退路只有死——史太林227號命令（上）

1941年，納粹德軍展開巴巴羅薩行動（Operation Barbarossa），入侵蘇聯。喺一年之內，納粹用閃電戰（Blitzkrieg），由德蘇邊境，進攻超過一千公里到莫斯科門前，圍堵列寧格勒（Leningrad，今聖彼得堡），向北高加索進發。喺經過一年嘅血腥戰鬥之後，史太林面臨紅軍嘅崩潰，作出咗表面殘酷，但係果斷而且有效決定勝局嘅一個命令：「一步不退！」（Ни шагу назад!）

要明白當中原因，就要先睇下背景。德軍閃電戰打亂紅軍陣腳，紅軍一開始就節節敗退，處於劣勢。由於大部分士兵都係新兵甚至未完成訓練，所以即使總戰鬥人數比德軍高介乎四成五至三倍，戰力仍然比較低下。經過一年嘅戰爭，「撤退」慢慢成爲一種風氣。好多時候見到敵人，第一反應唔係守住據點，而係因爲驚其他部隊棄守會令自己被包圍，所以儘快撤退。呢種大規模嘅非戰略式撤退，喺1941至1942年之間亦都造成合共大約四百萬戰力被擄成戰俘（紅軍喺1942年六月總戰力約九百三十五萬、德軍三百七十二萬）。

史太林喺1942年7月28日宣佈第227號命令，命令寫出：
「在聽信了製造恐慌的人的謠言後，沒有認真地阻止敵人的進攻，已經放棄了羅斯托夫、諾沃切卡斯克。」
「國家的人民[…]現在開始對紅軍感到失望，開始失去了對紅軍的信心。很多人詛咒紅軍向東逃跑，把我們的人民遺棄在德國的奴役下。」

呢種大規模撤退，係咪好耳熟能詳？（納粹對戰俘嘅待遇雖然唔係文章範圍，不過可以自己Google下） #227號命令 #史太林