Maqolada tilga olingan Nurafshon shahri, To‘ytepa mahallasi, Toshkent yo‘li ko‘chasi, 125-uy manzilida joylashgan bino 1970-yillarda qurilgan bo‘lib, uzoq yillar davomida O‘rta Chirchiq tumani markazlashgan kutubxonalar tizimi tasarrufida kutubxona sifatida faoliyat yuritgan. 2013-yilda hukumatning tegishli qaroriga muvofiq Markazlashgan kutubxonalar tizimi faoliyati tugatilib, uning negizida ta’lim muassasalarida Axborot-resurs markazlari tashkil etilgan. Shu munosabat bilan mazkur kutubxona ham Nurafshon shahridagi 1-sonli umumta’lim maktabiga ko‘chirilib, Axborot-resurs markazi sifatida o‘z faoliyatini davom ettirgan.

O‘zbekiston Respublikasi Vazirlar Mahkamasining 2021-yil 21-iyuldagi 390-F-sonli qarori hamda Toshkent viloyati hokimining 39-10-0-F/21-sonli farmoyishiga muvofiq mazkur bino Toshkent viloyati Dori-darmon aksiyadorlik jamiyatiga mulk huquqi asosida foydalanish uchun berilgan. Hozirgi kunda ushbu obyektdan maxsus dori vositalarini saqlash ombori sifatida foydalanib kelingan.

Shuningdek, 2017-yilda Nurafshon shahri O‘rta Chirchiq tumani tarkibidan ajratilib, Toshkent viloyatining ma’muriy markazi etib belgilanganidan so‘ng shaharning yangi bosh rejasi (genplan) ishlab chiqilgan. Mazkur bosh reja asosida shahar hududlarini izchil rivojlantirish, zamonaviy ijtimoiy infratuzilma obyektlarini barpo etish, aholi uchun qulay sharoitlar yaratish hamda shaharsozlik me’yorlariga qat’iy rioya etish ustuvor vazifalar sifatida belgilangan.

Shu munosabat bilan, avval kutubxona faoliyat yuritgan mazkur manzilda kutubxona binosini qayta tiklash rejalashtirilmagan. Biroq shaharning bosh rejasiga muvofiq, yangi zamonaviy kutubxona Nurafshon Business City hududida barpo etilishi ko‘zda tutilgan. Mazkur maskan transport va piyodalar qatnovi nuqtai nazaridan aholi uchun qulay joylashuvga ega bo‘lib, zamonaviy loyiha asosida bunyod etiladi.

Yangi kutubxona zamonaviy axborot-resurs markazi sifatida shakllantirilib, kitobxonlar uchun keng imkoniyatlar yaratadigan, yoshlarning bilim olishi, izlanishi va bo‘sh vaqtini mazmunli tashkil etishga xizmat qiladigan zamonaviy ma’naviy-ma’rifiy maskanga aylantiriladi.

Ayni paytda Nurafshon shahrida aholi, ayniqsa yoshlarning kitob mutolaasi bilan shug‘ullanishi uchun zarur sharoitlar yaratilgan. Jumladan, Yoshlar markazida 5 mingdan ortiq kitob fondiga ega Toshkent viloyati “Turon” axborot-kutubxona markazi filiali hamda Toshkent viloyati Yozuvchilar uyushmasi huzurida 2 mingdan ziyod kitob fondiga ega kutubxona faoliyat yuritib kelmoqda.