ወጪ እና ጊዜ ቆጣቢ የሆነ "ሸነል" የተሰኘ ተገጣጣሚ የግንባታ ቴክኖሎጂ በሙሉ አቅም ወደ ሥራ ገባ

ወጪ እና ጊዜ ቆጣቢ የሆነ "ሸነል" የተሰኘን ተገጣጣሚ የግንባታ ቴክኖሎጂ በሙሉ አቅም ወደ ሥራ ማስገባት መቻሉ ተገለጸ።

በአማራ ክልል የዘመን ኮንስትራክሽን ኮርፖሬሽን አመራሮችና ባለሙያዎች በተለያዩ ተቋማት ውል ወስደው እየገነቧቸው የሚገኙ የተለያዩ ሕንፃዎችን ተዘዋውረው ተመልክተዋል።

የኮርፖሬሽኑ ዋና ሥራ አስፈጻሚ ታደሰ ግርማ እንደገለጹት፤ ቴክኖሎጂው አለም አቀፍ የግንባታ መስፈርቶችን ያሟላ ነው።

ቴክኖሎጂው በጀርመን እና ጣሊያንን በመሳሰሉ ሀገራት ቤት ለመሥራት የሚጠቀሙበት ነው።

በወጪ ደረጃም በአርማታና ብሎኬት ከሚገነቡ ሕንፃዎች እስከ 40 በመቶ የሚቀንስና ከ38 በመቶ በላይ በአጠረ ጊዜ ገንብቶ ለማጠናቀቅ የሚያስችል ነው።


ቴክኖሎጂው በጥራቱና አዋጭነቱ በፌዴራል ደረጃ ከሚመለከተው አካል ማረጋገጫ የተሰጠው መሆኑን ጠቁመው፤ ኀብረተሰቡ ይሄን ቴክኖሎጂ ተጠቅሞ የመኖሪያ ቤቶችን በቀላል ወጪ መሥራት ይቻላል።

አሁን ላይ የነበሩ የግብአትና ሌሎች ችግሮችን ሙሉ በሙሉ በመፍታት በሙሉ አቅም ወደ ስራ ማስገባት ችሏል።

በሙከራ ደረጃ የዘጠኝ ግለሰቦችን ቤት ገንብቶ ማስረከብ መቻሉን ጠቁመው፣ አሁን ላይ የአማራ ክልል ጤናና ግብርና ቢሮዎች እድሳትና አዳዲስ ሕንፃዎች ግንባታን በቴክኖሎጂው እያከናወኑ ነው።

የአማራ ክልል ልህቀት የዲዛይንና ቁጥጥር ኮርፖሬሽን ቢሮን ገንብቶ ማስረከብ መቻሉን ገልጸው፤ አሁን ላይ ቴክኖሎጂውን ፈልጎ ለሚመጣ የተቀላጠፈ አገልግሎት እንደሚሰጥ አረጋግጠዋል።

የአማራ ክልል ግብርና ቢሮ ጽሕፈት ቤት ኃላፊ አቶ  ስለሺ ሙሉነህ፤  40 ሚሊዮን ብር በጨረታ የተጠየቀውን የማስፋፊያ ቢሮ ግንባታ በግማሽ በመቀነስ በቴክኖሎጂው ማስገንባት ተችሏል።

@etconp