“အညာဒေသ လက်ရှိစစ်ရေး အလေးအပေါ့”
ချစ်သောအညာမြေ Episode-19
=========================

အညာဒေသမှာရှိတဲ့ ခုခံတော်လှန်ရေးအင်အားစုတွေအနေနဲ့ စစ်ကောင်စီဘက်က တန်ပြန် တိုက်ခိုက်တာ၊ စခန်းတွေ စီးနင်းခံရတာ၊ ကိုယ့်တပ်ဖွဲ့ဝင်တွေ ထိခိုက် ဆုံးပါးရတာ စတာတွေမဖြစ်အောင် ဘယ်လို သတိထား ကာကွယ် လုပ်ဆောင်သင့်ပါသလဲ၊ အားနည်းချက်တွေက ဘာတွေရှိနေပါသလဲ၊ ဒီနှစ်ရဲ့ ကျန်တဲ့လတွေအတွင်း အညာဒေသရဲ့ စစ်ရေး အလေးအပေါ့ကို ဘယ်လိုများ ခန့်မှန်းနိုင်ပါသလဲ စတာတွေကို အခုဆွေးနွေးခန်းမှာ ကြည့်ရှု နားဆင်ကြရပါမယ်။

မြင်းခြံမြို့အခြေစိုက် Myingyan Black Tiger (KBT) အဖွဲ့ခေါင်းဆောင် ရဲဘော်မိုက်ခဲ၊ ဝက်လက်မြို့အခြေစိုက် ဆေးကြိမ်လုံး ပြည်သူ့ကာကွယ်ရေးတပ်ဖွဲ့ခေါင်းဆောင် ရဲဘော်ဇော်ဂျီနဲ့ ယင်းမာပင်ခရိုင် တပ်ရင်း (၁)၊ ပြန်ကြားရေးတာဝန်ခံ ရဲဘော်ဗလတို့နဲ့အတူ ကိုကျော်ကျော်သိန်းက မေးမြန်း ဆွေးနွေးထားပါတယ်။

https://youtu.be/GxLhUA9DQak

#ချစ်သောအညာမြေ
#MizzimaTV

ရေယာဉ်ဖြင့် ရိက္ခာပို့လာသည့် စစ်ကောင်စီတပ်ဖွဲ့နှင့် ကာကွယ်ရေးတပ်ဖွဲ့တို့ ၃ ရက်ဆက်တိုက် တိုက်ပွဲဖြစ်
==================

လွှမ်းမိုး (မဇ္ဈိမ)။ ။ စစ်ကိုင်းတိုင်း၊ ချောင်းဦးမြို့နယ်တွင် ချင်းတွင်းမြစ်ကြောင်းအတွင်း ရေယာဉ်ဖြင့် ရိက္ခာပို့လာသည့် စစ်ကောင်စီတပ်ဖွဲ့နှင့် ကာကွယ်ရေးတပ်ဖွဲ့တို့ သုံးရက်ဆက်တိုက် တိုက်ပွဲဖြစ်ပွားသည်ဟု Hero Fighter (Salingyi) တပ်ဖွဲ့ထံက သိရသည်။

“သဲအိပ်တွေ ကာပြီးထွက်ခွာလာတဲ့ စစ်ကောင်စီတပ်ဖွဲ့ရဲ့ ရေယာဉ်ကို ရှေ့ထွက်ပြောင်းနဲ့ လက်နက်ငယ်‌တွေကို အများဆုံးသုံးပြီး တိုက်ခိုက်ခဲ့တာ ဖြစ်ပါတယ်။ ထိခိုက်သေဆုံးမှုကိုတော့ အသေးစိတ်မသိရသေးဘူး” ဟု Hero Fighter (Salingyi) တပ်ဖွဲ့မှ ဗိုလ်သူရိန်က ပြောသည်။

မုံရွာမြို့ ၊ အလုံမင်းဒေါင့် ဆိပ်ကမ်းမှ ချောင်းဦးမြို့နယ်သို့ ရိက္ခာထောက်ပို့ပေးပို့ရန် ထွက်ခွါလာသည့် စစ်ကောင်စီတပ်ဖွဲ့ရေယာဉ်ကို ချင်းတွင်း မြစ်ကြောင်း တစ်လျှောက် ရေကြောင်းကျဉ်းသည့် နေရာမှ စောင့်ကြိုပြီး တိုက်ခိုက်ခဲ့ခြင်းဖြစ်သည်ဟု ဆိုသည်။

အဆိုပါ စစ်ကောင်စီတပ်ဖွဲ့၏ ရေယာဉ်သည် ကံကြီးကုန်း‌ကျေးရွာသို့ ရိက္ခာထောက်ပို့အဖြစ် ထွက်ခွာလာသည့် အင်အား ၆၀ ခန့်ပါ စစ်ကောင်စီတပ်ဖွဲ့ အမြန်ရေယာဉ်ကို ဇူလိုင်လ ၇ ရက် ညနေ ၄ နာရီခွဲ အချိန်တွင် တိုက်ခိုက်ခဲ့ကြောင်း Hero Fighter (Salingyi) တပ်ဖွဲ့မှ ဗိုလ်သူရိန်က ပြောသည်။

ဆားလင်းကြီးမြို့နယ် ချင်းတွင်းမြစ်ကြောင်းအတွင်း ထောက်ပို့ရေယာဉ်များဖြင့် လိုက်ပါလာသောစစ်ကောင်စီတပ်ဖွဲ့နှင့် ဒေသခံ ကာကွယ်ရေးတပ်ဖွဲ့များ ဇူလိုင်လ ၆ရက်မှစ၍ ယနေ့အထိ သုံးရက်ဆက်တိုက် ထိတွေ့တိုက်ပွဲများ ဖြစ်ပွါးနေပြီး မြစ်ကမ်းတစ်လျှောက် ကျေးရွာများမှ ဒေသခံများ စစ်ရှောင်နေရကြောင်း သိရသည်။

ထိုတိုက်ခိုက်မှုကို Hero Fighter (Salingyi) ၊ Chindwin Dynamite (Salingyi)၊ တောင်ပံနီပြောက်ကျားတပ်ဖွဲ့ နှင့် ဒေသတွင်းမဟာမိတ်များက ပူးပေါင်းတိုက်ခိုက်ခဲ့ခြင်းဖြစ်ကြောင်း သိရသည်။

ထို့အပြင် ယမန်နေ့ ဇူလိုင်လ ၇ရက် ညပိုင်းကလည်း မုံရွာမြို့တစ်ဖက်ကမ်းရှိ အမှတ်(၂၈) ရဲတပ်ရင်းမှ ယင်းမာပင် အနောက်ခြမ်း နှင့် တောင်ဘက်အခြမ်းသို့ လက်ကြီးများဖြင့် အဆက်မပြတ် ပစ်ခတ်နေသည့်အတွက် ဒေသခံများ နေရပ်စွန့်ခွာ ထွက်ပြေးနေရကြောင်းလည်း ဒေသခံများထံက သိရသည်။

https://youtu.be/8oz8EAuMOeI

စာတည်း။ ။ ဖူးသိမ်ကျ
စာမူတည်းဖြတ်။ ။ အောင်ကျော်ဖြိုး

#စစ်ကိုင်းတိုင်း
#ဆားလင်းကြီးမြို့နယ်
#စစ်ကောင်စီတပ်
#အမြန်ရေယာဉ်
#တိုက်ပွဲဖြစ်ပွား
----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​နွေဦးတော်လှန်ရေးနေ့စဉ် မှတ်စု (၈ ဇူလိုင် ၂၀၂၃) 
=======================

အကြမ်းဖက်စစ်တပ်မှ ထောင်ကျနေသည့် နိုင်ငံရေးအကျဉ်းသားများကို ခေါ်ထုတ်သတ်ဖြတ်မှုများ ခပ်စိတ်စိတ်လုပ်လာပြီး လူ့အခွင့်အရေးနှင့်စစ်ရာဇဝတ်မှုများကို ဆိုးဆိုးရွားရွားချိုးဖောက်နေသည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​အိန္ဒိယ-မြန်မာ-ထိုင်း ၃ နိုင်ငံ အဝေးပြေးလမ်းမကြီး မကြာမီ ပြီးစီးမည်  
========================

အိန္ဒိယ-မြန်မာ- ထိုင်း ၃ နိုင်ငံ အဝေးပြေးလမ်းမကြီးတည်ဆောက်မှုသည် ယခုအခါ ၇၀ ရာခိုင်နှုန်းခန့် ပြီးစီးနေပြီ ဖြစ်ကြောင်း အိန္ဒိယ ကုန်းလမ်းပို့ဆောင်ရေးနှင့် အဝေးပြေးလမ်းများဆိုင်ရာဝန်ကြီး နီတင် ဂတ်ကာရီ က မကြာသေးမီက ထုတ်ပြန်ပြောကြားသည်။ အဆိုပါလမ်းမကြီး ပြီးစီးသည်နှင့် အရှေ့တောင် အာရှ နှင့် ကုန်သွယ်မှုအတွက် အိန္ဒိယ၏ အရှေ့ဘက်နိုင်ငံများနှင့် ဦးစားပေးဆောင်ရွက်ရေးမူဝါဒအတွက် လိုအပ်သော ပံ့ပိုးမှုများ ရရှိလာစေမည် ဖြစ်သည်။

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဘီးလင်းမြို့နယ်တွင် လက်နက်ကြီးကျည်ထိမှန်၍ ကလေးငယ် ၂ ဦးအပါအဝင် ဒေသခံ ၆ ဦး ထိခိုက်ဒဏ်ရာရ
===================

YT
မဇ္ဈိမ။ ။ မွန်ပြည်နယ်၊ ဘီးလင်းမြို့နယ်၊ ရွှေရောင်ပြကျေးရွာအုပ်စုတွင် စစ်ကောင်စီတပ်က ပစ်ခတ်သော လက်နက်ကြီးကျည် ကျရောက်ပေါက်ကွဲမှုကြောင့် ကလေးငယ်နှစ်ဦး အပါအဝင် ဒေသခံခြောက်ဦး ထိခိုက်ဒဏ်ရာရခဲ့ပြီး နေအိမ်သုံးလုံး ထိမှန်ပျက်စီးခဲ့ကြောင်း ကရင်အမျိုးသားအစည်းအရုံး (KNU) ဗဟိုက ယနေ့ ဇူလိုင်လ ၈ ရက်တွင် ထုတ်ပြန်သည်။

"လက်နက်ကြီးကျတာက ရွှေရောင်ပြရွာထဲကိုပေါ့။ ဒဏ်ရာရတဲ့သူတွေက အရမ်းကြီး မပြင်းထန်ကြပေမယ့် လူကြီးတွေလည်းပါတယ်။ ဒီလိုပါပဲ သူတို့ကတော့ အကြောင်းမရှိလည်း ရှာကြံပစ်နေတာကို" ဟု ဘီးလင်းမြို့နယ် ဒေသခံတစ်ဦးက မဇ္ဈိမကိုပြောသည်။
ယမန်နေ့ ဇူလိုင်လ ၇ ရက် နေ့လည်ပိုင်းက သထုံမြို့နယ်၊ ဇီးဝန်းအခြေစိုက် စစ်ကောင်စီ၏ အမတ (၃၁၄) အမြောက်တပ်မှ ပစ်ခတ်လိုက်သည့် လက်နက်ကြီးကျည် သုံးလုံး ဘီးလင်းမြို့နယ်၊ ရွှေရောင်ပြကျေးရွာအတွင်း ကျရောက်ပေါက်ကွဲမှုကြောင့် ဒေသခံများ ထိခိုက်ဒဏ်ရာရခဲ့ခြင်း ဖြစ်သည်ဟု KNU က ထုတ်ပြန်ချက်တွင် ဖော်ပြထားသည်။

လက်နက်ကြီးကျည် ထိမှန်ဒဏ်ရာရသူများမှာ ရွှေရောင်ပြကျေးရွာနေ အသက် ၅၇ နှစ်အရွယ်ရှိ ဒေါ်တင်အေး၊ အသက် ၅၆ နှစ်အရွယ်ရှိ နော်မုလားဖေ၊ အသက် ၂၅ နှစ်အရွယ်ရှိ စောကူ၊ အသက် ၁၈ နှစ်အရွယ်ရှိ နော်မိထူး၊ အသက်ကိုးနှစ်အရွယ်ရှိ နော်သင်္ကြန်ဖော၊ အသက်ငါးနှစ်အရွယ်ရှိ စောစင်မင်းဦးတို့ဖြစ်ပြီး နေအိမ်သုံးလုံးလည်း ထိမှန်ပျက်စီးခဲ့ကြောင်း KNU ဗဟို ထုတ်ပြန်ချက်အရ သိရသည်။

အဆိုပါ လက်နက်ကြီးပစ်ခတ်မှု မတိုင်မီ ဇူလိုင်လ ၇ ရက် နံနက် ၉ နာရီဝန်းကျင်အချိန်က ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ (၁)၊ PDF ပူးပေါင်းတပ်ဖွဲ့က အဆိုပါ အမတ (၃၁၄) တပ်ရင်းသို့ ဒရုန်း၊ လက်နက်ကြီးဖြင့် တိုက်ခိုက်မှုပြုလုပ်ခဲ့ကြောင်း KNLA သတင်းရင်းမြစ်ထံက သိရသည်။

"ဒီဘက်က သွားတိုက်ခဲ့တာရှိတယ်။ ဒရုန်းနဲ့ ဗုံးချခဲ့တာ။ အပျက်အစီးကတော့ မသိရသေးဘူးဗျ။ အဲ့ဒါပြီးတာနဲ့ ၁၀ နာရီကျော်လောက်မှာ ရွှေရောင်ပြဘက်ကို ပစ်တာပဲ။ သူတို့က တော်လှန်ရေးတပ်ဖွဲ့တွေ ရွှေရောင်ပြကနေ သူတို့ကို ပစ်တယ်ဆိုပြီး ပြန်ပစ်တာပေါ့" ဟု တပ်မဟာ (၁) KNLA သတင်းရင်းမြစ်က မဇ္ဈိမကိုပြောသည်။

ဇီးဝန်းအခြေစိုက် အမတ (၃၁၄) မှ စစ်ကောင်စီတပ်ဖွဲ့ဝင်များသည် ဘီးလင်းမြို့နယ်၊ ရွှေရောင်ပြကျေးရွာအုပ်စုအတွင်း လက်နက်ကြီးများဖြင့် မကြာခဏ ပစ်ခတ်လေ့ရှိပြီး ဒေသခံ ထိခိုက်၊ သေဆုံးမှုများ မကြာခဏ ဖြစ်ပေါ်လေ့ရှိကြောင်း ဘီးလင်းမြို့နယ် ဒေသခံထံက သိရသည်။

ပြီးခဲ့သည့် မတ်လ ၂၉ ရက်နေ့ကလည်း အမတ (၃၁၄) မှ ပစ်ခတ်ခဲ့သော ၆၀ မမ လက်နက်ကြီးကျည်ကြောင့် ရွှေရောင်ပြကျေးရွာအုပ်စု၊ တောင်ကလေးကျေးရွာနေ အသက် ၈၀ အရွယ်ရှိ အဖွားအိုတစ်ဦးအပါအဝင် ဒေသခံသုံးဦး ထိခိုက်ဒဏ်ရာရခဲ့သေးသည်။

စာတည်း။ ။ ဖူးသိမ်ကျ

#မွန်ပြည်နယ်
#ဘီးလင်းမြို့နယ်
#စစ်ကောင်စီတပ်
#လက်နက်ကြီးပစ်ခတ်မှု

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

National Unity Government (NUG)၏ PVTV Channel မှ ၂၀၂၃ ခုနှစ် ဇူလိုင်လ ၈ ရက်ထုတ်လွှင့်မှုများ
==================

https://youtu.be/x9cq0ky9bvM

ဇူလိုင်လ (၉) ရက်၊ တနင်္ဂနွေနေ့ မနက်ပိုင်း မဇ္ဈိမရေဒီယိုအစီအစဉ်
=====================

ဒီကနေ့မနက် နားဆင်ရမယ့် အစီစဉ်တွေကတော့ ...

အာဆီယံက မြန်မာနဲ့ တရုတ်အပေါ် ပြင်းပြင်းထန်ထန် တုံ့ပြန်ဖို့ အမေရိကန်နိုင်ငံခြားရေးဝန်ကြီး ဖိအားပေးမယ့်သတင်းနဲ့အတူ

ကရင်နီ စစ်ဘေးရှောင် စခန်းတွေမှာ ဆန် ပြတ်လပ်နေတဲ့သတင်းလွှာ အပါအဝင်

နောက်ဆုံးရ ပြည်တွင်းသတင်းတွေနဲ့ တပတ်အတွင်း နိုင်ငံတကာသတင်းတွေကို နားဆင်ကြရပါမယ်။

အဲဒီနောက်မှာတော့ တပတ်အတွင်း စီးပွားရေးသတင်းတွေကို နားဆင်ကြရမှာပါ။

သတင်းတွေအပြီးမှာတော့သံစဉ့်အိမ်အစီအစဉ်ကို တင်ဆက်ပေးသွားမှာပါ။

https://youtu.be/g_aJWWTqGZg

#Morningradio
#Mizzimaradio
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

ဇူလိုင် ၉ ရက်နေ့ ရုပ်သံသတင်းအစီအစဉ်
================

By ရန်ကုန်ခေတ်သစ်

ဒီကနေ့ ဇူလိုင် ၉ ရက်နေ့မှာ ရန်ကုန်ခေတ်သစ်သတင်းဌာရဲ့ This Week ရုပ်သံအစီအစဉ်ကို ထုတ်လွှင့် သွားမှာဖြစ်ပါတယ်။ဒီအစီအစဉ်မှာ တစ်ပတ်အတွင်း မြန်မာနိုင်ငံမှာ ဖြစ်ပေါ်ခဲ့တဲ့ သတင်းတွေထဲကမှ ထူးခြားတဲ့ သတင်းတွေကို ရွေးချယ်ကောက်နုတ်သုံးသပ် တင်ဆက်ပေးထားတာလည်း ဖြစ်ပါတယ်။

https://youtu.be/wFvRbw7iZUU

-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

အမေရိကန် သမ္မတလောင်းများထဲမှ Bitcoin ကို အားပေးထောက်ခံသူ ၄ ဦး
———————————————————

၂၀၂၄ ခုနှစ်အမေရိကန် သမ္မတ ရွေးကောက်ပွဲဟာ လိုနေသေးသော်လည်း ယခုအချိန်တွင် သမ္မတလောင်းများရဲ့ယှဥ်ပြိုင်မှုများ ဟာ အရှိန်မြှင့်တက်နေပြီဖြစ်ပါတယ်။

အမေရိကန်သမ္မတဟောင်း Donald Trump ဟာလည်း သမ္မတ ရွေးကောက်ပွဲမှာ ပြန်လည်ယှဥ်ပြိုင်ဖို့စည်းရုံးမှုတွေ စတင်နေပြီး ၂၀၂၀ ရွေးကောက်ပွဲမှာသူ့ကို အနိုင်ရရှိသွားတဲ့ Joe Biden ကို ဖယ်ရှားပစ်မယ်လို့ ပြောဆိုနေပါတယ်။

အမေရိကန်နိုင်ငံ တွင် Bitcoin အပေါ်အမြင်အမျိုးမျိုးဖြင့် အငြင်းပွားမှုများ ရှိနေချိန်တွင် စိတ်၀င်စားဖို့ ကောင်းတာ တစ်ခုကတော့ သမ္မတလောင်းတွေထဲက ၄ ယောက်ဟာ Bitcoin ကို ထောက်ခံအားပေးပြီး Bitcoin ဟာ နိုင်ငံတကာလူ့အခွင့်အရေးများ တွင်လည်း ကူညီနေတာကို လက်ခံထားကြသူများဖြစ်ပါတယ်။

ခင်ဦးမြို့နယ် ဆီဆုံလေးကျေးရွာအနီးတွင် စစ်ကောင်စီတပ်ဖွဲ့နှင့် ကာကွယ်ရေးတပ်ဖွဲ့တို့ တိုက်ပွဲဖြစ်ပွား
=================

လွှမ်းမိုး (မဇ္ဈိမ)။ ။စစ်ကိုင်းတိုင်း၊ ခင်ဦးမြို့နယ်၊ ဆီဆုံလေးကျေးရွာအနီးတွင် စစ်ကောင်စီတပ်ဖွဲ့နှင့် ဒေသကာကွယ် ရေးတပ်ဖွဲ့တို့ ဇူလိုင်လ ၈ ရက်နေ့ မွန်းတည့်၁၂ နာရီခန့်က တိုက်ပွဲဖြစ်ပွားခဲ့ကြောင်း MRDA စေတန် တပ်ခွဲထံမှ သိရသည်။

“လက်နက်ကြီး လက်နက်ငယ်တွေကို အဓိကသုံးပြီး တိုက်ခိုက်ခဲ့တာ ဖြစ်ပါတယ်။
ရန်သူဘက်ကလည်း ပြန်လည်ပစ်ခတ်ခဲ့ပြီး ပစ်ပြေး ပြေးပြီး ဆုတ်ခွာသွားကြတာဖြစ်ပါတယ်။ အတွင်းသတင်းအရ ပျူစောထီး လေးဦး လက်နက်ကြီးထိမှန်သေဆုံးခဲ့တယ်လို့ သိရတယ်” ဟု Myanmar’s Royal Dragon Army (MRDA) စေတန်တပ်ခွဲမှ တပ်ခွဲမှူးက ပြောသည်။

ခင်ဦးမြို့နယ်မြောက်ခြမ်းရှိ မဒေါင်းလှကျေးရွာမှ စစ်ကောင်စီတပ်နှင့် ပျူစောထီးပူးပေါင်းအဖွဲ့သည် ဆီဆုံ လေးကျေးရွာမှ စပါးရိတ်သိမ်းစက်များကို အင်အားသုံး၍လာရောက်လုယူစဉ် ဒေသကာကွယ်ရေး တပ်ဖွဲ့ များနှင့် ထိတွေ့တိုက်ပွဲဖြစ်ပွားခဲ့ခြင်းဖြစ်ပြီး အဆိုပါလုယက်မှုကြောင့် စပါးရိတ်စက်တစ်စီး ဆုံးရှုံးလိုက် ရကြောင်း ဒေသခံတပ်ဖွဲ့များထံမှ သိရသည်။

ထိုတိုက်ခိုက်မှုကို MRDA စေတန်တပ်ခွဲ ၊ Royal Tiger နှင့် B.W.G.R.F တပ်ဖွဲ့တို့က ပူးပေါင်းတိုက်ခိုက် ခဲ့ခြင်းဖြစ်ပြီး ဒေသကာကွယ်ရေးတပ်ဖွဲ့များ အထိအခိုက် မရှိခဲ့ကြောင်း သိရသည်။

https://youtu.be/dUASQfDjgUg

စာတည်း။ ။ ဖူးသိမ်ကျ
စာမူတည်းဖြတ်။ ။စောဖေ


#စစ်ကိုင်းတိုင်း
#ခင်ဦးမြို့နယ်
#စစ်ကောင်စီတပ်
#တိုက်ပွဲဖြစ်ပွား

-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

​​ပုလဲမြို့နယ် အင်မထီးပျူရွာမှ နွားကျောင်းထွက်လာသည့် ပျူစောထီးနှင့် စစ်ကောင်စီတပ်ဖွဲ့ တိုက်ခိုက် ခံရ
==================

လွှမ်းမိုး
(မဇ္ဈိမ)။ ။စစ်ကိုင်းတိုင်း၊ ပုလဲမြို့နယ်၊ အင်မထီးပျူရွာမှ နွားကျောင်းထွက်လာသည့် ပျူစောထီးနှင့် စစ်ကောင်စီတပ်သားများကို ဇူလိုင်လ ၈ ရက်နေ့ မွန်းလွဲ ၁ နာရီတွင် ဒေသကာကွယ်ရေးတပ်ဖွဲ့များက အလစ်အငိုက် စောင့်ကြိုတိုက်ခိုက်ခဲ့ကြောင်း သခင်ဒေါင်းညိုတပ်ဖွဲ့ထံမှ သိရပါသည်။

အဆိုပါ ဖြစ်စဉ်တွင် နှစ်ဖက်ပစ်ခတ်မှု မိနစ် ၃၀ ခန့်ရှိခဲ့ပြီး ပျူစောထီးနှင့်စစ်ကောင်စီတပ်ဖွဲ့မှ ထိခိုက် သေဆုံးမှုကို မသိရသေးကြောင်း သခင်ဒေါင်းညိုက ဆိုသည်။

“စစ်ကောင်စီတပ်သားတွေနဲ့ပျူစောထီးအဖွဲ့က ဒေသကာကွယ်ရေးတပ်ဖွဲ့တွေရဲ့ မိုင်းကိုကြောက်လို့ နွား တွေကို ရှေ့ကမောင်းပြီး နယ်ချဲ့လာတာ။ သူတို့ တိုးလို့ရသလောက်တိုးပြီး မိုင်းတွေ ထောင်သွားကြတာ။ ဒါကြောင့် ကျနော်တို့က စောင့်ကြိုပြီးတိုက်ခဲ့တာ။ နွားကျောင်းထွက်လာတဲ့ စစ်သားနဲ့ပျူအင်အား ၃၀ လောက်နဲ့ မိနစ် ၃၀ လောက်ပစ်ခတ်မှု ဖြစ်ခဲ့တယ်။ ရန်သူထိခိုက်မှုအခြေနေကတော့ မသိရသေးဘူးဟု” ၎င်းကဆိုသည်။

အဆိုပါတိုက်ခိုက်မှုကို သခင်ဒေါင်းညိုတပ်ဖွဲ့နှင့် ကျားသစ်နက်ပြောက်ကျားတပ်ဖွဲ့တို့ ပူးပေါင်းတိုက်ခိုက် ခဲ့ခြင်းဖြစ်ပြီး ဒေသကာကွယ်ရေးတပ်ဖွဲ့များဘက်မှ အထိအခိုက်မရှိ ဆုတ်ခွာနိုင်ခဲ့ကြောင်း သိရသည်။

အင်းမထီးပျူစောထီးရွာသည် အနီးဝန်းကျင်ကျေးရွာများဖြစ်သည့် ဦးနှောက်၊ သာယာကုန်း စသည့်ကျေး ရွာများမှ ဒေသခံများ၏ နွားနှင့်လှည်းများကို ရိက္ခာနှင့်သယ်ဆောင်ရန်အတွက် လုယူအသုံးပြုနေကြ ကြောင်း သိရသည်။

စာတည်း။ ။စောဖေ
စာမူတည်းဖြတ်။ ။စောဖေ

#စစ်ကိုင်းတိုင်း
#ပုလဲမြို့နယ်
#အင်းမထီးပျူရွာ
#သခင်ဒေါင်းညိုတပ်ဖွဲ့
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

သီးသန့်ခန်း သို့ ဟိုင်းခန်းက “ ပျော်ပျက် ” ခုံမင်သူများ
=================

ကီရာ
မဇ္ဈိမ။ ။ညဘက်ဖွင့်သည့် Night Club များတွင် ပျော်ပါးလေ့ရှိသူများကြား ရေပန်းစားနေသည့် အရာရှိသည်။ ထိုသည်မှာ “ သီးသန့်ခန်း သို့မဟုတ် ဟိုင်းခန်း’ ဟူ၍ပင်။

ဟိုင်းသည် High မြင့်တက်ခြင်း ၊ ဆေးသုံးပြီးနောက် စိတ်လွတ်လပ်ပေါ့ပါးခြင်း၊ လစ်ခြင်း အစရှိသည့် အဓိပ္ပာယ်များဖြစ်ပြီး လူငယ်များ၏ ဘန်းစကားတစ်ခုအနေဖြင့် ဟိုက်မှ ဟိုင်းအဖြစ် ပြောင်းလဲ ခေါ်ဝေါ်ကြခြင်း ဖြစ်ကြောင်း သိရသည်။

“ လူတွေက အယောက် ၂၀ ကျော်လောက် ရှိတယ်။ လူငယ်တွေချည်းပဲ အသက်က ၁၆ နှစ် ၁၇နှစ်ကနေ ၂၀ ဝန်းကျင်လောက်လေးတွေ။ သုံးယောက်တစ်ဖွဲ့ လေးယောက်တစ်ဖွဲ့ လာကြတာပေါ့ ။ အခန်းအကျယ်က ၁၀ပေ လောက်ပဲ။ အဲ့မှာ စားပွဲဝိုင်းရှိတယ်။ ထိုင်ဖို့အတွက် ဆိုဖာတွေ ချပေးထားတယ်။ အဲ့ခုံတွေရဲ့အလယ်မှာ ဒီဂျေတီးတဲ့ နေရာရှိတယ်။ ဒီဂျေ သမားနှစ်ယောက်က တစ်လှည့်ဆီ တီးပေးတယ်။ အဲကွန်း နှစ်လုံးဖွင့်ပေးထားတယ်”ဟု ရန်ကုန်မြို့တွင်းရှိ ဟိုင်းခန်းတစ်ခုကို မြင်တွေ့ရပုံကို ကိုမင်းမင်း က ယခုလိုပြန်လည် ပြောပြလာခြင်းဖြစ်သည်။

ဟိုင်းခန်းများကို ဟိုတယ်များ၊ ကေတီဗီများတွင် သီးသန့်အခန်းများ ဌားရမ်းလုပ်ဆောင်ကြပြီး ဗဟန်းမြို့နယ်ရှိ Music Buzz KTV တွင်လည်း ဟိုင်းခန်းများ အလွယ်တကူဌားရမ်းနိုင်ကြောင်း သိရသည်။ ဝင်ကြေးမှာ လူတစ်ယောက်လျှင် ကျပ်၁၀,၀၀၀ မှ ကျပ် ၂၅၀၀၀အထိ ရှိသည်။ ပျော်ပျက်ချင်သူများအတွက် ဟိုင်းခန်းများတွင် စိတ်ကြွဆေးဝါးဖြစ်သည့် ‘ E“ နှင့် “K “ အပြင် “Happy Water “ ဟုခေါ်သည့် မူးယစ်ဆေးဝါးကိုလည်း ကို အလွယ်တကူ ဝယ်ယူရရှိနိုင်ရန် ဟိုင်းခန်းစီစဥ်သူများက စီစဥ်ပေးထားသည့်အပြင် သုံးချင်သည့် ဆေးများကိုလည်း ကြိုတင်မှာယူထားနိုင်သည်။
ခေါင်းခါဆေးဟု နာမည်ကြီးသည့် Ecstasy -MDMA (E) ဆေးပြား၊ မေ့ဆေးအဖြစ် အသုံးပြုနိုင်သည့် Ketamine(K) နှင့် ဓာတ်ပေါင်း ခြောက်မျိုးခန့် ပါဝင်သည့် Happy Water တို့မှာ ဟိုင်းခန်းများတွင် အလွယ်တကူရရှိနိုင်သည်။

E တစ်လုံးလျှင် ကျပ် ၅၀,၀၀၀ ဖြင့် ရောင်းချကြပြီး ပထမဆုံး စတင်သုံးစွဲမည့်သူများအနေဖြင့် ဆေးလုံးတစ်လုံး၏ သုံးပုံတစ်ပုံ သောက်ရုံဖြင့် လစ် ( စိတ်တက်ကြွ) နိုင်သည်ဟု မူးယစ်ဆေးရောင်းချသူတစ်ဦးက ပြောသည်။ ထို့အပြင် ကတ်တမင်း Kသည် Snow ၊ Crystal နှင့် Diamond ဟူ၍ အမျိုးအစား သုံးမျိုးရှိပြီး Snowသည် တစ်ထုပ် ကျပ်ငွေ ၃၀,၀၀၀နှင့် Crystalသည် ကျပ်ငွေ ၅၀,၀၀၀နှင့် မှာ ကျပ်ငွေ ၆၀,၀၀၀မှ ၇၅,၀၀၀အထိ စျေးနှုန်းအမျိုးမျိုးရှိကြောင်း သိရသည်။

စာတည်း။ ။အောင်ကျော်ဖြိုး

#Mizzima
#K
#E
#Happy Water
#ဟိုင်းခန်း
#သီးသန့်ခန်း

------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​လိုင်လင်းပီမြို့တိုက်ပွဲအတွင်း စစ်ကောင်စီတပ်သား ၄ ဦး သေဆုံးဟုဆို
===================

ပါခွီး
(မဇ္စျိမ)။ ။ချင်းပြည်နယ်၊ မတူပီမြို့နယ်၊ လိုင်လင်းပီမြို့အတွင်း ထိတွေ့တိုက်ပွဲဖြစ်ပွားခဲ့ရာ စစ်ကောင်စီ တပ်သားလေးဦးသေဆုံးခဲ့ကြောင်း ချင်းလဲန်းကာကွယ်ရေးတပ်ဖွဲ့(မရာ) CDF – Mara က ဇူလိုင်လ ၉ ရက် ယနေ့တွင် ထုတ်ပြန်သည်။

CDF – Mara တပ်ရင်း(၃) ထိန်းချုပ်နယ်မြေဖြစ်သော လိုင်လင်းပီမြို့ပေါ်တွင် ဇူလိုင်လ ၈ ရက်နေ့ မွန်းလွဲ ၂ နာရီ ၂၀ မိနစ်အချိန်တွင် မိနစ် ၃၀ ကြာ တိုက်ပွဲဖြစ်ပွားခဲ့ခြင်းဖြစ်ကြောင်း ဆိုသည်။

လိုင်လင်းပီမြို့ပေါ်တွင် စစ်ကောင်စီတပ်သားများက ပြည်သူများကို ခြိမ်းခြောက်ခြင်း၊ နှောင့်ယှက်ခြင်း၊ မူးယစ်ရမ်းကားပြီး သေနတ်များရမ်းသန်းပစ်ဖောက်သည့်အတွက် ယခုကဲ့သို့ တိုက်ပွဲဖြစ်ပွားရခြင်းဖြစ် ကြောင်း ထုတ်ပြန်ချက်တွင် ဖော်ပြထားသည်။

“တိုက်ပွဲစဖြစ်တာကတော့ မြို့ထဲမှာစဖြစ်ခဲ့တာပါ။ အခုတော့ သူတို့အထိုင်စခန်းကနေ လက်နက်ကြီးနဲ့ ပစ်ခတ်နေပါတယ်” ဟု CDF – Mara ပြောရေးဆိုခွင့်ရှိသူက မဇ္စျိမကို ပြောသည်။

တိုက်ပွဲအတွင်း စစ်ကောင်စီတပ်သား လေးဦးသေဆုံးပြီး ငါးဦးထက်မနည်း ဒဏ်ရာရရှိသွားကြောင်းနှင့် အထိနာသော စစ်ကောင်စီတပ်က မြို့အတွင်း ပြည်သူလူထုနေထိုင်ရာသို့ လက်နက်ကြီးငယ်များဖြင့်ပစ် ခတ်သဖြင့် အသက် ၂၀ အရွယ် အမျိုးသမီးတဦးအသက်ဆုံးရှုံးခဲ့ပြီး နေအိမ်နှစ်လုံးမီးလောင်ပြာကျခဲ့ ကြောင်း ဆိုသည်။
တိုက်ပွဲများဆက်လက်ပြင်းထန်လာနိုင်သောကြောင့် မြို့တွင်းရှိပြည်သူများ သတိဖြင့်သွားလာနေထိုင်ကြ ရန် CDF – Mara က အသိပေးထားသည်။

CDF – Mara တပ်ဖွဲ့သည် ဒေသတွင်းရှိ တိုက်ပွဲများတွင်လည်း ချင်းကာကွယ်ရေးတပ်ဖွဲ့များနှင့် ပူးပေါင်း ၍ စစ်ကောင်စီတပ်ကို ခုခံတိုက်ခိုက်လျက်ရှိကြောင်း သိရသည်။

ယခုဖြစ်ပွားလျက်ရှိသည့်တိုက်ပွဲများနှင့် ရှေ့ဆက်လက်ဖြစ်ပွားနိုင်သောတိုက်ပွဲများအတွက် မိဘပြည်သူ များအနေဖြင့် လိုအပ်လျက်ရှိသော လက်နက်ခဲယမ်းများဖြည့်တင်းပေးကြပါရန် CDF – Mara တာဝန်ရှိသူ က မေတ္တာရပ်ခံပြောကြားသည်။

စာတည်း။ ။စောဖေ
စာမူတည်းဖြတ်။ ။စောဖေ

#ချင်းပြည်နယ်
#လိုင်လင်းပီမြို့
#CDF–Mara
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U

​​YBSယာဉ်လိုင်းများ CNG မရသည့်အတွက် အခက်ကြုံ
=================

မဇ္ဈိမ ။ ။ ရန်ကုန်မြို့တွင်ပြေးဆွဲနေသည့် YBSယာဉ်လိုင်းများ CNG မရသည့်အတွက် အခက်အခဲကြုံတွေ့နေရသည်ဟု ယာဉ်မောင်းများထံက သိရသည်။

‘’ကျွန်တော်တို့တွေ ဂက်စ်ဆိုင်မှာ ကားတန်းစီတာ တစ်ညလုံးနီးပါးပဲ။ မင်္ဂလာဒုံ၊ ပုလဲဂက်စ်ဆိုင်ကနေ တန်းစီလိုက်တဲ့ကားတန်းက အမှတ်(၃)လမ်းဆုံထိ ရောက်တယ်။ပြီးတော့ယာဉ်လိုင်းတွေအားလုံးက တန်းသာစီနေရတာ ဂက်စ်ရမလား၊ မရလားလည်း မသိဘူး"ဟု မင်္ဂလာဒုံမြို့နယ်အတွင်းရှိ YBS ယာဉ်မောင်းတစ်ဦးက ပြောသည်။
ယခုရက်ပိုင်းအတွင်း ရုံးဆင်း၊ရုံးတက်အချိန်များတွင် YBS ယာဉ်လိုင်းများ ဂက်စ်မရသည့် အခြေအနေပြန်လည်ကြုံတွေ့နေရသဖြင့် ယာဉ်လိုင်းများ ယာဉ်အစီးရေ အပြည့်မထွက်နိုင်ကြောင်းလည်း သိရသည်။

‘’အခုကမိုးတွင်းကာလဆိုတော့ အရင်ကလို မီးလည်းသိပ်မပျက်တော့ဘူး။ ဘာကြောင့်ဂက်စ်ဆိုင်တွေမှာ ကားတွေတန်းစီနေရတာလဲဆိုရင်တော့ ဂက်စ်ဝယ်ဖို့ဒေါ်လာမရှိလို့ ပြောကြတယ်။ အမေရိကန်ကနေ စစ်အစိုးရဘဏ်တွေကို ပိတ်လိုက်တော့ ဂက်စ်ဝယ်မရတော့ဘူးလို့ ပြောကြတာပဲ’’ဟု ယာဉ်မောင်းတစ်ဦးက မှတ်ချက်ပြုပြောသည်။

ဇူလိုင်လ ၅ရက်နေ့ကလည်း မင်္ဂလာဒုံမြို့နယ် ၊ ပုလဲ CNG ဂက်စ်ဆိုင်တွင် YBS ၁၁၉ယာဉ်မောင်းနှင့် YBS၂၉ယာဉ်မောင်းတို့ ဂက်စ်ဖြည့်ရန်စောင့်ဆိုင်းနေစဉ် ယာဉ်မောင်းအချင်းချင်း ခိုက်ရန်ဖြစ်ပွား၍ ဓားထိုးမှု ဖြစ်ပွားခဲ့သည်ဟု အဆိုပါ ဂက်စ်ဆိုင်တွင် တန်းစီနေသည့် ယာဉ်မောင်းတစ်ဦးထံက သိရသည်။
"အဲဒီမှာကားသမားအချင်းချင်းငြိပြီး(ခိုက်ရန်ဖြစ်ပွား)ဓါးထိုးမှုဖြစ်ကြတာ ‘’ဟု ၎င်းကပြောသည်။

အဆိုပါ ဖြစ်စဉ်နှင့်ပတ်သက်၍ သေဆုံး၊ ထိခိုက်ဒဏ်ရာရရှိမှု အခြေအနေ အသေးစိတ်ကို မသိရှိရသေး‌ကြောင်း ဆိုသည်။
ပြီးခဲ့သည့်ရက်ပိုင်းက စစ်ကောင်စီလက်အောက်ရှိ မြန်မာနိုင်ငံခြား ကုန်သွယ်မှုဘဏ် (MFTB) နှင့်မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ် (MICB) တို့ကို အမေရိကန်ပြည်ထောင်စု၊ဘဏ္ဍာရေးဌာနက ဒဏ်ခတ်အရေးယူ ပိတ်ဆို့လိုက်ကြောင်း ဇွန်လ ၂၁ ရက်နေ့က ထုတ်ပြန်ခဲ့ပြီးနောက် CNG ဝယ်မရသဖြင့် ဂက်စ်ကားများ အခက်အခဲဖြစ်နေသည်ဟု သိရသည်။
လက်ရှိတွင် ရန်ကုန်တိုင်းအတွင်း၌ CNG သဘာဝဓာတ်ငွေ့ အရောင်းဆိုင်ပေါင်း ၄၂ ဆိုင်ရှိသည်ဟုလည်း သိရသည်။

စာတည်း။ ။ ဖူးသိမ်ကျ
စာမူတည်းဖြတ်။ ။အောင်ကျော်ဖြိုး

#ရန်ကုန်တိုင်း
#မင်္ဂလာဒုံမြို့နယ်
#CNG
------------------------
လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U