銅鑼灣東角道Channel

#讀者投稿 #美國選舉 #中共視角

隔岸觀火 中共宜家係揞住半邊咀笑（六)

上文提到，喺中共角度嚟睇，總統最好混亂到一個程度致美國陷入內戰邊緣。否則，好似《中國模式國情專題教學手冊》咁講，「政黨惡鬥，人民當災」 —— 包括延綿不絕嘅司法訴訟，亦都可以做到undermine美國嘅效果。

但容許候選人提出司法訴訟唔係反映咗美國制度嘅優越性咩？從中共角度嚟睇，無論點樣判都好，佢哋都可以spin嚟貶低美國。判贏咗，自然係證明美國選舉充滿舞弊情況。又種票又造票又點錯票又遺失選票，咁多醜聞、咁黑暗，可以話係仲衰過中國明刀明槍嗰隻專制濫權喎。

但如果法院判決係判輸咗呢？中共亦可以spin，話連美國法院都已經唔再「有險可守」 —— 即係全個美國三權體制加埋deep state面具已經被拆穿。兩者任佢噏但係目的都係一樣，就係「證明」西方民主體制多年嘅人吹到咁好，其實實際上沒有什麼優越性可言。

法院判決如是，選舉結果亦如是。登嬴嘅話，除咗嗰啲醜聞 (Hunter、戀童、老人癡呆) 之外，仲有就係會喺佢四年任期內，好似過去四年嘅通俄門咁樣，不斷loop選舉舞弊與及佢其實係俾中共收買嘅指控。仲有聯同侵及QAnon口中嘅deep state與及 ”Big Media, Big Money, and Big Tech” 操控美國政治、社會每一個層面嘅一套conspiracy theories平衡時空世界觀。

至於如果最終係其實侵嬴嘅話，從國際政治嘅角度嚟睇，其實可能對美國嘅國際地位嘅根本性傷害更大。呢個要考慮返美國同埋盟友嘅關係。二戰以後，美國逐漸取代了英國在國際上的地位，成為西方陣營領袖。此地位是得到一眾西方國家認同，即係大家都默認嘅西方世界「共主」。但呢個領導地位，喺特朗普上台以來，已經逐漸下降。西方盟友唔再睇 (由特朗普領導嘅) 美國頭，甚至喺多個國際場合，法國、德國、加拿大等領袖多次、自己圍埋一堆然後疏遠佢。先唔理佢哋咁樣做係咪啱，但如果侵上台再做四年，睇怕咁嘅情況只會越趨嚴重。

國家領袖如是，其實多國人民對特朗普本人亦有咁嘅睇法。根據一個跨國民意調查，對特朗普嘅信任度，比起所有西方領袖還要低 (連結)。而其實除咗台灣同香港之外，西方國家甚至亞太其他國家，其實係一面倒支持登而非侵成為美國總統 (連結)。

因此，雖然我哋香港人視侵為大佬，如果佢當選嘅話，恐怕美國在國際政治上的地位進一步削弱 —— 即係其實有利於中共 2049 百年爭霸 “One-Hundred Year Marathon” 的形勢。

最好戴多次頭盔：從第一部份開始，此分析旨在說明中共其實並非着眼於侵或登而係點樣可以喺呢趟渾水搵到可乘之機。因此，我哋都從無捧侵或登嘅含意。同埋寫咗咁長，其實都係暗示俾香港人知，唔好盲舂舂陷入中共嘅圈套。個別聲援可以，但啲集體行動 (例如登報、眾籌打官司、白宮聯署) 就要諗清楚。經過2016年嘅選舉之後，美國人去外國干預選舉非常敏感 —— 只要睇吓Mark Simon單嘢就知。另外就係唔好因為侵輸咗，就俾機會中共輿論PR機器分化、同埋進一步灌輸無力感。本來呢一點想寫多啲，但係篇嘢已經太長所以從略，敬請原諒。

如有意見、投稿，請透過 @AskChing_bot 提交。
- - - - -
銅鑼灣東角道
本區公海： https://t.me/CWBhk
Channel: https://t.me/CWBnow