​​ယခုနှစ် ပထမ ၅ လအတွင်း အရပ်သား ၇၄၀​ ကျော်​သေဆုံးခဲ့ပြီး အရပ်သား​သေဆုံးမှု စံချိန်တင်မြင့်တက်
==================

001
(မဇ္စျိမ) ။ ။ ၂၀၂၃ ခုနှစ် ပထမငါးလအတွင်း အရပ်သားပြည်သူ ၇၄၈ ဦးထက်မနည်း သေဆုံးခဲ့ပြီး အရပ်သားသေဆုံးမှု စံချိန်တင်မြင့်တက်ခဲ့ကြောင်း မြန်မာ့မဟာဗျူဟာနှင့် မူဝါဒလေ့လာရေးအင်စတီကျု ISP Myanmarက ဇွန်လ ၁၄ ရက်နေ့တွင် ထုတ်ပြန်သည်။
အဆိုပါ အရပ်သားများမှာ လက်နက်ကိုင် ပဋိပက္ခများနှင့် တိုက်ပွဲများကြောင့် သေဆုံးခြင်းဖြစ်ပြီး ထိုပမာဏမှာ နှစ်နှစ်ကျော်ကာလအတွင်း အများဆုံးဖြင့် စံချိန်တင်ခဲ့ကြောင်း ဆိုထားသည်။

ထို့ပြင် ယင်းပမာဏမှာ ပြီးခဲ့သည့် ၂၀၂၂ ခုနှစ်အတွင်း သေဆုံးခဲ့ရသော အရပ်သားစုစုပေါင်း၏ ၆၀ ရာခိုင်နှုန်းနီးပါးအထိရှိခဲ့ကြောင်း ISP Myanmar က ဖော်ပြထားသည်။

စစ်အာဏာသိမ်းပြီးနောက် အရပ်သားများမှာ စစ်ကောင်စီ၏ လေကြောင်းတိုက်ခိုက်မှုကြောင့် သေဆုံးရသကဲ့သို့ စစ်ကြောင်းထိုးရင်း သတ်ဖြတ်ခံရခြင်း၊ အရှင်လတ်လတ်မီးရှို့သတ်ဖြတ်ခံရခြင်းတို့လည်းရှိကြောင်း စစ်ကိုင်းတိုင်း၊ ခင်ဦးမြို့နယ်၊ မြင်းဒေါင်းကျေးရွာ ပ.က.ဖ ခေါင်းဆောင်ကပြောသည်။

“ကျွန်တော့်ရွာပေါ့နော်။ စစ်ကိုင်းတိုင်း၊ ခင်ဦးမြို့နယ် ၊ မြင်းဒေါင်းရွာမှာ အရပ်သားပြည်သူ သုံးယောက်ဗျ။ တစ်ယောက်ကတော့ အရှင်လတ်လတ် မီးထဲထည့်ရှို့သွားတယ်ဗျ။ နှစ်ယောက်ကတော့ အရှင်လတ်လတ် မြင်းဒေါင်းက ဈေးတန်းက ဈေးဆိုင်ထဲမှာ မီးထည့်ရှို့သွားပြီး တစ်ယောက်ကတော့ အရှင်လတ်လတ် ရိုက်သတ်ပစ်တာဗျ။ လမ်းပေါ်မှာတင် ရိုက်သတ်ပစ်တာ”ဟု ဆိုသည်။

အာဏာသိမ်းကာလ နှစ်နှစ်ကျော်အတွင်း နိုင်ငံတစ်ဝန်း လက်နက်ကိုင်ပဋိပက္ခများကြောင့် သေဆုံးရသည့် အရပ်သား ၂,၄၀၀ ကျော်ရှိပြီး ထိုအထဲမှ ၄၉ ရာခိုင်နှုန်းမှာ စစ်ကိုင်းတိုင်းအတွင်းမှဖြစ်ပြီး ဒုတိယအများဆုံးမှာ မကွေးတိုင်းဖြစ်ကြောင်း ISP Myanmar၏ ထုတ်ပြန်ချက်အရ သိရသည်။

စစ်ကိုင်းတိုင်း၊ ယင်းမာပင်၊ ဆားလင်းကြီးတစ်ဝိုက်တွင် အာဏာသိမ်းကာလ ၂၀၂၁ ခုနှစ် ဒီဇင်ဘာလအတွင်းက တစ်ရက်တည်း အရပ်သား ၁၅ ဦးသတ်ဖြတ်ခံရသည့်ဖြစ်စဉ် ရှိခဲ့ကြောင်း ယင်းမာပင်၊ ဆားလင်းကြီး၊ ရွာပေါင်းစုံသပိတ် ဦးဆောင်ကော်မတီဝင် ကိုသက်ဦးက ပြောသည်။

“အဲ့ဒီထဲက ၁၀ ယောက်ကကျတော့ လက်ပြန်ကြိုးတုတ် မီးရှို့သတ်ဖြတ်ခံရတာ ။ အဲ့ဒီနောက်မှာလည်း ဆက်တိုက်သတ်ဖြတ်ခံရတာ ဒီနယ်မြေမှာဆိုရင် နောက်ထပ် ခြောက်ယောက်ဆိုတော့ ၂၁ ယောက်ပေါ့။ အဲ့တာတွေက လေကြောင်းတိုက်ခိုက်မှုမဟုတ်ပါဘူး။
သာမာန်စစ်ကြောင်းထိုးတဲ့အချိန်မှာပါ။ သာမာန်စစ်ကြောင်းထိုးအခြေအနေမှာတောင် စစ်ကြောင်းထိုးရင်း သတ်ဖြတ်တာက တစ်ကြိမ်သာပါပါတယ်။ မြန်မာဝမ်ပေါင်၊ မြန်မာယမ်စီကြေးနီကုမ္ပဏီတွေကို လုံခြုံရေးယူပေးရင်းတန်းလန်း ရွာတွေကို ဝင်မွှေရင်း မိရင် သတ်ဖြတ်သွားတဲ့လူဦး​ရေ စာရင်းဖြစ်ပါတယ်”ဟုဆိုသည်။
ထို့ပြင် ယခု ၂၀၂၃ ခုနှစ်အတွင်း စစ်ကောင်စီစစ်ကြောင်းထိုးမှုမှာ ယခင်နှစ်ကထက် ထက်ဝက်ခန့် ပိုမြင့်တက်လာပြီး ပထမ ငါးလအတွင်း အဆိုပါ နယ်​မြေတစ်ဝိုက် ၎င်း လက်လှမ်းမီသ၍ အရပ်သားနှစ်ဦး နှိပ်စက်ခံရပြီး သေနတ်ဖြင့် ပစ်သတ်ခံရမှုရှိခဲ့ကြောင်း ကိုသက်ဦးက ဆက်လက်ပြောသည်။

အာဏာသိမ်းကာလ နှစ်နှစ်ကျော်အတွင်း ဆန္ဒပြပွဲများ၌ ပစ်ခတ်ခံရခြင်းနှင့် စစ်ကောင်စီက ဖမ်းဆီးထားစဉ် သေဆုံးခဲ့သည့် အရပ်သား ၂,၁၈၃ ဦး၊ တိုက်ပွဲနှင့် လက်နက်ကိုင်ပဋိပက္ခများကြောင့် သေဆုံးရသူ ၂,၄၅၄ ဦးထက်မနည်းရှိကြောင်း ISP Myanmar က ထုတ်ပြန်ထားသည်။

ထို့ပြင် စစ်ကောင်စီ၏ စာရင်းများအရ ဒလန်ဟု စွပ်စွဲသတ်ဖြတ်ခံရသူ ၄,၀၀၃ ဦးရှိကြောင်းဖော်ပြထားသော်လည်း စစ်ကောင်စီ ကိန်းဂဏန်းများအတွက် သီးခြားအတည်ပြုချက်မရှိကြောင်း ISP Myanmar က အသိပေးထားသည်။

စာတည်း- သန့်ဇော်(သန်လျင်)

#mizzima
#ISPMyanmar
#စစ်ကောင်စီ
#ဒလန်
#လက်နက်ကိုင်ပဋိပက္ခ
Photo- ကိုသက်ဦး
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။
https://bit.ly/2VhJ12U

​​ထိုင်းနိုင်ငံတွင် မြန်မာ့အရေး Track1.5ဆွေးနွေးပွဲကျင်းပသွားရန်ရှိနေပြီး စစ်ကောင်စီနိုင်ငံခြားရေးဝန်ကြီးကို ဖိတ်ကြားထား
==================

မိုးသောက်
မဲဆောက်(မဇ္ဈိမ)။။ မြန်မာ့အရေးဆွေးနွေးပွဲ Track 1.5 တစ်ခုကို ထိုင်းနိုင်ငံ၌ဇွန်လ ၁၉ ရက်နေ့တွင် ကျင်းပရန်ရှိနေပြီး စစ်ကောင်စီ နိုင်ငံခြားရေးဝန်ကြီး ဦးသန်းဆွေကို ဖိတ်ကြားထားကြောင်း သတင်းပေါက်ကြားမှုဖြစ်ပေါ်နေသည်။

ထိုင်းနိုင်ငံခြားရေးနှင့် ဒုတိယဝန်ကြီးချုပ် ဒွန်ပရာမွတ်ဝီနိုင်းက ယခုအစည်းအဝေးကိုစီစဉ်ခြင်းဖြစ်သည်ဟု မြန်မာ့အရေးလေ့လာစောင့်ကြည်သူ နိုင်ငံရေးသုတေသီ အီဂေါဗလာဇီဗစ်က သူ၏ လူမှုကွန်ရက်စာ မျက်နှာတွင် ရေးသားထားသည်။

“ Track 1.5 လုပ်ငန်းစဉ်တစ်ခုလုံးဟာ အာဆီယံရဲ့အနေအထားနဲ့ သဘောတူထားတာတွေကို တိုက်ရိုက်စိန်ခေါ်ပြီးတော့ အားပျော့သွားစေတာ” ဟုလည်း ပရာ့ဂ်အခြေစိုက် အီဂေါဗလာဇီဗစ်က ဝေဖန်ရေးသားထားသည်။

Track 1.5 ဆိုသည်မှာ အစိုးရတာဝန်ရှိပုဂ္ဂိုလ်များနှင့် ကျွမ်းကျင်သူများတွေ့ဆုံဆွေးနွေးခြင်းကိုဆိုလိုသည်။ အဆိုပါ အစည်းအဝေးသို့တက်ရောက်ရန် ဖိတ်ကြားထားသော တခြားသောနိုင်ငံများကို မဇ္ဈိမအနေဖြင့် မသိရှိရသော်လည်း အာဆီယံ၏အလှည့်ကျဥက္ကဌဖြစ်သော အင်ဒိုနီးရှားနိုင်ငံကတက်ရောက်မှာမဟုတ်ကြောင်း ယုံကြည်စိတ်ချရသည့် သတင်းရင်းမြစ်တစ်ခုကပြောသည်။

မြန်မာကို အာဆီယံအဖွဲ့ဝင်အဖြစ်အသိအမှတ်ပြုသေးသော်လည်း ထိပ်သီးအစည်းအဝေးကို စစ်အုပ်စုတက်ရောက်ခွင့်ပိတ်ပင်ထားခံရသည်။ မြန်မာစစ်အုပ်စုလိုက်နာအကောင်အထည်ဖော်ရန် အာဆီယံကဘုံသဘောတူညီချမှတ်ထားသော အစီအစဉ်ကိုအကောင်အထည်ဖော်ရန်ပျက်ကွက်မှုက အဓိကအကြောင်းရင်းဖြစ်သည်။

ထိုသို့သောအခြေအနေတွင် အိမ်နီးချင်းနိုင်ငံများဖြစ်သော အိန္ဒိယနှင့်ထိုင်းတို့က စစ်ကောင်စီကိုယ်စားလှယ်များ ဖိတ်ကြားသည့် အစည်းအဝေးများလုပ်လာခြင်းဖြစ်ကာ Track 1.5 ပါဟု သမုတ်လာကြသည်။
ယခင်နှစ်အတွင်းတွင် မြန်မာ့အရေးအတွက် Track1.5အစည်းအဝေးနှစ်ခုကို ထိုင်းနိုင်ငံနှင့်အိန္ဒိယနိုင်ငံတို့တွင် ပြုလုပ်ခဲ့ပြီးဖြစ်သည်။ ထိုင်းနိုင်ငံ၊ ဘန်ကောက်မြို့တွင် ၂၀၂၃ခုနှစ်မတ်လအတွင်းက ပြုလုပ်ခဲ့ပြီး တရုတ်၊ အိန္ဒိယ၊ ဘင်္ဂလားဒေ့ရှ် ၊ဂျပန်၊ကမ္ဘောဒီယား၊ လာအိုနှင့်ဗီယက်နမ်နိုင်ငံတို့ပါဝင်ခဲ့သည်။
အိန္ဒိယနိုင်ငံ၊ နယူးဒေလီမြို့တွင်မူ ဧပြီလ ၂၅ရက်နေ့က ပြုလုပ်ခဲ့ကြပြီး မြန်မာ၊ အိန္ဒိယ၊ တရုတ်ပြည်သူ့သမ္မတနိုင်ငံ၊ ထိုင်းနိုင်ငံ၊ ကမ္ဘောဒီးယားနှင့် လာအိုတို့အပြင် အင်ဒိုနီးရှားနိုင်ငံ တို့လည်း တက်ရောက်ခဲ့သည်။

ဓါတ်ပုံ။ ။ ပြီးခဲ့သည့် ဧပြီလအတွင်းက ဦးသန်းဆွေနှင့်ထိုင်းနိုင်ငံခြားရေးဝန်ကြီးတို့တွေ့ဆုံသည့်ပုံ

National Unity Government (NUG)၏ PVTV Channel မှ ၂၀၂၃ ခုနှစ် ဇွန်လ ၁၆ ရက်ထုတ်လွှင့်မှုများ
====================

https://youtu.be/jg2uTrudaEw

#PVTV
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​မုန်တိုင်းဒဏ်သင့် ရခိုင်ပြည်နယ် မူလအခြေအနေနီးပါးပြန်ရောက်ရှိဟု စစ်ကောင်စီပြောဆိုမှု ရခိုင်ပြည်သူများငြင်းဆို၊ အရေးပေါ်အကူအညီများလိုအပ်‌နေဆဲဟုပြော
==================

ရွှေနွယ်
(မဇ္ဈိမ) ။ ။ရခိုင်ပြည်နယ်အတွင်း မုန်တိုင်းသင့်ဒေသများတွင် မူလအခြေအနေနီးပါး ပြန်လည်ရောက်ရှိနေပြီဟု ရခိုင်ပြည်နယ်စီမံအုပ်ချုပ်ရေးကောင်စီ၏ ပြောဆိုမှုသည် မဟုတ်မှန်ဘဲ မုန်တိုင်းဒဏ်သင့်ပြည်သူအများစုသည် အရေးပေါ်အကူအညီများ လိုအပ်နေကြောင်း ဒေသခံများနှင့် လူမှုကယ်ဆယ်ရေးအဖွဲ့များကပြောသည်။

ရခိုင်ပြည်နယ်အတွင်း မုန်တိုင်းဘေးပြန်လည်ထူ‌ထောင်ရေးကဏ္ဍသည် မူလအခြေအနေနီးပါး ပြန်လည်ရောက်ရှိနေပြီဟု ရခိုင်ပြည်နယ်စီမံအုပ်ချုပ်ရေးကောင်စီပြောခွင့်ရ ဦးလှသိန်းက မိုခါမုန်တိုင်း တိုက်ခတ်မှုတစ်လပြည့်သည့် ဇွန်လ ၁၄ ရက်နေ့တွင် မီဒီယာအချို့သို့ဖြေကြားခဲ့သည်။

" ပြောမယ်ဆိုလို့ရှိရင်တော့ ရခိုင်ပြည်နယ်ရဲ့ တစ်လတာကာလမှာတော့ မူလအခြေအနေနီးပါးလောက်ရောက်ပြီလို့ ပြောနိုင်ပါတယ်" ဟု ဦးလှသိန်းက CNI သတင်းဌာနသို့ ဖြေထားသည်။

ဦးလှသိန်းက စစ်တွေမြို့အား၍ဥပမာပေး ရှင်းပြထားပြီး မုန်တိုင်းဝင်ပြီးတစ်လအကြာတွင် ပုံမှန်အခြေအနေသို့ပြန်လည်ရောက်ရှိပြီဟု ပြောနိုင်ခြင်းမှာ လျှပ်စစ်မီးရရှိမှု၊ လမ်းများသွားလာနိုင်မှု၊ စာသင်ကျောင်းများနှင့် ဆေးရုံများဖွင့်လှစ်နိုင်မှုကိုကြည့်၍ ပြောခြင်းဖြစ်ကြောင်း ဆိုထားသည်။

စစ်တွေမြို့ဒေသခံအချို့နှင့် အရပ်ဖက်အဖွဲ့အချို့အား မဇ္ဈိမမှ ယနေ့ ဇွန်လ ၁၆ရက်တွင် ဆက်သွယ်မေးမြန်းရာ စာသင်ကျောင်းအများစုသည် အမိုးအကာမလုံခြုံဘဲ ဖွင့်ထားသည်ဟု ပြောသည်။ထို့အပြင်အမိုးအကာအောက်သို့မရောက်သေးသည့် အိမ်ထောင်စုများစွာရှိနေပြီး စားဝတ်နေရေးအခက်အခဲများစွာရှိနေကြောင်း ပြောသည်။

“ကျွန်တော်တို့ တွက်ကြည့်ရသလောက်ဆိုရင် စစ်တွေမှာ အမိုးအကာအောက်ပြန်ရောက်တာ ၄၀ရာနှုန်းလောက်ပဲရှိဦးမယ်။ ဒါက အခိုင်အမာမဟုတ်ဘူးနော်။ ယာယီအမိုးအကာ၊ယာယီအဆင့်လောက်ကိုရောက်တာပါ” ဟု စစ်တွေမြို့မှ အရပ်ဖက်အဖွဲ့တစ်ခု၏တာဝန်ရှိသူတစ်ဦးကပြောသည်။

ထို့အပြင် စစ်တွေမြို့အပြင် ရခိုင်ပြည်နယ်အတွင်း မုန်တိုင်းသင့်ဒေသများတွင် ကုန်စျေးနှုန်း အဆ မတန်ကြီးမြင့်လာမှုနှင့်အတူ အခြေခံလူတန်းစားများနှင့် လက်လုပ်လက်စားမိသားစုများမှာ အလုပ် အကိုင်ရှားပါးမှုကြောင့် စား‌ရေးသောက်ရေးခက်ခဲနေကြောင်း အရပ်ဖက်အဖွဲ့အချို့က ပြောသည်။

"လက်ရှိမှာ အဖွဲ့အစည်းအသီးသီးက လာဝေနေတာရှိတဲ့အတွက် ဒီအပေါ်မှာ မုန်တိုင်းသင့်မိသားစုတွေ တစ်ပတ်တန်သည်ဖြစ်စေ၊ အလွန်ဆုံး နှစ်ပတ်တန်သည်ဖြစ်စေ၊ ပြေလည်သွားတာတော့ရှိမယ်။ ဒါပေမယ့် ရေရှည်မှာ အဆင်ပြေဖို့အတွက်ကတော့ မလွယ်ပါဘူး။ စားဝတ်နေရေးအဆင်မပြေကြပါဘူး" ဟု အရပ်ဖက်အရေးဆောင်ရွက်သူတစ်ဦးပြောသည်။

မိုခါမုန်တိုင်းကြောင့် ၉၀ ရာခိုင်နှုန်းခန့်ပျက်စီးသွားသော ပေါက်တောမြို့နယ်တွင်လည်း ပြည်သူများသည် လုံခြုံသည့် အမိုးအကာအောက်ပြန်လည်ရောက်ရှိရန်ခက်ခဲနေဆဲဖြစ်ပြီး အခြေခံလူတန်းစားများအတွက် ထမင်းနပ်မှန်ရန်ပင် မလွယ်ကူကြောင်း ပေါက်တောမြို့ဒေသခံတစ်ဦးကမဇ္ဈိမကိုပြောသည်။

၎င်းက "လက်ရှိအချိန်အထိ တော်တော်လေးချို့ချို့တဲ့တဲ့ကို တွေ့ရတယ်။ အမိုးအကာကလည်း ကိုယ့်ဘာသာပဲမိုးကြရတယ်။ မရှိရှိတာစိုက်ထုတ်ပြီး။ မမိုးရင် နေလို့မရဘူးလေ။ မိုးကလည်းလာနေပြီ။ ဒါတောင် မြို့ပေါ်မှာ မမိုးနိုင်သေးတဲ့အိမ်တွေ၊နယ် ဘက်မှာမမိုးနိုင်သေးတဲ့အိမ်တွေအများကြီး" ဟု ဆိုသည်။

မုန်တိုင်းကြောင့် ထိခိုက်ခဲ့သော စီးပွားရေးလုပ်ငန်း များ၊ ကုန်ရောင်းကုန်ဝယ်လုပ်ငန်းများမှာ ယခင်အတိုင်း မလည်ပတ်နိုင်သေးသည့်အတွက် အဆိုပါ လုပ်ငန်းများပေါ်တွင် မှီတည်နေသော လက်လုပ် လက်စားများမှာ ပိုမိုအခက်ကြုံနေကြရသည်ဟု သတင်းရရှိသည်။

“လခစားဝန်ထမ်းလောက်ကလွဲရန် ကျန်တဲ့သူတွေ ၊လက်လုပ်လက်စားတွေက ထမင်းနပ်မှန်ဖို့ခက်ခဲနေကြပါတယ်။ ကျွန်တော်တို့အပါအဝင်ပါ” ဟု ပေါက်တောမြို့ခံတစ်ဦးကပြောသည်။

ရသေ့တောင်မြို့နယ်၊မစဲကျေးရွာဒေသခံကမူ ၎င်းတို့အနေဖြင့် လက်ရှိတွင် အမိုးအကာအတွက် တာလ ပတ်စများနှင့် ဆန်အပါအဝင် စားသောက်ကုန်အချို့ကို ကမ္ဘာ့စားနပ်ရိက္ခာအစီအစဉ်(WFP) မှလာရောက်ကူညီသည့်အတွက် မုန်တိုင်းတိုက်ခတ်ပြီး ကာစနေ့ရက်များထက် ပိုမိုအဆင်ပြေသည်ဟု ပြောသည်။

စစ်ကောင်စီ၏၎င်းတို့ ကျေးရွာအပေါ်ကူညီမှုနှင့်ပတ်သက်၍ မေးမြန်းရာတွင် “စစ်ကောင်စီက လာကူညီတာတော့မတွေ့မိသေးဘူးဗျ” ဟု ဆိုသည်။

ဓာတ်ပုံ - ရခိုင်ပြည်နယ်မှမုန်တိုင်းဘေးသင့်နေအိမ်တစ်လုံး
စာတည်း - မောင်ကြီး

#mizzima
#ရခိုင်ပြည်နယ်
#မုန်တိုင်းသင့်ဒေသများ
#ရခိုင်ပြည်နယ်စီမံအုပ်ချုပ်ရေးကောင်စီ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇွန်လ( ၁၇ )ရက်၊ စနေနေ့ မနက်ပိုင်း မဇ္ဈိမရေဒီယိုအစီအစဉ်
=========================

ဒီကနေ့ မနက် နားဆင်ရမယ့် အစီစဉ်တွေကတော့ ...
မိုခါမုန်တိုင်းကြောင့် နေအိမ်အများအပြားပျက်စီးသွားတဲ့ ရခိုင်ပြည်နယ်မှာ ၇၀ ရာခိုင်နှုန်းအထိ အရေးပေါ် အကူအညီ လိုအပ်နေတယ်လို့ ရက္ခိုင့်တပ်တော် (AA)/ULA ရဲ့ အရေးပေါ် ကယ်ဆယ်ရေးနဲ့ ပြန်လည် နေရာချထားရေး ကော်မတီက ထုတ်ပြန်လိုက်တဲ့သတင်းနဲ့အတူ နိုင်ငံတော်အတိုင်ပင်ခံပုဂ္ဂိုလ်ရဲ့ မွေးနေ့မှာ ပန်းသပိတ်ဆင်နွှဲကြဖို့ တော်လှန်ရေးအင်အားစုတွေက တိုက်တွန်းလိုက်တဲ့သတင်းအပါအဝင် တခြား စိတ်ဝင်စားဖွယ် ပြည်တွင်းသတင်းတွေနဲ့ နောက်ဆုံးရ နိုင်ငံတကာသတင်းတွေကို နားဆင်ကြရမှာပါ။
အဲ့ဒီနောက်မှာတော့ စီးပွားရေးသတင်းတွေကို နားဆင်ကြရဖို့ရှိပါတယ်။ သတင်းတွေအပြီးမှာတော့ ဒီကနေ့အတွက် သတင်းသုံးသပ်ချက်အစီအစဉ်ကို နားဆင်ရမှာဖြစ်သလို အပတ်စဉ်တင်ဆက်နေကျဖြစ်တဲ့ Insight Myanmar အစီအစဉ်ကိုနားဆင်ရမှာပါ။

https://youtu.be/jGGO0r_ePN8

#Morningradio
#Mizzimaradio
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​မအူပင်အကျဥ်းထောင်မှ နိုင်ငံရေးအကျဥ်းသား ၆ ဦးကို ထောင်ပိုင်က ရိုက်နှက်တိုက်ပိတ်
======================

မင်းထက်
(မဇ္စျိမ)။ ။ ဧရာဝတီတိုင်း ၊ မအူပင်အကျဥ်းထောင်တွင် စစ်အာဏာရှင်ဆန့်ကျင်မှုကြောင့် ဖမ်းဆီးခံထားရသည့် နိုင်ငံရေးအကျဥ်းသား ခြောက်ဦးကို မအူပင်ထောင်ပိုင်က ဦးဆောင်ရိုက်နှက်ပြီး တိုက်ပိတ်ထားကြောင်း သိရသည်။

ပြီးခဲ့သည့် ဇွန်လ ၁၁ ရက်က မအူပင်အကျဥ်းထောင်သို့ ဧရာဝတီတိုင်း အကျဥ်းထောင် ညွှန်ကြားရေးမှူး ဦးဇော်စစ်အောင် လာရောက်စဥ် နိုင်ငံရေးအကျဥ်းသားအချို့ စကားပြောကြမ်းတမ်းသည်ဟုဆိုကာ ခေါ်ထုတ်ရိုက်နှက်ခဲ့ခြင်းဖြစ်ကြောင်း အကျဥ်းထောင်နှင့် နီးစပ်သူတစ်ဦးကပြောသည်။

ရိုက်နှက်ခံရသူများမှာ ပြီးခဲ့သည့် ၂၀၂၂ ခုနှစ် စက်တင်ဘာလ ၁ ရက်နေ့က ရန်ကုန်တိုင်း၊ အလုံမြို့နယ်တွင် ဖမ်းဆီးခံခဲ့ရသည့် မအူပင် PDF အဖွဲ့ဝင် ကိုစိုင်းနောင်(ခ) လက်ယာ ၊ကိုမျိုးမင်းဦး၊ကိုဝေဖြိုးအောင်၊ကိုသူရဦး၊ ကိုငြိမ်းချမ်းနှင့် ကိုတာရာလင်းတို့ဖြစ်သည်ဟုသိရသည်။

ကိုတာရာလင်းသည် ဦးဇော်စစ်အောင်အား လူ့အခွင့်အရေးချိုးဖောက်ခံရမှုများ၊ နိုင်ငံရေးအကျဥ်းသားများ ရသင့်ရထိုက်သည့် အခွင့်အရေးများကို တင်ပြခဲ့၍ ရိုက်နှက်ခံရခြင်းဖြစ်ကြောင်း ၎င်းကဆိုသည်။

"၁၁ ရက်နေ့က ညွှန်မှူးလာတဲ့အချိန်မှာ မအူပင် PDF ငါးယောက်က စကားပြောတာကြမ်းတယ်။ တာရာလင်းကတော့ နိုင်ငံရေးအကျဥ်းသားဖြစ်ပြီး မဟုတ်တာတွေတောင်းဆိုတယ်ဆိုပြီး ၁၂ ရက်နေ့မှာ ခေါ်ထုတ်ရိုက်တာပါ"ဟု အကျဥ်းထောင်နှင့် နီးစပ်သူကပြောသည်။
ကိုတာရာလင်းသည် ကြံခင်းမြို့နယ်မှ ဒုရဲတပ်ကြပ်ဖြစ်ပြီး ၂၀၂၁ ခုနှစ် ဖေဖော်ဝါရီလ၂ ရက်နေ့တွင် စစ်အာဏာရှင်အလိုမရှိကြောင်း လူမှုကွန်ရက်တွင်ရေးသားခဲ့မှုကြောင့် ၎င်း၏ အစ်ကိုဖြစ်သူနှင့်အတူ ဖမ်းဆီးခံရပြီး ပုသိမ်အကျဥ်းထောင်တွင် အကျဥ်းချခံထားခဲ့ရာမှ မအူပင်အကျဥ်းထောင်သို့ ပြောင်းရွှေ့ခံခဲ့ရသူဖြစ်သည်။

လက်ရှိတွင် ၎င်းတို့ ရိုက်နှက်ခံရသည့် ဒဏ်ရာများအား ဆေးကုသခွင့် ရ၊ မရမသိရကြောင်း အကျဥ်းထောင်နှင့်နီးစပ်သူက ပြော သည်။

မအူပင်အကျဥ်းထောင်တွင် စစ်အာဏာသိမ်းပြီးနောက်ပိုင်း စစ်အာဏာရှင် အလိုမရှိကြောင်း ဆန့်ကျင်မှုကြောင့် ဖမ်းဆီးခံထားရသည့် နိုင်ငံရေးအကျဥ်းသား ဦးရေ ၁၀၀ ဝန်းကျင်ရှိနေကြောင်းသိရသည်။

စာတည်း။ ။အောင်ကျော်ဖြိုး

#Mizzima
#နိုင်ငံရေးအကျဥ်းသား ၆ ဦး
#တိုက်ပိတ်

ဓာတ်ပုံ -မအူပင် PDF အဖွဲ့ဝင်များ ဖမ်းဆီးခံရစဥ်က စစ်ကောင်စီမှ ထုတ်ပြန်ထားသည့် ဓာတ်ပုံ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

နော်ဝေနိုင်ငံတွင် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ၇၈ နှစ်ပြည့် မွေးနေ့ပွဲကျင်းပ
====================

(မဇ္ဈိမ)။ ။ နော်ဝေနိင်ငံ၊ ဖရိုလဲန်မြို့ရှိ အောင်ဆန်းစုကြည်ပန်းခြံ၌ ဇွန်လ ၁၉ ရက်နေ့တွင်ကျရောက်မည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ၇၈ နှစ်ပြည့်မွေးနေ့ပွဲအခမ်းအနားကို ဇွန်လ ၁၇ ရက် ကျင်းပကြောင်း သိရသည်။

အခမ်းအနားကို ဖရိုလဲန်ပြည်နယ် ဒုမြို့တော်ဝန်နှင့် အကြီးအကဲများ၊ ပြည်တွင်း၊ ပြည်ပရှိ ဒီမိုကရေစီ လိုလားသူများ အတူတကွပူးပေါင်း ကျင်းပကြကြောင်းသိရသည်။

'' ဒီနှစ် အမေစု ၇၈ နှစ်ပြည့်မွေးနေ့ကို နော်ဝေးနိုင်ငံ ဖွံ့ဖြိုးရေးဝန်ကြီး ကိုယ်တိုင်တက်ရောက်ဖို့ပြောထားပြီးကာမှ ကိစ္စတစ်ခုပေါ်လာတဲ့အတွက် သူမလာနိုင်တော့ဘဲ ဗွီဒီယိုနဲ့စကားပြောတယ်။ ဒီပြည်နယ်မှာရှိတဲ့ ဒုတိယမြို့တော်ဝန်ကိုယ်တိုင် တက်ရောက်တယ်။ ပြီးတော့ဖရိုလဲန်မြို့တော်ဝန် တက်ရောက်တယ်။ နောက်ပြည်တွင်း ပြည်ပက ဒီမိုကရေစီလိုလားသူတွေပါဝင်မယ်။ ဒါကလည်းအမေစုလွတ်မြောက်ရေးအတွက် အားလုံး တက်တက်ကြွကြွ ပါဝင်ကြတာပါ ''ဟု အောင်ဆန်းစုကြည်ပန်းခြံကော်မတီ ဥက္ကဌဆလိုင်းဂျွန်မန်းက ဆိုသည်။

ထို့ပြင့် နိင်ငံတကာရှိ အောင်ဆန်းစုကြည်ပန်းခြံလူငယ်များ ပထမအကြိမ်အဖြစ် တွေ့ဆုံဆွေးနွေးမှုများ ပြုလုပ်ခဲ့ကြောင်း သိရသည်။

စာတည်း။ ။အောင်ကျော်ဖြိုး

#Mizzima
#၇၈ နှစ်ပြည့်
#ဒေါ်အောင်ဆန်းစုကြည်

ပုံ/အောင်ဆန်းစုကြည်ပန်းခြံထဲ၌ ကျင်းပမည့်‌ဒေါ်အောင်ဆန်းစုကြည် ၇၈ နှစ်ပြည့် မွေးနေ့ပွဲအခမ်းအနားအတွက် ပြင်ဆင်နေကြစဉ်။
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​တနိုင်းဝရာဇွပ်ပြည်သူ့စစ်အဖွဲ့က KIA တပ်ဖွဲ့ဝင် နှစ်ဦးကို ဖမ်းဆီး
=====================

(မဇ္ဈိမ)။ ။ စစ်ကောင်စီ (တနိုင်း ဒကစ)တပ်နှင့် ပူးပေါင်းစစ်ရေးလှုပ်ရှားနေသည့် မင်းဇေသန့် ဦးဆောင်သော တနိုင်းဝရာဇွပ် ပြည်သူ့စစ်အဖွဲ့က လက်နက်ကိုင်ဆောင်ထားသည့် KIA တပ်ဖွဲ့ဝင် နှစ်ဦးကို ဇွန်လ ၉ ရက်နေ့တွင် ဖမ်းဆီးသွားကြောင်း ပြည်သူ့စစ်နှင့် နီးစပ်သည့် သတင်းရင်းမြစ်က ဆိုသည်။

တနိုင်းဟူးကောင်းချိုင့်ဝှမ်းဒေသ ၊ ကချင်လွတ်မြောက်ရေးတပ်မတော် (KIA) တပ်မဟာ (၂) လက်အောက် တပ်ရင်း (၁၄ ) နယ်မြေ ၊ ရှဒူးဇွပ်ကျေးရွာအခြေစိုက် စစ်ကောင်စီ ခလရ ၂၉၇ တပ်ရင်းနှင့် ခေါင်းလှော်ချောင်း (ဒေသအခေါ်) ကြားရှိ ကားလမ်းမအနီးတွင် ဖမ်းဆီးသွားခြင်းဖြစ်ကြောင်း သိရသည်။

`` ရွာထဲ ဆက်ကြေးလာကောက်ရင်း အဖမ်းခံလိုက်ရတယ်လို့ပြောတယ်။ ခုထိတော့ ဝရာဇွပ်ပြည်သူ့စစ်အဖွဲ့စခန်းထဲမှာ ကောင်းကောင်းမွန်မွန် ရှိနေတယ်" ဟု ၎င်းသတင်းရင်းမြစ်က ပြောသည်။

ပြီးခဲ့သည့် မေလ ဒုတိယပတ် အတွင်းကလည်း KIO အုပ်ချုပ်ရေးအရာရှိ အပါအဝင် တပ်ဖွဲ့ဝင် ခြောက်ဦးကို ဝရာဇွပ်ပြည်သူ့စစ်အဖွဲ့က ဖမ်းဆီးထားကြောင်း အမည်မဖော်လိုသူ ရှဒူးဇွပ်ဒေသခံ သတင်းရင်းမြစ်က ပြောသည်။

“ ပြီးခဲ့တဲ့ မေလကလည်း ခြောက်ယောက်ဖမ်းထားသေးတယ်။ အဲ့ ခြောက်ယောက်ထဲကနေ တချို့ကိုတော့ ပြန်လွတ်ပေးလိုက်ပြီးတော့ တချို့ကိုတော့ ဖမ်းထားတုန်းလို့ ကြားတယ်။ ပြန်လွတ်လာကြတဲ့သူတွေက ဘယ်လိုပုံစံကြောင့် ပြန်လွတ်လာမှန်းမသိဘူး ” ဟု သတင်းရင်းမြစ်က ပြောသည်။

ထိုအဖမ်းခံခဲ့ရသူများသည် ဝါရာဇွပ်နဲ့ ရှဒူးဇွပ်ကျေးရွာများတွင် စစ်ရေးအရ သွားလာလှုပ်ရှားစဥ် ဖမ်းဆီးခံခဲ့ရခြင်းဖြစ်ကြောင်း KIO စစ်ရေးရုံး၏ အမည်မဖော်လိုသော သတင်းရင်းမြစ်က ပြောသည်။
ဝရာဇွပ်ပြည်သူ့စစ်အဖွဲ့က " ရန်သူက အညံ့ခံလျှင် မိမိက ခွင့်လွတ်တဲ့စိတ်နဲ့ ပြုမူဆက်ဆံပါ။ မိမိတို့တပ်ဖွဲ့ ဖမ်းဆီးထိန်းသိမ်းထားသည့် ရန်သူ့သုံ့ပန်းတချို့အား ကောင်းမွန်စွာ ထိန်းသိမ်းထာလျက်ရှိပါသည်" ဟု ဇွန် ၁၁ ရက်နေ့က သတင်းထုတ်ပြန်ထားပါသည်။
ဖမ်းဆီးခံထားရသူများသည် KIA တပ်မဟာ (၂ ) လက်အောက်ခံ တပ်ရင်းများဖြစ်သည့် KIA တပ်ရင်း ( ၁၄ )၊ တပ်ရင်း(၄၃) နှင့် တပ်ရင်း (၄၅) တို့မှ ဖြစ်ကြောင်း မဇ္ဓျိမ၏ မြေပြင်သတင်းအဖွဲ့က ကနဦး စုံစမ်းသိရှိရသည်။

လက်ရှိတွင် ဖမ်းဆီးခံထားရသူများကို မြောက်ပိုင်းတိုင်းစစ်ဌာနချုပ်၏ စစ်ဆင်ရေးဌာနချုပ်ခွဲတစ်ခုဖြစ်သည့် တနိုင်း ဒကစသို့ လွဲပြောင်းပေးပို့ခြင်းမရှိသေးဘဲ ဝရာဇွပ်ပြည်သူ့စစ်စခန်းအတွင်း၌သာ ဖမ်းဆီးထားဆဲဖြစ်ကြောင်း စုံစမ်းသိရှိရသည်။

စာတည်း။ ။အောင်ကျော်ဖြိုး

#Mizzima
#KIA တပ်ဖွဲ့ဝင်
#တနိုင်းဝရာဇွပ်ပြည်သူ့စစ်အဖွဲ့
#ဖမ်းဆီး
ဓာတ်ပုံ - ဝရာဇွပ်ပြည်သူ့စစ်အဖွဲ့ရဲ့ သတင်းထုတ်ပြန်ထားမှု
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

“ကရင်နီဒေသမှာ ဘာတွေဖြစ်နေလဲ” KNDF ဒုစစ်ဦးစီးချုပ် မာဝီ နှင့် ဆက်သွယ်မေးမြန်းချက်
======================

ဂျူချန်း (မဇ္ဈိမ)။ ။ ကရင်နီအမျိုးသားကာကွယ်ရေးတပ် KNDF ဖွဲ့စည်းပြီး နှစ်နှစ်ကျော်ကာလအတွင်း တပ်ဖွဲ့ဝင်အင်အား ၆,၀၀၀ မှ ၈,၀၀၀ ကြား အထိ စုစည်းနိုင်ခဲ့ပြီးဖြစ်တယ်လို့ သိရပါတယ်။

ကရင်နီပြည်နယ် နေရာအနှံ့မှာ တော်လှန်ရေးအင်အားစုတွေနဲ့ စစ်ကောင်စီတပ်ဖွဲ့တွေကြား တိုက်ပွဲဖြစ်ပွားလျက်ရှိပြီး စစ်ကောင်စီတပ်ဖွဲ့က မြေပြင်တိုက်ပွဲတွေမှာ အကျအဆုံးတွေများနေတယ်လို့ KNDF ဒုစစ်ဦးစီးချုပ် မာဝီက ပြောပါတယ်။

“စစ်ကောင်စီ မိသားစုတွေက ဈာပနအခမ်းအနားတွေပဲ လုပ်နေရတဲ့အခြေအနေမျိုးကို ကျနော်တို့ ကရင်နီတွေက ဖန်တီးပေးနေတာပဲ ဖြစ်ပါတယ်” လို့ မာဝီက ပြောပါတယ်။

ကိုယ်ပိုင်လွတ်လပ်ခွင့်နဲ့ ဖက်ဒရယ်ဒီမိုကရေစီအတွက် တိုက်ပွဲဝင်နေတာဖြစ်တာကြောင့် နိုင်ငံတကာအနေနဲ့ မျက်နှာကြီးရာ ဟင်းဖက်မပါဘဲ ယူကရိန်းနည်းတူ မြန်မာပြည်သူလူထုသည်လည်း ပံ့ပိုးခံသင့်တယ်လို့ မာဝီက ပြောပါတယ်။

စာမူတည်းဖြတ်။ ။ ဖူးသိမ်ကျ
စာတည်း။ ။ အောင်ကျော်ဖြိုး

https://youtu.be/DcImWFuPNYs

#ကရင်နီပြည်နယ်
#KNDF
#ဆက်သွယ်မေးမြန်းချက်
-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

ရေးမြို့နယ် စစ်ကောင်စီတပ်မှ အကြောင်းမဲ့ လက်နက်ကြီးပစ်ခတ်မှုကြောင့် အမျိုးသမီးသေဆုံး
=====================

ဂျူချန်း
(မဇ္ဈိမ)။ ။ မွန်ပြည်နယ်၊ ရေးမြို့နယ်တောင်ပိုင်း၊ ခေါ်ဇာမြို့နယ်ခွဲ၊ ကျောက်အိုင် (ဝင်းတမော့)ကျေးရွာတွင် ဇွန်လ ၁၆ ရက်နေ့ ညနေ ၃နာရီ ၁၅မိနစ်၌ စစ်ကောင်စီ၏ ခလရ(၃၁) တပ်မှ တိုက်ပွဲဖြစ်ပွားခြင်းမရှိဘဲ ကျောက်အိုင်ကျေးရွာတွင်းသို့ လက်နက်ကြီးပစ်ခတ်ခဲ့ရာ လက်နက်ကြီး ကျည် ကျရောက်ပေါက်ကွဲမှုကြောင့် ဝင်းတမော့ကျေးရွာနေ အမျိုးသမီးတစ်ဦး နေရာတွင် သေဆုံးခဲ့ရကြောင်း ဒေသခံမှ သိရသည်။

သေဆုံးသွားသည့် အမျိုးသမီးသည် ဝင်းတမော့ကျေးရွာနေ အသက် ၄၀ နှစ်အရွယ် မိထွေးကြည် ဖြစ်ပြီး ရေချိုးရန်အတွက် အိမ်နောက်ဖေးဘက်မီးဖိုချောင်၌ ရှိနေစဉ် စစ်ကောင်စီတပ်မှ ပစ်ခတ်လိုက်သည့် လက်နက်ကြီးသည် မိထွေးကြည်၏ ဦးခေါင်း ထိမှန်ခဲ့ရာမှ သေဆုံးခဲ့ရကြောင်း ဒေသခံများက ပြောသည်။

“ရေချိုးဖို့ အိမ်နောက်ဖေးဘက်ဝင်သွားတာ၊ အဲ့ဒီအချိန်မှာ ထိသွားတာ။ ခေါင်းတည့်တည့်ထိတာ တစ်ခါတည်း ပွဲချင်းပြီးဆုံးသွားတယ်။ (၃၁) တပ်က ပစ်တာ။ ကျနော်တို့ရွာမှာ (လက်နက်ကြီးထိပြီးသေဆုံး) ဒါပထမဆုံးပဲ။ ခုတလော ဘေးမှာလည်း တိုက်ပွဲဖြစ်တာမရှိပါဘူး” ဟု ကျောက်အိုင်ရွာသားတစ်ဦးက မဇ္ဈိမ ကို ပြောသည်။
လက်နက်ကြီးထိမှန်သေဆုံးခဲ့ရသည့် မိဝင်းကြည်အား နေ့ချင်း သုသာန်တွင် မီးသင်္ဂြိုဟ်ခဲ့ပြီး ညနေပိုင်းတွင် ရဲများလာရောက်ကြည့်ရှုခဲ့သော်လည်း တစ်စုံတစ်ရာ ညွှန်ကြားခြင်း၊ တာဝန်ယူခြင်းမရှိကြောင်း ဒေသခံမှ သိရသည်။

ကျောက်အိုင်ကျေးရွာ အနီးတစ်ဝိုက်တွင် တိုက်ပွဲဖြစ်ပွားမှု မရှိသော်လည်း စစ်ကောင်စီတပ်မှ အဆိုပါ ဇွန်လ ၁၆ ရက်နေ့ နံနက် ၁၀ နာရီခန့်တွင် လက်နက်ကြီး နှစ်ကြိမ် ပစ်ခတ်ခြင်းပြုလုပ်ခဲ့ပြီး ညနေ ၃နာရီ ၁၅မိနစ်တွင် ထပ်မံပစ်ခတ်သည့် လက်နက်ကြီးသည် ကျေးရွာတွင်းကျရောက်ပေါက်ကွဲခဲ့ပြီး မိထွေးကြည်ဦးခေါင်းအား ထိမှန်သေဆုံးခဲ့ရခြင်း ဖြစ်သည်။

ပြီးခဲ့သည့် ၂၀၂၁ ခုနှစ် စက်တင်ဘာလ ၂၈ ရက်နေ့တွင်လည်း ရေးမြို့နယ် ၊ ချောင်းတောင်တံတားဂိတ်၌ ခေါဇာမြို့မှ အသက် ၂၇ နှစ်အရွယ် မင်းရဲနိုင်ဦးအား စစ်ကောင်စီတပ်မှ ပစ်သတ်ခဲ့သေးသည်။

စာတည်း - သန့်ဇော်(သန်လျင်)

#mizzima
#ရေးမြို့နယ် #စစ်ကောင်စီတပ်
#လက်နက်ကြီးပစ်ခတ်မှု
#ဝင်းတမော့ကျေးရွာ
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U