ထိုင်း-မြန်မာ ကုန်သွယ်နေသည့် အာရှကားလမ်းပိုင်း ပြိုကျမှု ဖြစ်ပွား
=================

မဇ္ဈိမ
ထိုင်း- မြန်မာ နယ်စပ်ကုန်သွယ်ရေးအတွက် အသုံးပြုနေသည့် အာရှလမ်းပိုင်း တစ်နေရာသည် ယနေ့ ဩဂုတ်လ ၇ ရက်နေ့ မွန်းလွဲပိုင်းတွင် မြေပြိုကျမှု ဖြစ်ပွားနေ၍ ခရီးသည်တင် ကားများ၊ ကုန်တင်ကားများ သွားလာ၍ မရဘဲ ပိတ်မိနေကြောင်း ကားသမားများနှင့် မြဝတီမြို့ခံ များက မဇ္ဈိမကို ပြောသည်။

မြဝတီမြို့နှင့် ကော့ကရိတ်မြို့ကြားရှိ တောနော်ရေတံခွန်အနီး အာရှလမ်းပိုင်း ပြိုကျမှုသည် ဩဂုတ်လ ၇ ရက်နေ့၊ မွန်းလွဲ ၁ နာရီတွင် ဖြစ်ပွားခဲ့ခြင်း ဖြစ်သည်။

ယခုရက်ပိုင်းအတွင်း မိုးသည်းထန်စွာ ရွာသွန်းကာ တောင်ကျရေ ပြင်းထန်စွာ တိုက်စားပြီးနောက် အာရှလမ်းပိုင်း ပြတ်တောက်မှု ဖြစ်ပွားခဲ့ခြင်းဖြစ်ကြောင်း ‌မြဝတီမြို့ခံတစ်ဦးက မဇ္ဈိမကို ပြောသည်။

“လမ်းပြိုတာ တောနော်ရေတံအနီးအနားမှာပါ၊ တောင်ကျရေ တအားထိုးဆင်း ပြီးတော့ ကားလမ်းပါ တစ်ခါတည်း ပြတ်သွားတာပေါ့” ဟု မြဝတီမြို့ ဒေသခံ တစ်ဦးက ပြောသည်။

ခန့်မှန်းခြေ ပေ ၄၀ အကွာအဝေးခန့် ပြတ်တောက်သွားသော အာရှလမ်းပိုင်း‌ မြေပြိုမှုသည် ကော့ကရိတ်မြို့နယ်၊ ကော့နွဲ့ကျေးရွာ၊ တောနော်ရေတံခွန်အနီးတွင် ဖြစ်ပွားနေခြင်း ဖြစ်သည်။

“ကော့ကရိတ်~မြဝတီ အာရှလမ်း၊ တောနော်ရေတံခွန်အနီး လမ်းမကြီး မြေပြိုပြီး မည်သည့်ယာဉ်မှ သွားလာမရပါ” ဟု ကော့ကရိတ်မြို့ရှိ လူမှုကူညီ ကယ်ဆယ်ရေးအသင်း တာဝန်ရှိသူတစ်ဦးကလည်း ဖေ့စ်ဘွတ် လူမှုကွန်ရက်တွင် ရေးသားထားသည်။

လက်ရှိမှာ ကော့ကရိတ်မှ မြဝတီမြို့၊ မြဝတီမှ ကော့ကရိတ်မြို့သို့ ထွက်ခွာ လာ သော ခရီးသည်တင်ယာဉ်များ၊ ကုန်တင်ကားများသည် လမ်းခုလတ်တွင် ပိတ်မိနေ ကြပြီး အချို့မှာ မြဝတီ- ရန်ကုန် လမ်းဟောင်းအတိုင်း ကွေ့ပတ်သွားလာရန် ပြင်နေကြကြောင်း သိရသည်။

ယခုရက်ပိုင်းအတွင်း မိုးသည်းထန်စွာ ရွာသွန်းနေပြီး ထိုင်းနိုင်ငံ၊ မဲဆောက်မြို့ တစ်ဘက်ကမ်းရှိ မြဝတီမြို့တွင်လည်း မြဝတီမြို့ အမှတ် (၁) ၊ အမှတ် ရပ်ကွက် (၅) အနိမ့်ပိုင်းတွင် ရေဝင်ရောက်မှုများ ရှိနေကြောင်း မြို့ခံများက ပြောသည်။

စာတည်း။ ။ နောင်နောင်

#အာရှလမ်းမြေပြို
#မြဝတီ
#Mizzima
---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

တရုတ်နိုင်ငံအရှေ့ပိုင်းမှာ ပြင်းအား ၅.၄ ရှိ ငလျင်လှုပ်ခတ်မှုကြောင့် လူ ၂၁ ဦးဒဏ်ရာရရှိ

#InternationalNews #reels #shorts #China #Mizzima

လဲချားမြို့နယ်မှ တပ်စခန်း ၁၀ ခု ဆုတ်ခွာပေးရန်ငြင်းဆန်ပြီးနောက် စစ်ကောင်စီတပ်နှင့် SSPP တို့ တိုက်ပွဲဖြစ်
====================

001
(မဇ္စျိမ)။ ။ရှမ်းပြည်နယ်တောင်ပိုင်း၊ လဲချားမြို့နယ်အတွင်းမှ တပ်စခန်း ၁၀ ခု ဆုတ်ခွာပေးရန် အကြောင်း ကြားမှုကို ငြင်းဆန်ပြီးနောက် စစ်ကောင်စီတပ်နှင့် ရှမ်းပြည်တိုးတက်ရေးပါတီ(SSPP/SSA)တို့ တိုက် ပွဲများဖြစ်ပွားနေကြာင်း သတင်းရရှိသည်။

ဩဂုတ်လ ၆ ရက်နေ့က စစ်ကောင်စီတပ်နှင့် တိုက်ပွဲဖြစ်ပွားခဲ့ပြီး စစ်ကောင်စီတပ်မှ ထိခိုက်ကျဆုံးမှုများ ကာ နှစ်ဦးအရှင်ဖမ်းမိခဲ့ကြောင်း SSPP က ယနေ့ ဩဂုတ်လ ၇ ရက်နေ့တွင် ထုတ်ပြန်သည်။

လဲချားမြို့နယ်၊ ဟိုင်းဆိုင်အုပ်စု၊ ခိုင်းဖက်နမ် နမ့်ပေါက်ကျေးရွာအနီးရှိ SSPP တပ်စခန်းကို စစ်ကောင်စီ တပ်က အင်အား ၇၀ ဖြင့် စတင်ထိုးစစ်ဆင်တိုက်ခိုက်ခဲ့ခြင်းဖြစ်ပြီး SSPP ဘက်ကလည်း လဲချားမြို့နယ်၊ မန်ဆေအုပ်စု၊ မက်လန်းကျေးရွာတွင် တပ်စွဲထားသည့် စစ်ကောင်စီ၏ ခမရ ၅၇၃ ကို ပြန်လည်ခုခံစစ် ဆင်နွှဲခဲ့ရာ နှစ်ဖက်တိုက်ပွဲပြင်းထန်ခဲ့ကြောင်း သိရသည်။

အဆိုပါတိုက်ပွဲမှာ နံနက် ၆ နာရီကျော်မှ ညနေ ၃ နာရီဝန်းကျင်အထိဖြစ်ပွားခဲ့ကာ စစ်ကောင်စီတပ်မှ ၁၀ ဦးထက်မနည်းကျဆုံးပြီး တပ်သားအချို့ဒဏ်ရာအပြင်းအထန်ရရှိသွားကာ စစ်သုံးယာဉ်တစီးကိုသိမ်း ဆည်းရရှိခဲ့ကြောင်း SSPP ကဆိုသည်။

တိုက်ပွဲအတွင်း SSPP ဘက်မှ ရဲဘော်တဦးကျဆုံးသွားကြောင်းလည်း ထုတ်ပြန်ချက်တွင် ဖော်ပြထား သည်။

ယင်းတိုက်ပွဲအတွင်း နှစ်ဖက်ထိခိုက်ကျဆုံးမှုအခြေအနေများကို မဇ္စျိမအနေဖြင့် သီးခြားအတည်ပြုနိုင် ခြင်း မရှိသေးသကဲ့သို့ စစ်ကောင်စီဘက်မှလည်း တစုံတရာ ထုတ်ပြန်ခြင်းမရှိပေ။

စစ်ကောင်စီက လဲချားမြို့နယ်အတွင်းရှိ SSPP ၏ တပ်စခန်း ၁၀ ခုကို ဆုတ်ခွာပေးရန် အကြိမ်ကြိမ် အကြောင်းကြားခဲ့ပြီး SSPP ဘက်ကလည်း ဌာနချုပ်လုံခြုံရေးအတွက် မည်သည့်အကြောင်းပြချက်နှင့်မှ တပ်ပြန်မဆုတ်ပေးနိုင်ကြောင်း စစ်ကောင်စီထံ ပြန်လည်အကြောင်းပြန်ခဲ့ကြောင်း သိရသည်။

ထို့ကြောင့် ဩဂုတ်လ ၄ ရက်နေ့နှင့် ၅ ရက်နေ့တို့တွင် စစ်ကောင်စီက မန်ကျန်ရွာဘက်မှနေ၍ SSPP တပ် စခန်းရှိရာဘက်သို့ လက်နက်ကြီးများဖြင့် ၁၀ ကြိမ်ထက်မနည်းပစ်ခတ်ခဲ့ပြီးနောက် ဩဂုတ်လ ၆ ရက်နေ့ တွင် နှစ်ဖက်ထိတွေ့တိုက်ပွဲဖြစ်ပွားခဲ့ခြင်းဖြစ်ကြောင်း သိရသည်။

အဆိုပါတိုက်ပွဲဖြစ်ပွားပြီးနောက် ပင်လုံ-လဲချား-မိုင်းနောင်နှင့် လဲချားမြို့နယ်ထဲရှိ နမ့်တိန်းတံတားအဝင် တို့တွင် စစ်ကောင်စီက သွားလာခွင့်ပိတ်ထားပြီး နှစ်ဖက်စစ်ရေးတင်းမာနေကြောင်း SSPP က ထုတ်ပြန် ထားသည်။

တိုက်ပွဲကြောင့် လဲချားမြို့နယ် ဟိုင်းဆိုင်အုပ်စု နောင်ကျန်၊ နမ့်ပေါက်၊ နမ့်လုတ်းကျေးရွာတို့မှ ဒေသခံများ ဟိုင်းဆိုင်ကျေးရွာဘက်သို့ထွက်ပြေးတိမ်းရှောင်ခဲ့ရပြီး မတ်လန်းကျေးရွာမှဒေသခံများလည်း လဲချားမြို့ ဘက်သို့ ထွက်ပြေးတိမ်းရှောင်ရလျက်ရှိကြောင်း သိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#ရှမ်းပြည်နယ်တောင်ပိုင်း
#လဲချားမြို့နယ်
#ရှမ်းပြည်တိုးတက်ရေးပါတီ
#SSPP/SSA

Photo - SSPP Info

---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဩစတြေးလျရဲ့ မုယောစပါးတင်သွင်းမှုအတွက် စည်းကြပ်ခွန်တွေဖယ်ရှားပေးမယ်လို့ တရုတ်ပြော

#InternationalNews #reels #shorts #Austria #China #Mizzima

ယင်းမာပင်မြို့နယ်က ထောင်နှင့်ချီသော ဒေသခံများ စစ်ဘေးတိမ်းရှောင်
=======================

လွှမ်းမိုး
(မဇ္ဈိမ)။ ။စစ်ကိုင်းတိုင်း၊ ယင်းမာပင်မြို့နယ်မြောက်ခြမ်း ချင်းတွင်းမြစ်ကြောင်းတလျှောက်တွင် စစ်ကောင်စီတပ်က ကုန်းကြောင်း၊ ရေကြောင်း နှစ်ဖက်ညှပ်၍ အင်အား ၃၀၀ ခန့်ဖြင့် စစ်ကြောင်းထိုးနေ ခြင်းကြောင့် ဒေသခံ ၁၀,၀၀၀ ကျော် နေရပ်စွန့်ခွာထွက်ပြေးနေရကြောင်း သိရသည်။

ဩဂုတ်လ ၅ ရက်နေ့မှ စတင်ကာ စစ်ရှောင်နေရခြင်းဖြစ်ပြီး စားဝတ်နေရေး အခက်အခဲများ ရှိနေကြောင်း စစ်ဘေးရှောင် ဒေသခံတဦးက မဇ္ဈိမကို ပြောသည်။

“စစ်ရှောင်နေရတာ ဒီနေ့ရောဆို သုံးရက်ရှိပြီ။ အိမ်ကလည်း နိုင်သလောက် ဆန်၊ ဆီလေးတွေထည့်ခဲ့တာ တော့ရှိတယ်။ စစ်ရှောင်ရက်ကြာလာတော့ စားဖို့သောက်ဖို့ အဆင်မပြေတာတွေ ဖြစ်လာတယ်။

တခြား ရွာတွေသွားဖို့ဆိုတာလည်း လူကများတော့အားနာတယ်။ အဲဒီတော့ဖြစ်သလို တောထဲကသစ်ပင်အောက် မှာ တဲထိုးပြီးနေရတာပေါ့။ မိုးမရွာရင်အဆင်ပြေပေမဲ့ မိုးကရွာနေတော့ နေဖို့အခက်ကြုံနေတယ်” ဟု ဆိုသည်။

နီးစပ်ရာ တောတောင်များနှင့် ဘေးလွတ်ရာထွက်ပြေးနေရသည် စစ်ရှောင်များသည် လက်ရှိတွင် ရက် ဆက်မိုးရွာသွန်းမှုကြောင့် နေထိုင်ရေးအတွက် လွန်စွာခက်ခဲနေကြောင်းလည်း စစ်ဘေးရှောင်များက ပြောသည်။

ယင်းမာပင်မြို့နယ်မြောက်ခြမ်းရှိ ချင်းတွင်းမြစ်ကြောင်းတလျှောက်ကို စစ်ကောင်စီတပ်က စစ်ကြောင်း ထိုးနေခြင်းကြောင့် စုန်းချောင်း၊ ပန်းတိမ်ပြင်၊ စေသူ၊ ကျောက်မှော်၊ ကျောက်ကုန်းနှင့် ကြက်လျှာ စသည့် ကျေးရွာများမှ လူဦးရေ ၁၀,၀၀၀ ကျော် နေရပ်စွန့်ခွာစစ်ရှောင်နေရခြင်း ဖြစ်သည်။

စာတည်း။ ။ နောင်နောင်
စာမူတည်းဖြတ်။ ။စောဖေ

#ယင်းမာပင်
#စစ်ရှောင်
#Mizima
---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

Aug - 7 [4 Pm] Mizzima News Hour

Mizzima Headline News

#4pmnews #mizzimanewshour #reels #shorts

ရာဟုလ်ဂန္ဒီရဲ့ အသရေဖျက်မှုပြစ်ဒဏ်ကို အိန္ဒိယထိပ်တန်းတရားရုံးက ဆိုင်းငံ့ထားဖို့ အမိန့်ချမှတ်

#InternationalNews #reels #shorts #Mizzima #India

သြဂုတ်လ (၇)ရက်၊ ညနေ ၄ နာရီ Mizzima News Hour မဇ္ဈိမသတင်းအစီအစဉ်
=====================

00:19 - မြန်မာ့နိုင်ငံရေးမှာ စစ်တပ်ပါဝင်မှု အဆုံးသတ်ရေး အပါအဝင် ရပ်တည်ချက်ခြောက်ရပ် NUCC နဲ့ NUG ထုတ်ပြန်တဲ့သတင်း

03:41 - ၈၈၈၈ လုံးအရေးတော်ပုံကြီး (၃၅) နှစ်ပြည့် အကြိုသပိတ် ရန်ကုန်မှာ ပြုလုပ်တဲ့သတင်း

09:17 - ဒဏ်ခတ်အရေးယူထားတဲ့ စစ်ကောင်စီဘဏ် နှစ်ခုနဲ့ ပတ်သက်မှုတွေရပ်ဆိုင်းဖို့ အမေရိကန် သတိပေးတဲ့ သတင်းနဲ့

11:40 - မနီလာပင်လယ်အော်မှာ တရုတ်ရဲ့မြေယာပြန်လည်ဖော်ထုတ်ခြင်းအတွက် စိုးရိမ်ကြောင်းအမေရိကန်ပြောတဲ့ သတင်း အပါအဝင် တခြား အရေးကြီးသတင်းတွေနဲ့ စိတ်ဝင်စားဖွယ်သတင်း တွေကို တင်ဆက်ပေးသွားမှာပါ။

https://youtu.be/-RG7wHvi04I

#4pmnews
#Mizzimanewshour
#mizzimatv
-----------------------------------------
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​CDF တပ်ဖွဲ့ဝင် ၂၀၀ အိန္ဒိယသို့ နိုင်ငံရေးခိုလှုံခွင့်တောင်းသည်ဆိုသည်မှာ မဟုတ်မှန်
=======================

ZZ
(မဇ္ဈိမ) ။ ။ ချင်းကာကွယ်ရေးတပ်ဖွဲ့ (CDF) အဖွဲ့ဝင် ၂၀၀ လက်နက်ချကာ အိန္ဒိယနိုင်ငံသို့ နိုင်ငံရေးခိုလှုံခွင့် တောင်းသည်ဆိုသောသတင်း လူမှုကွန်ရက်တွင် ပျံ့နှံ့လျက်ရှိနေသည်။ ယင်းမှာ မှားယွင်းနေသည်။

“ရန်ကြီးအောင်”အမည်ရှိ တယ်လီဂရမ်ချန်နယ်က ဩဂုတ်လ ၄ ရက်နေ့တွင် ပုံသုံးပုံဖြင့် “မြန်မာတပ် မတော်ကို အပြုတ်တိုက်မယ်ဆိုတဲ့ Cdf ချင်းပလုံးပဒက် အင်အား 200 ခန့် အိန္ဒိယနိုင်ငံသို့ လက်နက် အပ်နှံပြီး နိုင်ငံရေးခိုလှုံခွင့် တောင်းသွားပါကြောင်း သတင်းရရှိပါသည်” ဟု (မူရင်းအရေးအသားတိုင်း) ရေးသားကာ ဖြန့်ဝေခဲ့သည်။

ထိုအကြောင်းသည် တယ်လီဂရမ်နှင့် ဂရုပ်ကိုးခုတွင် ပျံ့နှံ့လျက်ရှိပြီး ကြည့်ရှုသူ ၆,၀၀၀ ကျော်ရှိသည်။ အလားတူပင် ဖေ့စ်ဘုတ်တွင် ပြန်လည်ဖြန့်ဝေမှုများလည်း ရှိနေသည်။
မဇ္ဈိမ၏အချက်အလက်စစ်ဆေးသူများအနေဖြင့် အဆိုပါဖြန့်ဝေမှုတွင်ပါဝင်သည့် ဓာတ်ပုံနှင့် အကြောင်း အရာများအား အချက်အလက်စစ်ဆေးခဲ့သည်။

ဓာတ်ပုံများထဲမှ တတိယပုံသည် ၂၀၂၂ ခုနှစ်ကတည်းကရှိနေခဲ့သည့် ပုံဟောင်းဖြစ်သည်။ “Titus Tang” အမည်ရှိ YouTube အသုံးပြုသူက ၂၀၂၂ ခုနှစ် ဇန်နဝါရီလ ၄ ရက်နေ့တွင် ချင်းဘာသာစကားဖြင့် တင် ဆက်ထားသည့် ဗီဒီယိုဖိုင်၌ပါဝင်သည့် ဓာတ်ပုံဖြစ်သည်။

CDF တပ်ဖွဲ့ဝင်များ နိုင်ငံရေးခိုလှုံခွင့်တောင်းခံခြင်းနှင့်ပတ်သက်၍ အိန္ဒိယသတင်းဌာနများဖြစ်သည့် India Today ၊ NDTV ၊ The Indian Express ၊ The Economic Times တို့တွင် ရှာဖွေခဲ့ရာ၌ သတင်းတု ကဖော်ပြထားသည့် CDF တပ်ဖွဲ့ဝင် ၂၀၀ ခန့် အိန္ဒိယနိုင်ငံသို့ နိုင်ငံရေးခိုလှုံခွင့်တောင်းခံသည်ဟူသည့် အကြောင်းအရာကို မတွေ့ရချေ။

အလားတူပင် မြန်မာသတင်းဌာနများ၌လည်း ထိုအကြောင်းနှင့်ပတ်သက်၍ သတင်းဖော်ပြမှု မရှိပေ။
ချင်းပြည်နယ်အတွင်းရှိ ဒေသခံကာကွယ်ရေးတပ်ဖွဲ့များနှင့် ချိတ်ဆက်ဆောင်ရွက်နေသည့် Chinland Joint Defense Committee (CJDC) တပ်ဖွဲ့မှ တာဝန်ရှိသူတဦးကို အဆိုပါအကြောင်းအရာနှင့်ပတ်သက် ပြီး ဆက်သွယ်မေးမြန်းခဲ့သည်။
၎င်းမှ “မကြားမိပါဘူး အကို။ တကယ်လို့ရှိလာခဲ့ရင်လည်း ကျွန်တော်တို့ကြားသင့်ပါတယ်။ မသိလိုက်ဘူး နော်။ တစ်ဖက်နိုင်ငံမှာ နိုင်ငံရေးခိုလှုံခွင့်တောင်းတဲ့သူ မရှိသေးဘူး” ဟု ပြောသည်။
ထို့ကြောင့် CDF တပ်ဖွဲ့ဝင် ၂၀၀ ခန့် လက်နက်ချကာ နိုင်ငံရေးခိုလှုံခွင့် အိန္ဒိယနိုင်ငံကိုတောင်းသည်ဆို သောသတင်းမှာ အမှန်တကယ်မရှိသည့်အကြောင်းအရာကို လုပ်ကြံဖန်တီးရေးသားထားသည့် သတင်း အမှားသာဖြစ်သည်။

စာတည်း။ ။စောဖေ

#Misinformation_Buster
#Fake_News
#CNF
---------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U