動手實踐遠勝口頭説教
「嗰陣畢業無幾耐，啱啱開始搵工，就喺度諗除咗一般NGO之外，仲有咩其他選擇而又可以貢獻社會呢？於是就決定自己出嚟創業，可以有彈性啲，唔一定只係做NGO提供嘅服務範疇。」Paul憑住自己多年從事兒童相關工作嘅經驗，最終亦選擇從小朋友有最常接觸嘅玩具入手，展開自己嘅創業之旅。

再生玩具店會定期舉辦工作坊，同參與嘅小朋友一齊發揮創意，利用環保或者回收得嚟嘅物料製作玩具。另外，再生玩具店亦會收集同回收舊玩具，喺社區舉辦玩具漂流活動，等小朋友可以將自己唔要嘅玩具帶到漂流點，交換自己嘅「心頭好」，希望以實踐代替説教，教導小朋友減少浪費，帶出環保信息。

「記得有一次喺沙田搞玩具漂流，有個小朋友喺玩具堆裏面搵到架滑板車，好似搵到寶物咁，仲話自己帶嚟嗰件玩具好平，問我係咪真係可以換走架滑板車。希望大人同小朋友都可以透過呢啲活動，明白到好多喺你手上已經無咩價值嘅嘢，喺其他人眼中可能都係寶。」

窮則變　變則通
然而，正當再生玩具店嘅運作漸上軌道之際，2020年爆發嘅武漢肺炎可以話係打亂咗Paul一直以嚟以實體活動為主嘅計劃。「喺疫情之下，基本上所有實體活動同工作坊都停咗，加上見到好多小朋友因為停課而要長期留喺屋企，所以就想睇下點樣可以令小朋友喺屋企都可以自己DIY玩具，解悶之餘都可以繼續宣揚環保意識。」

喺第一波疫情嘅時候，Paul就喺Youtube上載自己拍攝嘅教學影片，指導家長同小朋友利用日常生活中常見嘅材料製作屬於自己嘅玩具。同一時間，Paul亦著手設計唔同嘅玩具DIY套裝，例如「再生」糖果機、足球機、推銀機等，方便家長準備製作材料。

「嚟緊我哋會推出一款新嘅boardgame，除咗繼續利用回收同環保物料，好似以前收集返嚟嘅快餐店舊公仔作為玩具材料之外，亦希望鼓勵小朋友跳出boardgame既定嘅規則，發揮小宇宙，自創不同嘅玩法。」

香港也能重生嗎？
縱然疫情或多或少都改變咗再生玩具店嘅營運方式，但對Paul而言，2019年開始嘅社會運動就帶比佢更多嘅反思同體會。

「之前喺社區搞活動嘅時候都有遇過遊行示威，但要點樣同小朋友解釋社會發生緊咩事呢？或者佢哋未必可以了解到好深入，但更加唔想粉飾太平，當無事發生過咁。」自反修例運動之後，政權對社運以至港人自由嘅打壓愈發無的放矢，香港人唔知自己幾時會被送中，唔知自己幾時會因為講過某句說話而被控違反國安法，成為勾結外國勢力嘅罪證，唔知自己嘅電話卡資料幾時會落喺政權手上……如果社會繼續保持沉默，敵進我退，最終身受其害嘅必然會係香港嘅下一代。

「其實國安法立法之後都會有啲驚，究竟仲應唔應該教小朋友為公義發聲，要追求真相呢？會唔會因為咁而為自己招惹不必要嘅麻煩呢？或者喺呢一刻嚟講，最低嘅底線就只能夠係教佢哋要明辨是非，分清黑白對錯。」 要氹小朋友開心？唔一定用電子奶嘴嘅～親手整一個屬於自己嘅玩具一樣咁開心架！

即刻上meMall買材料包：
https://memall.hk/brand-anewtoys

#meMall港故事⁣
#香港重生
#黑白是良知 ————————————————
TG： https://t.me/memallhk
MW： https://mewe.com/p/memall
FB： https://facebook.com/memallhk2
IG： https://instagram.com/memallhk