини севиб келмайсанми, тўй бўлиб кетмайдими ❤😂🤘

Эххх!

PS. Бу суратни Франциянинг Бретань вилоятида туширганман.

"Уч замон"га ҳали аъзо бўлмаганлар учун ҳавола👉https://t.me/uchzamon