Salomlashuv xabarlari, xabarlardagi tugmalar va imzolangan hadyalar

Asl eʼlonni ingliz tilida oʻqish

Salomlashuv xabarlari, xabarlardagi tugmalar va imzolangan hadyalar

Telegram endi 13 yoshda, lekin bu har oylik yangilanishlarni toʻxtatishga sabab boʻla olmaydi:

Salomlashuv xabarlari: chat egalari faqat yangi aʼzolarga koʻrinadigan xabarlar yubora oladi.
- Guruh yoki kanalingizda maxsus salomlashuv xabarlarini yarating.
- Salomlashuv xabarini faqat yangi aʼzolar koʻradi.
- Media biriktiring yoki bir vaqtda bir nechta xabar yuboring.
- Matn muharriri orqali boy formatlash qoʻshing.

Xabarlardagi tugmalar: dasturchilar istalgan matnni interfaol qila oladi.
- Guruh va kanallarda tugmalarni matn ichiga joylashtiring.
- Vaqtinchalik xabarlar bilan avtomatlashtirilgan oqimlar yarating.
- Soʻrovnomalar yuboring, oʻyinlar uyushtiring yoki viktorinalar tuzing.

Xabarlardagi ichki hujjatlar: istalgan odam fayllarni matn bloklari ichiga joylashtira oladi.
- Hujjatlar, fayllar va musiqani matningiz yoniga kiriting.
- Ichki fayllarni ikki marta bosib biriktiring.

Imzolangan hadyalar: Telegram Marketpleys orqali hadya yuborishda fikr qoʻshing.

Salomlashuv xabarlari

Guruhlar va kanallar endi yangi aʼzolarga boshqalar uchun chatni toʻldirib yubormasdan qoʻshimcha axborotlar berish uchun salomlashuv xabarlarini qoʻllab-quvvatlaydi. Foydalanuvchi qoʻshilganida xabarni faqat oʻzi koʻra oladi.

Salomlashuv toʻplamiga bir nechta xabar va media qoʻshish mumkin. Boy formatlash ham bu yerda ishlaydi – jumladan, jadvallar, ichki media va yangi aʼzolarni choʻchitishning boshqa sirli usullari.

Salomlashuv xabarini qanday qoʻshish mumkin?

Oson! Hech qanday bot yoki sehr-jodu kerak emas. Guruh yoki kanalingizga salomlashuv xabarini qoʻshish uchun uning profilini oching va Tahrirlash > Salomlashuv xabari bandini tanlang va bir nechta xabar yuboring:

Xabarlar ichidagi tugmalar

11 yil avval Telegram botlari oddiy chat ichida istalgan ilovani yaratish imkonini berdi. Bugundan boshlab bitta xabar ichiga sigʻadigan ilovalar yarata olasiz. (Koinotni stikerga sigʻdirmasimizdan oldin bizni toʻxtating.)

Dasturchilar endi bir nechta tugmani bevosita xabar ichiga joylashtira oladi. Vaqtinchalik xabarlar bilan birgalikda bu soʻrovnomalar, oʻyinlar va munajjimlar bashoratidan tortib mahsulotlarni koʻrish va buyurtma qilishgacha boʻlgan har qanday narsa uchun oqimlar yaratish imkonini beradi.

Bunday xabarlarni istalgan joyda, jumladan, istalgan sondagi foydalanuvchi ular bilan ishlay oladigan guruh yoki kanallarda eʼlon qilish mumkin – masalan, bir vaqtning oʻzida alohida oʻyinlarda shaxmat oʻynash uchun.

Hatto ulardan aʼzolarga Qanday turdagi panda ekanini bilib olishlariga yoki guruhingizning Foydalanish shartlaridagi chalgʻituvchi usullarni bosib oʻtishlariga yordam beradigan salomlashuv xabarlari sifatida ham foydalanishingiz mumkin.

Xabarlar ichiga avtomatlashtirilgan oqimlarni qanday qoʻshish mumkin?

Bu yerda ham hech qanday sehr-jodu kerak emas, lekin biroz kod yozishga toʻgʻri keladi. Bu vayb-koding zamonasida buni hech kim qoʻrqinchli deb bilmasa kerak, shundaymi?

Dasturchilar uchun batafsil axborot shu yerda mavjud.

Xabarlardagi ichki hujjatlar

Boy matn muharriri endi koʻproq turdagi ichki mediani qoʻllab-quvvatlaydi, shuning uchun matningizning istalgan joyiga hujjatlar, fayllar va musiqa kirita olasiz. Chunki hech narsa har bir soʻzdan keyin kelgan Excel jadvali kabi “Seni sevaman” deya olmaydi.

Matn muharririni ochish uchun kiritish maydoniga 3 qatordan koʻproq matn kiritgandan keyin paydo boʻladigan ⛶ belgisini bosing.

Qoʻllab-quvvatlanmaydigan fayllar uchun yangi format

Afsuski, hatto rivojlangan jamiyatlarda ham ilovalarning avtomatik yangilanishi faolsizlantirilgan odamlar uchraydi. Aynan ular uchun dizaynerlarimiz chiroyli oʻrinbosar yaratdi: agar ilova eskirgan boʻlsa va xabarni koʻrsata olmasa, u xabar oʻrnida paydo boʻladi. Oʻrinbosarga oxirgi yangilanishni bir zumda yuklab olish uchun tugma ilova qilingan.

Ilovaning eskirgan versiyasi haqidagi yangi oʻrinbosardan zavqlanish uchun oxirgi versiyaga yangilang va biz yangi biror narsa qoʻshishimizni kuting.

Android'da avtomatik yangilanishni yoqish uchun Play Marketni oching va Sozlamalar > Tarmoqqa ulanish sozlamalari > Ilovalarni avtomatik yangilash rukniga kiring. iOS'da Sozlamalar > Ilovalar > App Store rukniga kiring va “Ilova yangilanishlari” bandini yoqing.

Marketpleysdan imzolangan hadyalar

Telegram Yulduzlar yordamida xavfsiz va qulay hadyalar marketpleysimizda boshqa foydalanuvchilardan minglab noyob hadyalarni sotib olishingiz mumkin. Endi u yerdan sotib olgan hadyalaringizga oʻz imzo va fikringizni ham qoʻsha olasiz.

Chunki hech narsa haqiqatan ham “Seni sevaman!” deydigan, avval ham sevilgan Plush Pepe kabi “Seni sevaman” deya olmaydi.

Imzolangan hadyani qanday yuborish mumkin?

Telegram Marketpleysdan hadya yuborish uchun istalgan foydalanuvchi profilini oching va ⋮ / ⋯ > “Hadya yuborish” bandini bosing, keyin noyob yuksaltirilgan hadyalarni sotib olish uchun “Kolleksion hadyalar” filtrini tanlang.

Telegram 13 yoshda

Telegram endigina 13 ga kirdi! U hali ham avtomobil hayday olmaydi va ovoz bera olmaydi (kimdir qarab turganda), lekin hech boʻlmaganda ijtimoiy tarmoqlardagi hisoblarimiz nihoyat kulrang zonadan chiqdi yoki ularni 8 yoshli bolalar boshqarmaganida shunday boʻlardi.

Oʻtgan yili biz 55 tadan ortiq funksiyani oʻz ichiga olgan 12 ta yirik yangilanish chiqargan edik – mana, eng sevimlilarimizdan baʼzilari: