​​လီယွန်နယ် မက်ဆီနဲ့ ပြိုင်ဆိုင်မှုက အခုအချိန် 'ပြီးဆုံးသွားပြီ'လို့ ခရစ္စတီယာနို ရော်နယ်လ်ဒို ပြော
=======================

By PKThawn
ခရစ္စတီယာနို ရော်နယ်လ်ဒိုက သူနဲ့ လီယွန်နယ် မက်ဆီတို့ဟာ "ဘောလုံးသမိုင်းကြောင်းကို ပြောင်းလဲခဲ့ကြပေမယ့်" သူတို့ရဲ့ ပြိုင်ဆိုင်မှုက အခုတော့ ပြီးဆုံးသွားခဲ့ပြီလို့ ဆိုပါတယ်။

ထာဝရကြီးကျယ်ခမ်းနားတဲ့ ထိပ်တန်းကစားသမားတွေအဖြစ် သတ်မှတ်ခံထားရပြီး သူတို့ဟာ ရီးယဲလ်မက်ဒရစ်၊ ဘာစီလိုနာတို့နဲ့အတူ စပိန်လာလီဂါမှာ တစ်ဦးနဲ့ တစ်ဦး ရင်ဆိုင်ရလေ့ရှိပါတယ်။
"ကျနော်တို့ဟာ တစ်ကမ္ဘာလုံးက လေးစားခံရပါတယ်၊ ဒါက အရေးကြီးဆုံး အရာပါပဲ"လို့ ရော်နယ်လ်ဒိုက ပြောပါတယ်။

ဘလွန်းဒီအော် ၅ ကြိမ်ဆုရှင် ရော်နယ်လ်ဒိုဟာ ၂၀၀၃ ခုနှစ်နောက်ပိုင်း ပထမဆုံးအကြိမ် ဒီဆုရဲ့ ဆန်ကာတင်စာရင်းကနေ ချန်ရစ်ခံခဲ့ရပြီး မက်ဆီဟာ ၈ ကြိမ်မြောက် ဆွတ်ခူးနိုင်ဖွယ်ရှိပါတယ်။
"သူက သူ့နည်းသူ့ဟန်နဲ့ လုပ်သလို ကျနော်လဲ အဲသလိုပါပဲ။ ကျနော် မြင်တဲ့အတိုင်းကတော့ သူ ကောင်းကောင်းလုပ်တယ်။ ဒါကို ဆက်လုပ်သွားမယ်၊ အမွေအနှစ်က ဆက်ရှိနေမှာပါ။"လို့ အခု အယ်လ်-နာဆာအသင်းအတွက် ဆော်ဒီအာရေးဗီးယားမှာ ကစားနေတဲ့ အသက် ၃၈ နှစ်အရွယ် ရော်နယ်လ်ဒိုက ပြောပါတယ်။

အမုန်းတရားက သူတို့ရဲ့ ပြိုင်ဆိုင်မှုရဲ့ အင်္ဂါရပ်တစ်ခုလားလို့ မေးတဲ့အခါမှာ သူက “ခရစ္စတီယာနို ရော်နယ်လ်ဒိုကို ကြိုက်တဲ့သူတွေက မက်ဆီကို မုန်းနေစရာ မလိုပါဘူး။ ဒီလိုပြိုင်ဆိုင်မှုမျိုးလို့ ကျနော် မမြင်ပါဘူး။

"ပြိုင်ဆိုင်မှုတော့ ပြီးဆုံးသွားပါပြီ။ ဒီလိုပြိုင်ဆိုင်မှုက ကောင်းမွန်ခဲ့တယ်၊ ပရိသတ်က သဘောကျခဲ့တယ်။ ကျနော်တို့ဟာ ဘောလုံးစင်မြင့်ထက်မှာ ၁၅ နှစ်ကြာ မျှဝေခဲ့ပြီး နောက်ဆုံးမှာတော့ အဆုံးသတ်ခဲ့ပါပြီ။ သူငယ်ချင်းတွေလို့ ပြောနေတာမဟုတ်ရပါဘူး၊ ဒါပေမယ့် ကျနော်တို့က ပရော်ဖက်ရှင်နယ် လုပ်ဖော်ကိုင်ဖက်တွေဖြစ်ပြီး တစ်ယောက်ကို တစ်ယောက် အပြန်အလှန် လေးစားကြတယ်"လို့ ပြောပါတယ်။

သူတို့ကြားမှာ နှစ်ယောက်သား စံချိန်ချိုးခဲ့တာတွေဟာ ပြိုင်ပွဲကနေ ရရှိတဲ့ ဂုဏ်သိက္ခာအရှိဆုံး ဆုတံဆိပ် အများအပြားကို ရရှိခဲ့တာပါပဲ။

ရော်နယ်လ်ဒိုဟာ ရီးယဲလ်မက်ဒရစ်အတွက် ၄၃၈ ပွဲကစား ၄၅၁ ဂိုးနဲ့ ကလပ်ရဲ့ ထာဝရစံချိန်တင်ဂိုးသွင်းသူဖြစ်ပြီး ဘာနေဗျူးမှာ ၉ နှစ်တာကာလအတွင်း ချန်ပီယံလိဂ် ၄ ကြိမ်၊ လာလီဂါ ၂ ကြိမ်နဲ့ စပိန်ဘုရင့်ဖလား ၂ ကြိမ်အပါအဝင် ကလပ်အသင်းနဲ့အတူ ဆုဖလား ၁၆ လုံး ဆွတ်ခူးနိုင်ခဲ့ပါတယ်။

အခုအချိန် အမေရိကန်က အင်တာမိုင်ယာမီမှာ ကစားနေတဲ့ မက်ဆီဟာ ပွဲပေါင်း ၇၈၁ ပွဲကစားကာ ၆၇၄ ဂိုး သွင်းယူပြီး ဘာစီလိုနာအသင်းရဲ့ ဂိုးအများဆုံးသွင်းတဲ့ စံချိန်ကို ရရှိထားပါတယ်။
အသက် ၃၆ နှစ်အရွယ် ကစားသမားဟာ လာလီဂါဖလား ၁၀ ကြိမ်၊ ချန်ပီယံလိဂ်ဖလား ၄ ကြိမ်နဲ့ စပိန်ဖလား ၇ ကြိမ်အပါအဝင် ကလပ်အသင်းနဲ့အတူ ဆုဖလား ၃၅ လုံး ရရှိခဲ့ပါတယ်။

နိုင်ငံတကာဇာတ်ခုံမှာတော့ မက်ဆီဟာ အာဂျင်တီးနားအသင်းနဲ့အတူ ၂၀၂၂ ကမ္ဘာ့ဖလားနဲ့ ကိုပါအမေရိကဖလားတို့ကို ဆွတ်ခူးနိုင်ခဲ့ပြီး ရော်နယ်လ်ဒိုဟာလည်း ပေါ်တူဂီအသင်းနဲ့အတူ ဥရောပချန်ပီယံရှစ်နဲ့ နေရှင်းလိဂ်ဖလားတို့ကို ဆွတ်ခူးနိုင်ခဲ့ပါတယ်။

သူတို့နှစ်ဦးဟာ ကွင်းထဲမှာ ၃၆ ကြိမ်တွေ့ဆုံဖူးပြီး နောက်ဆုံးတွေ့ဆုံမှုမှာ ဇန်နဝါရီလမှာ ဖြစ်ပါတယ်။ အဲဒီအချိန်က မက်ဆီက ပဲရစ်စိန့်ဂျာမိန်းအတွက် ကစားပေးတဲ့ ချစ်ကြည်ရေးပွဲစဉ်မှာ ရော်နယ်လ်ဒိုရဲ့ Riyadh Season XI ကို ၅-၄ ဂိုးဖြင့် အနိုင်ရရှိခဲ့တာဖြစ်ပါတယ်။

(BBC)
Photo: EPA

#ronaldo #messi #မက်ဆီ #ရော်နယ်လ်ဒို

​​ဆော်ဒီမြေမှာ ရော်နယ်လ်ဒိုရဲ့ အယ်လ်နာဆာနဲ့ ယှဉ်ပြိုင်မယ့် မက်ဆီရဲ့ အင်တာမိုင်ယာမီ
================

By PKThawn

လီယွန်နယ် မက်ဆီရဲ့ အင်တာမိုင်ယာမီအသင်းဟာ လာမယ့် ဖေဖော်ဝါရီလမှာ ကျင်းပမယ့် ရီယာ့ဒ်ရာသီဖလား (Riyadh Season Cup)ပြိုင်ပွဲမှာ ခရစ္စတီယာနို ရော်နယ်လ်ဒိုရဲ့ အယ်လ်-နာဆာနဲ့ ရင်ဆိုင်ရမှာဖြစ်ပါတယ်။ ဒါဟာ ကမ္ဘာ့ဘောလုံးလောကက အိုင်ကွန်ကစားသမားနှစ်ဦးရဲ့ နောက်ဆုံးတွေ့ဆုံပွဲဖြစ်လာနိုင်ဖွယ်ရှိပါတယ်။

ပြီးခဲ့တဲ့ ဇူလိုင်လက အမေရိကန်ကလပ်နဲ့ ပူးပေါင်းခဲ့ပြီး အမေရိကန်နဲ့ မက္ကဆီကိုကလပ်တွေနဲ့ ယှဉ်ပြိုင်ရတဲ့ Leagues Cup ပြိုင်ပွဲမှာ ချန်ပီယံဆုဆွတ်ခူးခဲ့သူ ဘလွန်းဒီအော် (၈)ကြိမ်ဆုရှင် မက်ဆီဟာ ဘလွန်းဒီအော် (၅)ကြိမ်ရ ရော်နယ်လ်ဒိုနဲ့ တွေ့ဆုံရဖို့ မျှော်လင့်ရပါတယ်။

အသက် ၃၆ နှစ်ရှိ မက်ဆီဟာ အာဂျင်တီးနားအသင်းကို ပြီးခဲ့တဲ့နှစ်ရဲ့ ကမ္ဘာ့ဖလားချန်ပီယံဖြစ်အောင် ဦးဆောင်နိုင်ခဲ့ပြီး အသက် ၃၈ နှစ်ရှိ ပေါ်တူဂီအသင်းခေါင်းဆောင် ရော်နယ်လ်ဒိုရဲ့ ပြိုင်ဘက်အဖြစ် ကာလရှည်ရပ်တည်ခဲ့ပါတယ်။

လာမယ့် ဖေဖော်ဝါရီလ ရီယာ့ဒ်ရာသီဖလားပြိုင်ပွဲမှာ အင်တာမိုင်ယာမီကို ဧည့်သည်နိုင်ငံတကာကလပ်အသင်းအဖြစ် သတ်မှတ်ခဲ့ပြီး ဆော်ဒီပရိုလိဂ်အသင်းတွေဖြစ်တဲ့ အယ်လ်-ဟီလာလ်နဲ့ အယ်လ်-နာဆာတို့ ပူးပေါင်းပါဝင်မှာဖြစ်ပါတယ်။ ဒါပေမယ့် Kingdom Arena ကွင်းမှာ ပြိုင်ပွဲကျင်းပမယ့် ပွဲရက်အတိအကျကို ထုတ်ပြန်ကြေညာခြင်း မရှိပါဘူး။

မိုင်ယာမီအသင်းဟာ မက်ဆီရဲ့ အသင်းဖော်ဟောင်းတွေဖြစ်တဲ့ ဂျော်ဒီ အယ်လ်ဘာနဲ့ ဆာဂျီယို ဘူးစကွက်စ်တို့လည်း ခေါ်ယူထားခဲ့ပါတယ်။ သူတို့နှစ်ဦးလုံးဟာ လာလီဂါချန်ပီယံ (၅)ကြိမ်စီရရှိခဲ့တဲ့ ကစားသမားတွေဖြစ်ပါတယ်။

လီဗာပူးလ်ရဲ့ ထင်ရှားတဲ့ ကစားသမားဟောင်း ဆာဒီယို မာနေးနဲ့ အင်တာမီလန် အသင်းခေါင်းဆောင်ဟောင်း မာဆယ်လို ဘရိုဇိုဗစ်တို့ကလည်း ချန်ပီယံလိဂ် (၅)ကြိမ်ဆွတ်ခူးထားတဲ့ ရော်နယ်လ်ဒိုရဲ့ အယ်လ်-နာဆာအသင်းမှာ ပူးပေါင်းခဲ့ပါတယ်။

အယ်လ်-ဟီလာလ်အသင်းဟာ ဒူးဒဏ်ရာကနေ ပြန်လည်သက်သာလာပြီဖြစ်တဲ့ ဘရာဇီးလ်ရဲ့ ထာဝရဂိုးသွင်းအများဆုံးကစားသမားဖြစ်တဲ့ နေမာကို ခေါ်ယူထားပါတယ်။

ရော်နယ်လ်ဒိုဟာ ပြီးခဲ့တဲ့ ဇန်နဝါရီလက အယ်လ်-နာဆာသို့ ပြောင်းရွှေ့လာပြီးနောက် ပီအက်စ်ဂျီကို ၅-၄ ဂိုးဖြင့် ရှုံးနိမ့်ခဲ့တဲ့ ရီယာ့ဒ် All-Star XI အသင်းနဲ့အတူ ဆော်ဒီအာရေဗီးယားမှာ သူ့ရဲ့ပထမဆုံးပွဲဦးထွက်ပွဲကို ကစားခဲ့ပါတယ်။

(AFP)

Photo: X/@Turki_alalshikh

#မက်ဆီ #ရော်နယ်လ်ဒို #messi #ronaldo #cristianoronaldo #RiyadhSeasonCup #alnassr #InterMiami

​​ဆော်ဒီမှာ ကစားဖို့ မည်သည့်သဘောတူညီချက်ကိုမျှ မရှိကြောင်း အင်တာမိုင်ယာမီ ပြော
======================

By PKThawn
အင်တာမိုင်ယာမီဟာ ဆော်ဒီကလပ်နှစ်သင်းနဲ့ တွေ့ဆုံမှာဖြစ်တယ်လို့ အင်္ဂါနေ့အစောပိုင်းက ကြေညာခဲ့တဲ့ ပွဲစီစဉ်သူရဲ့ ပြောဆိုချက်ကို မေဂျာလိဂ်ကလပ်က ငြင်းဆိုထားပြီး လာမယ့် ဖေဖော်ဝါရီလမှာ ဆော်ဒီအာရေဗျမှာ ယှဉ်ပြိုင်ဖို့ သဘောတူညီထားခြင်းမရှိကြောင်း ပြောပါတယ်။

လာမယ့် ဖေဖော်ဝါရီလမှာ ရီယာ့ဒ်ရာသီဖလားပြိုင်ပွဲမှာ လီယွန်နယ်မက်ဆီရဲ့ အင်တာမိုင်ယာမီနဲ့ ခရစ္စတီယာနို ရော်နယ်လ်ဒိုရဲ့ အယ်လ်နာဆာတို့ကြား ပွဲစဉ်အပါအဝင် အယ်လ်-ဟီလာလ်နဲ့အတူ တခြားအသင်းတသင်းတို့နဲ့ ယှဉ်ပြိုင်ကစားကြမယ်လို့ ကြေညာခဲ့ပြီးနောက် နာရီအနည်းငယ်အကြာမှာ အမေရိကန်ကလပ်အသင်းက မည်သည့်ရာသီကြိုခရီးစဉ်အစီအစဉ်တခုကိုမျှ အတည်ပြုမထားကြောင်း ငြင်းဆိုခဲ့ပါတယ်။

"အင်တာမိုင်ယာမီ CF ဟာ ရီယာ့ဒ် ရာသီဖလားပြိုင်ပွဲမှာ ပါဝင်ကစားဖို့ စီစဉ်ထားကြောင်း ဆိုတဲ့ ကြေညာချက်တစောင်ကို ဒီကနေ့အစောပိုင်းက ထွတ်ပေါ်ခဲ့တယ်။ ၎င်းဟာ မှားယွင်းတဲ့ ဖော်ပြချက်ပါ။" အင်တာမိုင်ယာမီရဲ့ ထုတ်ပြန်ချက်က ပြောပါတယ်။
"အသင်းပိုင်ရှင် ဂျော့ချ်မက်စ်ရဲ့ ပြောဆိုချက်တွေ ထုတ်ပြန်ချက်မှာ ပါရှိတယ်။ မတ်စ်က ရာသီကြို ခရီးစဉ်နဲ့ ပတ်သတ်ပြီး လူသိရှင်ကြား ဒါမှမဟုတ် သီးသန့် မှတ်ချက်တွေ မပေးထားပါဘူး။"

ဘလွန်းဒီအော် ၈ ကြိမ်ဆုရှင် မက်ဆီဟာ ဇူလိုင်လက အင်တာမိုင်ယာမီနဲ့ ပူးပေါင်းခဲ့ပြီး အမေရိကန်၊ မက္ကဆီကိုကလပ်တွေနဲ့ ယှဉ်ပြိုင်ရတဲ့ လိဂ်ဖလား (Leagues Cup)ပြိုင်ပွဲမှာ အသင်းနဲ့အတူ ချန်ပီယံဆုရရှိခဲ့ပါတယ်။ သူဟာ အင်တာမိုင်ယာမီကို ကမ္ဘာ့တဝှမ်းမှ ပြိုင်ပွဲရပ်တွေအတွက် အလိုရှိတဲ့ အသင်းဖြစ်လာစေခဲ့ပါတယ်။
"တရုတ်နိုင်ငံမှာ မထင်မှတ်ထားတဲ့ အခြေအနေတွေ"ကြောင့် တရုတ်ကို သွားရောက်ဖို့ စီစဉ်ထားတဲ့ ပွဲစဉ်တွေကို ရပ်ဆိုင်းလိုက်ကြောင်း အင်တာမိုင်ယာမီက အခုလ အစောပိုင်းမှာ ကြေညာခဲ့ပါတယ်။

မက်ဆီနဲ့ ရော်နယ်လ်ဒိုတို့ရဲ့ ပြန်လည်တွေ့ဆုံပွဲဟာ စိတ်လှုပ်ရှားစရာဖြစ်တာမှန်ပေမယ့် ဖြစ်လာနိုင်စရာမရှိကောင်း အင်တာမိုင်ယာမီရဲ့ ထုတ်ပြန်ချက်မှာ အခုနောက်ဆုံးအခြေအနေကို ဆိုထားပါတယ်။
"အင်တာမိုင်ယာမီဟာ ကမ္ဘာလုံးဆိုင်ရာ အမှတ်တံဆိပ်တခုဖြစ်လာဖို့ အစကတည်းက စိတ်ကူးရှိထားပါတယ်။ ဒီလိုဖြစ်လာအောင် ကျနော်တို့ရဲ့ ၂၀၂၄ ရာသီကြိုအစီစဉ်ကို ဆုံးဖြတ်ဖို့ ပြောဆိုတာတွေ ရှိနေပါတယ်"လို့ ထုတ်ပြန်ချက်က ပြောပါတယ်။

"အင်တာမိုင်ယာမီရဲ့ ပထမဆုံး နိုင်ငံတကာ ခရီးစဉ်မှာ လိုက်ပါလာမယ့် ကျနော်တို့ရဲ့ ကစားသမားတွေကို လာမယ့် ရက်သတ္တပတ်တွေမှာ ကြေညာဖို့ မျှော်လင့်ပါတယ်။"

အသက် ၃၆ နှစ်အရွယ် မက်ဆီဟာ အာဂျင်တီးနားအသင်းကို မနှစ်က ကမ္ဘာ့ဖလားချန်ပီယံဆုကို ဆွတ်ခူးနိုင်ခဲ့ပါတယ်။
ရော်နယ်လ်ဒိုဟာ ပြီးခဲ့တဲ့ ဇန်နဝါရီလက အယ်လ်-နာဆာသို့ ပြောင်းရွှေ့လာပြီးနောက် ပီအက်စ်ဂျီကို ၅-၄ ဂိုးဖြင့် ရှုံးနိမ့်ခဲ့တဲ့ ရီယာ့ဒ် All-Star XI အသင်းနဲ့အတူ ဆော်ဒီအာရေဗီးယားမှာ သူ့ရဲ့ပထမဆုံးပွဲဦးထွက်ပွဲကို ကစားခဲ့ပါတယ်။

(AFP)

#messi #ronaldo #InterMiami #Mizzima #အင်တာမိုင်ယာမီ #ရော်နယ်လ်ဒို #မက်ဆီ #RiyadhSeasonCup

https://www.youtube.com/watch?v=FUs0vGWmM5s
ရော်နယ်ဒိုငွေစက္ကူဆိုတဲ့ သတင်းအမှား