​​တောင်ကြီးမြို့ ရွိုင်ရယ်ဟိုတယ်က Play House Bar & Club ပိတ်ထားရန် SYFDA - Rangers က သတိပေးစာထုတ်
====================

စန်းကျိန်

ရှမ်းပြည်နယ်တောင်ပိုင်း၊ တောင်ကြီးမြို့ရှိ ရွိုင်ရယ်ဟိုတယ်(Royal Taunggyi Hotel) တွင် ဖွင့်လှစ်ထားသော Play House ဘားနှင့် ကလပ်က လူငယ်များကို တော်လှန်ရေးတွင် မပါဝင်နိုင်ရန် နည်းအမျိုးမျိုးဖြင့် ဆွဲဆောင်နေသောကြောင့် အသိပေးစာထုတ်ပြန်သည့် ယခု အချိန်မှစ၍ ပိတ်ထားပေးရန် Shan Youth's Federal Democratic Army ( SYFDA - Rangers )က ယမန်နေ့ မေလ ၁၀ ရက်က ထုတ်ပြန်ထားသည်။

အဆိုပါ Play House ဘားနှင့် ကလပ်သည် ယခုဖြစ်ပေါ်နေသော နိုင်ငံရေးအခြေအနေကို လျစ်လျူရှုပြီး စစ်အာဏာရှင် အလိုကျ တိုင်းပြည်ငြိမ်းချမ်းသွားသည့် အသွင်ဆောင်ကာ ပျော်ပါးကခုန်နေခြင်းများသည် တော်လှန်ရေးအရှိန်ကို နှောင့်နှေးစေပြီး မိမိတို့မြို့ ဂုဏ်သိက္ခာကို ထိခိုက်သဖြင့် ပိတ်ထားပေးစေလိုကြောင်းနှင့် မိမိတို့ သတိပေးစာအပေါ် လျစ်လျူရှုမှုများ ပြုလုပ်ပါက ပစ်ခတ်ဖောက်ခွဲခြင်းများ ပြုလုပ်သွားမည်ဖြစ်ကြောင်း SYFDA - Rangers အဖွဲ့က ဆိုသည်။

''ကျွန်တော်တို့အဖွဲ့က Play House Club ကို ပိတ်ပေးဖို့ သတိပေးစာထုတ်ထားတာ သူတို့ဘက်က အခုထိတော့ တုန့်ပြန်မှုတစ်စုံတစ်ရာမရှိသေးပါဘူးဗျ။ သူတို့ဘက်က လျစ်လျူရှုမယ်ဆိုရင် ပစ်ခတ်ဖောက်ခွဲမှုတွေ ပြုလုပ်သွားမှာမို့ ပြည်သူတွေကို သတိထားသွားလာဖို့ကို အသိပေးချင်ပါတယ်ဗျ။ ပြည်သူတွေသိသင့်တဲ့ mission တွေကိုလည်း ကျွန်တော်တို့ဘက်ကကြိုတင်အသိပေးတာတွေလုပ်ဆောင်ပြီးမှ တိုက်ခိုက်သွားမှာပဲဖြစ်ပါတယ်ဗျ။ ကျွန်နော်တို့အဖွဲ့နဲ့ ပူးပေါင်းဆောင်ရွက်ဖို့ နီးစပ်ရာ PDF တွေနဲ့ မဟာမိတ်ဖွဲ့လိုကြောင်းလည်း ပြောချင်ပါတယ်'' ဟု SYFDA - Rangers အဖွဲ့မှ တာဝန်ရှိသူတစ်ဦးက မဇ္ဈိမကို ပြောသည်။

Shan Youth's Fedral Democratic Army (SYFDA-Rangers) အဖွဲ့မှာ ရှမ်းပြည်နယ်တောင်ပိုင်း (တောင်ကြီးမြို့) ပေါ်တွင် နေထိုင်သောစစ်အာဏာရှင်ကို မလိုလားသည့် လူငယ်များစုပေါင်း၍ စစ်အာဏာရှင်စနစ်ကို အမြစ်ပြတ်တိုက်ထုတ်ရန်၊ စစ်အစိုးရ၏ လည်ပတ်နေသော ယန္တရားများရပ်တန့်ရန်နည်းလမ်းမျိုးစုံဖြင့်တော်လှန်သွားရန် ရည်ရွယ်ချက်ဖြင့် ၂၀၂၁ ခုနှစ်၊ ဖေဖော်ဝါရီ လ ၁၇ ရက်နေ့တွင်စတင်တည်ထောင်ခဲ့ခြင်းဖြစ်သည်။

SYFDA အဖွဲ့သားများသည် အာဏာသိမ်းစစ်ကောင်စီကို လက်နက်ကိုင် တော်လှန်ရန်အတွက် EAOs နယ်မြေများတွင် စစ်သင်တန်းများကို စနစ်တကျသင်ကြားကာ Commando အဆင့်ထိအားလုံးပြီးမြှောက်အောင်သင်ကြားလာခဲ့ပြီး တိုက်ပွဲအတွေ့အကြုံများယူရန် နယ်မြေအချို့တွင် မိမိတို့ကိုယ်တိုင်အောင်မြင်စွာတိုက်ခဲ့နိုင်ခဲ့ကြောင်း၊ ယခုအချိန်တွင် SYFDA အဖွဲ့သည် တိုက်ပွဲများကိုယ်တိုင်ဆင်နွှဲရန်အဆင်သင့်ဖြစ်နေပြီဖြစ်ကြောင်း ၊ အချိန်မရွေးနေရာမရွေးဖောက်ခွဲတိုက်ခိုက်မှုများဖြစ်ပွားနိုင်၍ ပြည်သူများအသွားလာများဆင်ခြင်ကြရန် အသိပေးထားသည်။

ထို့အပြင် မိမိတို့ဖောက်ခွဲရေးပစ္စည်းများထောင်ထားသောနေရာများတွင် မစပ်စုသင့်ကြောင်း၊ မသင်္ကာဖွယ်ရာ အရာများတွေ့လျှင် ဝေးဝေးမှ ရှောင်ပေးကြစေလိုကြောင်း၊ မိမိတို့ဆင်ထားသောမိုင်းများသည် Upgrade မိုင်းများဖြစ်သဖြင့် ပြင်းအားလွန်စွာများသောကြောင့် ယင်းကဲ့သို့ပစ္စည်းများတွေ့လျှင်အမြန်ဆုံးရှောင်ပေးရန်လည်းShan Youth's Fedral Democratic Army (SYFDA-Rangers)အဖွဲ့က အသိပေးထားသည်။

#Mizzima
#ရှမ်းပြည်နယ်တောင်ပိုင်း
#တောင်ကြီးမြို့
#Play House Bar & Club
#Shan Youth's Federal Democratic Army (SYFDA - Rangers)
#သတိပေးစာထုတ်
=====================
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို ဖိတ်ခေါ်ပါတယ်။ 
သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ 
Follow the link : https://bit.ly/2VhJ12U

ကင်းလှည့်နေသည့် စစ်ကောင်စီတပ်သားအား ဖမ်းဆီးရမိပြီးနောက် ပြန်လည်ခုခံသဖြင့် ပစ်ခတ်ရာတွင် သေဆုံး
=====================

မေဘယ်လ်သူ

တောင်ကြီးမြို့ Royal Taunggyi Hotel တွင် ဖွင့်လှစ်ထားသည့် Play House Club အနီး ကင်းလှည့်နေ သော စစ်ကောင်စီတပ်သားအား ဖမ်းဆီးရမိခဲ့ပြီးနောက် စစ်ဆေးမှုပြုလုပ်ရန်ပြင်ဆင်နေစဉ် ပြန်လည်ခုခံ ပြီး ထွက်ပြေးရန်ကြိုးပမ်းသောကြောင့် ပစ်ခတ်ခဲ့ရာ သေဆုံးသွားကြောင်း သိရသည်။

Play House Club အား ပိတ်ရန်သတိပေးထားပြီး အသိပေးမှုကိုလျစ်လျူရှုပါက ပစ်ခတ်ဖောက်ခွဲမှုများ ပြုလုပ်သွားမည်ဟု Shan Youth's Federal Democratic Army (SYFDA Rangers)မှ မေလ ၁၀ ရက်နေ့ က သတိပေးထားသည်။

အဆိုပါထုတ်ပြန်ချက်အပေါ်တွင် မည်သည့်တုံ့ပြန်မှုမှမပေးသဖြင့် အနီးကပ်စောင့်ကြည့်ခဲ့ရာ Club သို့ အဝင်အထွက်များရှိနေသည့်အတွက် ဖောက်ခွဲရန်ပြင်ဆင်ခဲ့သည်ဟု သိရသည်။

“ Club ဖွင့် မဖွင့်ဆိုတာ အထဲထိဝင်မကြည့်နိုင်တော့ တနေရာက စောင့်ကြည့်နေတုန်း အဝင်အထွက် လုပ် နေတာတွေ့လို့ ဖောက်ခွဲပစ်ခတ်မှုလုပ်ဖို့ ပြင်ဆင်လိုက်တယ်။ ပြင်ဆင်နေတုန်း နယ်မြေအနေအထားကို လေ့လာတဲ့အခါမှာ ကျနော်တို့ကိုစောင့်ဖမ်းမယ့် စကစကကောင်တွေက ကြိုတင်နေရာယူထားတာတွေ့ ရတယ်။ ဒါနဲ့ အစီအစဥ်ပြောင်းပြီး ဒီကောင်တွေအလစ်ကို ဝင်တိုက်မယ်လုပ်တော့ စကစတစ်ကောင်က လက်နက်မပါဘဲ ကျနော်တို့ zone နားကို အပေါ့လာသွားတာနဲ့ ဖမ်းပြီး ကျနော်တို့နယ်မြေထဲကို ခေါ်လာ ခဲ့တယ်" ဟု SYFDA Rangers မှ တာဝန်ရှိသူကပြောသည်။

ဖမ်းဆီးခံရသူအား ကောင်းမွန်စွာထိမ်းသိမ်းထားပြီး စစ်ဆေးမှုပြုလုပ်ရန် SYFDA Rangers မှ ရဲဘော် သုံးဦးကဆက်လက်လုပ်ဆောင်ခဲ့ရာတွင် ဖမ်းဆီးခံရသောစကစတပ်သားမှ လက်နက်လုပြီး ပစ်ခတ်ထွက် ပြေးရန်ကြိုးစားသဖြင့် ပစ်ခတ်ဖမ်းဆီးခဲ့ရာ စကစတပ်သား နေရာတွင် ပွဲခြင်းပြီးသေဆုံးသွားခဲ့သည်ဟု သိရသည်။

“ အဲ့ဒီဖြစ်စဉ်မှာ စကစတပ်သားနဲ့ ရုန်းရင်းဆန်ခတ်ဖြစ်ပွားရင်း ကျည်ထွက်သွားလို့ ကျွန်တော်တို့ ရဲဘော် တစ်ဦး ပေါင်မှာကျည်ရှပ်ထိသွားတယ်။ စိုးရိမ်ရတဲ့ဒဏ်ရာဖြစ်လို့ ဆေးတပ်သားတွေက စောင့်ရှောက်မှု ပေးပြီး အနားယူခိုင်းထားပါတယ်" ဟု ၎င်းက ပြောသည်။

အဆိုပါဖြစ်စဉ်နှင့်ပက်သက်ပြီး Play House Club အား ပိတ်ထားရန် ဒုတိယအကြိမ်ထပ်မံသတိပေးလိုပြီး သတိပေးချက်ကိုလျစ်လျူရှုပါက Club ပိုင်ရှင်အနေဖြင့် ဆုံးရှုံးမှုများစွာရရှိစေမည်ဖြစ်ပြီး Dj players များ ကိုလည်း SYFDA Rangers အဖွဲ့မှ အမည်ပျက်စာရင်းသွင်း၍ တိုက်ခိုက်မှုများပြုလုပ်သွားမည်ဟု သိရ သည်။

#Mizzima
#တောင်ကြီးမြို့
#SYFDA_Rangers
#Play_House_Club
#စစ်ကောင်စီတပ်သား
=====================
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို ဖိတ်ခေါ်ပါတယ်။ 
သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ 
Follow the link : https://bit.ly/2VhJ12U