“Bolalar farovonligiga investitsiya: kelajak avlodlarning barqaror va adolatli taraqqiyoti sari yo‘l” butunjahon sammiti ishtirokchilariga

Prezident Shavkat Mirziyoyev “Bolalar farovonligiga investitsiya: kelajak avlodlarning barqaror va adolatli taraqqiyoti sari yo‘l” butunjahon sammiti ishtirokchilariga tabrik yo‘lladi

Davlatimiz rahbari murojaatida har bir bola mehr, xavfsizlik, sifatli ta’lim va zarur tibbiy yordam olish huquqiga ega ekanini ta’kidlab, bolalik davriga yo‘naltirilgan investitsiyalar mamlakatning uzoq muddatli taraqqiyoti uchun mustahkam asos bo‘lishini qayd etdi.

Murojaatda O‘zbekistonda ona va bola salomatligini muhofaza qilish, maktabgacha ta’lim imkoniyatlarini kengaytirish, inklyuziv ta’limni rivojlantirish hamda bolalarni zo‘ravonlik va ekspluatatsiyadan himoya qilish borasida amalga oshirilayotgan ishlar va erishilgan natijalar qayd etildi.

Shuningdek, Prezident bolalarning ilk rivojlanish davridan boshlab uzluksiz qo‘llab-quvvatlash, og‘ir kasalliklarni erta aniqlash va davolash, xavfsiz ta’lim va raqamli muhitni yaratish, bolalarning fikrini eshitish hamda xalqaro hamkorlikni kuchaytirish muhimligini ta’kidladi.

Prezident Samarqand platformasini bolalar farovonligini ta’minlashga qaratilgan samarali tajribalarni almashish, qo‘shma loyihalarni ishlab chiqish va ularning natijalarini muhokama qilishga xizmat qiluvchi amaliy muloqot mexanizmi sifatida rivojlantirish taklifini ilgari surdi.

“Farovonlik yo‘lidagi taraqqiyot har bir bolaning hayotida sezilganida umumiy yutug‘imizga aylanadi”, deb ta’kidladi Prezident.

Murojaatda bolalarning xavfsiz o‘sishi, o‘z qobiliyatini ro‘yobga chiqarishi va kelajagini qurishi uchun zarur sharoit yaratish davlatlar va xalqaro hamjamiyatning umumiy mas’uliyati ekani alohida qayd etildi.

#Prezident_tabrigi #Butunjahon_sammiti

Facebook | Instagram | YouTube | Telegram