‍ 🔻#شاکە_و_خانمەسۊر 🔻
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
یە شوکرانەێ شاکەسە ،هەم زوەقِ خان خەێدەو دەر
ئۊشێ کورە گڵاڵان ، بنووڕ لافاو گرتەو وەر

وەختێ وهار خەیمە دا ،دڵِ شاکەو خانمەسۊر
هە چۊ تیەنی توقیا ، ڕێا داگرت پر لە نۊر

باڵاێ بەرز مانشت کوو ، یا ئاخڵەێ مانگ نوو
لرەێ ئاوِ سیەچڵ ، یاگەر تافەی ئاوِ جوو

زەوق مەسۊر هاوردەو دەنگ ،شاکەی شێعرێ ئەڵوەسی
لەێوا بۊ خان هاودەمی ، پێا کردو دڵ بەسی

لە ساێ بەرزە چناران . یاگەر غەریب لە شاران
وە گووشِ دڵ شنەوین، شێعرەیلِ یەک چۊ جاران

شەماڵ بۊ وە پەێک خان،هەناێ لە قەندهارۊ
پەیکێ هات تا کەنِ کەو ،وەختێ شاکە خەم بارۊ

شەماڵ بوو عەتر بەڕۊ،بوو عەترِ وەن لە کاوان
ڕەسان وە لاێ خان مەسۊر ،هەم دڵِ خان دتاوان

شەماڵ داێەم سەفەر کرد،شێعرەیلێان وەلا برد
بەێنِ شاکەو خان مەسۊر داێەم ڕەد و بەدەڵ کرد

خان لە شارِ قەندهار ، پەیغامێ هات لە گورگین
وەت بۊشن وە شاپەروەر ، ئەگەر کوشیام نەکەی شین

شماڵ بۊش وە شاپەرور،کوشیام فەداێ یارانم
ئێگل لە ناو کەن کەو ، بۊنەو دووسِ جارانم

دۆعا بکەێ وە جاێ خەم،هە چۊ ئەورِ وهاران
باڵەو بگرم تا ئەێوان،هەم شێعر بۊشیم چۊ جاران

یەێ ڕوژ ئەورەیلِ وهار ، یەکەو گرتن ڕا وارین
لەنوو شاکە و خان مەسۊر، گولەیل نوو هەم کارین

خان ئۊشێدن وە شاکە، تنِ دەرِ خەیبەر کەن
یە کام گڕەێ ئاگڕە ،ڕوح و جەسەد خەێگە بەن

ئۊشی برا دڵِ م ، کەفتەو کەمەن درازان
دێرێ ڕا خوەێ گل مەخوەێ،هه لە خوڕان تا بازان

دڵم ها لە قڵاچەێ ، لە ناو٘ سەنگِ مەڕمەڕی
تواێ لەیلێ بۊنێدەو ، یاگەر ڕەنجِ بێ وەری

جواو دەێدن خان مەسۊر، شاکە خوەد و ئەقباڵد
یەێ ڕوژ دۊنی هسارەێ،ڕوژنا خەێ لە ماڵد

شاکە بنوڕ وە دڵد . بزان دڵد چوە دۊنی
بزان دەریاچەێ لە زەڕ ، یاگەر دەریاچەێ خۊنێ

جارێ بازد گل مەخوەێ ، ها ناو بڕێ کورپە دۊەت
دوعا بکە بۊنێدەو ،کورپە دۊەتێ وێنەێ بەت

خان م لە خەو لەیلم دیم .لەیلِ خوەم وە بێ مەیل دیم
لە لێوێ نەیم گوڵ خەنەێ، خەمِ فرەێ وە لەیل دیم

ترسم بازِ خێاڵات ،لەنوو ئڕام خەم بارێ
لەنوو بیلِ کەنِ کەو ، یاگەر تووز و تەم بارێ

شاکە ئۊشێ خان مەسۊ ، جارێ بەختم ها لە خەو
دەعام یەسە دۊاێ ت، ساتێ نەۊنم خوەم وە چەو

ئەمان دۊاێ خان مەسۊر ،شاکە مەن و بیل کەو
بازِ شـــــــکارِ بەختێ ، مەرگِ مەسۊر گرتەو چەو

شاگە چرێ ئەو مانشت ، مانشت مەگەر نیەزانی
ئەێوان گشتێ خەم بارە،ت بێ خەوەر لە خانی

مەرگ خان لە وهارۊ.ئەێوان بۊگە گوڵ زارێ
شاکە چڕێ ئەو وهار ، دی گوڵ نەکەێ هۊچ دارێ

✍ #ڕەحێم_ئێداری

#سلام_بر_زرنه
🔻🔛🔻
@salam_bar_zarneh

‍ ‍ مانشت لەو بانەو ،بێستۊن دۊنی
بۊ وەێ قامەتو، ئڕا بی سۊنی

بۊ داخ فەرهاێ،دەرۊند سزان
یا ئاخ شیرین ،لەشت ئەڵکزان

بۊ لەو زەمانەو،چەن وهار دیدە
وە ئەێ خەزانەو ، هێمان مەنیدە

ئە فەرهاد تر ، لەنو پێا بو
رەنجێ سەمەر بەێ، دی دلنێا بو

شێرین شێوەی تر ،ڕەنگ سۊر بۊنێ
لە ناو زەخمەیلد،وەرشەی نۊر بۊنێ

مە ئەو هناسە ،تووز و تەم بوەێ
لە قلاێ دڵد ،شوون خەم بوەێ

بۊ خو منیش هەم ، خەم وە کووڵ بۊمە
بادەز خان مەسۊ، خوەم وە چووڵ دیمە

ها یادت شاکە ، چۊ هاوار کەردەن
"(مانشت نیەزانی ، خانمەسۊر مەردەن)"

تنو بێ ستۊن کەڵهۆڕ نشینین
ڕیشگ لە دونیاێ پڕ لە نۊر دیرین

بۊش وە بێ ستون م هاو خۊندم
تەک دەمە لیدەو هە خوەم سۊندم


✍🍁 #ڕەحێم_ئێداری🍁

⁃⁃🖍
@salam_bar_zarneh◍