‍ #کەنگیر

کەنگیر هۆمێدِ، کوردە ماڵانی
چۊ داڵگ ئڕا ، خوردە ساڵانی

ساڵەیل دۊرێ،ت وە چەو دیدە
خەم خوەرئاواێ، کەن کەو دیدە

قیقەێ نازاران، وە جەمەو دیدە
گاجار عەڤداڵان، وە خەمەو دیدە

حەرەم سەراێ خان، هەم وە چووڵ دیدە
ناڵەێ شاپەروەر، خەم وە کووڵ دیدە

دەوران قەدیم، دایەم خوەشدۊ
سراوەێ مانشت، گەورا بەشدۊ

وەهاران گۆڵەیل، دانەێ لە چۊزە
بردن نازارەیل، ئاود وە کۊزە

دەرۊن دڵد ،چۊ قڵاێ سیەس
قڵاێ دڵدیش، خو تڵاێ سیەس

چۊ سەدەف نگین ، لە دەرۊ دێری
ت میلکانێگی، هزار سۊن دێری

ئەێ پاێەێ پۆڵە ، ها لە سانیری
وە پیمان ئۊشێ ، ئڕا دڵگیری

هێمان دڵ نەناس ، وساس وە پاوا
تواێ هەم بەێدن ،لەشێ وە ئاوا

بۊ چوە کورەو کرد، ئەو سراودە
ئەو ترنگەێ ئاوێ، چۊ لاولاودە

هەناێ لەتر دای ، ئاود کیشاو بان
دەسِ پاچە کەفت ، تەنگەێ شمێران

ناڵەێ دەرۊند ، وڵات ڕەسانەو
گاجار سینگ نای ، وە قڵاێ خانەو

ئەلان پڕخۊنە ، دڵِ شمێران
ڕا کاڵێ تن و ، چووڵی قڵاێ خان

ئۊشێ واز بکە ،چەوەیل کەود
داێەم ها فکرِ، ڕوژەیل خەود

ئاو ت خوڕەێ، ئەسر مانشتە
ناو ت ماناێ ،فەسڵ بارشتە

ترنگەێ ئاود باێ، چۊ جارجاران
وڵنگەێ سازد باێ، وە ناز واران

چۊ میلکان خوەد، دڵمان چووڵە
وەختێ دۊنیمن ،ئەێ هەوش هووڵە

✍🍁 #ڕەحیم_ئێداری🍁

#سلام_بر_زرنه
🔻🔛🔻
@salam_bar_zarneh