Berkitilgan media, qurilma xotirasini maksimal tejash, yangi chizish vositalari, kontaktlaringiz uchun profil rasmlari va boshqalar

2022-yilni sogʻinadiganlar kam boʻladi, lekin biz u nima bilandir esda qolarli boʻlishi uchun harakat qildik: sizni berkitilgan media, qurilmada joy tejashning qoʻshimcha usullari, rasm muharriri uchun yangi vositalar, kontaktlaringizga profil rasmlarini taklif qilish imkoniyati va boshqa koʻplab funksiyalar kutmoqda.

Berkitilgan media

Telegram xabarlarda istalgan matnni berkitish uchun maxsus formatlashni qoʻllab-quvvatlaydi. Endi siz rasmlar va videolarni tasvirni xiralashtiradigan yorqin qatlam bilan qoplashingiz mumkin. Oluvchilar sehrni buzish va kontentni koʻrish uchun bir marta bosishi kerak.

Biriktirmalar menyusida bitta yoki bir nechta elementni tanlang, yoki belgisini bosing va “Spoyler bilan berkitish” bandini tanlang.

Qurilma xotirasini maksimal tejash

Telegram ishlashi uchun xotirada deyarli joy talab qilinmaydi. Telefoningiz xotirasidan media va hujjatlarni olib tashlashingiz va istalgan paytda Telegram bulutingizdan qayta yuklab olishingiz mumkin. Foydalanuvchilar bir necha yildan buyon keshning maksimal hajmini belgilash va muayyan vaqt davomida ochilmagan fayllarni avtomatik olib tashlash imkoniyatidan foydalanib kelmoqda.

Bu yangilanishda foydalanuvchilarda qurilma xotirasi muayyan chat turkumlari – shaxsiy xabarlar, guruhlar va kanallardan ortiqcha materiallar qanchalik tez-tez avtomatik tozalanishini tanlash, shuningdek, alohida chatlar uchun istisno qoʻshish imkoniyati paydo boʻldi.

“Xotiradan foydalanish” menyusidagi yangi doiraviy diagrammalar qurilmada nima joy olayotganini darhol tushunish, Media, Fayllar va Musiqa ruknlari esa eng katta fayllarni tezda oʻchirish imkonini beradi.

iOS uchun ilovada keshingiz hajmini hisoblash uchun ketadigan vaqtni ancha qisqartirdik. Android foydalanuvchilar omadli – ularning ilovasi buni allaqachon yuqori tezlikda bajarmoqda.

Yangi funksiyalar bilan Sozlamalar > Maʼlumotlar va xotira > Xotiradan foydalanish ruknida tanishing.

Yangi chizish va matn vositalari

Telegramning allaqachon kuchli media muharriri dizayni toʻliq yangilandi. Chizish vositalari chizish tezligiga asosan enini dinamik ravishda oʻzgartiradi va chiziqlaringizni avtomatik ravonlashtiradi.

Keraksiz maʼlumotlarni berkitishga yordam beradigan yangi xiralashtiradigan choʻtka qoʻshildi. Endi choʻtka rangini beshta turli usullardan biri, jumladan, rasmdagi rangni aniqlash vositasi yordamida yuqori aniqlikda belgilash mumkin.

Rasmlar va videolarga matn qoʻshish uchun yangilangan vosita yozuvning oʻlchami, shrifti va fonini oʻzgartirish imkonini beradi. Barcha foydalanuvchilar matn bloklariga maxsus animatsiyali toʻplamlardagi emojilarni qoʻshishi mumkin boʻladi – hatto Telegram Premium obunasisiz ham.

Toʻrtburchaklar, aylanalar, strelkalar, yulduzlar va chat pufakchalari kabi shakllarni tezda qoʻshish uchun “+” tugmasini bosing. Kanvasni rang bilan toʻldirish yoki hamma narsani tozalash uchun yuzani bosib turishingiz ham mumkin.

Keyingi yangilanishlarda biz rasm muharriri interfeysini yaxshilash va uning unumdorligi oshirishni davom ettirishni rejalashtirmoqdamiz.

Kontaktlaringiz uchun profil rasmlari

Kontaktlaringizni tahrirlayotganingizda ular uchun profil rasmini tanlashingiz mumkin – buni uning profil rasmida faqat siz koʻrasiz.

Agar kontaktingiz uchun yaxshi profil rasmi boʻlsa, buni unga taklif qilishingiz mumkin. U rasmni profiliga qoʻshishi uchun ikki marta bosishi kifoya.

Kontaktning profilini oching > Tahrirlash bandini bosing, keyin “… uchun rasm belgilash” yoki “… uchun rasm taklif qilish” bandini tanlang.

Ommaviy profil rasmlari

Agar faqat muayyan foydalanuvchilar profil rasmingizni koʻrishiga ruxsat bersangiz, qolgan barcha uchun ommaviy rasm belgilashingiz mumkin.

Bu yangilanish maksimal profil rasmi maxfiyligiga erishishingizga ham imkon beradi: koʻrinuvchanlikni “Hech kim” qilib belgilashingiz hamda ayrim foydalanuvchilar yoki guruhlarni istisno sifatida qoʻshishingiz mumkin.

Bu sozlamalarni Sozlamalar > Maxfiylik va xavfsizlik > Profil rasmi ruknida topish mumkin.

Guruh aʼzolarini berkitish

Spamga qarshi kuchaytirilgan himoya sozlamasi kabi vositalar chat adminlariga katta guruhlarni tozalashda yordam beradi, lekin ayrim guruhlar aʼzolarini istalmagan shaxsiy xabarlardan himoyalashni xohlashi ham mumkin.

100 dan ortiq aʼzoli guruhlar adminlari endi aʼzolar roʻyxatini berkitishni tanlashi mumkin. Shu tarzda, agar odamlar guruhga xabar yubormasa, faqat uning adminlari ular guruhda borligini biladi.

Android uchun ilovada jarayon animatsiyalari

Chatdagi xabarlar soni koʻpligi sababli ancha yuqorida joylashgan javobga oʻtishda, shuningdek, ilovadagi ayrim boshqa boʻlimlarga ravon animatsiyalar qoʻshildi.

Yangi animatsiyali emojilar

Premium foydalanuvchilar Telegram rassomlaridan hadya sifatida maxsus animatsiyali emojilarning 10 ta yangi toʻplamiga ega boʻladi.

Bu va boshqa toʻplamlarni stikerlar panelining emojilar sahifasida toping.

Yana boshqa interaktiv emojilar

Biz interaktiv emojilar olamimizni kengaytirishda davom etmoqdamiz. Suhbatdoshingiz bilan sinxron ravishda butun ekran effektlarini tomosha qilish uchun istalgan yakkama-yakka chatda bitta emojisini yuboring va keyin uning ustiga bosing.

Barcha ushbu emojilardan endi reaksiyalar sifatida foydalanish ham mumkin, ayniqsa, Moai yuzi 2022-yil bilan xayrlashishga mos keladi.

Istalgan kattalikdagi guruhlar uchun mavzular

Mavzulardan endi aʼzolar sonidan qatʼi nazar barcha guruhlar foydalanishi mumkin. Bu barchaga muhokamalarni tartiblashning yangi usulini taqdim etadi.

Bugun uchun barcha yangiliklar shular. Biz dekabrda yana bitta yangilanish chiqarmoqchi edik, lekin oy oxirigacha dam olishga qaror qildik.

2022-yil, 30-dekabr
Telegram jamoasi