Telegram Business

Бүгіннен бастап кез келген адам өзінің Telegram тіркелгісін бизнес тіркелгіге айналдыра алады және бизнес мүмкіндіктеріне қол жеткізе алады: жұмыс уақыты, мекенжайы, жылдам жауап, желіден тыс кезде жіберілетін хат, жеке бастау беті, чатбот қолдауы және т.б.

Telegram Business

Telegram бұрыннан бері әзірлеушілерге бизнеске кеңінен қолданылатын күшті боттар мен шағын қолданбалар жасауға мүмкіндік беріп келеді.

Бүгіннен бастап кез келген қолданушы ешқандай бағдарламалау дағдыларынсыз бизнес мүмкіндіктерін оңай қолдана алады.

Жұмыс уақыты және мекенжайы

Бизнес тіркелгі өзінің жұмыс уақытын көрсете алады және картада мекенжайын белгілей алады.

Бұл арқылы қолданушылар сізді қайдан табуға болатынын біледі және бірден ашықсыз ба, жоқ па екенін көре алады.

Бастау беті

Бизнес тіркелгі жаңа чат үшін өзінің бастау бетін баптай алады, адамдар сөйлесуді бастамас бұрын қандай мәтін және стикер көретінін таңдайды.

Бұл сізге өнім мен қызмет жайлы ақпарды көрсетуге немесе клиентті брендтік суретпен қарсы алуға мүмкіндік береді.

Жылдам жауап

Telegram Business сізге жылдам жауап жасауға мүмкіндік береді. Жылдам жауап – алдын ала дайындалған хаттарды жіберуге арналған қысқа мәтіндер. Олар бірнеше хаттан тұруы мүмкін және мәтін пішімдеуін, сілтемені, стикерді, медианы және файлды қолдайды.

Бұл клиенттерге жиі қажет ақпаратты тез жіберуге көмектеседі. Мысалы: сабақ кестесін немесе мәзірі бар PDF файлын.

Хат енгізу өрісінде / жазғанда барлық жылдам жауабыңыз көрсетілетін тақта ашылады, оларды бір басумен жіберуге немесе өңдеуге болады. Бұл тек жеке чатта жұмыс істейді, топта істемеді.

Сәлемдесу хаты

Көбірек автоматтандыру үшін сізге алғаш рет хабарласқан қолданушыларға жіберілетін сәлемдесу хатын орната аласыз. Бұл олардың бірден маңызды ақпарат немесе жай ғана достық сәлем алатынын қамтамасыз етеді.

Сәлемдесу хатына жиі қойылатын сұрақтарға жауаптар немесе бизнесіңіз жайлы қосымша мәліметтерді қосуға болады.

Белгілі бір уақыт кезеңін белгілей аласыз, жаңа хат келгенде сәлемдесу қайтадан жіберіледі.

Желіден тыс хаты

Сіз сондай-ақ бизнесіңіз жабық болғанда немесе демалыста жүргенде жіберілетін желіден тыс хатын орната аласыз.

Бұл адамдарға сізден жауапты қашан күтуге болатынын білуге мүмкіндік береді.

Достарға, туыстарға немесе қызметкерлерге бизнес хаттарын жібермеу үшін кез келген автоматтандырылған хаттарды белгілі бір чаттарды немесе тұтас чат санаттарын қоспауға шектеуге болады.

Чатты белгілеу

Telegram Business немесе Premium арқылы сіз чаттарға түрлі түсті белгілерді қоса аласыз, оларды чат бумаларына байланысты ерекше тегтермен белгілей аласыз.

Бұл сізге чат тізіміндегі клиенттерді олардың мәртебесі, қажеттілігі немесе басымдық деңгейіне қарай тез ажыратуға көмектеседі.

Барлық Telegram қолданушысы өз чаттары үшін арнайы чат бумасын жасай алады. Жұмыс, оқу, жаңалық және т.б. үшін бөлек қойындылар қоса алады.

Чат сілтемесі

Клиенттердің сізге хабарласуын одан да жеңілдету үшін чатқа сілтеме жасай аласыз. Мысалы: тапсырыс беру немесе тапсырысты қадағалау батырмасы. Басқанда сілтеме бірден сізбен чат ашады және қолданушыға ұсынылған хатты жазып қояды.

Сілтемені Telegram ішінде де, одан тыс жерде де қолдана аласыз. Мысалы: сайттағы сілтемеден бастап, мейрамхана мәзіріндегі QR кодқа дейін.

Әрбір сілтеме қанша рет басылғанын көрсетеді, сондықтан сіз оның тиімділігін бақылай аласыз.

Бизнеске арналған чатбот

Бизнес қолданушылары хаттарды өз атынан өңдеп, жауап беретін Telegram боттарын қоса алады. Бұл бизнеске бар құралдар мен жұмыс үдерістерін біріктіруге немесе чаттарды басқаратын ЖИ көмекшілерін қосуға мүмкіндік береді.

Чатбот қосқанда боттың қай чаттарға қол жеткізе алатынын баптай аласыз. Мысалы: барлық контактіңізбен чаттарды қоспау немесе тек жаңа чаттарға жауап беру.

Бұл Telegram боттары үшін жаңа дәуірді ашады, барлық әзірлеушіні бизнеске Telegram қолданушыларымен байланысын автоматтандыруға және жақсартуға көмектесетін жаңа қызметтер жасауға шақырамыз. Толық ақпарды бот нұсқаулығынан қараңыз.

Telegram алдағы жаңартуларда бизнеске арналған жаңа мүмкіндіктерді енгізетін болады. Қазіргі уақытта барлық Telegram Business мүмкіндігі Premium жазылушыларына тегін қолжетімді. Оларды Баптау → Telegram Business бөлімінен таба аласыз.

2024 жылы 31 наурыз
Telegram командасы