#手足投稿 #二手資料

有朋友噚日經過太子站發生以下事情想投稿

//由深水埗搭地鐵準備去黃埔，因為咁啱有位坐又攞住好多嘢，所以路線係計劃坐到旺角站轉線，但唔知點解搭咗一個站之後就企起身喺太子離開車廂。

但太子站係需要上一條扶手電梯先可以到黃埔線月台，又唔知做乜好似有人guide去車頭方向。去到見到幅蓮花圖，唔覺得有咩特別，但就突然間覺得好凍，係咁打冷震同起雞皮。

當時四周圍好肯定得自己一個人，踏上扶手電梯嗰下係由腳板底起雞皮麻痹到上頭殼頂⋯ 同埋聽到好嘈，好似入咗菜市場好多人叫賣咁，有聽到好清楚嘅一句救命，就到頂⋯ 之後情況持續到到咗黃埔返埋屋企，都不斷起雞皮打冷震。

夜晚大約12點半去瞓覺，夢見自己企喺頭先搭過嗰條扶手電梯搭咗好耐，上升緊但一直都未到頂，好驚，直到又聽到嗰句好清晰嘅救命聲就醒咗⋯//

本身個人冇咩靈異體質，睇唔到聽唔見，間唔中都會打冷震但未試過咁樣，通常離開咗現場就會冇事，未試過持續咁長時間，831不在太子站，但形容個夢好似親歷其境，好嘈好恐怖⋯