17 የምግብ ዘይት ምርት አይነቶች መሠረታዊ ችግር ስላለባቸው ኅብረተሰቡ እንዳይጠቀማቸው ማሳሰቢያ ተሰጠ፡፡

የኢትዮጵያ የምግብና መድኃኒት ቁጥጥር ባለስልጣን በአዲስ አበባ እና በሌሎች አካባቢዎች ባደረገው የገበያ ጥናት በ17 የምግብ ዘይት ምርቶች ላይ መሠረታዊ ችግር ስላለባቸው ኅብረተሰቡ እንዳይጠቀማቸው አሳስቧል፡፡

ባለስልጣን መስሪያ ቤቱ ባደረገው የገበያ ጥናት የዘይት ምርቶቹ የሚመረቱበት ቦታና የተመረተበት ሀገር፣ የምርት መለያ ቁጥር፣ የአምራች አድራሻ የሌላቸው፣ የገላጭ ጽሁፍ ችግር ያለባቸው መሆንና ለጤና ጠቀሜታ እንዳለው ተደርጎ የተቀመጡ መሆን፣ የመጠቀሚያ ጊዜና ማብቂያ ቀን የሌላቸው እንደሆኑ አስታውቋል። የሀገሪቱን የደረጃ ምልክት ያልለጠፉና ደረጃውንም የማያሟሉ መሆናቸው በተደረገው ጥናት መረጋገጥ መቻሉን ባለሥልጣን መስሪያ ቤቱ አስታውቋል፡፡

እነዚህም የምግብ ዘይት ምርቶች፦ ሉሉ ዘይት፣ አርሲ ዘይት፣ አሃዱ ዘይት፣ ድሬ ንጹህ የምግብ ዘይት፣ አሚን ንጹህ የምግብ ዘይት፣ ሮያል የምግብ ዘይት፣ ዳግም የተጣራ የኑግ ዘይት፣ ጄጃን የምግብ ዘይት፣ ውብ የተጣራ የኑግ ዘይት፣ ለማ የኑግ ዘይት፣ ኑድ ንጹህ የምግብ ዘይት፣ ገበታ የምግብ ዘይት፣ ዘመን ዘይት፣ አጋር ዘይት፣ አናጅ ዘይት፣ ሳባ ዘይት እና ጃሎ ዘይት ናቸው።

የተጠቀሱትን ምረቶች ኅብረተሰቡ እንዳይጠቀማቸው በጥብቅ አሳስቧል።