Гісторыі ў суполках і яшчэ 8 магчымасцей

Telegram выводзіць камунікацыю ў суполках на новы ўзровень — з 9 новымі магчымасцямі. Цяпер суполкі могуць размяшчаць гісторыі і захоўваць іх як допісы на сваёй старонцы профілю. Можна прызначаць унікальныя фоны і статусы, а таксама наладжваць выгляд да дробных дэталей, напрыклад, колер і іконку вокладкі профілю, і стыль спасылак. Усе гэтыя магчымасці ўжо даступныя і могуць быць адкрытыя праз падтрымку удзельнікаў. Суполкі з высокім узроўнем падтрымкі таксама адкрываюць сваім удзельнікам доступ да расшыфроўкі галасавых і відэапаведамленняў, і карыстальніцкіх эмодзі.

Падтрымка ў суполках

Суполкі цяпер могуць атрымліваць узроўні праз падтрымку, атрыманую ад удзельнікаў або розыгрышаў. У дадатак да гісторый у суполках і налад выгляду, вышэйшыя ўзроўні адкрываюць магчымасці Premium — такія як расшыфроўка галасавых і відэапаведамленняў, і карыстальніцкія эмодзі — усім, хто піша ў гэтай суполцы.

Гісторыі ў суполках

Адкрываецца цэлы новы спосаб камунікацыі ў суполках, калі кіраўнікі могуць размяшчаць гісторыі. Адказы ад удзельнікаў будуць адпраўляцца напрамую ў суполку — каб абмяркоўваць усім разам.

Каб размясціць гісторыю ад імя суполкі, націсніце іконку гісторыі (+) ў профілі суполкі або выберыце суполку у раздзеле 'Стварыць гісторыю як…' рэдактара гісторый.

Налады выгляду суполкі

Заручыўшыся падтрымкай удзельнікаў, кіраўнікі суполкі атрымаюць доступ да унікальных налад выгляду, якія ёсць толькі ў Telegram. Можаце змяніць колер і іконку на вокладцы профілю вашай суполкі, задаць эмодзі-статус, і выбраць фон, які будзе бачыць кожны, хто адкрые суполку.

Эмодзі-статус для суполкі можна выбіраць з тысяч эмодзі, зробленых мастакамі Telegram — і так побач з назвай з’явіцца што заўгодна, ад анімаванага геймпада да загадкавага баклажана.

Каб наладзіць выгляд вашай суполкі, адкрыйце яе профіль і выберыце Рэд. > Выгляд. Узровень суполкі вызначае даступнасць пэўных налад выгляду.

Наборы эмодзі ў суполках

На вышэйшых узроўнях суполкі змогуць адкрыць некаторыя з магчымасцей Telegram Premium.

Напрыклад, кіраўнікі могуць выбраць адзін набор карыстальніцкіх эмодзі, і ўнутры суполкі ім змогуць карыстацца усе ўдзельнікі, нават тыя, хто не мае падпіскі на Telegram Premium.

Можаце выбраць набор, зроблены мастакамі Telegram, або стварыць уласны набор толькі для вашай суполкі.

Расшыфроўка голасу і шмат чаго яшчэ

Удзельнікі суполак з высокім узроўнем падтрымкі атрымліваюць доступ да неабмежаванай расшыфроўкі галасавых і відэапаведамленняў, адпраўленых у суполцы.

І гэта толькі пачатак – сачыце за будучымі абнаўленнямі, якія зробяць суполкі яшчэ больш магутнымі.

Спіс усіх магчымасцей, якія суполкі атрымліваюць з кожным узроўнем падтрымкі, даступны тут.

Дазволы для фундатараў

Паведамленні ад карыстальнікаў, якія падтрымалі суполку, будуць мець спецыяльны значок падтрымкі. Кіраўнікі могуць задаць асобныя паўнамоцтвы для фундатараў, даючы ім прывілеі накшталт ігнаравання павольнага рэжыму або іншых абмежаванняў.

Падпіска на Telegram Premium адразу дае 4 «маланкі», якія можна размеркаваць на любую суполку або канал — і вы атрымаеце дадатковыя 3 кожны раз, калі дорыце камусьці Premium.

Мы планавалі дадаць яшчэ 5 новых магчымасцей з гэтым абнаўленнем, але Богі Крам Праграм былі не на нашым баку. Але і ладна — вы ўбачыце іх вельмі хутка ў нашым сакавіцкім абнаўленні!

29 лютага, 2024
Каманда Telegram