#iqtibos

Rahbarlik – Vatan oldidagi mas’uliyat

Haqiqatan ham, ma’naviy uyg‘onishda – islohotlarni hamjihatlikda, yuksak salohiyat va qunt bilan ro‘yobga chiqarishda yangi tafakkurga ega fidoyi insonlar va mas’uliyatli rahbarlar hal qiluvchi ahamiyatga ega.

Bugun yurtimizda qadriyatlar, mezonlar, o‘lchovlar o‘zgargan. Ilgari kishining obro‘-e’tiborini, qadr-qimmatini uning lavozimi, mavqei belgilagan bo‘lsa, bugungi kunda fidoyilik va mehnat asosiy mezonga aylandi.

Endi rahbarlik – bu imtiyoz emas, Vatan oldidagi mas’uliyat, sinov va xizmat maktabi.

Zotan, haqiqiy uyg‘onish ana shu fidoyi mehnatdan boshlanadi. Kechagi davrda katta amal deganda hashamat, nutq va ko‘rgazmali yig‘ilishlar tushunilardi. Ammo bugungi zamonda rahbar – xalq bilan, xalq orasida bo‘lishi kerak. Shiddatli o‘zgarishlar davri rahbardan faqat boshqaruv emas, balki bunyodkorlik, mehnatsevarlik va vijdon talab etadi. Kim xalqqa xizmat qilsa – o‘sha chinakam yetakchi. Mas’uliyatdan qochgan esa amaldan ham ayriladi.

Sobiq ittifoqdan qolgan “har viloyatning rahbari o‘zidan bo‘lsin” degan qarash ancha yil yashadi. Ammo bugungi hayot isbotladiki, salohiyat, bilim va fidoyilik hech qanday geografik chegarani tan olmaydi.

Prezidentimiz izidan borib, bu insondan o‘rnak, ibrat olib, butun O‘zbekistonning har qarich yeri mening Vatanim deya yashayotgan, uning obodligi uchun bor bilim va iqtidorini safarbar etayotgan jonkuyar rahbarlar oramizda ko‘p.

Masalan, Samarqand viloyatida tug‘ilib Navoiy, Surxondaryo va Samarqandda faoliyat ko‘rsatgan, hozir esa Sirdaryoda quvonarli natijalarga erishayotgan rahbarning tajribasi – haqiqiy yetakchilik qudrati tug‘ilgan joyda emas, vijdon va sadoqatda ekanini namoyon etadi.

Yoki so‘nggi yillarda Toshkent viloyatining islohotlar markaziga aylangani ham bu hududning rahbari qanday inson ekanining barometridir. Bu kishi jonkuyar, tashabbuskor, mehnatsevar, vatanparvar bo‘lmasa, davlat rahbari qo‘yayotgan talablarni sidqidildan bajarmasa, hududning ko‘rki, iqtisodiyoti, ijtimoiy hayotidagi bugungi misli ko‘rilmagan yangilanishlar qayoqda edi?!

Yaqinda ushbu viloyatda bo‘lib o‘tgan bir tadbirda ishtirok etgan yoshi ulug‘ inson Abdusamat Nosirov shunday dedi:
“Prezidentimiz hamma sohada – iqtisodiyotda, ijtimoiy hayotda, kadrlar siyosatida yangi davrni boshlab berdi. Viloyatimiz misolida bu yaqqol ko‘rinadi. 40 yil muhokama qilingan masala – viloyat markazini Nurafshonga ko‘chirish amalga oshdi. Endi 22 tumanda ham katta o‘zgarishlar ko‘zga tashlanmoqda”.

Bu so‘zlar xalqning qalbidan chiqqan samimiy baho. Viloyatning qiyofasi o‘zgardi, yangi korxonalar, yangi infratuzilmalar paydo bo‘ldi. Bunday natija tasodif emas – bu Prezidentimizning qat’iyati, fidoyi rahbarlarning mehnati samarasidir.

O‘tkir RAHMAT
("Toshkent haqiqati" gazetasi, 2025 yil, 15 oktyabr sonidan)

✅Telegram 🌐Website 📹YouTube✅Facebook 🕊Twitter