【台灣泰國文宣示範】

#賽後檢討

呢幾日Twitter好似俾火燒咁旺，相信大家都好享受今個假期，但都係時候總結一下今次嘅經驗。

首先係早幾日台灣政府不斷向外國輸出口罩，然後俾五毛話台灣係支國一部份攞credit。台灣朋友好犀利即刻騎劫返#ThisAttackComesFromTaiwan呢個hashtag，仲順便貼返台灣美食同靚景嚟介紹自己國家。

另外當然係呢兩日由泰國hit到去全球嘅#nnevvy，Team Thailand洗版式得嚟又搞笑嘅攻擊實在令大家印象非常深刻，佢哋仲借用香港同台灣令五毛玻璃心爛到一地都係。

總結而言有啲咩係我哋可以參考嘅呢？其實都不外乎嗰幾點。

1. 靈活變通
好似台灣咁，其實可以參考佢哋將人哋嘅攻擊變成自己優勢呢種做法，既可以維護自己嘅價值，同時可以幫自己宣傳，適當咁騎劫咗人哋個hashtag。其實香港自己都有做眾籌輸岀口罩，雖然唔係政府做，但我哋喺適當嘅tweet都可以話俾外國人聽香港人願意幫忙。香港人執生好叻，就更應該表現喺文宣上面。

2. 認清目標
支國人因為屈人港獨台獨而攻擊人，泰國人就利用返佢哋嘅玻璃心弱點嚟攻擊返佢哋，完全了解佢哋嘅敵人。文宣唔只淨係俾外國議員睇，泰國人極速connect到支國人嘅敵人，直頭形成咗大東亞共榮圈同支國對立。當然，泰國人冇我哋嘅包袱，佢哋都玩得開放好多。而且佢哋多人，我哋情況唔一樣，所以要清楚知道每次想達到嘅目的，因為未必次次都一樣。同埋泰國人追得時事好貼，Gphone玩動森都俾佢哋攞哂做meme。

有見到啲post話平時嘅文宣過份認真同太重視美觀，搞笑嘅更有效。當然講傳播嘅速度同有趣方面，搞笑嘅meme係有優勢，但絕對唔可以discredit平時一啲認真嘅文宣。首先唔係樣樣嘢都適合搞笑，例如講疫症同WHO嘅嘢都好應該用有事實佐證嘅論點；反而泰國嗰種可以盡情玩。總之就唔好側重某一邊，資訊、幽默、澄清缺一不可，睇情況做人。

同埋見到有手足話驚騎劫咗泰國個tag，亂騎劫講香港嘢。其實感覺大家好識玩，搞笑就真係搞笑，笑五毛就笑五毛，冇特別覺得大家有太多過火嘢。我哋本身就俾人拉落水，借少少位講吓香港亦唔過份。都係嗰句，睇情況唔好做多咗。

文宣方向其實冇一個定案，最能夠喺台灣同泰國人學到嘅其實係齊心。人哋只係需要有一個共同目標就會一齊做，大家可以再思考吓。