【#光時月報｜四月號 - 畀埋條命你好冇？】

呢個自肥企画，我哋都以為一月正式告一段落。點知⋯⋯我哋竟然經歷同潮食閣相似嘅情況，原來當日我哋為咗保障內部手足安全而釋出嘅最後善意，最後會成為貪婪所利用嘅工具。對方早有預謀，我哋實在始料不及。

時至今日，一切已走進法律程序，保守估計要走多成年。嘢唔可以再多講，但我哋保證，我哋會好努力好努力，直至拎返呢筆屬於香港人嘅錢。

顛倒黑白、指鹿為馬嘅情況，喺邊度都有機會發生。希望我哋嘅經歷，能夠令黃圈引以為戒。因為曾經百分百信任、識咗十幾廿年嘅同好，都有機會因為一己私利而出賣你最珍重嘅價值。但失望，唔代表就要絕望灰心，反而係要更努力。

接手光時個刻，呢度嘅形象早已被完全摧毀，內部嘅架構、運作同工作標準亦形同虛設，仲差過我哋大學上莊嗰陣。講真，我哋仲有咩驚失去？我哋係絕對唔會將香港人嘅錢拱手相讓。

呢四個幾月以嚟，我哋廿幾個𡃁仔未必做得好好，財政狀況仍然未回復。但至少，宜家嘅光時係我哋一手一腳重建返嚟，我哋每個改變大家都有目共睹。我哋宜家有米賣、多咗好多香港品牌合作、貨品開始完全揀得落手、有自家Podcast節目，好快就有自取點、月訂計劃同更環保嘅選擇畀大家添。

2021年嘅光時，係一間真真正正有架構有制度，同時幫助到每位在職年青人搵到自己嘅公司。

未來，我哋同樣會拼命捍衛光時。
放馬過嚟囉，無嘢好驚。

光時團隊
2021-05-12

————————⠀
【光時 - HKongs Mall／Est.2019】
真正將全數營利回饋年青人嘅網店
埋嚟睇埋嚟揀: HKongs.com

MeWe: 光時 HKongs
Facebook: @hkongsofficial
Instagram: @hkongs_official
Telegram: @hkongs ⠀

#長夜再黑總有光時 #HKongs #HKongsMall #香港網店